رواية نور حياتي
الفصل الثالث
روحت فتحت الباب لاقيت بنت استغربت اوي مش علشان بنت و جاية في الوقت ده خالص على فكرة انا استغربت علشان كانت لابسة قصير و مبين كتير من جسمها كأنها في الصيف مش الشتا معانا هي مش بردانة البت دي ولا ايه
نور : نعم ؟
البنت بدلع : آدم موجود
نور : اه موجود ادخلي و هناديهولك
البنت : شكرا انتي تبقي مين يا شاطرة
نور : اخته يا حبيبتي اتفضلي
دخلت جوا و هو كان واقف في الطرقة و روحتله
نور : في بنت برا عايزاك بس غريبة
آدم : بنت مين والله ما اعرف بنات صدقيني
نور : مقصدش كدا خالص بس اللي مستغربة منه ان هي مش بردانة يلا ما علينا انا هدخل انام عندي شغل بكرا تصبح على خير
دخلت الأوضة و نمت هتقولولي انتي مجنونة ازاي تسيبيه معاها لوحدهم و هي باللبس ده و ازاي باردة كدا و انا هقولكوا انني قولتلكوا قبل كدا انني بقيت مش فارق معايا اي حاجة و ان مشاعري اتقتلت من زمان و مبقتش عارفة احس بأي حاجة
آدم خرج لقى سالي السكرتيرة الشخصية بتاعته في الشركة بس هي بتحب تتلزق فيه و هو كان بيعدي ليها علشان ميقطعش عيشها اول ما شافها حس باشمئزاز لأن لبسها كان ضيق اوي و مفتح كأنها في عز الصيف مش الشتا
آدم بجدية : في ايه يا سالي جايالي البيت ليه و كمان في الوقت ده؟
سالي بدلع : مش انت يا دومي قولتلي ابقي تعاليلي علشان نراجع آخر حاجة حصلت في الشركة
آدم : و هو انا قولتلك تعاليلي البيت ؟ أو قولت تعالي انهردة الساعة ١٢ بليل ؟ انا قولت ؟
سالي : خلاص بقى حصل خير متبقاش قفوش
آدم : اطلعي برا يا سالي و انتي مرفودة من الشركة و مش عايز اشوف وشك تاني اتفضلي براااا
سالي : انت بتطردني من بيتك و برتفدني من الشركة ؟!!
ادم : اه و ياريت منتشرفش بوشك ده تاني يلا برا
سالي : ماشي يا آدم بس خلي بالك علشان هتندم و جامد اوي كمان يا آدم و هتشوف
مشت سالي و فضل آدم يفكر : يا ترى نور بتعمل ايه دلوقتي اكيد اتدايقت
عقله : انت عبيط هتضايق من ايه اصلا و هي مش بتطيق وشك هتبقى غيرانة مثلا
قلبه: بس هي كانت بتمثل انه مش فارق معاها علشان متضعفش قدامي
عقله : يخربيت كدا يا اخي هي اصلا الموضوع مش فارق معاها انت شوفت طريقتها باعدين انت بتفكر في كل ده ليه انت متجوزها علشان شغل بينك و بين ابوها و بس
قلبه : بس انا حاسس.....
عقله : مفيش مفيش يا مهزأ يا زفت انت مفيش حاسس مش احنا عاملين عهد انك تفضل مقفول لحد ما تيجي واحدة معاها المفتاح الحقيقي مش المزيف و تفتحك و تدخل حصل ولا محصلش
قلبه : حصل
عقله : يبقى هو متجوزها علشان شغل و بس شغل و ايييه
قلبه : و بس
عقله : ايوة كدا برافو عليك يلا روح نام بقى يا آدم
بطنه : استنوا هنا انتوا نسيتوني في ايه انا جعان راعوا انني مكلتش من الصبح
عقله : مش وقتك والله مش وقتك
بطنه : ماليش دعوة اقولك روح صحيها اطلب منها تعمل اكل
قلبه : اه والنبي نفسي اشوفها هي طول اليوم برا و مش بلحق اقعد معاها
عقله : هتجيبولي شلل حسبي الله مش قولنا تخرس يا مهزأ قولنا ولا مقولناش و انت يا مفجوع هو مش هيصحي حد افرض رفضت تعمله حاجة و هي بتقوله عاملني كهوا
بطنه : خلاص اتصرفوا انا جعان ماليش فيه
آدم : خلاص خلاص بطلوا كلكوا انا تعبت منكوا انا هطلب دليفري و ناكل و ننام و مسمعش صوت حد فيكوا هناكل و ايييه
عقله و قلبه و بطنه : و ننام حاضر
( عادي يا جماعة في ايه بييجي علينا وقت بنبقى بنكلم نفسنا بشخصيات مختلفة عادي يعني اقبلوا مني شوية تفاهة معلش 😂 )
