رواية حب مكتوب
الجزء الرابع
للكاتبه مي علي
الجزء الرابع
سمعت بابا بيرحب بيه وبعدين قاله...
بص يابني ... انت زي مروان ابني بالظبط ومتربي معاه يعني زي ابني وبردو مي بنتي واي اب لازم يطمن علي مستقبل بنته
دلوقتي يابني .. انت معندكش شقه ومفيش وظيفه ثابته وف اي وقت اخوك ممكن يرجع وتخش الجيش ... يعني الدنيا لسه مستقرتش معاك ... ومي كمان لسه مخلصتش تعليمها
ف مفيش داعي للإستعجال
انا مش هقولك معنديش بنات للجواز والكلام ده بس يابني انا بقول انك لازم تظبط امورك وحياتك تستقر وبعدين تقرر تتجوز سواء مي أو غيرها
صح يابني ولا انت شايفني بتكلم غلط ؟!
- لا ياعمي معاك حق انا بس كنت عشمان اخطبها دلوقتي وف خلال السنتين دول اكون كونت نفسي
- وليه نستعجل يابني ظبط امورك وكل حاجه بتيجي علي مهل وتكون هيا كمان اخدت شهادتها واتخرجت
- اللي حضرتك شايفه يا عمي وانشالله انا هعمل اللي عليا واكافح واعافر عشان أسعدها
- ربنا يراضيك يابني وزي مقولتلك انت زي مروان بالظبط
- ربنا يخليك يا عمي يارب .... طب استأذن انا بقي
مروان قال...
لسه بدري يابني خليك قاعد معايا شويه
- معلش بقي هبقي اجيلك تاني يا صحبي
- طب استني انا نازل معاك
ومشيو
وقفت ف الشباك بصيت لقيتهم نازلين وماشيين بيتكلمو ... انا مش عارفه ازعل ولا افرح
بابا موافقش عليه وف نفس الوقت قاله كون نفسك وتعالي
ماما قالت ...
اتهدي بقي واقعدي .. رجلك موجعتكيش م الوقفه
- ماما انا مش فاهمه
- مش فاهمه اي ؟!
حكتلها اللي بابا قالو
قالت...
طب كويس دلوقتي بقي هنسيبها لله والخير ربنا يكتبه
وطلعنا قعدنا بره وبابا متكلمش معايا ولا نص كلمه وانا كمان مسألتش
وعدي اليوم عادي ... تاني يوم صحيت ونزلت روحت الجامعه
بس غريبه ملقتهوش ف الشارع زي كل يوم
قولت ف نفسي اكيد زعل .. روحت الموقف وبردو فضلت ادور عليه بعيني وسط الناس علي أمل اني اشوفه
وركبت العربيه وانا محبطه ... مبقتش عارفه اعدي يوم من غير ما اشوفه الصبح ... اد اي حنين اوي ... وبيحبني جدا
وانا قاعده كده وسرحانه لقيت حد ركب جمبي وانا محستش اصلا وكنت سرحانه خالص
لقيت اللي جمبي بصوت عالي قال...
اتنين م العشره ورا ياسطي
ببص لقيته هو ... شهقت شهقه عاليه وقولت....
يانهار ابيض انت ؟!
- بس بس هتفضحينا مالك شوفتي عفريت
- لا بس اصل اتفاجئت
- معلش صحيت متأخر ... خوفت تكوني مشيتي ... لبست جري ونزلت ع الموقف .... بصي كده
- اي ؟!
- بصي علي رجلي
بصيت ورحت ضاحكه اووووي كل الناس بصتلي
- يخربيتك وطي صوت ضحكتك دي
- اعمل اي بس مقدرتش اكتمها وبعدين انت مش شايف المنظر ... انت لابس ف الرجل دي فردة شراب قصيره .. والتانيه فردة شراب تانيه خالص وطويله هههههههههههههه
- اعمل اي ملحقتش ادور ع الفرده التانيه ... ما ده كلو عشانك ياختي .. لا ده مفيش تقدير ... خالص ... خالص
قالها بأسلوب ضحكني
ضحكت راح قايل..
ايوه كده اضحكي .... صباح الفل
- هههههه صباح الفل
- فطرتي؟!
- لا لسه ملحقتش نزلت علي طول
- حلو اوي يبقي نفطر سوا
- لا مش هينفع مش هلحق عندي محاضره مهمه عاوزه الحقها
- متخفيش مش هأخرك
وقال السواق يقف ونزلنا علي اول الشارع بتاع الجامعه
قولتله ...
ليه مخليتوش يكمل وينزلني قدام الجامعه
- تعالي بس هنفطر
- هنفطر اي ؟!
