رواية لعبة القدر
الحلقة الرابعة عشر والخامسة عشر
ﺍﻟﺤﻠﻘﻪ ١٤ من رواية لعبة القدر
ﺣﺎﺯﻡ ﺣﻜﻲ ﻛﻞ ﺣﺎﺟﻪ ﻟﺸﺎﻫﻨﺪﺍ ﻭﻣﺴﺘﻨﻲ ﻣﻨﻬﺎ ﺗﺮﺩ ﻋﻠﻴﻪ ﺑﺲ ﻣﻔﻴﺶ ﺍﻱ ﺭﺩ
ﺣﺎﺯﻡ : ﺷﺎﻫﻲ ﻗﻮﻟﻲ ﺍﻱ ﺣﺎﺟﻪ ﺍﺭﺟﻮﻛﻲ ﻣﺘﺴﻜﺘﻴﺶ ﻛﺪﻩ
ﺷﺎﻫﻨﺪﺍ ﺑﺮﺿﻪ ﺳﺎﻛﺘﻪ .
ﺣﺎﺯﻡ : ﺷﺎﻫﻲ ... ﺷﺎﻫﻨﺪﺍ ... ﺷﺎﻫﻨﺪﺍ
ﺷﺎﻫﻨﺪﺍ : ﻫﺎﻩ . ﻫﺎﻩ ﺑﺘﻘﻮﻝ ﺍﻳﻪ ؟؟
ﺣﺎﺯﻡ : ﺍﻧﺘﻲ ﻧﺎﻳﻤﻪ ؟؟
ﺷﺎﻫﻨﺪﺍ : ﺍﻳﻮﻩ . ﻋﺎﻳﺰ ﺣﺎﺟﻪ ؟؟
ﺣﺎﺯﻡ : ﻻ ﺧﻼﺹ ﻧﺎﻣﻲ
ﺷﺎﻫﻨﺪﺍ : ﻃﻴﺐ ﺗﺼﺒﺢ ﻋﻠﻲ ﺧﻴﺮ
ﻧﺎﻣﺖ ﺷﺎﻫﻨﺪﺍ ﻭﻫﻮ ﻓﻀﻞ ﻛﺘﻴﺮ ﻳﺘﻘﻠﺐ ... ﺍﺧﻴﺮﺍ ﻗﺪﺭ ﻳﻘﻮﻟﻬﺎ ﻭﻓﻲ ﺍﻻﺧﺮ ﺗﻄﻠﻊ ﻧﺎﻳﻤﻪ !! ﻃﻴﺐ ﻳﻌﻤﻞ ﺍﻳﻪ ﺑﻘﻲ ؟؟
ﺍﻟﻨﻬﺎﺭ ﻃﻠﻊ ﻭﻗﺎﻋﺪﻳﻦ ﻳﻔﻄﺮﻭﺍ ﻣﻊ ﺑﻌﺾ
ﺷﺎﻫﻨﺪﺍ : ﻫﻮ ﺍﻧﺖ ﺻﺤﺘﻨﻲ ﻟﻴﻪ ﺑﻌﺪ ﻣﺎ ﻧﻤﺖ ؟؟
ﺣﺎﺯﻡ : ﻻ ﺍﺑﺪﺍ
ﺷﺎﻫﻨﺪﺍ : ﺍﻣﺎﻝ ﻫﻴﺎ ﺭﺧﺎﻣﻪ ﻭﺧﻼﺹ ؟؟ ﺑﺘﺼﺤﻴﻨﻲ ﻟﻴﻪ ﻟﻤﺎ ﻣﺶ ﻋﺎﻳﺰ ﺣﺎﺟﻪ ؟؟
ﺣﺎﺯﻡ : ﺍﻧﺎ ﻣﺶ ﻗﺼﺪﻱ ﺍﺭﺧﻢ . ﺍﻧﺎ ﺑﺲ ﻛﻨﺖ ﻋﻤﺎﻝ ﺍﺭﻏﻲ ﻭﺍﺭﻏﻲ ﻭﻓﻲ ﺍﻻﺧﺮ ﻣﻠﻘﺘﻜﻴﺶ ﺑﺘﺮﺩﻱ ﻓﻨﺎﺩﻳﺖ ﻋﻠﻴﻜﻲ ﻓﺎﻛﺘﺸﻔﺖ ﺍﻥ ﺳﻴﺎﺩﺗﻚ ﻧﺎﻳﻤﻪ ﻭﺍﻧﺎ ﺑﻜﻠﻢ ﻧﻔﺴﻲ
ﺷﺎﻫﻨﺪﺍ ﺿﺤﻜﺖ : ﺍﻧﺎ ﺍﺳﻔﻪ ﺣﺒﻴﺒﻲ ﺑﺲ ﻓﻌﻼ ﻛﻨﺖ ﺗﻌﺒﺎﻧﻪ ﻋﻠﻲ ﺍﻟﻌﻤﻮﻡ ﺍﻧﺎ ﺍﻫﻮ ﻗﺪﺍﻣﻚ ﻗﻮﻝ ﻛﻨﺖ ﺑﺘﻘﻮﻟﻲ ﺍﻳﻪ ﻭﺍﻧﺎ ﻧﺎﻳﻤﻪ
ﻓﻜﺮ ﺣﺎﺯﻡ ﻳﻘﻮﻟﻬﺎ ﻭﻻ ﺍﻳﻪ ؟؟ ﺗﻠﻴﻔﻮﻧﻪ ﺭﻥ ﻭﺭﺩ ﻓﻜﺎﻥ ﻣﺤﺘﺎﺟﻴﻨﻪ ﻓﻲ ﺍﻟﺸﻐﻞ
ﺣﺎﺯﻡ : ﺑﻌﺪﻳﻦ ﺑﻘﻲ ﻧﺮﻏﻲ ﺳﻼﻡ ﺍﻧﺎ ﻋﻨﺪﻱ ﺷﻐﻞ ﻣﻬﻢ
ﺷﺎﻫﻨﺪﺍ : ﺍﻧﺎ ﻛﻤﺎﻥ ﻋﻨﺪﻱ ﻃﻠﺒﻴﻪ ﻣﻬﻤﻪ ﺍﻟﻤﻔﺮﻭﺽ ﺍﺳﺘﻠﻤﻬﺎ ﻳﺎﻻ ﺍﺷﻮﻓﻚ ﺑﺎﻟﻠﻴﻞ ﺑﻘﻲ ﺳﻼﻡ
ﻛﻞ ﻭﺍﺣﺪ ﻧﺰﻝ ﺷﻐﻠﻪ ﻭﺍﻻﻳﺎﻡ ﺑﺘﻌﺪﻱ ﻭﺣﺎﺯﻡ ﺷﺎﻝ ﺍﻟﻤﻮﺿﻮﻉ ﻣﻦ ﺩﻣﺎﻏﻪ ﻭﻗﺮﺭ ﺍﻧﻪ ﻣﻠﻬﺎﺵ ﻻﺯﻣﻪ ﺗﻌﺮﻑ ،، ﻫﻮ ﺿﻤﻴﺮﻩ ﻣﺴﺘﺮﻳﺢ .. ﺑﻴﺤﺐ ﻣﺮﺍﺗﻪ ﻭﺑﺲ ﺍﻣﺎ ﻋﻼﻗﺘﻪ ﺑﺮﻫﻒ ﻣﺶ ﻫﺘﻔﻬﻤﻬﺎ ﻓﺎﻻﻓﻀﻞ ﻣﺎ ﻳﻘﻮﻟﻬﺎﺵ ﻭﺩﻩ ﺍﻟﺼﺢ
ﻛﺎﻥ ﻓﻲ ﺷﻐﻠﻪ ﻓﺘﻠﻴﻔﻮﻧﻪ ﺭﻥ ﻭﺭﺩ ﻋﻠﻴﻪ
ﺣﺎﺯﻡ : ﺷﻮﻕ ﺍﺯﻳﻚ ﺍﺧﺒﺎﺭﻛﻢ ﺍﻳﻪ ؟؟
ﺷﻮﻕ : ﺍﻟﺤﻤﺪ ﻟﻠﻪ ﺑﺲ ﻟﻮ ﺗﻬﻤﻚ ﺍﺧﺒﺎﺭﻧﺎ ﻛﻨﺖ ﺳﺄﻟﺖ ﻋﻠﻴﻨﺎ ؟؟
ﺣﺎﺯﻡ : ﻭﺍﻟﻠﻪ ﻣﺸﻐﻮﻝ ﺟﺪﺍ ﺟﺪﺍ ﺍﻟﻔﺘﺮﻩ ﺩﻱ
ﺷﻮﻕ : ﺭﺑﻨﺎ ﻳﻌﻴﻨﻚ ﺑﺲ ﺍﻻﻭﻝ ﺍﺳﻔﻪ ﻟﻮ ﺍﺗﺼﻠﺖ ﻓﻲ ﻭﻗﺖ ﻣﺶ ﻣﻨﺎﺳﺐ
ﺣﺎﺯﻡ : ﻻ ﻋﺎﺩﻱ ﺍﻧﺎ ﺍﺻﻼ ﻓﻲ ﺍﻟﺸﻐﻞ ﻣﺶ ﺍﻟﺒﻴﺖ ﺧﻴﺮ ﻓﻲ ﺣﺎﺟﻪ ؟؟
ﺷﻮﻕ : ﻛﻨﺖ ﻋﺎﻳﺰﻩ ﺍﺳﺘﺄﺫﻧﻚ ﻟﻮ ﺍﻧﺖ ﺗﺠﻴﺐ ﺭﻫﻒ ﺍﻟﻨﻬﺎﺭﺩﻩ ﻣﻦ ﺍﻟﻤﺪﺭﺳﻪ ﻭﺭﺍﻳﺎ ﻣﺸﻮﺍﺭ ﻣﻬﻢ
ﺣﺎﺯﻡ : ﻣﺸﻮﺍﺭ ﺍﻳﻪ ﺩﻩ ﺍﻟﻤﻬﻢ ؟؟
ﺷﻮﻕ : ﻣﺸﻮﺍﺭ ﻭﺧﻼﺹ ﻫﺒﻘﻲ ﺍﻗﻮﻟﻚ ﻟﻤﺎ ﺍﺷﻮﻓﻚ ﺍﻟﻤﻬﻢ ﻫﻴﻨﻔﻊ ﻭﻻ ﺍﻳﻪ . ؟
ﺣﺎﺯﻡ : ﻣﺎﺷﻲ ﺣﺎﺿﺮ ﻫﻴﺎ ﺍﺻﻼ ﻭﺣﺸﺎﻧﻲ ﺟﺪﺍ
ﺷﻮﻕ : ﺧﻼﺹ ﺧﻠﻴﻬﺎ ﻣﻌﺎﻙ ﻭﺍﻧﺎ ﺍﻭﻝ ﻣﺎ ﺍﺭﻭﺡ ﻫﻜﻠﻤﻚ ﺗﺠﻴﺒﻬﺎ ﺍﻟﺒﻴﺖ ﻭﻣﺘﺸﻜﺮﻩ ﻗﻮﻱ ﻳﺎ ﺣﺎﺯﻡ
ﺣﺎﺯﻡ : ﺍﻫﻮ ﻓﺮﺻﻪ ﻧﻘﻌﺪ ﺍﻧﺎ ﻭﻫﻴﺎ ﻣﻊ ﺑﻌﺾ ﻣﺎ ﺗﻘﻠﻘﻴﺶ ﻋﻠﻴﻬﺎ
ﺷﻮﻕ : ﺍﻧﺎ ﻣﺶ ﺑﻘﻠﻖ ﻋﻠﻴﻬﺎ ﻣﻌﺎﻙ ﻳﺎ ﺣﺎﺯﻡ
ﻗﻠﺒﻪ ﺩﻕ ﻟﻤﺎ ﺷﻮﻕ ﻗﺎﻟﺖ ﺟﻤﻠﺘﻬﺎ ﺩﻱ ﻭﻟﻠﺤﻈﻪ ﺧﺎﻳﻒ ﻳﻜﻮﻥ ﺑﻴﻐﻠﻂ ﻛﺪﻩ ﺍﻭ ﺑﻴﻐﻠﻂ ﻓﻲ ﺣﻖ ﻣﺮﺍﺗﻪ ﺑﺲ ﻫﻮ ﻓﻌﻼ ﺑﻴﺤﺐ ﺭﻫﻒ ﻭﺑﺲ ﻭﻣﺶ ﻗﺎﺩﺭ ﻳﻔﺴﺮ ﺣﺒﻪ ﻟﻴﻬﺎ ﺍﻳﻪ ؟؟
ﺭﺍﺡ ﻭﺍﻭﻝ ﻣﺎ ﺭﻫﻒ ﺷﺎﻓﺘﻪ ﺟﺮﻳﺖ ﻋﻠﻴﻪ ﻭﻧﻄﺖ ﻋﻠﻴﻪ ﻭﻫﻮ ﺣﻀﻨﻬﺎ ﺟﺎﻣﺪ
ﺣﺎﺯﻡ : ﻭﺣﺸﺘﻴﻨﻲ ﻳﺎ ﺍﻏﻠﻲ ﻣﻦ ﺭﻭﺣﻲ
ﺭﻫﻒ : ﻛﺪﺍﺏ ﺑﺲ ﺍﻧﺖ ﻛﻤﺎﻥ ﻭﺣﺸﺘﻨﻲ ﻗﻮﻱ
ﺣﺎﺯﻡ : ﻃﻴﺐ ﻭﻻﺯﻣﺘﻬﺎ ﺍﻳﻪ ﻛﺪﺍﺏ ﺩﻱ ﺑﻘﻲ ؟؟
ﺭﻫﻒ : ﻋﻠﺸﺎﻥ ﺍﻧﺎ ﻟﻮ ﻭﺣﺸﺘﻚ ﻛﻨﺖ ﺟﻴﺖ ﺗﺸﻮﻓﻨﻲ ؟؟
ﺣﺎﺯﻡ : ﻛﺎﻥ ﻋﻨﺪﻱ ﻇﺮﻭﻑ ﻣﻨﻌﺘﻨﻲ ﻭﻣﻀﻐﻮﻁ ﻗﻮﻱ ﻓﻲ ﺍﻟﺸﻐﻞ ﻓﺴﺎﻣﺤﻴﻨﻲ ﺑﻘﻲ ﻭﺍﻟﻨﻬﺎﺭﺩﻩ ﻫﻨﺘﻐﺪﻱ ﺍﻧﺎ ﻭﺍﻧﺘﻲ ﻟﻮﺣﺪﻧﺎ ﻫﺎﻩ ﺍﻳﻪ ﺭﺃﻳﻚ ؟؟
ﺭﻫﻖ : ﻫﻬﻴﻴﻴﻴﻪ . ﺑﺠﺪ ﻳﺎ ﺯﻭﻣﺎ
ﺣﺎﺯﻡ : ﺑﺠﺪ ﻳﺎ ﻗﻠﺐ ﺯﻭﻣﺎ
ﺍﺧﺪﻫﺎ ﻭﺭﺣﻮﺍ ﻳﺘﻐﺪﻭﺍ ﻣﻊ ﺑﻌﺾ ﻭﻛﺎﻧﻮﺍ ﺑﻴﻬﺰﺭﻭﺍ ﻭﻳﻀﺤﻜﻮﺍ ﻭﻟﻠﺤﻈﻪ ﺣﺎﺯﻡ ﻓﻜﺮ ﻣﻤﻜﻦ ﺣﺪ ﻳﺸﻮﻓﻪ ﻭﻳﻌﺮﻓﻪ ﻓﻲ ﺍﻟﻤﻜﺎﻥ ﺩﻩ
ﺑﺲ ﺑﻌﺪﻫﺎ ﻭﻗﺼﺎﺩ ﺿﺤﻜﻪ ﺭﻫﻒ ﻣﺶ ﻣﻬﻢ ﺍﻱ ﺣﺎﺟﻪ ﺗﺎﻧﻴﻪ ﺍﻟﻤﻬﻢ ﺍﻟﻀﺤﻜﻪ ﺩﻱ ﺗﻔﻀﻞ ﻋﻠﻲ ﻭﺵ ﺭﻫﻒ ﻭﺑﺲ
ﺣﺎﺯﻡ : ﻗﻮﻟﻴﻠﻲ ﻳﺎ ﺭﻫﻮﻑ ﻫﻮ ﺑﺎﺑﺎﻛﻲ ﻣﺶ ﺑﻴﺠﻴﻠﻜﻢ ﺍﻭ ﺑﻴﺴﺄﻝ ﻋﻠﻴﻜﻢ ؟؟
ﺭﻫﻒ : ﻭﻫﻮ ﻓﻴﻦ ﺑﺎﺑﺎﻳﺎ ﺩﻩ ﺍﺻﻼ ؟؟ﺍﻧﺎ ﻣﻌﻨﺪﻳﺶ ﺑﺎﺑﺎ
ﺣﺎﺯﻡ : ﺍﻣﺎﻝ ﻣﺤﻤﻮﺩ ﺩﻩ ﻣﻴﻦ ﺑﻘﻲ ؟؟
ﺭﻫﻒ : ﻣﺤﻤﻮﺩ ﻣﺶ ﺑﺎﺑﺎﻳﺎ
ﺣﺎﺯﻡ ﺍﺫﺑﻬﻞ ﻭﻟﻠﺤﻈﻪ ﻣﺶ ﻋﺎﺭﻑ ﻳﻘﻮﻝ ﺍﻳﻪ ؟
ﺣﺎﺯﻡ : ﺍﻣﺎﻝ ﻣﻴﻦ ﺑﺎﺑﺎﻛﻲ ؟؟
ﺭﻫﻒ : ﺍﻧﺎ ﻣﻌﻨﺪﻳﺶ ﺑﺎﺑﺎ ﺍﻧﺎ ﻋﻨﺪﻱ ﻣﺎﻣﺎ ﺑﺲ ..
ﺣﺎﺯﻡ : ﺍﻧﺘﻲ ﺍﺯﺍﻱ ﺑﺘﻘﻮﻟﻲ ﻛﺪﻩ ؟؟
ﺭﻫﻒ : ﻫﻮ ﺍﻻﺏ ﺩﻩ ﺑﺎﻻﺳﻢ ﺑﺲ ؟؟ ﺍﻧﺎ ﻣﺎ ﺑﺸﻮﻓﻮﺵ ﻭﻟﻮ ﺍﺣﺘﺠﺖ ﺣﺎﺟﻪ ﻣﺶ ﺑﻼﻗﻴﻪ ﻫﻮ ﻋﻨﺪﻩ ﻋﻴﺎﻟﻪ ﻭﻣﻬﺘﻢ ﺑﻴﻬﻢ ﻟﻜﻦ ﺍﻧﺎ ﻣﺶ ﻣﻬﻤﻪ ﻋﻨﺪﻩ .. ﺍﻧﺎ ﻋﻨﺪﻱ ﻣﺎﻣﺎ ﻭﺑﺲ ﻭﻫﻴﺎ ﺑﺘﺤﺎﻭﻝ ﻭﺑﺘﺸﺘﻐﻞ ﻭﺑﺘﺘﻌﺐ ﻋﻠﺸﺎﻧﻲ ﻟﻜﻦ ﻣﻌﻨﺪﻳﺶ ﺑﺎﺑﺎ ﻓﻬﻤﺖ ﺑﻘﻲ
ﺣﺎﺯﻡ : ﻫﻮ ﻛﻤﺎﻥ ﻣﺸﻐﻮﻝ ﻭﺑﻌﺪﻳﻦ ﻫﻤﺎ ﺍﻧﻔﺼﻠﻮﺍ
ﺭﻫﻒ : ﻃﻴﺐ ﻭﺍﻧﺎ ؟؟؟ ﺍﻳﻪ ﺫﻧﺐ ﻣﺎﻣﺎ ﺗﺘﺒﻬﺪﻝ ﺑﻴﺎ ﻛﺪﻩ ؟؟ ﻟﻤﺎ ﻣﺶ ﻫﻴﻬﺘﻢ ﺑﻴﺎ ﺑﻴﺨﻠﻔﻮﻧﻲ ﻟﻴﻪ ؟
ﺣﺎﺯﻡ : ﻣﺎﻫﻤﺎ ﻣﻜﻨﻮﺵ ﻋﺎﺭﻓﻴﻦ ﺍﻧﻬﻢ ﻫﻴﻨﻔﺼﻠﻮﺍ ﻭﺍﻱ ﺣﺪ ﻣﻌﺮﺽ ﻟﺪﻩ
ﺭﻫﻒ : ﻃﻴﺐ ﻭﺍﻫﻢ ﺍﻧﻔﺼﻠﻮﺍ ﻭﺍﻧﺎ ﻣﻊ ﻣﺎﻣﺎ ﺍﻓﺮﺽ ﻣﺎﻣﺎ ﻣﺜﻼ ﺗﻌﺒﺖ ﻣﻨﻲ ﻫﻌﻤﻞ ﺍﻧﺎ ﺍﻳﻪ ؟؟ ﻋﺎﺭﻑ ﺍﻗﻮﻟﻚ ﺣﺎﺟﻪ ﻣﺤﺪﺵ ﻳﻌﺮﻓﻬﺎ ؟
ﺣﺎﺯﻡ : ﻗﻮﻟﻲ
ﺭﻫﻒ : ﻛﻞ ﻣﺮﻩ ﻣﺎﻣﺎ ﺗﺘﺄﺧﺮ ﻓﻴﻬﺎ ﻭﺍﻧﺎ ﻓﻲ ﺍﻟﻤﺪﺭﺳﻪ ﺑﺨﺎﻑ ﻗﻮﻱ ﺍﻧﻬﺎ ﺗﻜﻮﻥ ﺯﻫﻘﺖ ﻭﺍﻧﻬﺎ ﻣﺶ ﻫﺘﻴﺠﻲ ﻭﻣﺶ ﻫﺸﻮﻓﻬﺎ ﺗﺎﻧﻲ ﺑﺨﺎﻑ ﻗﻮﻱ ﻳﺎ ﺣﺎﺯﻡ
ﺣﺎﺯﻡ ﺷﺎﻟﻬﺎ ﻭﺍﺧﺪﻫﺎ ﻋﻠﻲ ﺣﺠﺮﻩ
ﺣﺎﺯﻡ : ﺣﺒﻴﺒﻪ ﻗﻠﺒﻲ ﻣﺎﻣﺎ ﻋﻤﺮﻫﺎ ﺍﺑﺪﺍ ﻣﺎ ﻫﺘﺴﻴﺒﻚ ﺍﺑﺪﺍ
ﺭﻫﻒ : ﻣﺶ ﻫﻴﺒﻘﻲ ﺑﻤﺰﺍﺟﻬﺎ ﻋﺎﺭﻓﻪ ﺑﺲ ﻣﻤﻜﻦ ﺗﺘﻌﺐ ﺯﻱ ﻗﺒﻞ ﻣﺎ ﺍﻧﺖ ﺗﻴﺠﻲ ﻛﺎﻧﺖ ﻋﻠﻲ ﻃﻮﻝ ﺑﺘﻌﻴﻂ ﻭﺣﺘﻲ ﺍﻻﻛﻞ ﻣﻜﻨﺘﺶ ﺑﺘﻌﺮﻑ ﺗﺠﻴﺒﻪ ﻭﻛﺘﻴﺮ ﺑﻨﻨﺎﻡ ﻣﻦ ﻏﻴﺮ ﺍﻛﻞ
ﺣﺎﺯﻡ : ﺣﺒﻴﺒﺘﻲ ﺍﻟﻔﺘﺮﻩ ﺩﻱ ﻣﺶ ﻫﺘﺮﺟﻊ ﺗﺎﻧﻲ ﺍﺑﺪﺍ ﺍﻭﻋﺪﻙ ﺍﻧﺎ ﺑﺪﻩ ﺍﻧﺎ ﺩﻟﻮﻗﺘﻲ ﻣﻮﺟﻮﺩ
ﺭﻫﻒ : ﻻ ﺍﻧﺖ ﻣﺶ ﻣﻮﺟﻮﺩ ﺍﻧﺖ ﺩﻟﻮﻗﺘﻲ ﻣﺘﺠﻮﺯ ﻭﻋﻨﺪﻙ ﻣﺮﺍﺗﻚ ﻭﺑﻜﺮﻩ ﺗﺨﻠﻒ ﻭﻳﺒﻘﻲ ﻋﻨﺪﻙ ﻋﻴﺎﻝ ﻭﺗﻨﺴﺎﻧﻲ ﺧﺎﻟﺺ ﺯﻱ ﻣﺤﻤﻮﺩ ﺑﺎﻟﻈﺒﻂ ﺍﻻﻭﻝ ﻛﺎﻥ ﺑﻴﺴﺄﻝ ﻭﺑﻴﺠﻲ ﻟﻜﻦ ﺑﻌﺪ ﻣﺎ ﺑﻘﻲ ﻋﻨﺪﻩ ﻋﻴﺎﻝ ﺧﻼﺹ ﺭﻣﺎﻧﻲ ﺍﻧﺎ ﻭﻣﺎﻣﺎ ﻭﻛﻞ ﻓﻴﻦ ﻟﻮ ﺍﻓﺘﻜﺮ ﺑﻴﺴﺄﻝ ﺍﻧﺖ ﺑﺮﺿﻪ ﻫﺘﻌﻤﻞ ﺯﻳﻪ ﻫﺘﻔﻀﻞ ﺗﺒﻌﺪ ﻭﺗﺒﻌﺪ ﻟﺤﺪ ﻣﺎ ﺗﺒﻌﺪ ﺧﺎﻟﺺ
ﻭﺍﻧﺎ ﻫﺮﺟﻊ ﺗﺎﻧﻲ ﻟﻔﻮﻕ ﺍﻟﺴﻄﻮﺡ ﻭﻧﻘﻌﺪ ﺍﻧﺎ ﻭﻣﺎﻣﺎ ﻟﻮﺣﺪﻧﺎ ﻭﺗﺮﺟﻊ ﺗﺘﺒﻬﺪﻝ ﺗﺎﻧﻲ ﻭﺍﺭﺟﻊ ﺍﻧﺎ ﻋﻨﺪ ﻛﻞ ﺟﺎﺭ ﺷﻮﻳﻪ ﻭﻛﻞ ﻭﺍﺣﺪ ﺑﻜﻠﻤﻪ ﻭﺍﺭﺟﻊ ﻟﻮﺣﺪﻱ ﺗﺎﻧﻲ
ﺣﺎﺯﻡ : ﺭﻫﻒ ﺑﺼﻴﻠﻲ ﺍﻭﻋﺪﻙ ﺍﻧﻲ ﻋﻤﺮﻱ ﺍﺑﺪﺍ ﻣﺎ ﻫﺒﻌﺪ ﻋﻨﻚ ﻭﻃﻮﻝ ﻣﺎ ﺍﻧﺎ ﻋﺎﻳﺶ ﻋﻤﺮﻙ ﻣﺎ ﻫﺘﺤﺘﺎﺟﻲ ﺣﺎﺟﻪ ﺍﺑﺪﺍ ﺍﻧﺎ ﻣﻮﺟﻮﺩ
ﺭﻫﻒ : ﻭﻟﻤﺎ ﺗﺨﻠﻒ ؟؟
ﺣﺎﺯﻡ : ﻭﻟﻤﺎ ﺍﺧﻠﻒ ﻫﺘﻔﻀﻠﻲ ﺍﻧﺘﻲ ﺑﺮﺿﻪ ﻓﻲ ﻗﻠﺒﻲ ﻣﻦ ﺟﻮﻩ ﺍﻧﺘﻲ ﻣﺘﻌﺮﻓﻴﺶ ﺍﻧﺎ ﺑﺤﺒﻚ ﻗﺪ ﺍﻳﻪ ؟؟
ﺭﻫﻒ : ﻭﺍﻧﺎ ﻛﻤﺎﻥ ﺑﺤﺒﻚ ﻗﻮﻱ ... ﻭﺑﺘﻤﻨﻲ ﻟﻮ ﺍﻧﺖ ﺗﺒﻘﻲ ﺑﺎﺑﺎ !!
ﺣﺎﺯﻡ : ﺍﻋﺘﺒﺮﻳﻨﻲ ﺑﺎﺑﺎ ﻭﺍﻱ ﺣﺎﺟﻪ ﺗﺘﻤﻨﻴﻬﺎ ﺑﺲ ﺗﺸﺎﻭﺭﻱ ﻭﺑﻌﺪﻳﻦ ﻣﻌﺎﻛﻲ ﺗﻠﻴﻔﻮﻥ ﻣﺎﻣﺎ ﻭﻓﻲ ﺍﻱ ﻭﻗﺖ ﺗﺤﺘﺎﺟﻲ ﺣﺎﺟﻪ ﻛﻠﻤﻴﻨﻲ ﺍﺗﻔﻘﻨﺎ ؟؟
ﺭﻫﻒ : ﺍﺗﻔﻘﻨﺎ
ﺷﻮﻕ ﺍﺗﺼﻠﺖ ﻭﻗﺎﻟﺖ ﻟﺤﺎﺯﻡ ﻳﺠﻴﺐ ﺭﻫﻒ ﻭﻓﻌﻼ ﺭﻭﺣﻬﺎ ﻋﻠﻲ ﺍﻟﺒﻴﺖ
ﺷﻮﻕ : ﻣﺘﺸﻜﺮﻩ ﻗﻮﻱ ﻳﺎ ﺣﺎﺯﻡ ﺗﻌﺒﺘﻚ ﻣﻌﺎﻳﺎ
ﺣﺎﺯﻡ : ﻻ ﺑﺎﻟﻌﻜﺲ ﺍﻧﺎ ﺍﺗﺒﺴﻄﺖ ﺟﺪﺍ ﺍﻧﺎ ﻭﻫﻴﺎ ﻭﻋﺎﻳﺰ ﻛﻞ ﻛﺎﻡ ﻳﻮﻡ ﻛﺪﻩ ﺍﺧﺪﻫﺎ ﻭﻧﺨﺮﺝ ﺍﻧﺎ ﻭﻫﻴﺎ ﻣﻊ ﺑﻌﺾ ﺑﺲ ﺍﻟﻤﻬﻢ ﻣﺸﻮﺍﺭ ﺍﻳﻪ ﺍﻟﻤﻬﻢ ﻗﻮﻱ ﺩﻩ ﺍﻟﻠﻲ ﺍﺧﺮﻙ ﻛﻞ ﺩﻩ ؟؟
ﺷﻮﻕ : ﻣﺸﻮﺍﺭ ﺷﻐﻞ ﻟﻘﻴﺖ ﺷﻐﻞ ﻗﺮﻳﺐ ﻣﻦ ﻫﻨﺎ ﻭﺑﺮﺍﺗﺐ ﺣﻮﻳﺲ ﺑﺲ ﺍﻟﻨﻬﺎﺭﺩﻩ ﻋﻠﺸﺎﻥ ﺍﻭﻝ ﻳﻮﻡ ﺍﺗﺎﺧﺮﺕ ﻟﻜﻦ ﺑﻌﺪ ﻛﺪﻩ ﻫﻴﺒﻘﻲ ﻓﻲ ﺳﺎﻋﻪ ﻓﻲ ﺍﻟﻨﺺ ﻛﺪﻩ ﺍﺟﻲ ﺍﺧﺪ ﺭﻫﻒ ﻭﺍﻏﺪﻳﻬﺎ ﻭﺍﻫﻮ ﺍﻻﻣﻮﺭ ﺗﺘﺴﻬﻞ
ﺣﺎﺯﻡ ﺑﻴﺒﺼﻠﻬﺎ ﺑﺎﺳﺘﻐﺮﺍﺏ ﻭﺳﺎﻳﺒﻬﺎ ﺗﺘﻜﻤﻞ ﺑﺮﺍﺣﺘﻬﺎ ﻟﺤﺪ ﻣﺎ ﺧﻠﺼﺖ ﻭﺑﺼﺘﻠﻪ ﻭﻫﻮ ﻣﺴﺘﻐﺮﺏ ﻟﻴﻪ ﺭﺍﻓﺾ ﻓﻜﺮﻩ ﺷﻐﻠﻬﺎ ؟؟ ﻣﺎﻫﻲ ﻣﺮﺍﺗﻪ ﺑﺘﺸﺘﻐﻞ ﻟﻴﻪ ﺩﻱ ﺭﺍﻓﺾ ﺧﺮﻭﺟﻬﺎ ﺍﻭ ﺑﻬﺪﻟﺘﻬﺎ ﺍﻭ ﺍﺧﺘﻼﻃﻬﺎ ﻣﻊ ﺍﻱ ﺣﺪ ؟؟ ﺍﺣﺴﺎﺱ ﻏﺮﻳﺐ ﺟﻮﺍﻩ ﻣﺶ ﻋﺎﺭﻑ ﻳﻔﺴﺮﻩ ...
