رواية بنت السارق
الفصل السادس ....
بقلم سالى مصطفى
ورجعت ماسة على الكليه بعد مقابلة جاسر فى القسم ....... واخدت اختها وروحت على البيت ....
دخلت ماسة وملك البيت وماسة مبسوطة على الآخر بقى وبتقول لامها : ماماا يامامااا شوفتى الظابط رجعلى النهاردة كل حاجاتى اللى اتسرقت منى ومش ناقصين اى حاجة ....
فريدة بفرح : طب كويس يا ماسة ربنا وقف معاكى والظابط طلع كويس ...
ماسة : كويس اوى ياماما ...
ملك بضحكة :طب ممكن كفاية كلام عن الظابط بقى ونشوف حناكل ايه عشان انا جعانه ...... انتوا مش جعانين ولا ايه ؟؟؟
فريدة : روحوا غيروا هدومكم طيب ... اكون انا حطيت السفرة ....
ماسة : ماشى يااحلى ماما فى الدنيا ...
ملك تهمس لماسة فى اذنها : اسكتى انتى يابتاعة الظابط ... اقول لامك انك ....
قاطعتها ماسة بسرعة وقالت : بس ياملك امك حتسمع ...
وفى آخر اليوم ........ فضلت ماسة سهرانة لوقت متاخر مستنية مكالمة من جاسر كانت متوقعة انه يكلمها ويطمن عليها ..... لاحظت عليها اختها ملك ان فى حاجة شغلاها ومش مخلياها عارفة تنام ...
ملك : مش حتنامى ياماسة ؟؟
ماسة : لا مش جايلى نوم لسة ياملك ...
ملك : مش جايلك نوم ؟؟؟ وواخدة التليفون جمبك ليه؟؟ اااه انتى مستنية مكالمة من الظابط صح ..
ماسة : صح يافالحة ايه العبقرية دى كلها .... تفتكرى حيتصل ؟؟
ملك بضحة : افتكر انك تنامى اريحلك .... بدل ماانتى تاعبة نفسك حيتصل ولا لا ....
ماسة بغضب : طب نامى انتى بقى ....... وخليكى فى حالك .....
وفى نفس اللحظة رن تليفون ماسة ..... بصت ماسة للفون بسرعة وقالت : ملك ملك بيتصل اهوه ...
ملك باستغراب : يابنتى ده رقم ممكن يكون مش هوه ... انتى ازاى مخدتيش رقمه ؟؟
ماسة بقلق : انا مفيش حد بيطلبنى غريب اكيد هوه .... وفتحت ماسة الخط ...
ماسة : الوووو ..
جاسر : الوووو عاملة ايه يا ماسة ؟؟
ماسة : مين ؟؟
جاسر : معقول مش عارفة صوتى ؟؟
ماسة : الظابط جاسر صح ؟؟
جاسر : لا .... جاسر وبس منغير ظابط ..... احنا مش فى القسم دلوقتى ياماسة ...... صح ولا ايه ؟؟
ماسة : صح ... جاسر ...... كده احسن برضو ...
جاسر بحب : تعرفى ياماسة انى بشكر الحرامى اللى سرقك ده عشان خلانى اشوفك واقابلك ..... انتى اجمل صدفة فى حياتى بجد .....
ماسة : كتير عليا الكلام ده ... بس انا اول ماشوفتك كنت خايفة منك الصراحة ... بس بعد كده حبيت..... وسكتت ماسة مكملتش الكلمة .....
جاسر : بعد كده ايه يا ماسة كملى ....
وفى نفس اللحظة دخلت فريدة أوضة البنات وفتحت الباب ..... اتخضت ماسة وراحت قفلة الخط مع جاسر بسرعة فى نص المكالمة ...
ماسة بقلق : فى حاجة ياماما ؟؟؟؟
فريدة : كنت بشوفكم صاحيين ولا نمتوا ..... عشان كنت عاوزة اقولكم حاجة كده ....
ملك وماسة بقلق فى صوت واحد : فى ايه ياماما حصل حاجة ؟؟
فريدة : متتخضوش مفيش حاجة........ بس كنت عاوزة اقولكم انى انى حجوز ...
ماسة وملك مصدومين بصوت واحد : تتجوزى ؟؟؟؟ !!!
ماسة : ازاااى ياماما حتتجوزى بعد بابا ...... وتجيبى كمان راجل غريب يقعد معانا فى البيت غير بابا ؟؟؟
ملك : انا مش مصدقة اللى بسمعه ده ...... حتتجوزى ليه ياماما ؟؟؟
فريدة بغضب : ايه هوه ده اللى مش مصدقة اللى بسمعه وتجوزى ليه وراجل غريب ايه الكلام ده ؟؟؟
ده حقى زى ما هوه حق ابوكم برده انه يجوز اشمعنا انا بقى ............ وبعدين انا مش باخد رايكم عشان توافقوا ولا لا ده قرارى وانا اخدتوا ...... وحجوز الشهر ده كمان انا ببلغكم بس عشان تبقوا عارفين ......
ماسة بوجع : وحتتجوزى مين بقى ياماما ؟؟؟ مين سعيد الحظ ده ؟؟؟
فريدة : حتجوز دكتور فى الجامعة ياماسة ...... راجل محترم واحسن من ابوكى الف مرة .....
ملك بغضب : مفيش حد احسن من بابا .....
فريدة : يوووو بقى ........ انا قولتلكم وخلاص ....... انا دفنت نفسى عشرين سنة مع ابوكم واستحملتوا كل ده ........ وده دلوقتى حقى انى اتجوز راجل مناسب ليه واعيش حياتى .....
