اندفعت تجري وتجري بجنون و هي تتلفت حولها برعب تتخبط في الظلام الحالك
الذي يلف كل شئ حولها لترى بصعوبه امامها ارض صحراويه
لا نهائيه مزروعه بكثافه بنباتات طبيه غريبه ذات رائحه نفاذه قويه وخاليه من اي بشر قد تحاول الاستنجاد به
لتسقط فجأه على ركبتيها بقوه ودموعها تنهمر بغزاره بسبب ارتدائها لحذاء سهره عالي الكعبين يعوقها عن الركض فتتخلص منه سريعا ثم تركض حافية القدمين
يساعدها انها ترتدي ثوب سهره قصير جدا لا يعوقها عن الحركه او الركض ..فركضت وركضت دون توقف حتى لهثت من شدة التعب وهي تشعر بألام لا تطاق بسبب اشواك النباتات التي تخترق جسدها من شدة ارتطامها بها وهي تحاول الهرب ثم تسقط مره اخرى و تنتفض رعبا وهي تستمع برعب لأصوات الكلاب الشرسه التي تطاردها يرافقها ضحكات مجنونه لرجل وهو يقول بصوت عالي باستمتاع سادي مجنون
= يلا يا ملك قدامك دقيقتين بالظبط وهطلق الكلاب وراكي استعدي ياروح قلبي
ليتابع الضحك بجنون
= شوفتي انا كريم ازاي وهسيبلك دقيقتين بحالهم علشان تعرفي غلاوتك عندي كبيره أد إيه
ليزداد رعبها وهي تستمع اليه يبدء العد ببطئ واستمتاع قبل ان يحرر فجأه الكلاب خلفها قبل ان ينتهي من العد
شعرت باختناق انفاسها بداخلها و هي تزيد من سرعة ركضها وانفاسها تتلاحق بسرعه ونبضات قلبها تعلو وتعلو حتى كاد قلبها ان يتوقف عن النبض من سرعة نبضاته واصوات الكلاب الشرسه تطاردها بجنون
و هي تتلفت حولها و تكتم انفاسها برعب وشعورها بقرب مغادرتها للحياه يتزايد بقوه مع اقتراب صوت مطاردها الزي يضحك بجنون وهو ينادي عليها ببطئ
واستمتاع سادي
= مل ااااك.. كووكي ..روحتي فين
اظهري يلاا ..الكلاب عاوزه تتعشا..أنا بقالي يومين مجوعها علشان اللحظه الحلوه دي
ثم بدء في الضحك بجنون ونباح الكلاب يتعالى و الصوت يقترب منها بشده وسرعه
شعرت ملك بالرعب وهي تتعثر فجأه في طرف حبل غليظ ملقي على الارض تجاهلته وهي تندفع هربآ بين النباتات وهي جاثيه على ركبتيها محاوله الهرب من الموت الذي يلاحقها بقوه لتجد نفسها فجأه بالقرب من بئر ماء قديم يستخدم لري المزروعات في هذا الجزء البعيد من الصحراء ..
نزلت ملك البئر سريعا و هي تتلفت حولها برعب ثم ألقت نفسها بسرعه بداخله يساعدها جسدها الهزيل شديد النحافه
وهي تتوقع امتلاء البئر بالماء و موتها غرقا الا انها تشعر انه سيكون ارحم لها من الموت تمزيقآ بين انياب كلاب زوجها الشرسه والمتوحشه
تئوهت بضعف وهي ترتطم بقوه بارض البئر الصلبه الخاليه من الماء والمغطاه بنباتات ذات رائحه نفاذه قويه
تلفتت حولها وهي ترى الظلام يلف كل شئ امامها وتساقطت دموعها وهي تشعر باليأس الشديد يسيطر عليها وبدأت تتلو الشهاده بضعف وانهزام و دموعها تنهمر بشده وهي تجد ان حتى فكرة الموت غرقا الاكثر رحمه تضيع منها
تساقطت دموعها برعب وهي تتلمس جدران البئر بخوف و الظلام الدامس يحيط بها من كل جانب مع اقتراب اصوات الكلاب بشده من البئر المختبئه به ..وشعرت
بالاختناق وباليأس وهي تحاول تغطية جسدها بالنباتات التي يمتلئ بها اسفل البئر المهجور في محاوله يائسه منها للاختفاء عن عيون زوجها وهي تدرك عقم محاولتها لان الكلاب تقتفي اثرها عن طريق حاسة الشم القويه لديها
ارتجفت ملك برعب وهي تستمع لصوت زوجها وهو يقول بتسليه مريضه
= ايه يا كوكي هتفضلي مستخبيه مني كده كتير.. انا كده هزعل وانتي عارفه نتيجة زعلي ايه
كتمت ملك أنفاسها برعب وهي تشعر بالكلاب تقترب من البئر وهي تنبح بشده وتلتف حوله وهي تتشمم المكان دون ان تستطيع ان تتعرف على رائحتها التي أخفتها رائحة النباتات الطبيه العطريه النفاذه و التي تغطي نفسها بها لتشعر بالراحه وهي تستشعر ابتعاد اصوات الكلاب وهي تنبح بشده وتتجاوز البئر دون ان تتوقف بجانبه ويمر بعض
الوقت و صوت نباح الكلاب يبتعد ويبتعد عن مخبئها حتى كاد ان يختفي تماما..