ﺷﻮﻕ : ﺑﺘﺒﺼﻠﻲ ﻛﺪﻩ ﻟﻴﻪ ؟؟
ﺣﺎﺯﻡ : ﺧﻠﺼﺘﻲ ﻛﻼﻣﻚ ﻭﻻ ﻓﻲ ﻫﺒﻞ ﺗﺎﻧﻲ ﻋﺎﻳﺰﻩ ﺗﻘﻮﻟﻴﻪ ؟؟
ﺷﻮﻕ : ﺍﻳﻪ ﺍﻟﻬﺒﻞ ﻓﻲ ﻛﻼﻣﻲ ؟؟ ﻫﻮ ﺍﺣﻨﺎ ﻫﻨﻔﻀﻞ ﻋﺎﻟﻪ ﻋﻠﻴﻚ ﻻﻣﺘﻲ ؟؟
ﺣﺎﺯﻡ : ﻟﺤﺪ ﻣﺎ ﺍﻣﻮﺕ ...
ﺷﻮﻕ : ﺑﻌﺪ ﺍﻟﺸﺮ ﻋﻠﻴﻚ ﺑﺲ ﻛﺪﻩ ﻛﻔﺎﻳﻪ ﺍﻧﺖ ﻣﺶ ﻣﻠﺰﻡ ﺑﻴﻨﺎ
ﺣﺎﺯﻡ : ﺑﺼﻲ ﻳﺎ ﺷﻮﻕ ﺍﻭﻻ ﺍﻧﺘﻮ ﻣﺶ ﻋﺎﻟﻪ ﺍﺑﺪﺍ ﻭﺛﺎﻧﻴﺎ ﺍﻧﺎ ﻣﺘﻌﻠﻖ ﺑﺮﻫﻒ ﺟﺪﺍ ﻭﻫﻔﻀﻞ ﻣﺘﻜﻔﻞ ﺑﻴﻬﺎ ﻟﺤﺪ ﻣﺎ ﺍﺟﻮﺯﻫﺎ ﺍﻭ ﺍﻣﻮﺕ .. ﻷ ﺣﺘﻲ ﻟﻮ ﻣﺖ ﻫﺄﻣﻨﻠﻬﺎ ﻣﺴﺘﻘﺒﻠﻬﺎ ﺑﺤﻴﺚ ﻣﺎ ﺗﺤﺘﺠﺶ ﻻﻱ ﺣﺪ ﻓﻲ ﻳﻮﻡ ﻣﻦ ﺍﻻﻳﺎﻡ .. ﻓﺮﻳﺤﻲ ﻧﻔﺴﻚ ﻣﻦ ﺣﻮﺍﺭ ﺍﻟﺸﻐﻞ ﺩﻩ ﻻﻧﻲ ﻣﺶ ﻫﻮﺍﻓﻖ ﻋﻠﻴﻪ .. ﺍﻧﺘﻲ ﺷﻐﻠﻚ ﻫﻮ ﺑﻨﺘﻚ ﻭﺑﺲ ﻣﺶ ﻣﻄﻠﻮﺏ ﻣﻨﻚ ﻏﻴﺮ ﻛﺪﻩ ﻭﺍﻧﺴﻲ ﺧﺎﻟﺺ ﺣﻮﺍﺭ ﺍﻟﺸﻐﻞ
ﺷﻮﻕ : ﻳﺎ ﺣﺎﺯﻡ ﺑﺲ
ﺣﺎﺯﻡ : ﻣﺎ ﺑﺴﺶ ﻣﻔﻴﺶ ﺷﻐﻞ
ﺷﻮﻕ ﺑﺘﺒﺼﻠﻪ ﺑﺤﺐ ﻭﺣﺴﺖ ﺍﻥ ﺩﻩ ﺍﻧﺴﺐ ﻭﻗﺖ ﺗﻘﻮﻟﻪ ﺳﺮ ﺣﺒﻪ ﻟﺮﻫﻒ ﺍﻳﻪ ؟؟
ﺷﻮﻕ : ﺣﺎﺯﻡ ﺍﻧﺎ ﻋﺎﻳﺰﻩ ﺍﻗﻮﻟﻚ ﺣﺎﺟﻪ ﻣﻬﻤﻪ ﻋﻦ ﺭﻫﻒ
ﺣﺎﺯﻡ : ﻗﻮﻟﻲ ﺳﺎﻣﻌﻚ
ﺷﻮﻕ : ﺭﻫﻒ ﺗﺒﻘﻲ
ﻗﺎﻃﻌﻬﺎ ﺗﻠﻴﻔﻮﻧﻪ ﺑﻴﺮﻥ ﻓﻄﻠﻌﻪ ﻭﻛﺎﻧﺖ ﻣﺮﺍﺗﻪ ﺑﺘﺘﺼﻞ ﻓﺒﺺ ﻟﺸﻮﻕ
ﺷﻮﻕ : ﺭﺩ ﻋﻠﻴﻬﺎ ﺍﻻﻭﻝ
ﺭﺩ ﺣﺎﺯﻡ ﻋﻠﻲ ﻣﺮﺍﺗﻪ
ﺷﺎﻫﻨﺪﺍ : ﺍﻧﺖ ﻓﻴﻦ ﻳﺎ ﺣﺎﺯﻡ ؟؟
ﺣﺎﺯﻡ : ﺍﻳﻪ ﺍﻧﺖ ﻓﻴﻦ ﺩﻱ ؟؟ ﻣﻦ ﺍﻣﺘﻲ ﺑﺘﺘﻜﻠﻤﻲ ﻛﺪﻩ ؟؟
ﺷﺎﻫﻨﺪﺍ : ﻃﻴﺐ ﻣﻤﻜﻦ ﺍﺫﺍ ﺳﻤﺤﺖ ﺗﻴﺠﻠﻲ ﺣﺎﻟﻴﺎ ﺍﻟﺒﻴﺖ ؟؟
ﺣﺎﺯﻡ : ﺧﻴﺮ ﻓﻲ ﺍﻳﻪ ؟؟
ﺷﺎﻫﻨﺪﺍ : ﻟﻮ ﺳﻤﺤﺖ ﻳﺎ ﺣﺎﺯﻡ ﺗﻌﺎﻝ ﻋﻠﻲ ﺍﻟﺒﻴﺖ ﻣﻤﻜﻦ ؟؟
ﺣﺎﺯﻡ : ﺣﺎﺿﺮ ﻳﺎ ﺷﺎﻫﻨﺪﺍ ﺟﺎﻱ ﺳﻼﻡ
ﻗﻔﻞ ﻭﺑﺺ ﻟﺸﻮﻕ : ﻃﻴﺐ ﺍﻧﺎ ﻫﻀﻄﺮ ﺍﻣﺸﻲ ﺣﺎﻟﻴﺎ ﻭﻧﺘﻜﻠﻢ ﺑﻌﺪﻳﻦ ﺑﺲ ﻟﻮ ﺣﺎﺟﻪ ﻣﻬﻤﻪ ﻗﻮﻱ ﻗﻮﻟﻴﻬﺎ ﻣﺤﺘﺎﺟﻪ ﺣﺎﺟﻪ ﻟﺮﻫﻒ ؟؟
ﺷﻮﻕ : ﻻ ﻳﺎ ﺣﺎﺯﻡ ﺩﻩ ﻣﺠﺮﺩ ﻛﻼﻡ ﻳﺘﺄﺟﻞ ﻋﺎﺩﻱ
ﺣﺎﺯﻡ : ﻃﻴﺐ ﺧﻼﺹ ﺍﺷﻮﻓﻚ ﺑﻌﺪﻳﻦ ﻳﺎﻻ ﺳﻼﻡ
ﺭﻭﺡ ﺣﺎﺯﻡ ﻟﻤﺮﺍﺗﻪ ﺍﻟﻠﻲ ﻛﺎﻧﺖ ﺯﻱ ﺍﻻﺳﺪ ﺍﻟﻤﺤﺒﻮﺱ ﺭﺍﻳﺤﻪ ﺟﺎﻳﻪ ﻭﺍﻭﻝ ﻣﺎ ﺷﺎﻓﺘﻪ ﻋﻨﻴﻬﺎ ﻛﺎﻧﺖ ﺑﺘﻄﻠﻊ ﺷﺮﺍﺭ
ﺣﺎﺯﻡ : ﻓﻲ ﺍﻳﻪ ﺍﻟﻠﻲ ﺣﺼﻞ ﻣﺎﻟﻚ ؟؟ ﺣﺪ ﺟﺮﺍﻟﻪ ﺣﺎﺟﻪ ؟
ﺷﺎﻫﻨﺪﺍ : ﻻ ﻣﺤﺪﺵ ﺟﺮﺍﻟﻪ ﺣﺎﺟﻪ
ﺣﺎﺯﻡ : ﺍﺗﺨﺎﻧﻘﺘﻲ ﺍﻧﺘﻲ ﻭﻣﺎﻣﺎ ؟؟
ﺷﺎﻫﻨﺪﺍ : ﺍﻧﺎ ﻣﻦ ﺍﻣﺘﻲ ﺑﺘﺨﺎﻧﻖ ﻣﻊ ﻣﺎﻣﺘﻚ ؟؟
ﺣﺎﺯﻡ : ﺍﻣﺎﻝ ﻓﻲ ﺍﻳﻪ ؟؟ ﺟﻴﺒﺎﻧﻲ ﻋﻠﻲ ﻣﺎﻻ ﻭﺷﻲ ﻛﺪﻩ ﻟﻴﻪ ؟؟
ﺷﺎﻫﻨﺪﺍ : ﻛﻨﺖ ﻓﻴﻦ ﺳﻴﺎﺩﺗﻚ ؟؟
ﺣﺎﺯﻡ : ﺍﻧﺘﻲ ﺟﻴﺒﺎﻧﻲ ﻛﺪﻩ ﻋﻠﺸﺎﻥ ﺗﺴﺄﻟﻴﻨﻲ ﻛﻨﺖ ﻓﻴﻦ ؟؟
ﺷﺎﻫﻨﺪﺍ : ﺍﻩ ﻳﺎ ﺣﺎﺯﻡ ﺟﻴﺒﺎﻙ ﻋﻠﺸﺎﻥ ﺍﺳﺄﻟﻚ ﻛﻨﺖ ﻓﻴﻦ ؟
ﺣﺎﺯﻡ : ﻛﻨﺖ ﻓﻲ ﺷﻐﻠﻲ ﻳﺎ ﺷﺎﻫﻨﺪﺍ
ﺷﺎﻫﻨﺪﺍ : ﻻ ﻳﺎ ﺣﺎﺯﻡ ﻣﻜﻨﺘﺶ ﻓﻲ ﺷﻐﻠﻚ
ﺣﺎﺯﻡ : ﻭﺑﻌﺪﻳﻦ ؟؟
ﺷﺎﻫﻨﺪﺍ : ﻛﻨﺖ ﺑﺘﺘﻐﺪﻱ ﻓﻴﻦ ﺗﺤﺪﻳﺪﺍ ؟
ﺣﺎﺯﻡ : ﻭﺍﻧﺘﻲ ﻣﺎﻟﻚ ﺑﺘﻐﺪﻱ ﻓﻴﻦ ؟؟ ﺍﻧﺘﻲ ﻋﺎﻳﺰﻩ ﺍﻳﻪ ﻳﺎ ﺷﺎﻫﻨﺪﺍ ؟؟
ﺷﺎﻫﻨﺪﺍ : ﻋﺎﻳﺰﻩ ﺍﻋﺮﻑ ﻣﻴﻦ ﺍﻟﻠﻲ ﻛﻨﺖ ﺑﺘﺘﻐﺪﻱ ﻣﻌﺎﻫﺎ ﻭﺑﺘﻀﺤﻚ ﻭﺑﺘﻬﻴﺺ ﻭﻭﺍﺧﺪ ﺭﺍﺣﺘﻚ ﻗﻮﻱ ﻣﻌﺎﻫﺎ ﻭﻣﺎ ﺗﻜﺪﺑﺶ ﻋﻠﻴﺎ ﻟﻮ ﺳﻤﺤﺖ
ﺣﺎﺯﻡ ﻓﻬﻢ ﺍﻥ ﺍﻟﻠﻲ ﺑﻠﻎ ﺷﺎﻫﻨﺪﺍ ﺗﻌﻤﺪ ﻣﺎ ﻳﻘﻮﻟﻬﺎﺵ ﻋﻤﺮ ﺍﻟﻠﻲ ﻛﺎﻧﺖ ﻣﻌﺎﻩ ﻭﺍﻥ ﺣﺪ ﻣﻦ ﺻﺤﺒﺎﺗﻬﺎ ﺷﺎﻓﻪ ﻭﻋﺎﻳﺰ ﻳﻮﻟﻌﻬﺎ ﺑﻴﻨﻬﻢ
ﺣﺎﺯﻡ ﺿﺤﻚ
ﺷﺎﻫﻨﺪﺍ : ﺍﻧﺖ ﺑﺘﻀﺤﻚ ﻳﺎ ﺣﺎﺯﻡ ؟؟ ﺑﺘﻀﺤﻚ ﻋﻠﻴﺎ
ﺣﺎﺯﻡ : ﺍﻳﻮﻩ ﻃﺒﻌﺎ ﺑﻀﺤﻚ ﻻﻧﻚ ﻫﺒﻠﻪ ﻭﺑﺘﺮﻣﻲ ﻭﺩﺍﻧﻚ ﻻﻱ ﺣﺪ
ﺷﺎﻫﻨﺪﺍ : ﺍﻧﺎ ﻣﺶ ﺑﺮﻣﻲ ﻭﺩﺍﻧﻲ ﻟﺤﺪ .. ﺍﻧﺖ ﺑﺘﻨﻜﺮ ﻳﻌﻨﻲ ﺍﻧﻚ ﺍﺗﻐﺪﻳﺖ ﻣﻊ ﺣﺪ ﺍﻟﻨﻬﺎﺭﺩﻩ ؟؟
ﺣﺎﺯﻡ : ﻻ ﻣﺶ ﺑﻨﻜﺮ ﻳﺎ ﺳﺘﻲ ﺑﺲ ﺍﻟﻠﻲ ﻭﺻﻠﻚ ﺍﻟﻜﻼﻡ ﻧﺴﻲ ﻳﻘﻮﻟﻚ ﺍﻥ ﺍﻟﻠﻲ ﻛﻨﺖ ﺑﺘﻐﺪﻱ ﻣﻌﺎﻫﺎ ﻋﻨﺪﻫﺎ ﺳﺒﻊ ﺳﻨﻴﻦ ﺑﺲ
ﺷﺎﻫﻨﺪﺍ ﻣﺴﺘﻐﺮﺑﻪ : ﺍﻳﻪ ؟؟ ﺳﺒﻊ ﺳﻨﻴﻦ ؟؟
ﺣﺎﺯﻡ : ﺍﻳﻮﻩ ﺳﺒﻊ ﺳﻨﻴﻦ
ﺷﺎﻫﻨﺪﺍ : ﻭﺩﻱ ﻣﻴﻦ ﺩﻱ ﻭﺗﻌﺮﻓﻬﺎ ﻣﻨﻴﻦ ﻭﻓﻴﻦ ﺍﻫﻠﻬﺎ ؟؟
ﺣﺎﺯﻡ : ﻋﻴﻠﻪ ﻣﺘﻜﻔﻞ ﺑﻴﻬﺎ
ﺷﺎﻫﻨﺪﺍ : ﺍﻳﻮﻩ ﻣﺎﺷﻲ ﻣﻴﻦ ﺩﻱ ؟؟ ﻭﺗﻌﺮﻓﻬﺎ ﻣﻨﻴﻦ ؟؟
ﺟﺖ ﻟﺤﻈﻪ ﺍﻟﻤﻮﺍﺟﻬﻪ ﻭﺍﻟﺤﻘﻴﻘﻪ ﻻﺯﻡ ﺗﺘﻘﺎﻝ ﻣﻊ ﺍﻥ ﺣﺎﺯﻡ ﻣﺶ ﻣﺘﻔﺎﺀﻝ ﺑﺲ ﻻﺯﻡ ﻫﺘﻌﺮﻑ ﻓﻴﺒﻘﻲ ﻣﻨﻪ ﺍﺣﺴﻦ
ﺣﺎﺯﻡ : ﺍﻟﺒﻨﺖ ﺍﺳﻤﻬﺎ ﺭﻫﻒ ﻭﺗﺒﻘﻲ ﺑﻨﺖ ﺷﻮﻕ
ﺷﺎﻫﻨﺪﺍ : ﻭﺗﻄﻠﻊ ﻣﻴﻦ ﺷﻮﻕ ﺩﻱ ؟؟
ﺣﺎﺯﻡ ﺑﺘﺮﺩﺩ : ﺷﻮﻕ ﺍﻟﻤﻤﺮﺿﻪ ﺍﻟﻠﻲ ﺣﻜﻴﺘﻠﻚ ﻋﻨﻬﺎ
ﺷﺎﻫﻨﺪﺍ : ﺗﻘﺼﺪ ﺣﺒﻴﺒﺘﻚ ؟؟ ﺩﻱ ﺑﻨﺖ ﺣﺒﻴﺒﺘﻚ ؟؟
ﺣﺎﺯﻡ : ﻣﺶ ﺣﺒﻴﺒﺘﻲ ... ﻛﺎﻧﺖ .. ﻓﻲ ﻓﺮﻕ
ﻟﺤﻈﺎﺕ ﺻﻤﺖ ﻛﺘﻴﺮﻩ ﻭﺷﺎﻫﻨﺪﺍ ﻣﺶ ﻋﺎﺭﻓﻪ ﺗﻘﻮﻝ ﺍﻳﻪ ؟ ﺍﻟﻜﻼﻡ ﻫﺮﺏ ﻣﻨﻬﺎ ﻭﻣﺶ ﻻﻗﻴﻪ ﺣﺎﺟﻪ ﺗﻘﻮﻟﻬﺎ
ﺣﺎﺯﻡ : ﺳﺎﻛﺘﻪ ﻟﻴﻪ ؟؟ ﺍﺗﻜﻠﻤﻲ
ﺷﺎﻫﻨﺪﺍ : ﻗﺎﺑﻠﺘﻬﺎ ﻣﻦ ﺍﻣﺘﻲ ؟؟
ﺣﺎﺯﻡ : ﻣﻦ ﻓﺘﺮﻩ ﻃﻮﻳﻠﻪ
ﺷﺎﻫﻨﺪﺍ : ﺍﻳﻮﻩ ﻳﻌﻨﻲ ﻗﺒﻞ ﻣﺎ ﻧﺘﺠﻮﺯ ﻭﻻ ﺑﻌﺪ ﻣﺎ ﺍﺗﺠﻮﺯﻧﺎ ؟؟؟
ﺣﺎﺯﻡ : ﻗﺒﻞ ﻣﺎ ﻧﺘﺠﻮﺯ ... ﻗﺒﻞ ﻣﺎ ﺍﺗﻌﺮﻑ ﻋﻠﻴﻜﻲ ﺍﺻﻼ ..
ﺷﺎﻫﻨﺪﺍ : ﻃﻴﺐ ﺍﻣﺎﻝ ﺍﺗﺠﻮﺯﺗﻨﻲ ﻟﻴﻪ ﻟﻤﺎ ﺣﺒﻴﺒﺘﻚ ﺭﺟﻌﺘﻠﻚ؟؟؟
ﺣﺎﺯﻡ : ﺍﻳﻪ ﺍﺗﺠﻮﺯﺗﻨﻲ ﻟﻴﻪ ﺩﻱ ؟؟ ﻭﺍﻳﻪ ﺣﺒﻴﺒﺘﻲ ﺭﺟﻌﺘﻠﻲ ؟؟؟ ﺷﺎﻫﻨﺪﺍ ﺣﺒﻴﺒﺘﻲ ﻋﻼﻗﺘﻲ ﺑﺸﻮﻕ ﺳﺒﻖ ﻭﻗﻮﻟﺘﻠﻚ ﺍﻧﻬﺎ ﺍﻧﺘﻬﺖ ﺑﺠﻮﺍﺯﻫﺎ ﻭﺍﺗﻘﻔﻠﺖ ﺻﻔﺤﺘﻬﺎ
ﺷﺎﻫﻨﺪﺍ : ﺍﻧﺖ ﻋﻠﻲ ﻋﻼﻗﻪ ﺑﻴﻬﺎ ﻟﺤﺪ ﺍﻟﻨﻬﺎﺭﺩﻩ ﻳﺒﻘﻲ ﺍﺯﺍﻱ ﺍﺗﻘﻔﻠﺖ ؟؟ ﺍﻧﺖ ﺑﺘﻀﺤﻚ ﻋﻠﻲ ﻣﻴﻦ ؟؟
ﺣﺎﺯﻡ : ﺍﻧﺎ ﻣﺘﻜﻔﻞ ﺑﻴﻬﺎ ﻭﺑﺒﻨﺘﻬﺎ ﺩﻩ ﻣﺶ ﻣﻌﻨﺎﻩ ﺍﻧﻲ ﺑﺤﺒﻬﺎ ﺍﻭ ﺍﻧﻲ ﻋﻠﻲ ﻋﻼﻗﻪ ﺑﻴﻬﺎ
ﺷﺎﻫﻨﺪﺍ : ﺍﻣﺎﻝ ﻣﻌﻨﺎﻩ ﺍﻳﻪ ؟؟ ﻟﻤﺎ ﺗﺠﻴﺐ ﺣﺒﻴﺒﺘﻚ ﺍﻟﻘﺪﻳﻤﻪ ﻭﺗﺘﻜﻔﻞ ﺑﻴﻬﺎ ﻭﺗﻜﻮﻥ ﻣﺴﺆﻝ ﻋﻨﻬﺎ ﻭﻋﻦ ﺑﻨﺘﻬﺎ ﻳﺒﻘﻲ ﺍﺳﻤﻪ ﺍﻳﻪ ﺩﻩ ؟؟
ﺣﺎﺯﻡ : ﺷﻮﻕ ﻣﺶ ﺍﻟﺒﻴﺖ ﺍﻟﻮﺣﻴﺪ ﺍﻟﻠﻲ ﻓﺎﺗﺤﻪ ﻭﺍﻧﺘﻲ ﻋﺎﺭﻓﻪ ﺩﻩ ﻛﻮﻳﺲ
ﺷﺎﻫﻨﺪﺍ : ﺍﻳﻮﻩ ﻣﺎ ﺍﻋﺘﺮﺿﺘﺶ ﺑﺲ ﺷﻮﻕ ﺍﻟﻮﺣﻴﺪﻩ ﺍﻟﻠﻲ ﺑﺘﺤﺒﻬﺎ
ﺣﺎﺯﻡ : ﻣﺎ ﺑﺤﺒﻬﺎﺵ .. ﺷﺎﻫﻲ ﺍﻧﺎ ﻟﻤﺎ ﺭﺟﻌﺖ ﻛﻨﺖ ﻣﺘﺨﻴﻞ ﺍﻧﻲ ﺑﺤﺒﻬﺎ ﻭﻋﻠﺸﺎﻥ ﻛﺪﻩ ﺣﺒﻴﺖ ﺍﻧﺘﻘﻢ ﻟﻜﺮﺍﻣﺘﻲ ﺍﻟﻤﺠﺮﻭﺣﻪ ﻭﻓﻀﻠﺖ ﻭﺭﺍﻫﺎ ﺍﻃﺮﺩﻫﺎ ﻣﻦ ﻛﻞ ﺷﻐﻞ ﺗﻤﺴﻜﻪ ﻭﻭﺻﻠﺘﻬﺎ ﻟﻤﺮﺣﻠﻪ ﻛﺎﻧﺖ ﺑﺘﺸﺤﺖ ﻋﻠﺸﺎﻥ ﺗﺠﻴﺐ ﻟﻘﻤﻪ ﻟﺒﻨﺘﻬﺎ ﻭﺧﻠﺘﻬﺎ ﺍﺳﻮﺃ ﻣﻦ ﺍﻟﻤﺘﺸﺮﺩﻳﻦ ﻭﺍﻟﺸﺤﺎﺗﻴﻦ ﻭﺗﺨﻴﻠﺖ ﺍﻥ ﻛﺪﻩ ﻫﺮﺗﺎﺡ ﺑﺲ ﻟﻘﻴﺖ ﻧﻔﺴﻲ ﻣﺶ ﻣﺮﺗﺎﺡ ﻭﻣﺶ ﻣﺒﺴﻮﻁ ﻭﺍﻻﻧﺘﻘﺎﻡ ﺿﺎﻳﻘﻨﻲ ﺍﻛﺘﺮ ﻭﺣﺴﺴﻨﻲ ﺍﻧﻲ ﻣﺶ ﺍﻧﺴﺎﻥ ﻓﺒﺎﻟﺘﺎﻟﻲ ﻗﺮﺭﺕ ﺍﻧﻲ ﺍﺳﺎﻋﺪﻫﺎ ﻓﺘﻜﻔﻠﺖ ﺑﻴﻬﻢ ﻭﺍﺗﻌﻠﻘﺖ ﺑﺮﻫﻒ ﻭﺑﺲ ﺩﻩ ﻛﻞ ﺍﻟﻤﻮﺿﻮﻉ
ﺷﺎﻫﻨﺪﺍ : ﻭﺍﻧﺖ ﻣﺘﺨﻴﻞ ﺍﻧﻲ ﻫﻘﺒﻞ ﺍﻟﻌﻼﻗﻪ ﺩﻱ ؟؟
ﺣﺎﺯﻡ : ﺍﻧﺎ ﻣﺶ ﻫﺘﺨﻠﻲ ﻋﻨﻬﻢ ﻳﺎ ﺷﺎﻫﻨﺪﺍ
ﺷﺎﻫﻨﺪﺍ : ﻳﻌﻨﻲ ﺍﻳﻪ ﻳﺎ ﺣﺎﺯﻡ ؟ ﺍﺧﺒﻂ ﺍﻧﺎ ﺩﻣﺎﻏﻲ ﻓﻲ ﺍﻟﺤﻴﻂ ﻭﺍﺗﻘﺒﻞ ﻋﻼﻗﺘﻚ ﺑﺤﺒﻴﺒﺘﻚ ؟؟
ﺣﺎﺯﻡ : ﻗﻮﻟﺘﻠﻚ ﻣﺶ ﺣﺒﻴﺒﺘﻲ ... ﺍﻧﺘﻲ ﺑﺲ ﺣﺒﻴﺒﺘﻲ .. ﺷﻮﻕ ﻣﺎﺿﻲ ﻣﺶ ﺍﻛﺘﺮ ﻭﺣﺎﻟﻴﺎ ﺑﻌﻄﻒ ﻋﻠﻴﻬﺎ ﻭﻋﻠﻲ ﺑﻨﺘﻬﺎ ﻭﺑﺲ
ﺷﺎﻫﻨﺪﺍ : ﺣﻂ ﻧﻔﺴﻚ ﻣﻜﺎﻧﻲ ﻳﺎ ﺣﺎﺯﻡ ... ﻟﻮ ﻇﻬﺮﻟﻲ ﺣﺒﻴﺐ ﻗﺪﻳﻢ ﻭﺍﻧﺎ ﺑﺮﻭﺣﻠﻪ ﻭﺍﻗﻌﺪ ﻣﻌﺎﻩ ﻓﻲ ﺷﻘﻪ ﻟﻮﺣﺪﻧﺎ ﻭﺍﻗﻮﻟﻚ ﺳﻮﺭﻱ ﺍﺻﻞ ﺑﺤﺐ ﺍﺑﻨﻪ ﻭﻻ ﺑﻨﺘﻪ ﻫﺘﻌﻤﻞ ﺍﻳﻪ ؟؟؟ ﻫﺘﺘﻘﺒﻞ ﺍﻟﻮﺿﻊ ﺩﻩ ؟؟
ﺣﺎﺯﻡ : ﺍﻟﻮﺿﻊ ﻣﺨﺘﻠﻒ ﺍﻧﺘﻲ ﻏﻴﺮ
ﺷﺎﻫﻨﺪﺍ : ﻻ ﻣﺶ ﻣﺨﺘﻠﻒ ﻭﺍﻭﻋﻲ ﺗﻜﻠﻤﻨﻲ ﺑﻘﺼﻪ ﺭﺍﺟﻞ ﻭﺳﺖ
ﺣﺎﺯﻡ : ﻣﺶ ﻫﻜﻠﻤﻚ ﺑﻘﺼﻪ ﻭﺍﺟﻞ ﻭﺳﺖ ﺑﺲ ﺍﻟﻠﻲ ﺍﻧﺘﻲ ﺑﺘﻘﻮﻟﻴﻪ ﻣﺎ ﻳﻨﻔﻌﺶ
ﺷﺎﻫﻨﺪﺍ : ﻭﻟﻴﻪ ﻧﺎﻓﻊ ﻣﻌﺎﻙ ؟؟
ﺣﺎﺯﻡ : ﺍﻧﺎ ﺑﺼﺮﻑ ﻋﻠﻴﻬﻢ ﻭﺑﺲ
ﺷﺎﻫﻨﺪﺍ : ﺑﺲ ﻳﺎ ﺣﺎﺯﻡ !! ﻣﺶ ﺑﺘﺮﻭﺡ ﺍﻟﺒﻴﺖ ﻋﻨﺪﻫﺎ ؟؟ ﻣﺶ ﺑﺘﻘﻌﺪ ﻭﺗﺎﻛﻞ ﻣﻌﺎﻫﻢ ﻣﺜﻼ !! ﻣﺶ ﺑﺘﻘﻌﺪ ﻭﺗﺤﻜﻴﻠﻚ ﻫﻤﻮﻣﻬﺎ ﻭﻣﺸﺎﻛﻠﻬﺎ !! ﻣﺶ ﺑﺘﺤﺒﻚ ﻫﻴﺎ ﺣﺘﻲ ﻟﻮ ﺍﻧﺖ ﻣﺶ ﺑﺘﺤﺒﻬﺎ ؟ !! ﻫﻴﺎ ﺍﻟﻌﻼﻗﻪ ﺍﻳﻪ ﻏﻴﺮ ﺍﻫﺘﻤﺎﻡ !!! ﻭﺍﻧﺖ ﻣﻬﺘﻢ ﺑﻴﻬﺎ ﻭﺑﻤﺸﺎﻛﻠﻬﺎ ﻭﺑﺒﻨﺘﻬﺎ ﻋﺎﻳﺰ ﺍﻳﻪ ﺗﺎﻧﻲ ؟؟ ﻧﺎﻗﺺ ﺍﻳﻪ ﺗﺎﻧﻲ ؟؟
ﺣﺎﺯﻡ : ﺷﺎﻫﻨﺪﺍ ﺍﻧﺘﻲ ﺑﺘﺼﻴﻐﻲ ﺍﻻﻣﻮﺭ ﻏﻠﻂ .. ﺍﻧﺎ ﻣﺎ ﺑﺤﺒﻬﺎﺵ
ﺷﺎﻫﻨﺪﺍ : ﺍﻣﺎﻝ ﺑﺘﺤﺐ ﻣﻴﻦ ؟؟؟
ﺣﺎﺯﻡ : ﻫﻘﻮﻟﻚ ﺍﻧﺎ ﺑﺤﺐ ﻣﻴﻦ
ﻗﻔﻞ ﺣﺎﺯﻡ ﺍﻟﻜﻼﻡ ﻭﺳﻜﺖ ﺷﺎﻫﻨﺪﺍ ﺑﻄﺮﻳﻘﺘﻪ ﺍﻟﺨﺎﺻﻪ ﺍﻟﻠﻲ ﻣﺎ ﺑﺘﻌﺮﻓﺶ ﺗﻘﺎﻭﻣﻬﺎ ﺍﻭ ﺗﺮﻓﻀﻬﺎ ... ﺣﺎﻭﻝ ﻳﻘﻮﻟﻬﺎ ﺑﺤﺒﻚ ﺑﻄﺮﻳﻘﻪ ﻏﻴﺮ ﺍﻟﻜﻼﻡ ... ﺣﺎﻭﻝ ﻳﻌﻴﺸﻬﺎ ﺍﻟﺤﺐ ﺩﻩ ...
