رواية خادمه بعقد شرعي الفصل الاول1والثاني2 كتابة القلم الذهبي

تاليف #القلم الذهبي 

الفصل الاول والثاني 

مفيش حد يقدر يختار الظروف اللي هو هيعيش فيها . احنا 

بنتولد بنلاقي نفسنا جوه الظروف نفسها ولازم نعيشها سواء كانت تعيسه او سعيده. 

حكايتي بدأت من هنا !!

انا صفيه 19 سنه من اسره فقيره ع قدها عايشه بحي شعبي 

فتاه ملتزمه وجميله بشهاده اهل الحي اللي بعيش فيه . انا 

اكبر اخواتي عايشه مع بابا وماما ومعايا اخواتي خمس بنات 

وانا السادسه وولدين يعني احنا العشر عايشين بشقه واحد 

حياتنا معدومه بمعناها الحقيقي والدي معاه كشك بيبيع فيه 

جرايد ومجلات ويدوبك قادر ياكلنا ويشربنا. انا عايزه اقول 

قد ايه عيشتنا تعيسه لدرجة اني مكملتش تعليمي لان مفيش 

فلوس اخواتي بيتعلموا لسه ابتدائي وكمان بابا بيصرف علي 

تعليمهم من صدقات الناس علينا. فقر وذل ما بعده فقر .لدرجة 

اننا مش لاقيين الغطا اللي يدفينا بالشتاء .

انا واخواتي البنات كنا بنتغطي ببطانيه واحده في عز البرد 

القارس ونبقي معجونين جوه بعض. دموعي مكنتش تفارقني 

كل ليلة من الذل دي واكثر دموعي من البرد اللي بينهش في 

لحمي ومش قادره اتحمله واخواتي الولاد أطفال كانوا يناموا 

مع بابا وماما. بابا طلعني من الثانويه وقالي.

كفايه عليكي كدا مش قادر اصرف عليكي وكان دايما كل ما بيبص عليا يقولي جملته المعتاده. 

ياريت طلعتي ولد اهو كنتي هونتي عليا المعيشه واشتغلتي بره وجبتي فلوس.  

اوضاعنا كانت صعبه بمعناها الحقيقي.  كنت كل يوم من بعد ما بطلت اروح المدرسه انزل الكشك مع بابا عشان اساعده.  وحتي بيع الجرايد مبقاش زي الاول يدوبك اللي بنبيع بيهم يكفوا اكلنا وشربنا.  كنت بطلب من ابويا اروح اشتغل باي مكان يقولي سنك دي خطر تروحي تشتغلي بمكان لوحدك.  مع كل الفقر والحياه المذله لكن بابا كان بيخاف علينا وحريص علينا اووي... 

وفي يوم كنت بنضف في الكشك بتاع بابا وبغسله وقفت عربيه سمراء كبيره زي اللي بنشوفها بالأفلام كدا. 

بابا كان قاعد بيرصد الجرايد ويظبطهم  واول ما شاف العربيه قام بسرعه واخد كام جريده ومجلتين.  

استغربت انا !! 

معقول بابا يعرف الراجل دي ؟  

اكيد يعرفه لانه بسرعه جاب طلبه من غير ما يتكلم او حد نشوفه.. 

راح بابا ناحيت العربيه وانا عيني عليه واتفتح قزاز العربيه الوراني 

وكان راجل في الخمسين من عمره وواضح عليه الوقار والهيبه زي البشوات بتوع زمان . ليه هيبته وقوته كدا. 

بابا واقف معاه وعطي ليه الجرايد والمجلات وانا ملاحظه عينه باصه ناحيتي. 

بسرعه غيرت مكاني اللي كنت واقفه فيه. 

عشان ابعد عن نظراته.  

وفجاه لقيت بابا بينادي عليا . طلعت من جوه كشك الجرايد بصلي وقال. 

_ انا رايح مع البيه خليكي هنا شويه وراجع 

مشي بابا وانا بفكر هو واخد بابا ورايح فين..

_ بعد ساعه رجعت العربيه ونزل بابا  وقرب مني والعربيه مشيت.. 

_ طول الوقت بابا ساكت بس. 

اللي حسيته كل شويه يبص عليا وعينيه بطول بنظره عليا . لدرجه زرع جوايا شك وفضول وعايزه اعرف بيبص عليا ليه.. 

وفجاه وبدون مقدمات .

