رواية بنت السارق
الفصل الرابع ....
بقلم سالى مصطفى
صوتت ماسة كتييير من منظر الاتنين دول وشكلهم المرعب
ومن اللى حصل معاها بس محدش قدر ولاعرف يلحقها......
الموضوع كله كان فى لمح البصر .....
وهربوا الاتنين بسرعة وسابوها فى الشارع بعد ماسرقوها
...... ومبقتش عارفة تعمل ايه ولا عارفة حتروح البيت ازااااى
ولا توصل لملك اختها ازااااى وتكلمها ازاااى بعد ماسرقواا منها الموبايل ...
اتملا قلب ماسة بالخوف وفضلت تعيط جامد خصوصآ انها
كانت بعيدة عن البيت مش معاها فلوس تروح ......
اتلمت الناس عليها من صوت صراخها وعياطها ونصحوها انها
تروح لاقرب قسم شرطة وتبلغ عن اللى حصل معاه ده ..... وان ده اسلم حل ليها ....
اقتنعت ماسة برأيهم شوية وهيه خايفة جدآ..... واخدها
واحد من الناس اللى كانوا معاها ووصلها لاقرب قسم شرطة عشان تقدم بلاغ .....
وصلت ماسة للقسم وقالت للظابط احمد انها عاوزة تعمل بلاغ سرقة واعتداء عليها .....
دخلها الظابط احمد علطووول مكتب الظابط جاسر منغير مناقشة ...... ودخلت ماسة مكتب الظابط جاسر وهيه خايفة وبتعيط ....
الظابط جاسر : اتفضلى تعالى .... بتعيطى ليه ؟؟؟
ماسة بخوف باكية : عاوزة اعمل بلاغ بسرقة شنطتى وموبايلى ...
الظابط جاسر : طب وبتعيطى ليه ؟؟؟؟ هدى نفسك كده واحكيلى كل اللى حصل ....
وراح علا الظابط جاسر صوته جااامد وقال : احمد........ احمد..... هات كوباية ليمون هنا حالآ دلوقتى ...
دخل الظابط احمد وقالوا : حاضر يافندم ..
ماسة باكية : لا مفيش لزوم ...
الظابط جاسر : لا حتشربى عشان تهدى وتفهمينى ايه اللى حصل ..... انتى هنا فى امان..... بتعيطى ليه بقى ؟؟؟
ماسة : زادت ماسة فى العياط اكتر .....
الظابط جاسر باستغراب : انا مش شايف سبب لعياطك ..... طب احكيلى اللى حصل اتعرضتى للسرقة ازاى ؟؟؟؟
ماسة بصت للظابط بخوف وقلق وقالت : كنت واقفة مستنية اختى فى الشارع .... لقيت اتنين شكلهم مرعب وقعونى فى الارض فى الشارع وسرقوا شنطتى وموبايلى .....
الظابط جاسر : تعرفيهم قبل كده الاتنين دول ؟؟؟
ماسة بسرعة وخوف : لا ولا عمرى شفتهم ...
الظابط جاسر : الكلام ده حصل امتى ؟؟
ماسة بخوف : لسة حالا قرب الكلية بتاعتى ....
الظابط جاسر : انتى بتدرسى فى الكلية لسة ؟؟ تقدرى توصفيلى شكلهم ومواصفاتهم بالظبط ؟؟
ماسة بخوف : هما كان شكلهم يخوف لكن مش فاكرة مواصفاتهم اوى ...... انا كنت خايفة منهم اوى مركزتش فيهم ....
دخل الظابط احمد للمكتب بعد ما خبط على الباب ..... وحط كوباية الليمون قدام ماسة وخرج علطووول بره المكتب ...
راح بص الظابط جاسر لماسة وقالها : اشربى الليمون ...
بصتله ماسة بكسوف وقالتله : حاضر حشرب ....... ومدت ايدها ماسة وشربت الليمون وهدى عياطها شوية وبدأت تطمن لجاسر .....
سكت الظابط جاسر خااالص ومتكلمش مع ماسة ولا كلمة وهيه بتشرب الليمون ..... وفضل باصصلها جامد وساكت لحد ما خلصت ....