ﺑﺲ ﻃﻮﻝ ﻣﺎ ﻫﻮ ﻣﻌﺎﻫﺎ ﺷﻮﻕ ﺻﻮﺭﺗﻬﺎ ﺑﺘﻄﺎﺭﺩﻩ ﻭﻣﺶ ﻋﺎﺭﻑ ﻳﻔﺴﺮ ﺩﻩ ﺑﺎﻳﻪ ؟ ﻫﻮ ﺗﺨﻄﻲ ﺣﺒﻬﺎ ﻭﺣﺎﻟﻴﺎ ﺑﻴﺤﺐ ﻣﺮﺍﺗﻪ ﻭﺑﺲ .... ﺑﻌﺪ ﻓﺘﺮﻩ ﻃﻮﻳﻠﻪ ﻭﻫﻴﺎ ﺟﻨﺒﻪ
ﺷﺎﻫﻨﺪﺍ : ﺍﻧﺎ ﻣﻮﺍﻓﻘﻪ ﻋﻠﻲ ﻋﻼﻗﺘﻚ ﺑﻴﻬﻢ ﺑﺲ ﻋﻨﺪﻱ ﺷﺮﻁ
ﺣﺎﺯﻡ : ﻭﺍﻧﺎ ﻣﻮﺍﻓﻖ ﻋﻠﻴﻪ
ﺷﺎﻫﻨﺪﺍ : ﻣﺶ ﺗﺴﻤﻌﻪ ﺍﻻﻭﻝ ؟؟
ﺣﺎﺯﻡ : ﻣﻬﻤﺎ ﻳﻜﻮﻥ .. ﺍﻧﺎ ﺍﻟﻤﻬﻢ ﺍﻧﻲ ﻣﺶ ﻫﺘﺨﻠﻲ ﻋﻨﻬﻢ ﻭﻫﺄﻣﻨﻬﻢ ﻣﺎﺩﻳﺎ ﻭﺑﺲ
ﺷﺎﻫﻨﺪﺍ : ﺍﻭﻛﻲ ﻭﺩﻩ ﺷﺮﻃﻲ
ﺣﺎﺯﻡ : ﺳﻮﺭﻱ ﻛﺪﻩ ﺍﻧﺎ ﻣﺶ ﻓﺎﻫﻢ
ﺷﺎﻫﻨﺪﺍ : ﻳﻌﻨﻲ ﻳﺎ ﺣﺎﺯﻡ ﺍﻧﺖ ﻫﺘﺼﺮﻑ ﻋﻠﻴﻬﻢ ﻭﻫﺘﻔﺘﺢ ﺑﻴﺘﻬﻢ ﺑﺲ ﺯﻳﻬﻢ ﺯﻱ ﺍﻱ ﺣﺪ ﺍﻧﺖ ﻣﺘﻜﻔﻞ ﺑﻴﻪ .. ﻻ ﻫﺘﺮﻭﺣﻠﻬﻢ ﻭﻻ ﻫﺘﻘﺎﺑﻠﻬﻢ ﻭﻻ ﻫﺘﺸﻮﻓﻬﻢ .. ﺷﺮﻑ ﺍﻧﺖ ﻫﺘﺨﺼﺼﻠﻬﻢ ﻣﺒﻠﻎ ﻗﺪ ﺍﻳﻪ ﻭﻳﺘﺒﻌﺘﻠﻬﻢ ﺯﻳﻬﻢ ﺯﻱ ﺍﻱ ﺣﺪ
ﺣﺎﺯﻡ ﺍﺗﻌﺪﻝ ﻭﺑﺼﻠﻬﺎ ﺑﺎﺳﺘﻨﻜﺎﺭ
ﺷﺎﻫﻨﺪﺍ : ﺍﻳﻪ ﻣﻌﺘﺮﺽ ﻋﻠﻲ ﺍﻳﻪ ؟؟
ﺣﺎﺯﻡ : ﺍﻧﺎ ﻗﻮﻟﺘﻠﻚ ﺑﺤﺐ ﺭﻫﻒ ﻭﻋﺎﻳﺰ ﺍﺷﻮﻓﻬﺎ ﺗﻘﻮﻟﻴﻠﻲ ﺍﻗﻄﻊ ﻋﻼﻗﺘﻲ ﺑﻴﻬﻢ ﻧﻬﺎﺋﻲ ؟؟؟
ﺷﺎﻫﻨﺪﺍ : ﻭﺍﻧﺎ ﺍﺳﻔﻪ ﺍﻧﺖ ﺑﺘﻴﺠﻲ ﻋﻠﻴﺎ ﻗﻮﻱ ﻭﺍﻛﺘﺮ ﻣﻦ ﻛﺪﻩ ﻣﺶ ﻫﺘﺤﻤﻞ .. ﻣﺶ ﻗﺎﺩﺭﻩ ﺍﻓﻬﻢ ﺣﺒﻚ ﻟﻌﻴﻠﻪ ... ﺃﻣﻨﻠﻬﺎ ﻣﺴﺘﻘﺒﻠﻬﺎ ﻟﻜﻦ ﺍﻛﺘﺮ ﻣﻦ ﻛﺪﻩ ﻣﻌﻨﺪﻳﺶ ﺍﻟﻜﺮﻩ ﻓﻲ ﻣﻠﻌﺒﻚ
ﺣﺎﺯﻡ : ﻳﻌﻨﻲ ﺍﻳﻪ ﺍﻟﻜﺮﻩ ﻓﻲ ﻣﻠﻌﺒﻲ ؟؟
ﺷﺎﻫﻨﺪﺍ : ﻳﻌﻨﻲ ﻳﺎ ﺣﺒﻚ ﻟﺮﻫﻒ ﻳﺎ ﺍﻧﺎ ؟؟
ﺣﺎﺯﻡ : ﺍﻧﺘﻲ ﺍﺗﺠﻨﻨﺘﻲ ﻭﻻ ﺍﺗﻬﺒﻠﺘﻲ ؟؟؟ﺍﻧﺘﻲ ﻣﺎ ﺗﺘﺤﻄﻴﺶ ﻓﻲ ﻣﻘﺎﺭﻧﻪ ﻣﻊ ﺣﺪ ﺍﺻﻼ
ﺷﺎﻫﻨﺪﺍ : ﺧﻼﺹ ﻳﺒﻘﻲ ﺍﻧﺖ ﻣﻮﺍﻓﻖ ؟؟
ﺣﺎﺯﻡ : ﺍﻧﺎ ﻋﺎﻳﺰ ﺍﻓﻬﻢ ﻋﻼﻗﺘﻲ ﺑﺮﻫﻒ ﻣﻀﻴﻘﺎﻛﻲ ﻓﻲ ﺍﻳﻪ ؟؟
ﺷﺎﻫﻨﺪﺍ : ﺭﻫﻒ ﻭﺷﻮﻕ ﻓﻲ ﻛﻔﻪ ﻭﺍﺣﺪﻩ ﻣﺶ ﻣﻔﺼﻮﻟﻴﻦ ﻋﻦ ﺑﻌﺾ ﺩﻱ ﻫﺘﺠﻴﺐ ﺩﻱ ﻭﺍﻧﺎ ﻣﻌﺘﺮﺿﻪ ﻋﻠﻲ ﻋﻼﻗﺘﻚ ﺑﺸﻮﻕ ... ﺣﺎﺯﻡ ﺍﻟﻠﻲ ﻋﻨﺪﻱ ﻗﻮﻟﺘﻪ
ﺣﺎﺯﻡ ﻣﺎ ﺭﺩﺵ ﻋﻠﻴﻬﺎ ﻭﺳﺎﺑﻬﺎ ﻭﺧﺮﺝ ... ﻣﺶ ﻋﺎﺭﻑ ﻳﻔﻜﺮ ﺩﻩ ﻳﺪﻭﺏ ﻟﺴﻪ ﻭﺍﻋﺪ ﺭﻫﻒ ﺍﻧﻪ ﻣﺶ ﻫﻴﺴﻴﺒﻬﺎ .. ﻭﻋﺪﻫﺎ ﺍﻥ ﻣﺤﺪﺵ ﻫﻴﻘﻒ ﺑﻴﻨﻬﻢ ، ﻭﻋﺪﻫﺎ ﺍﻧﻪ ﻫﻴﻜﻮﻥ ﺍﺏ ﻭﺍﻫﻮ ﺑﻴﻔﻜﺮ ﻳﺘﺨﻠﻲ ﻋﻨﻬﺎ ...
ﺭﺍﺡ ﺷﻐﻠﻪ ﻭﻓﻀﻞ ﺳﺮﺣﺎﻥ ﻣﺶ ﻣﺮﻛﺰ ﻧﻬﺎﺋﻲ
ﻋﻠﻲ : ﺣﺎﺯﻡ ... ﺣﺎﺍﺍﺍﺍﺍﺯﻡ ... ﺍﻳﻪ ﻓﻴﻨﻚ ؟؟
ﺣﺎﺯﻡ : ﻣﻌﻠﺶ ﻣﺶ ﻣﺮﻛﺰ ﺧﻠﻲ ﺍﻟﺸﻐﻞ ﺑﻜﺮﻩ ﺍﻧﺎ ﻫﻘﻮﻡ ﺍﺭﻭﺡ
ﻋﻠﻲ : ﻃﻴﺐ ﺍﻻﻭﻝ ﻗﻮﻟﻲ ﻣﺎﻟﻚ ﻓﻲ ﺍﻳﻪ ؟؟
ﺣﺎﺯﻡ : ﺷﺎﻫﻨﺪﺍ ﻋﺮﻓﺖ ﺑﺸﻮﻕ ﻭﻋﺎﻳﺰﺍﻧﻲ ﺍﻗﻄﻊ ﻋﻼﻗﺘﻲ ﺑﻴﻬﻢ ﻳﺎ ﺗﺴﻴﺒﻨﻲ
ﻋﻠﻲ : ﻫﺘﺮﻣﻴﻬﻢ ﻓﻲ ﺍﻟﺸﺎﺭﻉ ﺗﺎﻧﻲ ؟؟ ﺣﺮﺍﻡ ﻳﺎ ﺣﺎﺯﻡ ﻭﺑﻌﺪﻳﻦ ﺷﺎﻫﻨﺪﺍ ﻃﻴﺒﻪ ﻣﺎ ﺗﺮﺿﺎﺵ ﺑﻜﺪﻩ
ﺣﺎﺯﻡ : ﻻ ﻣﺶ ﻫﺮﻣﻴﻬﻢ ﻓﻲ ﺍﻟﺸﺎﺭﻉ ﻫﻴﺎ ﻣﻮﺍﻓﻘﻪ ﺍﻧﻲ ﺍﺗﻜﻔﻞ ﺑﻴﻬﻢ ﻫﻴﺎ ﺷﺮﻃﻬﺎ ﺍﻥ ﺍﻧﺎ ﺍﻗﻄﻊ ﻋﻼﻗﺘﻲ ﺑﻴﻬﻢ ﺗﻤﺎﻣﺎ
ﻋﻠﻲ : ﻃﻴﺐ ﺣﻘﻬﺎ ﻭﻋﺪﺍﻫﺎ ﺍﻟﻌﻴﺐ ﺍﻳﻪ ﻣﺸﻜﻠﺘﻚ ﺍﻧﺖ ﺑﻘﻲ ؟؟ﺍﻧﺖ ﻗﻮﻟﺖ ﺍﻧﻚ ﺗﺨﻄﻴﺖ ﺣﺐ ﺷﻮﻕ ﻟﻴﻪ ﻣﻌﺘﺮﺽ ﺑﻘﻲ ؟؟
ﺣﺎﺯﻡ : ﻫﻮ ﺍﻧﺖ ﻫﺘﻘﻮﻟﻲ ﺯﻳﻬﺎ ؟؟
ﻋﻠﻲ : ﻣﺎﻫﻮ ﺍﻱ ﺣﺪ ﻫﻴﻘﻮﻝ ﻛﺪﻩ ، .. ﺍﻧﺖ ﺍﺣﻤﺪ ﺭﺑﻨﺎ ﺍﺻﻼ ﺍﻥ ﻣﺮﺍﺗﻚ ﻋﺎﻗﻠﻪ ﻭﻣﺎ ﻗﺎﻟﺘﺶ ﺍﺭﻣﻴﻬﻢ ﻓﻲ ﺍﻟﺸﺎﺭﻉ
ﺣﺎﺯﻡ : ﺍﻧﺘﻮ ﻣﺶ ﻗﺎﺩﺭﻳﻦ ﺗﻔﻬﻤﻮﺍ ﻟﻴﻪ ؟؟؟ ﻋﻼﻗﺘﻲ ﺑﺮﻫﻒ ﻫﻴﺎ ﺍﻟﻤﻬﻤﻪ ﻣﺶ ﺷﻮﻕ ... ﺍﻧﺎ ﺑﺤﺐ ﺭﻫﻒ ... ﻭﻋﺪﺗﻬﺎ ﺍﻧﻲ ﻫﻔﻀﻞ ﻣﻮﺟﻮﺩ ﻓﻲ ﺣﻴﺎﺗﻬﺎ
ﻋﻠﻲ : ﺩﻱ ﻋﻴﻠﻪ !!
ﺣﺎﺯﻡ : ﻋﻴﻠﻪ ﻭﺍﺗﻌﻠﻘﻨﺎ ﺑﺒﻌﺾ ﻓﻴﻦ ﺍﻟﻤﺸﻜﻠﻪ ؟؟
ﻋﻠﻲ : ﺍﻟﻤﺸﻜﻠﻪ ﺍﻥ ﺍﻣﻬﺎ ﺣﺒﻴﺒﺘﻚ
ﺣﺎﺯﻡ : ﻳﻮﻭﻭﻭﻭﻭﻩ ﻣﺎ ﺗﺘﻜﻠﻤﺶ ﺯﻱ ﺷﺎﻫﻨﺪﺍ
ﻋﻠﻲ : ﺣﺎﺯﻡ ﻛﻼﻣﻚ ﻣﻠﻮﺵ ﻣﻌﻨﻲ ... ﺍﻳﻪ ﺍﻟﻠﻲ ﻳﻌﻠﻘﻚ ﺑﺎﻟﺒﻨﺖ ﻏﻴﺮ ﺍﻣﻬﺎ ؟؟
ﺣﺎﺯﻡ : ﻣﻌﺮﻓﺶ ﺍﻟﻠﻲ ﺍﻋﺮﻓﻪ ﺍﻧﻲ ﺑﺤﺐ ﺭﻫﻒ ﻭﻣﺎ ﺑﺤﺒﺶ ﺷﻮﻕ
ﻋﻠﻲ : ﺍﺳﻒ ﺑﺲ ﻛﻼﻣﻚ ﻣﺎﻟﻮﺵ ﻣﻌﻨﻲ ... ﺍﻟﺴﺆﺍﻝ ﻫﻨﺎ ﺑﺘﺤﺐ ﻣﺮﺍﺗﻚ ﻭﻻ ﻷ ؟؟ ﺩﻩ ﺍﻟﻤﻬﻢ ﺣﺎﻟﻴﺎ
ﺳﺎﺑﻪ ﻭﺧﺮﺝ ﻭﻫﻮ ﻣﻌﺮﻓﺶ ﻳﻘﺮﺭ .. ﺍﺧﺮ ﺍﻟﻠﻴﻞ ﺭﻭﺡ ﻣﻠﻘﺎﺵ ﻣﺮﺍﺗﻪ ﻓﻲ ﺍﻟﺒﻴﺖ ﻭﺩﻩ ﺟﻨﻨﻪ ﻓﺎﺗﺼﻞ ﺑﻴﻬﺎ ﺗﻠﻴﻔﻮﻧﻬﺎ ﻣﻘﻔﻮﻝ ﺍﺗﺼﻞ ﺑﺎﺑﻮﻫﺎ ﻭﻋﺮﻑ ﻣﻨﻪ ﺍﻧﻬﺎ ﻣﻮﺟﻮﺩﻩ ﻋﻨﺪﻩ
ﻓﻀﻞ ﻫﻴﺘﺠﻨﻦ ﻣﻦ ﺗﺼﺮﻓﻬﺎ ﻭﻋﺎﻳﺰ ﻳﻌﻤﻞ ﺍﻱ ﺣﺎﺟﻪ ﺑﺲ ﻣﺶ ﻋﺎﺭﻑ ؟؟؟ ﻃﻴﺐ ﻳﺮﻭﺡ ﻟﺸﻮﻕ ﻫﻴﺎ ﺑﺘﺮﻳﺤﻪ ؟؟ﻻﺃ ﻷ ﺷﻮﻕ ﻷ !!
ﻧﺰﻝ ﻭﻫﻮ ﻧﺎﺯﻝ ﻗﺎﺑﻞ ﻣﺎﻣﺘﻪ ﺭﺍﺟﻌﻪ ﻣﻦ ﺑﺮﻩ ﻳﺪﻭﺏ
ﺣﺎﺯﻡ : ﻛﻨﺘﻲ ﻓﻴﻦ ﻟﺤﺪ ﺩﻟﻮﻗﺘﻲ ﻭﺍﺯﺍﻱ ﺗﺘﺄﺧﺮﻱ ﺑﺮﻩ ﻛﺪﻩ ؟؟
ﺻﻔﻴﻪ : ﻭﺍﻧﺖ ﻣﺎﻟﻚ ﻳﺎ ﺣﺎﺯﻡ ؟؟ ﻳﺨﺼﻚ ﻓﻲ ﺍﻳﻪ ﻛﻨﺖ ﻓﻴﻦ ؟؟
ﺣﺎﺯﻡ : ﻳﻌﻨﻲ ﺍﻳﻪ ﺍﻧﺎ ﻣﺎﻟﻲ ؟؟ ﺍﻧﺖ ﺍﻣﻲ
ﺻﻔﻴﻪ : ﺑﺎﻟﻈﺒﻂ ﺍﻣﻚ ﻣﺶ ﻣﺮﺍﺗﻚ ﻋﻠﺸﺎﻥ ﺗﺴﺄﻟﻨﻲ ﻛﻨﺖ ﻓﻴﻦ ؟؟ ﻭﺑﻌﺪﻳﻦ ﺍﻧﺖ ﻓﻴﻦ ﻣﺮﺍﺗﻚ ﺑﻘﻲ ؟؟
ﺣﺎﺯﻡ : ﻣﺮﺍﺗﻲ ﻓﻲ ﺑﻴﺖ ﺍﺑﻮﻫﺎ
ﺻﻔﻴﻪ : ﺑﺘﻌﻤﻞ ﺍﻳﻪ ؟؟ ﺍﻭﻋﻮﺍ ﺗﻜﻮﻧﻮﺍ ﺯﻋﻼﻧﻴﻦ ؟؟
ﺣﺎﺯﻡ : ﻳﻔﺮﻕ ﻣﻌﺎﻛﻲ ؟؟؟
ﺻﻔﻴﻪ : ﻻ ﻣﺎ ﻳﻔﺮﻗﺶ ﺗﺼﺒﺢ ﻋﻠﻲ ﺧﻴﺮ ﺍﻧﺎ ﺗﻌﺒﺎﻧﻪ ﻭﻋﺎﻳﺰﻩ ﺍﻧﺎﻡ
ﺳﺎﺑﺘﻪ ﻭﻃﻠﻌﺖ ﻭﻫﻮ ﻓﻀﻞ ﻛﺘﻴﺮ ﻣﻜﺎﻧﻪ ﻣﺴﺘﻐﺮﺏ ﻣﻦ ﺍﻣﻪ ﻭﺗﺼﺮﻓﺎﺗﻪ ... ﻋﻤﺮﻩ ﻣﺎ ﺣﺲ ﺍﺑﺪﺍ ﺍﻧﻬﺎ ﺑﺘﺨﺎﻑ ﻋﻠﻴﻪ ﺍﻭ ﺑﺘﺤﺒﻪ ﺯﻱ ﺍﻱ ﺍﻡ .. ﻋﻤﺮﻩ ﻣﺎ ﺣﺲ ﺑﺎﻟﺤﺐ ﻭﺍﻻﻫﺘﻤﺎﻡ ﻏﻴﺮ ﻣﻦ ﺷﺎﻫﻨﺪﺍ ... ﺣﺒﻬﺎ ﺻﺎﺩﻕ ﻭﺣﻘﻴﻘﻲ ﻭﺑﺘﻬﺘﻢ ﺑﻴﻪ ﻭﺍﻫﻮ ﻫﻴﻀﻴﻌﺎ ﻣﻦ ﺍﻳﺪﻳﻪ ﻋﻠﺸﺎﻥ ﺧﺎﻃﺮ ﻭﺍﺣﺪﻩ ﺳﺒﻖ ﻭﺑﺎﻋﺘﻪ ﺑﺎﻟﻔﻠﻮﺱ ... ﺷﺎﻫﻨﺪﺍ ﻫﻴﺎ ﺍﻫﻢ ﺣﺪ ﻓﻲ ﺣﻴﺎﺗﻪ ﺷﻮﻕ ﺍﺗﺨﻠﺖ ﻋﻨﻪ ﻭﺑﺎﻋﺘﻪ ﻭﺟﺮﺣﺘﻪ ﻭﺩﻩ ﺷﻲﺀ ﻣﺶ ﻻﺯﻡ ﺍﺑﺪﺍ ﻳﻨﺴﺎﻩ ﺍﺑﺪﺍ
ﺧﺮﺝ ﻣﻦ ﺑﻴﺘﻪ ﻭﺭﺍﺡ ﻟﺒﻴﺖ ﺍﺑﻮﻫﺎ ﻭﻃﻠﻌﻠﻬﺎ ﺍﻭﺿﺘﻬﺎ ﻛﺎﻧﺖ ﺭﺍﻗﺪﻩ ﻓﻲ ﺳﺮﻳﺮﻫﺎ ﻭﺍﻟﻤﻔﺮﻭﺽ ﺍﻧﻬﺎ ﻧﺎﻳﻤﻪ
ﺩﺧﻞ ﺑﺮﺍﺣﻪ ﻭﻧﺎﻡ ﺟﻨﺒﻬﺎ ﻭﺿﻤﻬﺎ ﺟﺎﻣﺪ ﻭﻫﻤﺲ ﻓﻲ ﻭﺩﺍﻧﻬﺎ
ﺣﺎﺯﻡ : ﻭﻻ ﺍﻧﺎ ﻣﺎﻟﻴﺶ ﻏﻴﺮﻙ ﻓﻲ ﺍﻟﺪﻧﻴﺎ ﺩﻱ ... ﺍﻭﻋﻲ ﻳﺎ ﺷﺎﻫﻲ ﺗﺴﻴﺒﻴﻨﻲ ﻭﺗﺒﻌﺪﻱ ﻋﻨﻲ .. ﺍﻧﺎ ﻣﺶ ﻫﺴﺘﺤﻤﻞ ﺑﻌﺪﻙ ﻋﻨﻲ ... ﻭﻛﻞ ﺍﻟﻠﻲ ﺍﻧﺘﻲ ﻋﻴﺰﺍﻩ ﻫﻌﻤﻠﻪ ﺑﺲ ﺍﻧﺘﻲ ﺍﻭﻋﻲ ﺗﺘﺨﻠﻲ ﻋﻨﻲ .. ﺍﻧﺎ ﻣﺤﺘﺎﺟﻠﻚ ﻗﻮﻱ
ﻟﻔﺖ ﺷﺎﻫﻨﺪﺍ ﻟﻴﻪ ﻭﺿﻤﺘﻪ ﻟﺼﺪﺭﻫﺎ ﺑﺤﺐ : ﻭﺍﻧﺎ ﺑﺤﺒﻚ ﺍﻛﺘﺮ ﻣﻦ ﺍﻟﺪﻧﻴﺎ ﻭﻣﺎ ﻓﻴﻬﺎ ﺍﻧﺎ ﺑﺲ ﻛﻨﺖ ﺧﺎﻳﻔﻪ ﻟﺘﻜﻮﻥ ﻟﺴﻪ ﺑﺘﺤﺒﻬﺎ
ﺣﺎﺯﻡ : ﺍﻧﺎ ﻣﺎ ﺑﺤﺒﻬﺎﺵ ...
ﺳﺎﻋﺘﻬﺎ ﺍﻓﺘﻜﺮ ﻛﻞ ﺿﺤﻜﻪ .. ﻟﺤﻈﻪ .. ﺍﺑﺘﺴﺎﻣﻪ .. ﻛﻞ ﺣﺎﺟﻪ ﻣﺮﺕ ﺑﻴﻪ ﻣﻊ ﺷﻮﻕ ... ﺍﻓﺘﻜﺮ ﻭﺟﻌﻪ ﻭﺍﻻﻣﻪ ... ﻭﺣﺲ ﺍﻧﻪ ﺑﻴﻜﺮﻩ ﺷﻮﻕ ﻗﻮﻱ ﻗﻮﻱ ﻭﻣﺤﺘﺎﺝ ﻟﺸﺎﻫﻨﺪﺍ ﻭﺑﺲ
ﺿﻤﺘﻪ ﻭﻧﺎﻣﻮﺍ ﺍﻻﺗﻨﻴﻦ ﻭﺣﺎﺯﻡ ﺣﺴﻢ ﻗﺮﺍﺭﻩ ﺍﻧﻪ ﻫﻴﺨﺘﺎﺭ ﻣﺼﻠﺤﺘﻪ ﻫﻮ ﻭﺑﺲ ﻭﺷﻮﻕ ﻫﻴﺄﻣﻨﻬﺎ ﻣﺎﺩﻳﺎ ﻭﺑﺲ ﻭﺭﻫﻒ ﺭﺑﻨﺎ ﺍﺭﺣﻢ ﺑﻴﻬﺎ ﻣﻨﻪ
ﻛﻞ ﻳﻮﻡ ﺑﻴﻌﺪﻱ ﻗﻠﺒﻪ ﺑﻴﻮﺟﻌﻪ ﻭﺑﻴﻔﺘﻜﺮ ﺭﻫﻒ ﻭﺍﺧﺮ ﺣﻮﺍﺭ ﺩﺍﺭ ﺑﻴﻨﻬﻢ ﻭﻭﻋﺪﻩ ﻟﻴﻬﺎ ﻭﺩﻟﻮﻗﺘﻲ ﺍﻫﻮ ﺑﻴﺨﻞ ﺑﻮﻋﺪﻩ ﺩﻩ
ﻳﻮﻡ ﻭﺭﻱ ﻳﻮﻡ ﺑﻴﻌﺪﻱ ﻭﻫﻮ ﺑﻌﻴﺪ ﻋﻨﻬﻢ ﺗﻤﺎﻣﺎ ﻭﺷﺎﻫﻨﺪﺍ ﺣﺎﺳﻪ ﺍﻥ ﺟﻮﺯﻫﺎ ﻓﻲ ﺣﺎﺟﻪ ﻣﻀﻴﻘﺎﻩ ﻭﻣﻨﻐﺼﻪ ﺣﻴﺎﺗﻪ ﺑﺲ ﻣﻌﻨﺪﻫﺎﺵ ﺍﻟﺠﺮﺃﻩ ﺍﻧﻬﺎ ﺗﺴﺄﻟﻪ ﺍﻳﻪ ﻫﻴﺎ ﻻﻧﻬﺎ ﺧﺎﻳﻔﻪ ﻣﻦ ﺍﻻﺟﺎﺑﻪ ....