وفجأه... شعرت بالضوء يغمر المكان من حولها فتجمدت من شدة الرعب وهي تتخيل انها اصبحت في عداد الموتى لامحاله و أن زوجها استطاع اخيرا اكتشاف مكان إختبائها
فتوقفت عن التنفس بترقب وخوف وهي تدرك انه يبحث عنها بداخل البئر وهو يسلط مصباح يدوي صغير يحمله ويديره لاسفل البئر يتفحصه بدقه الا انه لم يستطع ان يراها بسبب النباتات الكثيفه التي تغطي جسدها بالكامل وتحجب رؤيتها عنه
ارتجفت برعب وهي تكتم انفاسها وقد أدركت انه لا يستطع ان يراها لترتجف وهي تستمع اليه يصرخ بغضب مجنون
= الكلاب جعانه بقالها يومين.. فاكره اني هاسيبها اكتر من كده من غير أكل..دي تمنها أغلى منك إنتي واللي خلفوكي..
ارتعشت برعب وهي تسمعه يواصل الصراخ بصوت عالي غاضب مجنون
= انا مش فاهم انتي بتهربي مني ليه انا دافع تمنك بالكامل لأبوكي يعني كلك ملكي..حياتك ..مستقبلك ..موتك
وأنا بس اللي أقرر تموتي أو تعيشي أو حتى أحرقك حيه إنتي ملكي زيك زي الكلاب اللي بدور عليكي دي بالظبط
ليتابع بغضب..
=وبعدين مش تحمدي ربنا انك هتموتي وانتي مرات سامح بيه الانصاري..
هتموتي و انتي هانم بدل عيشة الخدامين اللي كنتي عيشاها قبل ما اعرفك ..
ليتابع بسخريه مقيته
= دا انا كنت ناوي أعملك عزا وصوان كبير و اللي باقي منك هيندفن في قبر فخم لا انتي ولا اهلك كنتم تفكرو تتدفنو فيه وبعد ده كله برضه عاوزه تهربي ..
ليتابع بغضب اكبر
= انا عارف انتي مش عاوزه تموتي ليه عاوزه تروحي لقاسم حبيب القلب وتستنجدي بيه وتحكيله على كل اللي بينا
ليقوم بتقليد لهجتها بحقد وهو يدور بجنون حول البئر يزيل النباتات وهو يبحث عنها
إلحقني يا قاسم ..سامح من يوم ما إتجوزته وهو بيضربني و بيعزبني
سامح بيضحك عليك و بياخد فلوس منك وبيصرفها على الستات و المخدرات ويقولك اني انا إلي باخدهم منه عشان اوافق أكمل معاه..
سامح طلع مش راجل و ملمسنيش لحد دلوقت
ليصرخ فجأه بجنون وهو يقول باحتقار
=بس انا راجل غصب عنك انتي وقاسم حبيب القلب وأظن انا خليتك تشوفي بعنيكي انا راجل ازاي وانا بعاشر ستات كتير تانيه قدام عنيكي
ليتابع باحتقار
= انتي بس الي بقرف اقرب منها انتي بس الي متعتي الوحيده اني افضل اعذب فيها لحد ما أشوف دمها سايل
قدام عينيا بحس بنشوه ومتعه غريبه وانا شايفك بتتألمي من شدة العذاب
بس خلاص زهقت منك وعاوز اجدد واجيب واحده جديده مكانك وعشان كده لازم تموتي ..
ليتابع بساديه وقسوه وهو مازال يصرخ
= وعشان انا قررت انك تموتي يبقى هتموتي فاهمه هتموتي والصبح مش هيطلع عليكي الا وكلابي واكله وشبعانه من لحمك
ليتابع بغضب وهو يركل جدار البئر الخارجي بقدمه
= فاكره اني هطلقك كده بالساهل ..
فاكره اني هسيبك تفضحيني عند أهلي
إوعي تكوني فاكره ان الكلاب مش هتقدر توصلك حتى لو كانت ريحة الزرع مغطيه ريحتك ومخليه الكلاب مش قادره
تتعرف على مكانك ..بس الصبح قرب يطلع وهقلب المزرعه عليكي و هلاقيكي ..بس ساعتها هتتمني الموت الي بقدمهولك مش هتلاقيه..
انتفضت ملك برعب وهي تسمعه يركل البئر بغضب شديد وهو يصرخ بجنون
هقتلك يا ملك هقتلك حتى لو كان ده اخر حاجه هعملها في حياتي
ارتجفت ملك برعب وهي تستمع اليه يصرخ ويهزي بطريقه قد اعتادت عليها منذ زواجها منه
ليقاطع صراخه ارتفاع رنين هاتفه الجوال فجأه لتستمع ملك اليه
وهو يقول بغضب
= قاسم ..وهو ده وقتك انت كمان
استنشق سامح الهواء بقوه اكثر من مره وهو يحاول تهدئة انفاسه قبل ان يجيب على الهاتف بصوت ضعيف مهزوز وهو يحاول ان يوحي لمن يحدثه انه كان يبكي و منهار من شدة الحزن
= قاسم .. إلحقني ملك سقطت نفسها موتت ابني الي في بطنها علشان انت رفضت تديني الفلوس الي هي طلبتها مني..
ابتسم سامح بخبث وهو يستمع الى إجابة محدثه
ثم تابع اصدار صوت كالبكاء وهو يتظاهر بالانهيار
= انا عارف انك حذرتني منها وقولتلي انها متجوزاني علشان طمعانه في فلوسي .. إنت كان عندك حق في كل إلي قلته عنها..
تساقطت الدموع من عين ملك وهي تشعر بتمزق قلبها السازج من شدة الحزن والألم و هي تستمع لحديث زوجها السئ
والمهين عنها مع ابن عمه ..قاسم الانصاري كبير عائلة الانصاري
لتغمض عينيها بألم وهي تستمع لزوجها يضيف بغضب
= انا لسه فاكر كلامك ليا عن أصلها الواطي و إن الي زيها يدوبك ينفعوا يخدمونا وبس و مستحيل تنفع تشيل اسم عيلتنا ولا ولادي ينفعوا يشيلوا اسمها ..انت كان عندك حق الي زيها متنفعش تكون غير خدامه لينا وبس ...
