رواية الأنسه أم محمد
الفصل الاول والثاني
الكاتبه مي علي
ااااااااااااه إلحقني يا صبري بولد
قام صبري مفزوع من النوم علي صريخ عطيات اللي كانت عماله تشد فيه زي ما يكون خروف
- جرا اي يا وليه بسم الله الرحمن الرحيم
- بولااااااااد اااااااااااه
- حاضر حاضر اوام هروح انده الدايه اهو
- داية اي الله يخربيييييييتك هو في حد بقي بيولد بدايه دلوووووووقتيييييي ااااااااااااه وديني المستشفااااااا
- طيب حاضر حاضر
خرج صبري يجري وهو لابس الكلسون
وراح ناحية الباب وخد باله أنه مش لابس
- يخربيتك ياوليه كنت هنزل كده بالكلسون
دخل جري ع الاوضه
صرخت ف وشه....
اي اللي رجعكككككك هولد الله يخربييييتك
- بجيب العبايه بجيب العبايه
واخد عبايته وطيران علي الشارع
قبلو سميح جارهم
- جرا اي يا صبري مالك متلخفت كده
- مراتي بتولد ورايح اوقف تاكس بسرعه اوديها المستشفي
صوت صريخ عطيات علي
سميح ...
مش هتلحق استني انت انا هروح انده حد يولدها
- مش هترضي تولد دي وليه فقر وانا عارفه
الكاتبه مي علي
- ههههه هو اي اللي مش هترضي تولد يا صبري هو بمزاجها
اقعد هنا بس علي ماروح انده حد يجي يولدها
جري سميح علي بيت ام زغلول الدايه اللي مولده تلت ترباع المنطقه عندهم
وبنتها كمان ممرضه
علي ما يروح سميح ينده الدايه تعالو اعرفكم بالناس الحلوه اللي معانا ف القصه دي
عطيات قبل متتجوز كانت بنت من بيئه فقيره جدا تكاد تكون معدمه مفيش تعليم ولا حاجه خالص
مسافة متتم البت تلاتاشر سنه بيجوزوها ويرتاحو
لكن عطيات اتأخرت ف الجواز اكمنها كانت قاعده علي خدمة ابوها وامها
كانت هي البت الوحيده علي تلاتاشر بطن قبلها وكلهم ماتو
اللي مات وامها بتولده واللي مات اول ما اتولد واللي عاش شهرين وفطس
لحد ما جت هيا وربنا بارك ف عمرها
ولما ابوها مات حصلته امها علي طول مكملتش
والناس اتكفلو بعطيات وراعوها
لحد ما جه صبري
مقطوع من شجره ووحيد
شافها عجبته فتقدملها
وولاد الحلال سعدوهم يتجوزو
وبعد الجواز اخدها ونزلو علي الجيزه ف منطقه شعبيه شبيهه للأرياف
صبري صنايعي ولكنه مش كسيب بيحب النوم والأكل اكتر من اي حاجه ف الدنيا علي عكس عطيات اللي كانت شعلة نار وتفكر وتحاول تجيب القرش من بطن العفريت عشان تعيش
لانها متجوزه راجل خيبه يوم شغال وعشره لأ
نهايته دي اول ولاده ليها وطبعا مقطوعه من شجره ممعهاش حد
يدوبك عرفت تجمع هدمتين للبيبي وفلوس المستشفي وحاشتهم عن صبري لا ياخدهم
إلحقو سميح جاب الدايه تعالو أما نشوف هيحصل اي
سميح ...
يلا يا عم اهي ام زغلول جت
ام زغلول ...
متخفش ياخويا سهله انشالله
تعالي يا عبير يلا
وطلعت عبير وامها ام زغلول ومعاهم الحاجه ومرات سميح وواحده كمان من جاراتهم
انتو عارفين أن احنا شعب بنحب نساعد بعض ونقف ف الشده قبل الفرح وبالذات الجيران ف المناطق دي
طلع صبري ودخلها ...
جبتلك الدايه ام زغلول احسن دايه ف المنطقه
بصتله عطيات ....
قرب يا صبريييييي قرب
- قربت اهو فيه اي
- امسك ايدددددي امسك ايييييدي
- اهو مسكتها
راحت ماسكه ايدو وعضاها ...
ااااااااااااه يا وليه يا عضاضه
- يااااا معفننننن جايبلي دااااايه يا معففففن اومال لو دافع حاجه من جيبببك
- مبلاش فضايح بقي يا وليه وبعدين مفرقتش حاجه ده هنا اريح ليكي
دي حتي الدايه دي مولده نص الشارع ده
- إلهي يولدووووووك وأشوف فيك يوووووم يا صبري
الكاتبه مي علي
دخلت ام زغلول ...