فضلت على الروتين ده اسبوعين اصحى الصبح اروح الشغل و ارجع بليل استفزه بالكلام شوية و ادخل انام لحد ما في يوم رجعت البيت و قعدت اتفرج على التليفزيون شوية و لاقيت تليفوني بيرن و كانت قمر
نور : ايوة يا قمر يا بنتي انا لسة سايباكي انتي لحقتي علشان تتصلي عليا
قمر : نور انا لاقيتلك شغل مع شغل الكافيه
نور : بجد يا قمر قولي والله
قمر : اه والله بصي يا ستي انا خالي طلع كان بيجهز لمحل ملابس حريمي و احنا منعرفش لسة عارفة منه دلوقتي ان افتتاحه هيكون بعد شهرين كدا عقبال ما يلاقي ناس تشتغل معاه و قولتله عليكي و وافق
نور : شكرا يا قمر انتي قلبي اقسم بالله من غيرك كان زماني بلف في الشوارع و مش لاقية ربنا يخليكي يا قلبي
قمر : مفيش بينا الكلام ده اصلا يا بنتي بلاش عبط
نور : حبيبتي يا قمر والله
قمر : قلبي يا نور يلا سلام دلوقتي
نور : باي
آدم : ايه ده في ايه حاسك مبسوطة
نور : اه والله مبسوطة اوي
آدم : مبسوطة من ايه بقى ؟
نور : ها !! لا عادي يعني مبسوطة و خلاص هو لازم يبقى في حاجة تخليني مبسوطة مينفعش اكون مبسوطة لوحدي انا تمام اوي
آدم : نور انا زهقت
نور : من ايه و انا مالي اصلا
آدم : زهقت من المعاملة دي قولتلك قبل كدا خلينا زي الصحاب عادي بدل اللي احنا فيه ده
نور : يعني انت عايز ايه دلوقتي ؟
آدم : عايز نتكلم مع بعض عادي تقوليلي حياتك ماشية ازاي و انا حياتي ماشية ازاي نتفرج سوا على التليفزيون نجيب غدا من برا و نتفرج على فيلم سوا لو في مشاكل نحلها لبعض كدا يعني
نور : اممم و ايه اللي هيخليني اعمل كدا ؟
آدم : يعني ايه ؟
نور : يعني كل اللي بتقول عليه ده مش هيدي اي فايدة بالعكس ده هيجي عليا بخسارة فخلينا كدا احسن ليا و ليك
آدم : و هو هييجي عليكي بخسارة ليه ده بالعكس انتي بتفكي عن نفسك و انتي بتتكلمي معايا
نور : لما احب افك عن نفسي افك عن نفسي مع حد انا ضامنة انه هيفضل معايا مش مع شخص مش ضامنة وجوده في وقت انا ممكن احتاجه فيه فخلينا كدا احسن هما شوية و نتطلق
ادم : ماشي يا نور براحتك
سابني و دخل اوضته و انا رقدت على الكنبة و قعدت اتفرج على التليفزيون و كنت حاضنة مخدة لحد ما لاقيت نفسي نمت
آدم دخل اوضته و فضل يفكر في نور لحد ما نام
صحي الساعة ٤ الفجر طلع يشرب ماية لقى نور نايمة في الأرض ما بين الكنبة و الترابيزة و حاضنة المخدة عرف انها نامت و هي قاعدة راح حاول يصحيها علشان تدخل تنام في اوضتها
آدم : نور نور اصحي
نور بهلوسة : حاضر حاضر هقوم اهو بس بلاش ضرب والنبي بلاش حاضر * و نامت تاني *
ادم : نور قومي نامي في الأوضة
نور : ...........
ادم : طب اعمل ايه دلوقتي اخاف اشيلك ادخلك جوا تصحي تقتليني علشان عملت كدا طب ماهو مينفعش اسيبك كدا خلاص بقى استعنا عالشقى بالله
آدم شالها و نيمها على سريرها و فضل سرحان فيها شوية
آدم : يا ترى حكايتك ايه كل يوم بكتشف ان وراكي حكاية و حياتك مكانتش سهلة
طلع من الأوضة و قفلها و راح نام و هو لسة بيفكر فيها
صحيت الصبح لاقيت نفسي على السرير طب ازاي انا فاكرة انني نمت امبارح على الكنبة و انا بتفرج على التليفزيون ما علينا طلعت دخلت المطبخ علشان اعمل الفطار لاقيته قاعد في البلكونة و بيشرب قهوة روحتله
نور : صباح الخير
آدم : صباح النور
نور : هو انا ايه جابني على السرير انا فاكرة انني نمت على الكنبة
آدم : احم احم هقول بس خليكي عاقلة كدا
نور : ما تخلص يا عم لو عارف قول
آدم : انا صحيت على الفجر كدا لاقيتك واقعة على الأرض بين الكنبة و الترابيزة حاولت اصحيكي مصحيتيش اضطريت اشيلك و ادخلك جوا
نور : تماام شكرا
آدم بصدمة : نعم؟
نور : بقولك شكرا
آدم : يعني مش هتقتليني !!