- هنفطر هنا .... فول زكريا
- يا نهار ابيض هنفطر علي عربية فول
- انتي عارفه اني من ساعة مدخلتي الجامعه وانا كل يوم اجي وراكي واتطمن انك دخلتي واجي اضرب طبق فول هنا واروح
- هو انت بتيجي هنا كل يوم تراقبني لحد ما ادخل
- لا مش براقبك ... اسمها بخاف عليكي حد يدايقك
بصتلو جامد اوي وحسيت بحنيته وخوفه عليا
قال...
يلا تعالي نفطر ... هفطرك احلي فطار
- انت عارف ان انا نفسي من زمان اكل علي عربية فول
- بس كده ... كل احلامك أوامر يا ست البنات
- والله من زمان بردو ونفسى حد يقولي يا ست البنات
- الله انتي جايباني احققلك أحلامك هنا بقي ولا اي
ضحكت قالي ....
ايوا ده اللي انا عاوزه منك ... انك دايما تضحكي ... ربنا ميحرمني من ضحكتك ابدا
اتكسفت .. قال..
اخلاثي ع الطمطمايه اللي بتحمر فجأة دي
- بطل بجد
- حااااضر ... طب يلا عشان نفطر
وطلب طبقين فول وفضل يهزر مع الراجل اللي كان عارفه
وفطرنا وكان احلي طبق فول كلته ف حياتي
وبعد ما خلصنا
اخدني عشان يوصلني الجامعه
ويدوبك مشي شويه ولقيته بيقولي ...
استني
- اي
- هجيب حاجه من السوبر ماركت
- طيب روح
- لا هتيجي معايا خليكي قدام عيني
- حاضر
للكاتبه مي علي
ودخل جاب حاجات لقيته جايبلي
شوكلاتات وبسكوتات وبيبس
وقالي ..
اتفضلي
- اي دول
- حطيهم ف شنطتك ... عشان لسه يومك طويل ... تأكلي منهم طول النهار حاجات تديكي طاقه
- بس انا مش عاوزه وبعدين انا لسه واكله طبق فول يخليني ماكلش تاني لأخر اليوم
- لا اخر اليوم اي انا عاوزك تطخني كده وتربربي يا ام عمر
- ام عمر ؟! مين ؟! اي عمر ده
- هههههه ابني ... اي اللي عمر ده مش عاجبك الاسم حضرتك
- ومين قالك اني هبقي امه
- يوه علي سدة النفس دي .. هاتي الشنطه اللي اديتهالك هاتي ..
روحت ضاحكه قال ..
ايوه كده بلاش فصلان
- لا بجد انت مسمعتش كلام بابا امبارح
- سمعته اكيد
- طب ومش مدايق
- بلعكس ده اداني طاقه وهكافح اكتر عشان اخدك وتبقي مراتي بس ادعيلي وسيبيها لله
- ونعم بالله
وصلنا لحد باب الجامعه ودخلني وهو بيقول...
خلي بالك من نفسك ها ... لو عرفت اجي اخدك هاجي وهتلاقيني مستنيكي ... ولو معرفتش يبقي عندي شغل فخلي بالك من نفسك وانتي مروحه
للكاتبه مي علي
- حاضر وانت كمان خلي بالك من نفسك
ودخلت وحضرت كل محاضراتي وكنت كل شويه اطلع حاجه حلوه من اللي جابها واكلها وانا مبسوطه اوي
وخلصت وخرجت بس ملقيتهوش عرفت انو اكيد ف الشغل ... دعيتله ربنا يقويه
وروحت
كنت مبسوطه اوي ونفسي مفتوحه ع المذاكره ... وجينا بليل كده نمت شويه
صحيت ملقتش لا ماما ولا بابا ف البيت ولقيت رساله علي الموبايل من ماما بتقولي أنها راحت لخالتي عشان تعبانه شويه
وبابا كان تقريبا لسه ف الشغل
وبعدين شويه ولقيت مروان بيرن يقولي أن هو ومحمود طالعين .... كنت هطير من الفرحه ... هشوفه مرتين ف يوم واحد ... دخلت لبست الاسدال وفتحتلهم
ودخل وهو بيبصلي ومبتسم ابتسامه خفيفه وقعدو
مروان قال...
اعمللنا شاي
دخلت عملت الشاي وقدمتهولهم بصلي وقال ...
