رواية بنت السارق التوام
الفصل الاول والثاني
بقلم سالى مصطفى
( ماسة ) و ( ملك ) ....
بنتين توأمين فى العشرين من عمرهم عايشين مع أبوهم رجل الاعمال الثرى المشهور ( سليم الطحان ) ....
ده كان القناع اللى بيدارى فيه عشان يبعد عنه اى شبهه والمستخبى بقى إنه أكبر تاجر سلاح ومخدرات فى البلد ......
وأمهم الدكتورة ( فريدة ) دكتورة فى الجامعة عايشين فى بيت مبيخلاش من الشجار والخناق بين أمهم وأبوهم دايمآ لانهم كانوا مختلفين فى كل حاجة وعلى اى حاجة ....
وفى يوم من الايام دخل ( سليم ) البيت فى وقت متاخر من الليل مع أصحابه ودخلوا فى أوضة الضيوف وقعدوا يتكلموا كتييير بصوت واطى عشان محدش يسمعهم من البيت.....
حست بيهم زوجته الدكتورة فريدة قامت بسرعة وخرجت من أوضتها وراحت عشان تطمئن على بناتها.......
لقيتهم نايمين راحت قفلت عليهم أوضتهم ومشت قرب أوضة الضيوف عشان تشوف جوزها بيتكلم مع مين واستخبت ورا الباب عشان محدش يحس بيها وسمعت جوزها من ورا الباب بيقول .....
سليم : انا معتمد عليك ياسيف فى العملية دى ميعاد التسليم بكره الساعة 3 الفجر فى نفس المكان اللى أحنا متعودين عليه الظابط ( جاسر ) فى مأمورية بكره وحيكون مسافر عشان كده انا اتعمدت يكون الميعاد بكره فى الوقت ده بالذات ...
سيف : انت متأكد انه حيكون مسافر ده بيشمشم عليك من زمان وبيشك فيك ولو ظبطنا المرة دى حنروح كلنا ورا الشمس ...
سليم : انا متاكد انه مسافر مش حيكون فى المنطقة أساسآ معلوماتى بتقول كده وأنا معلوماتى أكيدة اطمئن بس بعد التسليم علطول تدينى تليفون ان كل شئ تمام ومشى زى مااحنا مرتبين ......
سيف : متقلقش كل حاجة حتمشى مظبوط ....
سليم : انا معتمد عليك...... انت المسؤل قدامى عن اى غلط فى العملية دى بالذات......
اتصدمت الدكتورة فريدة من اللى سمعته من جوزها راحت فتحت عليهم الباب بسرعة منغير استاذان ودخلت وقالت بصوت عالى : سلييييم عوزاك !!!!!
اتفجع سليم وسيف منها وأتفاجأ بكلامها وقام بسرعة وأخدها بره الاوضة وقالها : عاوزة ايه انتى ايه اللى مصحيكى لحد دلوقتى ؟؟
فريدة بعصبية : مين اللى انت قاعد معاهم فى آخر الليل كده ؟؟ وبتكلموا فى ايه ؟؟
سليم : دول صحابى فى المكتب يافريدة ..... واحنا بنتكلم فى شغل ....
فريدة : شغل !!!! شغل السرقة والنصب صح ؟؟ انت مش حتبطل بقى ...
سليم بعصبية : اتعدلى فى كلامك ووطى صوتك الناس جوه حيسمعوكى ....
فريدة : انا عاوزاهم يسمعونى عشان يمشوا من هنا ....... انت جايبلى شوية بلطجية البيت معاك آخر الليل..... انت مش حاسس ان عندك بنات مش خايف عليهم انت اتجننت خلاص ......
سمع سيف وصاحبه اللى كان معاه كلام فريدة..... راح قايم بسرعة من أوضة الضيوف وخرج لهم وقال لسليم : احنا ماشين خلاص مدام فريدة معاها حق....
وراح باصص لفريدة وقالها : احنا آسفين يامدام ....
راحت فريدة بصالهم بقرف ومردتش عليه .... ومشوا .....
سليم بغضب : عجبك كده الناس مشت ارتاحتى دلوقتى .... افهمى ده شغلى ومش حبطله أبدآ فهمتى .....
قامت ماسة وملك من نومهم على صوت خناق امهم وأبوهم وزعيق جامد .....
ملك : شايفة ياماسة ابوكى وامك بيتخانقوا تانى وبيزعقوا ...... حتى بالليل مش راحمين نفسهم انا زهقت من البيت ده ......