ﻭﻓﻲ ﻳﻮﻡ ﺣﺎﺯﻡ ﺭﺟﻊ ﻣﻦ ﺷﻐﻠﻪ ﺍﻟﻈﻬﺮ ﻛﺎﻥ ﺗﻌﺒﺎﻥ ﺷﻮﻳﻪ ﻭﺩﺧﻞ ﻳﺎﺧﺪ ﺷﺎﻭﺭ .. ﺷﺎﻫﻨﺪﺍ ﻛﺎﻧﺖ ﻣﻮﺟﻮﺩﻩ ﻓﺴﺎﻋﺪﺗﻪ ﻭﻫﻮ ﺭﻳﺢ ﻓﻲ ﺍﻟﺒﺎﻧﻴﻮ ﻳﻤﻜﻦ ﺍﻟﻤﻴﻪ ﺍﻟﺴﺨﻨﻪ ﺗﻬﺪﻱ ﺍﻻﻟﻢ ﺷﻮﻳﻪ
ﻭﻫﻴﺎ ﺑﺮﻩ ﺗﻠﻴﻔﻮﻥ ﺣﺎﺯﻡ ﺭﻥ ﻓﻤﺴﻜﺘﻪ ﻭﻟﻘﺖ ﻣﻜﺘﻮﺏ ﻗﺪﺍﻣﻬﺎ ﺭﻗﻢ ﻏﺮﻳﺐ ﻓﺮﺩﺕ ﻋﻠﻴﻪ
@ ﺍﻟﻮ ﺗﻠﻴﻔﻮﻥ ﺍﻻﺳﺘﺎﺫ ﺣﺎﺯﻡ
ﺷﺎﻫﻨﺪﺍ : ﺍﻳﻮﻩ ﻳﺎ ﺍﻓﻨﺪﻡ ﻣﻴﻦ ؟؟
@ ﺍﺣﻨﺎ ﻫﻨﺎ ﻣﺪﺭﺳﻪ ﺭﻫﻒ ﻣﺤﻤﻮﺩ ﻭﺣﺎﻭﻟﻨﺎ ﻧﺘﺼﻞ ﺑﻤﺎﻣﺘﻬﺎ ﺑﺲ ﺗﻠﻴﻔﻮﻧﻬﺎ ﻣﻘﻔﻮﻝ ﻭﺭﻗﻤﻪ ﻫﻮ ﻣﻜﺘﻮﺏ ﻓﻲ ﺣﺎﻟﻪ ﺍﻟﻄﻮﺍﺭﻱﺀ
ﺷﺎﻫﻨﺪﺍ : ﻭﺍﻳﻪ ﻭﺑﻌﺪﻳﻦ ؟
@ ﺍﻧﺎ ﺍﺳﻔﻪ ﺑﺲ ﺍﻟﺒﻨﺖ ﺍﺗﻌﺮﺿﺖ ﻟﺤﺎﺩﺛﻪ ﻭﻧﻘﻠﻨﺎﻫﺎ ﺍﻟﻤﺴﺘﺸﻔﻲ ﻭﻣﺤﺘﺎﺟﻴﻦ ﻧﻮﺻﻞ ﻟﻤﺎﻣﺘﻬﺎ ﻭﻧﺒﻠﻐﻬﺎ
ﺷﺎﻫﻨﺪﺍ : ﺍﻩ ﺍﺳﻔﻪ ﻭﺍﻟﻒ ﺳﻼﻣﻪ ﻟﻠﺒﻨﺖ ﺑﺲ ﺣﺎﺯﻡ ﻣﺶ ﻣﺴﺆﻝ ﻋﻦ ﺍﻟﺒﻨﺖ ﺩﻱ ﻫﻮ ﺑﺲ ﻣﺘﻜﻔﻞ ﺑﻴﻬﺎ ﻣﺎﺩﻳﺎ ﻣﻦ ﺿﻤﻦ ﻧﺎﺱ ﻛﺘﻴﺮ ﻓﻤﺶ ﻣﻌﻘﻮﻟﻪ ﻛﻞ ﺣﺪ ﻳﺠﺮﺍﻟﻪ ﺣﺎﺟﻪ ﻫﻮ ﻫﻴﺠﺮﻱ ﻋﻠﻴﻪ ... ﺍﺳﻔﻪ ﻣﺮﻩ ﻛﻤﺎﻥ ﺑﺲ ﺣﺎﻭﻟﻲ ﺗﻮﺻﻠﻲ ﻻﻣﻬﺎ ﻭﻣﺎ ﺗﺰﻋﺠﻴﻨﻴﺶ ﺗﺎﻧﻲ
ﻗﻔﻠﺖ ﺍﻟﺴﻜﻪ ﻭﻫﻴﺎ ﻗﻠﺒﻬﺎ ﺑﻴﺪﻕ ﺑﺴﺮﻋﻪ ﻫﻨﺎ ﺣﺎﺯﻡ ﺧﺮﺝ
ﺣﺎﺯﻡ : ﺗﻠﻴﻔﻮﻧﻲ ﻛﺎﻥ ﺑﻴﺮﻥ ﻣﻴﻦ ؟؟؟
ﺷﺎﻫﻨﺪﺍ : ﺭﻗﻢ ﻏﻠﻂ
ﺍﻟﺤﻠﻘﻪ ١٥ من رواية لعبة القدر
ﺣﺎﺯﻡ ﺧﺮﺝ ﻭﻗﺎﻟﺘﻠﻪ ﺍﻥ ﺍﻟﺮﻗﻢ ﻏﻠﻂ ﻭﻧﺰﻟﻮﺍ ﺍﻻﺗﻨﻴﻦ ﻳﺘﻐﺪﻭﺍ ﻣﻊ ﺑﻌﺾ ﻛﻞ ﻭﺍﺣﺪ ﺳﺎﻛﺖ ﻭﺳﺮﺣﺎﻥ ﻓﻲ ﻣﻠﻜﻮﺗﻪ ﺍﻟﺨﺎﺹ ﺑﻴﻪ
ﺷﺎﻫﻨﺪﺍ ﻫﺘﺘﺠﻨﻦ ﺍﺯﺍﻱ ﻋﻤﻠﺖ ﻛﺪﻩ ؟ ﺩﻱ ﻣﺠﺮﺩ ﻃﻔﻠﻪ ﻋﻨﺪﻫﺎ ﺳﺒﻊ ﺳﻨﻴﻦ ؟؟ ﻣﻦ ﺍﻣﺘﻲ ﻫﻴﺎ ﻭﺣﺸﻪ ﻛﺪﻩ ؟؟ ﻣﻦ ﺍﻣﺘﻲ ﺍﻧﺎﻧﻴﻪ ﻛﺪﻩ ؟؟ ﺍﻳﻪ ﻳﻌﻨﻲ ﻟﻤﺎ ﻳﻘﺎﺑﻞ ﻋﻴﻠﻪ ﺍﻭ ﻳﻬﺘﻢ ﺑﻴﻬﺎ ؟ ﻫﻴﺠﺮﻱ ﺍﻳﻪ ﻳﻌﻨﻲ ؟
ﺣﺎﺯﻡ : ﺷﺎﻫﻲ !! ﻣﺎﻟﻚ ﺣﺒﻴﺒﻲ ؟
ﺷﺎﻫﻨﺪﺍ : ﻣﻔﻴﺶ ﺳﻼﻣﺘﻚ .. ﺍﻟﻠﻲ ﻗﻮﻟﻲ ﻳﺎ ﺣﺎﺯﻡ ﻫﻮ ﺍﺑﻮ ﺭﻫﻒ ﻓﻴﻦ ؟؟
ﺣﺎﺯﻡ ﺳﻜﺖ ﺷﻮﻳﻪ ﻭﺍﻓﺘﻜﺮ ﺭﻫﻒ ﺍﻟﻠﻲ ﺍﺻﻼ ﻣﺶ ﺑﻴﻨﺴﺎﻫﺎ ﺍﺑﺪﺍ
ﺣﺎﺯﻡ : ﺳﺎﺑﻬﻢ ﻣﻦ ﺯﻣﺎﻥ ﻭﺍﺗﺠﻮﺯ ﻭﻣﺨﻠﻒ ﺗﻮﺃﻡ ﻭﻧﺴﻲ ﺩﻭﻝ ﺗﻤﺎﻣﺎ
ﺷﺎﻫﻨﺪﺍ : ﻫﻮ ﻓﻲ ﺣﺪ ﺑﻴﻨﺴﻲ ﻋﻴﺎﻟﻪ ؟؟
ﺣﺎﺯﻡ : ﺍﻟﺤﻴﺎﻩ ﺧﺪﺗﻪ ... ﻋﺎﺭﻓﻪ ﺭﻫﻒ ﺩﻱ ﻃﻔﻠﻪ ﺟﻤﻴﻠﻪ ﺫﻛﻴﻪ ﻟﻤﺎﺣﻪ ﺍﺣﺴﺎﺳﻬﺎ ﻋﺎﻟﻲ ﻗﻮﻱ ﻭﻓﻮﻕ ﻛﻞ ﺩﻩ ﺧﺎﻳﻔﻪ
ﺷﺎﻫﻨﺪﺍ : ﺧﺎﻳﻔﻪ ؟؟ ﺧﺎﻳﻔﻪ ﻣﻦ ﺍﻳﻪ ؟؟
ﺣﺎﺯﻡ : ﻣﻦ ﻛﻞ ﺣﺎﺟﻪ ﺣﻮﺍﻟﻴﻬﺎ .. ﺧﺎﻳﻔﻪ ﻋﻠﻲ ﺍﻣﻬﺎ .. ﺧﺎﻳﻔﻪ ﻣﻦ ﺍﻣﻬﺎ ﻟﺘﺰﻫﻖ ﻭﺗﺘﻌﺐ ﻭﺗﺴﻴﺒﻬﺎ .. ﺍﺧﺮ ﻣﺮﻩ ﻟﻤﺎ ﺍﺗﻐﺪﻳﻨﺎ ﻣﻊ ﺑﻌﺾ ﻗﺎﻟﺘﻠﻲ ﺍﻧﻬﺎ ﺑﺘﻌﺘﺒﺮ ﺍﺑﻮﻫﺎ ﻣﻴﺖ ﻻﻧﻪ ﻣﻠﻮﺵ ﻭﺟﻮﺩ ﻓﻲ ﺣﻴﺎﺗﻬﺎ ﻭﻗﺎﻟﺘﻠﻲ ﺍﻧﻬﺎ ﺑﺘﺨﺎﻑ ﻛﺘﻴﺮ ﻭﻗﺎﻟﺖ ﺍﻧﻬﺎ ﻓﻲ ﺍﻟﻤﺪﺭﺳﻪ ﻟﻮ ﺍﻣﻬﺎ ﺍﺗﺄﺧﺮﺕ ﺷﻮﻳﻪ ﺑﺘﻔﻜﺮ ﺍﻧﻬﺎ ﺳﺎﺑﺘﻬﺎ ﻻﻧﻬﺎ ﺗﻌﺒﺖ .. ﺧﺎﻳﻔﻪ ﺍﻥ ﺍﻣﻬﺎ ﺗﺴﺘﺴﻠﻢ ﻭﺗﺴﻴﺒﻬﺎ ﺍﻭ ﻳﺠﺮﺍﻟﻬﺎ ﺣﺎﺟﻪ ﻣﺜﻼ .. ﺗﺨﻴﻠﻲ ﺩﻩ ﺗﻔﻜﻴﺮ ﻋﻴﻠﻪ ؟؟ ﻭﻟﻤﺎ ﺍﻧﺎ ﺣﺎﻭﻟﺖ ﺍﻃﻤﻨﻬﺎ ﻭﻋﺪﺗﻬﺎ ﺍﻧﻲ ﻣﺶ ﻫﺘﺨﻠﻲ ﻋﻨﻬﺎ ﻋﺎﺭﻓﻪ ﺭﺩﻫﺎ ﻛﺎﻥ ﺍﻳﻪ ؟
ﺷﺎﻫﻨﺪﺍ : ﺍﻳﻪ ؟
ﺣﺎﺯﻡ : ﺍﻥ ﺍﻧﺎ ﺑﻜﺮﻩ ﺍﺧﻠﻒ ﺍﻧﺎ ﻛﻤﺎﻥ ﻭﺍﻧﺴﺎﻫﺎ ( ﺿﺤﻚ ﺑﻮﺟﻊ ) ﻣﺎ ﺗﻌﺮﻓﺶ ﺍﻧﻲ ﻫﺘﺨﻠﻲ ﻋﻨﻬﺎ ﺣﺘﻲ ﻣﻦ ﻏﻴﺮ ﻣﺎ ﺍﺧﻠﻒ ... ﺑﺲ ﺍﻋﻤﻞ ﺍﻳﻪ ؟؟ ﺍﻧﺎ ﻛﻤﺎﻥ ﺧﻔﺖ ﺯﻳﻬﺎ .. ﺧﻔﺖ ﻣﻦ ﺍﻟﻮﺣﺪﻩ ﺧﻔﺖ ﺍﻧﻚ ﺍﻧﺘﻲ ﺗﺘﺨﻠﻲ ﻋﻨﻲ ﻭﺍﺭﺟﻊ ﻟﻮﺣﺪﻱ ﺗﺎﻧﻲ ﻓﻜﻨﺖ ﺍﻧﺎﻧﻲ ﻭﺍﺧﺘﺮﺕ ﻧﻔﺴﻲ ﻭﺳﻴﺒﺖ ﺍﻟﻌﻴﻠﻪ ﺩﻱ ﻟﻮﺣﺪﻫﺎ ﻟﺨﻮﻓﻬﺎ ﻭﻟﻮﺟﻌﻬﺎ .. ﻳﺎﻻ ﻣﺎ ﻋﻠﻴﻨﺎ ﻟﻴﻬﺎ ﺭﺏ ﻛﺮﻳﻢ ﻳﺘﻮﻻﻫﺎ
ﺷﺎﻫﻨﺪﺍ ﺩﻣﻮﻋﻬﺎ ﻧﺰﻟﺖ ﻭﺳﺎﺑﺖ ﺍﻻﻛﻞ ﻭﻃﻠﻌﺖ ﻻﻭﺿﺘﻬﺎ ﻭﺣﺎﺯﻡ ﻭﺭﺍﻫﺎ ﺑﻴﻜﻠﻤﻬﺎ ﺑﺲ ﻣﺶ ﺑﺘﺮﺩ ﻋﻠﻴﻪ ﺑﺘﻌﻴﻂ ﻭﺑﺲ
ﺣﺎﺯﻡ : ﻃﻴﺐ ﺑﺘﻌﻴﻄﻲ ﻟﻴﻪ ؟؟ ﺷﺎﻫﻲ ... ﺍﻧﺎ ﻣﻘﻮﻟﺘﺶ ﻛﺪﻩ ﻋﻠﺸﺎﻥ ﺍﺯﻋﻠﻚ ﺍﻭ ﺍﺣﻤﻠﻚ ﺫﻧﺒﻬﺎ ... ﺷﺎﻫﻲ ﺭﺩﻱ ﻋﻠﻴﺎ ﺍﺭﺟﻮﻛﻲ
ﺷﺎﻫﻨﺪﺍ ﺑﻌﻴﺎﻁ : ﺍﻧﺎ ﺍﻧﺴﺎﻧﻪ ﻭﺣﺸﻪ ﻗﻮﻱ
ﺣﺎﺯﻡ : ﻟﻴﻪ ﺑﺲ ؟ ﻛﻞ ﺍﻧﺴﺎﻥ ﺑﺘﺠﻴﻠﻪ ﻟﺤﻈﺎﺕ ﻳﻜﻮﻥ ﻓﻴﻬﺎ ﺍﻧﺎﻧﻲ ﻭﻳﺒﺺ ﻟﻨﻔﺴﻪ
ﺷﺎﻫﻨﺪﺍ : ﺍﻧﺎ ﺍﺳﻔﻪ ﻳﺎ ﺣﺎﺯﻡ ﺳﺎﻣﺤﻨﻲ
ﺣﺎﺯﻡ : ﻋﻠﻲ ﺍﻳﻪ ﺑﺲ ؟؟ ﻣﺎﻟﻚ ﻓﻲ ﺍﻳﻪ ؟؟
ﺷﺎﻫﻨﺪﺍ ﻓﻜﺮﺕ ﺗﻘﻮﻟﻪ ﺑﺲ ﺗﺨﻴﻠﺖ ﻧﻈﺮﺗﻪ ﻟﻴﻬﺎ ﻫﺘﻜﻮﻥ ﺍﻳﻪ ﻓﺘﺮﺍﺟﻌﺖ
ﺷﺎﻫﻨﺪﺍ : ﻣﻔﻴﺶ ﻳﺎ ﺣﺎﺯﻡ ﺑﺲ ﺍﺗﻀﺎﻳﻘﺖ ﻋﻠﺸﺎﻥ ﺍﻟﺒﻨﺖ
ﺣﺎﺯﻡ : ﻣﺎ ﻋﻠﻴﻨﺎ ﺳﻴﺒﻚ ﻣﻦ ﺍﻟﺴﻴﺮﻩ ﺩﻱ ﺍﻟﻤﻬﻢ ﺍﺧﺒﺎﺭ ﺷﻐﻠﻚ ﺍﻳﻪ ؟؟
ﺑﺒﺘﻜﻠﻤﻮﺍ ﻣﻊ ﺑﻌﺾ ﻭﺷﻮﻳﻪ ﻭﺗﻠﻴﻔﻮﻧﻪ ﺭﻥ ﻓﻘﺎﻡ ﻳﺮﺩ ﺑﺲ ﺍﺗﺮﺩﺩ ﻻﻧﻪ ﻟﻘﺎﻫﺎ ﺷﻮﻕ ﻓﺒﺺ ﻟﻤﺮﺍﺗﻪ ﻭﻣﺶ ﻋﺎﺭﻑ ﻳﺮﺩ ﻭﻻ ﻷ . ؟ ﻭﺍﺧﻴﺮﺍ ﺭﺩ ﻭﺳﻤﻊ ﺻﻮﺕ ﻋﻴﺎﻃﻬﺎ ﺑﻬﺴﺘﺮﻳﺎ ﻭﻛﻼﻡ ﻣﺶ ﻣﻔﻬﻮﻡ ﺍﺑﺪﺍ ﺑﺲ ﻓﻲ ﻛﻠﻤﻪ ﺭﻫﻒ ﻭﺑﺲ
ﺣﺎﺯﻡ : ﺍﻋﺪﻱ ﻳﺎ ﺷﻮﻕ ﻭﻓﻬﻤﻴﻨﻲ ﻓﻲ ﺍﻳﻪ ؟؟؟ ﻣﺶ ﻓﺎﻫﻢ ﻭﻻ ﻛﻠﻤﻪ ؟؟
ﺷﻮﻕ ﺣﺎﻭﻟﺖ ﺗﺘﻤﺎﺳﻚ : ﺭﻫﻒ ﻋﻤﻠﺖ ﺣﺎﺩﺛﻪ ﻭﺍﺣﻨﺎ ﻓﻲ ﺍﻟﻤﺴﺘﺸﻔﻲ ﺍﺭﺟﻮﻙ ﺗﻌﺎﻝ
ﺣﺎﺯﻡ ﺍﺗﺼﺪﻡ : ﻣﺴﺘﺸﻔﻲ ﺍﻳﻪ ؟ ﺩﻗﺎﻳﻖ ﻭﻫﻜﻮﻥ ﻋﻨﺪﻙ
ﻗﻔﻞ ﻭﻗﺎﻡ ﺑﺴﺮﻋﻪ ﻳﻠﺒﺲ ﻭﻣﺮﺍﺗﻪ ﻭﺭﺍﻩ ﻣﺶ ﻋﺎﺭﻓﻪ ﺗﻌﻤﻞ ﺍﻳﻪ ؟
ﺷﺎﻫﻨﺪﺍ : ﺍﻳﻪ ﺍﻟﻠﻲ ﺣﺼﻞ ؟
ﺣﺎﺯﻡ : ﺭﻫﻒ ﻋﻤﻠﺖ ﺣﺎﺩﺛﻪ ﻭﻓﻲ ﺍﻟﻤﺴﺘﺸﻔﻲ ﻭﺍﻧﺎ ﻫﺮﻭﺣﻠﻬﻢ
ﺷﺎﻫﻨﺪﺍ : ﻃﻴﺐ ﺍﻧﺎ ﻫﺎﺟﻲ ﻣﻌﺎﻙ ﻋﻠﻲ ﺍﻻﻗﻞ ﺍﺳﻮﻕ ﺍﻧﺎ
ﺭﺍﺣﻮﺍ ﺍﻻﺗﻨﻴﻦ ﺍﻟﻤﺴﺘﺸﻔﻲ ﻭﺍﺧﻴﺮﺍ ﻭﺻﻠﻮﺍ ﻛﺎﻥ ﺗﻌﺒﺎﻥ ﺟﺪﺍ ﻓﺴﺎﻋﺪﺗﻪ ﻫﻴﺎ ﻳﻨﺰﻝ ﻭﺳﻨﺪﺗﻪ ﻟﺤﺪ ﻣﺎ ﺩﺧﻠﻮﺍ ﻭﺻﻤﺖ ﺭﻫﻴﺐ ﻣﺴﻴﻄﺮ ﻋﻠﻴﻬﻢ ﻣﻦ ﺳﺎﻋﻪ ﻣﺎ ﺧﺮﺟﻮﺍ ﻣﻦ ﺍﻟﺒﻴﺖ ﻟﺤﺪ ﻣﺎ ﻭﺻﻠﻮﺍ .. ﺩﺧﻠﻮﺍ ﻭﺳﺄﻟﻮﺍ ﻭﺭﺍﺣﻮﺍ ﻟﺮﻫﻒ ﻛﺎﻧﺖ ﺷﻮﻕ ﻗﺎﻋﺪﻩ ﺑﺘﻌﻴﻂ ﺍﻭﻝ ﻣﺎ ﺳﻤﻌﺖ ﻳﻮﺕ ﺣﺎﺯﻡ ﻗﺎﻣﺖ ﻫﺘﺠﺮﻱ ﻋﻠﻴﻪ ﺑﺲ ﻭﻗﻔﺖ ﺍﻭﻝ ﻣﺎ ﺷﺎﻓﺖ ﻣﺮﺍﺗﻪ ﻓﻲ ﺍﻳﺪﻩ
ﺣﺎﺯﻡ : ﻫﻴﺎ ﻓﻴﻦ ﻳﺎ ﺷﻮﻕ ؟؟
ﺷﻮﻕ : ﺍﺧﺪﻭﻫﺎ ﻭﻣﺤﺪﺵ ﻗﺎﻟﻲ ﺣﺎﺟﻪ
ﺣﺎﺯﻡ : ﺍﻳﻪ ﺍﻟﻠﻲ ﺣﺼﻞ ﺍﺻﻼ ؟؟
ﺷﻮﻕ : ﺍﻧﺎ ﺍﺗﺎﺧﺮﺕ ﻋﻠﻴﻬﺎ ﺷﻮﻳﻪ ﻭﺍﻭﻝ ﻣﺎ ﻭﺻﻠﺖ ﻗﺎﻟﻮﻟﻲ ﺍﻧﻬﺎ ﻫﻨﺎ ﻣﻌﺮﻓﺶ ﺍﻳﻪ ﺍﻟﻠﻲ ﺣﺼﻞ
ﺣﺎﺯﻡ : ﺧﺎﻓﺖ ﺍﻧﻚ ﺗﻜﻮﻧﻲ ﺳﻴﺒﺘﻴﻬﺎ ...
ﺷﻮﻕ ﺑﺼﺘﻠﻪ ﺑﺎﺳﺘﻐﺮﺍﺏ
ﺣﺎﺯﻡ : ﻗﺎﻟﺘﻠﻲ ﺍﻧﻬﺎ ﺑﺘﺨﺎﻑ ﻟﻤﺎ ﺑﺘﺘﺄﺧﺮﻱ ﺍﻧﻚ ﻫﺘﺴﻴﺒﻴﻬﺎ ﻭﺗﻤﺸﻲ ... ﺧﺎﻓﺖ
ﻣﺪﻳﺮﻩ ﺍﻟﻤﺪﺭﺳﻪ ﻛﺎﻧﺖ ﻣﻮﺟﻮﺩﻩ ﻻﻧﻬﺎ ﻣﺴﺆﻟﻴﻪ ﻋﻠﻴﻬﺎ ﻓﺤﺎﺯﻡ ﺑﺼﻠﻬﺎ
ﺣﺎﺯﻡ : ﺍﻧﺘﻮ ﺍﺯﺍﻱ ﺗﺨﺮﺟﻮﻫﺎ ﻟﻮﺣﺪﻫﺎ ﻣﻦ ﺍﻟﻤﺪﺭﺳﻪ ؟ ﻣﻔﻴﺶ ﺭﻗﺎﺑﻪ ؟
ﺍﻟﻤﺪﻳﺮﻩ : ﻓﻲ ﻃﺒﻌﺎ ﺑﺲ ﺍﻟﺒﻨﺖ ﺟﺮﻳﺖ ﻣﺮﻩ ﻭﺍﺣﺪﻩ ﻭﺍﻟﻤﻮﺿﻮﻉ ﺣﺼﻞ ﺑﺴﺮﻋﻪ ﻭﺑﻌﺪﺑﻦ ﺍﻟﺒﻮﺍﺏ ﻫﻴﺘﺠﺎﺯﻱ ﻭﻫﻴﺎﺧﺪ ﺟﺰﺍﺗﻪ
ﺷﻮﻕ : ﻭﻫﻴﻔﻴﺪﻧﻲ ﺑﺎﻳﻪ ؟ ﻭﻫﻮ ﺫﻧﺒﻪ ﺍﻳﻪ ؟ ﺩﻩ ﺭﺍﺟﻞ ﻏﻠﺒﺎﻥ ﻭﻋﻠﻲ ﻗﺪ ﺣﺎﻟﻪ ؟ ﺩﻩ ﻗﺪﺭ
ﺣﺎﺯﻡ : ﻭﺳﻴﺎﺩﺗﻜﻢ ﻣﺎ ﺍﺗﺼﻠﺘﻮﺵ ﺑﻴﺎ ﻟﻴﻪ ﻭﻋﺮﻓﺘﻮﻧﻲ ﺍﻟﻤﻔﺮﻭﺽ ﺍﻥ ﺍﺳﻤﻲ ﻣﺘﺴﺠﻞ ﻓﻲ ﺍﻟﻄﻮﺍﺭﻱﺀ؟
ﻣﺪﺭﺳﻪ ﻛﺎﻧﺖ ﺟﻨﺐ ﺍﻟﻤﺪﻳﺮﻩ ﺍﺗﺪﺧﻠﺖ
ﺍﻟﻤﺪﺭﺳﻪ : ﻻ ﻳﺎ ﻓﻨﺪﻡ ﺍﻧﺎ ﺍﺗﺼﻠﺖ ﺑﺮﻗﻢ ﺣﻀﺮﺗﻚ ﻭﺭﺩﺕ ﻋﻠﻴﺎ ﺍﻟﻤﺪﺍﻡ ﻭﻗﺎﻟﺘﻠﻲ ﺍﻥ ﺭﻫﻒ ﺣﺎﻟﻪ ﺧﻴﺮﻳﻪ ﻭﺳﻂ ﺣﺎﻻﺕ ﻛﺘﻴﺮ ﻭﻣﺶ ﻛﻞ ﻣﺸﻜﻠﻪ ﺍﻧﺖ ﻫﺘﺠﺮﻱ ﻋﻠﻴﻬﺎ ﻭﻗﻔﻠﺖ ﻓﻲ ﻭﺷﻲ ﺍﻟﺴﻜﻪ
ﺣﺎﺯﻡ ﺑﺺ ﻟﺸﺎﻫﻨﺪﺍ ﻭﺍﻓﺘﻜﺮ ﺗﻮﺗﺮﻫﺎ ﻟﻤﺎ ﺳﺄﻟﻬﺎ ﻋﻠﻲ ﺍﻟﻠﻲ ﺍﺗﺼﻞ ﻭﺍﻓﺘﻜﺮ ﻋﻴﺎﻃﻬﺎ ﻟﻤﺎ ﺍﻧﻜﻠﻤﻮﺍ ﻋﻦ ﺭﻫﻒ
ﺷﺎﻫﻨﺪﺍ : ﺍﺳﻔﻪ ﻳﺎ ﺣﺎﺯﻡ ﺑﺲ ﻣﺎ ﺗﺨﻴﻠﺘﺶ ﺍﻥ ﺍﻟﻤﻮﺿﻮﻉ ﻛﺪﻩ
ﺣﺎﺯﻡ : ﺍﻣﺎﻝ ﺗﺨﻴﻠﺘﻲ ﺍﻳﻪ ؟
ﺷﺎﻫﻨﺪﺍ : ﺍﻱ ﺣﺎﺟﻪ ﻏﻴﺮ ﻛﺪﻩ ﺍﻧﺎ ﺍﺳﻔﻪ ﺳﺎﻣﺤﻨﻲ
ﺣﺎﺯﻡ ﻣﺮﺩﺵ ﺑﺲ ﺑﺼﻠﻬﺎ ﺑﻮﺟﻊ ... ﻛﻞ ﻭﺍﺣﺪﻩ ﺍﻧﺎﻧﻴﻪ ﻭﻣﺎ ﺑﺘﻔﻜﺮﺵ ﻏﻴﺮ ﻓﻲ ﻧﻔﺴﻬﺎ ﻭﺑﺲ ... ﺷﻮﻕ ﻛﺎﻧﺖ ﺑﺘﺤﺐ ﻧﻔﺴﻬﺎ ﻭﻋﺎﻳﺰﻩ ﻓﻠﻮﺳﻪ ﻋﻠﺸﺎﻥ ﺗﺘﺠﻮﺯ ﺣﺒﻴﺒﻬﺎ ﻭﺍﺩﻱ ﺷﺎﻫﻨﺪﺍ ﻣﺎ ﻓﻜﺮﺗﺶ ﻓﻲ ﻭﺟﻊ ﻋﻴﻠﻪ ﺑﺲ ﻓﻜﺮﺕ ﻓﻲ ﻧﻔﺴﻬﺎ ﻭﺍﻧﺎﻧﻴﺘﻬﺎ ... ﻗﺎﻃﻊ ﺍﻓﻜﺎﺭﻩ ﻧﺰﻭﻝ ﺍﻟﺪﻛﺘﻮﺭ
ﺣﺎﺯﻡ : ﺣﺎﻟﺘﻬﺎ ﺍﻳﻪ ؟؟
ﺍﻟﺪﻛﺘﻮﺭ : ﺍﺣﻨﺎ ﻋﻤﻠﻨﺎﻟﻬﺎ ﺍﺷﻌﻪ ﻭﺍﻟﺤﻤﺪ ﻟﻠﻪ ﻣﻌﻨﺪﻫﺎﺵ ﻧﺰﻳﻒ ﺩﺍﺧﻠﻲ
ﺷﻮﻕ ﺍﺗﻨﻬﺪﺕ ﺑﺎﺭﺗﻴﺎﺡ ﺑﺲ ﺣﺎﺯﻡ ﻷ
ﺣﺎﺯﻡ : ﻭﺑﻌﺪﻳﻦ ؟؟ ﻫﺎﺕ ﺍﻟﻠﻲ ﻋﻨﺪﻙ ؟؟ ﺍﻧﺎ ﺍﻛﺘﺮ ﻭﺍﺣﺪ ﺑﻴﻌﺮﻑ ﻳﻘﺮﻱ ﻣﻼﻣﺤﻜﻢ ﻛﻮﻳﺲ ﻫﺎﺕ ﺍﻟﻠﻲ ﻋﻨﺪﻙ
ﺍﻟﺪﻛﺘﻮﺭ : ﻋﻨﺪﻫﺎ ﻛﺴﺮ ﻓﻲ ﺍﻟﻌﻤﻮﺩ ﺍﻟﻔﻘﺮﻱ ﺑﻴﻦ ﺍﻟﻔﻘﺮﻩ ﺍﻟﺮﺍﺑﻌﻪ ﻭﺍﻟﺨﺎﻣﺴﻪ ﺑﺎﻟﺘﺤﺪﻳﺪ
ﻫﻨﺎ ﺣﺎﺯﻡ ﻛﺎﻥ ﻫﻴﻮﻗﻊ ﻟﻮﻻ ﺷﺎﻫﻨﺪﺍ ﺳﻨﺪﺗﻪ ﻭﺍﺗﻌﺎﺩ ﺷﺮﻳﻂ ﺣﻴﺎﺗﻪ ﻗﺪﺍﻣﻪ ... ﺍﻟﺤﺎﺩﺛﻪ ﺍﻟﻠﻲ ﺳﺎﺑﺘﻪ ﻣﺸﻠﻮﻝ .. ﺍﻟﻌﻤﻠﻴﺎﺕ .. ﺍﻟﺪﻛﺎﺗﺮﻩ ... ﺍﻻﻟﻢ ... ﺑﺲ ﻫﻮ ﻛﺒﻴﺮ ﻟﻜﻦ ﻫﻴﺎ ﻳﺪﻭﺏ ﻋﻴﻠﻪ ... ﻟﺴﻪ ﻣﺎ ﻋﺎﺷﺘﺶ ... ﻟﺴﻪ ﻣﺎ ﻟﻌﺒﺘﺶ ... ﻟﺴﻪ ﻣﺎ ﺍﺳﺘﻤﺘﻌﺘﺶ ﺑﻄﻔﻮﻟﺘﻬﺎ
ﺣﺎﺯﻡ : ﺍﻧﺖ ﻧﺎﻭﻱ ﻋﻠﻲ ﺍﻳﻪ ؟؟ﺍﻳﻪ ﺍﻟﺤﻞ ؟؟
ﺍﻟﺪﻛﺘﻮﺭ : ﻫﺘﺪﺧﻞ ﺍﻟﻌﻤﻠﻴﺎﺕ ﺑﺲ ﺍﻟﺨﻄﻮﺭﻩ ﻋﺎﻟﻴﻪ ﻭﻧﺴﺒﻪ ﺍﻻﺻﺎﺑﻪ ﺑﺎﻟﺸﻠﻞ ﻛﺒﻴﺮﻩ
ﺷﻮﻕ ﻋﻴﻄﺖ ﺑﺤﺮﻗﻪ ﻣﻦ ﻗﻠﺒﻬﺎ ﻭﺷﺎﻫﻨﺪﺍ ﻛﻤﺎﻥ
ﺣﺎﺯﻡ : ﺍﻧﺎ ﻫﺘﺼﻞ ﺑﺎﻟﺪﻛﺘﻮﺭ ﺑﺘﺎﻋﻲ ﻳﺠﻲ ﺍﻻﻭﻝ ﻣﺎ ﺗﻌﻤﻠﺶ ﺍﻱ ﺣﺎﺟﻪ ﻟﺤﺪ ﻣﺎ ﻳﺠﻲ
ﺣﺎﺯﻡ ﺍﺗﺼﻞ ﺑﺎﻟﺪﻛﺘﻮﺭ ﺑﺘﺎﻋﻪ ﻭﻃﻠﺐ ﻣﻨﻪ ﻳﺠﻲ ﺑﺴﺮﻋﻪ ﻋﻠﻲ ﺍﻟﻤﺴﺘﺸﻔﻲ ﻭﻋﻄﺎﻩ ﻋﻨﻮﺍﻧﻬﺎ ﻭﻓﻌﻼ ﺧﻼﻝ ﺭﺑﻊ ﺳﺎﻋﻪ ﻛﺎﻥ ﺍﻟﺪﻛﺘﻮﺭ ﺑﺘﺎﻋﻪ ﺟﺎﻱ ﻳﺠﺮﻱ ﻻﻧﻪ ﺧﺎﻑ ﻳﻜﻮﻥ ﺣﺎﺯﻡ ﺟﺮﺍﻟﻪ ﺣﺎﺟﻪ ﻭﺍﺗﻨﻬﺪ ﺍﻭﻝ ﻣﺎ ﺷﺎﻓﻪ ﻛﻮﻳﺲ
ﺣﺎﺯﻡ : ﺍﻧﺖ ﻫﺘﺪﺧﻞ ﻟﻠﺒﻨﺖ ﺍﻟﻠﻲ ﺟﻮﻩ ﺩﻱ ﻭﻫﺘﻜﺸﻒ ﻋﻠﻴﻬﺎ ﻭﺗﻄﻤﻨﻲ ﺍﻧﺖ ﻓﺎﻫﻢ ؟ ﺍﻧﺖ ﻫﺘﻄﻤﻨﻲ ﺍﺗﻔﻀﻞ
ﺍﻟﺪﻛﺘﻮﺭ ﺩﺧﻞ ﻟﺮﻫﻒ ﻭﻛﺸﻒ ﻋﻠﻴﻬﺎ ﻭﺷﺎﻑ ﺍﺷﻌﺘﻬﺎ ﻭﻃﻠﻊ ﻟﺤﺎﺯﻡ
ﺍﻟﺪﻛﺘﻮﺭ : ﺍﻟﻌﻤﻠﻴﻪ ﺻﻌﺒﻪ ﻭﻓﻴﻬﺎ ﺧﻄﻮﺭﻩ ﻋﺎﻟﻴﻪ ﺑﺲ ﻣﻔﻴﺶ ﺣﻠﻮﻝ ﺗﺎﻧﻴﻪ ﻗﺪﺍﻣﻨﺎ ..