اطلع بره بقي يا سي صبري وسبنا بقي لسه قدامها حبه حاكم اول ولاده دي بتبقي صعبه
خرج صبري اللي كانت متوتر
ودخلو هما وسخنو الميه وحضرو كل حاجه
وهي كل شويه تصوط
طلع سميح وكام راجل من الجيران قعدو معاه بره يطمنوه
وهما قاعدين كده كل شويه تصوط وتقول .....
إلحقييييني يامااا الله يخربيتك يا صبري
يبص للناس وهو محروج ويسكت
شويه وتصرخ تاني ...
ااااااااه ااااااه إلحقوووني هموت إلهي تموت يا صبري يا معفن يا معفن اااااه
الكاتبه مي علي
الناس حاطه أيدها علي بوقها ومحروجين وعاوزين يضحكو
سميح ...
سهله ياخويا سهله معلش ربنا يطمنك عليها
صبري ..
يارب ياسيدي يارب
- ااااااااااه إلهي يولدوووووووك يا صبري
الناس ضحكت بجد المره دي وصبري بقي ف نص هدومه
سميح بضحك ...
كنت عاوز توديها المستشفي وتاخد بينج بقي
أما وهي كده مش سامع بتقول اي
اومال لو خدت بينج بقي وقعدت تخطرف ههههههههه
- اقول اي بس انا كان مالي ومال الهم ده انا كنت مرتاح وعايش
- الله متثبت كده يا راجل ده انت لسه جايلك عيل اهو لسه مشفش النور تقوم تقول كده
فك يا راجل ومتشلهاش هم
- الحمدلله علي كل حال
فجأه صوت الصريخ وقف والدنيا بقت هدوء لعشر دقايق متواصله
صبري ...
الله هما سكتو ليه انا مش سامع صوتها
لتكون ماتت
قرب ناحية الباب
ورقعت عطيات بالصوت بس مش صريخ الولاده لا
دي صرختها اللي حرقت قلبها علي ابنها اللي نزل ميت
طبعا كانت صدمه بالنسبالها بس احتسبته عند الله
والناس كانت بتواسيها
بعد مرور كام شهر حملت تاني وسقطت
وتالت وسقطت
وصبري ابتدي يقوي عليها بسبب الحكايه دي وأنها مبيعشلهاش بطون
زي امها
وهي حطت الحسره ف قلبها وسكتت
اربع سنين ع الحال ده
يا تحمل وتسقط يا تولد والعيل ينزل ميت
ومفيش ولا عيل فيهم حتي بيكمل اسبوع
اربع ولادات ميته
والباقي كله سقوط
لحد ما يئست
بس كانت محبوبه من كل الناس حواليها ومؤمنه بقدر الله
بس قدر الله ساعات مبيرضيش البشر
دخل صبري عليها ف يوم وقال ...
بقولك اي يا عطيات
- قول يا ميلة بختي
- ياشيخه اتنيلي ده انتي اللي ميلتي بختي
قصرو انا قررت اتجوز
الكاتبه مي علي
- ناااااعم ت اي يا صبري تتجوز
يا راجل هو انت قادر تصرف علي بيت عشان تصرف علي بيتين متتنيل ياصبري وتقعد خليني ساكته
- الله وانتي مالك يا وليه ثم إن الراجل ميعيبوش إلا ..
- إلا اي يا صبري متكمل المثل الراجل ميعيبوش الا اييييه
صبري ساكت مبيردش
- مترد ساكت ليه
انا هكملهولك ياخويا الراجل ميعيبهوش الا جيبه يا صبري ها جيبو
جيبك المخروم ياخويا
- انا مكنتش بتكلم علي كده يا وليه
- اومال ميعيبوش الا ايييه
ههههه اوعي يكون اللي ف بالي يا صبري
هههه ده كده انيل ده حتي الكلب بيتجوز يا صبري
- يا وليه متلمي لسانك بقي الله
وبعدين انا مقصرتش معاكي خمس سنين اهو وانتي بطونك كلها بتموت إلا ما فيه واحد فيهم عاش
- وده بأيد مين يا صبري
- يا ستي مقولناش حاجه بس انتي متقدريش ومبيعشلكيش بطون غيرك تقدر
وعشان كده انا قررت اتجوز وده ميعيبنيش ف حاجه الشرع حللي اربعه
الكاتبه مي علي
سكتت عطيات والحسره ف قلبها وقالت ...