ليتابع وهو يتظاهر بالبكاء
= بس انا برضه بحبها ومقدرش استغنى عنها حتى بعد ما عرفت انها أجهضت نفسها و موتت ابني وهتسيبني علشان مقدرتش أوفر لها الفلوس إلي طلبتها
انا حاسس اني بموت يا قاسم ..ملك موتت ابني وعاوزه تسيبني...
خلاص مبقاش يهمها حاجه غير الفلوس وبس ..بتهددني اني لو مجبتلهاش الفلوس الي هي عوزاها هتطلب الطلاق وتسيبني
ليصرخ فجأه وهو يدعي البكاء
= لو ملك سابتني انا هموت نفسي سامع يا قاسم هموت نفسي .. انا بحبها.. بحبها ومقدرش اعيش من غيرها ابعتلي الفلوس يا قاسم ابعتها علشان أديها لملك علشان متسبنيش علشان خاطري يا قاسم ابعت الفلوس انا عارف اني اخدت منك كتير بس دي أخر مره هطلب منك فلوس علشان خاطري وافق ..
ليتابع بانكسار
= انا عارف انك بتكرهها و تحتقرها ومكنتش عاوزني أتجوزها علشان مش من مستوانا بس انا بحبها ومقدرش استغنى عنها
ابتسم سامح بانتصار وهو مازال يتظاهر بالبكاء
ربنا يخليك ليا انا عارف انك مستحيل تتخلى عني و اوعدك ان دي هتكون اخر فلوس أخدها منك وأديهالها
ثم أضاف بخضوع
حاضر..حاضر بس انت رجعت من السفر امتى.... حاضر يا قاسم حاضر انا بكره هكون عندك وهعمل كل الي تقولي عليه ...مع السلامه
اغلق سامح الهاتف وهو يبتسم بخبث وانتصار ..ابتسامه تحولت الى ضحكات مجنونه عاليه وهو يقول بانتصار
وكده قاسم هيبعت الفلوس و أدلع أنا نفسي بيها وبعدها طبعا اكتشف ان ملك روح قلبي ماتت واتصدم واطلع على
اوربا اتفسح كام شهر واتعالج من الصدمه القويه دي ..ولما ارجع اشوف واحده تانيه العب معاها نفس اللعبه
ليتابع بتفكير
=و بكده يبقى كارت ملك اتحرق ولازم اتخلص منها قبل ما تفضحني عنده.. انا اخدت منه فلوس كتير وانا مفهمه اني بديها لملك علشان ترضى تعيش معايا و الكذبه بتاعة انها حامل وسقطت نفسها دي كانت اخر محاوله مني علشان اقدر اخد فلوس من قاسم وبعد كده مش هيرضى يديني فلوس تاني وهو فاكر ان ملك هي الي بتاخدها يبقى كده خلاص دور ملك انتهى وحياتها كمان..
ليصرخ فجأه
= انتي فين يا بنت الكلب خلصيني ورايا سهره كبيره وهتبوظ بسببك
اندفع سامح بغضب يحاول العثور عليها ثم توقف فجأه وهو يشعر بدوار و ببدء نوبة الصرع التي تنتابه ما بين وقت لأخر ..ليحاول التمسك بحافة البئر ولكنه يفشل فيحاول الجلوس على حافته وهو يشعر بدوار يكتنف رأسه وتشنجات تستولي على كل عضلات جسده ليختل توازنه فجأه ويسقط بعنف
بداخل البئر بعد ان فقد وعيه وجسده ينتفض بشده وهو يضغط على فمه بقوه حتى سالت الدماء منه
في حين تجمدت ملك رعبا وهي تشعر بوزن ثقيل يلقى فجأه فوقها وهو يهتز بشده
رفعت ملك رأسها قليلا بخوف وهي ترى زوجها ملقي فوقها تنتابه تشنجات قويه وهو شبه غائب عن الوعي
تنفست ملك بتوتر وهي تحاول الابتعاد عنه بخوف و رعبها صور لها انه نجح في العثور عليها الا انها أدركت فجأه انه يتعرض لاحدى نوبات الصرع الكثيره التي تهاجمه فجأه بين الحين والأخر لتدرك انها فرصتها الوحيده للنجاه من المصير المظلم الزي ينتظرها ...
إنتفضت سريعا وهي تبتعد عنه بخوف وتقرر تسلق جدار البئر فتحاول تسلقه اكثر من مره وتفشل وهي تراقب زوجها الغائب عن الوعي برعب خوفا من عودته لوعيه
حتى استطاعت تسلق الجدار بنجاح و الانطلاق سريعا الى الفيلا الخاصه بهم في محاوله منها للبحث عن مفاتيح اي سياره من السيارات التي يمتلئ بهم جراج الفيلا
ركضت ملك سريعا الى الفيلا الخاليه وهي حافية القدمين وقدمها تنزف الدماء بشده بسبب الاشواك والنباتات القاسيه التي داست فوقها حافيه وهي تحاول الهرب من زوجها ..
نظرت حولها بخوف وهي تقرر البحث في غرفة المكتب فتجاوزت المدخل سريعا وهي تدخل مباشره اليها وتبحث عن مفاتيح السياره في ادراج المكتب
لتفتح كل الادراج تقريبا حتى وجدتهم ملقيين باهمال في اخر درج
لتتتنهد بارتياح وهي تتناول مفتاح السياره وعينيها تلتمع بالدموع وهي تقول بخوف
= الحمد لله لقيته بس يارب اعرف اسوق العربيه واخرج بيها من هنا قبل ما سامح يفوق..