ﺣﺎﺯﻡ : ﺍﻧﺎ ﻣﻤﻜﻦ ﺍﺳﻔﺮﻫﺎ ﺑﺮﻩ
ﺍﻟﺪﻛﺘﻮﺭ : ﻣﺎ ﻳﻨﻔﻌﺶ ﺗﺘﺤﺮﻙ ﺍﺻﻼ ﺑﺤﺎﻟﺘﻬﺎ ﺩﻱ ﺍﻟﺤﺮﻛﻪ ﻣﻤﻜﻦ ﺗﺸﻠﻬﺎ ﺗﻤﺎﻣﺎ
ﺣﺎﺯﻡ : ﻭﺑﻌﺪﻳﻦ ؟؟
ﺍﻟﺪﻛﺘﻮﺭ : ﺗﺨﻠﻲ ﻋﻨﺪﻙ ﺍﻳﻤﺎﻥ ﺑﺮﺑﻨﺎ ﺍﻧﺎ ﻫﺪﺧﻠﻬﺎ ﻭﺭﺑﻨﺎ ﻣﻌﺎﻧﺎ
ﺣﺎﺯﻡ : ﻃﻴﺐ ﻋﺎﻳﺰ ﺍﺷﻮﻓﻬﺎ ﺍﻻﻭﻝ
ﺩﺧﻠﻮﺍ ﻛﻠﻬﻢ ﻟﺮﻫﻒ ﻭﻋﻴﺎﻃﻬﻢ ﺯﺍﺩ ﺍﻭﻝ ﻣﺎ ﺷﺎﻓﻮﻫﺎ
ﺭﻫﻒ ﺑﺘﻌﺐ : ﺯﻭﻣﺎ ﺣﺒﻴﺒﻲ ﻭﺣﺸﺘﻨﻲ
ﻫﻨﺎ ﺷﺎﻫﻨﺪﺍ ﻋﻴﻄﺖ ﻗﻮﻱ
ﺣﺎﺯﻡ ﻗﺮﺏ ﻣﻨﻬﺎ ﻭﻣﺴﻚ ﺍﻳﺪﻫﺎ ﻭﺑﺎﺳﻬﺎ
ﺣﺎﺯﻡ : ﻭﺣﺸﺘﻴﻨﻲ ﺍﻧﺘﻲ ﻳﺎ ﺭﻭﻓﺎ ... ﺣﺎﺳﻪ ﺑﺈﻳﻪ ؟؟ ﻓﻲ ﺣﺎﺟﻪ ﻭﺟﻌﺎﻛﻲ ؟؟
ﺭﻫﻒ : ﻻ ﻣﻔﻴﺶ ﺑﺲ ﺍﻧﺎ ﻣﺶ ﺣﺎﺳﻪ ﺑﺮﺟﻠﻴﺎ ﺍﻛﻦ ﻣﻌﻨﺪﻳﺶ ﺭﺟﻠﻴﻦ ﺍﺻﻼ
ﺣﺎﺯﻡ ﺩﻣﻌﻪ ﻣﻨﻪ ﻧﺰﻟﺖ ﻭﺭﻫﻒ ﻣﺴﺤﺘﻬﺎ
ﺭﻫﻒ : ﺍﻧﺖ ﺑﺘﻌﻴﻂ ﻟﻴﻪ ؟؟ ﺍﻧﺖ ﺗﻌﺒﺎﻥ ﺗﺎﻧﻲ ؟؟ ﻃﻴﺐ ﺍﺭﺗﺎﺡ ﺍﻧﺖ
ﺣﺎﺯﻡ : ﺍﻧﺎ ﻣﺶ ﺗﻌﺒﺎﻥ ﻳﺎ ﻗﻠﺒﻲ ... ﺍﻳﻪ ﺍﻟﻠﻲ ﺣﺼﻞ ﻟﻴﻪ ﺧﺮﺟﺘﻲ ﻣﻦ ﺍﻟﻤﺪﺭﺳﻪ ؟؟
ﺭﻫﻒ ﺳﻜﺘﺖ ﻭﺑﺼﺖ ﻻﻣﻬﺎ : ﺧﻔﺖ ... ﺧﻔﺖ ﺗﻜﻮﻥ ﻣﺸﻴﺖ ﻭﺳﺎﺑﺘﻨﻲ ﻓﻘﻠﺖ ﺍﺟﺮﻱ ﻭﺍﻟﺤﻘﻬﺎ ﺍﻧﺎ ﻗﺒﻞ ﻣﺎ ﺗﻤﺸﻲ .. ﺍﻧﺎ ﻋﺎﺭﻓﻪ ﺍﻟﺒﻴﺖ ﻭﺣﺎﻓﻈﻪ ﺍﻟﻄﺮﻳﻖ ... ﻛﻨﺖ ﻋﺎﻳﺰﻩ ﺍﻟﺤﻘﻬﺎ
ﺷﻮﻕ : ﺍﻧﺘﻲ ﺑﺘﻘﻮﻟﻲ ﺍﻳﻪ ؟؟ ﺍﻧﺖ ﺭﻭﺣﻲ ﻭﻋﻤﺮﻱ ... ﺣﺪ ﻳﺴﻴﺐ ﺭﻭﺣﻪ ؟؟ ﺍﻧﺎ ﻋﻤﺮﻱ ﻣﺎ ﺍﺳﻴﺒﻚ ﺍﺑﺪﺍ ﺍﺑﺪﺍ
ﺭﻫﻒ : ﺍﻧﺎ ﺍﺳﻔﻪ ﻣﺎ ﺗﺰﻋﻠﻴﺶ ﻣﻨﻲ
ﺣﺎﺯﻡ : ﺍﻟﻤﻬﻢ ﺩﻟﻮﻗﺘﻲ ﺗﺒﻘﻲ ﻛﻮﻳﺴﻪ ﻭﺗﻘﻮﻣﻲ ﺑﺎﻟﺴﻼﻣﻪ
ﺭﻫﻒ : ﺣﺎﺯﻡ ﻳﻌﻨﻲ ﺍﻳﻪ ﻣﺸﻠﻮﻟﻪ ؟؟
ﺣﺎﺯﻡ : ﺍﻧﺘﻲ ﺳﻤﻌﺘﻲ ﺍﻟﻜﻠﻤﻪ ﺩﻱ ﻓﻴﻦ ؟
ﺭﻫﻒ : ﺍﻟﻤﻤﺮﺿﺎﺕ ﻭﺍﻟﺪﻛﺎﺗﺮﻩ ﺑﻴﻘﻮﻟﻮﺍ ﺍﻧﻲ ﻣﻤﻜﻦ ﺍﺑﻘﻲ ﻣﺸﻠﻮﻟﻪ
ﺣﺎﺯﻡ ﺑﺎﺳﻬﺎ : ﺑﻌﺪ ﺍﻟﺸﺮ ﻋﻠﻴﻜﻲ ﺍﻧﺎ ﻣﺶ ﻫﺴﻤﺢ ﺑﺪﻩ ﺍﺑﺪﺍ ﻣﺎ ﺗﺨﺎﻓﻴﺶ
ﺭﻫﻒ : ﻟﻮ ﺍﻧﺖ ﻣﻮﺟﻮﺩ ﺍﻧﺎ ﻣﺶ ﻫﺨﺎﻑ
ﺣﺎﺯﻡ : ﻭﺍﻧﺎ ﺳﺒﻖ ﻭﻭﻋﺪﺗﻚ ﺍﻧﻲ ﻣﺶ ﻫﺘﺨﻠﻲ ﻋﻨﻚ ﺍﻳﻮﻩ ﺍﻧﺎ ﺑﻌﺪﺕ ﺷﻮﻳﻪ ﺑﺲ ﻣﻦ ﻫﻨﺎ ﻭﺭﺍﻳﺢ ﻣﺶ ﻫﺘﺒﻌﺪﻱ ﻋﻨﻲ ﺍﺑﺪﺍ ﻣﻬﻤﺎ ﻳﻜﻮﻥ ﺍﻟﺘﻤﻦ ﻭﺩﻩ ﻭﻋﺪ ﻣﻨﻲ
ﺑﺺ ﻟﻤﺮﺍﺗﻪ ﺑﻠﻮﻡ ﻭﻫﻴﺎ ﺑﺼﺖ ﻟﻼﺭﺽ
ﺩﺧﻞ ﺍﻟﺪﻛﺘﻮﺭ ﺍﻟﻌﻤﻠﻴﺎﺕ ﻭﻛﻞ ﻭﺍﺣﺪ ﺳﺎﻛﺖ ﺷﺎﻫﻨﺪﺍ ﺣﺎﻭﻟﺖ ﺗﻘﻒ ﺟﻨﺐ ﺣﺎﺯﻡ ﻭﺗﻤﺴﻚ ﺍﻳﺪﻩ ﺑﺲ ﺭﻓﺾ ﺑﺼﻤﺖ ﻭﻭﻗﻒ ﺑﻌﻴﺪ ﻋﻨﻬﺎ
ﺷﻮﻕ ﻋﻴﺎﻃﻬﺎ ﻣﺴﺘﻤﺮ ﻭﺧﺎﻳﻔﻪ ﺑﻨﺘﻬﺎ ﺗﺮﻭﺡ ﻣﻨﻬﺎ
ﺷﺎﻫﻨﺪﺍ ﺍﻟﻨﺪﻡ ﻫﻴﻤﻮﺗﻬﺎ ﺍﻧﻬﺎ ﺑﻌﺪﺗﻬﻢ ﻋﻦ ﺑﻌﺾ
ﻋﺪﺕ ﺳﺎﻋﺎﺕ ﺍﻟﻌﻤﻠﻴﻪ ﺑﻄﻴﺌﻪ ﻣﻤﻠﻪ ﻣﺨﻴﻔﻪ ﺑﺲ ﻋﺪﺕ ﻭﻃﻠﻊ ﺍﻟﺪﻛﺘﻮﺭ ﻭﻛﻠﻬﻢ ﺑﺼﻮﻟﻮﺍ ﺑﺨﻮﻑ
ﺍﻟﺪﻛﺘﻮﺭ : ﺍﻟﺤﻤﺪ ﻟﻠﻪ ﺍﻟﻌﻤﻠﻴﻪ ﻋﺪﺕ
ﺣﺎﺯﻡ : ﻳﻌﻨﻲ ﻣﺶ ﻫﺘﻜﻮﻥ ﻣﺸﻠﻮﻟﻪ ﺻﺢ ؟
ﺍﻟﺪﻛﺘﻮﺭ : ﺍﺟﺎﺑﻪ ﺳﺆﺍﻟﻚ ﺑﺪﺭﻱ ﻋﻠﻴﻬﺎ ﻭﺍﻧﺖ ﻋﺎﺭﻑ ﺩﻩ ﻛﻮﻳﺲ ﻣﻦ ﻏﻴﺮ ﻣﺎ ﺗﻔﻮﻕ ﻭﻧﺸﻮﻑ ﻫﺘﺘﺤﺮﻙ ﻭﻻ ﻷ ﻣﺎﻗﺪﺭﺵ ﺍﺟﺎﻭﺑﻚ
ﻓﻀﻠﻮﺍ ﻛﻠﻬﻢ ﻗﺎﻋﺪﻳﻦ ﺟﻨﺒﻬﺎ ﻣﺴﺘﻨﻴﻨﻬﺎ ﺗﻔﻮﻕ ... ﺷﺎﻫﻨﺪﺍ ﺑﺼﺘﻠﻬﺎ ﻟﻘﺘﻬﺎ ﻋﻴﻠﻪ ﻣﺠﺮﺩ ﻋﻴﻠﻪ .. ﻣﻌﻘﻮﻟﻪ ﻏﺎﺭﺕ ﻣﻦ ﺩﻱ ﻟﺒﻪ ﻣﻨﻌﺖ ﺟﻮﺯﻫﺎ ﺍﻧﻪ ﻳﺸﻮﻓﻬﺎ ؟؟ ﻟﻴﻪ ﻣﺜﻠﺖ ﻣﺎ ﻃﻠﺒﺘﺶ ﺗﺘﻌﺮﻑ ﻋﻠﻴﻬﺎ ﻭﺗﺮﻭﺡ ﻣﻌﺎﻩ ؟؟ ﻟﻴﻪ ﻗﻠﺒﻬﺎ ﻣﺶ ﻛﺒﻴﺮ ؟؟ ﺩﻋﺖ ﻣﻦ ﻗﻠﺒﻬﺎ ﺍﻥ ﺍﻟﺒﻨﺖ ﺗﻘﻮﻡ ﺑﺎﻟﺴﻼﻣﻪ ﺑﺼﺖ ﻟﺸﻮﻕ ﺑﺘﻤﻌﻦ ﺗﺪﺭﺳﻬﺎ ﻟﻘﺘﻬﺎ ﺍﻧﺴﺎﻧﻪ ﺍﺑﺴﻂ ﻣﻦ ﺍﻟﺒﺴﺎﻃﻪ .. ﻫﻴﺎ ﻛﻤﺎﻥ ﻣﺠﺮﺩ ﻋﻴﻠﻪ ... ﻟﻮ ﻛﺎﻧﺖ ﺷﺎﻓﺘﻬﺎ ﻣﻜﺎﻧﺘﺶ ﻏﺎﺭﺕ ﻣﻨﻬﺎ ﺍﺻﻼ ... ﺷﻮﻕ ﻛﺎﻧﺖ ﺩﺑﻼﻧﻪ ﻣﻔﻴﻬﺎﺵ ﺣﻴﻮﻳﻪ ﻭﻻ ﺟﻤﺎﻝ ﻫﻴﺎ ﺍﺣﻠﻲ ﻣﻨﻬﺎ ﻣﻠﻴﻮﻥ ﻣﺮﻩ ... ﻣﻌﻘﻮﻟﻪ ﻏﻴﺮﺗﻬﺎ ﻣﻜﺎﻧﺘﺶ ﻓﻲ ﻣﺤﻠﻬﺎ ... ﻗﺎﻣﺖ ﻭﺭﺍﺣﺖ ﻟﺠﻮﺯﻫﺎ
ﺷﺎﻫﻨﺪﺍ : ﻣﻤﻜﻦ ﺗﻘﻮﻡ ﺗﺮﺗﺎﺡ ﺷﻮﻳﻪ ؟؟
ﺣﺎﺯﻡ : ﻟﻮ ﺍﻧﺘﻲ ﻋﺎﻳﺰﻩ ﺗﺮﻭﺣﻲ ﺭﻭﺣﻲ ﻭﺟﻮﺩﻙ ﻣﺎﻟﻮﺵ ﻻﺯﻣﻪ ﻫﻨﺎ ﺍﺻﻼ
ﺷﺎﻫﻨﺪﺍ : ﺍﻧﺎ ﻋﺎﻳﺰﻩ ﺍﻓﻀﻞ ﻣﻌﺎﻙ
ﺣﺎﺯﻡ : ﻟﻴﻪ ﺷﻮﻕ ﻫﺘﺨﻄﻔﻨﻲ ﻣﺜﻼ ﻭﻻ ﻫﺘﻐﺮﻳﻨﻲ ؟؟؟ ﺭﻭﺣﻲ ﻳﺎ ﺷﺎﻫﻨﺪﺍ ﺍﻟﻠﻪ ﻻ ﻳﺴﻴﺌﻚ
ﺷﺎﻫﻨﺪﺍ : ﺣﺎﺯﻡ ﺍﻧﺖ ﻓﺎﻫﻤﻨﻲ ﻏﻠﻂ ﺍﻧﺎ ﺑﺲ
ﻗﺎﻃﻌﻬﺎ ﺣﺎﺯﻡ : ﻣﺶ ﻭﻗﺘﻪ ﺗﺒﺮﻳﺮﺍﺗﻚ ﺭﻭﺣﻲ ﺍﻧﺘﻲ
ﺷﺎﻫﻨﺪﺍ : ﺍﻧﺎ ﻋﺎﻳﺰﻩ ﺍﺗﻄﻤﻦ ﻋﻠﻴﻬﺎ
ﺣﺎﺯﻡ : ﻟﻤﺎ ﺗﻔﻮﻕ ﻫﺒﻠﻐﻚ ﺍﺗﻔﻀﻠﻲ
ﻣﺸﻴﺖ ﺷﺎﻫﻨﺪﺍ ﻣﻊ ﺍﺻﺮﺍﺭ ﺣﺎﺯﻡ ﻭﻓﻀﻞ ﺍﻟﺼﻤﺖ ﻣﺴﻴﻄﺮ ﻋﻠﻲ ﺷﻮﻕ ﻭﺣﺎﺯﻡ ﻓﺘﺮﻩ ﻃﻮﻳﻠﻪ ﺟﺪﺍ
ﺣﺎﺯﻡ ﻗﺎﻡ ﻭﻗﻌﺪ ﺟﻨﺐ ﺷﻮﻕ ﻭﺩﻱ ﻛﺎﻧﺖ ﺍﺷﺎﺭﻩ ﻫﻀﺮﺍ ﻟﻴﻬﺎ ﺍﻧﻬﺎ ﺗﺘﺮﻣﻲ ﻓﻲ ﺣﻀﻨﻪ ﻭﺗﻌﻴﻂ ﻋﻠﻲ ﺑﻨﺘﻬﺎ ﺍﻭ ﺑﻨﺘﻬﻢ
ﺣﺎﺯﻡ : ﻣﺎ ﺗﺨﺎﻓﻴﺶ ﻫﺘﺒﻘﻲ ﻛﻮﻳﺴﻪ ﻭﻫﺘﺸﻮﻓﻲ
ﺷﻮﻕ : ﻭﻟﻮ ﻣﺎ ﺑﻘﺘﺶ ﻫﻌﻤﻞ ﺍﻳﻪ ؟؟
ﺣﺎﺯﻡ : ﻫﺘﺒﻘﻲ ﻻﺯﻡ ﺗﺒﻘﻲ ﻳﺎ ﺷﻮﻕ ﻻﺯﻡ
ﺍﺧﻴﺮﺍ ﺭﻫﻒ ﻓﺎﻗﺖ ﺟﺮﻳﻮﺍ ﺍﻻﺗﻨﻴﻦ ﻋﻠﻴﻬﺎ ﻭﺍﻟﺪﻛﺘﻮﺭ ﺟﻪ ﺑﺴﺮﻋﻪ ﻭﺣﺎﻭﻟﺖ ﺗﺤﺮﻙ ﺭﺟﻠﻴﻬﺎ ﻭﻓﻌﻼ ﻗﺪﺭﺕ ﻭﻫﻨﺎ ﺍﻟﻜﻞ ﺍﺗﻨﻬﺪ ﺑﺎﺭﺗﻴﺎﺡ ﻭﺧﺼﻮﺻﺎ ﺣﺎﺯﻡ
ﺣﺎﺯﻡ ﻣﻜﻨﺶ ﺑﻴﻔﺎﺭﻗﻬﻢ ﺍﺑﺪﺍ ﻣﻦ ﺍﻟﻤﺴﺘﺸﻔﻲ ﻭﺷﺎﻫﻨﺪﺍ ﻛﺎﻧﺖ ﺑﺘﺠﻴﻠﻬﻢ ﻛﻞ ﺷﻮﻳﻪ ﺳﻮﺍﺀ ﺑﺄﻛﻞ ﺍﻭ ﺑﻬﺪﻭﻡ ﺍﻭ ﺍﻱ ﺣﺎﺟﻪ ﻣﻤﻜﻦ ﻳﺤﺘﺎﺟﻮﻫﺎ ﻭﺟﻮﺍﻫﺎ ﺧﻮﻑ ﻛﺒﻴﺮ ﺍﻧﻬﺎ ﺗﻜﻮﻥ ﺧﺴﺮﺕ ﺟﻮﺯﻫﺎ ﻭﺣﺒﻴﺒﻬﺎ ﻭﺧﺼﻮﺻﺎ ﻭﺍﻟﻜﻼﻡ ﻳﻜﺎﺩ ﻳﻜﻮﻥ ﻣﻌﺪﻭﻡ ﺑﻴﻨﻬﻢ
ﺷﺎﻫﻨﺪﺍ ﻛﺎﻧﺖ ﺑﺘﺰﻭﺭ ﺭﻫﻒ ﻭﺗﻘﻌﺪ ﻣﻌﺎﻫﺎ ﻭﺍﻛﺘﺸﻔﺖ ﻓﻌﻼ ﺍﻧﻬﺎ ﺍﻧﺴﺎﻧﻪ ﺭﻗﻴﻘﻪ ﺟﻤﻴﻠﻪ ﻣﺤﺒﻮﺑﻪ
ﺭﻫﻒ : ﻫﻮ ﺍﻧﺘﻲ ﺑﺘﺤﺒﻲ ﺯﻭﻣﺎ ﻗﻮﻱ ؟؟
ﺷﺎﻫﻨﺪﺍ : ﺍﻧﺎ ﻃﺒﻌﺎ ﺑﺤﺒﻪ ﻣﺶ ﺟﻮﺯﻱ
ﺭﻫﻒ : ﻳﻌﻨﻲ ﺍﻧﺘﻲ ﺑﺘﺤﺒﻴﻪ ﻋﻠﺸﺎﻥ ﺟﻮﺯﻙ ﻭﻻ ﺑﺘﺤﺒﻴﻪ ﻋﻠﺸﺎﻥ ﺑﺘﺤﺒﻴﻪ
ﺣﺎﺯﻡ ﺿﺤﻚ ﻭﺷﺎﻫﻨﺪﺍ ﻛﻤﺎﻥ
ﺷﺎﻫﻨﺪﺍ : ﺍﻧﺎ ﺑﺤﺒﻪ ﻋﻠﺸﺎﻥ ﺑﺤﺒﻪ ﻭﺑﻌﺪﻫﺎ ﺣﺒﻴﺘﻪ ﺍﻛﺘﺮ ﻋﻠﺸﺎﻥ ﺑﻘﻲ ﺟﻮﺯﻱ
ﺣﺎﺯﻡ : ﺧﻠﻲ ﺑﺎﻟﻚ ﻣﺶ ﻫﺘﺨﻠﺼﻲ ﻣﻦ ﺍﺳﺌﻠﺘﻬﺎ ﻧﻬﺎﺋﻲ
ﺭﻫﻒ : ﻣﺶ ﺍﻧﺖ ﻗﻮﻟﺘﻠﻲ ﻧﺒﻘﻲ ﺍﺻﺤﺎﺏ ؟ ﻻﺯﻡ ﺍﺳﺄﻟﻬﺎ ﻋﻠﺸﺎﻥ ﻧﺒﻘﻲ ﺍﺻﺤﺎﺏ
ﺷﺎﻫﻨﺪﺍ : ﺍﺳﺌﻠﻲ ﻳﺎ ﻗﻤﺮ ﻓﻲ ﺍﻟﻠﻲ ﻳﻌﺠﺒﻚ
ﺭﻫﻒ : ﻫﻮ ﺍﻧﺘﻲ ﻣﻤﻜﻦ ﺗﺒﻘﻲ ﺻﺎﺣﺒﻪ ﻣﺎﻣﺎ ؟؟
ﺷﺎﻫﻨﺪﺍ ﻭﺷﻮﻕ ﺑﺼﻮﺍ ﻟﺒﻌﺾ ﻭﺍﻻﺗﻨﻴﻦ ﻣﺤﺪﺵ ﻓﻴﻬﻢ ﻋﺮﻑ ﻳﺠﺎﻭﺏ
ﺣﺎﺯﻡ : ﻭﻟﻴﻪ ﻷ ﻳﺎ ﺭﻭﻓﺎ ﻋﺎﺩﻱ ﻳﻌﻨﻲ ﺑﻜﺮﻩ ﻳﺒﻘﻮﺍ ﺍﺻﺤﺎﺏ .. ﺍﻟﻤﻬﻢ ﻳﺎﻻ ﺑﻘﻲ ﺍﻧﺘﻲ ﺍﺧﺮﺟﻴﻠﻨﺎ ﻣﻦ ﻫﻨﺎ
ﺭﻫﻒ : ﻻ ﻣﺶ ﻋﺎﻳﺰﻩ ﺍﺧﺮﺝ
ﺣﺎﺯﻡ : ﻟﻴﻪ ﺑﻘﻲ ﺍﻥ ﺷﺎﺀ ﺍﻟﻠﻪ ؟؟
ﺭﻫﻒ : ﻋﻠﺸﺎﻥ ﻫﻨﺎ ﺍﻧﺖ ﻋﻠﻲ ﻃﻮﻝ ﻣﻌﺎﻳﺎ ﻓﻲ ﺍﻟﺒﻴﺖ ﺑﺘﻨﺴﺎﻧﻲ
ﺣﺎﺯﻡ : ﻻ ﻳﺎ ﻗﻤﺮ ﻣﺶ ﻫﻨﺴﺎﻛﻲ ﺍﺑﺪﺍ ﺍﺑﺪﺍ ﻣﺶ ﺍﺣﻨﺎ ﺍﺗﻔﻘﻨﺎ ﻋﻠﻲ ﻛﺪﻩ ؟
ﺭﻫﻒ : ﻣﺎ ﺍﺣﻨﺎ ﺑﻨﺘﻔﻖ ﻭﺍﻧﺖ ﺑﺘﻨﺴﻲ
ﺣﺎﺯﻡ : ﻻ ﻣﺶ ﻫﻨﺴﻲ ﺍﺑﺪﺍ
ﺭﻫﻒ : ﺍﺑﺪﺍ ﺍﺑﺪﺍ ؟؟
ﺣﺎﺯﻡ : ﺍﺑﺪﺍ ﺍﺑﺪﺍ
ﻭﻓﻲ ﻣﺮﻩ ﺣﺎﺯﻡ ﺭﻭﺡ ﺑﻴﺘﻪ ﻭﻫﻴﺎ ﻛﺎﻧﺖ ﻣﻮﺟﻮﺩﻩ
ﺷﺎﻫﻨﺪﺍ : ﺍﺧﺒﺎﺭﻫﺎ ﺍﻳﻪ ؟؟
ﺣﺎﺯﻡ : ﺍﻟﺤﻤﺪ ﻟﻠﻪ ﺍﺣﺴﻦ ﻭﺍﺣﺘﻤﺎﻝ ﻛﺒﻴﺮ ﺗﺨﺮﺝ ﺑﻜﺮﻩ
ﺷﺎﻫﻨﺪﺍ : ﺍﻥ ﺷﺎﺀ ﺗﻘﻮﻡ ﺑﺎﻟﺴﻼﻣﻪ ﺑﺴﺮﻋﻪ
ﺣﺎﺯﻡ : ﻭﺍﻟﺪﻋﻮﻩ ﺩﻱ ﺑﺠﺪ ﻭﻻ ﻛﻼﻡ ﻭﺍﻟﺴﻼﻡ ؟؟
ﺷﺎﻫﻨﺪﺍ : ﺣﺎﺯﻡ ﺍﻧﺎ ﻏﻠﻄﺖ ﺑﺲ ﻟﺪﻗﺎﻳﻖ ﺍﻟﻐﻴﺮﻩ ﻋﻤﺘﻨﻲ ﻭﺣﺒﻲ ﻟﻴﻚ ﻏﻤﺎ ﻋﻨﻴﺎ
ﺣﺎﺯﻡ : ﺑﺲ ﺩﻱ ﻋﻴﻠﻪ ﻭﻛﺎﻧﺖ ﻓﻲ ﺍﺯﻣﻪ
ﺷﺎﻫﻨﺪﺍ : ﻋﺎﺭﻓﻪ ﻭﺍﺳﻔﻪ ﻭﺍﺳﺘﻮﻋﺒﺖ ﺩﻩ ﻭﺟﺮﻳﺖ ﻭﻗﻮﻟﺘﻠﻚ ﺍﺳﻔﻪ ﺳﺎﻣﺤﻨﻲ ﺍﻋﺬﺭﻧﻲ ﻋﻠﻲ ﻏﺒﺎﺋﻲ ﻓﻲ ﺍﻟﻠﺤﻈﻪ ﺩﻱ ﺍﺳﻔﻪ ﺑﺠﺪ ... ﺍﻧﺎ ﻋﻤﺮﻱ ﻣﺎ ﺍﺫﻳﺖ ﺣﺪ ﺍﺑﺪﺍ ﻓﺄﻛﻴﺪ ﻣﺶ ﻗﺎﺻﺪﻩ ﺃﺫﻱ ﻋﻴﻠﻪ
ﺣﺎﺯﻡ : ﺍﻭﻛﻲ ﻳﺎ ﺷﺎﻫﻨﺪﺍ ﻫﺴﺎﻣﺤﻚ ﺑﺲ ﻟﻌﻠﻤﻚ ﺍﺗﻔﺎﻗﻲ ﻣﻌﺎﻛﻲ ﻻﻏﻲ ﺭﻫﻒ ﺗﺤﺖ ﻣﺴﺆﻟﻴﺘﻲ ﻭﻣﺶ ﻫﺒﻌﺪ ﻋﻨﻬﺎ ﺗﺎﻧﻲ ﻣﻬﻤﺎ ﻳﻜﻮﻥ ﺍﻟﺘﻤﻦ ﺍﻟﻜﻮﺭﻩ ﺩﻟﻮﻗﺘﻲ ﻓﻲ ﻣﻠﻌﺒﻚ ﺍﻧﺘﻲ
ﺷﺎﻫﻨﺪﺍ : ﺍﻧﺎ ﺷﻔﺖ ﻗﺪ ﺍﻳﻪ ﻫﻴﺎ ﻣﺘﻌﻠﻘﻪ ﺑﻴﻚ ﻭﻣﺶ ﻫﺘﺪﺧﻞ ﺗﺎﻧﻲ ﺑﻴﻨﻜﻢ ﺑﺲ ﺍﻭﻋﺪﻧﻲ ...
