تعريف الشخصيات والاول
حامد السيوفي: كبير عائلة السيوفي ، رجل لديه تلات اولاد (هنعرفهم في الاحداث) ، عمره 80 سنة وعلي الرغم من سنه الكبير بس قوي وكلمته مسموعة وبيحترمه كل الناس ، وقلبه طيب بس قلبه قسي في يوم في الماضي وندمان على كدا (باردوا هنعرف ايه حصل)
فهد المنياوي: شاب طويل وعيونه زرقاء وبشرته بيضا وشعره بني فاتح (ايه الاجانب دي😂) ، رجل اعمال كبير عنده شركة لتصميم الأزياء ومن اكبر الشركات في المجال دا ، عمره 30 سنة شخصيته حادة الطباع حياته مقفولة مش بيحب العلاقات الجديدة ومعندوش غير اخت واحدة وصديقين قريبين منه جدا ، وعلى الرغم من شدته في التعامل بس الكل بيحبه وبيحترمه ، وعنده عقدة من النساء بسبب والدته (هنعرف الحكاية بعدين)
نهلة: اخت فهد الوحيدة وبيحبها جداااا ، بنت جميلة ورقيقة ، ليست محجبة وشعرها قصير عند الرقبة وطويلة وبشرتها بيضا ولون عيونها ذي لون عيون اخوها زرقاء (لون البحر😍) ، عمرها 18 سنة وفي ثانوية عامة
ندى: بنت رقيقة ومحجبة وبتحب اسرتها جدا المكونة من ( اب وام ) وصاحبتها الوحيدة هي نهلة لانهم مع بعض في نفس المدرسة وسنهم ذي بعض ، بشرتها بيضا وملامحها وعيونها اخضر فاتح(واخدة لون عيون باباها) وشعرها طوييل ، هادية جدا ، شخصيتها طيبة و حلوة مع اي حد وبتحب الهزار اوي ومبسمة دايما
كمال: ابو ندى (مش هنتكلم عنه كتير عشان شخصية استثنائية) بيحبها جدا وعمره 60 سنة موفر كل حاجة لبنته على الرغم من انهم حالتهم متوسطة
هدى: ام ندى ، طيبة جدا وعمرها 45 سنة وحنونة
فارس السيوفي: حفيد حامد السيوفي ، شاب وسيم وطويل وبشرته خمرية وعيونه بنية وشعره اسود كلون الليل ، وعمره 30 سنة صاحب مقرب لفهد ، ولسة عاذب لانه مش لاقي الحب اللي بيحلم بيه
عبدالرحمن: عمره 30 سنة والصاحب التاني لفهد ، بشرته بيضا وعيونه عسلية وشعره بني وطويل (ايه الشباب اللي كلهم طوال دول😂)
ومعجب ببنت بس مش معرف حد حتى اصحابه
(بقية الشخصيات هنعرفها في الاحداث)
الحلقة الاولى
#رواية_مكتوبة_ليك❤
#بقلم_ايمان_جمال
_______________________
صباح يوم جديد لبطلتنا ، المنبه ضرب ، ندى صحيت على صوته وفصلته وقامت دخلت الحمام تغسل وشها وتتوضى وتصلي ركعتين الصبح قبل المدرسة عشان دا اخر يوم امتحان في ثانوية عامة
والدة ندى هي هدى ذي أي امرأة صحيت من نومها عشان تجهز الفطار لأسرتها ، كمال في اوضته صاحي وكان بيصلي ، ندى خلصت صلاه ولبست هدومها وظبطت حجابها وخرجت من اوضتها
ندى: صباح الخير
كمال: صباح الورد على وردتي
هدى بزعل مصطنع: طلاما هي وردتك انا ابقى ايه بقى
كمال ضحك: انتي حياتي
ندى: نحن هنا
هدى ضحكت: بس يابت ويالا عشان تفطري ومافيش نزول من غير فطار
ندى قعدت تفطر
كمال: ندوش هقولك ذي كل يوم امتحان بلاش توتر وجاوبي كويس ومتخافيش من اي حاجة واللي يقف عليكي سبيه للآخر وان شاء الله الامتحان هيكون كويس