تناولت مفتاح السياره وهي تنظر من نافذة المكتب ناحية المكان المتواجد به زوجها لتتفاجأ بزوجها يتجه بضعف نحو المنزل وهو يترنح من تأثير نوبة الصرع التي انتابته
تلفت ملك حولها برعب ودموعها تتساقط من شدة الخوف
= دا فاق و جاي على هنا أعمل إيه
انا لازم اهرب من هنا قبل ما يوصل
نظرت حولها برعب تحاول تقرير ما ينبغي عليها ان تفعله وهي تستمع اليه يدخل الى بهو الفيلا وهو يصرخ عليها بصوت ضعف
= عاجبك الي حصلي بسببك والله لاندمك يا بنت الكلب على كل الي عملتيه فيا و النهارده برضاكي اوغصب عنك هتكوني عشا لكلابي
اندفعت ملك برعب تتسلق حاجز النافذه و تقفز منه بدون تفكير من شدة خوفها لتجد نفسها ملقاه على العشب وساقها ملتويه و تؤلمها بشده من قوة اندفاعها الا انها تجاهلت الالم وهي تجري وتقفز بساق واحده في اتجاه السياره في محاوله منها للهروب وهي تستمع لسباب زوجها و صراخه المجنون وهو يقف في نافذة الغرفه يتابع محاولة هروبها يصاحبه صوت الكلاب التي تندفع و تقترب من مكان وجودها بشده
نظرت ملك برعب للسيارات الكثيره المتواجده في جراج الفيلا وهي تضغط بسرعه وخوف على مفتاح السياره في محاوله منها لمعرفة السياره التي يخصها المفتاح الذي بحوزتها
لتندفع برعب وخوف الى السياره التي سمعت منها استجابه للمفتاح وهي تنظر خلفها للكلاب التي علا نباحها وهي تندفع نحوها بشراسه وقوه
لتدخل سريعا الى السياره وتغلق الباب خلفها أليآ
في حين اندفعت الكلاب تهاجم السياره بشراسه شديده وهي تحاول تشغيل السياره بيأس ورعب لتتفاجأ بتطاير زجاج النافذه التي بجانبها وتفتته تحت ضربه قويه من عصاه غليظه يحملها زوجها
ويده الاخرى تندفع بقوه داخل السياره وتطبق على عنقها بشده وهو يحاول خنقها بقسوه شديده ..
تلوت ملك بقوه وهي تحاول دفع يده عنها الا انها فشلت وهي تستمع اليه يضحك بجنون و يقول باستمتاع سادي
= موتي ..موتي يا ملك .. موتي ومتقاوميش ..موتي وخليني أدفن سري معاكي
شعرت ملك بستاره سوداء تستولي على رأسها وهي تشعر بان عنقها يكاد ينكسر تحت ضغط اصابعه وهي تحاول التنفس و تفشل فتمتد يدها تحاول ابعاد يديه بيأس عن عنقها وهي تشعر بدنو الموت منها فتقوم بيأس باداراة السياره وهي تقريبا لا ترى شئ أمامها .. الا ان وللعجب استجابة السياره لها وهي تندفع للامام بقوه ويد زوجها تحاول التشبث بعنقها الا انه يفشل وهو يراها تندفع بالسياره الى خارج الفيلا ليصرخ بغضب مجنون وهو يتجه الى سياره اخرى محاولا اللحاق بها
اندفعت ملك الى حديقة الفيلا وهي تقود السياره بسرعه و تقريبا لا ترى شئ امامها الا ان تشبثها بالحياه و الامل بقرب نجاتها جعلها تستفيق سريعا وهي تصطدم ببوابة الفيلا بقوه فتتجاوزها بسرعه وهي تتجه للطريق السريع في محاوله للهرب من زوجها الذي يندفع خلفها بسياره دفع رباعي قويه وهو يحاول الاقتراب منها
ملك برعب
= يارب انا مليش غيرك وانت المنتقم الجبار انقذني منه انا خلاص مبقتش قادره اقاوم اكتر من كده
لتتفاجأ بصدمه قويه للسياره من الخلف تتبعها صدمه من الجانب لتدرك ان زوجها يريد ان يتسبب في انقلاب السياره واخراجها عن الطريق زادت
ملك من سرعة السياره وهي تحاول الهروب منه الا انها فشلت وهو يصدمها مره اخرى بقوه أكبر
فتحاول السيطره على السياره التي مالت بقوه وهي تحاول الابتعاد عنه الا انه صدمها من الجانب مره اخرى بقوه اكبر جعلت سيارتها تلتف بخطر اكثر من مره حول نفسها ثم تحيد عن الطريق وتنقلب بشده فوق الرمال
ليصرخ بجنون وهو يشاهد انقلاب سيارة ملك فوق الرمال وهو يقول بانتصار
اخيرا هتموتي .. اخيرا هتموتي يا بنت الكلب
ليقاطع صياحه المنتصر صوت تنبيه من زامور قوي ومرتفع ليتفاجأ بسيارة نقل ضخمه أمامه حاول ان يتفاداها بسرعه وهو يصرخ برعب الا انه فشل
وسيارته تندفع بقوه تجاه سيارة النقل المحمله بوقود و تنفجر من شدة اصطدامه بها ..
لتنتهي حياته بأكثر الطرق مأساويه
بعد مرور إسبوع..
