رواية جنازه بدون ميت
الفصل التاسع
الكاتبه / مي علي
اكتشفت إن وزه بتخوني
ومع كيلاني
اتجننت وشوفته وهو طالع البيت زي الحراميه بعد نص الليل ودخل شقتي
اتجننت دخلت اوضة لأعرج وأخدت سكينه وطلعت زي المجنون ع السلم
وقبل ما اطلع
لقيت حد مسك دراعي جامد
بصيت لقيت لأعرج واقف قصادي وقال ...
ا انت مجنون س سيب السكينه دي من ايدك
- اوعي سبني
- ا أو عي انت بس تعالي معايا من من غير هلفطه
كان عامل زي المغناطيس بيشدني
وخرجنا من غير كلام
فضلت ماشي وراه كتير اوي
وركبت معاه مطرح مهو رايح وانا مش فاهم هو واخدني فين
لقيت الاوتوبيس اللي ركبناه نزلنا علي كوبري بيطل ع النيل
اه مفيهوش ناس قاعده
ومفيش مراكب والنيل ضلمه
قولتله ...
انت واخدني فين
- تع تع تعالي بس معايا
ونزلنا من الكوبري علي سلم مودي لقعده
خص صغير وفي تحتيه كرسين قدام وحتة لمبه منوره
بصلي وقال ...
اق اقعد
بصراحه المنظر كان مخيف والنيل مرعب كده
للكاتبه مي علي
بصلي وقال ...
اي خايف
- لا مش خايف
- لما دخلت البيت ده حاولت اشدك من غرقه ف ضلمة النيل ده بس انت مسمعتش مني
- النصيب بقي هنعمل اي
- انا قولت زيك كده النصيب بس لا ده اختيارنا
- اختيارنا أز
اي ده اي ده ثواني بس انت بتتكلم كويس اهو مبتهتهش حتي انت كنت بتكدب عليا
- ده المكان الوحيد اللي قعدة لساني بتتفك فيه
انا مكدبتش
مسافة ما اقوم من هنا لساني بيتكهرب
انت الشخص الوحيد اللي دافع عني بعد ما خسرت كل حاجه
- انا عارف ان وراك حكايه انا عاوز اعرفها
- انا جايبك هنا عشان احكيلك
كنت عاوز تودي نفسك ف داهيه عشان واحده خاينه
كنت متوقع منها اي
- علي رأيك
- عملتو سابق
- قصدك اي
- عندك وقت تسمع حكايتي
- جدا
- كنت متجوز كان بقالي خمس سنين
ست ولا كل الستات طيبه وبتخاف عليا وبتحبني
وربنا كرمنا ببنت
مكنتش مديها حقها ف اي حاجه سمحت للملل والفتور يخش بنا
كانت بتهتم بالبيت والبنت واهملت شويه ف نفسها
وانا زي زي اي راجل طفس
ابتديت امل وازهق
وادور علي حاجه تملي عيني
- وبعدين
- كان لسه محل الجزاره بيفتح
كنت ساكن ف البيت اللي قصادهم علي طول
البلكونه ف وش بلكونة المعلم
وظهرت هيا
- مين ؟!
- الوزه المنتوف ريشها مع كل واحد شويه
ابتدت تلاغيني بالعنين والنظرات
وكانت بنت ولا كل البنات زي ما شدتك كده
اتعلقت بيها
لدرجة اتمنيت اتجوزها
شهرين وانا داير وراها عشان تبل ريقي بكلمه
وهي ساعه تلاغي وساعه تكرف
لحد ما فتحتلي المجال شويه
شوفت معاها حنيه ودلع من بعيد لبعيد كده
قولت اومال لو اتجوزتها هتعمل فيا اي
واتعرفت ع المعلم طبعا بحكم اننا جران وبحكم إن كان غرضي اتجوزها
وفضلت انا وهيا زي السمنه ع العسل كده ومش منتبه لا لمراتي ولا لبيتي
لحد ما فيوم اختفت
ومعرفتش عنها أي حاجه
يومين ورا بعض فص ملح وداب
بعد اليومين
صحيت من عز النوم علي ترزيع الباب جامد
قومت اشوف مين
مراتي والبت اتصرعو
لقيت المعلم ورجالته سحبوني زي الخروف
وجرجروني ف الشارع
ونزلو فيا ضرب
عدموني العافيه
- لي كده؟!