ماسة : مش عارفة ايه اللى حصل المرة دى زعقهم جامد ربنا يستر ......
قامت ماسة وملك وخرجوا بره الأوضة عشان يعرفوا ايه حصل بصت ماسة لامها لقتها متعصبة على الآخر راحت قايللها : حصل ايه ياماما؟؟ بتزعقوا ليه ؟؟
فريدة : محصلش حاجة خدى أختك وأدخلى أوضتكم...... وبطلوا تدخلكوا فى حاجات ملكمش فيها ......اتفضلوا على أوضتكم بقى .....
دخلت ملك وماسة بسرعة على أوضتهم منغير اى مناقشة......
ولفت فريدة ناحية جوزها وقالتله : انا اللى مصبرنى عليك هما بناتك دول عشان ميتبهدلوش بينا غير كده كنت سيبتك من زمان وكنت اول واحدة تبلغ عنك وعن المصايب اللى بتعملها بس بناتك ملهمش ذنب ان حد يعايرهم بأبوهم ......
سليم بغضب : روحى نامى يافريدة وخلى يومك ده يعدى على خير أحسن لك ......
فريدة : عندك حق النوم احسن برده من المناقشة مع واحد زيك .....
وفى صباح تانى يوم قامت ملك وماسة وحضروا نفسهم ....... وراحوا على كليتهم وقبل مايدخلوا من البوابه......
شافت ملك سيف واقفلها على باب الكلية...... اتلخبطت وبصت لأختها ماسة وقالتها بقلق : معلش ياماسة مش حعرف ادخل معاكى الكلية ....
ماسة : ليه ياملك ؟؟
ملك : سيف واقفلى على باب الكليه شايفاه هناك أهوه .....
ماسة : وهوه مش عارف ان عندك محاضرات يعنى .... جيلك الصبح كده ليه ....
ملك : معلش ياماسة حروح أشوفه عاوز ايه وابقى انقل منك المحاضرة دى ....
دخلت ماسة الكلية لوحدها وهيه مضايقة من أختها ومن تصرفها ده .....
وراحت ملك ناحية سيف وقالتله : ايه اللى جايبك بدرى كده ؟؟؟
سيف : اقولك الصراحة ؟؟
ملك : قول ....
سيف : أصلك وحشتينى ..... كنت عندكوا أمبارح وكنت حموت وأشوفك ..... أو حتى تيجى وتقدميلى القهوة طنشتينى خالص امبارح ......
ملك بأستغراب : انت كنت عندنا امبارح ؟؟ ولا حسيت بيك .....
سيف : ممكن كنتى نايمة اصل الوقت كان متاخر .....
ملك : فكرتنى ..... ده امبارح بابا وماما اتخانقوا خناقة جامدة اوى مبطلوش زعيق انا قومت ونمت تانى وهما بيتخانقوا .....
سيف : معلش ربنا يهديهم ..... عندى ليكى حتة خروجة النهاردة حتعجبك اووى .....
ملك : خروجة !!! بس انا عندى محاضرات كتير النهاردة ....
سيف : محاضرات ايه بس !! بقولك حخرجك خروجة حلوة .... تقولى حاضر وبس ....
ملك بابتسامة : حاضر ... حبقى آخد المحاضرات من ماسة ...
سيف : ايوووه كده احبك ...
خلصت اول محاضرة...... وملك مرجعتش الكلية قلقت ماسة عليها كتير واتصلت بيها ....
ماسة : الوووو ايوه ياملك انتى فين كل ده ؟؟؟
ملك : انا مع سيف ياماسة معلش حتأخر شوية ....
ماسة : لحد دلوقتى ازاى يعنى؟؟؟ ولسة حتتاخرى تانى ؟؟؟؟ مينفعش كده ياملك ....
ملك : معلش ياماسة لما أشوفك حبقى احكيلك واقولك ايه حصل .... سلام دلوقتى ...
سيف بغضب : هيه ماسة بتتحكم فيكى كده ليه ...... انتى حرة اذا كنتى حتحضرى محاضراتك ولا لا....... انتى لازم يكون ليكى شخصية عن كده معاها ....
ملك : الموضوع مش كده .... هيه بتخاف عليا بزيادة مش اكتر ..... دى اختى ياسيف ....
