👴نوفيلا ابو الرجاله👴
🌵البارت التانى🌵
مر اليوم والكل رجع على الشقه وراح مصطفى جاب ملك من
المطار وسلم عليها وروحو على البيت وملك سلمت على الاولاد وقالت
ملك / ماشاءالله يا مصطفى عيالك كبرو وبقو رجاله انا اخر مره شوفتهم كانو صغيرين عن كده خالص الأيام بتجرى
مصطفى / مين يصدق أن مريم ميته بقالها عشر سنين ده انا حاسس انها ميته من امبارح من كتر النار اللى فى قلبى عليها
ملك / الله يرحمها قطعت بينا كلنا
مصطفى/ عيالك عاملين ايه وجوزك
ملك / ههههه بنتى اتجوزت الشهر اللى فات والتانيه مخطوبه لزميلها فى الجامعه العيال كبرونا يا مصطفى هههههه
مصطفى / ربنا يسعدهم يارب وجوزك ايه أخباره
ملك / اهو الحمدالله فتح فرع تانى لشركه بتاعته
مصطفى / ربنا يرزقه ويوسع رزقه يارب
ملك / وتفرح بعيالك يارب يا حبيبى بص بقى انا نازله مصر مخصوص علشان عايزه اكلمك فى موضوع ومكنش هينفع فى التليفون
مصطفى / موضوع ايه ده
ملك /الموضوع اللى كل ما افتحك فيه تتعصب عليا
مصطفى / بعصبيه لو هو اللى فى دماغى بلاش احسن
ملك / احمد خد اخواتك وادخل الاوضه بتاعتكم علشان عايزه اتكلم مع بابا فى موضوع
احمد / اوك ودخل هو واخواته الاوضه
ملك / ايوه هو يا مصطفى مريم الله يرحمها ماتت من عشر سنين والحى ابقى من الميت ومسير عيالك هيتجوزو وهيسيبوك قاعد هنا لواحدك ما بين أربع حيطان طيب له تعمل فى نفسك كده اتجوز واحده تخدمك وتخدم عيالك انت كبرت ومبقتش حمل كل اللى بتعملوا ده وهيجى عليك وقت مش هتقدر تجيب لنفسك كوباية الميه
مصطفى / بعصبيه ملك انا مليون مره قولتلك متتكلميش فى الموضوع ده جواز مش هتجوز عمرى مريم ممتتش مريم عايشه فى قلبى يا ملك وعمرى ما هقدر ابص لواحده تانيه غير مراتى ولا المس حد تانى غير مريم انا لحد دلوقتى بشم ريحتها فى السرير اللى بنام عليه عمرى ما هسمح بواحده تانيه تشاركنى فى السرير وتضيع ريحة مريم منه
ملك / انا عايزه مصلحتك انا ببص لقدام وقت ما كل واحد من عيالك يتفتح ليه بيت وانت تبقى عايش لواحدك
مصطفى /عمرى ما هعيش لوحدى هتعيش معايا ذكريات مريم الجميله هى اللى هتكون ونسى فى وحدتى
ملك / طيب فى بنت كويسه اوى وبنت حلال هى بنت بس كبيره فى السن ومستعده تتجوز واحد ومعاه عيال عادى اخت واحده معانا بره مصر بس هى عايشه هنا فى مصر لوحدها شوفها واقعد معاها يمكن تستريح ليها وتعجبك
مصطفى / لاء يا ملك
ملك / ليه بس يا مصطفى شوفها بس قبل ما ترفض
مصطفى / بعصبيه ملك قفلى على الموضوع ده خلاص
ملك / انا تعبت معاك الصراحه دماغك ناشفه اوى
مصطفى / انا فى دماغى مريم وبس وفى قلبى مريم وبس وانا مشتكتش من خدمة ولادى عمرى وهفضل اخدمهم لحد ما يروحو بيوتهم