ندى: حاضر يا بابا انا مش قلقانة من المادة دي الحمدلله وعندي ثقة في ربنا اني هحل كويس فيها
هدى: ربنا معاكي يا حبيبتي ويوفقك
تليفون ندى رن وكانت نهلة صاحبتها مستنياها تحت عشان هي بتعدي عليها بالعربية
ندى: انا نازلة بقى عشان نهلة مستنية تحت
كمال: ماطلعتش تفطر معانا ليه
ندى: ماتقلقش ياحاج هي عازمة نفسها عندنا عالغدا اصلا😂
هدى: واحلى غدا يتعمل عشانها انا والله بحبها اوي
كمال: وانا والله ربنا يخليكم لبعض يابنتي
ندى: يارب يا بابا يالا سلام
ندي خرجت من باب شقتهم وهي نازلة كان عمر جارهم نازل (عمر شاب محترم وهادي الطباع وبيحب ندى بقاله سنين عمره 28 سنة وبيشتغل محاسب في بنك)
عمر: صباح الخير
ندى: صباح الخير ياعمر
عمر: النهاردة اخر يوم ؟
ندى: اه ان شاء الله بعد اذنك
ندى سابته ونزلت لانها مش بتحب تقف تتكلم مع حد على السلم
نهلة واقفة ساندة على عربيتها: يالا يابنتي هنتأخر
ندى: كل مرة بتقولي كدا وبنوصل بدري
نهلة لاحظت عمر: مش واخدة بالك ان كل يوم امتحان لينا تلاقيه نازل وراكي
ندى بعدم اهتمام: عادي تلاقيه نازل شغله
نهلة: يابنتي والله تلاقيه بيحبك
ندى: حب ايه يابنتي احنا في ايه ولا في ايه وبعدين يعني انا مش فاضية للكلام دا ويالا بينا عشان شكلك انتي اللي هتأخرينا بكلامك دا
نهلة: ماشي يالا
**************
في ڤيلا فهد المنياوي
صحي فهد من نومه ودخل اخد شاور وغير هدومه (لبس بدلة كحلي بقميص ابيض) ورش من البرفيوم بتاعه وصفف شعره بحرافية جعله اكتر وسامة لبس نضارة الشمس بتاعته اخفت لون البحر اللي في عيونه ، نزل تحت
فهد: دادة
دادة فاطمة: نعم يافهد بيه
فهد: انا خارج ماتحضريش الفطار
دادة فاطمة: حضرتك ما اكلتش حاجة من امبارح
فهد: معلش يادادة انا كدا مرتاح ، يالا سلام
دادة فاطمة: ربنا معاك
فهد ركب عربيته ورايح لشركته ، بعد شوية وصل شركته والسواق فتحله الباب ، دخل الشركة الكل ساب اللي في ايده وواقفين احتراما للفهد في منهم نظرات اعجاب ودا خصوصا من فتيات الشركة والنظرات التانية احترام
فهد دخل مكتبه وضرب جرس السكرتيرة وثواني ودخلت
السكرتيرة: اوامرك يافندم
فهد: جبيلي قهوتي وعرفي فارس وعبدالرحمن اني عاوزهم
السكرتيرة: مستر فارس لسة ماجاش
فهد: اطلبهولي حالا
السكرتيرة طلبت فارس وفهد اخد منها التليفون واذن ليها تخرج: اهلا بالاستاذ اللي لسة نايم
فارس بنوم: صباح الخير
فهد: خمس دقايق والاقيك عندي هنا انت عارف لو اتأخرت انت عارف هعمل فيك ايه
فارس قام من عالسرير برعب: حالا وهتلاقيني عندك
فهد قفل مع فارس وشوية وعبدالرحمن دخل
عبدالرحمن: صباح الخير يافهد
فهد: صباح الخير يا عبده اقعد
عبدالرحمن: خير
فهد: ايه اخبار الشغل في اخر دفعة ؟
عبدالرحمن: كويس جدا والمصنع شغال كويس وكل التصاميم بتتجهز بالظبط ومافهاش اي غلطة
فهد: تمام وهتتسلم امتى؟
عبدالرحمن: الاسبوع دا ان شاء الله