سيف : هيه بتخاف عليكى وانا مش بخاف عليكى ياملك ..... طب اتفضلى روحيلها ..... انا ماشى أساسآ ....
ملك : انت فهمتنى غلط مش قصدى كده ..... انت حتتقمص بقى ولا ايه ؟؟
سيف بغضب : ولا اتقمص ولا تتقمصى....... انتى المفروض تقدرينى عن كده..... وتقدرى انى سايب شغلى وجيلك .... مش مهم خلاص عادى ....
ملك : انا محصلش منى حاجة لكل ده انت بتتلكك عشان تزعل ولا ايه ...... عاوزة اخرج معاك بقى .....
سيف : انا ماشى ياملك مفيش خروج اتفضلى روحى كليتك روحى لأختك ......انا بقول كلمتى مرة واحدة بس ......فهمتى ....
دمعت ملك من اسلوب كلامه الجارح وسبته ومشت وراحت كليتها ودخلت المحاضرة عند اختها ماسة ...... شافتها ماسة والدموع فى عنيها وباين عليها الحزن ....
ماسة بحزن : مالك ياملك ايه اللى حصل ؟؟
ملك : مفيش حاجة ياماسة ..... مش عاوزة اتكلم ممكن ....
ماسة : على راحتك ياملك .... انا كنت عاوزة أطمن عليكى ....
رواية بنت السارق التوام
الفصل الثانى ....
خلص اليوم ...... ورجعت ماسة وملك على البيت بعد ماخلصوا محاضراتهم .....
وملك بنفس حالتها متغيرتش باين عليها الحزن ومش عاوزة تتكلم مع ماسة ...... ولا مع اى حد من البيت ......
لاحظت عليها امها الدكتورة فريدة ان فى حاجة حصلت مزعلاها من اول مارجعت من الكلية ...... راحت داخلة لماسة وملك الاوضة وبصت لملك وقلتلها ....
فريدة : ايه اللى مزعلك كده ياملك فى حاجة حصلت فى الكلية ؟؟
ملك : مفيش حاجة ياماما ..... مش زعلانة ....
راحت فريدة بصة بسرعة لماسة وقالت : أوعوا تكونوا أتخانقتوا مع بعض !!!؟؟؟
ردت ماسة بسرعة : لا لا ياماما مفيش حاجة من دى حصلت متخنقناش خالص صح ياملك ........ احنا بس زعلانين عشان انتى وبابا علطول بتتخانقوا وبتزعقوا ......
فريدة : الكلام اللى بتقوله اختك ماسة صح ياملك هوه ده السبب ...
بصت ملك لماسة بحزن وقالت لأمها : صح ياماما مفيش حاجة حصلت ....
فريدة : انتم ملكمش اى علاقة بأى مشاكل بينى وبين ابوكم لان مشاكلنا مش حتخلص ....... ركزوا انتم بس فى مزاكرتكم وكليتكم ....... وخرجت الدكتورة فريدة من أوضة ماسة وملك ......
وفى نهاية اليوم نام البيت كله ماعدا سليم ....... كان مستنى مكالمة سيف عشان يبلغوا باللى حصل وعلى الساعة 4 كده اتصل سيف راح رد سليم بسرعة على الفون ...
سليم بقلق : الووو ايه الاخبار ياسيف .....
سيف : الاخبار مش حلوة اوى .... كل حاجة تمت زى مااحنا عاوزين والفلوس معايا ........ بس المكان كان متراقب من الشرطة كان عندهم علم بالميعاد وهجموا علينا بس عرفنا نهرب وفى ظابط اتصاب جامد ....... الظابط جاسر كان عامل حسابه حتى وهوه مسافر ......
سليم بفرح : يلا بالشفا ...... واخبار مش حلوة ليه مايتصاب الظابط ولا يموت حتى ايه المشكلة ...... مش الفلوس معاك هاتهم وتعالى على البيت انا مستنيك .......
سيف : مابلاش البيت دلوقتى خليها بكره الوقت متأخر والدكتورة فريدة ممكن تعمل مشاكل ..... ده مؤكد حتعمل مشاكل انت مش فاكر اللى حصل .....
سليم بغضب : دكتورة فريدة ايه بقولك تعالى ده بيتى وانا مستنيك ملكش دعوة بدكتورة فريدة ......
سيف : حاضر ...... مسافة السكة واكون عندك .....