ملك / دول شباب يا مصطفى يعنى كل ما بيكبرو بيحتاجو خدمه اكتر انما لو كانت فيهم حتى لو بنت واحده كانت خدمتكم كلكم
مصطفى / وانا مشتكتش من خدمتهم
ملك / انت حر بقى ها انا هقوم اريح فى الاوضه شويه من تعب السفر
مصطفى / ماشى ادخلى
ملك / دخلت اوضتها تريح ومصطفى دخل اوضه مسك صورة مريم ودموعه نزلت منه وقال
مصطفى / مفكرينك موتى يا مريم ميعرفوش انك عايشه فى دمى ميعرفوش أن قلبى مستحيل يدخل حد فيه غيرك انتى وبس ميعرفوش أن ايدى اخدت عهد على نفسها متلمسش ولا واحده غيرك عينى مش بتشوف غير صورتك وبس ميعرفوش أن اخد عهد على نفسى ان هعيش مخلص ليكى لحد ما نتقابل فى الاخره إن شاءالله بحبك يا مريم وهفضل احبك وباس الصوره وحطها مكانها وقام يقراه فى المصحف
~•~•~•~•~•~•~•~•~•~•~•~•~•~•
وبعد مرور عدة سنوات آخره كبر الأبناء وتخرجو وكل واحد منهم اختار شريكة حياته واتجوز وبقى ليهم حياتهم الخاصه المستقله بيهم واتبقى مصطفى وحيد فى البيت مع ذكرياته مع مريم
احمد / اتخرج واشتغل محاسب فى شركه كبيره جدآ وحب بنت صاحب الشركه واتجوزها ومسك هو شركات ابوها لأنها البنت الوحيده عنده واعتبر احمد ابنه عنده بنت وولد
محمد / اتخرج من كلية تربيه واشتغل مدرس عربى فى مدرسه حكومى على قد الحال وحب بنت الجيران واتجوزها عنده ولد وبنتين
محمود / بقى وكيل نيابه وحب بنت أحد القيادات العاليه واتجوزها عنده ولد واحد ومخلفش غيره
~•~•~•~•~•~•~•~•~•~•~•~•~•
انشغل احمد ومحمود عن ابوهم وبقو تقريبآ محدش فيهم بيروح يزوره نهائى مفيش غير محمد هو بس اللى بيزور ابوه هو وولاده ومراته بتعمل ليه الاكل بتاع الاسبوع كله وتحطو فى التلاجه وتنضف ليه الشقه اسبوعيآ عرضو عليه يقعد معاهم فى شقتهم بس هو تملى بيرفض يسيب شقته بذكرياته مع مريم وفى يوم راح محمد يزور ابوه كالعاده هو ومراته وأولاده وكانو قاعدين بياكلو مصطفى قال
مصطفى / اخواتك واحشونى اوى يا محمد
محمد / معلش يا بابا كل واحد عنده أشغاله اكيد انت كمان واحشهم بس مش عارفين يجو يشوفوك
مصطفى / طيب ما انت يا ابنى عندك اشغالك ورغم كده مش بتغيب عنى وكل اسبوع تجيب اولادك يقضو معايا اليوم انا معرفش شكل اولادهم ايه
محمد / ا.ا اصل انا يا بابا مدرسه حكوميه ليها ساعه محدده بنروح فيها إنما احمد ومحمود كل واحد فيهم شغله ملهوش مواعيد ولا ساعات ثابته يروحو فيها
مصطفى / طيب معلش يا ابنى هتعبك معايا روح ليهم وقولهم أن انا نفسى اشوفهم واشوف ولادهم
محمد / حاضر يا بابا وانا عمرى ما اتعب منك يا حبيبى انت تأمر وانا عليا انفذ
مصطفى / ربنا يبارك فيك ويرزقك برزق عيالك يا قادر يا كريم
محمد / ويطول لينا فى عمرك يا بابا
مصطفى / وانتى يا بنتى ربنا يديكى الصحه ويقويكى على اللى بتعمليه معايا