بعد كده قالها : بقيتى احسن دلوقتى ؟؟
ماسة : الحمد لله احسن ..... شكرآ ....
الظابط جاسر : الحمد لله ...... طب وحادثة السرقة دى تستاهل كل العياط ده اللى كنتى بتعيطيه وانتى داخلة انا قولت فيه كارثة اكبر من كده ....
ماسة بضحكة : اصل انا اول مرة ادخل القسم واتكلم مع ظابط ...... الناس هيه اللى قالتلى أعمل كده واروح ابلغ كنت خايفة اوى منك ومن كل الناس اللى هنا .....
الظابط جاسر بابتسامة : ده اكتر مكان امان ليكى ..... اديكى اعدة معايا اهوه ..... هو انا بخوف ؟؟؟
ضحكت ماسة وقالت : لا مش كنت فكراك كده خالص .... اول مرة اتعامل مع ظابط ....
الظابط جاسر : انتى اسمك ايه بقى ؟؟
ماسة باستغراب: ليه ؟؟؟
ضحك الظابط جاسر وقالها : عشان المحضرر .... اكتب فيه اسمك ....
ماسة بضحكة : اسمى ماسة ....
الظابط جاسر بفرحة : الله ... اسمك جميل ماماسة ........ ده احلى اسم انا سمعته بجد .... ممكن تدينى رقم موبايلك ....
بصتله ماسة باستغراب مرة تانية وقالت : رقم موبايلى؟؟ ليه ؟؟ ده كمان عشان المحضر ؟؟
ضحك جاسر ضحكة عاليه وقالها : لا....... ده عشان اتتبع الخط بتاعك اللى كان فى موبايلك واعرف مكانه موجود فين دلوقتى ..... واقدر اوصل للى سرقوكى وارجعلك حاجتك تانى ....
ماسة متفاجأة : ايه ده !!!!! ممكن بجد ؟؟؟
جاسر : ده مش ممكن ده اكيد .... انا حستناكى بكره فى نفس الميعاد ده بالظبط حتيجى وتستلمى شنطتك كاملة وموبايلك منى ....
ماسة : معقول ازاااى ؟؟؟
جاسر : ده شغلى بقى ياماسة ...هااااا لسة خايفة من الظباط ....
ماسة بابتسامة : لا مش خايفة خالص ....
وفجأة راح مخبط الظابط احمد على الباب ودخل بسرعة ....راح بصصله الظابط جاسر بغضب وقاله : فى ايه ؟؟؟
الظابط احمد : عاوزك فى كلمة بس ....
قام جاسر من مكتبه وخرج مع الظابط احمد وقاله بره المكتب : فى ايه ؟؟؟ ايه اللى حصل ؟؟؟
احمد : عملت التحريات زى ما سيادتك قولتلى على سليم لقيت اكتر مكان كان بيتردد عليه بيت صاحبه سيف ...... واكيد هوه موجود هناك دلوقتى ....
جاسر : تمام كويس جدآ .... استنانى بقى حخلص واطلع معاك على بيت سيف ....
احمد : ماشى .. حستناك ........
ورجع تانى جاسر المكتب واول ما دخل المكتب علطوول .... راحت ماسة قامت من مكانها وقالتله حمشى انا بقى انا عطلتلك عن شغلك .....
جاسر : ولا عطلتينى ولا حاجة .... على فكرة انا مش حعمل محضر ليكى ...... ولما سالتك عن اسمك انا كنت عاوز اعرفه بس .... بس مكنتش اعرف ان اسمك حلو كده ....
اتكسفت ماسة من كلامه وقالتله : ماشى ..... اكتبلك رقمى هناا ....
جاسر : اكتبى ياماسة..... انا حتتبع الخط وحرجعلك حاجتك منغير محضر .....
بصتله ماسة بخجل وكسوف تانى وقالته : كتبته انا حمشى بقى ...
جاسر : استنى تمشى ايه ؟؟ انتى معاكى فلوس تروحى البيت ....
ماسة بتردد : ماهوو ...
طلع جاسر لماسة فلوس من جيبه وقالها : مفيش ماهوو .......اتفضلى دول عشان تعرفى تروحى ....