بصلي وقال .. 

_ صفيه يا بنتي تعالي هنا جمبي عاوزك.. 

قربت منه وقعدت جمبه بص ناحيتي وحط ايده علي كتفي وربت علي ضهري بحنيه اول مره اشوفها منه. وقالي 

_ انا عايزك تروحي المحل بتاع المعلم لطفي وتجيبي لابسين حلوين ليكي كدا . 

_ وراح مطلع فلوس  !!

_ بصيت عليه وانا بمد ايدي ليه وقلت. 

_ اي ده يا بابا 

بصلي وضحك وقال .

_ دي فلوس منا عارف عمرك ما مسكتيها  . عديهم تلاقيهم 500 جنيه 

_ اخدتها وعديتها طلعوا خمسمائة جنيه بصيت وانا مستغربه..

_ دول ليا انا يا بابا 

_ ايوه ليكي ويلا روحي اشتري الملابس واللاقيكي علي البيت.. 

_ انا مش عارفه اوصفلك الفرحه كانت اد ايه فرحتي اتحولت عياط مش مصدقه معايا فلوس.  وهشتري ملابس !!  

يااه حكمت يارب. 

اخدت الفلوس وجريت ورحت المحل  وجبت اللبس ليا  وانا مروحه فضلت معايا فلوس.  

وصلت الحاره وانا مبسوطه وطلعت الشقه  ومعايا الملابس.  

واول ما شافتني ماما . بصت عليا مستغربه وقالت.. 

_ جبتي الملابس دي منين يا صفيه اتكلمي. 

_ بصتلها بضحكه. 

جبتها بفلوس يا ماما والله مش سرقتها متخفيش 

ماما عنيها وسعت مستغربه. 

_ فلوس ؟ !! 

وهجيلك منين الفلوس بقي يا ست صفيه 

وقبل ما اتكلم .

 بابا فتح الشقه ودخل ومعاه  اكل وملابس لاخواتي  وكان معاه واحد وبايده  بطانيات جديده.  

_ امي واقفه ومستغربه حتي من بابا.. 

نادي عليا بابا وقال..

_ جهزي الاكل دي يا صفيه عشان ناكل كلنا مع بعض. معايا كلمتين مع امك وراجعين ناكل سوا.. 

_ خد ماما ودخلوا اوضتهم.. 

بعد نص ساعه خرجوا الاتنين وقعدوا علي الاكل معانا.. 

_ واللي استغربته علي الاكل . نظرات ماما ليا.  وكل فتره والتانيه بتبص عليه. 

نفس اللي حصل من باب في الكشك وكانهم بيقولوا دي اخر مره نشوفك فيها 

الخوف والتوتر اتسرب ليا ومش عارفه فيه ايه بالظبط. 

_ خلصنا الاكل وماما قامت وندهت عليا ودخلت معاها اوضتها.. 

وقبل ما اقعد قالت...

_ هاتي اللبس الجديد اللي جبتيه.  

طلعت بره وجبت كيس الملابس . واختارت  واحد منهم ولبسته. 

_ لبست اللبس الجديد وبدون مقدمات ماما فضلت تبوس فيا وتحضني وانا مش فاهمه حاجه..

بعدت عنها وقلت..

_ هو في ايه يا ماما مش تتكلمي فيه ايه. 

بصتلي ومسكت ايدي ..

_ اسمعي يا صفيه يا بنتي النهارده اخر يوم ليكي هنا في الشقه . 

انتي دلوقت مرات الباشا وهتعيشي معاه بالقصر بتاعه.  وعايز اقولك حاجه تحطيها براسك. 

_ اوعي ترفضي طلب للبيه. اي حاجه يقولها او يطلبها منك تقولي حاضر وبس  وخليكي فاكره اخواتك الغلابه دول . 

لو زعلتي البيه في حاجه ممكن نتشرد. دي ايديه طايله وكفايه انه هيساعدنا في تعليم اخواتك والعيشه دي .  

_بصتلها وانا مش قادره استوعب كلامها.. 

_ قولي يا ماما انكم بعتوني خلاص ملهاش تفسير تاني..

_ قربت مني وحضنتني بدموعها.. 

_ احنا مبعنكيش احنا انتي مراته بعقد شرعي قدام ربنا وشهود..

_ انا مش زعلانه يا ماما انا عشان اخواتي وانتوا تعيشوا كويس  موافقه علي كل حاجه.. 

