قصة زواج استثنائي الجزء الثامن8 بقلم نور الهدى الموسوي

محمد باقر: فتحت عيوني اني بغرفتي اخوية يمسح المي إلي شمرة على وجهي حتى يكعدني  و اختي تبجي يم رآسي دخل ابوية بإيدة جهاز قياس الضغط انطا لحسين اخوية و قاس حسين ضغطي طبعا حسين يشتغل دكتور تخدير بالمستشفى كلي 

-ضغطك كلش هابط

ابوية صاح بفاطمة اختي كللها سويلة أكل انوب اجة يم رآسي ضل يمسح على شعري كلي

-شفت عقاب رب العالمين مثل ماسلبت من البنية حياتها الحلوة الي كانت عايشتها 

كتلة

- وانتة فرحان مو 

- هذا عقلك المريض يكولك هالشي

اخوية حاجاه كلة بابا خلي يرتاح شوية 

اختي جابت الاكل اكلتلي لكمتين و تمددت إجه اخوية كلي اني طالع محتاج شي

- باجر أريد اكعد لصلاة الصبح 

-اي من عيوني اني اكعدك

حسيتة فرح لزمت ايديه وجريتة الية

-اكلك شي بس لتكل ﻷحد

-احجي خوية

- آني ناسي اشلون أصلي أريدك تساعدني

-من عيوني

باسني براسي وطفة الضوء وطلع 

كعدني لصلاة الصبح وصلى  كدامي وآني وراه أردد كلماته واني مغمض أحس روحي ارتاحت استوني افتهمت شنو معنى الراحة الي يحسوها الناس بعد الصلاة

رحت تمددت طلع اخوية وبعدة بشوية انفتحت الباب دخلت "مينا" بنت اختي بوستني  وكلتلي جوعانة أريد اشتري كلتلها اخذي من المحفظة خمسة انتي والجهال كل واحد ألف اخذت ورجعت بوستني وطلعت دخل أخوية وكعد يم رآسي فسألته

-اذا تبت الله يعفي عني 

أبتسم وكلي رب العالمين رحمن رحيم شوف النبي موسى سأل مرة الله كلة ربي اشكبرها رحمتك كلة  اصعد للجبل صعد شاف ولد ديضرب امه ويكللها كافي مليت منج ابقي هنا اني ما أريدج وتركها ونزل فهي صاحت وراه كلتله يمة اوكف كلها شتريدين كلتلة الجبل طريقة  صعب اخذ البس حذائي لأن أحسن من حذائك سيدنا النبي موسى تعجب كلة ربي شنو هالرحمة كلة و عزتي وجلالي رحمتي أضعاف هذي الرحمة

هنا دخلت اختي شايلة صينية الريوك تضحك كلتلي

- ليش منطي لمينا خمسة خلت الأطفال كلها تتباجة تكللهم خالي اعطاني خمسة بس إلي 

ضحكت 

والله كلتلها انتي والجهال كل واحد ألف بس هذي على أمها

اخوية خرب من الضحك وهية زعلت رادت اتكوم كمشنا بيها نتشاقى وياج

أكلنا اني كعدت اتاملهم كلتلهم

-آني هواية أحبكم

ضحكت اختي كرصت خدي وكلتلي

-آني همين أحبك لك مرات أشوفك مثل بنتي مينا بسوالفك اتضل الزغير لو شو ميكون

ضحك اخوية وكللنا

-تدرون اني شايل على محمد تذكرون لما كنا ازغار كنت اهزة بالمرجوحة و وكع وانكسرت ايدة ابوية شبعني دك وأمي ضلت شهر كامل زعلانة مني

ضحكنة و انفتحت الباب دخل عباس ابن عمي كامل هو رجل عصامي جان وياية من جنت أشتغل بعمليات بغداد بيتهم بالمنصور ضل يحضن بية ويكلي

- أيا ملعون تزوج وماتكلي

ضل يدردش وياية اشوية ارتاحيت طلع ورجع جايب قاط لونه سمائي كلي 

-هذا قاط عرسك ولك شنو لابس قاط اسود بالعقد 

ساعدني البس وسألني

-ليش فصلوك 

اني باوعتلة بتعب بالمراية كلتلة

-خلص بعدين نحجي

كلي

- بكيفك ضلع

غيرت ملابسي ونزلت تلكني النسوان بالهلاهل طيرن اذني

دخلت لﻹستقبال الناس فرحانة وتسلم ابوية كاعد و يهز بيدة عمي أبو عباس كلي 

-بوس ايدة ابوك

اقتربت أريد ابوسها صدني و كام كال

-راح نتاخر

فدك:إجت الزفة وأحس روحي انقبظت دخل محمد لابس قاط سمائي مبتسم كلولة بوس  رآسها وانوب غطوا وجهي ولبسوني عباية كمشت بإيد ابوية وضل لازم إيدي لحدما وصلنا للسيارة (تكولون فلم عادل امام عريس من جهة أمنية)

احنا عدنا اليتزوج يحجز بالفندق بالنجف تبركا بجوار الأمير طول الطريق اني أقرأ بالقرآن  الي انطونيا لما وصلنا كانوا حاجزين سويت كامل دخلت الغرفتي مسكت ايدين أمي كلتلها 