حبيبه / ربنا يخليك يا بابا انا بعمل واجبى مع ابويه ولا انت مش بتعتبرنى بنتك
مصطفى / اكتر من بنتى والله انتى تعرفى فيكى شبه كبير من مريم ام محمد الله يرحمها اوى بحس ان بشوفها فيكى
محمد / زيدى يا زيدى على الدلع انتى تعرفى بابا طول عمره يقول مفيش ولا واحده على الأرض اتخلقت شبه ماما انتى الوحيده اللى شافك شبها يا بختك يا بنت المحظوظه ههههههههه
حبيبه / الله اكبر انت هتحسدنا ولا ايه حوش عين ابنك عننا يا بابا
مصطفى / هههههههههه هو فعلا كنت بقول كده تملى بس لما شوفت حبيبه شوفت امك فيها
ربنا يسعدكم يارب ويفرح قلوبكم بولادكم يا قادر يا كريم
وقعدو ياكلو وبعد وقت انتهو من الاكل ولمت الاطباق حبيبه وغسلتهم وعملت الشاى وقعدو يشربو وقضو الوقت مع بعض وروح محمد وحبيبه والأولاد البيت
فى اوضت محمد وحبيبه
كان محمد نايم على السرير وواخد حبيبه فى حضنه وسرحان
حبيبه / مالك يا حبيبى
محمد / بفكر اعمل ايه مع اخواتى علشان يجو يشوفو ابوهم انا كذا مره كلمتهم فى التليفون أنهم يرحو يزورو ابوهم وكانو بيقلو ليا تملى اول ما يلاقو فرصه هيجو يبصو عليه وزى ما انتى شايفه دخلو فى سنين محدش فيهم شاف ابوهم ولا بابا شاف عيالهم لما كبرو
حبيبه / طيب وانت ناوى تعمل ايه بابا طلب منك تروح ليهم
محمد / هعمل ايه هروح ليهم بكره بعد المدرسه ربنا يهديهم
حبيبه / حرام والله اللى بيعملوا ده المفروض يجو يشوفو ويخلوه يشوف اولادهم حتى مش بيهون عليهم يرفعو سماعة التليفون ويسألو عليه ويشوفو لو محتاج حاجه
محمد / انا بحاول على قد ما اقدر مقصرش معاه فى مصاريف علاج ولا حاجه علشان ميحتاجش لحد فيهم انا عايز بس الاهتمام المعنوى مش الاهتمام المادى الحمدالله ربنا بيسترها معايا فى المصاريف علشان براضى ابويه
حبيبه / نامت على بطنها وحطت دقنها على كتف محمد وبصت ليه وقالت عارف يا حمو ايه اكتر حاجه حبيتها فيك
محمد / مسح على مناخيرها بصبعه وقال ايه يا قلب حمو
حبيبه / قلبك الحنين و الطيب ده بجد بحس انك ملاك نازل من السما حاجه بيضا جت فى زمن غلط القلوب بتاعته سوده والجشع بقى هو سيد الموقف إنما انت من زمن الناس الطيبه اللى عندها الموده والرحمه اهم من كنوز الدنيا بحالها
محمد / انا كده هتغر فى نفسى بقى
حبيبه / من حقك تتغر الصراحه انا سعات بحسد نفسى عليك وبحمد ربنا وبشكره تملى أن هو رزقنى بواحد زيك
محمد / اممممم لا كده الكلام كبير اوى وعايز وشدها ليه مره واحده وبسها بوسه طويله من شفايفها وبعد وقت طويل بعد عنها وبص فى عينيها وقال شكلك عايزه تتاكلى اكل
حبيبه / بدلع محمد
محمد / عيون محمد قلب محمد عمر محمد
حبيبه / بدلع بحبك
محمد / لاء كده الموضوع خطير وشدها تحت الغطا وقرب منها و(سكتت شهرزاد عن الكلام الغير مباح 😉😉)
~•~•~•~•~•~•~•~•~•~•~•~•~•