عاوز تتجوز يا صبري
هه اتجوز
لكن أنا مش راضيه وحسبي الله ونعم الوكيل فيك يا صبري حسبي الله ونعم الوكيل فيك
وسابته ودخلت الاوضه وهي بتعيط وبتشتكي لربنا
ونزل صبري اللي كان مخطط كل حاجه وعينه علي واحده ف الحاره كانت متجوزه واتطلقت
بس بت صغيره وحلوه
وقرر أنه هيتجوزها
سميح اول ما عرف ...
انت انجننت يا راجل طب اسأل علي اللي هتاخدها دي سمعتها ف كل حته واخواتها شمامين
بقي يا راجل تتهف ف عقلك وتسيب مراتك الست اللي بمية راجل اللي صانتك وشايلاك ومستحملاك عشان تتجوز عليها
وتعمل حجتك انها مبيعشلهاش عيال
- بقولك اي يا سميح انا ده حقي اخلف واتجوز واحده تبسطني وانا هتجوزها هي مش هتجوز اخواتها
- ومالها مراتك يكش بس انت اللي شيلتها الهم
- بلا هم بلا قرف بقي انا خلاص اخدت قرار
- ع العموم عقلك فراسك تعرف خلاصك
الكاتبه مي علي
ام زغلول وستات الحته لما عرفوا طلعو يواسوها
ام زغلول ...
والنبي ياختي متشيلي ف نفسيتك سيبك منه وبصي لنفسك كده
- انا كل اللي قاهرني اني مليش ذنب ده قضاء ربنا
- والله لربنا يكرمك اخر كرم بس اصبري وقولي يارب
- يااااارب
واخدت قرار انها لازم تفوق
وبقت تمسك هدوم البيبي وتعيط وتشتكي للي لا بيغفل ولا بينام
واللي احن عليها من الكل
وصبري كان بيستف أموره وراح قعد ما اخوات البت
اللي كانو شمامين وصيع
وواخدين فكره عن صبري أنه عنده ورشه وصنايعي وكسيب
وميعرفوش اللي فيها وأنه قيحه وعطيات هي اللي شايله الهم
عطيات بقي نزلت جابت مكنة خياطه
وحبة قماش بالفلوس اللي كانت بتحوشها للولادات من اي شغل كانت بتعمله
وابتدت تشتغل والحته كلها كانت بتساعدها ويفصلو عندها هدوم
وربنا سترها معاها والاشيه بقت معدن
وقاطعت صبري مبقتش تكلمه
كانت بتقضيله حاجته من سكات عشان خاطر ربنا بس
مكنتش ضعيفه لا كانت عارفه أن ربنا ميرضاش بالظلم
البت اللي هيتجوزها صبري واهلها اصرو يعملو فرح
زي ما كانو مصرين يخلوها تعيش مع عطيات
بس صبري حاول يقنعهم عشان عطيات متعملش مشاكل معاها
واتفق أنه هيأجرلها شقه
بس اخواتها قالو لا متسكنش ف إيجار
وعشان همهم الفلوس وبس
قالولو أن اختهم عندها شقه ف نفس البيت بتاعهم
تسكنو ف شقتها بس صبري هيدفع ايجار ليهم عادي كأنها مش بتاعتها
قال اي ميعش سفلئه علي قفاها
صبري كان بيحاول يفكر بعقله وحاسس أنه هيدبس
وعاوز ينسحب
بس البت كانت بتبلفه وتخليه عاوز يتجوز بكره الصبح
عشان طفس ودني
في خلال الأيام اللي بيجهزو فيها الفرح
حست عطيات بأعراض الحمل
وكانت أشد من اي حمل فات
دوخه بأستمرار وقئ وهبوط
بعتت لأم زغلول تيجي تكشف عليها
وفعلا راحتلها ام زغلول وكشفت عليها
- مبروك يا حبيبتي حامل
طبعا حزنت عطيات ...
