رواية #لست_ملكي
(الجزء الرابع)
#بقلم_آيه_عادل
رنا : انا اسفه اسفه والله
خالد بضحك : يخربيتك يا شيخه كنت هموت من الخضه
رنا : اسفه والله بعد الشر عنك
خالد : ولا يهمك ياستي ، انتي ايه اللي جابك هنا صحيح
رنا : انا وماما ورانيا كنا بنوضب البيت بقي وبنفرش انت عارف ان رقيه مشغولة عشان الامتحانات
خالد : عارف دي حتي مشغوله عني
رنا : هي تقدر برضو انت عارف أنها بتحبك وعايزه تنجح عشان تبقي فاضيالك بقي بعد كده ربنا يسعدكم
خالد : يا رنا انا زي اي شاب نفسي أحس باهتمام
رنا : فاهماك بس انت اعذرها هي بتحبك ودي ظروف واديك شايف كلنا مضغوطين بين شقتكم وشقه رحيم وخديجه ربنا يتمملكم بخير
فجأه النور قطع وانا بترعب من الضلمه وبالذات لو في مكان مش مكاني اترميت في حضن خالد المصيبه انه مابعدنيش عنه وفي ثانيه لقيت نفسي مغمضه عيني ومستسلمه ولقيته بيقولي انتي كويسه ماتختفيش وابتديت احضنه واقوله انا خايفه من الضلمه لقيته بيحضني اكتر وبيقولي انا معاكي بصيتله وحسيت انه هو كمان مبسوط من اللي بيحصل كان خلاص هيقرب من خدي فجأه سمعت الباب بيخبط فوقنا احنا الاتنين وخالد شغل الكشاف وفتح الباب لقيت ماما ورانيا
الام : ايه يا خالد يا حبيبي في حاجه ولا ايه
خالد : مافيش يا ماما انا كنت بجيب الشنطه دي فيها شويه هدوم لسه جايبهم قولت اطلعهم علي هنا لقيت رنا بتعيط عشان النور قاطع
رانيا : أيوه يا بني اصل رنا جبانه جدا ههههههههههه
رنا : الدور والباقي علي اللي سابتني وراحت تاكل انا مش هاجي هنا تاني علي فكره واقعد لوحدي انا لما النور يجي همشي ومش هاجي تاني
النور لما جه وروحت لقيت رقيه نايمه ولما سمعتني اني جيت لقيتها قامت قالتلي:
ايه يابنتي انتو جيتو
رنا: اها ياختي انا بس اللي جيت هما هناك انا طلع عيني علي ماخلصت فرش دولابك ومسحت الاوضه والنور قطع عليا ولولا ستر ربنا خالد جه ونور بالكشاف بتاع موبايله وفي نفس الوقت لقيت ماما ورانيا جم والنور اول ماجه جيت
رقيه : معلش يا حبيبتي انا اسفه تسلم ايدك وعقبال ما افرشلك شقتك بايدي
رنا : ان شاء الله انا داخله انام
دخلت اوضتي و حسيت بشعور غريب اوي خوف وفرحه وتوتر ياتري هيقول عليا ايه انا ازاي أعمل كده اصلا انا خاينه ووحشه اوووي يارب سامحني انا ماكنش قصدي
فجأه لقيت التليفون بيرن ايه ده معقول اللي بيحصل ده خاااالد بيكلمني انا رديت وياريتني مارديت
خالد : ألو رنا انتي معايا ألو
معرفتش ارد بسرعه من الصدمه استجمعت نفسي ورديت
رنا : أيوه يا خالد ازيك
خالد : الحمد لله انتي بقيتي كويسه
رنا : أيوه الحمد لله بقيت كويسه
خالد : انا عارف ان اللي حصل فوق ماكنش المفروض يحصل بس انا والله مش عارف حصل ازاي انا اسف
رنا : انا اللي اسفه يا خالد اسفه علي كل حاجه انا عارفه ان انت بتحب رقيه و مع ذلك اتماديت في الغلط
خالد : انتي بتعيطي ليه دلوقتي
رنا : عشان انا بحبك ، أيوه بحبك من زمان وانت عمرك ما حسيت بيا طول عمري بحاول ألفت نظرك وانت كنت معتبرني هوا حسستني اني وحشه من كتر تجاهلك ليا انا بقيت وحشه قدام نفسي واديني دلوقتي بحبك وانا عارفه انك بقيت لأختي مش ليا انا موجوعه يا خالد موجوعه
خالد : رنا والله انا معرفش كل اللي انتي بتقوليه ده
رنا : انا اللي كلمتك وقولتلك اني بحبك ومع ذلك افتكرتني رقيه
خالد : انا اسف بجد انا اسف ولو عايزاني ماجيش عندكم او ماتشوفيش وشي هعمل كده
رنا : اعتبرني متقولتش حاجه وعامل رقيه كويس وخد بالك منها وانا هعاملك زي اخويا وانسي اي حاجه او اي كلام دار بينا
بعد اسبوع من اليوم ده جت عمتي من ايطاليا وكان معاها ابنها حاتم وكان بقالنا 10سنين ماشوفناهمش طبعا جم قبل فرح رحيم ورقيه باسبوع وقعدو معانا عمتي كانت مبسوطه اوي وحاتم كان عمره 26سنه شاب وسيم وشيك جدا قضينا الاسبوع ده كله خروجات وسهر كان بيبقي معانا خالد ورقيه ورحيم وخديجه كان حاتم بيحاول يلمحلي انه معجب بيا وكنت بتعمد ابين اهتمامي بيه قدام خالد اللي كان دايما عينه عليا
كنا قاعدين كلنا وحاتم قال :بقولك ايه يا طنط بقولك يارحيم اسمعو ياجماعه انا عايز اتجوز رنا
انا حسيت ان جسمي تلج ووقعت العصير من ايدي
خالد بصلي اوي وبص ل حاتم
رحيم : والله ياتوما انا موافق بس الرأي رأي رنا