_شويه ودخل بابا علينا..

تعالي  يا صفيه سلمي علي اخواتك عشان العربيه بتاعة الباشا تحت مستنيه..

_ ودعت اخواتي بالدموع بعيوني. بس جوايا انا مبسوطه لانهم هيعيشوا حياه كويسه بسببي ودعت بابا واخدت شنطتي ونزلت مع بابا..

_ الحاره كلها كانت بتبص علينا والناس حوالين العربيه والكل بيسئل مين دي .

ركبت العربيه وكنت وحدي اللي فيها وبعد ما طلعنا من الحاره ومشيت العربيه شويه. 

فجاه وقف السواق بمكان. 

ببص حواليه مش عارفه ليه هو وقف.  

بصيت ناحيته وقلت..

_ لو سمحت احنا وقفنا ليه هنا ؟

مردش عليا ولا عبرني حتي قررتها اكثر من مره وهو زي الصنم مش بيرد عليا .

خوفت اووي ومش عارفه مصيري ايه وايه اللي بيحصل دي .

العربيه فخمه ومش عرفه افتح اي حاجه جواها لا زجاج ولا باب حاجات اول مره اشوفها او اعرفها..

_ فضلنا علي الحال دي ساعه كامله واحنا واقفين بطريق.. 

_ بعد الساعه جات عربيه لونها اسمر وافتكرت العربيه اللي جات اخدت بابا من الكشك .. وقفت العربيه قدام العربيه اللي انا فيها.. 

_ شافهم السواق اللي كان سايق بيا ونزل بسرعه وفتحلي الباب. 

_ نزلت انا وعايزه اعرف في ايه قربت ناحية العربيه بتاعت البيه . 

وفتحلي السواق الباب ودخلت وكان الباشا جوه العربيه وانا ركبت قدام . 

_مشيت العربيه بسرعه ودخلنا من مكان غريب بعيد عن المدينه.  ووصلنا قدام قصر كبير أشبه بقصر الأمراء والملوك مبني ضخم جدا ..

واحنا ماشيين جوه القصر دي اشجار ضخمه وورود  . 

وقف السواق لحظه.  وطلع صوت من ورايا. 

_ دي السرايا اللي تعيشي فيها يا صفيه 

_ بصيت ورايا وكان البيه هو اللي بيتكلم 

قلت بيني وبين نفسي. 

اخيرا سمعت صوتك. 

وكملت العربيه ومشيت وقفنا تاني قدام سور ضخم ولما شفته كنت مفكر ه دي نهايه الطريق بتاع   السرايا لانه سور حديد مفيش بعده حاجه 

وبعد شويه السور اتفتح لوحده. 

_ استغربت وفضلت فتره ابص عليه ومستغربه ازاي فتح دي  .. بص البيه ناحيتي وقال..

_  متركزيش في حاجه لانك مش هتفهمي اي دي هنا السرايا كلها أسرار. 

وخلي بالك أسرار السرايا مش بتطلع بره بتدفن مع صاحبها جواها. يعني اللي تعرفيه هنا تكتمي عليه. 

_ اسمعي اللي بقولك عليه ونفذيه..

انا منصور بيه الدالي كل اللي عينك شيفاه دي ملكي انا .

انا اللي عايزه منك الطاعه وبس ومحدش يعرف عنك حاجه  

_ انا شفتك قبل كدا مع باباكي اكثر من مره عجبني هدوءك واتزانك وانك بنت شقيانه ومتعوده علي التعب وهستفاد  كتير هنا  وعشان كدا اخترتك لأكثر من مهمه جوه السريا.  

***

وقفت العربيه وبص منصور بيه ناحية صفيه وقال. 

_ انزلي يا صفيه وتعالي ورايا. 

نزلت صفيه وماشيه تتهادي وراء منصور بيه . اللي حس بضعف خطواتها.  

_بصلها بنظره حادة وقال بصوت مرتفع 

في اي ماشيه خايفه ليه تعالي بسرعه 

جريت ولحقته صفيه 

وصلوا جوه غرفه غريبه ومقغله من كل مكان تشبه الصندوق..

_ وقف منصور وقال بصوت شديد. 

عوف فينك 

طلع واحد من الغرفه يجري اسمر البشره شديد الوجه شكله الاسمر مع وجه وعيونه التاسعه ترعب اي حد يشوفه.. 