بتباركيلي علي اي ده انتي حقك تعزيني
- طب بس متقوليش كده
اتفائلي خير
طب والله وماليكي عليا حلفان انا حاسه ان اللي جاي ده انشالله هيبقي خير وهيعيش وهيبقي فل الفل ويملي عليكي حياتك
- يارب يا ام زغلول يارب
- اتمسكي بربنا وثقي فيه ومش هيخذلك ابدا
- ونعم بالله يا ام زغلول عندي امل فيه يساعي الدنيا بحالها ده هو سندي ف الدنيا والاخره مليش غيره
مليش غيرك يارب
- ايوه كده افرحي
وفرحي جوزك وابعديه عن الجوازه الغم دي
- هو اللي بلا بيها نفسو خليه يشيل بقي
- ده داخل وعكه سوده اوي اخواتها زنقوه يعيني
بس نقول اي هو اللي طفس لا مؤاخذه ياختي
- ولا مؤاخذه ليه انتي معاكي حق
- بصي انا من رأيي تقوليله
وتحاولي تحطي جواه الامل علي الاقل تبعديه عن الجوازه السوده دي
مهما كنتي مراته بردو
وانتي بنت اصول يابنتي
- رأيك كده
- اه والله ده عين العقل يابنتي
انا هستأذن بقي عشان ورايا حبة حاجات هروح اقضيها هفوت عليكي وقت تاني تقوليلي عملتي اي
- ربنا يجعلك ف كل خطوه سلامه يا ام زغلول
ومشت ام زغلول وفضلت عطيات تفكر
تقوله ولا متقولش
وقامت حضرت الاكل كالعاده
واستنته لما جه وحطتله الاكل من غير كلام
ودخلت كالعاده
وهو بيبصلها بس مش عارف يتكلم معاها من ساعة مقلها الخبر ده
وهي متررده وراحه جايه مش عارفه تقوله ولا لا
وبعدين قالت ف نفسها ...
كده كده مش فارقه
خرجت ولاقته قام وشال الاكل وعمل شاي لنفسو وقعد
خرجت وقفت قدامه وفضلت بصاله ومتنحه
الكاتبه مي علي
صبري ...
مالك يا وليه في اي
- مفيش
وسكتت شويه وبعدين قالت ...
لا في انا عاوزه اكلمك ف موضوع
- اتكلمي يا وليه مالك مش عادتك تستأذني اتكلمي
اخدت نفس عميق وقالت ....
تفتكرو هتقولو ولا هتسكت عشان فاقد الامل فيها وهل البيبي ده هيكمل ولا لا وهل يتجوز البنت دي ولا الجوزاه هتبوظ
رواية الأنسه أم محمد
الفصل الثاني
الكاتبه / مي علي
عطيات قررت تصارح صبري بأنها حامل وهيا عارفه أن مش هتف ق معاه
وصبري قالها ...
متتكلمي يا وليه من امتي بتستأذني قبل ما تتكلمي
اخدت نفس عميق وقالت ...
انا
وسكتت شويه
- متتكلمي الله مالك في ايه
- مفيش حاجه كنت عاوزه اقولك ربنا يتمملك علي خير ياخويا
انتبه صبري لكلامها وبصلها بإستغراب زي ما يكون قلبه اتقبض وقال ...
هتروحي فين
هتطلبي تتطلقي ولا اي يا عطيات
- لا يا صبري مش هطلب الطلاق وحتي لو طلبت هي هتفرق معاك ف اي يعني مخلاص يا صبري العشره هانت
- لا مهانتش يا عطيات وهتفرق معايا وانتي تطلبي زي مانتي عاوزه إنما أنا طلاق مش هطلق
- ناويلي علي اي يا صبري
طب انا كنت شيلاك عشان انت جوزي واحنا واحد
عاوز تخليني عشان اشيلك انت وهيا ولا اي
- كلامك ماسخ يا عطيات
انا اصلا غلطت يوم مدبست نفسي كده
صعب عليها بصتله بحزن وقالت ...
ليه ياصبري بتقول كده
- متعرفيش حاجه اسكتي
- احكيلي يمكن اساعدك
- عاوزني اكتبلها الورشه والشقه دي بأسمها كضمان اني مش هطلقها ولا اجي عليها وقال هيعملولي توكيل عشان ارجع حقي براحتي
منين عاوزين كده ومنين هيعملولي توكيل
وانا مضمنهمش دول عالم شوضليه ياكلو مال النبي
- خلاص بلاها الجوازه دي ياخويا
- هيبهدلوني
- ليه وانت اول واحد ولا اخر واحد يتقدم لوحدها ويسيبها
- الفرح بعد بكره
هيموتوني قال عشان سمعة اختهم
ولو اتجوزتها هدبس وهياخدو مني كل حاجه
وهي مستقويه بيهم
انا افتريت والله وربنا بيحاسبني سامحيني يا عطيات يا اميره يا بنت الأمره
- مسمحاك يا صبري
ومتخافش ربنا بيدبرها
وطول ما ربنا موجود مفيش حاجه هتجرالك ابدا
فجأه الباب خبط
بس بطريقه همجيه
عطيات ...