تسلم ايدك
بصتله وابتسمت ودخلت
وعدي شويه ومشي ... وقفت ف الشباك بصيت عليه وهو نازل ... لقيته فجأه وقف وسند نفسه علي عربيه قدام باب البيت بالظبط وربع أيده
وبص فوق براحه عشان يشوفني ... وابتسم ... وكان زي القمر .. من كسوفي رحت داخله
دقيقه وبصيت تاني تقريبا افتكر ان حد دخل عليا فمشي
نمت وانا مبسوطه اوي بجد ... بقيت احب اصحي اروح الجامعه
صحيت بدري وكنت فايقه اوي
ماما قالتلي...
مش عاويدك يعني تصحي لوحدك كنتي بتطلعي عيني عبال متصحي
- عندي محضرات مهمه اوي يا مامتي يا حبيبتي
وابتسمت
بصتلي بخبث وابتسمت وقالت ...
محضرات ؟! يابت... طب ابقي سلميلي ع الدكتور
روحت ضاحكه ونزلت
ولتاني مره بردو مشفهوش ف الشارع وانا نازله ... الله بقي
ولسه خارجه من منطقتنا لقيت اللي بيقول ...
نزلي البلوزه
بصيت لقيته هو ...وبيقولي ...
اي ده بقي ... احنا فينا من كده ... لا انا بغير .. البلوزه دي متتلبسش تاني عشان ديقه وقصيره والبناطيل ممكن نغيرها ونلبس جيبه واسعه حلوه
والطرحه ممكن نطولها شويه
وال ال ال لا بصي انتي تتنقبي
ضحكت وقولتله ...
لا والله ما البس شكاره احسن
- حلو ده ومالو لو محدش هيبصلك انا معنديش مانع بس بجد لازم تلتزمي ف لبسك اكتر من كده
- وانت مين بقي انشالله عشان تديني أوامر
- يانهار ابيض يا نهار ابيض انتي مش عارفه انا مين
- لا والله محصليش الشرف
- احم احب اعرفك بنفسي
محمود كامل جوز حضرتك
- نعم!!!
- نمشيها خطيبك مؤقتا
- هههههههه ثواني بس هو انت هتيجي كده كل يوم توصلني
- ايوه .. ولو حكمت اجي اخدك كمان هاجي ... انا بخاف عليكي اوي
وبردو فطرنا عند فول زكريا وجابلي حاجه حلوه ووصلني الجامعه وروحت مبسوطه اوي
ماما اول ما شافتني قالت...
ها اي الاخبار
- تمام الحمدلله
- بقيتي بتحبي الجامعه يعني
- اه بقيت بحب الجامعه وموصلات الجامعه وعربية الفول بتاعت الجامعه وكلو كلو
للكاتبه مي علي
- احكيلي يا لمضه
حكيتلها اللي حصل
قالت...
بصي انا عارفه انك متربيه وتربيتي انا واثقه فيها وكمان هو محترم بس بلاش نزود ف الموضوع ده عشان ميحصلش مشكله يا حبيبتي
- حاضر يا ماما
- ربنا يفرح قلبك يا حبيبتي ويراضيكي
- امين يارب
- اهم حاجه ميأثرش علي مذاكرتك ومستقبلك
- بالعكس يا ماما والله ده بيشجعني وبيخلي نفسي مفتوحه ع المذاكره
- طيب يا حبيبتي انشالله خير
ودخلت اذاكر وانا فعلا مبسوطه اوي ... انا حبيته بجد
عدي علينا سنه بحالها واحنا كده وكل يوم يجي يوصلني وساعات كمان يجي ياخدني وفضلنا كده أحد أيام الامتحانات وكان بيجي يطمن عملت اي
وف الاجازه كنت بقولو علي الايام اللي باخد فيها كورسات وكان بيبقي زعلان اوي انو مش بيشوفني كتير
وبقي بيحوش كتير اوي وبيشتغل
وانا كمان خلصت تالته جامعه ودخلت رابعه
وف اول يوم ف السنه كنت شايفاه قبلها وقالي انو هيستناني بكره كالعاده عشان يوصلني
للكاتبه مي علي
بس ملقتهوش ... عدي اسبوع معرفش عنه حاجه
قلقت عليه اوي ... لا بشوفه ف الشارع ولا الجامعه ولا بيجي البيت
عاوزه اعرف عنه اي حاجه
قولت لماما طبعا ...قالتلي ...
والله ماعرف يا بنتي بس ممكن أسألك مروان عليه
- ياريت يا ماما والنبي
- انتي حبتيه يا مي
- اوي يا ماما اوي
عمري ما هلاقي زيه ف حياتي
وفعلا لما جه مروان وبابا واتغدينا وقعدنا نتكلم
ماما سألت مروان عليه ...
مروان اومال فين محمود مش باين لا يكون جراله حاجه
مروان وشه اتقلب وسكت شويه وقال ...
محمود ف المستشفي....