رواية " رفيق روحي"
الفصل التاسع عشر
اتجوزت عليا يا عمر و خلفت كمان من غير ما تقولي طب كنت
قولي خليني علي الاقل اشوف بنتك انا نفسي اشيل ولادك
ياتري طلعت شبههك ولا شبه مامتها.انا المفروض مكنش انانيه
اكيد انت مقولتش ليا عشان مزعلش و احس بالنقص الي
عندي .انت ليك حق تتجوز يا عمر انت ما عملتش حاجه غلط
بس المفروض تعدل ما بينا هما محتاجين وجودك اكتر مني و بنتك محتاجه تتربي وسطكم .
بس يا عمر انا متوقعتش انك تعملها انا كنت عايزه اقولك
تتجوز بس عشان ما احسش بالذنب بس كنت عارفه انك مش
هتوافق عشان انت بتحبني ياتري يا عمر لسه بتحبني و لا هي
خدت مكاني في قلبك و ياتري اهتمامك بيا بجد ولا عشان
محسش انك اتجوزت عليا ليه يا عمر تعمل فيا كده انا قولتلك
من الاول اني انانيه في حبي ليه تجرحني كده يا عمر انت
كسرت قلبي الي ما حبش غيرك .
مش عارفه ازاي قدرت تقولي بكل هدوء انك متجوز معملتش
حساب لقلبي الي انكسر
فاكر يا عمر لما قولت لك هيجي يوم و مش هنعرف نعاتب و
هتكون الاجنده دي الطريقه ان احنا نتعاتب وقتها قولت لي
مش هيجي الوقت ده عشان علاقتنا قويه و هنقدر نتعاتب بعد
من غير ما نتحتاج للكتابه.بس جه الوقت الي مش عارفه اعاتبك فيه .
مش قادره اتخيل ان في واحده تانيه بتشاركنا فيك بتشاركني
حبك ليه كده يا عمر ليه تعمل فيا كده مش بتقول اني بنتك
في اب يكسر بنته كده ، انا استاهل منك كده .آسفه يا عمر لو كنت انانيه
حبيبتك او الي كانت حبيبتك
عمر: ملك انا رجعت انتي فين يا ملك يا ملك
راحت فين دي مش بتخرج من غير ما تقولي ارن عليها كده
و كمان ناسيه موبايلها في البيت يا رب منك يا ملك روحتي فين .
ايه ده الاجنده ايه الي مطلعها اكيد ملك كتبت فيها حاجه قبل ما تمشي
ايه الي كاتباه ده يا ملك انتي فهمتي غلط ياتري انتي فين دلوقتي و حالتك عامله ازاي لما دموعك مغرقه الورق امال انتي عامله ايه دلوقتي
عمر: السلام عليكم ازيك يا عمي
ابو ملك: و عليكم السلام يا ابني
عمر: ملك عندك يا عمي
ابو ملك: لا يا ابني مجاتشي هو في حاجه
عمر:خرجت و ناسيه موبايلها قولت اكيد جات عندكم
ابو ملك: لا يا ابني مجاتش شوفها يا ابني و طمني عليها
عمر: حاضر يا عمي
ياتري انتي فين دلوقتي يا ملك ازاي تفكري فيا كده معقول انا اعمل فيكي كده و اتجوز عليكي ازاي انا ما صدقت تكوني من نصيبي اسيبك و اروح اتجوز غيرك
عمر: ملك الحمدلله اني لقيتك كنت عارف اني هلاقي هنا
ملك اول ما شافته مسحت دموعها
عمر: خرجتي من غير ما تقولي ليه
ملك: كنت عايزه اقعد لوحدي شويه
عمر: طب كنتي خاتي معاكي موبايلك
ملك: معلش يا عمر نسيت
عمر: مش واخده بالك ان الوقت اتأخر و انتي بره لوحدك لحد دلوقتي
ملك: محستش بالوقت قدام البحر
عمر: طب يلا عشان نروح
ملك: انا عايزه اروح عند بابا
عمر: نروح دلوقتي و الصبح نبقي نروح