فهد: كدا تمام اوي ، ابعت ايميل بقى وعرفهم ان الدفعة هتتسلم الاسبوع دا
عبدالرحمن: حاضر ، يالا انا هروح مكتبي ولو احتاجتني اطلبني
فهد: ماشي
*****************
في المدرسة عند نهلة وندى خلصوا الامتحان وخرجوا وفي الطريق وقفوا عند محل ايس كريم ونزلوا يشتروا وفي نفس المكان كان موجود فارس صاحب فهد بيشتري قهوة (نهارك اسود النهاردة المفروض فهد طلب منه خمس دقايق ودا قعد ساعتين) نهلة دخلت تشتري وندى وقفت تستناها ، فارس اخد القهوة من الكافيه ونزل وشاف ندى سرح في جمالها ولبسها ولون عيونها اللي بيجذب اي حد وهي لاحظت النظرات دي واضايقت اوي وركبت العربية على مانهلة تيجي وهو اتحرج وركب عربيته ومشي ، نهلة ركبت العربية وندى اخدت منها الايس كريم ، نهلة لاحظت ان ندى مضايقة
نهلة: مالك ياندوش
ندى: انا مضايقة اوي من كل حد يبصلي هو انا فيا حاجة ملفتة انا كل لبسي طويل وكمان لابسة حجابي
نهلة: يا قلبي انتي اللي جميلة ماشاء الله وبعدين لون العيون دي اللي مودياكي في داهية
ندى بضحك: طب يالا يارخمة زمان ماما مستنيانا عالغدا
نهلة: اخيرا ياندوش خلصنا الحمدلله امتحان النهاردة على خير و كدا اخدنا الاجازة
ندى: اخيرا ، واخيرا هدخل المجال اللي بحلم بيه من زمان
نهلة: انتي عارفة ان فهد اخويا فرح اووي لما عرفته اني هدخل Fashion Academy (معهد الموضة خاص بالأزياء)
ندى: انتي يابنتي ماشاء الله عندك موهبة الرسم والتصميم كويس جداااا و عشان كدا شجعتك ندخله سوا
نهلة: بس انتي اشطر مني فيها ماشاء الله
ندى: ياحبيبتي فيه كورسات هناخدها اكيد وهنبقى كويسين في المجال دا
نهلة: خلاص تمام
بعد شوية وصلوا البيت عند ندى ، وهدى فتحتلهم
هدى: نهلة حبيبتي وحشتيني
نهلة بتحضنها: وحشتك ايه يادودو ما انا عندك كل يوم
هدى: بس يابت ياشقية انتي وبعدين ايه دودو دي احنا كبرنا خلاص على كدا
نهلة: كبرنا ايه بس يا جميل دا اللي يشوفك يقول اخت ندى مش مامتها
كمال خرج على صوتها: لا يانهلة بقى هي خلاص كبرت وانا هتجوز تاني😂
نهلة: اوبا ، انت كدا ياحاج بتلعب بالنار
كمال بيضحك اوي: مش هي بتقول كبرت خليها كبيرة بقى
هدى: بقى كدا ماااااشي
كلهم ضحكوا عليها ، ندى دخلت تغير هدومها ونهلة قعدت مع هدى وكمال ، ندى خرجت وسايبة شعرها الطويل اللي بيخليها اجمل واجمل ، تليفون نهلة رن وكان اخوها فهد
نهلة: الو
فهد: روح اخوها عملت ايه النهاردة ؟
نهلة: الحمدلله كان كويس
فهد: ربنا معاكي يا قلبي ، انتي فين
نهلة: انا عند ندى صاحبتي هتغدى معاها وهروح
فهد: ماشي بس خدي بالك انك ماعرفتنيش ودا حسابه عسير
نهلة بضحك: سماح المرادي يا ابيه فهد
فهد بغضب: بلاش ابيه دي عشان بتكبريني اوي كدا
نهلة ضحكت بصوت: عيوني لفهد حبيبي
فهد: ايوا كدا يالا خلصي وتروحي على طول
نهلة: حاضر
فهد خلص مكالمته مع اخته وفارس دخل ، فهد عيونه اتلونت بلون اخضر غامق اووووي (لون غضب الفهد)
