رواية ابن الجيران
الفصل الثالث
بقلم نورسين
في بيت تامر
أمينه : ياله يا بنتي أتأخرنا .. الناس جايين بقالهم كام يوم وبقاا شكلنا وحش اووي
( امينه هي والدة تامر وهدير .. سيدة طيبه جداا وكريمه جداا مع كل الناس ومحبوبه من جيرانها وتعرف الواجب والاصول كويس اووي )
هدير : انا خلصت اهوه يا ماما .. ياله بيناا
تامر : انتوا رايحين فين ؟؟
أمينه : رايحين نسلم علي الجيران الجداد يا ابني بقالهم كام يوم ووشناا ف وش بعض وبسلم من البلكونه بقاا شكلنا وحش اووي .. هنروح نرحب بيهم ونرجع علي طول
تامر : طيب متتأخروش علشان انا نازل .. اصحابي مستنيني ومتنسوش تسلمولي عليهم وتقولولهم ان الحته نورت
هدير : نور اييه ونسلم علي مين يا ابني انت .. دول كلهم بنات 😂😂
تامر : بناااات ... ااااه ... قولتيلي ... عادي برضو مفيش مشكله سلملي عليهم ولا علي اي حد تلاقيه ف سكتك هههههه
هدير : هههههه ماشي يا عم الظريف
ويتركوه ويتوجهوا لبيت نانسي .. هدير تدق الباب .. فتفتح نانسي
نانسي : افندم .. حضراتكم عاوزين مين ؟؟
هدير : احنا جيرانكم فالبيت اللي قدامكم علي طول .. عرفتينا ؟؟ اللي في البلكونه اللي قصادكم علي طول
نانسي : اااااه .. اهلاً وسهلاً .. تعالوا اتفضلوا .. يا مااامااا
سلمي : نعم .. مين علي الباب ؟؟
نانسي : دول الجيران اللي قصادنا يا ماما
وتقترب سلمي من الباب
سلمي : اهلاً وسهلاً .. تعالوا اتفضلوا .. البيت نور
امينه : اهلاً بيكي .. البيت منور بأصحابه
هدير تتوجه لنانسي بالكلام ..انا هدير وانتي اسمك اييه ؟؟
نانسي : انا نانسي
هدير : وانتي داخله سنه كام ؟؟
نانسي : انا هدخل الجامعه السنه دي اول سنه ان شاء الله .. سنه اولي يعني
هدير : مبروك عليكي .. انتي اصغر من تامر بسنه
نانسي :ميرسي الله يبارك فيكي .. تامر مين 🤔؟؟
هدير : تامر اخويا .. بكره تعرفوه .. ما البلكونه ف وش البلكونه .. يعني هتشوفيه كتير
سلمي : ليه كلفتوا نفسكم بس ده كتير اووي
امينه : لا متقوليش كده .. دي حاجه بسيطه والله .. عموماً انا جيت اعزمك انتي والبنات علي شبكه هدير يوم الخميس بإذن الله في البيت علي الضيق كده .. بس اهو البنات يفرحوها وخلاص .. بصراحه ابوها متوفي وانا مش هقدر اعمل براا البيت
سلمي : ألف مبروك .. ربنا يتمم لها بخير يارب خلاص هشوف البنات وهستأذن باباهم وان شاء نيجي
هدير : واحنا مستنينكوا ان شاء الله
امينه : طيب هنستأذن احنا علشان أتأخرنا لسه هنعزم باقي الناس
سلمي بعد ما مشيت هدير وامينه .. تحكي للبنات وتسالهم .. اييه رأيكوا هتروحوا ولا اييه ؟؟
نغم : طيب هو احنا نعرفهم اصلاً علشان اول تعارف يبقاا نروح فرح كده علي طول
سلمي : عادي الست حابه انكم تفرحوا بنتها و دي حاجه عاديه .. الناس بتحب تتجمع ف الافراح .. مناسبه كويسه والكل بيبقاا فرحان
نورهان : وجهات نظر برضو .. طيب لو انتي رأيك كده يعني موافقه .. خلاص نروح اهو نغير جو
نيره توشوش نانسي : هي دي مامة الولا ابو عضلات واخته
نانسي : ايون هي دي 😂😂 وابو عضلات ابنها وطلع ف سنه تانيه كليه
سلمي : خلاص جهزوا لبسكوا وانا هقول لبابا وان شاء الله يوافق
نغم : ماشي نروح وامرنا لله .. يارب يطلع فرح كويس .. والسهره متضربش عشان هزعل اووي لو سيبت الفيلم الاجنبي اللي جاي علي Mbc2 وروحت الفرح لقيته وحش
سلمي : هروح اعمل الشاي لبابا واشوف رأيه اييه
وبعد ان خرجت سلمي من غرفه البنات
نانسي : انا لبسي جاهز .. هروح بالفستان الاسود القصير
بعد نصف ساعه ترجع سلمي تبلغ البنات ان والدهم وافق علي حضورهم فرح هدير
سريعاً ينتهي الاسبوع .. انه يوم الخميس ميعاد الفرح
يتجهز البنات ويرتدوا فساتينهم اللامعه ويتزينوا ويتوجهوا لبيت أمينه .. عند وصولهم تتوجه أمينه لأستقبالهم والترحيب بهم
امينه : اهلاً وسهلاً .. شرفتونا .. دول بناتك صح ؟؟
سلمي : ألف مبروك .. اه .. دي نورهان الكبيره مخطوبه وهتتجوز قريب ان شاء الله ودي نانسي انتي عرفاها ودول بقاا نغم ونيره
امينه : ما شاء الله ذي القمر .. ربنا يحفظهملك ويفرحك بيهم .. تعالوا يا بنات العروسه جواا
يدخلوا البنات مع أمينه ويسلموا علي هدير وخطيبها ويقابلوا رانيا في الفرح ويسلموا عليها وتشتغل الموسيقي ويبدأوا البنات يندمجوا مع الاغاني وفجأه يقف الدي چي محتاج يتظبط فتتبرع نانسي انها تغني للعروسه .. تقوم وتقف في النص وتقولهم بس غنوا معايا مش هغني لوحدي
ردوا عليها البنات : ماشي ابدأي بس واحنا معاكي .. وتبدأ تغني ..