استلقت ملك التي تغطي الجروح و الكدمات جسدها و وجهها على الفراش في المشفى الذي نقلت اليه بعد ان نجت بأعجوبه من حادث السياره الذي دبره لها زوجها وذلك بعد ان قفزت من السياره التي كانت تقودها قبل انقلابها الكارثي بثواني
لتستمع بتعب الى نعمات زوجة والدها المتوفي والتي مازالت تتمتع بمسحه من الجمال زال بفعل الفقر والحاجه وهي تقول بغضب
= إرتحتي..كل شويه تحاولي تهربي منه و تقولي بيضربني ويعذبني وكنتي عاوزه تتطلقي منه.. أهو مات وسابلك الدنيا كلها والقرشين اللي كنا بناخدهم على حس جوازك منه ضاعوا هما كمان
تجاهلت ملك صياح زوجة والدها الغاضب وهي تسمعها تتابع بغضب
=اللي يغيظ اكتر انه طلع مفلس ميملكش حاجه كل الفلوس و الارض والخير الي كان زذاللنا بيه ملك ابن عمه قاسم اللي كان بيصرف عليه و علينا واحنا منعرفش..
لتجلس بغضب وهي تتتابع بحسره
=يعني مفيش حتى ورث هتورثيه منه وكده يبقى خسرنا كل حاجه وخرجنا من المولد بلا حمص
لتتابع وهي تتأمل ابنة زوجها الراحل بغضب
=طول عمرك فقريه و نحس ومش وش نعمه قعدتي تتبطري على النعمه اللي كنت فيها لحد مازالت من وشك وأنا الي قلت خلاص هنودع الفقر ونقب على وش الدنيا بس المنحوس منحوس
لتتابع بحسره غاضبه
=وشكل أهله هما كمان زي ما يكون ماصدقوا رموكي هنا و من يوم الحادثه مسئلوش عنك
لتتابع بغيظ
=دا انا حتى روحت أعزيهم في جوزك طردوني ورفضوا يدخلوني الفيلا زي ما يكونوا مستعريين مننا بس برضه مش هسيبهم قبل ما ناخد حقنا منهم حتى لو كان جوزك ميملكش حاجه فهما عندهم كتير ويقدروا يراضوكي بأي حاجه
نعمات باستنكار غاضب
=انتي ساكته ومبترديش عليا ليه.. ايه هفضل أكلم نفسي كده كتير
ملك بتعب
=عاوزاني أقولك إيه !!
نعمات بغضب
=عوزاكي تقوليلي هنعمل ايه في مصيبة موت جوزك وخروجك من الجوازه الفقر دي من غير ولا مليم
تساقطت دموع ملك بتعب
=انا مش عاوزه حاجه منهم انا عاوزه امشي واسيب البلد دي كلها وانسى كل اللي حصلي فيها
وقفت نعمات وهي تصيح باستنكار
=نعم تمشي ..تمشي تروحي فين .. ويعني ايه مش عاوزه حاجه ..ده حقك ولا يمكن نتنازل عنه
ملك بغضب
=انا مليش حقوق وانتي عارفه كده كويس ..هو اشتراني منك ودفع تمني وانتي بعتي وقبضتي التمن يبقى عاوزه ايه تاني
نعمات باستنكار
=ايه الكلام الفارغ الي بتقوليه ده بعتك دا إيه .. دانا جوزتك جوازه متحلميش بيها جوزتك لابن اكبر عيله في البلد يبقى بعتك ازاي فهميني
انتفضت ملك بغضب
=انتي جوزتيني غصب عني لواحد مريض سادي متعته الوحيده انه يعذب فيا ليل ونهار ضرب واهانه وتعذيب ومنع من النوم والاكل مجنون بيضربني ويعذبني وبعديها يعاشر ستات قذره قدام عيني علشان يثبت رجولته
نعمات بارتياب
=يعني ايه يثبت رجولته؟! هو مش....أقصد يعني...
ملك وهي تضحك بسخريه مؤلمه
=لاء ملمسنيش انا لسه بنت زي ما أنا اصله كان بيقرف مني وبيقول ازاي يلمس خدامه اشتراها علشان متعته ..متعته الي هي تعذيبي ..
نعمات بعدم تصديق
=ملمسكيش إزاي وانتي كنتي حامل شهرين وسقطي ..
ملك بتعب
=كذب ..كله كان كذب
نعمات بعدم تصديق
=كذب ازاي دي البلد كلها كانت عارفه انك حامل وكامله هانم دبحت عجلين و وزعتهم على اهل البلد من كتر فرحها بحاملك
ملك بغضب
=مش عاوزه تصدقيني ليه قلتلك كل ده كان كذب بيغطي بيه هو وكامله هانم على قذرته وساديته واجرامه قدام عيلته ...
=إخرسي قطع لسانك...
إلتفتت ملك وزوجة والدها على صوت كامله هانم الغاضب
وقفت نعمات سريعا وهي تقول بارتباك
=كامله هانم ....أهلا وسهلا إتفضلي
اندفعت كامله هانم بغضب للداخل والتي تتمتع بملامح وجه ارستقراطيه حاده و ترتدي ثوب حداد طويل أنيق أسود اللون وتلف رأسها بحجاب طويل أسود وهي تقول بغضب شديد
=عارفه لو سمعتك بتقولي كده تاني ولا حد خد خبر بالكلام الفارغ الي بتقوليه ده هنسفك من على وش الدنيا واعملك عبره لكل الكلاب اللي زيك اللي بيتطاولوا على اسيادهم من غير خشا ولا حيا..