نور : لا علشان لو كنت سيبتني على الأرض بالنومة دي كان زماني قايمة جسمي مكسر متخافش انا مش مجنونة علشان اقتلك لأسباب تافهة لو السبب ممكن يخليني اقتلك مش هتردد في القرار ده
آدم : و انتي ازاي بتتعاملي بالطريقة دي ؟
نور : طريقة ايه ؟
آدم : انتي بتتعاملي مع القتل على انه حاجة عادية بتحصل كل يوم مش جاي في بالك انه حرام مثلا و ان القانون بيعاقب عليه
نور : مين قالك انني معرفش
آدم : يعني عارفة كدا و عايزة تقتليني
نور : همممم انا هحاول اسكت علشان مقولش حاجة مش المفروض اقولها انا هفطر و هنزل
كنت لسة همشي بس وقفني كلامه
آدم : صحيح مقولتيليش بتشتغلي ايه ؟
نور : ده من الحاجات اللي مش من المفروض اقولها
فطرت و نزلت و كملت يومي عادي جدا و فضلنا كدا برضه هو يحاول يعرف حاجات عن حياتي بس انا مش بديله الإجابة و كنت حاسة انه بيحاول يقرب مني و فتح معايا كذا مرة اننا نبقى صحاب بس انا اللي برفض برضه فضلنا كدا فترة و في يوم كنت راجعة من الشغل الساعة ٨ و نص الدنيا قلبت مطرة جامد اوي و انا مش معايا حاجة اغطي نفسي بيها علشان المطرة و الجو كان برررد اوي كنت بجري في الشارع علشان اوصل البيت وصلت البيت و انا بتكتك من البرد و جسمي بيترعش و حاسة انني داخلة على دور برد شديد و انا لما بيجيلي برد اعصابي بتبقى سايبة حبتين كنت واقفة قدام الباب عمالة برن الجرس مفيش رد قعدت جنب الباب نص ساعة لحد ما محستش بنفسي بعد كدا
آدم كان عنده شغل كتير في الشركة و عرف ان الدنيا كانت بتمطر بس نسي أن نور بترجع البيت الساعة ٩ و فضل في الشركة لحد الساعة ١١ ونص و الدنيا كانت لسة بتمطر و الجو كان شديد جدا ركب عربيته و راح البيت لقى نور واقعة جنب الباب و هدومها كلها مبلولة و جسمها سخن جدا فتح الباب بسرعة و شالها و دخلها و اتصل على واحدة كانت بتشتغل عنده
آدم : ايوة يا درية
درية : ايوة يا ادم بيه
ادم : درية تعاليلي الشقة بتاعتي بسرعة
درية : حاضر يا آدم بيه مسافة السكة و هكون عندك
عدى ربع ساعة و هو مش عارف يعمل ايه لحد ما درية جات
درية : خير يا آدم بيه ؟
آدم : تعالي بصي بقى انا عايزك تاخدي نور و تغيريلها هدومها المبلولة دي بالدهوم اللي موجودة جوة لحد ما اتصل بالدكتور
درية : حاضر يا بيه
ادم دخل نور الأوضة و درية ظبطتها و آدم اتصل بالدكتور و جيه كشف عليها و طلع من اوضتها
آدم : خير يا دكتور
الدكتور : هي عندها برد شديد انا هكتبلها على شوية أدوية تاخدهم في معادهم و محتاجة كمادات مستمرة لحد ما السخونية تنزل اتفضل
آدم اخد الروشتة و الدكتور مشي
ادم : درية اعمليلها كمادات لحد ما اجي
درية : حاضر يا بيه
آدم نزل جاب الأدوية و رجع تاني
آدم : خلاص يا درية امشي انتي تعبتك معايا و جبتك في الوقت ده
درية : تعبك راحة يا بيه عن اذنك
درية مشت و آدم دخل لنور و اتصدم من منظرها شاف شعرها البني المقصوص خالص بطريقة بايظة خالص و في فرقبتها حروق هو أول مرة يشوفها لأن نور على طول كانت بتلبس تربون و بتلف طرحة على رقبتها زي كوفية كدا فضل قاعد جنبها بيعملها كمادات و بيصحيها يديها الدوا و تنام تاني و نام على الكرسي الي جنب السرير و هو قاعد جنبها