فهد: انت لسة جاي
فارس: اهدى بس عليا
فهد: اهدى ايه وزفت ايه دا شغل دا يافارس جايلي بعد معاد الشغل بساعتين امال لو ماكنتش انت شريك في الشركة ودا شغلك كنت عملت ايه
فارس قعد بخوف: يافهد والله انا كنت عند جدي في البلد امبارح وجاي متأخر اعمل ايه ولما صحيت اتأخرت شوية في الطريق
فهد بسخرية: الطريق أخرك ساعتين مش كدا
فارس: خلاص بقى يافهد
فهد: جهز نفسك بقى انا هدرب معاك الليلادي
فارس برعب: لا ابوس ايدك انا حرمت بص عاقبني بشغل اكتر لكن تدريب ومع مين مع الفهد لا
فهد ضحك على صاحبه: يالا ياجبان
فارس: اه ياعم جبان
فهد: طب يالا على مكتبك حالا
فارس خرج جري من ادام فهد
فهد قاعد على كرسي مكتبه ورجع بضهره وسرحان في حياته وشوية ودخلت السكرتيرة
فهد: خير في ايه
السكرتيرة: مستر مهند مستني حضرتك بارة
فهد: دخليه
(مهند دا منافس لفهد و دايما شايف فهد عدوه لكن فهد مش كدا وابو مهند كان صاحب ابو فهد زمان ، وعلاقة فهد بمهند كانت كويسة بس القدر بعدهم عن بعض ، علاقتهم باقت علاقة شغل منافسين وبس)
مهند دخل: اذيك يافهد
فهد بهدوء: تمام اقعد ، تشرب ايه ؟
مهند قعد: لا مش عاوز حاجة ، انت داخل المناقصة الجديدة ؟
فهد: اكيد
مهند: بلاش يافهد وسبهالي
فهد: ومن امتى فهد المنياوي بيسيب مناقصة داخلها
مهند: انت كل مرة بتكسب اي مناقصة بتدخلها وانا عاوز اكسب المناقصة دي بجد
فهد: مهند معلش كل واحد فينا بيقدم شغله يبقى ليه انا اخرج واسبهالك
مهند: بس انا محتاج المناقصة دي
فهد وقف: وليه جيتلي انا مافيه شركات تانية داخلة معانا
مهند: ما انت عارف يافهد ان انت شركتك الوحيدة اللي بتقدم شغل اقوى من اي شركة تانية وبتكسب اي مناقصة بتدخلها
فهد بثقة: وطلاما عارف كدا ليه عاوزني اسيب المناقصة دي حتى لو انت محتاجها ؟
مهند وقف: خلاص يافهد اعتبرني ماجيتش ليك عن اذنك
فهد قعد مع نفسه بعد خروج مهند (علاقتهم ببعض كانت كويسة زمان لكن حاجة حصلت مابينهم بوظت علاقتهم خالص)
فهد لنفسه: بقيت قاسي مع الكل ليه حتى مع صاحبك جايلك محتاج انك تنسحب من المناقصة عشان شركته ماتخسرش وانت رفضت من امتى وانت كدا يافهد
فهد وقف وعيونه كلها غضب: انا هفضل كدا قاسي ومش هسمح لأي حد يدمرني ولا يكسرني
*************
في المساء
فهد رجع ومعاه عبدالرحمن وفارس ، ونهلة نزلت لما سمعت صوت عربية فهد وبتجري عليه
نهلة: وحشتني
فهد بيحضنها بحنان: دا على اساس يعني اننا مش عايشين في بيت واحد
نهلة بغضب: انت ماينفعش معاك غير اني اقولك ابيه فهد وربنا
فهد: بلاااااش عشان انتي اللي هتندمي
نهلة: لا خلاص
عبدالرحمن وفارس واقفين مستغربين فهد ، رغم قسوته مع اي حد وفي معظم الاوقات بيكون معاهم شديد في المعاملة لكن مع اخته بيكون ليها اب واخ بجد و مافيش احن ولا اطيب من قلبه
نهلة بصت لعبدالرحمن وفارس وبصت لفهد: انت ناوي تدرب معاهم الليلادي ولا ايه