بصله بنظره حاده منصور بيه وقال 

_ انا بردان يا عوف . دفي الغرفه.  

صفيه استغربت وقالت بين نفسها. 

_ بردان ازاي وانت لابس جاكت يدفي عيله بحالها واللي زيكم عمره ما يشعر ويشوف برد زي الغلابه.  

_ طلع عوف ومعاه واحد مسكها من ايديها وقابض عليها.  شافت منصور وجريت ركعت تحت رجليه ومرعوبه وخايفه وعماله تعيط بشده وتنوح وتقول .

_ارجوك احب علي رجلك ما تموتنيش انا معرفش حاجه يا منصور بيه معرفش 

_ صفيه واقفه جمب الحيط ووشها احمر وجسمها كله بيرعش مرعوبه وخايفه من المنظر اللي قدامه  . 

قرب عوف من مجموعه زراير وضغط عليها وفجاه ظهرت نار شديد جوه الصندوق اللي جوه الغرفه وبلحظه الغرفه بقيت مضائه بالنار وشديدة الحراره.. 

_ منصور دفع البنت برجله ووطي مسكها من شعرها بعنف وقوه والبنت تتاوه وتعيط بغزاره وقرب منها ووشه كله غضب وكره وغيظ. 

_ للمره الاخير من اللي كان مع دلال يوم الحادثه انطقي..

 البنت بعياط مرير  ورعب وخوف..

_ والله ما اعرف حاجه عنه يا سعادة البيه 

_ منصور شاور لعوف برأسه.  

مسكه عوف البنت ودخلها جوه الصندوق ورمها جواه والبنت بتصرخ بقوه. وبتقول

_ حرام عليك ما عايزه اموت . حرام عليك يا منصور بيه.. 

_ قرب منصور من صفيه وشافها مرعوبه والعرق نازل منها بغزاره وسحبها من ايديها وخرج بره الاوضه..

_ وقف منصور وطلع سيجاره وولعها ونفخ دخانها ناحية صفيه وفضلت تكح 

_بصلها بنظره حاده 

اسمعي لازم تبقي قويه ومتخفيش من اي حاجه تحصل قدامك انتي باول الطريق ولسه المشوار قدامك صعب. 

.الاهم تنفذي كل اللي أطلبه منك بدون نقاش. 

_ دلوقت هندخل السرايا وهتتعرفي علي الناس اللي فيها خليكي قويه _متخفيش 

الفصل الثاني 

خادمه بعقد شرعي 

تاليف #القلم الذهبي 

           ************************

وصلت العربيه بعد ما طلعنا من اوضة الرعب وركبت  وركب منصور بيه ووصلنا عند  السور كالعاده وفتح  ومشينا مسافه وبعدها دخلت العربيه ناحية السريا. 

_ انا فعلا مرعوبه من اللي بيحصل دي ومش عارفه ولا فاهمه حاجه من اللي بتحصل معايا دي. 

_ وقفت العربيه قدام السرايا ونزلت ونزل البيه وماشي قدامي بخطواته بكبرياء البشوات بتوع زمان.  

اول ما دخلنا السرايا من جوه. 

انا اترعبت من شكلها حاجه فخمه كتير وحاجات جميله اووي ومليانه تحف اثاريه 

حاجات مكنتش احلم اشوفها بالواقع  .

_ وقفنا بنص بالسرايا . 

وظهر راجل كبير بالعمر . اشاره برأسه منصور بيه مشي من قدامه وبعد شويه رجع ومعاه طابور من الناس.  

_ انا كنت واقفه وراء منصور بيه بص ناحيتي وقال. 

_ دي عم حسن المسئول عن الخدم والمطبخ وهتكوني مع افراده بالشغل هنا. 

_هزيت راسي بنعم. 

خلص منصور كلامه معايا وعطي الأذن لحسن يتكلم..

_ تعالي هنا يا صفيه عشان اعرفك بيهم 

_ استغربت ازاي عرف اسمي حسن وهو  اول مره يشوفني او يعرفني. 

_ خلص كلام عم حسن وعرفت الناس اللي هشتغل معاهم 

شعبان سواق مدام عايده.  سناء شغاله خدامه من زمان معاهم . وادريس وفضل بيشتغلوا مع عم حسن بالمطبخ مساعدين 

عم حسن شغلته الاساسيه طباغ البيه زي ما بيقولوا عليه.  