ملك؛ لا انا عايز اروح عندنا
عمر: اهدي يا حبيبتي بلاش تعيطي عمي هيتعب لو شافك كده و مش هيسامحني علي دموعك دي
اهدي بس
عمر: يلا حبيبتي نروح بكره هنروح نشوف يلا يا حبيبتي اسمع مني انتي فاهمه غلط
ملك: انا فهمت كل حاجه و مافيش داعي تقول حاجه
عمر: يلا حبيبتي نروح و نكلم في البيت
عمر: اهدي يا حبيبتي و سمعيني انتي فاهمه غلط
ملك: انا مش قادره اتكلم انا عايزه انام
عمر: اسمعيني الاول و بعدين نامي
ملك: عشان خاطري سبني انام
عمر: ماشي يا حبيبتي نامي و نتكلم الصبح
عمر: صباح الخير يا جميل يلا عشان نفطر انا جهزت الفطار
ملك: انت مش رايح الشغل
عمر: لا مش هروح النهارده هقعد مع حبيبتي
ملك: مش لازم تبين الاهتمام ده يا عمر انا عرفت الحقيقه. روح ليهم و سبني
عمر: يا حبيبتي اسمعني انتي فاهمه غلط
ملك: بس يا عمر بقي مافيش داعي للي بتعمله انا فهمت كل حاجه و ده حقك سبني و روح ليهم
عمر: اروح لمين يا حبيبتي انا مليش غيرك
ملك: عمر سبني لوحدي لو سمحت اخرج و سبني انا مش عارفه ممكن اقول ايه دلوقتي عشان خاطري اخرج
عمر: هخرج بس شوفي الاجنده
ملك: ماشي بس اخرج
عزيزتي لا تسئ الظن بي فأنتي هي زوجتي و حبيبتي و بنيتي و ان شاء المولي ستكونين اماً لابنائي كيف تظنين اني فاعلها فأنتي قد أسرتي قلبي فلا يوجد في قلبي مكان لسواكي يا حبيبتي كيف افعلها و انتي كنتي حلم صعب المنال فكيف انظر لسواكي فوالله لو سرت الكون بحثا عن اخري تشبهك ما وجدتُ لكِ مثيل
حبيبك
عمر: ادخل يا حبيبتي
ملك: يعني ايه الكلام ده
عمر: يعني يا حبيبتي مافيش حد في حياتي غيرك انتي مراتي و بنتي
ملك: يعني انت ما اتجوزتش واحده غيري
عمر: ازاي تفكري اني اعمل كده انا ما حبتش غيرك و لا هحب غيرك و لو مخلفتش منك فأنا مش عايز ولاد من غيرك
ملك: يعني انت بتحبني انا و بس صح
عمر: ايوه يا حبيبتي عندك شك في كده
المفروض ازعل انك فكرتي فيا كده
ملك: اوعدني يا عمر انك مش هتبعد عني
عمر: اوعدك يا حبيبتي بس بلاش دموع كفايه كده
ملك: انت السبب سايبني طول الليل مقهوره
عمر: بحاول طول الليل افهمك و انتي مش عايزه تسمعيني
ملك: خلاص حصل خير
عمر: ايه رأيك نروح اسكندريه اسبوع نغير جو بعد التوتر الي احنا فيه
ملك: هاااا هنروح اسكندريه
عمر: بتقول لي كبرتي و انتي طفله زي ما انتي
ملك:عمر ما تقوليش يا طفله
عمر: هتفضلي طفلتي مهما كبرتي
ملك: هقولك علي سر
عمر: قولي
ملك: انا بحبك تقولي يا طفلتي بحسك باباي
عمر: انتي بنتي يا حبيبتي
......................................
قضينا اسبوع في اسكندريه كان كفيل انه ينسينا التوتر الي حصل في الفتره الي فاتت
ملك: الاسبوع كان حلو اوي يا عمر بس انا واحشني الاطفال اوي ان شاء الله ارجع من بكره الدار و حفظهم
عمر: ربنا يعينك يا حبيبتي
............................