- مش هتصدق عملت اي
- قول بس
- ههههه اتقدملها عريس ورفضت بالتلاته كان لي مصالح مع ابوها وهيا رافضه
ولما ضغط عليها فضلت تعيط واعترفتله انها مش بنت
وطبعا كان هيموتها بس كان عاوز يعرف مين عمل فيها كده
ولبستهالي انا
- ازاي مش فاهم ؟؛
- زي ما بقولك كده
ده اللي عرفتو منها بعدين لما ضربوني وكانو عاوزين يحبسوني وحلفتلهم ايمنات الله انو محصل
لكن ستفوها صح وهيا قالت إن انا
يا جدعان طب فين وازاي ابدا
وجابوني من افايا وكتبت عليها غصب
عشر رجاله واقفين قصادي والحبس ده غير سمعتي اللي بقت علي كل لسان والشهود اللي شهدو اني كنت اعرفها وعلي علاقه بيها
يومها خسرت كل حاجه مراتي اللي خدت بنتي ومعرفتلهاش طريق غير من قريب
وكرامتي وسمعتي ف شغلي
يوم جوازي حطو السكينه علي رقبتي ومضاني علي شيكات معرفش اسددها طول حياتي
للكاتبه مي علي
- زي ما عمل معايا
- ايوه واتجوزتها وعرفت بعد كده انها كانت بتحب واحد وضيعها وهرب فلبستهالي عشان ميقتلهاش
روحت قولتلو الكلام ده تخيل قالي اي
- اي
- انت مش اتجوزتها خلاص أن الله ستار حليم
- ههههههههههه حلو اوي الكلام ده
تاجر مخدرات ياعم
- اهو تاجر المخدرات ده ذلني ذلة الكلاب
كان رجالته محوطني من كل مطرح
وعرفت حقيقته واجبروني اشتغل معاهم
انا مرضتش وروحت بلغت عنه
وعن الاماكن اللي بيخبو فيها البضاعه
ودخل الحبس وهو يوم واحد وطلع معرفش ازاي
- هههه زي يوم القسم كمل
- ويدوبك خرج من هنا واتاخدت ضربه علي دماغي ف نص الحاره ومحدش حاش عني
وسحبوني علي مخزن وضربوني بالكرباج
وجه هو بصلي ف عيني وقال ...
رجلك دي اللي رحت بلغت بيها عني أنا هقطعهالك
وفعلا بالساطور وشالها زي مانت شايف
سابني برجل ورجل
وقالي انو لو اتكررت تاني هيقطع مني حتت ويرميها للكلاب
وجابلي حد ف البيت عالجني
ووداني بعدها المستشفي قال السطور وقع علي رجلي
وجابت غرغرينا ف قطعوهالي
وركبلي دعامه حديد تعوض مطرح رجلي اللي انقطعت
- وبعدين
- وبقيت زي مانت شايف اشرب عشان انسي
وبعدها ظهر كلاني والهانم حطت عينها علي واحد من الشمامين
وطلبت أطلقها وخالاني طلقتها
ورماني تحت ف البدروم عشان مغبش عنه
وأمر كلاني يأدبني زي مانت شفت كده
وسنين وانا بتذل
لحد ما حس اني خلاص مفيش مني رجا
وبقي يسيبني انجر ف اي داهيه
وبالذات لما ظهرت انت
استغليت حمايتك ليا اخيرا بقي عندي فرصه ادور علي مراتي وبنتي
- ولقيتهم
- لقيتهم ايوه بعد عذاب
كبرت مريم عارف يعني اي تشوف بنتك من بعيد ومتقدرش تاخدها ف حضنك
بموت كل يوم وانا واقف زي الشحاتين بشحت النظره منها
لدرجة مره قربت منها وهي متعرفنيش
بصتلها
وبصتلي كتير اوي وكانت واقفه وسط زمايلها
جت ولقيتها بتديني ف ايدي فلوس حاجه لله
ومشيت
دموعي مسحت الاسفلت
غلطه ونظره حقيره ونزوه ضيعت كل حاجه حلوه ليا
- يااااااه ده الحال من بعضو الفرق بس بيني وبينك اني انا كل حاجه حلوه بحياتي اخرتها خزوق
- لحد امتي هنفضل كده لازم حل
- هنعمل اي بس
- انا عندي فكره جهنميه ننتقم بيها لنفسنا وهتوفر علينا حاجات كتير اوي جايه وهتمهدلك فرصه انك تعيش حر
للكاتبه مي علي
- اي هيا
- انك تموت
- نعم !!!!
- اسمع زي ما بقولك
- ازاي ده عاوز تموتني
- ع الورق بس انا أو انت مش هتفرق المهم لازم حد فينا يتمحي من علي وش الدنيا عشان نعرف نتصرف
- ابتديت افهمك بس وضح اكتر
- حد فينا لازم يموت والكل يصدق انو مات
وانا بقولك انت احسن لأسباب كتير هفهمالك بعدين
- تمام
- المهم دلوقتي هيتنصب عزا والكل هيصدق
وهتبقي في جنازه
جنازه بدون ميت ..