مبروك عليك .. بنت الحلال
مبروك عليك .. ملكة جمال
حلوة وأميرة .. ترضى بحصيرة
دمها الخفيف .. يكمله الدلال
يسمعها تامر فيقرب ويقف يسند علي باب الاوضه ويتفرج عليها .. تلف وشها تلاقيه واقف وعينه عليها .. تتكسف بس مضطره انها تكمل الاغنيه .. وتكمل
أهل العريس .. هنوا العروسه
تستاهل الحلوة .. على كل خد بوسه
صفق وجامل .. يالله علي الهلاهل
لا تبقى خامل .. الليلة خميس
حلوة وأميرة .. ترضى بحصيرة
رأي العشيرة .. ريم وغزال
يا ربي يسعدكم .. كل السعادة
واللي يتمنى .. يحصل مراده
صفق وجامل .. يالله علي الهلاهل
لا تبقى خامل .. الليلة خميس
حلوة وأميرة .. ترضى بحصيرة
توفي بجزيرة .. البنت الحلال
وتخلص الاغنيه ويصقفوا اللي سمعوها .. اي خدمه كفايه عليكم كده بقاا 😂😂
امينه : ما شاء الله عليكي .. ده انتي صوتك حلو اووي .. ربنا يخليكي يا حبيبتي واردهولك يوم فرحك يارب
وتتوجه امينه للشاب المسئول عن الدي چي ما تشغل بقاا اي حاجه هو جاي يبوظ هنا
( تامر يرمى نظرات لنانسي وهى عامله نفسها مش واخده بالها )
ينتهي الفرح ويرجعوا البنات مع سلمي للبيت
نغم : شوفتوا بقاا اللي كنت عامله حسابه لقيته .. الدي چي باظ والست نانسي احييت الليله 😂😂 والفيلم خلص .. قولتلكم بلاش .. ياله ننام بقا احسن
نورهان : والله كان يوم حلو وهدير كانت ذي القمر والحمد لله اننا عملنا معاها الواجب ومزعلتش ان الدي چي باظ في ليلتها 😂😂
يبدلوا البنات ملابسهم وتدخل نانسي البلكونه .. تشوف تامر من غير ما يآخد باله ومعاه صاحبه وبيلموا الكراسي بعد الفرح وبينضفوا المكان وتدخل عليها نيره .. انتي بتعملي اييه ؟؟
نانسي : شششش مش بعمل حاجه .. اتفرجي وانتي ساكته
نيره تضحك بصوت عالي فيسمعها حسام ويبص عليها .. تآخد قلبه بضحكتها ..فينادي علي تامر
حسام : ولا .. ولا .. مين القمر دي
تامر : بس يا عم انت دول الجيران الجداد .. ويشاور لنانسي من جواا بأيده انها تدخل فتعمل نفسها مش شيفاه وتفضل واقفه بالعند فيه
وفجأه تليفون تامر يرن
يدخل البلكونه وعينيه علي نانسي وصوته عالي
اييه يا طمطم .. ازيك يا حبي .. وحشتيني
تمارا : مهو انا لو كنت وحشتك كنت سألت علياا وكلمتني .. انا زعلانه منك 😣😣
تامر : لا يا قلبي انا مقدرش علي زعلك .. بس انتي عارفه ان النهارده كانت خطوبة هدير وكنت مشغول طول اليوم ولحد دلوقت بشتغل ومعايا حسام كمان والله
تمارا : ماشي .. سامحتك بس علشان الفرح .. طيب هتيجي بكره علشان اشوفك ؟؟
تامر : ان شاء الله علي ميعادنا في نفس المكان .. وهو بيكلمها ومش بيبعد نظره عن نانسي اللي واقفه وسامعه كل كلامه وبعد ما خلص .. دخلت هي ونيره ورزعت باب البلكونه وراها
البت بتحبه مسكينه .. قطع الحب وسنينه