اشرقت شمس صباح يوم جديد بنورها الساطع فى سماء الجمهوريه
بدأ احمد بفتح عيونه على صوت المنبه قفله وقام من على السرير دخل الحمام اخد شاور وخرج لبس هدومه ونزل وقال
احمد / صباح الخير
هدى / صباح النور يا حبيبى
احمد / قعد يفطر
جودى / بابى فى حفله فى المدرسه وكل الآباء جاين المدرسه مع اولادهم والميس قالت ليا لازم حضرتك تحضر
أحمد / مش فاضى يا حبيبتى هبقى ابعت معاكى السكرتير بتاعى المخصوص
جودى / بس حضرتك دى للاباء يعنى للى زى حضرتك
أحمد / يا حبيبت بابى انتى عارفه انا بابى علطول فى الشغل ومعنديش وقت
هدى / جوجو يلا يا حبيبتى خدى حمزه وروحو المدرسه علشان متتأخروش
جودى / حاضر يا مامى
ومشيت جودى وحمزه على المدرسه
هدى / ايه يا حبيبى انت علطول مش فاضى مش فاضى ولادك مش بيقعدو معاك نهائى شغلك واخد كل وقتك ولادك ليهم حق عليك
أحمد / وانا بعمل كل ده ليه مش علشانكم علشان تعيشو عيشه حلوه فى مستوى كويس
هدى / ماشى يا حبيبى مقولتش حاجه بس احنا أهلك لينا حق عليك اوقات بزعل من بابا ان رمى عليك الشغل كله واخدك مننا
أحمد / هى الدنيا كده لازم نشتغل كتير علشان نعمل فلوس كتير وانتى شايفه دلوقتى الشركه بقت اكبر شركه فى الوطن العربى كله
هدى / انا تعبت من الكلام وعارفه أن فى الاخر لا هاخد منك حق ولا باطل
أحمد / مدام عارفه اخرتها يبقى اسكتى من دلوقتى احسن بلاش تكملى كلامك
هدى / هقول ايه وبصت ليه بغيظ وقامت وسابته
احمد / اكل بسرعه وبص فى ساعته وبعدين قام خرج ركب عربيته ومشى بيها راح على الشركه
~•~•~•~•~•~•~•~•~•~•~•~•~•
فى فيلا محمود
صحى محمود من نومه بص على مراته لاقها لسه نايمه قام دخل الحمام اخد شاور وخرج وشغل نور الاوضه علشان يلبس هدومه
رحاب /ايه ده ايه ده انت يا بنأدم اطفى النور
محمود/ بلاش البس يعنى علشان انزل شغلى
رحاب / وهى مغمضه عينيها يووووووه بقى خد هدومك والبس فى اى اوضه تانيه
محمود / ليكى حق ما انتى سهرانه بره لوش الصبح
رحاب / يووووووه بقى مش وقت كلامك ده اطفى النور
محمود / مش هطفى النور غير لما البس هدومى
رحاب / قعدت على السرير وفتحت عينيها بصعوبه وقالت عند يعنى
محمود / افهميها زى ما تفهميها ولبس هدومه وسرح شعره وفتح الباب ورزعه وراه ونزل
رحاب / هوف بنأدم لا يطاق ونامت تانى على السرير وحطت المخده على وشها
~•~•~•~•~•~•~•~•~•~•~•~•~•
فى شقة محمد
صحى محمد من نومه ملاقاش حبيبه قام من على سريره وخرج من الاوضه وراح عند الحمام بس سمع صوت المايه مفتوحه عرف أن حبيبه بتاخد شاور دخل اوضت الاولاد وصحاهم ودخل المطبخ يحضر الفطار وشويه وخرجت حبيبه وشافت محمد وقف فى المطبخ راحت عنده وبسته فى خده وقالت
حبيبه / صباح الخير يا حبيبى
محمد / صباح النور يا عمرى