وبعد ربع ساعة وصل سيف لبيت سليم ومعاه الفلوس اللى قاله عليها ....... ولقى سليم قاعد فى أوضة الضيوف بقى ومجهز قعدة وشيشة وحاطط ازايز بيرة ....... استغرب سيف وأتفاجأ من المنظر وقاله .....
سيف : ايه اللى انت عامله ده بلاش فى البيت ممكن فريدة تصحى او اى حد من البنات .....
سليم : النهاردة بقى لازم نحتفل للصبح بالنجاح ده ...... خد بالك الأخبار دى حتوصل للظابط جاسر ....... ياريت تختفى اليومين دول ومتجليش البيت كتير بس بعد احتفال النهاردة ......
سيف : ماشى ...... بس انا خايف برده كنا اعدنا احسن فى اى مكان بعيد عن البيت ممكن فريدة تصحى وتحصل مشكلة زى المرة اللى فاتت ......
سليم بغضب : انا مش عاوز مناقشة وكلام كتير ....... ده بيتى ياسيف محدش حيقيد حريتى فى بيتى فهمت اشرب وانت ساكت بقى .....
وبعد شوية قامت الدكتورة فريدة من النوم على صوتهم وحركتهم ........ جرت بسرعة على الصوت ودخلت عليهم فى أوضة الضيوف واتصدمت بيهم ومن المنظر اللى شافته .....
فريدة مصدومة وبعصبية : ايه ده ؟؟؟؟؟ سكر وشرب وقرف فى بيتى ...... انتم فاكرين نفسكم قاعدين فين ؟؟؟؟؟
سليم بغضب : واااطى صوتك يافريدة ...... ده مش بيتك لوحدك ......
فريدة : انت سكراان ياسليم ؟؟ طلقنى ..... طلقنى ..... ياسليم انا مش عاوزة اعيش معاك بعد كده ....
سليم بغضب : قولت واااااطى صوتك احسن البنات تسمعك ويصحوا ....
فريدة بغضب : هوه انت بتتكسف اوى ....... ولا بتخاف عليهم وعلى مشاعرهم انت لو بتخاف عليهم وعامل حساب لبناتك مكنتش تعمل القرف ده...... طلقنى ياسليم قولت .....
سليم : انتى طالق طالق يافريدة ........ طالق بالتلاته يافريدة ......
سيف : ايه ده يا سليم ؟؟ متتسرعش كده فى لحظة غضب ....
فريدة لسيف بغضب : اسكت انت خالص .....انت سبب المصايب دى كلها ....
سيف : ربنا يسامحك يا دكتورة .....
سليم : ارتاحتى كده يافريدة ؟؟ انتى طالق ياحبيبتى ....... وورقتك حتوصلك بكره وابقى ورينى بقى حتربى البنات ازاى وحتحافظى عليهم ازاى وتعلميهم الادب والاخلاق ياسيادة الدكتورة وابقى فهميهم بقى اد ايه ابوهم كان وحش وميتعاشرش متنسيش دى ......
فريدة : ايوه حربيهم لوحدى وحيبقوا احسن ناس ....... البنات حيعيشوا بعيد عنك احسن ماانت معاهم ابعد عننا احسن بقى .....
سليم :ماشى بس متبقيش تنسى كلامك ده ...... وانا سايبلك البيت كله وماشى .... يلا بينا ياسيف ......
وخرج سليم وسيف من البيت ومعاهم الفلوس اللى كان جايبها سيف ...... وراحت راجعة فريدة شوية وبصت نحية أوضتها لقت ماسة وملك واقفين بيعيطوا جمب الباب اتصدمت فريدة لما شافتهم راحت رايحلهم وقالتلهم ......
فريدة : انتوا واقفين هنا من امتى ؟؟؟؟
ملك : من ساعة ما بابا طلقك ياماما وسمعنا كل حاجة .... ليه عملتى كده ؟؟؟
فريدة : انا عملت كده عشانكوا ...... عشان خايفة عليكوا .....
ماسة : عشان خايفة علينا ياماما ...... تخلى بابا يسيبنا كده ويمشى .....
فريدة : منغير كتر اسئلة ياماسة ...... انا عارفة كويس انا بعمل ايه واتفضلوا على اوضتكوا بقى الموضوع مش محتاج عياط ...... المفروض ده كان يحصل من زمان .....
دخلت ماسة وملك على أوضتهم بعد كلام فريدة والحزن مالى قلبهم ودموعهم فى عينهم من اللى حصل ....... لحد ما ناموا .....