نعمات بارتباك
=معلش يا كامله هانم هي متقصدش الظاهر الحادثه وصدمة موت سامح بيه أثرت على عقلها وخلتها تقول الكلام الفارغ ده
وقفت كامله امام ملك الصامته وهي تقول بتكبر وغضب
=سيرة ابني سامح بيه الانصاري الله يرحمه متجيش على لسانك الا بكل خير والكلام بتاع ملمسنيش مكنش راجل بيعذبني سادي كل الكلام الفارغ اللي سمعته منك ده تنسيه وتمحيه من ذاكرتك خالص والا متلوميش غير نفسك
وقفت ملك امامها تقاوم ضعفها وهي تقول بتحدي
=يعني هتعملي ايه اكتر من اللي جرالي على ايدك انتي و ابنك
كامله هانم بغضب
=هعمل كتير ..وأظن أخر مره جيتي تشتكيلي منه وتعيطي وتهددي انك هتحكي لجده من اللي بيعمله فيكي ...أظن إنتي عارفه حصلك إيه
ملك بارتعاش
=متقدريش تعملي فيا حاجه سامح اللي كنتي بتهدديني بيه مات خلاص ..وربنا نجاني منه ومن جنونه و من تعذيبه فيا
كامله هانم بغضب
=اخرسي و انسي الكلام الفارغ االي بتقوليه ده و اعرفي ان دي اخر مره هسمحلك تقولي الكلام الفارغ ده قدامي ونصيحه اعرفي انتي بتتكلمي مع مين كويس ..
ملك بتحدي..
=لا انا عارفه انا بكلم مين كويسبكلم كامله هانم اللي خلت ابنها ياخدني في فيلا مهجوره في الصحرا وخليته يعذب فيا
شهر كامل و هي عارفه انه كان ناوي يقتلني علشان خايفه اني اتكلم وافضحه و هي هنا بتنشر في البلد اني حامل منه وسقطت علشان تكذبني لو كنت اتجرئت و حكيت لحد مش كده
احتقن وجه كامله هانم وهي تقول بغضب
=اللي فات مات وسمعة ابني والعيله اهم من حتة فلاحه متسواش ذيك
لتتابع بقوه وهي تتأمل وجه ملك الشاحب
=اسمعيني كويس وافهمي كويس انا بقول ايه لان اي غلط منك معناها انك بتنهي حياتك بإيدك
شهقت نعمات بخوف وهي ترى النظره الناريه المصممه المرتسمه على ملامح وجه كامله هانم
في حين تجاهلتها كامله هانم وهي تقول بقسوه
=اوعي تفتكري انك هتبتزيني وتحاولي تكسبي فلوس مني بالكلام الفارغ الي بتقوليه
... الكلام ده لو حد تاني سمعه منك او خرج بره الاوضه دي معناه حاجه واحده انك حكمتي على نفسك بالسجن ولسنين طويله
لتتابع بشماته
=اظن انتي عارفه ان ابني سامح بيه الله يرحمه كان ممضيكي
على ورق كتير وايصالات امانه على بياض علشان يضمن سكوتك وانتي طبعا افتكرتي ان الورق ده ضاع وخلصتي منه بموته
لتتابع بقسوه
=بس اللي متعرفيهوش ان الورق ده عندي وتحت ايدي ولو اتجرأتي و اتكلمتي مره تانيه وقلتي الكلام الفارغ ده او حد
خد خبر بيه ..من بكره الصبح الورق وايصالات الامانه هتتقدم للنيابه واضمنلك انك هتعيشي وتموتي وانتي في السجن
ملك بوجه شاحب وهي تبكي
=انتي عاوزه مني ايه حرام عليكي.. الورق و ايصالات الامانه
دول انا مضيت عليهم غصب عني..مضيت عليهم وهو بيعذبني من كتر خوفي منه كنت بمضي على اي حاجه علشان يرحمني
ويسيبني حرام عليكي كفايه العذاب والهوان اللي شوفته على ايد ابنك انا مش هتكلم ومش عاوزه منكم حاجه بس ارحموني و سيبوني في حالي
كامله هانم باحتقار
=انتي مش بس هتسكتي انتي هتختفي من هنا وللابد يعني مشوفش وشك تاني في البلد تغوري من هنا خالص
نعمات وهي تشهق باعتراض
=تسيب البلد وتروح فين يا هانم احنا طول عمرنا عايشين هنا وملناش مكان تاني يئوينا ولا نعيش فيه
كامله بقسوه
=تروح في ستين داهيه المهم مشوفش وشها هنا تاني والا
هتبقى هي اللي جنت على نفسها وياريت تفتكري انك انتي كمان ماضيه على ايصالات امانه وعلى بياض قصاد الفلوس
اللي كنت بتاخديها من سامح ابني الله يرحمه يعني انتي كمان هتحصليها على السجن لو كلامي متنفذش اظن كلامي مفهوم ..