حبيبه / صاحى من بدرى
محمد / من شويه دخلت صحيت الاولاد وقولت احضر الفطار لحد ما تخرجى
حبيبه / ربنا ميحرمنيش منك يارب
محمد / ولا منك يا عمرى تعالى بقى كملى لحد ما ادخل اخد شاور فى السريع
حبيبه / ماشى ووقفت تكمل الفطار ودخل محمد ياخد شاور وبعد وقت خرج من الحمام دخل اوضه لبس هدومه واداه فرضه وخرج من الاوضه وقعد يفطر معاهم
حبيبه / حبيبى هتتأخر النهارده
محمد / ايوه كان عندى مجموعات تقويه بس هعتزر وهروح لاحمد ومحمود اكلمهم زى ما انتى عارفه
حبيبه / ربنا معاك يا حبيبى
محمد / وقف وقال الحمدالله
حبيبه / انت مأكلتش حاجه
محمد / الحمدالله شبعت وبسها فى خدها وبص للاولاد وقال يلا بينا واخد الاولاد معاه ونزل راح المدرسه
~•~•~•~•~•~•~•~•~•~•~•~•~
انتهى وقت المدرسه عند محمد وراح الشركه عند اخوه احمد وطلب يقابله وقعد وقت طويل جدآ على ما عرف يدخل عنده المكتب
احمد / عامل ايه يا محمد
محمد / الحمدالله يا احمد
احمد / معلش بقى اتأخرت عليك بس كان عندى اجتماع مهم
محمد / لاء عادى ولا يهمك المهم ولادك ومراتك عاملين ايه
أحمد / الحمدالله كويسين وانتو عاملين ايه وبقى عندك كام عيل
محمد / عندى تلاته
مصطفى ومريم وروجين
احمد / ربنا يخليهوملك
محمد / المهم ابوك مسألتنيش عنه يعنى
أحمد / اه ما انا كنت لسه هسألك عنه عامل ايه
محمد / محتاجك انت واخوك محمود ابوك هيتجن عليكم يا احمد انت بقالك قد ايه مشفتهوش عيالك ميعرفوش جدهم ولا عمرهم شافوه
احمد / انت عارف الأشغال بقى انا والله مش بشوف عيالى بالايام ولسه انا ومراتى كنا بنتكلم فى الموضوع ده الشغل واخد كل وقتى والله
محمد / انت لو انشغلت على الدنيا كلها متنشغلش عن ابوك نسيت فضله عليك نسيت أن هو اللى كبرك وخلاك راجل طول بعرض ده الجميل اللى بترده ليه
احمد / محمد مش وقت مواعظك دى وفرها على نفسك واكيد ابوك يعنى مش هيكره ليا الخير وفتح الخزنه وطلع منها مبلغ ومد أيده بيها لمحمد وقال خد اديلو دول ولو احتاج حاجه تعال اديك زيهم وهات ليه اللى عايزه
محمد / بص للفلوس بحزن وزعل وقال ايه ده يا احمد انت مفكرنى جاى ليك علشان اخد منك فلوس اصرفها على ابوك لاء يا احمد الحمدالله مش مخلى ابوك محتاج حاجه بس هو محتاج وجودك جنبه نفسه يشوف عيالك ويعرفو أن ليهم جد عايش
أحمد / شال الفلوس وقال انت حيرتنى معاك يا محمد عايز ايه من الاخر
محمد / وقف وقال مش عايز حاجه وانا اسف لو اخد من وقتك وعطلتك عن اذنك وسابه وخرج
أحمد / نفخ وشوح بأيده وطلب من السكرتير يحضر للاجتماع التانى
~•~•~•~•~•~•~•~•~•~•~•~•~•
عند محمد خرج من الشركه وهى الدموع فى عينه ومخنوق ومضايق وقف ميكروباص وراح النيابه عند اخوه محمود وطلب يشوفه بلغوه أن هو مش موجود دلوقتى وأن هو فى مأموريه خرج وهو مكسور روح البيت ودخل على اوضه علطول