ماسة : بس انا مش حينفع آخد منك فلوس ....
جاسر : ليه يعنى ؟؟؟؟ ياستى اعتبريهم سلف وابقى روديهم تانى ..... انتى مش حتيجى بكره عشان تاخدى حاجتك اللى اتسرقت ....خدى بقى متكسفيش ايدى ....
مدت ماسة ايديها واخدت الفلوس بكسوف وقالته : شكرآ انا تعبتك اوى معايا ....
رد الظابط جاسر بابتسامة وقال : مفيش تعب .... حستناكى بكره ....
ماسة بابتسامة : حاضر حاجى ..... وخرجت ماسة من مكتب الظابط ونفسيتها مرتاحة ومطمنة اوووى ....... لدرجة انها نست اللى حصلها فى الشارع من مقابلة الظابط جاسر الحلوة دى ........وطيراان على البيت ......
ملك بقلق : انا حروح لاختى بقى ياسيف ....... انا قلقانه عليها عشان مش بترد عليا زمانها زعلانة منى عشان اتاخرت عليها ....... احنا أتاخرنا اوى ياسيف عليها ....
سيف بغضب : يابنتى انتى حرة هيه مش ولية امرك .... اووووف .......روحى ياملك عشان حتبدأى تعصبينى ... انا كمان حروح ....
ملك : معلش ياسيف ...حشوفك تانى ماشى ....
سيف : اكييييد .... ومشت ملك لاختها .... ومشى سيف وروح بيته .....
وخرج الظابط جاسر من المكتب بعد ما خلص شغله واخد احمد وطلع على بيت سيف علطوووول .....
وخبط الباب على سيف براحة عشان ميحسوش بحاجة من خبطتهم ويدوهم الامان ...... كان سيف ساعتها لسة داخل الشقة حالا لقى الباب بيخبط .....
فتح سيف الباب علطووول....... واتصدممم واترعش من الخوف اول ماشاف الظابط جاسر قدامه ....
سيف بقلق جامد : فى ايه ؟؟؟
زق جاسر سيف زقة خفيفة كده على جمب وقال : عن اذنك كده شوية ...
وبص لاحمد وقاله : فتش البيت ....
اترعب سيف منهم وقال لجاسر : انا عاوز اعرف فى ايه ؟؟ انت بتدور على حاجة عندى ؟؟؟
جاسر : دلوقتى حتعرف كل حاجة ...
وبعد التفتيش ... الظابط احمد : ملقناش حاجة يافندم ...
جاسر بغضب شديد : ازاى ملقتوش حاجة فين سليم ؟؟ وراح باصص لسيف بغضب وقاله : فين سليم ياسيف ؟؟
سيف : سليم ؟؟؟؟ سليم فى بيته ايه اللى حيجيبوا هنا ؟؟
جاسر بغضب : لا سليم مش فى بيته .... انت عارف كويس انا اقصد ايه ......سليم فين ياسيف ؟؟؟؟
سيف : انا معرفش اى حاجة عن اللى انت بتقوله ...... وسليم مش هناا ....
جاسر .بغضب شديد : بتدارى عليه يعنى .... ماشى ماشى ياسيف ....
وبص لاحمد وقال بغضب شديد : يلا بينا يااحمد ....
خرج جاسر من بيت سيف وهوه جمرة غضب ....... عشان ملقاش سليم ..... ولا لقى الفلوس اللى كان عامل حسابها ....
وبسرعة اول ما مشى جاسر من البيت ..... راح اتصل سيف بسليم على الموبايل علطووول ...
سيف بقلق : الووو ايوه ياسليم انت فين ؟؟
سليم : انا مع سهر ياسيف خلاص اشترينا الشقة ... فى حاجة ولا ايه ؟؟؟
سيف : فى مصيبة ........الظابط جاسر كان عندى هنا فى البيت دلوقتى ياسليم وقلب عليك الدنيا ....... والشر مالى عينه ... خد بالك من نفسك بقى .....
سليم : انت بتقول ايه بجد ؟؟؟؟ ايه اللى وصل جاسر عندك ؟؟؟
سيف : مش عارف انا مش مطمن ..... وسأل عليك بالاسم ....