-ماما لا تركيني

-ماما لا تخافين هو مادخلة بيج هذي الغرفة الج و هو الة الغرفة الثانية

تركوني أول ما طلعوا قفلت الباب وغيرت ملابسي فتحت الفون وأخذت رمز الإنترنت  الموجود على الميز دخلتة وضليت اكنك لحد الاذان صليت ولما خلصت دك الباب فتحت كان شايل صينية زغيرة كلي

-هذا عشاج

بالبداية ردت ارفض بس كنت ميتة جوع اخذتة من ايدة أكلت و شبعت طبعا اخجلت ما بقيت شي بالصينية

طلعت لكيتة مكمل أكل و ديباوع تلفزيون خليت الصينية يم أكلة دخلت اكعدت الصبح صليت و ضليت اقرأ قرآن اندكت الباب فتحتها كلي 

-آني رايح تزور أبو الحسن اتروحين وياية

هزيت رآسي بمعنى اي دخلت غيرت ثيابي وطلعت وياه زرنا ورجعنا كلي نأكل هنا بالقاعة  وية الناس دناكل وما أحس إلا أحد لزمني و وكفني كان خالو سالم بوستة 

-شتسوي اهنا

-كلنا اني وشيرين انجدد شوية تعالي اكلي ويانة

تركت و رحت اكلت ويا خالوا النوب اجوي اهلة خالو كلي ادخلي حضري غراضج حضرتهن وطلعنا  رحنا وياهم لبيتهم ذبحوا خروف جوة رجلينا وخلونا اندوس على الدم باحذيتنا انوب دخلونا للصالة اكعدت على الديوان و ولد عمة أخذوا محمد و دبجوا وياه وهم فرحانين ميدرون بسوالف ابن عمهم دخلت لغرفتي  كانت كلش حلوة ومرتبة جبيرة همينة غيرت ملابسي لبست فستان بيجي طويل و سرحت شعري و دخلت للصالة الي فوك كانت مملية  نسوان سلمت وكل ساعة جاية وحدة من كرايبهم لو من جيرانهم وتهلل وتخوي رآسي اجت وحدة وية بنتها هية نفسهة البنية الي اجت بالعقد ما كانت محجبة وامهم شامرة الشالي عل رآسها شمر اول ما وصلت بدون حتى سلام مسكت فستاني وتحرك بي كلتلي

-مين شتريتي

- ما اعرف ابوية اشتراه

-اي زين عاد مو فكر مثل ذيج الناس

تحجي وتباوع لمرة أخو محمد اسمها رباب وردة مال الله والنوب حتى ما بوسني ولا باركت عابت الساعة

11:30 انقطعوا الخطار غيرت ملابسي ونزلت شفت ولد حاجيتة كلي

-ها خوية اتفضلي

-وين المطبخ 

-اهنا وأشرلي

-شكرا شسمك انتة

-كرار أخو محمد الزغير بس مو تكليلة حجيتي وياية ترى هذا مخبل وانوب يتعارك وياية

لا هاي هية حتى وية اخو هيج دخلت وضليت اسولف وية أخواته كلش حبابات وخاصة شهد كلش حبيتها سالتهن 

-منو هالمرة كللي

-مرة خالة ابو رحاب وهذي بنتها رحاب اتكولون جنية اول ماذكرت أسمها دخلت وهنا خربن ضحك كالت 

-أي ضحكني وياجن

-خلصت عيني خلصت اتصير مو حلوة إذا انعادت

كلتلها مرت اخو محمد وهي ردت عليها

-ماحلوة لا موحلوة بس معدان

اهنا كبت العركة دخل محمد واخوه يهدون حسين اخذ مرتة وصعد ومحمد كللها

- ليش هيج رحاب

خلت ايدها على صدرة وتتباجة 

-هن يضحكن علية محمد

اختة أدخلت وبعدتها وهمست شي لمحمد استأذن وراح اني اصعدت لكيت مرت أخوه تبجي و زوجها يهدأ بيها تكلة

-يعني إذا فقرة هيج نتبهذل بعدين هو منو اختارني غير ابوك ليش هيج دائما اسمع منهن هالحجي 

باسها برأسها وكللها

-تصحيح اني وانوب الحجي 

ضحكت و ارتاحت دخلت

 للغرفة لكيت محمد يقرأ قرآن ما يعرف يقرأ كل ساعة و غلط اني ما اتحملت فكعدت اصححلة الخطا لما خلص خلة القرآن بمكانة والتفتلي كلي شكرا صبوا  الغدة اختة دكت الباب و دخلت كنت هسة مخلصة صلاة كلتلنا الوالد يكول خل ياكلون ويانة مو وحدهم اخذت صاية اشتراها  آلية ابوية لما راح قبل ست اشهر عمرة كانت بيجي ومزخرفة من كدام وسودة من الوراء نزلنا وسلمنا وكعدنا ناكل  وياهم شو هاي الأطفال كلها اتجمعت علينا محمد يوكلهم و يضحك وياهم بنت اختة اسمها "مينا" سألته 

-خالو تأخذنا للملاعيب 

-أكيد بس يخف الخطار

ابنة أخوه "جعفر" كلة

-يمتى يخفون

-من تاكلون وتسكتون 

همة ضحكوا كلش يحبونة ويتشاقون وياه حتى الضهر دخلت للغرفة لكيتة نايم وهمة نايمين يمة بس كل واحد بجهة

              الجزء التاسع من هنا

لقراءة باقي الفصول من هنا