_ 

منصور بيه واقف بعيد وبيدخن سيجارته المعتاده شافنا خلصنا كلام  واالناس رجعت مكانها.  نادي علي حسن وقال..

_ تعالي يا عم حسن عايزاك 

جري حسن ناحية منصور ووقف قدامه 

 بصله منصور بيه وقال ،

_ عرف صفيه هتنام فين واعطيها لبس الشغل وخليها ترجعلي هنا يلا بسرعه 

_ امرك يا منصور بيه 

_ مشيت مع عم حسن ووصلنا عند غرفه فتحها ودخلنا جواها الغرفه صغيره مش كبيره بس مقبوله فيها ملابس كمان.  وعرفت هلبس ايه للشغل. 

بجاجه زي باقي الخدم.  

خلص حسن وعرفني كل حاجه وبصلي وقال. 

_ اسمعي يا صفيه الشغل هنا متعب باوله بس هترتاحي بس تعرفي شغلك وكل حاجه تخص الشغل . 

اهم شي تسمعي الكلام وبس 

هزيت راسي ورديت عليه 

_ حاضر يا عم حسن . متخفش انا هعمل كل اللي يطلب مني وانا ساكته. 

_ بصلي حسن وابتسم برافوا عليكي كدا هتعمري بالسريا.  يلا تعالي شوفي منصور بيه عايز منك ايه..

طلعنا من الاوضه .  وقفلها وراح ناحية المطبخ وانا رحت ناحية منصور بيه 

_ وقفت قدامه وفضل يبص عليا بنظرات مش مفهومه وانا ساكته. 

ونفسي  اعرف فيه بالظبط.  وليه نظراته دي. 

وقف منصور بيه من مكانه وبصلي بنظره حاده وقال .

_ اسمعي يا صفيه . دلوقت احنا هنروح عند دلال هانم  . 

وعايزك تفتحي عنيكي قووي وتعرفي كل صغيره وكبيره بتعملها وبتكلم مين وكل حاجه عنها ولو سألتك انتي مين وعرفتي منصور بيه ازاي. 

_هتقولي عم حسن جابني هنا اشتغل خدامه في السرايا . دي اللي اعرفه بس . 

_ بصمت هزت راسها صفيه بنعم.  

كمل كلامه منصور. 

يلا تعالي ورايا 

ركب منصور السلم وطالع فوق بالدور التاني ناحية غرفة دلال مراته. 

_ وصل عند الغرفه. وأشار بايده لصفيه توقف بره 

_ دفع الباب برجله ودخل . اتفزغت دلال من دخوله بالطريقه المتوحشة دي وكانت قاعد علي كرسي متحرك. 

_ بصتله بعيون حاده وكاتمه الغيظ جواها 

_ انت مش ناوي تبطل دخلتك دي عليا يا منصور.  

_ قرب منها منصور بنظراته الحاده وقال ببرود وثقه وكبرياء. 

_ اسمي منصور بيه يا بنت الاكابر. وادخل عليكي زي ما انا عايز وبالطريقه اللي تعجبني  والا انتي ناسيه انتي عايشه فين ؟ 

_ بصتله دلال بقرف.  

_ ويا تري عايشه فين يا منصور بيه . انا مش ناسيه ولا عمري هنسي. انا عايشه في قصر بابا ولا عمري هعرف غير كدا  والا امكن انت نسيت . انت عملت ايه عشان تستولي علي القصر دي والمصنع... 

_ قرب منها اكتر منصور وبيجز علي اسنانه وكله غضب. 

_ انا مش منصور اللي يا خد حاجه مش بتاعته.  القصر والمصنع اشتريتهم من المرحوم باباكي بفلوسي وتعبي.  ولولا منا عامل خاطر لعشرتي لوالدك كان زمانك مرميه بره تاكلك الكلاب.. 

دلال بصتله بسخريه.. 

_بفلوسك. وفلوسك دي كانت فين . انت قصدك اخدتهم بخداعك واللعيبك القذره وخونت الامانه اللي امانك عليها بابا.. 

_ منصور مد ايده ومسكها من شعرها بقوه وقهر وقال وهو وجهه بوجها 

_ انتي اخر واحده تتكلم عن الخيانه.  واللي نسيتي كنتي سهرانه مع مين يوم الحادثه. 

بس متخفيش مصيري هعرفه وهوريكم انا هعمل اي فيكم .

