رواية حب مكتوب
للكاتبه مي علي
الجزء السادس
كان بقالي فتره طويله معرفش عنه اي حاجه
لحد ما لقيت مروان وبابا داخلين
ومحمود معاهم
عرفت من مروان إن الراجل صاحب البيت اللي كان محمود ماجر منو الشقه ..طرده منها وقالو ان فلوس الايجار زادت اوي واتكسر عليه شهرين ورا بعض
والشقه تلزمو وهو مش عاوز منو فلوس بس عاوزو يفضي الشقه
لكن محمود مرضيش يمشي الا لما دفع كل الفلوس اللي عليه وعرفت انها كانت اخر فلوس معاه ولم حاجته ومشي
مروان لما عرف مسك فيه يجي يقعد عندنا ولما مرضيش
مروان كلم بابا وخلاه يروح بنفسه يقنعه
جه ودخل بصيت عليه
حسيت اني معرفوش الحزن والعجز مغطي وشه ومتبهدل
ماما اول ما جه خرجت سلمت عليه ودخلت جري عشان نحضر الاكل
وقالتلي :
الواد تعبان هيقع من طوله ..لازم نأكله
خرجت حطيت الاكل ...هو حتي مبصليش
بابا قال..
يلا يابني ده بيتك واحنا اهلك اقعد كل لقمه وخش خش خد دوش واوضة مروان كبيره اقعد معاه فيها
قال بصوت مبحوح :
والله يا عمي انا متقل عليكو مش عارف اقلكو ايه ...انتو عملتو معايا اللي اخويا اللي مني معملهوش معايا حتي مسألش عني من ساعة العزا
ماما قالت :
ماتشلش هم يابني ربنا يهون عليك ويكرمك اخر كرم
قال:
يارب عشان انا فعلا تعبت
وحط ايدو علي وشه ووطي راسه وفضل ساكت
وانا قلبي بيتقطع عليه
عاوزه اروح احضنه واطبطب عليه
بابا راح قايم ومقومه وحضنه وقال :
متشلش هم حاجه يابني انا زي ابوك وانت زي مروان عندي
قعدنا كلنا وانا مشلتش عيني من عليه
وخلصنا اكل وهو قام خد دوش ودخل اوضة مروان علي طول
عدي يومين وهو قاعد معانا وكنت هموت واتكلم معاه بس مكنش في فرصه مروان طول الوقت جمبه
تالت يوم لم حاجته عشان يمشي
بابا :
هتروح فين بس يابني
- كفايه كده ياعمي انا تقلت عليكم ، متقلقش اختي هنا ف مصر لسه مسافرتش هروحلها
وهاخد منها مفتاح الشقه اللي ليها هنا واقعد فيها مؤقتا لحد ما ربنا يدبرها
مروان :
وليه يابني ماتخليك قاعد معانا
- معلش يا مروان كفايه كده
- يا ع
قاطعه وقال :
مروان بجد مش هينفع اقعد اكتر من كده انا زعلان من نفسي والله تقلت عليكم
بابا بحزن قاله :
متقولش كده يابنب احنا اهل وعموما ده بيتك ف اي وقت تعالي وانا قولتلك انا زي ابوك وقت ما تحتاجني هتلاقيني
- ربنا يراضيك ياعمي وكتر الف خيركم ... سلام عليكم
وسلم عليهم وهو نازل بصلي بصه متعديش اكتر من ثانيه بس عميقه اوي لدرجة حسيتها ساعه ... ونزل
عدي شهرين بعدها معرفش عنو اي حاجه غير انه كويس وبيحاول يجمع نفسه ويقف علي رجله لان كل الفلوس اللي حوشها صرفها ف يوم وليله
وعرفت بعد كده من مروان انه هيخش الجيش كده خلاص
قولت ف نفسي :
يعني اي هقعد كل ده مش هشوفه
طب هو حتي مسألش عليا
فضلت زعلانه كده وبسمع مروان وهو بيحكي انه خلاص خلص ورقه وهيخش الجيش
وكان عندي تاني يوم اول يوم امتحانات
لما عرفت كده مبقتش عارفه اذاكر ولا اعمل حاجه ولا اركز وكنت هموت بالزعل
بس حاولت ابعد الموضوع عن دماغي وفعلا قدرت ألم الماده
بس انا زعلانه منه
انا عاوزه اشوفه وهو حتي محاولش يطمن عليا
نزلت تاني يوم الصبح الجامعه وكالعاده بدور عليه بين الناس
وصلت الحد الجامعه وداخله
لقيت حد مسكني من دراعي وقال :
ثانيه واحده بس يا انسه ...انتي بتجري ف الشارع مش بتمشي
لقيته هو
انت؟!