يا ساتر استر هو في اي
- خشي جوه أما افتح اشوف مين
فتح صبري لقاه روماني اخو العروسه
هو شهرته كده فالمنطقه
- ازيك يا روماني عامل اي
- الحمدلله يا نسيبي
اي مفيش اتفضل
- تتفضل فين يا روماني
- جرا اي يا جدع متدخلني ده انا جاي ضيف عندك
- انا مبستقبلش ضيوف هنا يا روماني
انا بقابل الناس ع القهوه
انا مدخلش غريب علي جماعتي
- غريب اي يا جدع ده احنا كلها يومين ونبقي نسايب
- لما نبقي بقي يا روماني تعالي ننزل ع القهوه
- لا ولا قهوه ولا بتاع بقي
قصرو
فكرت ف اللي قولنالك عليه
- اللي هو اي
- الورشه والشقه
قبل كتب الكتاب تتكتب بأسم اختي
- انا قولتلك اني مش لوحدي ف الورشه معايا شريك وهو مش هيقبل بكده
- ماشي الورشه تاخد وقتها مقولناش حاجه
طب والشقه
- احنا هنروح من بعض فين يا روماني نتم كتب الكتاب وبعدين نشوف
- ماشي يا نسيبي هنصبر عليك بس خد بالك إن كان حبيبك عسل متلحسوش كله عااا
سلام
نزل روماني الشمام ودخل صبري وهو خايف منهم ومرعوب
خرجت عطيات اللي كانت سامعه كل حاجه
- اي ده يا صبري اي الحشاش ده انت مش سامع صوته عامل ازاي
ده بيشرب لما معمي
انت اتعميت يا صبري ولا اييه
- ابوس ايدك يا عطيات انا مناقص سيبيني بقي الله يسترك
ودخل الاوضه وحاول ينام
ونزلت عطيات واتجمعت مع كام واحده من جاراتهم وحكتلهم اللي حصل
ومرات سميح اقترحت عليها انهم اكيد ساعة الفرح اخواتها هيجيبو هباب من اللي بيشربوه
فيبلغو عنهم ويجو يمسكوهم ويخلصو صبري من الجوازه
عطيات ...
ولو عرفو أن احنا اللي وراها ده ممكن يمتوه وانا مش مستغنيه عنه
- متقلقيش ياختي انا هتصرف
وفعلا يوم كتب الكتاب والحنه
عملو وش كبير اوي ف الشارع وهيصه
المفروض أن الدخله بتبقي بعد الكتاب بكام يوم
اخواتها عملو قاعده وديچي وبتاع وجمعو من كل حته الناس من أشكالهم
والحاره اتقلبت دخان وريحه فظيعه
وطبعا صبري وسطهم زي الفرخه الدايخه
وقاعد مستني عشماوي
قصدي المأذون
وجه المأذون وف الشارع ووسط الخلق قعدو
وابتدي المأذون ياخد الأجراءات
وحط صبري ايدو ف ايد اخوها الكبير عشان يكتبو الكتاب لكن
قبل ما ينطق كلمه كان البوليس طب ع المنطقه
روماني ...
اي ده اي ده اي ده
باشاااا منور الحته والله يا باشا
الظابط ...
خش يا عسكري انت وهو اقلبلي الطرابيزات دي ولملي العيال دي كلها علي جنب وفتشهملي
- جرا اي يا باشا ده فرح اختي ودول معزيمنا ناس مين دي اللي تتفتش
- اخرص يلاااااا
- حاضر اباشا
طبعا كلهم غمزو لبعض اللي معاه حاجه يرميها
لكن العساكر عينهم كانت مفتحه ولمو كل حاجه
واتمسك روماني بحتت حشيش ادد كده وأخوه التاني
وكذا واحد من اللي كانو جايبين حاجات يوجبو بيها مع العرايس
واهل العروسه
لمو كل الناس دي ع البوكس
بما فيهم صبري
والجوازه باظت
وعلي الرغم من أن صبري كان خايف من مرواحه القسم معاهم
بس كان مبسوط أنه خلص من الجوازه دي
ورموهم ف الحجز علي ما الظابط يجي
قرب روماني علي صبري بسجاره ...
متزعلش يابو نسب مسافة يوم وهنخرج وهعملك احلي ليله
صبري بإرتباك ...
إن انشالله
- جرا اي يا جدع متجمد كده ده السجن للجدعان
ههه فاكر ياض يا كوحشه التلت سنين اللي قضيناهم ف طره
كوحشه ...
اااه ياعم فاكر دول كانو احلي تلت سنين يا صاحبي عدالللله
صبري ...