ﺣﺎﺯﻡ : ﺍﻭﻋﺪﻙ ﺑﺈﻳﻪ ؟؟
ﺷﺎﻫﻨﺪﺍ : ﺍﻧﻚ ﻫﺘﻔﻀﻞ ﺗﺤﺒﻨﻲ ﻭﺍﻧﻪ ﻟﻮ ﻓﻲ ﻳﻮﻡ ﺣﻨﻴﺖ ﻟﺸﻮﻕ ﺍﻭ ﺣﺒﻴﺘﻬﺎ ﺗﻘﻮﻟﻲ ﻣﺎ ﺗﺴﻴﺒﻨﻴﺶ ﻋﺎﻣﻴﻪ
ﺣﺎﺯﻡ ﻣﺴﻚ ﺍﻳﺪﻳﻦ ﻣﺮﺍﺗﻪ ﻭﺿﻤﻬﺎ : ﺍﻣﺘﻲ ﻫﺘﺜﻘﻲ ﻓﻲ ﺣﺒﻲ ﻟﻴﻜﻲ ﻳﺎ ﺷﺎﻫﻨﺪﺍ .. ﺍﻧﺎ ﻣﻌﺎﻛﻲ ﺍﻧﺘﻲ ﻭﺑﺲ
ﺷﺎﻫﻨﺪﺍ : ﺑﺲ ﺍﺭﺟﻮﻙ ﺍﻭﻋﺪﻧﻲ
ﺣﺎﺯﻡ : ﺣﺎﺿﺮ ﺍﻭﻋﺪﻙ ﺍﻧﻲ ﻟﻮ ﺣﻨﻴﺖ ﻟﺸﻮﻕ ﻫﺘﺒﻘﻲ ﺍﻧﺘﻲ ﺍﻭﻝ ﺣﺪ ﺍﺑﻠﻐﻪ ﻫﺎﻩ ﻣﺒﺴﻮﻃﻪ ﻛﺪﻩ ؟
ﺍﺳﺘﻐﺮﺏ ﺣﺎﺯﻡ ﻣﻦ ﻧﻔﺴﻪ ﺍﻧﻪ ﻋﻤﺮﻩ ﻣﺎ ﻗﺎﻝ ﻟﺸﺎﻫﻨﺪﺍ ﺍﻧﻪ ﺑﻴﺤﺒﻬﺎ ﻭﻣﺶ ﻋﺎﺭﻑ ﻟﻴﻪ ﻣﺶ ﻗﺎﺩﺭ ﻳﻨﻄﻖ ﺍﻟﻜﻠﻤﻪ ﺩﻱ ﺗﺎﻧﻲ ﺍﺑﺪﺍ ؟؟؟
ﻧﻄﻘﻬﺎ ﻟﺸﻮﻕ ﻭﺑﺲ
ﺭﺟﻊ ﺣﺎﺯﻡ ﻟﺸﻮﻕ ﻭﺭﻫﻒ ﻭﻓﻀﻞ ﻣﻌﺎﻫﻢ ﻭﺍﺧﺮ ﺍﻟﻨﻬﺎﺭ ﺷﺎﻫﻨﺪﺍ ﺭﺍﺣﺖ ﺗﺰﻭﺭﻫﻢ ﻻﻧﻬﺎ ﻫﻴﺎ ﻛﻤﺎﻥ ﺣﺒﺖ ﺭﻫﻒ
ﺣﺎﺯﻡ ﻣﻊ ﺷﻮﻕ ﻓﻲ ﺍﻭﺿﻪ ﺭﻫﻒ ﻭﺭﻫﻒ ﻧﺎﻳﻤﻪ
ﺣﺎﺯﻡ : ﺍﻟﺤﻤﺪ ﻋﺪﺕ ﻋﻠﻲ ﺧﻴﺮ ﻭﺑﻜﺮﻩ ﺍﻥ ﺷﺎﺀ ﺗﻄﻠﻊ ﺑﺎﻟﺴﻼﻣﻪ
ﺷﻮﻕ : ﻭﻟﻤﺎ ﺗﻄﻠﻊ ﻫﺘﻴﺠﻲ ﺗﺰﻭﺭﻫﺎ ﻭﻻ ﻫﺘﺮﺟﻊ ﻟﻌﺎﺩﺗﻚ ﻭﺗﻨﺴﺎﻧﺎ ؟؟
ﺣﺎﺯﻡ : ﺍﻧﺎ ﺑﺘﺸﻐﻞ ﻣﺶ ﺑﻨﺴﺎﻛﻢ ﻓﻲ ﻓﺮﻕ
ﺷﻮﻕ : ﺍﻧﺖ ﺑﺠﺪ ﻳﺎ ﺣﺎﺯﻡ ﺑﺘﺤﺐ ﻣﺮﺍﺗﻚ ؟؟
ﺣﺎﺯﻡ ﺑﺎﺳﺘﻐﺮﺍﺏ : ﺍﻳﻪ ﺍﻟﺴﺆﺍﻝ ﺍﻟﻐﺮﻳﺐ ﺩﻩ ؟ ﻃﺒﻌﺎ ﺑﺤﺒﻬﺎ
ﺷﻮﻕ : ﺍﻣﺎﻝ ﺍﻧﺖ ﻫﻨﺎ ﻟﻴﻪ ؟؟
ﺣﺎﺯﻡ : ﻋﻠﺸﺎﻥ ﺭﻫﻒ
ﺷﻮﻕ : ﺭﻫﻒ ﺑﺲ ؟؟ ﺍﻣﺎﻝ ﻟﻴﻪ ﻛﻞ ﻳﻮﻡ ﻭﺍﻟﺘﺎﻧﻲ ﺗﺠﻴﻠﻨﺎ ﻭﺗﻘﻌﺪ ﻣﻌﺎﻧﺎ ؟؟ ﻟﻴﻪ ﻛﻞ ﻣﺎ ﺑﺘﻀﺎﻳﻖ ﺍﻭ ﺗﺰﻋﻞ ﺑﺘﺠﺮﻱ ﻋﻠﻲ ﺣﻀﻨﻲ ؟؟ ﻟﻴﻪ
ﺣﺎﺯﻡ : ﺍﻣﺘﻲ ﺍﺧﺮ ﻣﺮﻩ ﺟﺮﻳﺖ ﻋﻠﻲ ﺣﻀﻨﻚ ﻳﺎ ﺷﻮﻕ ؟ ﻗﺒﻞ ﻣﺎ ﺍﺗﺠﻮﺯ ﺻﺢ ،؟ ﻛﻨﺖ ﻣﻮﻫﻮﻡ ﺑﺤﺐ ﻗﺪﻳﻢ ﻭﻓﻘﺖ ﻣﻨﻪ ...
ﺷﻮﻕ : ﻣﺘﺄﻛﺪ ﺍﻧﻚ ﻓﻘﺖ ﻣﻨﻪ ؟؟ ﻣﺘﺄﻛﺪ ﻳﺎ ﺣﺎﺯﻡ ؟؟
ﺣﺎﺯﻡ : ﻃﺒﻌﺎ ﻣﺘﺄﻛﺪ ﻭﺍﻻ ﻣﻜﻨﺘﺶ ﺍﺗﺠﻮﺯﺕ ﺷﺎﻫﻨﺪﺍ
ﺷﻮﻕ : ﻳﻌﻨﻲ ﺍﻧﺎ ﻟﻮ ﻗﺮﺑﺖ ﻣﻨﻚ ﻛﺪﻩ ﻣﺸﺎﻋﺮﻙ ﻣﺶ ﻫﺘﺘﺤﺮﻙ
ﻗﺮﺑﺖ ﻣﻨﻪ ﻗﻮﻱ ﻭﻭﻗﻔﺖ ﻗﺼﺎﺩﻩ ﺗﻤﺎﻣﺎ ﻭﺣﺎﺯﻡ ﺑﺼﻠﻬﺎ ﺑﺘﺤﺪﻱ
ﺣﺎﺯﻡ : ﻣﺸﺎﻋﺮﻱ ﻣﺎ ﺑﺘﺘﺤﺮﻛﺶ ﺍﻻ ﻟﻤﺮﺍﺗﻲ ﻭﺑﺲ ﻓﻤﺎ ﺗﺘﻌﺒﻴﺶ ﻧﻔﺴﻚ ﻳﺎ ﺷﻮﻕ ﺍﻧﺘﻲ ﻣﺎﺿﻲ ﻭﺍﻧﺘﻬﻲ
ﺷﻮﻕ : ﺑﺠﺪ ﻳﺎ ﺣﺎﺯﻡ ﻣﺎﺿﻲ ؟؟
ﻗﺮﺑﺖ ﻣﻨﻪ ﻗﻮﻱ ﻭﻟﻤﺴﺖ ﺷﻔﺎﻳﻔﻪ ﺍﺳﺘﻐﺮﺏ ﻣﻦ ﺭﺩ ﻓﻌﻠﻬﺎ ﺩﻩ ﻭﻳﺪﻭﺏ ﻫﻴﺒﻌﺪﻫﺎ ﻛﺎﻧﺖ ﺷﺎﻫﻨﺪﺍ ﻓﺘﺤﺖ ﺍﻟﺒﺎﺏ ﻭﻭﻗﻔﺖ ﻗﺼﺎﺩﻫﻢ ﻣﺶ ﻣﺼﺪﻗﻪ ﻋﻨﻴﻬﺎ
ﺣﺎﺯﻡ ﺑﻌﺪ ﻋﻨﻬﺎ ﺑﺴﺮﻋﻪ ﻭﺷﻮﻕ ﻋﻄﺘﻬﺎ ﻇﻬﺮﻫﺎ
ﺣﺎﺯﻡ : ﺍﺳﺘﻨﻲ ﺍﻧﺘﻲ ﻓﺎﻫﻤﻪ ﻏﻠﻂ
ﺷﺎﻫﻨﺪﺍ : ﺍﻧﺎ ﻓﻌﻼ ﻓﺎﻫﻤﻪ ﻏﻠﻂ ﺑﻌﺪ ﺍﺫﻧﻜﻢ ﻋﻠﺸﺎﻥ ﻣﺎ ﺍﻋﻄﻠﻜﻤﺶ
ﺳﺎﺑﺘﻬﻢ ﻭﺟﺮﻳﺖ ﻭﻃﺒﻌﺎ ﺣﺎﺯﻡ ﻣﻠﺤﻘﻬﺎﺵ ﻓﻮﻗﻒ ﻣﻜﺎﻧﻪ
ﺷﻮﻕ : ﺍﻧﺎ ﺍﺳﻔﻪ ﻳﺎ ﺣﺎﺯﻡ
ﺣﺎﺯﻡ : ﺑﺠﺪ ﺍﺳﻔﻪ ﻭﻻ ﺍﻧﺘﻲ ﺩﻳﻤﺎ ﺑﺘﺤﺒﻲ ﺗﺒﻮﻇﻲ ﺣﻴﺎﺗﻲ ؟؟ ﺍﻧﺎ ﻗﻮﻟﺘﻠﻚ ﺍﻧﺎ ﺑﺤﺐ ﻣﺮﺍﺗﻲ
ﺷﻮﻕ : ﺍﻣﺎﻝ ﺑﺘﻬﺘﻢ ﺑﻴﻨﺎ ﻟﻴﻪ ﻫﺎﻩ ؟؟
ﺣﺎﺯﻡ : ﺑﻬﺘﻢ ﺑﺮﻫﻒ ﻣﺶ ﺑﻴﻜﻲ .. ﻓﻲ ﻓﺮﻕ ﻛﺒﻴﺮ ﻭﺩﻟﻮﻗﺘﻲ ﺑﻌﺪ ﺍﺫﻧﻚ ﺍﺭﻭﺡ ﺍﻟﺤﻘﻬﺎ
ﺳﺎﺑﻬﻢ ﻭﺭﺍﺡ ﻭﺭﻱ ﺷﺎﻫﻨﺪﺍ ﻭﻃﺒﻌﺎ ﻣﻠﻘﻬﺎﺵ ﻓﻲ ﺍﻱ ﻣﻜﺎﻥ .. ﻓﻀﻞ ﻛﻞ ﺷﻮﻳﻪ ﻳﺘﺼﻞ ﺑﻴﻬﺎ ﻭﻣﺶ ﺑﺘﺮﺩ ﻋﻠﻴﻪ
ﺍﺧﺮ ﺍﻟﻨﻬﺎﺭ ﺍﺑﻮﻫﺎ ﻛﻠﻤﻪ ﻭﻃﻠﺐ ﻳﻘﺎﺑﻠﻪ ﻭﺭﺍﺣﻠﻪ
ﻣﻜﺮﻡ : ﺷﺎﻫﻨﺪﺍ ﺣﻜﺘﻠﻲ ﺍﻟﻠﻲ ﺣﺼﻞ
ﺣﺎﺯﻡ : ﻭﺍﻳﻪ ﻫﻮ ﺍﻟﻠﻲ ﺣﺼﻞ ؟؟
ﻣﻜﺮﻡ : ﻋﻼﻗﺘﻚ ﺑﻤﺎﺿﻴﻚ
ﺣﺎﺯﻡ : ﻳﺎ ﺍﻟﻠﻪ ... ﺍﻧﺎ ﻣﺎﻟﻴﺶ ﻋﻼﻗﺎﺕ ﺍﻭﻙ ﻣﻤﻜﻦ ﺑﻘﻲ ﺍﺗﻜﻠﻢ ﻣﻊ ﺷﺎﻫﻨﺪﺍ ﻟﻮ ﺳﻤﺤﺖ ؟
ﻣﻜﺮﻡ : ﺷﺎﻫﻨﺪﺍ ﻃﺎﻟﺒﻪ ﺍﻟﻄﻼﻕ ﻳﺎ ﺣﺎﺯﻡ
ﺣﺎﺯﻡ ﺍﺗﺼﺪﻡ ﺑﺎﻟﻠﻲ ﺳﻤﻌﻪ .. ﻣﻌﻘﻮﻟﻪ ﺗﻜﻮﻥ ﻋﺎﻳﺰﻩ ﺗﺴﻴﺒﻪ ﻟﻤﺠﺮﺩ ﺳﻮﺀ ﺗﻔﺎﻫﻢ ؟؟ ﻻ ﻣﺶ ﻫﻴﺴﻤﺢ ﺑﺪﻩ ﺍﺑﺪﺍ
ﻫﻨﺎ ﺳﺎﻣﻴﻪ ﺍﺗﺪﺧﻠﺖ : ﻣﺶ ﻗﻮﻟﺘﻠﻚ ﺍﻧﻬﺎ ﻣﺠﺮﺩ ﻭﻗﺖ ﻭﻫﺘﻄﻠﺐ ﺍﻟﻄﻼﻕ ؟؟
ﺣﺎﺯﻡ : ﺣﻀﺮﺗﻚ ﻣﺶ ﻓﺎﻫﻤﻪ ﺣﺎﺟﻪ ... ﻓﻠﻮ ﺳﻤﺤﺘﻲ ﻣﺎ ﺗﺪﺧﻠﻴﺶ ﺑﻴﻨﺎ
ﺳﺎﻣﻴﻪ : ﺑﻨﺘﻲ ﻣﺶ ﻣﺒﺴﻮﻃﻪ ﻣﻌﺎﻙ ﻭﻋﺎﻳﺰﻩ ﺗﺘﻄﻠﻖ ﻳﺒﻘﻲ ﺍﺯﺍﻱ ﻣﺎ ﺍﺗﺪﺧﻠﺶ ؟
ﺣﺎﺯﻡ : ﻋﻤﻲ ﺍﻧﺎ ﻻﺯﻡ ﺍﺗﻜﻠﻢ ﺍﻧﺎ ﻭﻫﻴﺎ
ﻣﻜﺮﻡ : ﻳﺎ ﺍﺑﻨﻲ ﺍﻧﺖ ﺳﺒﻖ ﻭﺍﻛﺪﺕ ﻗﺒﻞ ﻣﺎ ﺗﺘﺠﻮﺯ ﺍﻥ ﻣﺎﺿﻴﻚ ﺍﻧﺘﻬﻲ ﻓﻠﻴﻪ ﻣﺼﺮ ﺗﺨﻠﻴﻪ ﺟﻨﺒﻚ ؟؟ ﺍﻧﺖ ﺑﺘﻬﺪ ﺑﻴﺘﻚ ﺑﺈﻳﺪﻙ
ﺣﺎﺯﻡ : ﺍﻧﺘﻮ ﻣﺶ ﻓﺎﻫﻤﻴﻦ ﺣﺎﺟﻪ ﺍﻧﺎ ﻣﻔﻴﺶ ﻓﻲ ﺣﻴﺎﺗﻲ ﻏﻴﺮ ﻣﺮﺍﺗﻲ ﻭﺑﺲ ...
ﻫﻨﺎ ﻣﺮﺍﺗﻪ ﺩﺧﻠﺖ ﻭﺍﺗﻜﻠﻤﺖ ﻭﺍﺗﻔﺎﺟﺊ ﺑﺼﻮﺗﻬﺎ ﻭﺭﺍﻩ
ﺷﺎﻫﻨﺪﺍ : ﻭﺍﻟﻠﻲ ﺍﻧﺎ ﺷﻔﺘﻪ ﺩﻩ ﻛﺎﻥ ﺍﻳﻪ ؟؟
ﺣﺎﺯﻡ ﻟﻔﻠﻬﺎ : ﻟﻮﺳﻤﺤﺘﻲ ﻣﻤﻜﻦ ﻧﺘﻜﻠﻢ ﺍﻧﺎ ﻭﺍﻧﺘﻲ ﺷﻮﻳﻪ ؟
ﺷﺎﻫﻨﺪﺍ : ﻻ ﻳﺎ ﺣﺎﺯﻡ ﺍﺣﻨﺎ ﺍﺗﻜﻠﻤﻨﺎ ﻛﺘﻴﺮ
ﺣﺎﺯﻡ : ﻭﻫﻨﺘﻜﻠﻢ ﺍﻛﺘﺮ ﻭﺍﻛﺘﺮ ﻭﻃﻮﻝ ﻣﺎ ﺍﺣﻨﺎ ﻣﻊ ﺑﻌﺾ ﻫﻨﻔﻀﻞ ﻧﺘﻤﺴﻚ ﺑﺒﻌﺾ ﻣﺶ ﻫﻨﺘﺨﻠﻲ ﻋﻦ ﺑﻌﺾ ﺑﺎﻟﺴﻬﻮﻟﻪ ﺩﻱ
ﺷﺎﻫﻨﺪﺍ : ﺍﻧﺖ ﺍﻟﻠﻲ ﺑﺘﺘﺨﻠﻲ ﻋﻨﻲ
ﺣﺎﺯﻡ : ﺍﻧﺎ ﻋﻤﺮﻱ ﻣﺎ ﺍﺗﺨﻠﻴﺖ ﻋﻨﻚ ﺍﺑﺪﺍ ﺍﻧﺘﻲ ﻣﺶ ﻓﺎﻫﻤﻪ ﺣﺎﺟﻪ ﻳﺎ ﺷﺎﻫﻲ ...
ﺷﺎﻫﻨﺪﺍ : ﺍﻧﺎ ﻛﻨﺖ ﺑﻌﻤﻞ ﻧﻔﺴﻲ ﻣﺶ ﻓﺎﻫﻤﻪ
ﺣﺎﺯﻡ ﺷﺪ ﺷﺎﻫﻨﺪﺍ ﻭﺍﺧﺪﻫﺎ ﻓﻲ ﺍﻭﺿﻪ ﻟﻮﺣﺪﻫﻢ
ﺣﺎﺯﻡ : ﺷﺎﻫﻲ ﺣﺒﻴﺒﺘﻲ ﺍﺳﻤﻌﻴﻨﻲ
ﻫﻨﺎ ﺷﺎﻫﻨﺪﺍ ﻋﻴﻄﺖ ﺟﺎﻣﺪ : ﻛﺎﻧﺖ ﻓﻲ ﺣﻀﻨﻚ ﻭﺑﺘﺒﻮﺳﻬﺎ
ﺣﺎﺯﻡ : ﻻ ﻣﻜﻨﺘﺶ ﻓﻲ ﺣﻀﻨﻲ ﻳﺎ ﺷﺎﻫﻲ ﻭﻻ ﻣﻜﻨﺘﺶ ﺑﺒﻮﺳﻬﺎ
ﺷﺎﻫﻨﺪﺍ : ﺍﻣﺎﻝ ﺍﻟﻠﻲ ﺍﻧﺎ ﺷﻔﺘﻪ ﺩﻩ ﻛﺎﻥ ﺍﻳﻪ ﻳﺎ ﺣﺎﺯﻡ .. ﺍﺯﺍﻱ ﻋﺎﻳﺰﻧﻲ ﺍﻛﺪﺏ ﻋﻨﻴﺎ ؟؟
ﺣﺎﺯﻡ : ﺍﻟﻠﻲ ﺷﻔﺘﻴﻪ ﻛﺎﻥ ﺷﻮﻕ ﺑﺘﺤﺎﻭﻝ ﺗﻘﺮﺑﻨﻲ ﻣﻨﻬﺎ ﻫﻴﺎ ﺯﻱ ﻣﺎ ﺍﻧﺘﻲ ﻗﻮﻟﺘﻲ ﺑﺘﺤﺒﻨﻲ ﻭﻛﻨﺖ ﺑﺤﺎﻭﻝ ﺍﻓﻬﻤﻬﺎ ﺍﻧﻲ ﺑﺤﺐ ﻣﺮﺍﺗﻲ ﻭﻣﺮﻩ ﻭﺍﺣﺪﻩ ﻟﻘﻴﺘﻬﺎ ﺑﺘﺒﻮﺳﻨﻲ ﻭﻳﺪﻭﺏ ﻫﺒﻌﺪﻫﺎ ﺍﻧﺘﻲ ﺩﺧﻠﺘﻲ ﺍﻟﻤﻮﺿﻮﻉ ﻣﺎ ﺍﺧﺪﺵ ﺍﻛﺘﺮ ﻣﻦ ﻟﺤﻈﻪ .. ﻟﺤﻈﻪ ﺩﺧﻮﻟﻚ ﺑﺲ ﺻﺪﻗﻴﻨﻲ ﻳﺎ ﺷﺎﻫﻲ ... ﺍﻧﺘﻲ ﻓﻲ ﻛﻔﻪ ﻭﺍﻟﺪﻧﻴﺎ ﻛﻠﻬﺎ ﻓﻲ ﻛﻔﻪ
ﺷﺎﻫﻨﺪﺍ : ﻻ ﻳﺎ ﺣﺎﺯﻡ ﺍﻧﺎ ﻣﺶ ﻓﻲ ﻛﻔﻪ ... ﺍﻧﺖ ﻣﻌﻨﺪﻛﺶ ﺍﺳﺘﻌﺪﺍﺩ ﺗﺒﻌﺪ ﻋﻨﻬﻢ ﻭﻋﻼﻗﺘﻚ ﺑﻴﻬﻢ ﻫﺘﻔﻀﻞ ﻣﺴﺘﻤﺮﻩ ﻭﺍﻧﺎ ﻛﻨﺖ ﻣﺘﺨﻴﻠﻪ ﺍﻧﻲ ﻫﻘﺪﺭ ﺍﺗﺤﻤﻞ ﺍﻟﻮﺿﻊ ﺩﻩ ﺑﺲ ﻣﺶ ﻫﻘﺪﺭ
ﺣﺎﺯﻡ : ﻟﻠﻤﺮﻩ ﺍﻷﻟﻒ ﻫﻘﻮﻟﻚ ﺍﺭﺟﻮﻛﻲ ﺧﻠﻲ ﻋﻨﺪﻙ ﺛﻘﻪ ﻓﻴﻪ ... ﺛﻘﻲ ﻓﻲ ﺣﺒﻲ ﻟﻴﻜﻲ ﺷﻮﻳﻪ .. ﻣﻔﻴﺶ ﺣﻴﺎﻩ ﻫﺘﺴﺘﻤﺮ ﻣﻦ ﻏﻴﺮ ﺛﻘﻪ ...