فهد كان هيرد بس فارس سمعها: للاسف يانهلة ياختي هينفخنا وانا والله لسة شباب و عاوز افرح بنفسي واخوكي دا ايديه استغفر الله
نهلة ضحكت بصوت ومش ملاحظة اللي واقف مضايق من كلامها مع فارس ولا ضحكها دا: لا بص يا ابيه فارس فهد حبيبي وطيب
فارس ضحك اوي: اه ياختي طيب اوي انتي هتقوليلي
فهد بيضحك على كلام اخته: طب يالا على فوق بقى بس قوليلي انتي اتعشيتي
نهلة: ايوا طبعا هو انا هستنى اقعد دلوقتي من غير عشا
فهد ضربها على دماغها بخفة: طول عمرك مفجوعة
نهلة ضحكت: ماااشي يالا انا طالعة اوضتي
عبدالرحمن: انا هسبقكم علي اوضة التدريب
وسابهم وطلع وفهد بيبصله جامد وبغموض
فارس: ما تعفو عني الليلادي يافهد
فهد: انا طالع اغير هدومي لو نزلت لاقيتك مشيت تليفون صغير بس لحامد السيوفي
فارس برعب: ثواني وتلاقيني جاهز ، وفي ثواني كان فوق
فهد بيضحك عليه وطلع يغير هدومه
الحلقة التانية
#رواية_مكتوبة_ليك❤
#بقلم_ايمان_جمال❤
_____________________
تاني يوم الصبح كان اجازة فهد وبالنسبة لنهلة فهي اصلا خلصت امتحانات امبارح وفي اجازتها ، فهد صحي من نومه ولبس تيشرت كط ابيض وبنطلون اسود ونزل يجري (بيحب الرياضة وبيهتم بجسمه)
نهلة صحيت من النوم ورنت على ندى وقالتلها انهم يخرجوا شوية وندى وافقت ونهلة قامت تتوضى وتصلي ، بعد شوية فهد رجع الڤيلا وطلب من الدادة انها تحضر الفطار وطلع ياخد دش ، نهلة نزلت قعدت على السفرة وفهد نزل
فهد: صباح الخير
نهلة: صباح النور
فهد: صاحية بدري يعني ، مش انتي خلاص خلصتي امتحانات ارتاحي بقى ونامي براحتك
نهلة: تؤتؤ انا احب استغل الأجازة صح ومن أول يوم
فهد: امممممم يبقى شكلك هتخرجي
نهلة وهي بتاكل: اي نعم
فهد: من غير ماتستأذني صح
نهلة: انت شفتني خرجت يعني الله
فهد: رخمة اوي انتي
نهلة: بلاش رخمة دي عشان انا رخامتي وحشة اوي
فهد: طب اياكي تنطقيها
نهلة ضحكت بصوت: ماااشي عفونا عنكم
(فهد بالنسبة لنهلة ابوها مش اخوها وبس لأن والدهم توفى من عشر سنين كانت نهلة عمرها ٨ سنين ووالدتهم اتجوزت بعده بكام شهر وسابتهم)
___________________
-في بيت ندى-
ندى صحيت وغسلت وشها واتوضت وصلت فرضها ولبست وخرجت من اوضتها ، كمال وهدى كانوا قاعدين على الفطار
تدى قعدت: صباح الخير
كمال: صباح الفل
هدى: صباح النور ياحبيبتي
كمال: هتخرجي انتي ونهلة ؟
ندى: ايوا ودا بعد اذنك طبعا يا بابا
كمال: ماشي يا حبيبتي ، ها لسة باردوا مصممة على مهعد الموضة؟
ندى بتأكيد: ايوا يا بابا انا هوايتي هتساعدني وانا بجد هكون مرتاحة في المجال دا انا ريحتكم ودخلت ثانوي عام فريحوني بقى وسبوني أختار المجال دا
هدى: ماشي يا حبيبتي بس انتي أكيد ان شاء الله هتجيبي مجموع كويس وتدخلي كلية احسن
ندى: بصي ياماما انا كنت ادبي وريحت نفسي عشان كانت رغبتي هي المجال دا تفوقت في دراستي خلال تلات سنين الثانوي وكنت مجتهدة جدا وهكون مجتهدة اكتر لما ادخل المجال دا عشان دي حاجة بحبها جدا