ولحد ما اعرف هخليكي تشوفي الذل والقهر اللي جوايا . واخليكي تتمني الموت وتشوفيه قدامك.  اصبري عليا يا بنت الاكابر.  

_ دلال بتتلوي وتعيط من وجع شدة شعرها 

سابها وبعد عنها منصور. بصتله ودموع القهر والذل عليها.. 

_ انت عمرك ما هتنضف دماغك من القذاره اللي فيها وعشان انت خاين شايف كل الناس زيك . شوف نفسك كنت ايه وبقيت ايه يا منصور يا دالي. 

_ بصلها منصور وضحك بقهقها عاليه وسخريه. 

قولي وطلعي اللي بقلبك بس عمرك ما هتقدري تستفزيني عشان اقتلك وترتاحي.  لا دي بعدك لازم ازلك وبعدها اخرتك عند عوف.  

_ طلع سيجاره ونفخ دخانها لفوق وبص ناحية صفيه اللي كانت واقفه بره وبصوت عالي حاد.. 

_ صفيه تعالي هنا. 

دخلت تجري صفيه وقفت قدام دلال ، بص منصور بيه ناحية دلال وقال بصوت هادئ 

_ دي صفيه الخدامه الجديده هتفضل هنا لرعايتك وتشوف طلباتك 

بصتله دلال بعيون دبلانه وصوت متعب 

_ وديت فين سعديه الغلبانه يا منصور. 

رد ببرود اعصاب وهدوء. 

_ سعديه يا هانم خلاص بح.  رفضت تريح قلبي من النار اللي فيه. 

فحرقت قلبها. يعني انسيها خلاص.. 

اتنهدت بيأس وتعب وقالت بصوت خفيض 

_ منك لله يا منصور . ربنا علي الظالم.. 

قاطع كلامهم دخول حسن  .

_ اسف يا منصور بيه . الدكتور امجد بانتظارك تحت. 

هز راسه منصور لحسن ومشي وبص ناحية دلال وسابها ومشي وقبل ما يخرج من الباب اوقفته بكلمتها. 

_ ياريت يا منصور بيه تخلي الدكتور امجد يغيرلك نوع العلاج بتاعة المرض النفسي لاحسن مش جايب نتيحه معاك. 

اشعلت النار بقلبه بكلامتها اللي نزلت كالبركان الغاضب عليه..  

خرج امجد وقفل الباب وراه بقوة بيعبر عن الغضب اللي جواه من كلام دلال 

*

واقفه صفيه جمب دلال ومتوتره وبتقول مع نفسها بعد ما سمعت الكلام اللي دار بين دلال ومنصور بيه..

_ يعني انا هنا بدل البنت رماها بالنار عوف يعني انا ممكن يحصلي اللي حصل لسعديه 😱 يمصيبتي. هو انا سبت الفقر والعيشه الذل وجيت هنا لقدري.  يا تري اي اللي مخبياه ليكي  الايام يا صفيه. 

_ قطع تفكيرها دلال قالت 

واقفه بعيد ليه يا صفيه تعالي هنا 

_ قربت صفيه جمب دلال بصتلها من فوق لتحت وقالت..

_ قبل ما تجاوبي علي اسئلتي اللي هسئلك فيها.  خليكي فاهمه كويس انا مش بحب الكدب والمراوغه بالكلام يعني تقولي الحقيقه وبس 

هزت صفيه راسها بنعم..

_ مين جابك هنا ؟ 

_ عم حسن اللي جابني هنا يا ست هانم عن طريق واحد قريبي 

_ اسمعيني كويس انتي باين عليكي بنت غلبانه واكيد بتصرفي علي اهلك او اخواتك 

_ اي كلام او حوار يدور بينا هنا او تسمعيه مني مع اي  حد تاني . ميطلعش بره الاوضه دي . دي لمصلحتك لو عايزه تطلعي من هنا بامان 

انا مش عايزه اخوفك بكلامي بس للاسف دي الحقيقه لازم تحفظي السر  وتخلي بالك من نفسك. 

صفيه بخوف وقلق. 

تحت امرك يا ست متخفيش من اي حاجه انا اهم حاجه اشتغل عشان اهلي واخواتي..

دلال بابتسامه !!

_ برافوا عليكي وانا هخليكي تعيشي اهلك احسن عيشه لو لقيتك تحت طوعي وبتسمعي الكلام وتنفذيه.