حبيبه / دخلت وراه وقالت مالك يا حبيبى
محمد / بحزن اخواتى يا حبيبه
حبيبه / مالهم
محمد / واحد مفكرنى أن رايح ليه علشان اخد منه فلوس لابويه والتانى كان فى مكتبه ورفض يقابلنى مستعر منى والعسكرى بيقولى أن هو فى مأموريه مع أن شوفته قاعد على مكتبه من حرف الباب
حبيبه / هما اللى خسرانين ربنا بيحاسب على إهمال الابن لوالديه انت عملت اللى عليك وهما ربنا مش هيسبهم خليك زى ما انت بار بأبوك وهنفضل جنبه العمر كله ومش هنخليه محتاج حاجه ومتزعلش نفسك
محمد / انا مش زعلان على اللى عملوه فيا انا زعلان على ابويه هقولو ايه لما يسألنى عليهم وهو نفسه يشوفهم هقولو ولادك رافضين يشوفوك ده يروح فيها قوليلى اعمل ايه يا حبيبه
حبيبه / لاحولا الله يارب مش عارفه اكدب عليه قولو أن احمد مسافر مثلا ومحمود فى مأموريه وهيغيب فيها ومعرفتش تقابل حد فيهم لحد ما ربنا يهديهم ويحنن قلبهم على ابوهم
محمد / يارب يا حبيبه قلبهم يحن على ابوهم
حبيبه / أن شاءالله قوم يلا غير هدومك علشان تتغدا
محمد / مليش نفس
حبيبه / على فكره انا متغدتش ومستنياك ولو مأكلتش مش هاكل وخلى ذنبى فى رقبتك
محمد / خلاص اطلعى حضرى الاكل
حبيبه / بسته فى خده وقالت هوا وخرجت من الاوضه حضرت الاكل وكان محمد غير هدومه وقعدو ياكلو مع بعض
~•~•~•~•~•~•~•~•~•~•~•~•
انتهى ايام الاسبوع وراح محمد وحبيبه وولاده عند مصطفى علشان يقضو اليوم معاه
مصطفى / محمد
محمد / نعم يا بابا
مصطفى / روحت لاخواتك
محمد / ا.ا.اه روحت
مصطفى/ وقالولك ايه
محمد / ها م.م.مشوفتش حد فيهم ا.ا.احمد مسافر بيخلص شغل بره و.و.وم.م.محمود فى مأموريه وهيغيب فيها
مصطفى / حس بتوتر محمد وعرف أن هو بيكدب عليه بس مبينش ليه أن هو كشفه قال ماشى ربنا يرزقهم
محمد /ي.ي.يارب
حبيبه / وسع وسع وسع لاحلى صنية مكرونه بالبشاميل لا اجمل ولا اروع من هيك يا سلام عليكى يا بت يا بيبو
مصطفى ومحمد /هههههههههههههه
محمد / طيب ثوانى بس احضر رقم الإسعاف
حبيبه / يا سلام يا اخويه ده على اساس انك اول مره تاكلها منى علطول بعملها عندنا
محمد / لاء ما انا اتوغوشت من دخلتك دى الصراحه داخله بثقه وانا بخاف منك لما بتكونى واثقه فى نفسك هههههههههه
حبيبه / شايف يا بابا ابنك بقى
مصطفى / ملكش دعوه بيها يا محمد دى حتى الصينيه ريحتها جوعتنى قطعى يا بنتى بسرعه وهاتى طبقى
حبيبه / من عنيا يا بابا وربنا انت تملى اللى رافع معنوياتى إنما ابنك يا ساتر معرفش مطلعش زيك كده ليه
محمد / والله الكلام ده من قلبك
حبيبه / احم لاء طبعآ من وراه قلبى
محمد / ايوه كده اتعدلى هههههههههههه
مصطفى / ههههههههههههه
وقعدو ياكلو وانتهى اليوم وروحو على شقتهم