انت دخلت السجن تلت سنين
روماني ...
انا متربي ف زنزانه يابا
- ونعم العائله الكريمه
- بتقول ايييه
- مفيش بقول ربنا يكتر من سجنك
- نعم يا روح امك
- مقصدش يا روماني انا بس متوتر
كوحشه ...
يا روماني ابعد عن الراجل أعصابه سايبه ولفلنا سجاره
دخل العسكري ...
قوم فز يا جحش انت وهو
روماني ...
طب وليه الغلط طااااه
- انجررر يلا
أخدهم علي مكتب المأمور
وأمر بعرضهم علي النيابه بتهمه حيازة المخدرات والإتجار للكميه اللي كانت معاهم
واخدهم العسكري تاني ع الزنزانه علي ما يرحلوهم
بس قبل ما يخرجو
صبري ...
يا حضرة المأمور انا مليش ذنب انا عاوز اقول حضرتك كلمتين
العسكري ...
انجر قدامي بقولك
صبري ...
يا حضرة المأمور انا ف عرضك
المأمور ..
سيبه يا عسكري سيبه
عاوز اي يا جدع انت
- عاوزك ف كلمتين علي انفراد انا ف عرضك
روماني ...
علي انفراد اي انت عاوز تعترف علينا يلا
طب يا حضره المأمور انا عاوز اعترف عليه بقي
المأمور ..
خدهم ع الحجز يا عسكري
روماني بعصبيه ..
بتبعنا يانسيبي بتبعنا طب والله لاوريك
زقهم العسكري وخرجو وقفل الباب وراه
المأمور ...
اتفضل عاوز تقول اي
- انا راجل واطي جزمه رمه واستاهل كل اللي جرالي انا كنت متجوز وف حالي وكافي خيري شري
كل الحكايه اني مراتي مبيعشلهاش عيال
اوم قلت اتجوز عليها ووقعتني البت اخوات العيال ولاد الشمامه دي
وكنت هتجوزها لولا الحكومه طبت واخدتني والحمد لله خلصت من الجوازه دي بس خدتني عاطل ف باطل وانا والله مبشرب سجاره حتي يا حضرة المأمور
- امممم واي اللي رماك الرميه دي
- النصيب ياباشا النصيب
- عموما ماشي احنا هنخرجك من هنا بكفاله وبضمان محل إقامتك
- إلهي يعمر بيتك يا حضرة المأمور
بس انا خايف يخرجو من السجن يأذوني انا ومراتي
- ليه هي البلد مفيهاش قانون ولا اي
ثم متقلقش هما مطولين معانا حبه
كمية المخدرات اللي معاهم
هتدي كل واحد فيهم كذا سنه سجن
- الله يطمنك يا حضرة المأمور
دلوقتي كلم حد يضمنك ويدفغلك الكفاله
- وكام الكفاله دي
- حوالي ٧٠٠ جنيه
- تدبر تدبر بأذن الله
ممكن بس اتصل بحد يجي يضمني
- اوي اوي التليفون عندك اهو
اتصل بسميح علي طول اللي متأخرش عليه هو ورجالة الحته
ورحولو ولمو من بعض
المبلغ اللي كان ف وقتها مبلغ وقدره
وخرجوا من الحبس ورجعوه علي بيته
سميح ...
كفاره يا جدع
احمد ربنا انها جت علي اد كده عشان تبقي تسمع الكلام
- الحمدلله يا سميح
- اطلع بقي للست مراتك أحسن ده احنا حبسينها نزلت جري ف الشارع وطلعناها وعماله تعيط
- انا ظلمتها اوي يا سميح
- يبقي تطلع وتحب علي رأسها يا راجل اطلع
الكاتبه مي علي
- الف شكر علي وقفتك جمبي يا سميح
- يا راجل متقولش كده احنا اهل
وطلع صبري لمراته
اللي صرخت اول ما شافته ...
يا حبيبي يا صبري
وجريت عليه حضنته
قدام الناس
اتحرجو فقاموا كلهم
مرات سميح ..
نسيبكو بقي ربنا يهدي سركم وحمدالله علي سلامتك يا سي صبري
- الله يسلمك يا ام محمود
عطيات ...
منجلكوش ف حاجه وحشه ابدا
- ربنا يهدي سركم ياختي
اول ما خرجو حضنها وباس راسها وقال ...
توبه يا عطيات حقك علي راسي ولا كنوز الدنيا تساوي ضفرك ولو علي العيال ف ربنا يبعت الرزق من عنده
- هيبعت انشالله بس ادعيلي يثبت
- هو اي ده
- الحمل
بفرحه ...