نعمات بخوف
=مفهوم يا هانم .. بس انا مليش دخل باللي بينكم هي حياله تبقى بنت جوزي الله يرحمه يبقى حرام اتاخد بذنبها واتطرد من بيتي
لتنحني فجأه على يد كامله هانم وهي تقبلها باستعطاف وذل
=ابوس ايدك باهانم وغلاوة المرحوم سامح بيه تسيبيني ارجع بيتي بلاش تطرديني منه
كامله هانم وهي تسحب يدها بقسوه وتجبر
=السواق مستنيكم بره هياخدكم يوصلكم بره البلد عند محطة القطر ومن هناك تركبوا القطر للمكان الاي تختاروه المهم مشفش وشكم هنا تاني
نعمات باعتراض و بكاء
=وهدومنا وحاجتنا اللي في البيت احنا ممعناش هنا حاجه خالص دي حتى ملك معندهاش هدوم هنا مفيش غير الفستان اللي كانت لابساه وقت الحادثه
وده فستان مكشوف ومينفعش تمشي بيه
كامله وهي تتجاهل حديثها بقسوه
=مش عاوزه رغي كتير واحمدوا ربنا اني مش عاوزه فضايح والا كان زمانكم مرميين في السجن قدامكم خمس دقايق و تكونوا جاهزين ..انا مستنياكم بره
لتتجاهلهم وتخرج من الغرفه بخطوات قويه والدموع تنساب بقوه وصمت على وجه ملك في حين توجهت نعمات بسرعه الى خزانة الثياب تخرج ثوب السهره الذي كانت ترتديه ملك وقت الحادثه وهي تندب بخوف
=أخرتها اطرد من حتة البيت اللي متاويني علشان واحده مش وش نعمه زيك
لتلكزها في ذراعها بقسوه
=البسي يا وش الفقر بسرعه خلينا نمشي من هنا قبل ما ترجع في كلامها دي وليه قادره وممكن تنفذ تهديدها
تناولت ملك منها الثوب المكشوف بقهر و بدئت في ارتدائه على الرغم من تقززها منه فهو يذكرها بكل ذكرياتها السيئه مع زوجها الراحل الا ان قرب خلاصها ورحيلها عن المكان هون عليها ارتدائه
لتنتهي سريعا من ارتدائه وزوجة والدها تتأمل الفستان المكشوف بغيظ وخوف
=هتركبي القطر كده ازاي استر يارب
تجاهلت ملك حديثها وهي تخرج بصحبتها لخارج المشفى وهي تتلفت حولها بتوتر حتى وجدت كامله هانم تقف بجانب السياره وتشير بيدها بكبرياء لسياره اخرى وهي تقول بتجبر و تحذير
السواق هيوصلكم للقطر ومشوفش وشكم هنا تاني وإلا انتم اللي هتبقوا جنيتم على نفسكم .. اظن مفهوم
نعمات بقهر وهي تجزب ملك للسياره
=اللي تشوفيه ياهانم اللي تأمري بيه هيتنفذ
ثم قامت بفتح باب السياره المتوففه بجانبها والجلوس في
المقعد الخلفي وبجانبها ملك التي جلست بهدوء وهي تشعر بالراحه لقرب تحررها من ماضيها الاليم...
وتمر الدقائق سريعا وتجد نفسها تجلس في القطار الخالي من
الركاب بجانب زوجة والدها التي لم تصمت دقيقه واحده مابين سبها لملك ودعائها على كامله هانم في حين تجلس هي بهدوء تنظر من النافذه وهي تشعر بالسعاده المشوبه بالحزن
فعلى الرغم من طردها بطريقه مذله وعدم وجود مكان يئويها او مال تستطيع الانفاق منه على نفسها وعلى زوجة والدها الا
انها تشعر بالسعاده لقرب استعادتها لحريتها
تنهدت ملك براحه و هي تشعر بالقطار يتوقف و تحركت سريعا وهي تنزل منه بسعاده وتتأمل المكان من حولها بفضول فهي لا تعرف حتى اسم المدينه التي تتواجد بها
نعمات وهي تتلفت حولها بخوف
=الدنيا ليلت هنروح فين دلوقتي
لتتابع بقلق
=الفستان اللي انتي لابساه ده مكشوف اوي والشباب اللي هناك دول بيبصوا علينا جامد ..أستر يارب
نظرت ملك لفستانها بقلق لتدرك للمره الاولى ان الفستان الاحمر الضيق والقصير الذي ترتديه يكشف عن جسدها بطريقه مبتزله تجعلها اقرب في شكلها لبائعات الهوى
ملك بخوف
=وهي ترى اقتراب مجموعه من الشباب الصاخب منها وهم ينظرون اليها بطريقه مقززه
=تعالي نخرج من هنا بسرعه دول شكلهم جايين علينا
لتتفاجأ بزوجة والدها تبعد عنها بعنف بعد ان دفعها احدهم بعيدا عنها في حين التف ثلاثة شباب من حولها يتلمسون جسدها بطريقه مقززه وهي تحاول الهرب بخوف من بين أيديهم
لتستمع لاحدهم يقول باستمتاع
=متخافيش ياقطه تعالي معانا دا احنا هنبسطك واللي هتطلبيه هتاخديه
لتتزايد جرأتهم في تحسس جسدها وهي تصرخ و تقاوم وهي تحاول الهروب منهم
حتى اوشكت على فقد الوعي من شدة مقاومتهم الا ان
ولحسن حظها تصادف مرور دوريه للشرطه استطاعت انقاذها من بين أيديهم لتجد نفسها تقف في قسم شرطه صغير
والشرطي المسئول يقوم باستجوابها
الشرطي باستنكار
=هو في واحده محترمه تمشي بفستان مكشوف بالشكل ده
وبليل الا لو كانت بتصطاد زبون انطقي ياروح امك و اعترفي
احسنلك انتي كنتي بتصطادي زبون واختلفتم على السعر وعلشان كده اتخانقتم وكنتي بتصوتي
انهمرت الدموع من عيون ملك تغمر وجهها وهي تقول بخوف
=ابدا محصلش انا معملتش حاجه دول هما اللي حاولوا يعتدو عليا وانا كنت بحاول ابعدهم عني
تجاهلها الشرطي بعدم تصديق وهو ينظر لزوجة والدها التي تبكي هي الاخرى برعب
=وانتي بقى تبقي اللي مسراحاها مش كده؟
نعمات برعب
=مسراحاها يعني ايه يابيه انا معملتش حاجه دول هما اللي
حاولوا يخطفوا بنت جوزي احنا ناس محترمين وعمرنا ما عملنا حاجه غلط
الشرطي بسخريه
=محترمين ماهو باين عليكم ..عموما بكره الصبح هتتعرضوا
على النيابه وهناك ابقو قولوا اللي انتوا عاوزينه..خدهم يا عسكري على التخشيبه
شهقت ملك وهي تبكي برعب في حين صرخت زوجة والدها وهي تضرب صدرها بخوف
=تخشيبه ونيابه يا نهار اسود ..لا مبدهاش بقى بص يا بيه
اللي واقفه قدامك دي تبقى مرات سامح بيه الانصاري الله
يرحمه يعني استحاله تعمل اللي انت بتقول عليه
صرخت ملك بقوه
=اسكتي يا خالتي ..اسكتي ..متسمعش كلامها انا مقربش حاجه لعيلة الانصاري وعاوزه اتحول للنيابه ويتحقق معايا
الشرطي بقسوه
=اخرسي خالص ومسمعش صوتك خلينا نسمع قريبتك دي هتقول ايه
ثم تابع بسخريه وهو يجلس خلف مكتبه
=ويطلع مين بقى سامح بيه الانصاري ده ..ايه هو ده اللي مسرحكم
نعمات بخوف
=مسرحنا ايه يابيه.. سامح بيه الله يرحمه ابن عيلة الانصاري بتوع مصانع الحديد والصلب اكيد حضرتك تسمع عنهم
الشرطي بسخريه
=عيلة الانصاري بتوع الحديد والصلب مره واحده .. بقى انتي عاوزه تفهميني ان البت دي تقرب لعيلة الانصاري
ملك بعنف
=دي كذابه متصدقهاش
نعمات باستنكار
= انا كذابه برضه دي اخرتها بس هقول ايه طالعه ناقصه لابوكي
ضرب الشرطي على مكتبه بعنف ليسكتهم وهو يقول بقسوه
=مش عاوز اسمع نفس واحده فيكم ..ايه هتتخانقوا قدامي ولا ايه..