عمر: السلام عليكم
ملك: و عليكم السلام يا بشمهندس
عمر: شكلك مضايقه مني
ملك: مش انا الولاد الي زعلانين منك عشان مش بتيجي تشوفهم
عمر: ان شاء الله اخلص بكره بدري و اجي اشوفهم و جيب لهم هدايا كمان
ملك: مش لازم الهدايا يا عمر كل شويه كفايه اننا نربيهم علي الثواب الي هياخدوه من الحفظ
عمر: عندك حق يا حبيبتي
ملك: اقرا لي سوره مريم عايزه اسمعها منك يا عمر
عمر: حاضر بس قول لي اشمعنا سوره مريم الي بتحبي تسمعيها
ملك: سوره مريم من اقرب السور لقلبي بتبدأ باداب الدعاء و فضل الدعاء و بعدين استجابت ربنا لدعاء سيدنا زكريا و رزقه بيحي رغم كبر سنه و عقم زوجته و كأنها تمهيد للمعجزه الاكبر وهي ان ربنا يرزق السيده مريم بعيسي من غير اب ياااا بحب السوره دي اوي بحسها سوره المعجزات و جايز معجزه تحصل معايا
عمر: ربنا يحققلك الي بتتمنيه يا حبيبتي
ملك: صباح الخير
عمر: صباح النور ايه سر الابتسامه الي علي الصبح دي
ملك: عشان ما تقولش اني زوجه نكديه
عمر: هو انا اقدر بردو يا جميل بس قول لي في ايه
ملك: شوفت رؤيا حلوه اوي يا عمر
عمر: قول لي شوفتي ايه
ملك: لما تتحقق هقولك
عمر: ماشي يا ملاكي هستناكي تقول لي
عمر: ايه النشاط ده كله و السعاده دي
ملك: مبسوطه اوي يا عمر نفس الرؤيا بتتكرر معايا كل يوم
عمر: ربنا يفرحك دايما يا حبيبتي
عمر: ايه الكتب دي
ملك: قررت اقرا شويه كتب الفتره دي و اول كتاب هبدأ بيه القواعد العشر
عمر: بيتكلم عن ايه ده
ملك:بيتكلم عن التربيه قولت استفيد منه عشان اعلم الولاد بطريقه صح
عمر : ربنا يتقبل منك يا حبيبتي
عمر:عندي ليكي خبر هيزعلك
ملك: مسافر مش كده
عمر: ايو يا حبيبتي بس المرادي مسافر بره مصر
الشركه هتعمل اتفاق مع شركه تانيه ولازم اكون موجود
هسافر اسبوع فرنسا
ملك: فرنسا يا عمر
عمر: اه يا حبيبتي
ملك: هتبعد اوي المرادي يا عمر
عمر: معلش يا حبيبتي ظروف الشغل
ملك: ربنا يرجعك بالسلامه يا حبيبي اوعي تنسي تجبلي هدايا و انت جاي
عمر:من عنيا يا جميل انتي تؤمري
ملك: شوف لو في حاجه هتحتاجها عشان ننزل نشتريها
عمر: في شويه حاجات عايزها نبقي ننزل نشتريها
......................................
ملك: السلام عليكم
ام ملك: و عليكم السلام يا ملوكه عمر وصل
ملك: لا لسه هيركب الطياره دلوقتي ربنا يرجعه بالسلامه
ام ملك: ربنا يحمي و يرجع سالم
ابو ملك: و انا بقول البيت نور ليه اتاري حبيبتي جات
ملك: حبيبي يا بابا واحشني اوي
ابو ملك: و انتي اكتر
ملك: هقعد معاكم اسبوع هتزهق مني فيه
ابو ملك: تنوري يا حبيبتي
ام ملك: صحي النوم يا ملوكه
ملك: صباح النور يا احلي ماما في الدنيا
ام ملك: ايه الدلع الي علي الصبح ده شكلك حلمتي حلم حلو
ملك: اه يا ماما نفس الحلم بيتكرر معايا كل يوم
ام ملك: ربنا يحققلك الي بتتمنيه يا بنتي
عمر وصل
ملك: اه وصل و عنده اجتماع دلوقتي
ام ملك: ربنا يوفقه و يرجع سالم
ملك: اللهم آمين
................................
ام ملك: في ايه يا ملك مالك اليومين دول مش عجباني
ملك: مش عارفه يا ماما معدتي تعباني و مش طايقه ريحه الاكل
ام ملك: انتي دايخه يا حبيبتي
ملك: اه يا ماما مش قادره
ام ملك: يبقي الف مبروك يا كوكي هتبقي ام
ملك: معقول يا ماما
ام ملك: اه يا حبيبتي هنجيب اختبار حمل و نشوف و ان شاء الله خير
ام ملك: هااا يا حبيبتي ايه نتيجه الاختبار
ملك: حامل يا ماما انا مش مصدقه نفسي اخيرا ربنا استجاب ليا و هبقي ام
ملك سجدت سجده شكر و فضلت تحمد ربنا انه استجاب لدعائها
ملك: الرؤيا الي بحلم بيها اتحققت يا ماما
ام ملك: ده الحلم الي بتشوفيه كل يوم و بيخليكي مبسوطه
ملك: اه يا ماما
بشوف ست لابسه ابيض و وشها منور و بتديني طفله و قالت لي امسكي مريم و خدت الطفله في حضني و كنت مبسوطه اوي
ام ملك: ربنا يسعدك ياحبيبتي و يكملك علي خير
ملك : عمر هيفرح اوي
ام ملك: اتصلي و عرفيه
ملك: هقولك لما يرجع عايزه اشوفه و انا بقوله
ام ملك: ربنا يسعدكم يا بنتي
.........................................
ملك: السلام عليكم
عمر: و عليكم السلام يا حبيبتي
ملك: عندي ليك خبر حلو بس مش هقولك غير لما ترجع
عمر: بتعاقبيني عشان انا مسافر يعني
ملك:اه
و بعد كده مش هنسمحلك تسافر تاني
عمر: هرجع بكره و اعرف
ملك: ترجع بالسلامه يا حبيبي