اهو انتي حامل يا عطيات
- ايوه
- من مين
- من مين ايه يا راجل انت اتهبلت ف مخك اومال انت بتعمل اي متجوزاك تخذي العين مثلا
- اتلخبطت يا وليه هههه الله قصدي من امتي ومقولتليش اي
- منت فاقد الامل فيا فقولت مش فارقه
- معرفش ليه عندي احساس أنه هيكمل يا بت يا عطيات
- بت اما تبتك
- بضحك معاكي يا وليه هههه
ده انتي ست الستات
عطيات بكسوف ...
واي كمان
- وعشرة عمري
- واي كمان
- ومعزتي اللي مربيها علي ايدي
- معزتك ؟! معزتك يا خروف
- ههههههه الله بهزر معاكي يا وليه
- يعني كان لازم يحبسوك عشان تدلعني شويه كده
- من هنا ورايح هدلعك علي طول
طب متدلعيني انتي شويه كده
- انت سندي ف الدنيا نصي التاني انت بغلي اللي مقدرش استغنى عنه
- بغلك ؟!
احم ما علينا
- انت كل حاجه ليا ف الدنيا يا بهيم متفهم
يكش بس تبطل تمبله وتشتغل زي الناس ولا انا هفضل كده شيلاك ياعني يا صبري يا ....
- باااااس باااااس يا ساتر انتي متكمليش لحظه عدله ابدا
- هههههه بضحك معاك يا راجل
- طب بقولك اي
- قول
- ما ...
كده
وغمز بعينيه
- اي مالك فيك اي
- يا وليه بقولك ...
ما ... كده
- اي عاوز تاكل ولا اي اغرفلك يا خويا حاضر
- اطلع من هدومي يارب
- اي طيب منا مش فهماك
- وانتي من امتي بتفهمي
- طب وسع كده يا صبري إلهي يحلبوك
- ههههههه بضحك معاكي يا وليه وبعدين بطلي تدعي عليا دعواتك الغريبه دي إلهي يحلبوك إلهي يولدوك إلهي يفتشوك
بلاش دعواتك دي ربنا يسترها علينا
- ههههه انت بتزعل ده انا بضحك معاك يا راجل
- طب ما ها ما تيجي
- يوووووه يا راجل انت عنيك وجعاك ولا اي متكمل الجمله ولا بطل رعش الكلاب اللي انت فيه ده
- لا حول ولا قوة الا بالله
اقول اي بس ماشي الست المؤديبه رزق مقولناش حاجه بس مش كده يعني
- بتقول اي انت
- مبقولش حاجه انا لازم اعمل كده كل حاجه بنفسي
وراح لف من وراها وشالها بس مش الشيل اللي ف الافلام شالها زي الجردل المقلوب
عطيات ...
هيهيهي نزلني يا راجل
- يارب يا ساتر
ودخل صبري رماها ع السرير
وطلع جمبها
- ااااااه اه يا ضهري
- ضهرك ضهرك اي ده انا خفيفه حتي
- اي يا وليه البرد ده غطيني غطيني بسرعه بسرعه بردان
مسكت اللحاف وغطته ..
اهو اهو
- طبطبي علي راسي بقي
- اهو
فضلت تطبطب عليه وصبري اتقلب ف لحظه ونام
عطيات ...