لتضيق عينيه وهو ينظر لنعمات وقد اشتعل فضوله
=انا هعمل نفسي مصدقك .. التليفون قدامك اهو اتصلي بحد فيهم يجي يأكد كلامك
اقتربت نعمات من الهاتف بتردد وهي تقول بخوف
=انا هتصل بتليفون القصر هو ده
التليفون الوحيد اللي حافظه نمرته
تعالى بكاء ملك وهي تقول بيأس
=علشان خاطري متتصليش بيهم السجن عندي ارحم
تجاهلتها نعمات وهي تقوم بطلب الرقم وانتظرت قليلا بتوتر حتى تلقت رد من الطرف الاخر
تناول الشرطي الهاتف منها بتعجب و هو يتكلم مع الطرف الاخر حتى انتهت المكالمه والشرطي ينظر لها بدهشه وفضول ثم إتجه اليها وقادها باحترام لاحد المقاعد لتجلس عليه وهي شبه منهاره
والضابط يقول باحترام شديد
=اتفضلي اقعدي ياهانم انا اسف جدا على كل اللي حصل انا اتكلمت مع الانصاري بيه شخصيا وهيبعت حد ياخد حضرتك احنا اسفين جدا على اللي حصل
شهقت ملك بخوف وجلست وهي تشعر بالدوار يلف رأسها وهي تقول بضعف
=حرام عليكي اتصلتي بيهم ليه
نعمات وهي تبتلع ريقها بخوف وتتخيل رد فعل كامله هانم عندما تعلم باتصالها بالقصر
=أهو اللي حصل .. يعني كنت عوزاني اسكت واحنا كنا هنتسجن في قضية اداب
بعد مرور اكثر من ساعتين وبعد حضور المحامي الخاص بعائلة الانصاري الذي قام باخراجها من قسم الشرطه بعد ان انهى كل الاجرائات القانونيه
ملك بارتباك وهي تقف خارج قسم الشرطه
=انا متشكره يا أستاذ رؤف على تعبك معايا
لتتابع بارتياح
=انا هاخد خالتي نعمات وهنمشي من هنا ومتشكره على تعب حضرتك
المحامي باحترام
=اسف يا ملك هانم بس التعليمات الي عندي انك المفروض ترجعي معايا للقصر
ملك وقد استولى عليها الغضب ولم تلاحظ اقتراب سياره سوداء فخمه من مكان وقوفهم وفتح بابها الخلفي
=تعليمات!! ...تعليمات من مين.. يكون في علمك انا همشي من هنا و مش هروح معاك في اي حته..
لتشهق فجأه بخوف وهي تشعر بيد قويه تجذبها للخلف بعنف وتجد نفسها ملقاه على مقعد خلفي لسياره لا تعرفها و انطلاق السياره سريعا لتنتفض وهي تحاول الاعتدال ومقاومة الشخص الجالس بجانبها وهو يحاول السيطره عليها وابقائها بداخل السياره و هي تقاومه بعنف وخوف حتى خارت قوتها و اضطرت للاستكانه بهدوء وهي تشعر انها في حرب خاسره بعد ان استطاع السيطره عليها بسهوله
رفعت ملك عينيها في ظلمة السياره بخوف لترى بصعوبه عينين سودوان شديدتا الحده تتأملها بسخريه
وهو يقول بتهكم
=ايه بتقاومي و مش عاوزه ترجعي القصر ليه مش ده القصر اللي مكنتيش تحلمي تمري من قدام بوابته و اللي خططتي علشان تدخليه و رسمتي على سامح الله يرحمه الحب علشان تبقي ملك هانم بعد ما كنتي حتة بياعه في محل متساويش
لتسمعه يتابع بتهكم اكبر
=ولا خلاص دلوقتي مبقتيش محتاجه القصر و عاوزه تهربي منه وتتمتعي بالفلوس اللي خدتيها بالغش والخداع من سامح الله يرحمه
ملك وهي تحاول تحرير يدها بغضب منه
=اهرب ايه وفلوس وقصر ايه اللي بتتكلم عنهم..انت مين وعاوز مني ايه ؟!!
الصوت بسخريه
=ايه لسه مش عرفاني طبعا معاكي حق احنا متقبلناش قبل كده غير لمره واحده ولدقايق قليله
لتشعر به يعتدل في جلسته وهو يقول بتهكم
=اسمحيلي اعرفك بنفسي ..انا قاسم الانصاري ابن عم جوزك و
اللي هيدفعك تمن كل لحظة وجع وألم اتسببتي فيها لسامح الله يرحمه