صحي على الساعة ٦ الصبح و هي بتصحيه و هي راقدة على السرير
نور بتعب : آدم آدم
آدم : نور انتي كويسة ؟
نور : ايه اللي حصل ؟
آدم : انا اسف جيت امبارح متأخر لاقيتك جنب الباب و هدومك مبلولة من المطرة و جالك برد شديد
نور و هي بتبص على نفسها : مين غيرلي الهدوم دي ؟
آدم : متخافيش انا جبت واحدة ظبطتك
نور : طيب هي الساعة كام ؟
آدم : الساعة دلوقتي ٦ الصبح
نور : طيب انا عايزة اقوم علشان الحق افطر و انزل الشغل
آدم : ايه العبط ده لا طبعا مفيش شغل انهردة انتي مش شايفة انتي عاملة ازاي انتي هتفضلي انهردة طول اليوم في السرير فاهمة
نور : خلاص خلاص مش قادرة للمناهدة اصلا كح كح كح
آدم : انا هروح اعملك حاجة سخنة خدي الدوا بس الاول
نور اخدت الدوا و آدم راح عملها حاجة سخنة و فضل قاعد جنبها طول اليوم و جيه الليل و كان بيديها الدوا
نور : هو انت بتعمل معايا كدا ليه؟
آدم : أولا علشان انتي ملزمة مني دلوقتي ثانيا لو مش انا اللي هيعمل كدا مين هيعمل كدا و انتي مالكيش حد اصلا كان زمانك موتي
نور : ياااه ده انا طلعت فارقة مع حد غير جووو يا فرحة قلبي
ادم : ممكن اسأل سؤال ؟
نور : همم
آدم : ايه اللي عمل في شعرك كدا و رقبتك
نور مكانتش تعرف ان شعرها و رقبتها باينين حطت ايدها على شعرها بسرعة بصدمة كدا و على رقبتها و هي بتحاول تخبي الحروق
نور : انت ليه مقولتلهاش تلبسني التربون و تلف على رقبتي الطرحة ؟
آدم : انا قولتلها تلبسك اللي جوا انا شوفتك كدا بعد ما هي مشت بس برضه ايه اللي عمل فيكي كدا ؟
نور بكذب : ولا حاجة كنت بحاول أقص شعري بوظته و اللي في رقبتي ده كنت عاملة حادثة و دي حروق منها مش اكتر
آدم : هنبطل كذب امتى ؟
نور : انا مبكذبش باعدين خلي بالك انا بحاول اتعامل معاك حلو علشان اللي عملته معايا بس مش اكتر انما انا مش مضطرة اقولك يعني
تليفونها رن بس هو مسكه و رد
قمر : ايه يا نور مجيتيش الكافيه انهردة ليه ؟
آدم اتصدم لما سمع كافيه بس قال يمكن كانت متفقة معاها يخرجوا في الكافيه و مد ايده بالتليفون ليها و هي اخدته
قمر : نور يا بنتي
نور : ايوة ايوة يا قمر
قمر : بقولك مجيتيش الكافيه ليه
نور : معلش اصلي تعبانة اخدت دور برد شديد
قمر : الف سلامة عليكي بس كدا عندي خبر مش حلو
نور : خبر ايه ؟
قمر : بصراحة المدير لما لقاكي مجيتيش قال انه هيجيب بدالك حد بكرا
نور : يعني ايه انا خلاص كدا اترفدت ؟
قمر : الظاهر كدا يا نور مش عارفة والله اعمل ايه حاولت اقوله على اي اعذار بالذات انك مكنتيش بتردي على التليفون بس هو دماغه حجر
نور : خلاص يا قمر اقفلي دلوقتي
قمر : متزعليش يا نور والنبي
نور : مزعلش اه لا متخافيش متعودين على كدا سلام يا قمر
نور قفلت المكالمة و خبت نفسها جوا البطانية
آدم : في ايه يا نور
نور : مفيش عايزة ابقى لوحدي
آدم : انتي كويسة ؟
نور : ايوة عايزة ابقى لوحدي
ادم : اللي يريحك
آدم خرج برا الأوضة و نور كانت متضايقة جدا و في نفس الوقت مش عارفة تعيط فضلت كدا شوية باعدين نادت على آدم