صبري
صبري انت نمت
جتك خيبه
صبري
- اي يا وليه
- متقوم يا راجل إلهي تبييييض
- سيبني انام يا وليه سيبني انام
- لا اصحي الله والله هجيب ميه وادلقها ف افاك قوم جتك البلا
- اهو قومت عاوزه اي
- ما ها .. كده
- مش فاهم
هههههههههههه
نسيب صبري وعطيات يفهمو بعض ف الليله اللي مش عاوزه تعدي دي
وبلاش الخيلات والنبي
هههههههه انا رواياتي اشف م الشرف
بعد مرور تمن شهور وصبري ابتدي يهتم ويشتغل
وعطيات باعت مكنة الخياطه عشان تسدد الفلوس اللي دفعوهالو الناس
واتخنقت مع البت اللي كان هيتجوزها خناقه كبيره لما راحت تجر شكلها
وضربوها ف الشارع كل ستات الحته
عشان منكادين منها
والأمور عدت تمام وزي الفل
ف بداية الشهر التاسع ابتدت تحضر حاجات البيبي
وطلعتلها ام زغلول قعدت معاها
- وحشتني يا عطيات والله
- وانتي كمان ليكي وحشه يا ام زغلول والله
- عامله اي ياختي طمنيني عليكي
- خايفه والله يا ام زغلول مرعوبه للعيل يفطس انا طول شهور الحمل وانا حاطه ايدي علي قلبي لينزل
عديت اول تلت شهور والحمل ثبت الحمدالله
بعدها بقيت مرعوبه ليموت جوه
ودلوقتي مرعوبه لينزل ميت
- متخفيش ياختي متخفيش انشالله هينزل حي وزي الفل
بس انا عاوزه آشور عليكي بحاجه
- قولي ياختي خير
- لو العيل نزل عايش وانشالله يعيش تسيبيني انا اسميهولك
- وماله ياختي انتي الخير والبركه بس ليه
- بصي يا ختي زمان علي ايامي وايام امي ف البلد الست اللي كانت مبيعشلهاش بطون دي
كانت لو عيل منهم عاش تسميه اسم غريب كده عشان يعيش
- اسم غريب ازاي
- يعني مره واحده مسيحيه مكنتش بيعيشلها عيال
جالها ولد وعاش امت سمته محمد
- يالهوي
- اه وعندنا كمان يسموها اسم غريب مصيبه داهيه
جلمبو عزوز حاجه كده يعني
- وبتنفع يختي الطريقه دي
- كله بأمر الله طبعا بس اه بتنفع يا بت
ويمسكو العيال بالاسامي دي ميغيروهاش احسن يموت
ويلبسو البت لبس الواد والواد لبس البت احسن يتحسد ويموت
- اه انا سمعت عن الموضوع ده
بس طب لو جه واد اسميه اي ولو بت اسميها اي
- سيبيها ياختي لوقتها اكون فكرتلك
- ماشي ياختي
- أما استأذن وكل يوم هفوت عليكي اطمن
- فيكي الخير ياختي والله منحرمش منك
ونزلت ام زغلول
وف نفس اليوم بليل الساعه اتنين
كانت عطيات بتصرخ وبتشد ف صبري
اللي قام كالعاده يجري علي تحت ينده ام زغلول
وجت ام زغلول وفضلت عطيات تصرخ والناس قاعده برا مستنيه الفرج
واخيرا نزل العيل
ولأول مره ف ولدتها ينزل عيل بيبكي ويهز صوت البيت كله
كل الرجاله قامو فطو زي ما يكون جون للأهلي
سميح ...
هييييييييييييي الف مبروك يا صبري
صبري كان ف حاله ولاده كأنه هو اللي بيولد ومش قادر يقوم لما سمع صوت العيل
عيط وضحك ف نفس الوقت وفضل يتنطط م الفرحه
الكاتبه مي علي
خلصت ام زغلول ولفت العيل
وهو لسه بيعيط
ودخل صبري جري يطمن عليها وهو كله لهفه للعيل اللي جه نور البيت
ام زغلول ...
تتربي ف عزك يا سي صبري بت زي القمر ربنا يباركلك ف عمرها
صبري قرب وهو يعيني خايف يمسكها
يدوبك باسها ودموعه نزلت علي خدها
وجري زي العيل الصغير ....
انا هروح افرق شربات وادبح ده انا نادرها
جري
ام زغلول ضحكت
عطيات بتعب ما بعد الولاده ...
شوفي الراجل خرج من غير ما يتطمن عليا
فجأه لقيته داخل تاني يجري وباسها وباس راسها ووشها كلو
وخرج يجري زي العيل اللي عاوز يلحق صحابه يوم العيد
عطيات ...
شوفي الراجل لأهبل
- حقه يا عطيات اومال تتربي ف عزكو
- قربيها مني يا ام زغلول
قربتها وباستها بحنان
ام زغلول ...
انتو خايفين تشيلوها دي بنتكو شيليها وخديها ف حضنك وأملي صدرك بريحتها وادعي ربنا يبارك ف عمرها
- يااااااارب ياااارب بحق اللحظه دي والملايكه اللي حفاني وروحي اللي كانت بين ايديك يارب
مسكتها وحضنتها اوي وهي كانت جميله اوي
بصت لام زغلول وقالت ...
هنسميها اي يا ام زغلول
- ملحقتش افكر ياختي استني كده اما افكر
سكتت شويه وقالت ...
نسميها نصيبه
- نصيبة اي يا ام زغلول كفا الله الشر
- طب استني استني
اه لقيتها نسميها محمد
- يانهار ابيض هسمي البت محمد
- خلاص ولا تزعلي
نسميها ام محمد حلو أم محمد .......