ﺍﻟﻤﻔﺮﻭﺽ ﻫﻨﺎ ﻳﻘﻮﻟﻬﺎ ﺍﻧﻪ ﺑﻴﺤﺒﻬﺎ ﻫﻴﺎ ﻭﺑﺲ
ﻟﻼﺳﻒ ﻣﻘﺪﺭﺵ ﻳﻨﻄﻖ ﺍﻟﻜﻠﻤﻪ ﺩﻱ
ﺣﺎﺯﻡ : ﺷﺎﻫﻨﺪﺍ ﺍﺭﺟﻮﻛﻲ ﺍﻧﺎ ﻣﺤﺘﺎﺟﻚ ﻓﻲ ﺣﻴﺎﺗﻲ
ﺷﺎﻫﻨﺪﺍ : ﺣﺎﺯﻡ .. ﺍﺭﺟﻮﻙ .. ﺍﺭﺟﻮﻙ ﺳﻴﺒﻨﻲ
ﺣﺎﺯﻡ : ﻣﺶ ﻫﺴﻴﺒﻚ ﻭﻣﺶ ﻫﺪﻳﻜﻲ ﻓﺮﺻﻪ ﺗﺒﻌﺪﻱ ﻋﻨﻲ ﺍﻧﺘﻲ ﻣﺮﺍﺗﻲ ﻭﺷﺮﻳﻜﻪ ﻋﻤﺮﻱ .. ﺍﻣﺎ ﺷﻮﻕ ﺍﻧﺎ ﻫﻌﺮﻑ ﺍﺯﺍﻱ ﺍﻭﻗﻔﻬﺎ ﻋﻨﺪ ﺣﺪﻫﺎ ﻭﺍﻋﺮﻓﻬﺎ ﻗﻴﻤﺘﻬﺎ ﻭﻣﻜﺎﻧﺘﻬﺎ ﻓﻲ ﺣﻴﺎﺗﻲ ... ﺍﻣﺎ ﺑﻘﻲ ﻟﻮ ﺍﻧﺘﻲ ﻣﺶ ﻣﺒﺴﻮﻃﻪ ﻣﻌﺎﻳﺎ ﻭﺑﺘﺘﻠﻜﻜﻲ ﺯﻱ ﻣﺎ ﺍﻣﻚ ﺑﺘﻘﻮﻝ ﻓﺪﻱ ﺣﺎﺟﻪ ﺗﺎﻧﻴﻪ ﺳﺎﻋﺘﻬﺎ ﻫﻨﺴﺤﺐ ﻣﻦ ﺣﻴﺎﺗﻚ ﻭﺷﻮﻓﻲ ﺳﻌﺎﺩﺗﻚ ﻣﻊ ﺭﺍﺟﻞ ﺗﺎﻧﻲ ﻏﻴﺮﻱ
ﺷﺎﻫﻨﺪﺍ : ﺍﻳﻪ ﺍﻟﻬﺒﻞ ﺩﻩ ؟ ﺍﻧﺎ ﺍﻋﺘﺮﺍﺿﻲ ﻋﻠﻲ ﺷﻮﻕ ﻭﻋﻼﻗﺘﻚ ﺑﻴﻬﺎ ﺑﺲ ﺍﻧﺎ ﺑﺤﺒﻚ ﻭﻣﺒﺴﻮﻃﻪ ﻣﻌﺎﻙ
ﺣﺎﺯﻡ : ﻳﺒﻘﻲ ﻳﺎﻻ ﻧﺮﺟﻊ ﺑﻴﺘﻨﺎ ﻭﺧﻠﻴﻜﻲ ﻣﻌﺎﻳﺎ ﻓﻲ ﻛﻞ ﺧﻄﻮﻩ ﻭﺧﻠﻲ ﻋﻼﻗﺘﻲ ﺑﺮﻫﻒ ﺗﺒﻘﻲ ﻗﺪﺍﻣﻚ ﻭﺷﺎﺭﻛﻴﻨﻲ ﺣﺒﻬﺎ ﻭﺍﻫﺘﻤﺎﻣﻨﺎ ﺑﻴﻬﺎ ... ﺍﻧﺘﻲ ﺷﻔﺘﻴﻬﺎ ﻭﺍﻋﺘﻘﺪ ﺍﻧﻚ ﺍﻧﺘﻲ ﻛﻤﺎﻥ ﺣﺒﻴﺘﻴﻬﺎ ﺻﺢ ؟؟
ﺷﺎﻫﻨﺪﺍ : ﺍﻳﻮﻩ ﺣﺒﻴﺘﻬﺎ ﺑﺲ
ﺣﺎﺯﻡ : ﻣﺎ ﺑﺴﺶ ﻳﺎ ﺷﺎﻫﻲ ﺍﻧﺘﻲ ﺭﺍﻓﻀﻪ ﻋﻼﻗﺘﻲ ﺑﺸﻮﻕ ﻭﺍﻧﺎ ﺑﻘﻮﻟﻚ ﻋﻼﻗﺘﻲ ﺑﺮﻫﻒ ﺑﺲ ﻳﺒﻘﻲ ﻣﻦ ﻫﻨﺎ ﻭﺭﺍﻳﺢ ﻓﻲ ﺍﻱ ﻭﻗﺖ ﺍﺭﻭﺡ ﻟﺮﻫﻒ ﺗﻜﻮﻧﻲ ﺍﻧﺘﻲ ﻣﻮﺟﻮﺩﻩ ﻭﻓﻲ ﺍﻟﺼﻮﺭﻩ ﻭﺩﻩ ﺍﻧﺴﺐ ﺣﻞ ﻳﺮﺿﻲ ﻛﻞ ﺍﻻﻃﺮﺍﻑ
ﻳﺎﻻ ﺑﻴﺘﻨﺎ ﻳﺎ ﺷﺎﻫﻲ ﻳﺎﻻ ﻣﺎ ﺗﺴﻴﺒﻴﻨﻴﺶ ﻟﻮﺣﺪﻱ
ﻣﺪ ﺍﻳﺪﻩ ﻭﻫﻴﺎ ﺍﺗﺮﺩﺩﺕ ﺑﺲ ﺣﻄﺖ ﺍﻳﺪﻫﺎ ﻓﻲ ﺍﻳﺪﻩ ﻭﺍﺧﺪ ﻣﺮﺍﺗﻪ ﻭﻣﺸﻲ ﻭﺭﺍﺣﻮﺍ ﺑﻴﺘﻬﻢ
ﻃﻮﻝ ﺍﻟﻄﺮﻳﻖ ﻣﺤﺪﺵ ﻓﻴﻬﻢ ﺍﺗﻜﻠﻢ ﺷﺎﻫﻨﺪﺍ ﺑﺘﺤﺎﻭﻝ ﺗﻘﻨﻊ ﻧﻔﺴﻬﺎ ﺍﻥ ﻓﻌﻼ ﺟﻮﺯﻫﺎ ﺑﻴﺤﺒﻬﺎ ﻭﺣﺎﺯﻡ ﺑﻴﺤﺎﻭﻝ ﻣﺎ ﻳﻔﻜﺮﺵ ﻓﻲ ﺍﻟﻠﺤﻈﻪ ﺍﻟﻠﻲ ﺷﺎﻫﻨﺪﺍ ﻗﻄﻌﺘﻬﺎ ﻭﺑﻴﺴﺄﻝ ﻧﻔﺴﻪ ﻟﻮ ﻣﺮﺍﺗﻪ ﻣﻜﻨﺘﺶ ﺟﺖ ﻛﺎﻥ ﺍﻳﻪ ﺍﻟﻠﻲ ﻫﻴﺤﺼﻞ ؟؟ ﻫﻴﺮﻓﺾ ﺷﻮﻕ ﻓﻌﻼ ﻭﻻ ﻫﻴﺼﺤﻲ ﻣﺎﺿﻲ ﻣﺎﺕ ﻭﺍﻧﺘﻬﻲ ؟؟ ﻭﻫﻮ ﻣﺎﺕ ﻓﻌﻼ ﻭﻻ ﺑﺲ ﻣﺪﻓﻮﻥ ﻭﺳﻂ ﻛﺒﺮﻳﺎﺀ ﻭﺟﺮﺡ ؟؟؟
ﺭﻭﺡ ﺑﻴﺘﻪ ﻭﻫﻨﺎﻙ ﻛﺎﻧﺖ ﺍﻣﻪ ﻳﺪﻭﺏ ﺩﺍﺧﻠﻪ ﻫﻴﺎ ﻛﻤﺎﻥ
ﺻﻔﻴﻪ : ﻣﺎﻟﻜﻢ ﺷﻜﻠﻜﻢ ﻏﺮﻳﺐ ﻛﺪﻩ ﻟﻴﻪ ؟
ﺣﺎﺯﻡ : ﻻ ﻣﺎ ﺗﺸﻐﻠﻴﺶ ﺑﺎﻟﻚ ﺍﻧﺘﻲ
ﺻﻔﻴﻪ : ﻃﻴﺐ ﺻﺢ ﻳﺎ ﺣﺎﺯﻡ ﻧﺴﻴﺖ ﺍﻗﻮﻟﻚ ﺍﻧﺎ ﻫﺴﻴﺐ ﺍﻟﻔﻴﻼ
ﺣﺎﺯﻡ : ﻫﺘﺴﻴﺒﻴﻬﺎ ﻭﻫﺘﺮﻭﺣﻲ ﻓﻴﻦ ؟
ﺻﻔﻴﻪ : ﻫﺘﺠﻮﺯ ﻭﻫﺮﻭﺡ ﺍﻋﻴﺶ ﺍﻧﺎ ﻭﺟﻮﺯﻱ
ﺣﺎﺯﻡ ﺍﺗﺼﺪﻡ ﻭﻣﻌﺮﻓﺶ ﻳﺮﺩ ﻋﻠﻲ ﺍﻣﻪ ﻭﺿﻐﻂ ﻋﻠﻲ ﺍﻳﺪ ﻣﺮﺍﺗﻪ ﺍﻟﻠﻲ ﺳﺎﻋﺘﻬﺎ ﺣﺴﺖ ﺑﺄﻟﻤﻪ
ﺣﺎﺯﻡ : ﺗﺘﺠﻮﺯﻱ ؟؟ ﻣﻴﻦ ﻭﺍﻣﺘﻲ ﻭﻟﻴﻪ ؟ﺍﻧﺘﻲ ﺑﺘﻬﺰﺭﻱ ﺻﺢ ؟
ﺻﻔﻴﻪ : ﻻ ﺍﻧﺎ ﻣﺶ ﺑﻬﺰﺭ ﻃﺒﻌﺎ .. ﻫﻮ ﺍﻧﺴﺎﻥ ﻛﻮﻳﺲ ﻭﺑﻴﺤﺒﻨﻲ ﻭﺑﺤﺒﻪ
ﺣﺎﺯﻡ : ﺏ ﺍﻳﻪ ؟؟ﺑﺘﺤﺒﻴﻪ ؟؟
ﺻﻔﻴﻪ : ﺍﻳﻪ ؟ ﻫﻮ ﺍﻧﺖ ﺑﺲ ﺍﻟﻠﻲ ﻣﺴﻤﻮﺣﻠﻚ ﺗﺤﺐ ؟؟
ﺣﺎﺯﻡ : ﻭﻳﻄﻠﻊ ﻣﻴﻦ ﺑﻘﻲ ﺩﻩ ؟؟
ﺻﻔﻴﻪ : ﻫﻮ ﻫﻴﺠﻲ ﻫﻨﺎ ﺑﻜﺮﻩ ﻳﺘﻐﺪﻱ ﻣﻌﺎﻳﺎ ﻟﻮ ﺗﺤﺐ ﺗﺘﻌﺮﻑ ﻋﻠﻴﻪ ﺍﺳﻤﻪ ﺣﺴﺎﻡ ﻋﺒﺪﺍﻟﻠﻪ
ﺣﺎﺯﻡ : ﺍﻧﺘﻲ ﺑﺘﺘﻜﻠﻤﻲ ﺑﺠﺪ ﺑﻘﻲ ؟؟
ﺻﻔﻴﻪ : ﺗﺼﺒﺢ ﻋﻠﻲ ﺧﻴﺮ ﻳﺎ ﺣﺎﺯﻡ ﺑﻜﺮﻩ ﺍﻟﺴﺎﻋﻪ ٢ ﻫﻴﻜﻮﻥ ﻣﻮﺟﻮﺩ ﻟﻮ ﺣﺎﺑﺐ ﺗﺘﻌﺮﻑ ﻋﻠﻴﻪ ﻭﺍﺧﺮ ﺍﻟﻨﻬﺎﺭ ﻫﻌﻤﻞ ﺣﻔﻠﻪ ﺻﻐﻴﺮﻩ ﻋﻠﻲ ﺍﻟﻀﻴﻖ ﻗﻮﻱ ﻫﻨﻜﺘﺐ ﻓﻴﻬﺎ ﺍﻟﻜﺘﺎﺏ
ﺣﺎﺯﻡ : ﺗﻜﺘﺒﻲ ﺍﻟﻜﺘﺎﺏ ؟؟ ﻣﺶ ﻟﻤﺎ ﺍﺷﻮﻓﻪ ﺍﻻﻭﻝ ﻭﺍﺷﻮﻓﻪ ﻣﻨﺎﺳﺐ ﻭﻻ ﻷ ؟؟
ﺻﻔﻴﻪ : ﺍﻧﺎ ﺷﻴﻔﺎﻩ ﻣﻨﺎﺳﺐ ﻭﻣﻦ ﻋﻴﻠﻪ ﻣﺤﺘﺮﻣﻪ ﻭﻟﻪ ﻭﺿﻌﻪ ﺍﻧﺎ ﻣﺶ ﻫﺨﺘﺎﺭ ﺣﺪ ﻣﺶ ﻋﻠﻲ ﺍﻟﻤﺴﺘﻮﻱ
ﻋﺮﻑ ﺣﺎﺯﻡ ﺍﻧﻬﺎ ﺑﺘﻠﻤﺢ ﻋﻠﻴﻪ ﻭﻋﻠﻲ ﺍﺧﺘﻴﺎﺭﻩ ﻟﺸﻮﻕ
ﺣﺎﺯﻡ : ﺍﻧﺘﻲ ﺑﺠﺪ ﻋﺎﻳﺰﻩ ﺗﺘﺠﻮﺯﻱ ؟؟
ﺻﻔﻴﻪ : ﺍﻩ ﻫﺘﺠﻮﺯ ﻳﺎ ﺣﺎﺯﻡ ﺗﺼﺒﺤﻮﺍ ﻋﻠﻲ ﺧﻴﺮ
ﺣﺎﺯﻡ ﻓﻀﻞ ﻛﺘﻴﺮ ﻭﺍﻗﻒ ﻣﻜﺎﻧﻪ ﻟﺤﺪ ﻣﺎ ﺷﺎﻫﻨﺪﺍ ﺷﺪﺗﻪ ﻭﻃﻠﻌﻮﺍ ﺍﻭﺿﺘﻬﻢ ﻭﻓﻀﻠﻮﺍ ﺳﺎﻛﺘﻴﻦ
ﻣﻌﻘﻮﻟﻪ ﺍﻣﻪ ﻫﺘﺘﺠﻮﺯ ﺑﻌﺪ ﺍﺑﻮﻩ ﺍﻟﻠﻪ ﻳﺮﺣﻤﻪ ؟؟ﻓﻲ ﺍﻟﺴﻦ ﺩﻩ ﻋﺎﻳﺰﻩ ﺗﺘﺠﻮﺯ ﺗﺎﻧﻲ ؟؟ ﻃﻴﺐ ﻟﻴﻪ ؟؟
ﺗﺎﻧﻲ ﻳﻮﻡ ﺣﺎﺯﻡ ﺭﺍﺡ ﺧﺮﺝ ﺭﻫﻒ ﻣﻦ ﺍﻟﻤﺴﺘﺸﻔﻲ ﻭﻣﺸﻲ ﻋﻠﻲ ﻃﻮﻝ ﻋﻠﺸﺎﻥ ﻳﻠﺤﻖ ﻋﺮﻳﺲ ﺍﻣﻪ
ﺷﻮﻕ : ﺍﻗﻌﺪ ﺷﻮﻳﻪ ﻣﺎﺷﻲ ﻋﻠﻲ ﻃﻮﻝ ﻟﻴﻪ ؟
ﺣﺎﺯﻡ : ﻣﻌﻠﺶ ﻣﺸﻐﻮﻝ ﺷﻮﻳﻪ
ﺷﻮﻕ : ﺣﺎﺯﻡ ﺍﻧﺎ ﺍﺳﻔﻪ ﺍﻣﺒﺎﺭﺡ
ﻗﺎﻃﻌﻬﺎ : ﺍﻣﺒﺎﺭﺡ ﻣﺤﺼﻠﺶ ﺍﻱ ﺣﺎﺟﻪ ﻓﻴﻪ ﺗﻤﺎﻡ ﻭﻻ ﺣﺼﻞ ﻭﻻ ﻫﻴﺤﺼﻞ ﻭﺍﻧﺎ ﻭﻣﺮﺍﺗﻲ ﺍﻟﺤﻤﺪ ﻟﻠﻪ ﻛﻮﻳﺴﻴﻦ ﺑﺲ ﺍﻧﺎ ﻓﻌﻼ ﻣﺸﻐﻮﻝ ﻭﻋﻨﺪﻱ ﺿﻴﻮﻑ ﻓﻲ ﺍﻟﺒﻴﺖ ﺍﻭ ﺗﺤﺪﻳﺪﺍ ﻋﻨﺪﻱ ﻋﺮﻳﺲ ﻓﻲ ﺍﻟﺒﻴﺖ
ﺷﻮﻕ : ﻋﺮﻳﺲ ؟؟ﻋﻨﺪﻙ ﻣﻴﻦ ﻫﻴﺘﺠﻮﺯ ﺍﺻﻼ ؟
ﺣﺎﺯﻡ : ﺍﻣﻲ ... ﺍﻣﻲ ﻋﺎﻳﺰﻩ ﺗﺘﺠﻮﺯ ﻭﺟﺎﻳﺒﻪ ﻋﺮﻳﺲ ﻋﺮﻓﺘﻲ ﺑﻘﻲ ﺍﻧﺎ ﻟﻴﻪ ﻣﺴﺘﻌﺠﻞ ﺑﻌﺪ ﺍﺫﻧﻚ ﺍﺷﻮﻓﻜﻢ ﺑﻌﺪﻳﻦ ﻟﻮ ﻓﻲ ﺣﺎﺟﻪ ﺍﺑﻘﻲ ﻛﻠﻤﻴﻨﻲ ﺳﻼﻡ
ﻧﺰﻝ ﻭﺭﺍﺡ ﺑﻴﺘﻪ ﻭﻫﻨﺎﻙ ﻗﺎﺑﻞ ﺣﺴﺎﻡ ﺍﻟﻠﻲ ﻣﻦ ﺍﻭﻝ ﻭﻫﻠﻪ ﻣﺎ ﺍﺭﺗﺤﻠﻮﺵ ﻧﻬﺎﺋﻲ ﻭﻛﺎﻥ ﻏﺪﻱ ﻣﻐﻠﻒ ﺑﺎﻟﺒﺮﻭﺩ
ﺣﺎﻭﻟﺖ ﺍﻣﻪ ﺗﻠﻄﻒ ﺍﻟﺠﻮ ﺑﺲ ﻣﻌﺮﻓﺘﺶ ﻧﻬﺎﺋﻲ ﻟﺤﺪ ﻣﺎ ﻗﺎﻡ ﻣﺸﻲ ﻋﺮﻳﺴﻬﺎ
ﺻﻔﻴﻪ ﺑﻬﺠﻮﻡ : ﺗﻘﺼﺪ ﺍﻳﻪ ﻫﺎﻩ ؟ ﻋﺎﻳﺰ ﺗﻀﺎﻳﻘﻪ ﺑﺒﺮﻭﺩﻙ ﺩﻩ ؟ ﻋﺎﻳﺰﺗﻄﻔﺸﻪ؟ ﻟﻌﻠﻤﻚ ﺑﻘﻲ ﺍﺣﻨﺎ ﻫﻨﺘﺠﻮﺯ ﺑﻐﺾ ﺍﻟﻨﻈﺮ ﺍﻧﺖ ﻭﺍﻓﻘﺖ ﺍﻭ ﻷ
ﺣﺎﺯﻡ : ﻭﻟﻤﺎ ﻛﺪﻩ ﻛﺪﻩ ﻫﺘﺘﺠﻮﺯﻳﻪ ﺑﺘﻌﺮﻓﻴﻨﻲ ﻋﻠﻴﻪ ﻟﻴﻪ ؟
ﺻﻔﻴﻪ : ﻗﻮﻟﺖ ﻣﺶ ﻫﺘﻜﻮﻥ ﺍﻧﺎﻧﻲ ﻭﻫﺘﺘﻤﻨﻲ ﺍﻟﺴﻌﺎﺩﻩ ﻻﻣﻚ ﺑﻌﺪ ﻋﻤﺮﻱ ﺍﻟﻠﻲ ﺿﻴﻌﺘﻪ ﻓﻲ ﺗﺮﺑﻴﺘﻚ
ﻫﻨﺎ ﺣﺎﺯﻡ ﺍﻟﻠﻲ ﺍﻧﻔﺠﺮ : ﻋﻤﺮﻙ ﺍﻟﻠﻲ ﺍﻳﻪ ؟؟ ﺑﺘﻬﺮﺟﻲ ﺻﺢ ؟ ﺩﻩ ﺍﻧﺘﻲ ﻣﻀﻴﻌﺘﻴﺶ ﻟﺤﻈﻪ ﻣﻌﺎﻳﺎ ... ﺍﻧﺘﻲ ﻛﻨﺘﻲ ﺑﺘﺴﻴﺒﻨﻲ ﻣﻦ ﻭﺍﻧﺎ ﻋﻴﻞ ﺻﻐﻴﺮ ﻟﻠﺨﺪﺍﻣﻴﻦ .. ﺍﻧﺎ ﻋﻼﻗﺘﻲ ﺑﺎﻟﺨﺪﺍﻣﻴﻦ ﻛﻠﻬﻢ ﺍﺣﺴﻦ ﻣﻨﻚ ﻣﻠﻴﻮﻥ ﻣﺮﻩ .. ﺍﻧﺎ ﻓﻲ ﻋﺰ ﻣﺎ ﻛﻨﺖ ﺗﻌﺒﺎﻥ ﻭﺑﺘﻨﻘﻞ ﻣﻦ ﻋﻤﻠﻴﻪ ﻟﻠﺘﺎﻧﻴﻪ ﻛﻨﺖ ﺑﺘﺘﻨﻘﻠﻲ ﻣﻦ ﺣﻔﻠﻪ ﻟﻠﺘﺎﻧﻴﻪ .. ﺣﺘﻲ ﻟﻤﺎ ﺳﺎﻓﺮﺕ ﺳﺎﻓﺮﺕ ﻟﻮﺣﺪﻱ .. ﻋﻤﺮ ﺍﻳﻪ ﺑﻘﻲ ﺍﻟﻠﻲ ﺟﺎﻳﻪ ﺗﻘﻮﻟﻲ ﺿﻴﻌﺘﻴﻪ ﻋﻠﻴﺎ ؟؟
ﺻﻔﻴﻪ : ﺑﺲ ﻣﺎ ﺟﺒﺘﻠﻜﺶ ﺟﻮﺯ ﺍﻡ
ﺣﺎﺯﻡ : ﻻ ﺗﺸﻜﺮﻱ ﻻ ﺑﺠﺪ ﺗﻌﺒﺘﻲ ﻗﻮﻱ
ﺷﺎﻫﻨﺪﺍ : ﺣﺎﺯﻡ ﺍﻫﺪﻱ ﺍﻟﻜﻼﻡ ﻣﺶ ﻛﺪﻩ
ﺻﻔﻴﻪ : ﺍﻧﺖ ﺍﻋﺘﺮﺍﺿﻚ ﻋﻠﻴﻪ ﻓﻲ ﺍﻳﻪ ؟
ﺣﺎﺯﻡ : ﺍﻭﻻ ﺻﻐﻴﺮ ﻋﻨﻚ ﺩﻩ ﺷﻜﻠﻪ ﻓﻲ ﺍﻭﻝ ﺍﻻﺭﺑﻌﻴﻦ
ﺻﻔﻴﻪ : ﻭﻫﻮ ﺍﻧﺎ ﻋﺠﻮﺯﻩ ﺑﻘﻲ ﻭﻻ ﺍﻳﻪ ﺩﻩ ﻳﺪﻭﺏ ﺳﻨﻪ ﻭﻻ ﺣﺎﺟﻪ ﻓﺮﻕ
ﺣﺎﺯﻡ : ﺍﻣﻲ !! ﺍﻧﺘﻲ ﻋﺪﻳﺘﻲ ﺍﻟﺨﻤﺴﻴﻦ ﺑﺪﺭﻱ
ﺻﻔﻴﻪ : ﺷﻜﻠﻲ ﻣﺎ ﻳﻌﺪﻳﺶ ﺍﻻﺭﺑﻌﻴﻦ ﻭﺑﻌﺪﻳﻦ ﻓﺮﻕ ﺍﻟﺴﻦ ﻣﺎ ﻳﺨﺼﻜﺶ
ﺣﺎﺯﻡ : ﻃﻴﺐ ﻣﺎﺷﻲ .. ﺑﺎﺭﺩ ﻭﺩﻣﻪ ﺗﻘﻴﻞ ﻭﺷﻜﻠﻪ ﺍﻧﺘﻬﺎﺯﻱ ﻭﺍﻋﺘﻘﺪ ﺍﻧﻪ ﻋﺎﻳﺰ ﻓﻠﻮﺳﻚ ﻣﺶ ﻋﺎﻳﺰﻙ ﺍﻧﺘﻲ
ﺻﻔﻴﻪ : ﺍﻧﺎ ﻏﻠﻄﺎﻧﻪ ﺍﻧﻲ ﺑﻜﻠﻤﻚ ﺍﺻﻼ ... ﻋﻠﻲ ﺍﺳﺎﺱ ﺍﻥ ﺍﻧﺎ ﺳﺖ ﻛﺮﻛﻮﺑﻪ ﻭﻭﺣﺸﻪ ﻓﻠﻮ ﺣﺪ ﺑﺼﻠﻲ ﻳﺒﻘﻲ ﻋﺎﻳﺰ ﻓﻠﻮﺳﻲ !! ﺍﻧﺖ ﻭﺣﺶ ﻛﺪﻩ ﻟﻴﻪ ؟؟
ﺣﺎﺯﻡ : ﺍﻧﺎ ﻭﺣﺶ !!!! ﻃﻴﺐ ﺑﻜﺮﻩ ﺍﺟﻴﺐ ﻟﺤﻀﺮﺗﻚ ﺗﺎﺭﻳﺦ ﺣﻴﺎﺗﻪ
ﺻﻔﻴﻪ : ﺍﻧﺖ ﻣﺎﻟﻜﺶ ﺩﻋﻮﻩ ﺑﻴﻪ ﻧﻬﺎﺋﻲ ﻣﻔﻬﻮﻡ ؟
ﺳﺎﺑﺘﻬﻢ ﻭﺧﺮﺟﺖ ﻭﻫﻤﺎ ﻓﻀﻠﻮﺍ ﻣﻜﺎﻧﻬﻢ ﻳﺒﺼﻮﺍ ﻟﺒﻌﺾ
ﺣﺎﺯﻡ : ﺑﺘﺒﺼﻴﻠﻲ ﻛﺪﻩ ﻟﻴﻪ ؟
ﺷﺎﻫﻨﺪﺍ : ﺍﻧﺖ ﻣﺘﺨﻴﻞ ﺷﻜﻠﻨﺎ ﻗﺪﺍﻡ ﺍﻟﻨﺎﺱ ﺍﻳﻪ ﺍﻥ ﺍﻣﻚ ﺗﺘﺠﻮﺯ ﻓﻲ ﺍﻟﺴﻦ ﺩﻩ ﻭﺣﺪ ﺍﺻﻐﺮ ﻣﻨﻬﺎ ؟؟
ﺣﺎﺯﻡ : ﻭﺍﻟﻨﺒﻲ ﻳﺎ ﺷﺎﻫﻨﺪﺍ ﻣﺶ ﻧﻘﺼﺎﻛﻲ ﺍﺻﻼ ﺍﻧﺎ ﺧﺎﺭﺝ ﺷﻮﻳﻪ ﺍﺷﻢ ﻫﻮﺍ ﻣﺨﻨﻮﻕ
ﺷﺎﻫﻨﺪﺍ : ﻃﻴﺐ ﻣﺎ ﺗﺘﺄﺧﺮﺵ
ﺧﺮﺝ ﻳﻠﻒ ﻛﺘﻴﺮ ﻭﺷﻮﻳﻪ ﻭﺍﺗﺼﻠﺖ ﺑﻴﻪ ﺭﻫﻒ ﻭﺍﺗﺮﺟﺘﻪ ﻳﺠﻴﺒﻠﻬﺎ ﺷﻮﻛﻮﻻﺗﻪ ﻭﻳﺠﻴﺒﻬﺎ ﻭﻫﻮ ﻣﺎ ﻗﺪﺭﺵ ﻳﻘﻮﻟﻬﺎ ﻷ
ﺭﺍﺣﻠﻬﻢ ﻭﻛﺎﻥ ﺑﺎﻳﻦ ﻋﻠﻴﻪ ﺍﻟﻀﻴﻖ ﻗﻮﻱ
ﺷﻮﻕ : ﻣﺎﻟﻚ ؟؟
ﺣﺎﺯﻡ : ﻣﻔﻴﺶ
ﺷﻮﻕ : ﺍﺧﺒﺎﺭ ﺍﻟﻌﺮﻳﺲ ﺍﻳﻪ ؟؟
ﻫﻨﺎ ﺣﺎﺯﻡ ﺍﻧﻔﺠﺮ ﻭﻗﺎﻝ ﻛﻞ ﺍﻟﻠﻲ ﺟﻮﺍﻩ .. ﻓﻀﻞ ﻳﺘﻜﻠﻢ ﻛﺘﻴﺮ ﻗﻮﻱ ﻭﻫﻴﺎ ﺳﻤﻌﺎﻩ ﻭﺳﺎﻛﺘﻪ ﻟﺤﺪ ﻣﺎ ﺧﻠﺺ ﻛﻼﻣﻪ
ﺣﺎﺯﻡ : ﺑﺘﺒﺼﻴﻠﻲ ﻛﺪﻩ ﻟﻴﻪ ﺍﻧﺘﻲ ﻛﻤﺎﻥ ،؟؟
ﺷﻮﻕ : ﻻﻧﻚ ﺑﺘﻔﻜﺮ ﻛﺎﺑﻦ ﻣﺶ ﻋﺎﻳﺰ ﺍﻣﻪ ﺗﺘﺠﻮﺯ ﻣﺶ ﺑﻌﻘﻼﻧﻴﻪ
ﺣﺎﺯﻡ : ﺍﻧﺎ ﻏﻠﻄﺎﻥ ﻓﻲ ﺍﻟﻠﻲ ﻗﻮﻟﺘﻪ ؟
ﺷﻮﻕ : ﺍﻭﻻ ﻓﺮﻕ ﺍﻟﺴﻦ ﻣﺶ ﺑﺎﻳﻦ ﻻﻥ ﻣﺎﻣﺘﻚ ﻣﺎﺷﺎﺀ ﺍﻟﻠﻪ ﺷﻜﻠﻬﺎ ﺻﻐﻴﺮ ﺍﻧﺖ ﻋﻠﺸﺎﻥ ﻋﺎﺭﻑ ﻋﻤﺮﻫﺎ ﻟﻜﻦ ﻏﻴﺮﻙ ﻣﺶ ﻫﻴﻌﺮﻑ ﺍﻣﺎ ﺑﻘﻲ ﺩﻣﻪ ﺗﻘﻴﻞ ﻭﺑﺎﺭﺩ ﻓﺪﻩ ﺗﺠﻨﻲ ﻣﻨﻚ ﺍﻭ ﻋﻠﺸﺎﻥ ﺍﻧﺖ ﻣﺶ ﻃﺎﻳﻘﻪ
ﺣﺎﺯﻡ : ﻳﻌﻨﻲ ﺍﻧﺎ ﺑﺘﺒﻠﻲ ﻋﻠﻴﻪ ﻣﺜﻼ ؟؟
ﺷﻮﻕ : ﺍﻟﺮﺍﺟﻞ ﻣﺶ ﺑﻴﺘﺤﻜﻢ ﻋﻠﻴﻪ ﻛﺪﻩ .... ﺣﺎﺯﻡ ﺭﻓﻀﻚ ﻟﻠﻔﻜﺮﻩ ﻧﻔﺴﻬﺎ ﻣﺶ ﻟﻠﺸﺨﺺ
ﺣﺎﺯﻡ : ﺍﻟﻤﻔﺮﻭﺽ ﺍﻋﻤﻞ ﺍﻳﻪ ؟ﺍﺭﺳﻢ ﺍﺑﺘﺴﺎﻣﻪ ﻋﻠﻲ ﻭﺷﻲ ﻭﺍﺑﺎﺭﻛﻠﻬﺎ ﻭﺍﻗﻮﻟﻬﺎ ﺑﺎﻟﺮﻓﺎﺀ ﻭﺍﻟﺒﻨﻴﻦ ؟؟
ﺷﻮﻕ : ﻻ ﻳﺎ ﺣﺒﻴﺒﻲ ﺗﻌﻤﻞ ﺯﻱ ﻣﺎ ﻗﻮﻟﺖ ... ﺗﺠﻤﻊ ﻣﻌﻠﻮﻣﺎﺕ ﻛﻔﺎﻳﻪ ﻋﻨﻪ ﺑﺤﻴﺚ ﺗﺘﻜﻠﻢ ﻭﺍﻧﺖ ﻋﺎﺭﻑ ﺑﺘﻘﻮﻝ ﺍﻳﻪ ﻣﺶ ﺗﻘﻮﻝ ﺑﺎﺭﺩ ﻭﺩﻣﻪ ﺗﻘﻴﻞ !!
ﺣﺎﺯﻡ : ﺑﻜﺮﻩ ﻳﺒﻘﻲ ﻋﻨﺪﻱ ﺗﺎﺭﻳﺦ ﺣﻴﺎﺗﻪ ﻭﺍﻣﺎ ﻧﺸﻮﻑ ﺑﺲ ﺑﺮﺿﻪ ﺍﻧﺎ ﻣﺶ ﻃﺎﻳﻘﻪ
ﺷﻮﻕ : ﻣﻌﻠﺶ ﺍﺳﺘﺤﻤﻞ .. ﺣﻘﻬﺎ ﻳﺎ ﺣﺎﺯﻡ ﺣﻘﻬﺎ ... ﻟﻴﻪ ﺗﻌﻴﺶ ﻓﻲ ﻭﺣﺪﻩ ﻃﺎﻟﻤﺎ ﻣﻤﻜﻦ ﺣﺪ ﻳﺤﺒﻬﺎ ﻭﻳﺮﺍﻋﻴﻬﺎ ؟؟
ﺣﺎﺯﻡ ﺍﻗﺘﻨﻊ ﺑﻜﻞ ﺣﺮﻑ ﻗﺎﻟﺘﻪ ﺷﻮﻕ ﻭﻓﻌﻼ ﻛﻠﻒ ﻋﻠﻲ ﻳﺠﻴﺒﻠﻪ ﺗﺎﺭﻳﺦ ﺣﻴﺎﻩ ﺣﺴﺎﻡ ﻭﻓﻌﻼ ﺟﺎﺑﻬﻮﻟﻪ
ﻋﻠﻲ : ﻛﻞ ﺍﻟﻤﻌﻠﻮﻣﺎﺕ ﺍﻟﻠﻲ ﻃﻠﺒﺘﻬﺎ ﻣﻮﺟﻮﺩﻩ ﻭﺍﻭﻋﻲ ﺗﻘﻮﻟﻲ ﺍﺭﻓﺪﻩ
ﺣﺎﺯﻡ ﺍﺑﺘﺴﻢ : ﻻ ﻳﺎﺭﻳﺖ ﺍﻗﺪﺭ ﺍﻗﻮﻟﻚ ﺍﻗﺘﻠﻪ ﻣﺶ ﺍﺭﻓﺪﻩ
ﻋﻠﻲ : ﺍﻧﺎ ﻋﺎﺭﻑ ﺍﺧﺮﺕ ﺷﻐﻠﻲ ﻣﻌﺎﻙ ﺳﻮﺩﺍ
ﺣﺎﺯﻡ : ﺍﻟﻤﻬﻢ ﺍﻳﻪ ﻣﺨﻠﺺ ﺍﻟﻜﻼﻡ ﺩﻩ ؟
ﻋﻠﻲ : ﺷﻮﻑ ﻳﺎ ﺳﻴﺪﻱ ... ﻋﻨﺪﻩ ﺗﻘﺮﻳﺒﺎ ٤٣ ﺳﻨﻪ ﻋﻨﺪﻩ ﺷﺮﻛﻪ ﺳﻴﺎﺣﻪ ﻓﺎﺷﻠﻪ ﺟﺪﺍ ﻋﺎﻳﺶ ﺗﻘﺮﻳﺒﺎ ﻋﻠﻲ ﺍﻟﺴﺘﺎﺕ
ﺣﺎﺯﻡ : ﻳﻌﻨﻲ ﺍﻳﻪ ﻋﺎﻳﺶ ﻋﻠﻲ ﺍﻟﺴﺘﺎﺕ ؟؟
ﻋﻠﻲ : ﻳﻌﻨﻲ ﻛﻞ ﻣﺎ ﺑﻴﻘﻊ ﻭﺷﺮﻛﺘﻪ ﺗﺨﺴﺮ ﺑﻴﺪﻭﺭ ﻋﻠﻲ ﻭﺍﺣﺪﻩ ﻣﺘﺮﻳﺸﻪ ﻛﺒﻴﺮﻩ ﺻﻐﻴﺮﻩ ﻣﺶ ﺗﻔﺮﻕ ﻳﺘﺠﻮﺯﻫﺎ ﺷﻮﻳﻪ ﻭﻳﻨﻔﻀﻬﺎ ﻭﻳﻘﻮﻟﻬﺎ ﺍﻣﻚ ﻓﻲ ﺍﻟﻌﺸﻪ ﻭﻻ ﻃﺎﺭﺕ ﺩﻩ ﻧﻈﺎﻣﻪ
ﺣﺎﺯﻡ : ﺍﺍﺍﺍﻫﻪ ﺍﻧﺎ ﻛﻨﺖ ﻋﺎﺭﻑ ...
