رواية جنازه بدون ميت
الفصل الخامس
الكاتبه / مي علي
فوقت لقي البطراوي مرمي جمب المكتب وغرقان دم وفيه طعنات ياما
وسكينه غارزه ف قلبه
يا وقعتك السوده يا عاطف
الله يخربيتك
قربت عليه ابص ان كان حي ولا مات
دا مدبوح
ده مين اللي عمل فيك كده يا حزين
الله يخربيتك يا عاطف انت بتقول ايه ميموت ولا يغور فداهيه انت اللي هتلبسها يا عاطف
اهرب منين بس يارب اهرب منين
حاولت افتح الباب بس ولاد الأبلسه كانو قفلينو
حاولت ادور علي اي منط ف الاوضه
وزيحت الستاره اللي ع الشباك كان مقفول وفضلت اشد فيه واحاول أكسره لحد ما اتفح
كان عليه سلك
معرفتش ازوقه
رفعت كرسي من الكراسي وزقيت السلك بيه لحد ما اتخلع
ونطيت
مشايفش حد وطلعت اجري وانا شايل روحي علي قلبي
بلف من الناحيه الورانيه لقيت عرببيات البوليس جايه
نطيت بسرعه من علي حتة السور الصغير اللي كان موارب المخزن
وخدت ديلي ف سناني وطلعت اجري وسط ضلمة الطريق
اروح فين بس يارب زمان البلد كلها عرفت
دبروهالي منهم لله
فضلت اجري لحد ما وصلت لأخر البلد أرض هوو مفيهاش صريخ ابن يومين
رجلي ودتني ع الطريق
وطلعت مع واحد ف عربيه نقل شافني واقف ع الطريق أخدني معاه ف سكته واديتو الخمسين جنيه اليتيمه اللي كانت معايا
نزلت ف بلد بعيده حبه عن بلدنا معرفش فيها حد
فضلت اتلطع ف الطرقات وانا الرعب صايبني وحاسس اني هيمسكوني يكتفوني ويرجعوني للحكومه
معملتش حاجه يارب والله ما عملت حاجه
فضلت ألف ف الشوارع وانا مش عارف حاجه ومكلتش لقمه
كان لازم بأي طريقه أكلم الحاج
لكن لا
اكيد راحو البيت يدورو عليا
استنيت لحد ما الدنيا غيمت
وروحت شحت من واحد دقيقتين
اداني تلفونه كان شاب زيي
رنيت مره اتنين تلاته والحاج مبيردش
رجعت للراجل تليفونه
ولسه هلف عشان أمشي لقيت الراجل بينده عليا :
يا أخ الرقم اللي رنيت عليه بيرن اهو
جريت ونتشت التليفون من أيدو
- ابا الحاج
- عاطف عاطف يابني انت فين يا حبيبي قتبت الراجل يا عاطف
- والله يا حاج معرفش حاجه والله ملمسته
- احكيلي ايه اللي حصل وايه اللي وداك هناك يابني ليه
حكتله اللي حصل
قال :
يا ولاد الأبلسه
- معرفش مين اللي قتلو والله معرف
- أعدائه كانو كتير يابني لابد كان يموت الموته دي ياكش بس المصيبه لابسوهالك وأخدوك غدر يابني
- ابا الحاج انت بتعيط متعيطش يا حاج انا برئ وهرجع وهحكلهم وهما أكيد
- لا لا اوعاك ترجع يا عاطف دبروهالك صح يابني ولقم بصماتك ع السكينه وف كل حته وكل الخلق شهدو انك كنت متعارك معاه قبلها
- سكينة اي اللي بصماتي عليها انا ملمستوش
- والله يابني ده اللي حصل وانا قاعد ايدي علي قلبي لا يجو يطربقو البيت ع اللي فيه
- طب هنعمل اي يابا الحاج هتحبس ظلم
- ولا هتاخد فيه يوم واحد
- اومال اعمل اي بس دبرني يا حاج
- اهرب اهرب يا عاطف اهرب ومتعاودش هنا الا لما الامور تهدي واوعاك تكلمني هنا تاني اوعاك يا عاطف انا خايف يمسكوك يا ولدي
- اهرب اروح فين بس انا معرفش حته الا هنا ومعيش مليم ف جيبي
حتي تليفوني نسيتو ف الارض
- اهم حاجه معاك بطاقتك اهرب واتخفي والباقي يدبر
لولا اني عامل علي انهم ممكن يتبعو التليفون ويجيبو المكالمه دي كنت قولتلك تروح فين بس علي عيني يابني
وفجأه سامع صوت خبط ع الباب
- وصلو يا عاطف الحكومه وصلت خلي بالك من نفسك يابني
اهرب ولا تعاودش الا لما تجلهم غوره مش هسيب حقك يا عاطف وهجيب اللي عمل كده
وقفل السكه ف وشي
- ا الو ابا الحاج
اروح فين ياااااارب
قفلت وانا دموعي بتنزل انا مش عارف اعمل اي
واديت الراجل التليفون
بصلي وقال :
امسح دموعك الشده للجدعان وطول مانت مظلوم ربنا مهيضيعش حقك
انا سمعتك وصعبت عليا وعارف اللي انت فيه
ومش من مصلحتك تستخبي هنا البلد دي علي حسب ما سمعت انها قريبه من بلدك
مؤكد هيفتشو هنا
- طب اروح فين بس
- ملكش حد خالص تعرفو
- مقطوع من شجره
- لولا الظروف كنت خدتك عندي بس عندي حريم والله
- كتر خيرك انا مش عاوز اعملك مشاكل
- اسمع انت تنزل مصر
- مصر !