ده بدل ما تفرحوا ..... انى حجبلكم راجل محترم حيخاف عليكم اكتر من ابوكم .... وياخد باله منكم ويشوف طلباتكم ....
ضحكت ملك وماسة باستهزاء جامد من كلام فريدة .... وقالوا : يخاف علينا ؟؟؟
وردت ملك بسخرية وقالت : اعملى اللى انتى عوزاه ياماما ..... دى حياتك وانتى حرة ....
ماسة بغضب : ايه اعملى اللى انتى عوزاه ده ؟؟؟؟ لابقى دى مش حياتك لوحدك ياماما ..... دى حياتنا كلنا واحنا مش موافقين على كده .....
فريدة بغضب : وانا قولت انى مش باخد رايكم ..... ولو مش عاجبكوا ابقوا روحوا اقعدوا عند ابوكم مدام بتحبوه اوى كده ...... وخرجت فريدة بره الاوضة بسرعة وهيه متعصبة من كلام بناتها .......
ملك : شايفة امك ياماسة ...... انا مش عارفة ايه اللى بيحصلنا ده ؟؟؟؟
ماسة : مش حتجوز ياملك ..... امك لازم ترجع عن القرار ده باى شكل .... احنا لازم نوقفها ......
ملك : انا حنام ياماسة وبكره نتكلم ...... عشان انا بجد تعبت من كل حاجة ....
ماسة بقلق : بس لازم نلاقى حل ياملك ...... مش ممكن راجل غريب يخش البيت بعد بابا.......
ماسة : ملك .... ملك انتى نمتى ؟؟ اووووف ....
وتانى يوم ....... بعد ماخلصت ماسة محاضراتها اتصلت بجاسر علطووووووول .....
ماسة : الوووو جاسر ..
جاسر : حلوة جاسر منك كده ...
ابتسمت ماسة بكسوف وقالت : معلش ياجاسر ماتزعلش منى ..... امبارح انا قفلت الخط معاك على فجأة .....
جاسر : كنت حاسس ان فى حد جمبك ..... وانتى فجأة اتلخبطى ....... مين بقى بابا ولا ماما ؟؟
ماسة : لا ماما .... اصل ماما دخلت عليا الاوضة وانا بكلمك فجأة اضطريت اقفل الخط ......
جاسر : طب قولى لماما بقى ان فى واحد بيحبنى وعاوز يقابلك ........ عشان بعد كده متهربيش من ماما تانى وانتى بتكلمينى ......
ماسة بفرحة : انت بتقول ايه ياجاسر ؟؟ بتحبنى ؟؟
جاسر : اه ياماسة من اول يوم شفتك فيه .... مكنتيش حاسة بكده ولا ايه ؟؟
ماسة : كنت حاسة طبعآ .... بس كان نفسى اسمعها منك ....
جاسر : واديكى سمعتيها ......... انا مسافر بعد بكره مأمورية تبع الشغل واول ماارجع من السفر ..... حقابل باباكى نفسى اوى اتعرف على اهلك ياماسة ..... بس خدى بالك لازم اشوفك قبل مااسافر ماشى .....
ماسة بضحكة : اكيد طبعآ ياجاسر .......... كلامك ده فرحنى اووى ...... انت اخدت كلام كتير من على لسانى .......
جاسر : عشان بحس بيكى ياماسة ...... اسيبك انا دلوقتى عشان عندى شغل ..... وحكلمك تانى .... لا اله الا الله ...
ماسة : ماشى حستناك ...... محمد رسول الله .....
ملك : خلاص .. خلصتى ياماسة .... مش يلا بينا بقى .....
ماسة : يلا بينا ...... بس انا عاوزة اطمن على بابا وحشنى اووى ......
ملك : ابوكى مش فايقلنا دلوقتى خالص ياماسة ولا حيفكر يتصل بينا اصلآ ويطمن علينا ...... العروسة الجديدة نسته كل حاجة انا كلمت سيف ولسة قايلى كده ......
ماسة : معقوول ؟؟ طلاق بابا وماما كانت اكبر غلطة فعلآ .....
وفى آخر اليوم وفى وقت متاخر من الليل ...... اتصل سيف بسهر على الموبايل ........
سيف : عاملة ايه ياعرووسة ؟؟ سليم فين ؟؟
سهر : كويسة ..... سليم نايم دلوقتى ...
سيف : طب كويس ...... اتصلت فى الوقت المناسب يعنى ...
سهر : تقريبا كده .... فى حاجة حصلت ولا ايه ؟؟
سيف : لا مفيش كنت بطمن عليكى ...... احنا خطتنا ماشية حلو اوى لحد كده ........ ودخلت على سليم حوار انك امى مشكش فى اى حاجة مثلتى الدور صح ياسهر ...... ركزى اكتر فى اللى جاى بقى .......
سهر : ايه هوه اللى جاى بقى ؟؟
سيف : تعرفى كل حاجة عن سليم وعن شغله كله وعن كل ثروته دى ........ بيشيل فلوس فين ارصدته فى البنوك كلها .......انا لازم احط ايدى على ثروة سليم كلها .......
وورينى شطارتك بقى وتخليه يكتبلك الشركة باسمك ....... سليم لازم يرجع شحات زى ماكان ....... سليم لازم يقع فى الفخ اللى انا رسمتهوله ..... وانا املك كل حاجة .... قصدى انا وانتى يعنى ....
سهر : اطمن ياسيف .... كل اللى انت عاوزه حيحصل .....