ﻋﻠﻲ : ﺍﻧﺖ ﻋﺎﻳﺰ ﺍﻳﻪ ﻣﻨﻪ ؟؟
ﺣﺎﺯﻡ : ﺍﻧﺎ ﻋﻦ ﻧﻔﺴﻲ ﻣﺶ ﻋﺎﻳﺰ
ﻋﻠﻲ : ﺍﻣﺎﻝ ﺍﻳﻪ ؟ ﺗﻌﺮﻓﻪ ﻣﻨﻴﻦ ؟
ﺣﺎﺯﻡ : ﺩﻩ ﻳﺎ ﺳﻴﺪﻱ ﺍﻣﻲ ﻋﺎﻳﺰﻩ ﺗﺘﺠﻮﺯﻩ
ﻋﻠﻲ : ﺍﻳﻪ ؟؟ ﺍﺗﺠﻨﻨﺖ ؟؟ ﺳﻮﺭﻱ ﻳﺎ ﺣﺎﺯﻡ ﻣﺶ ﺍﻗﺼﺪ ﺑﺲ ﻫﻮ
ﺣﺎﺯﻡ : ﻋﺎﺭﻑ ﻫﻮ ﻋﺎﻳﺰ ﻓﻠﻮﺳﻬﺎ
ﻋﻠﻲ : ﻃﻴﺐ ﺍﻧﺖ ﻻﺯﻡ ﺗﻤﻨﻊ ﺍﻟﺠﻮﺍﺯﻩ ﺩﻱ
ﺣﺎﺯﻡ : ﺍﻣﻲ ﺭﺍﻓﻀﻪ ﺗﻤﺎﻣﺎ ﻣﺠﺮﺩ ﺍﻟﻨﻘﺎﺵ ﺣﺘﻲ
ﻋﻠﻲ : ﻫﺘﻌﻤﻞ ﺍﻳﻪ ؟؟
ﺣﺎﺯﻡ : ﻃﻴﺐ ﺑﺺ ﻳﺎ ﻋﻠﻲ ﺍﻧﺎ ﻋﺎﻳﺰﻙ ﺗﺠﻴﺒﻠﻲ ﺍﻟﻤﺤﺎﻣﻲ ﻭﺑﺴﺮﻋﻪ
ﻋﻠﻲ : ﺍﻭﻙ
ﻭﻗﺎﺑﻞ ﺣﺎﺯﻡ ﺍﻟﻤﺤﺎﻣﻲ ﻭﻗﻌﺪ ﻣﻌﺎﻩ ﻗﻌﺪﻩ ﻃﻮﻳﻠﻪ
ﺣﺎﺯﻡ : ﻳﻌﻨﻲ ﺍﻳﻪ ﺑﻘﻲ ﻣﺶ ﻫﻴﻨﻔﻊ ؟
ﺍﻟﻤﺤﺎﻣﻲ : ﻳﻌﻨﻲ ﻣﺶ ﻫﻴﻨﻔﻊ ﺗﺎﺧﺪ ﺣﺎﺟﻪ ﺑﺘﺎﻋﺖ ﻭﺍﻟﺪﺗﻚ ﺍﻻ ﺑﻤﻮﺍﻓﻘﺘﻬﺎ ﺍﻭ ﺍﻧﻚ ﺗﺤﺠﺮ ﻋﻠﻴﻬﺎ
ﺣﺎﺯﻡ : ﻭﺍﻟﻤﻔﺮﻭﺽ ﺍﻋﻤﻞ ﺍﻳﻪ ؟
ﺍﻟﻤﺤﺎﻣﻲ : ﻣﺶ ﺑﺎﻳﺪﻙ ﺣﺎﺟﻪ ﻏﻴﺮ ﺍﻧﻚ ﺗﻠﻐﻲ ﺍﻟﺘﻮﻛﻴﻞ ﺍﻟﻠﻲ ﻛﻨﺖ ﻋﺎﻣﻠﻬﻮﻟﻬﺎ ﻭﺑﺲ
ﺣﺎﺯﻡ : ﻭﻟﻮ ﺍﺧﺪ ﻧﺼﻴﺒﻬﺎ ﻓﻲ ﺍﻟﺸﺮﻛﻪ ﻭﻧﻄﻠﻲ ﻫﻨﺎ ﺍﻋﻤﻞ ﺍﻳﻪ ﺳﺎﻋﺘﻬﺎ ؟
ﺍﻟﻤﺤﺎﻣﻲ : ﻧﺼﻴﺒﻚ ﺍﻛﺒﺮ ﻓﺒﺎﻟﺘﺎﻟﻲ ﻣﺶ ﻫﻴﻘﺪﺭ ﻳﺘﺪﺧﻞ ﻛﺘﻴﺮ ﻭﺭﺑﻨﺎ ﻳﺴﺘﺮﻫﺎ ﺍﻱ ﺧﺪﻣﻪ ﺗﺎﻧﻴﻪ ؟؟
ﺣﺎﺯﻡ : ﺍﻩ ... ﻋﻠﻲ ﺍﺩﻳﻠﻪ ﺑﻴﺎﻧﺎﺕ ﺷﻮﻕ ﻭﺭﻫﻒ .. ﻋﺎﻳﺰﻙ ﺗﻔﺘﺢ ﺭﺻﻴﺪ ﻓﻲ ﺍﻟﺒﻨﻚ ﺑﺎﺳﻢ ﺭﻫﻒ ﺭﺗﻜﻮﻥ ﻭﺍﻟﺪﺗﻬﺎ ﺷﻮﻕ ﻭﺻﻴﻪ ﻋﻠﻴﻪ ... ﻋﻠﻲ ﻫﻴﺪﻳﻚ ﺍﻟﺒﻴﺎﻧﺎﺕ ﻛﺎﻣﻠﻪ ﻭﺑﻌﺪ ﻣﺎ ﺗﺨﻠﺺ ﺗﺒﻠﻐﻨﻲ ﺑﺤﻴﺚ ﺍﺣﻄﻠﻬﺎ ﻣﺒﻠﻎ ﻣﺤﺘﺮﻡ ﻓﻲ ﺣﺴﺎﺑﻬﺎ ﺍﻭﻙ
ﺍﻟﻤﺤﺎﻣﻲ : ﺣﺎﺿﺮ ﻳﺎ ﺍﻓﻨﺪﻡ ﺑﻌﺪ ﺍﺫﻧﻜﻢ
ﺣﺎﺯﻡ : ﺧﻠﺺ ﺍﻭﺭﺍﻕ ﻭﺍﻟﺪﺗﻲ ﺍﻟﻨﻬﺎﺭﺩﻩ ﺗﻤﺎﻡ ؟
ﺍﻟﻤﺤﺎﻣﻲ : ﺗﻤﺎﻡ
ﺣﺎﺯﻡ ﺭﻭﺡ ﻭﻭﺍﺟﻪ ﻣﺎﻣﺘﻪ ﺍﻟﻠﻲ ﻛﺎﻧﺖ ﺑﺘﺠﻬﺰ ﻟﻔﺮﺣﻬﺎ
ﺻﻔﻴﻪ : ﺧﻠﺼﺖ ﺍﺗﻬﺎﻣﺎﺗﻚ ؟؟ ﻫﻮ ﻗﺎﻟﻲ ﻛﻞ ﺍﻟﻜﻼﻡ ﺩﻩ ؟؟ ﻭﻗﺎﻟﻲ ﻣﺎﺿﻴﻪ ﻛﻠﻪ ، .. ﻭﻋﺎﻳﺰ ﻳﺒﺪﺃ ﻣﻦ ﺟﺪﻳﺪ ﻭﺍﻧﺎ ﺑﺤﺒﻪ ﻭﻫﺒﺪﺃ ﻣﻌﺎﻩ
ﺣﺎﺯﻡ : ﺗﺒﺪﺃﻱ ﺍﻳﻪ ؟؟ ﺍﻧﺘﻲ ﻓﺎﻛﺮﻩ ﻧﻔﺴﻚ ﻋﻴﻠﻪ ؟؟
ﺻﻔﻴﻪ : ﺣﺎﺯﻡ !! ﺍﻧﺘﻲ ﺑﺘﺘﺨﻄﻲ ﺣﺪﻭﺩﻙ ... ﻋﻴﻠﻪ ﻭﻻ ﻣﺶ ﻋﻴﻠﻪ ... ﺍﻧﺖ ﻣﺶ ﻗﻠﺖ ﺍﻟﻠﻲ ﻋﻨﺪﻙ ؟ ﺍﺗﻔﻀﻞ ﺑﻘﻲ ... ﻋﺎﻳﺰ ﺗﻜﻮﻥ ﻣﻮﺟﻮﺩ ﻭﻗﺖ ﻛﺘﺐ ﺍﻟﻜﺘﺎﺏ ﺍﻫﻼ ﻭﺳﻬﻼ ﻣﺶ ﻋﺎﻳﺰ ﺍﻧﺖ ﺣﺮ ﺍﺗﻔﻀﻞ ﺑﻘﻲ
ﺳﺎﺑﻬﺎ ﻭﺧﺮﺝ ﻭﻗﺎﺑﻠﺘﻪ ﻣﺮﺍﺗﻪ
ﺷﺎﻫﻨﺪﺍ : ﺭﺍﻳﺢ ﻓﻴﻦ ﺍﺳﺘﻨﻲ ﻫﻨﺎ
ﺣﺎﺯﻡ : ﺧﺎﺭﺝ . ﺍﻧﺘﻲ ﻻﺑﺴﻪ ﻛﺪﻩ ﻭ ﺭﺍﻳﺤﻪ ﻓﻴﻦ ؟
ﺷﺎﻫﻨﺪﺍ : ﺍﻧﺎ ﺭﺍﻳﺤﻪ ﻋﻨﺪ ﺑﺎﺑﺎ ﺍﺳﺘﺤﺎﻟﻪ ﺍﺣﻀﺮ ﺍﻟﻤﻬﺰﻟﻪ ﺩﻱ ﺑﻌﺪ ﺍﺫﻧﻚ
ﺳﺎﺑﺖ ﺣﺎﺯﻡ ﻭﻣﺸﻴﺖ ﻭﻫﻮ ﻛﻤﺎﻥ ﺳﺎﺏ ﺍﻟﺒﻴﺖ ﻭﺭﺍﺡ ﻟﻤﻠﺠﺆﻩ ﺍﻻﻣﻦ ﻋﻨﺪ ﺷﻮﻕ
ﺷﻮﻕ : ﺍﻧﺖ ﺑﺘﻌﻤﻞ ﺍﻳﻪ ﻫﻨﺎ ؟ ﻣﺶ ﺍﻟﻨﻬﺎﺭﺩﻩ ﻓﺮﺡ ﻣﺎﻣﺘﻚ ،؟
ﺣﺎﺯﻡ : ﺍﻟﻤﻔﺮﻭﺽ ﺍﺭﻭﺡ ﺍﺭﻗﺺ ﻳﻌﻨﻲ ﻭﻻ ﺍﻳﻪ ؟؟
ﺷﻮﻕ : ﺍﻧﺖ ﻋﻤﻠﺖ ﺍﻳﻪ ﺍﻻﻭﻝ ﻓﻲ ﺍﻟﻤﻌﻠﻮﻣﺎﺕ ﺍﻟﻠﻲ . ﻃﻠﺒﺘﻬﺎ ﻋﻨﻪ ؟
ﺣﻜﺎﻟﻬﺎ ﻛﻞ ﺍﻟﻠﻲ ﺣﺼﻞ
ﺷﻮﻕ : ﻭﺑﻌﺪ ﻛﻞ ﺩﻩ ﻋﺎﻳﺰ ﺗﺴﻴﺒﻬﺎ ﻟﻮﺣﺪﻫﺎ ﻭﺟﺎﻱ ﻫﻨﺎ ؟
ﺣﺎﺯﻡ : ﻭﺍﻟﻤﻔﺮﻭﺽ ﺍﻋﻤﻞ ﺍﻳﻪ ؟؟
ﺷﻮﻕ : ﺷﻮﻑ ﻳﺎ ﺣﺎﺯﻡ .. ﺍﻧﺖ ﻋﻤﻠﺖ ﻛﻞ ﺍﻟﻠﻲ ﻋﻠﻴﻚ ﻭﺩﻟﻮﻗﺘﻲ ﺗﻘﻒ ﺟﻨﺐ ﻣﺎﻣﺘﻚ ﻣﺶ ﺗﺴﻴﺒﻬﺎ ﻭﺗﻤﺸﻲ ﺩﻱ ﻣﻬﻤﺎ ﻛﺎﻥ ﻣﺎﻣﺘﻚ ... ﻫﻴﺎ ﺷﺎﻳﻔﻪ ﺍﻧﻬﺎ ﺻﺢ ﺍﻭﻗﻒ ﻣﻌﺎﻫﺎ ﺣﺘﻲ ﻟﻮ ﺍﻧﺖ ﺷﺎﻳﻒ ﺍﻧﻬﺎ ﻏﻠﻂ ... ﺍﻟﻤﻬﻢ ﻣﺎ ﺗﺴﻴﺒﻬﺎﺵ ﻟﻮﺣﺪﻫﺎ ﻭﺧﺼﻮﺻﺎ ﻟﻮ ﻫﻮ ﻓﻌﻼ ﻭﺣﺶ ... ﻻﺯﻡ ﻳﻌﺮﻑ ﺍﻥ ﻭﺭﺍﻫﺎ ﺭﺟﺎﻟﻪ ﻣﻬﻴﺎﺵ ﻟﻮﺣﺪﻫﺎ ﺩﻩ ﻭﺍﺟﺒﻚ ﻛﺎﺑﻦ ... ﻳﺎﻻ ﻗﻮﻡ ﻭﺭﻭﺡ ﻋﻠﺸﺎﻥ ﺗﺠﻬﺰ ﻳﺎﻻ
ﺷﺪﺗﻪ ﻋﻠﺸﺎﻥ ﺗﻤﺸﻴﻪ ﻭﻫﻮ ﻣﻌﺘﺮﺽ ﺑﺲ ﻣﺸﻲ ﻣﻌﺎﻫﺎ ﻻﻥ ﻧﻮﻋﺎ ﻣﺎ ﻛﻼﻣﻬﺎ ﻓﻴﻪ ﺷﻲﺀ ﻣﻦ ﺍﻟﺼﺢ
ﻋﻤﻠﻮﺍ ﺣﻔﻠﻪ ﺿﻴﻘﻪ ﻭﻛﺘﺒﻮﺍ ﺍﻟﻜﺘﺎﺏ ﻭﺣﺎﺯﻡ ﻗﺎﻋﺪ ﺑﺎﻟﻌﺎﻓﻴﻪ ﻣﺶ ﻃﺎﻳﻖ ﻧﻔﺴﻪ ﺍﺳﺘﻔﺮﺩ ﺑﺤﺴﺎﻡ
ﺣﺎﺯﻡ : ﺍﻭﻋﻲ ﺗﺘﺨﻴﻞ ﻟﻠﺤﻈﻪ ﺍﻥ ﻗﺼﻪ ﺍﻟﺤﺐ ﺩﻱ ﺩﺍﺧﻠﻪ ﺩﻣﺎﻏﻲ ، .. ﺍﻧﺎ ﻭﺭﺍﻙ ﻫﺎﻩ ﺧﻠﻲ ﺑﺎﻟﻚ
ﺣﺴﺎﻡ : ﺍﻧﺎ ﻣﺶ ﻋﺎﺭﻑ ﺍﻧﺖ ﺑﺘﺘﻜﻠﻢ ﻋﻦ ﺍﻳﻪ ﺑﺲ ﺍﻧﺎ ﺑﺤﺐ ﻭﺍﻟﺪﺗﻚ ﺑﺠﺪ
ﺣﺎﺯﻡ : ﺍﻓﻠﺢ ﺍﻥ ﺻﺪﻕ ....
ﺳﺎﺑﻪ ﻭﻣﺸﻲ ﻭﺣﺴﺎﻡ ﺍﺧﺪ ﺻﻔﻴﻪ ﻭﻣﺸﻲ ﻋﻠﻲ ﺑﻴﺘﻬﻢ
ﻭﺍﻟﺒﻴﺖ ﻓﻀﻲ ﻋﻠﻲ ﺣﺎﺯﻡ ﻭﻣﺮﺍﺗﻪ ﺭﺟﻌﺖ ﺍﺧﺮ ﺍﻟﻠﻴﻞ ﻭﺣﺎﺯﻡ ﺭﻓﺾ ﻳﻜﻠﻤﻬﺎ ﻭﺳﺎﺑﻬﺎ ﻭﻃﻠﻊ ﺍﻭﺿﺘﻪ
ﺗﺎﻧﻲ ﻳﻮﻡ ﺭﺍﺡ ﻟﺸﻮﻕ ﻳﺸﻜﺮﻫﺎ ﻋﻠﻲ ﺭﺃﻳﻬﺎ ﻭﺧﺒﻂ ﻭﺩﺧﻞ ﻭﻫﻨﺎﻙ ﺍﺗﻔﺎﺟﺊ ﺑﻤﺤﻤﻮﺩ ﻭﻣﺮﺍﺗﻪ ﻭﻋﻴﺎﻟﻬﻢ ﻭﺍﺗﻘﺎﺑﻠﺖ ﺍﻟﻌﻴﻮﻥ ﻛﻠﻬﺎ ﻭﺣﺎﻟﻪ ﻣﻦ ﺍﻟﺘﻮﺗﺮ ﻭﺍﻟﻘﻠﻖ
ﺩﺧﻞ ﺣﺎﺯﻡ ﻭﺷﻮﻕ ﻋﺮﻓﺘﻬﻢ ﻋﻠﻲ ﺑﻌﺾ ﻣﻊ ﺍﻧﻬﻢ ﻛﺎﻧﻮﺍ ﻋﺎﺭﻓﻴﻦ ﺑﻌﺾ ﺑﻤﺠﺮﺩ ﺍﻟﻨﻈﺮ ﻭﺍﻻﺗﻨﻴﻦ ﻣﺶ ﻃﺎﻳﻘﻴﻦ ﺑﻌﺾ ﻧﻬﺎﺋﻲ ﻭﻋﺪﺍﺅﻫﻢ ﻛﺎﻥ ﻭﺍﺿﺢ
ﺣﺎﺯﻡ : ﻫﺪﺧﻞ ﺍﻧﺎ ﺍﻃﻤﻦ ﻋﻠﻲ ﺭﻫﻒ ﺍﻟﺠﻮ ﻫﻨﺎ ﺧﻨﻘﻪ
ﺳﺎﺑﻬﻢ ﻭﺩﺧﻞ ﻭﻣﺤﻤﻮﺩ ﻫﻴﺘﺠﻨﻦ
ﻣﺤﻤﻮﺩ : ﻳﺎ ﺗﻨﺎﻛﻪ ﺍﻟﻠﻲ ﺧﻠﻔﻮﻩ
ﺷﻮﻕ : ﺍﺭﺟﻮﻙ ﻣﺤﻤﻮﺩ ﻣﺎ ﺗﺘﻬﻮﺭﺵ
ﻣﺤﻤﻮﺩ : ﺍﻧﺎ ﻧﻔﺴﻲ ﺍﻓﻬﻢ ﻓﺎﺗﺤﻪ ﺑﺎﺑﻚ ﻟﻴﻪ ؟ ﺳﻴﺒﻴﻠﻪ ﺍﻟﺒﻴﺖ ﻭﺗﻌﺎﻟﻲ ﺷﻘﺘﻲ ﺍﻟﻘﺪﻳﻤﻪ ﻣﻘﻔﻮﻟﻪ ﺍﻓﺘﺤﻴﻬﺎ ﻭﺍﻗﻌﺪﻳﻬﺎ ﻓﻴﻬﺎ ﻣﻌﺰﺯﻩ ﻣﻜﺮﻣﻪ ﻳﺎ ﺍﻣﺎ ﺗﻘﻮﻟﻴﻠﻪ ﺍﻟﺤﻘﻴﻘﻪ ؟؟ ﻟﻜﻦ ﺍﻟﻮﺿﻊ ﺩﻩ ﻏﻠﻂ
ﺣﺎﺯﻡ ﻣﻊ ﺭﻫﻒ ﻭﻣﻠﻚ ﻭﻋﻤﺮ ﻭﻫﻴﺎ ﺑﺘﻌﺮﻓﻪ ﻋﻠﻲ ﺍﺧﻮﺍﺗﻬﺎ
ﻣﻠﻚ : ﻫﻮ ﺍﻧﺎ ﻳﻨﻔﻊ ﻳﺎ ﻋﻤﻮ ﺍﺧﺪ ﺍﻟﻌﺮﻭﺳﻪ ﺩﻱ ؟؟
ﺣﺎﺯﻡ : ﺩﻱ ﺑﺘﺎﻋﺖ ﺭﻫﻒ ﻫﻴﺎ ﺣﺮﻩ
ﻣﻠﻚ : ﺑﺲ ﻫﻴﺎ ﺑﺘﻘﻮﻝ ﺍﻧﻬﺎ ﻫﺪﻳﻪ ﻣﻨﻚ ﻭﻣﺶ ﻳﻨﻔﻊ ﻋﻠﺸﺎﻥ ﺍﻧﺖ ﻣﺎﺗﺰﻋﻠﺶ
ﺣﺎﺯﻡ ﺍﺑﺘﺴﻢ : ﺍﺩﻳﻬﺎﻟﻬﺎ ﺣﺒﻴﺒﺘﻲ ﻭﺍﻧﺎ ﻣﺶ ﻫﺰﻋﻞ ﻭﻫﺠﻴﺒﻠﻚ ﺍﺣﻠﻲ ﻣﻨﻬﺎ ﻛﺘﻴﺮ
ﺭﻫﻒ : ﺑﺠﺪ ﺯﻭﻣﺎ ﻣﺶ ﻫﺘﺰﻋﻞ ؟؟
ﺣﺎﺯﻡ : ﺑﺠﺪ ﻳﺎ ﻗﻠﺒﻲ ﺍﻧﺎ
ﻋﻤﺮ : ﻃﻴﺐ ﻭﺍﻧﺎ ﻣﺶ ﻫﺘﺠﻴﺒﻠﻲ ﺣﺎﺟﻪ ؟ ﻛﻞ ﺍﻟﻠﻲ ﻫﻨﺎ ﻟﻌﺐ ﺑﻨﺎﺕ ؟؟
ﺣﺎﺯﻡ : ﺍﻣﻤﻢ ﻃﻴﺐ ﺍﻧﺖ ﻋﺎﻳﺰ ﺍﻳﻪ ؟
ﻋﻤﺮ : ﻋﺎﻳﺰ ﻋﺮﺑﻴﻪ ﻛﺒﻴﻴﻴﻴﻴﺮﻩ ﺑﺮﻣﻮﺩ
ﺣﺎﺯﻡ : ﺑﺲ ﻛﺪﻩ ﺣﺎﺿﺮ ﻳﺎ ﺳﻴﺪﻱ ﻫﺠﻴﺒﻬﺎﻟﻚ ﻭﺭﻫﻒ ﻫﺘﺪﻳﻬﺎﻟﻚ ﺍﺗﻔﻘﻨﺎ ؟
ﻋﻤﺮ : ﻫﻴﻴﻴﻴﻴﻪ ﺍﺗﻔﻘﻨﺎ
ﻃﻠﻊ ﻋﻤﺮ ﻭﻣﻠﻚ ﻳﺠﺮﻭﺍ ﻻﺑﻮﻫﻢ ﻭﺍﻣﻬﻢ ﻳﺒﻠﻐﻮﻫﻢ ﺑﺎﻻﻟﻌﺎﺏ
ﺭﻫﻒ : ﺷﻔﺖ ﺍﺧﻮﺍﺗﻲ ﻭﺑﺎﺑﺎﻳﺎ !!! ﻫﻤﺎ ﻛﻮﻳﺴﻴﻦ ﻣﺶ ﻭﺣﺸﻴﻦ
ﺣﺎﺯﻡ : ﺣﺒﻴﺒﻲ ﺍﻟﻠﻲ ﻗﻠﺒﻪ ﻛﺒﻴﺮ ﺩﻩ .... ﺗﺴﻠﻤﻴﻠﻲ ﻳﺎ ﻗﻠﺒﻲ ﺍﻧﺘﻲ ... ﻫﻤﺎ ﻛﻮﻳﺴﻴﻦ ﻓﻌﻼ ... ﻫﻘﻮﻡ ﺍﻧﺎ ﺍﺭﻭﺡ ﻭﺍﺟﻴﻠﻚ ﻭﻗﺖ ﺗﺎﻧﻲ ﻳﺒﻘﻲ ﺍﻟﺒﻴﺖ ﻓﺎﺿﻲ ﻭﺍﻧﺘﻲ ﺍﻟﻌﺒﻲ ﻣﻊ ﺍﺧﻮﺍﺗﻚ ﺍﻭﻛﻲ ﻳﺎ ﻗﻤﺮ
ﺭﻫﻒ : ﺑﺲ ﻣﺶ ﺗﺘﺄﺧﺮ
ﺧﺮﺝ ﺣﺎﺯﻡ ﻭﺳﺎﺑﻬﺎ ﻭﻧﺴﻲ ﻣﻔﺎﺗﻴﺢ ﻋﺮﺑﻴﺘﻪ ﻭﻗﺎﻣﺖ ﺭﻫﻒ ﻭﺭﺍﻩ ﺑﻌﻜﺎﺯﺗﻬﺎ ﺗﺪﻳﻬﺎﻟﻮﺍ
ﺣﺎﺯﻡ : ﺷﻮﻕ ﻟﻮ ﺍﺣﺘﺠﺘﻲ ﺣﺎﺟﻪ ﻛﻠﻤﻴﻨﻲ ؟؟
ﺷﻮﻕ : ﻣﺎﺷﻲ ﺑﺴﺮﻋﻪ ﻳﻌﻨﻲ ؟؟
ﺣﺎﺯﻡ : ﺍﻟﺠﻮ ﺯﺣﻤﻪ ﻭﺍﻧﺎ ﻣﺒﺤﺒﺶ ﺍﻟﺰﺣﻤﻪ
ﻣﺤﻤﻮﺩ : ﺑﺎﺑﻦ ﻋﻠﻴﻚ ﻳﺎ ﺍﺑﻦ ﺍﻻﻛﺎﺑﺮ ﺍﻧﻚ ﻣﺒﺘﺤﺒﺶ ﺍﻟﺰﺣﻤﻪ
ﺣﺎﺯﻡ : ﺍﺑﻦ ﺍﻻﻛﺎﺑﺮ ؟؟؟ ﺍﻧﺖ ﺑﺘﺘﺪﺧﻞ ﻟﻴﻪ ﻓﻲ ﺍﻟﻜﻼﻡ ﺍﺻﻼ ؟؟ ﻭﺑﻌﺪﻳﻦ ﺍﻧﺖ ﺑﺄﻱ ﻋﻴﻦ ﺟﺎﻱ ﻫﻨﺎ ؟ ﻫﺎﻩ ؟؟
ﺷﻮﻕ : ﺧﻼﺹ ﻳﺎ ﺣﺎﺯﻡ ﺍﻣﺸﻲ ﺍﻧﺖ ﺩﻟﻮﻗﺘﻲ
ﺣﺎﺯﻡ : ﻻ ﻣﺶ ﻫﻤﺸﻲ ﺑﻘﻲ ... ﻫﻮ ﺳﻴﺎﺩﺗﻚ ﻟﺴﻪ ﻋﺎﺭﻑ ﺍﻧﻬﺎ ﻛﺎﻧﺖ ﻓﻲ ﺍﻟﻤﺴﺘﺸﻔﻲ ﻭﻛﺎﻧﺖ ﺑﻴﻦ ﺍﻟﻤﻮﺕ ﻭﺍﻟﺤﻴﺎﻩ ؟؟؟ ﻭﻻ ﻫﻴﺎ ﻣﺎ ﺗﻔﺮﻗﺶ ﻣﻌﺎﻩ ﺍﺻﻼ ؟؟ﻭﺑﻌﺪﻳﻦ ﺣﺘﻲ ﻟﻮ ﻋﺮﻓﺖ ﺍﻧﺖ ﻫﺘﻬﺘﻢ ﻟﻴﻪ ﻣﺎ ﺍﻧﺖ ﺳﺒﻖ ﻭﺭﻣﻴﺘﻬﺎ ﻫﻴﺎ ﻭﺍﻣﻬﺎ ﻋﻠﺸﺎﻥ ﺗﺘﺠﻮﺯ ﻭﺗﻌﻴﺶ ﺣﻴﺎﺗﻚ ...
ﻣﺤﻤﻮﺩ : ﺍﻧﺎ ﺭﻣﻴﺘﻬﺎ ؟؟؟ ﺍﻧﺎ ؟؟ ﻭﺍﻟﻠﻲ ﺍﻧﺖ ﻋﻤﻠﺘﻪ ﺩﻩ ﻳﻄﻠﻊ ﺍﻳﻪ ؟ ﻫﺎﻩ ﻳﺎ ﺍﺑﻦ ﺍﻻﻛﺎﺑﺮ
ﺷﻮﻕ : ﻣﺤﻤﻮﺩ ﺍﺳﻜﺖ ... ﺣﺎﺯﻡ ﺍﻣﺸﻲ
ﺣﺎﺯﻡ : ﺍﻳﻪ ﺍﻟﻠﻲ ﺍﻧﺎ ﻋﻤﻠﺘﻪ ؟؟؟ ﺭﻣﻴﺖ ﻣﺮﺍﺗﻲ ﻭﺑﻨﺘﻬﺎ ﻭﺭﺣﺖ ﺍﺗﺠﻮﺯﺕ ﻭﻣﺎ ﻋﺒﺮﺗﻬﻤﺶ ؟؟؟ ﻫﺎﻩ ؟؟
ﺷﻮﻕ : ﻣﺤﻤﻮﺩ ﺍﺳﻜﺖ
ﻣﺤﻤﻮﺩ : ﻻ ﻳﺎ ﺍﺑﻦ ﺍﻻﻛﺎﺑﺮ ﺍﻧﺖ ﺑﺲ ﺧﻠﻴﺖ ﻭﺍﺣﺪﻩ ﺗﺤﺒﻚ ﻭﺗﺤﻤﻞ ﻣﻨﻚ ﻭﺭﻣﻴﺘﻬﺎ ﻭﺭﺣﺖ ﺳﺎﻓﺮﺕ ﻭﺭﺟﻌﺖ ﺑﻌﺪ ﺳﻨﻴﻦ ﺑﺘﺘﻔﻀﻞ ﻋﻠﻴﻬﻢ ﻭﺑﺘﺘﻔﻀﻞ ﻋﻠﻲ ﺑﻨﺘﻚ ﺍﻧﻚ ﺑﺘﺼﺮﻑ ﻋﻠﻴﻬﺎ ... ﻟﻮ ﻓﻲ ﺣﺪ ﻭﺍﻃﻲ ﻭﻧﺪﻝ ﻓﺪﻩ ﻣﺶ ﺍﻧﺎ .... ﺍﻟﻨﺪﻝ ﻫﻮ ﺍﻟﻠﻲ ﻣﻄﻠﻌﺶ ﺭﺍﺟﻞ ﻭﺧﻠﻲ ﺑﺤﺒﻴﺒﺘﻪ ﺑﻌﺪ ﻣﺎ ﺳﻠﻤﺘﻪ نفسها