وبعد مامشى سليم مع سيف .......... فكر شوية لقى نفسه مش عارف يروح على فين راح باصص لسيف وقاله ........
سليم : انت فى حد عندك فى البيت ؟؟؟
سيف : مفيش غير امى ..... احنا عايشين لوحدنا .....
سليم : طب ينفع اروح معاك على البيت كده لحد النهار مايطلع ....... وبعدين اتصرف فى شقة الصبح ......
سيف : ينفع طبعآ ومنغير أستاذان ده بيتك ......... مفيش غير امى فى البيت وانت حتقعد معايا فى اوضتى لحد الصبح ..... والنهار يطلع ونبقى نتصرف .... حتى امى غير الدكتورة فريدة خالص بتضحك وبتهزر وبتحب الناس متقلقش مش معقدة ....
سليم : طب يلا بينا .......
دخل سيف وسليم الشقة ........ وراحوا على اوضة سيف وناموا علطول من كتر التعب ......
والصبح ........ قام سيف من النوم وخرج بره الأوضه وراح لأمه ( سهر ) ......
سيف : صباح الخير ياماما .....
سهر : صباح النور ياسيف .... كل ده نوم ؟؟؟
سيف : أصل معايا ضيف ..... ورجعنا متاخرين .....
سهر : مين الضيف ده بقى ..... هو نايم فى أوضتك ؟؟
سيف : اه نايم فى اوضتى ..... ده صاحب الشغل بتاعى بيشتغل معايا يعنى ......طلق مراته امبارح وجه معايا النهاردة بس ....... وبعدين حيشوف شقة ......
سهر : وليه النهاردة بس ؟؟ البيت بيتكوا خليه على راحته لحد ما يشوف شقة ....
بص سيف ناحية الاوضة لقى سليم قام من النوم ....... راح قايل لامه بصوت عالى : اهوه صحى اهوه .....
سيف لسليم : شوفت ياسليم ماما مش زعلانه ازاى انك جيت معايا........ وبتقولك خليك براحتك لحد ما تشوف شقة ......
سهر : اه طبعآ ....... مش هيه دى الأصول ولا ايه .....
سليم : انا متشكر ليكى جدآ يامدام ...... امك بتعرف فى الاصول ياسيف ......
سيف : شوفت بقى زى ماقولتلك ..... غير الدكتورة فريدة خالص ......
همس سليم لسيف وقاله : عاوزك فى كلمة لوحدنا ....
راح واخده سيف ودخلوا على الاوضة وقالوا : فى ايه ؟؟
سليم : هيه دى امك ؟؟!!
سيف : اه امى ليه ؟؟
سليم : اصل شكلها صغير اوووى وحلوة ..... انا أتفاجات بيها ..... فكرتها أكبر من كده .....
ضحك سيف وقاله : مش انا قولتلك غير الدكتورة فريدة خالص .... مصدقتنيش .....
سليم : اه طبعآ غيرها خالص .... تجوزنى أمك ياسيف ؟؟
سيف : انت بتتكلم جد ؟؟ ولا بتهزر .....
سليم : هوه الكلام ده فيه هزار .....
سيف : انا معنديش مانع بس لو هيه وافقت ......ده من ساعة ابويا مامات مجبتليش سيرة الجواز خالص ......
سليم : انت بس قولها ....... وانا عارف انها حتوافق .......
( من داخل قسم الشرطة )
وصل الظابط ( جاسر ) لقسم الشرطة بعد ما أنتهت مأموريته ورجع من السفر .....
وقابله الظابط احمد مقابلة حلوة ورحب بيه كتير ......
وبعدين بلغه بكل اللى حصل وهو غايب وإن فيه ظابط أتصاب ولسة فى المستشفى ..... وهما هربوا ومعرفوش يمسكوا حد منهم ......
اتعصب جدآ الظابط ( جاسر ) من كلامه وقاله بغضب شديد : وأنتوا كنتوا فين بقى لما كل ده حصل كنتم نايميين ؟؟؟ امال لو مكنتش مبلغكم بكل حاجة وقولتلكم تعملوا حسابكم كنتم عملتم إيه ؟؟؟
هوه سليم مفيش غيره كنت عارف إنهم حيستغلوا فرصة سفرى ..... لو كنت موجود مكنش حصل كل ده ...... بس ماشى ماشى ياسليم مش حتفلت منى المرة الجاية .... نهايتك على ايدى ياسليم .....