- اي انت دي !!! مش مبسوطه انك شوفتيني ولا اي
- لا
- كده طب انا اسف اوي
وجاي يمشي مسكت فيه
- اي استني انت مصدقت
- لا والله مانتي بتقولي انك مش مبسوطه انك شوفتيني
- لا مبسوطه مبسوطه اووي
- ايوه كده وليه مبتجيش الا بالعين الحمرا
خليكي تقيله كده
ابتسما
- مش ه اللي انا عاوزه
- بس مضحكنيش انا زعلانه منك اصلا
- انا عارف انك زعلانه مني بس انتي لازم تقدري ان الفتره اللي فاتت كانت اصعب فترات حياتي وحكاية الجيش دي كمان بهدلتني خالص
- مقدره والله
علي فكره انت
وسكتت
- انا اي قولي
- لا مش هقول
- وحياة سيدك البلوبي لاتقولي
ضحكت وقولت :
الله بقي
- ايوه كد اضحكي ..علي فكره وانتي كمان وحشتيني اوي
بصتله بدهشه :
وعرفت منين اني كنت عاوزه اقول كده
- باين ف عنيكي السود دول اللي هيجننوني يا وزه
- هتروح الجيش امتي
- كمان تلت ايام بس لازم اعمل حاجه قبل ما امشي
- حاجة اي
- هتعرفي بعدين يا وزتي
دلوقتي تدخلي وتركزي ف امتحانك وتخلي بالك من نفسك
عاوز تقدير مش اقل من ملحق سامعه
-هههههههههه
وراح قارصني ف خدي وقالي :
يلا ادخلي
- طيب خلي بالك من نفسك
دخلت الامتحان والحمدلله حليت كويس وخرجت دورت عليه يمكن الاقيه بس مكنش موجود
روحت ولسه داخله لقيته جوه
قلت سلامو عليكو وبصتلو باستغراب
ردو السلام وهو راح غامزلي روحت مسلمه عليه من بعيد ودخلت
- ماما ماما ماما
- اي يا مي
- محمود هنا بيعمل اي
- معرفش هو كلم مروان وقالو عاوزو ف موضوع وبابا موجود
- يادي المصيبه ناوي يعمل اي
- يابت اتهدي متبقيش خفيفه هنعرف كل حاجه دلوقتي
وللمره التانيه محمود طلب ايدي من بابا قبل ما يخش الجيش وبابا بردو مادلوش كلمه بس قالو خلص جيشك ويحلها حلال
مكنش عندي امتحانات تاني غير ف اليوم اللي هو رايح فيه الجيش
نزلت يوم الامتحان لقيته واقف علي اول الشارع
فضلنا ماشيين بعيد عن بعض لحد ما خرجت من المنطقه وقفنا وسلمنا علي بعض
وقال :
انا همشي مش هقدر اجي اوصلك بس كان لازم اشوفك قبل ما امشي
دلوقتي لازم اتحرك خلي بالك من نفسك وركزي ها
- وانت كمان ماشي ولو في اي وسيلة تطمني بيها عليك ياريت تتطمني
طلعت ورقه وقلم وكتت رقم موبايلي
قولتله :
خلي رقمي معاك
ضحك وقال :
انا حافظه من ساعة مكلمتيني محفور ف دماغي
بصتله بحنيه وقولت :
هتوحشني اوي
- يلاهويي ...يلا ابت امشي جتك القرف وانتي حلوه كده امشي
-ههههه حاضر
ومشيت وخلصت امتحان وروحت دماغي مبطلتش تفكير فيه ولا لحظه
وعدي اسبوعين معرفش عنه حاجه ومستنيه اي مكالمه او رساله منه يطمني عليه
لحد ما فيوم موبايلي رن رنة ماسدج
كسلت افتحها بعدين افتكرت انها ممكن تكون منه
جريت ع الموبايل فتحته وقريت الرساله من بره لقيتها من رقم غريب
ومكتوب ف الرساله انا محمود
فرحت اووي اوي
عملت ارشيف للرساله عشان خفت افتحها وهما قاعدين
وحطيت الموبايل واستنيتهم لما نامو عشان افتحها وفضلت افكر ياتري كاتبلي اي
وفعلا لما نامو اخدت تليفومي وقعدت ع السرير وفتحتها وانا قلبي بيرقص جوايا
لقيته كاتبلي ....