- ايوه هناك الدنيا توهه ومحدش يعرف حد اداري ف اي مكنه هناك مناطق شعبيه ياما روح واشتغل اي شغلانه واداري ف اي مكنه
انا هديك عنوان واحد قريبنا ف مصر هكلمه واقوله انك عاوز تشتغل ومعكش فلوس تسكن هو مؤكد هيسكنك
- اللهي ربنا يسترك
- خد امسك دول تطلع علي اول قطر تركب وطيران علي مصر
اصطبر اكتبلك العنوان
محل المعلم صباحي الجزار
روحله وهتسلك
- دينك ف رقبتي ليوم الدين
- ولا دين ولا حاجه ياما اتحبسنا يابا خليك شديد يكش انت اللي شكلك غلبان استعفي كده خليك حمقي
بالسلامه يا معلم
سلمت عليه وجريت علي محطة الارض وانا بتخفي حتي من نفسي وركبت القطر
ووصلت مصر قرب الساعه حداشر
فضلت اسأل لحد ما وصلت للعنوان
كانت منطقه شعبيه وزحمه ترمي الأبره فيها متنزلش
ومنوره وكلها محلات
علي ناصية الشارع محل كبير بتاع جزاره واخد ناصيه ومكتوب ع المحل جزارة المعلم صباحي
اهو هو ده
وصلت ويدوبك دخلت المنطقه قامت خناقه واحد من المحل باين صبي جزار ماسك شاب زيي بس رجلو مبتوره ومركب بديل حديد ومش ساعفه يعيني ونازل فيه مرمطه
وعاو يسيب عليه كلابه الصعرانه
والناس واقفه تتفرج
وشكلهم عالم فتوات
من اولها كده بيأوو ع الضعيف
الراجل مرمي ف الأرض عمال يصرخ ويستنجد
الدم غلي ف عروقي
ودخلت وسط الناس وشخط ف الجدع اللي ماسك الكلب وبيهددو بيه ونازل فيه مرمطه
- متلم كلابك يابا هو ادك ولا اكمنه ضعيف
- خليك ف حالك يا حيلتها
مدتلهوش اهتمام
وقربت من الواد :
قوم قوم اتسند عليا قوم
لقيت اللي جاي من وراا :
ايدك لو اتمدتله هقطعهالك
واحد من الناس اتكلم :
يا كلاني معلش شكله غريب عن المنطقه
وبصلي وقال :
اقصر الشر يابني
- اقصر اي يا حاج بيستأو ع الضعيف والراجل مش قادر يقف ومحدش بيحوش عنه
كلاني ده راح مزعق :
وانت مال أهلك يكونش ابنك وانت امه واحنا منعرفش ولا تكونو عاشقين بعض ههههههههههههه
الناس فضلت تضحك
يارب هو انا موعود بالزباله دي طول عمري
لقيته قرب وزقني وهو بيقول :
يلا يلا من هنا بدل مسيبهم عليك
- طب بس متزوقش
ومسكته من لياقته
- انت اد الحركه دي يا روح امك لا انت عاوز تتربي بقي
وجه يرفع ايدو يمدها عليه مسكتها وردتها ف وشو بقلم جامد علي خلقته
وانا بقول:
زعلت ليه ده انا كنت بنضفهالك
- انت بضربني ياض يابن ..........
الناس جريت من قدامه وكل واحد خد ساتر
وهوب لقيت خمس ست صبيان قدامي وافقين بالسواطير وعينهم بطق شرار ..............