ودلوقت روحي اوضتك وارتاحي والصبح تعاليلي. عشان نكمل كلامنا واشوف هحتاج منك اي 

_ ماشي يا ست هانم تحت امرك... 

_ خرجت من صفيه من عند دلال هانم  والصراعات جواها وبتفكر باللي هيا فيه ومش فاهمه حاجه من اللي بيحصل الكل عايزها تشتغل لحسابه والكل ليه اسرار مخفيه ! هيا ايه ؟ متعرفش.. 

*****

في المطبخ حسن بجهز في قهوه  وسناء بتنضف في المطبخ. 

قربت من حسن وقالت .

_ هو ايه اللي بيحصل يا حسن فجاه في  يوم وليلة اختفت البت سعديه  وظهرت فجاه صفيه انا مش فاهمه حاجه 

_ واحنا من امتي بنسال يا سناء علي حاجه في السريا احنا هنا نسمع الكلام وبس. 

_ يوه يا حسن انا بدردش معاك انت بس انا عارفه منقدرش نتكلم في حاجه. 

_ لا خليكي فاهمه وبلاش دردشه في حاجات زي دي الحيطه ليها ودان. 

بعد اذنك هروح اودي القهوه للبيه 

_ طيب يا خويا روح اذنك معاك . 

خرج حسن من المطبخ وشويه ودخلت صفيه المطبخ.  لقيت سناء بوشها. 

_ شافتها سناء وقابلتها بابتسامه..

_ تعالي يا حبيبتي مالك واقفه ليه كدا. 

_ مفيش بس جعانه من بدري علي لحم بطني وجيت اشوف عم حسن يجبلي 

اي حاجه اكلها.  

_ يا خبر وليه مقولتيش. تعالي اقعدي هنا 

_مسكتها سناء من ايديها وقعدتها علي طاوله بالمطبخ . احنا بقي يا حبيبتي بناكل هنا دي مكان اللي زينا بس. 

طلعت سناء اكل كتير من المطبخ وفضلت ترس قدام صفيه من كل الاصناف. 

_ صفيه مستغربه من سناء .

كفايه يا سناء اي الاكل دي كله !! 

سناء بضحكه. 

_ كولي يا حبييتي الاكل هنا كتير اووي ومش بيخلص ابداا وبعدين مش هتستفيدي بحاجه من هنا غير الاكل .. 

كولي واتغذي وطول ما انا معاكي هنا متقلقيش من اي حاجه ولو عايزه اي حاجه اطلبيها مني . احنا غلابه زي بعض وسرنا واحد .

صفيه بتاكل جعانه ومش عارفه تاكل من اي والا ايه  .

وبتقول بنفسها.. يا  تري أسرار ايه اللي واحد يا سناء يا داهيه كمان انتي يكون عندك أسرار وعايزه مني حاجه زيهم  دي قصر العجايب كدا.. 

قربت سناء من صفيه وهمست . 

_ بقولك اي مش اي حاجه تعرفيها هنا تقوليها لأي حد خلي بالك دول ناس ايديهم طايله. لو عرفتي حاجه تبقي بيني وبينك بس  .. 

_ حسن داخل المطبخ وشاف سناء لاصقه جمب صفيه وعماله تتكلم معاها بصوت واطي. شافته سناء قامت من مكانها. شاورلها حسن تيجي عنده. 

سناء قربت من حسن وقالت 

_ خير يا حسن عايز ايه 

_ بتقولي اي للبت يا سناء ابعدي عنها وخليها تاكل عيش. 

_ بصتله سناء بغضب 

_ وانا عملتلها اي يا حسن احنا ستات وبنتكلم كلام عادي ميخصكش انت 

_ انا بحذرك يا سناء متفتحيش عيونها وخليها زي مهي ماشيه بلاش تجبلنا مشاكل. 

بصتله وقالت بخبث.. 

_ جرا اي يا حسن مالك عليا كل ما اتكلم معاك تقولي بلاش مشاكل.  مشاكل اي الا بعملها انا . بقولك اي ابعد عني واختصر شري احسنلك وخليني ساكته.. 

_بصلها وكشر حسن 

وتسكتي ليه عايز اشوف ماسكه عليا اي يا ست سناء..

_ وبعدين !! 

 بلاش يا حسن لو مش خايف مني خاف من لساني.  لو اتكلم هتندم اووي...   

                      الفصل الثالث من هنا

لقراءة باقي الفصول من هنا