هدى: ماشي يابنتي خلاص اللي يريحك
كمال: ربنا يوفقك في اللي تختاريه يا حبيبتي
ندى: ايون كدا ادعولي ، ويالا بقى ياكمولة ايدك على فلوس عشان نهلة زمانها جايا
كمال ضحك: ماشي يارخمة الفلوس جوا على التسريحة في اوضتي مجهزهالك
ندى: الله عليك ، ودخلت تاخد الفلوس
كمال لهدى: خايف عليها من بعدنا ياهدى
هدى: ربنا يخلينا ليها يارب وماتتحوجش لحد ابدا
كمال بدعاء: يااارب يارب
*************
نرجع تاني لفهد ، قاعد في الجنينة وسرح بخياله ورجع لعشر سنين فاتوا من بعد وفاة ابوه بحاجات بسيطة
-فلاش باك-
هناء(ام فهد): انا عاوزة كدا يافهد
فهد: انتي فاهمة انتي بتقولي ايه ، انتي كدا هتسبيني انا وأختي وتمشي تروحي تتجوزي من حد تاني غير ابويا وكمان موته كان من كام شهر بس ومكملش سنة حتى
هناء: وايه يعني انا مش شايفاها حاجة كبيرة يعني
فهد: ماتخلنيش احس انك كنتي بتحبي الراجل دا وماصدقتي ان بابا مات عشان تتجوزيه
هناء: افرض يعني ان دا صح فيها ايه؟
فهد بصدمة: فيها ايه؟ لا مفهاش حاجة وطلاما دا اللي انتي عاوزاه يبقى تنسي ان ليكي ابن او ابنة اعتبرينا موتنا مع ابونا
هناء: وبالنسبة لنصيبي من ورث ابوك؟
فهد بوجع: كل همك الفلوس والورث وبس ، بس أحب اقولك ان كل الأملاك بإسمي حتى نصيب اختي انا الواصي عليها وكأن ابويا كان عارف انك هتعملي فينا كدا وهتتخلي عننا
هناء: خلي الفلوس تنفعكم وانا عارفة هاخد حقي ازاي
فهد: طول ما انا عايش وفيا نفس عمرك ماهتاخدي حاجة مش من حقك و دلوقتي اخرجي من بيتي وتنسينا نهائي واوعي في يوم تفكري تشوفينا
هناء خرجت من الڤيلا وسافرت مع جوزها بارة مصر
-عودة من الفلاش بوك-
فهد فاق من سرحانه على رنة تليفونه وكان عبدالرحمن صاحبه
فهد: الو ياعبده
عبدالرحمن: انت في الڤيلا ولا بارة
فهد: اه في الڤيلا تعالى
عبدالرحمن: تمام مسافة السكة وهكون عندك
فهد قفل المكالمة وفضل قاعد مكانه مستني صاحبه
*****************
ندى ونهلة في المول قاعدين في كافيه
نهلة: ها هنعمل ايه في الأجازة؟
ندى: اصبري لحد ما النتيجة تظهر وبعد كدا نشوف ، بس يعني كالعادة انتي هتسبيني وتقضي الأجازة مع اخوكي ياختي
نهلة: لا والله مايحصل انا عاوزاكي معايا وبعدين انا عاوزة اخرج مع صاحبتي مش مع اخويا واصحابه واحس اني طفلة في وسطهم
ندى ضحكت على كلامها: عندك حق بس هتعملي ايه ماهو اخوكي اللي مش بيحب يقضي اجازته من غيرهم
نهلة: والله ياندى رغم اني ببقى زهقانة بس ببقى فرحانة وانا شايفة فهد مبسوط و بيضحك معاهم ، والله يابنتي معاملاته مع اي حد غريب عننا صعب اوي
ندى: ربنا يهديه ويخليه ليكي يا حبيبتي
(ندى لسة ماتقابلتش مع فهد خالص ولا هو شافها لسة ، بس هي كل اللي تعرفه عنه شغله وصوره اللي بتشوفها في المجلات)
نهلة: يارب ، بقولك ايه انا عاوزة اشتريله هدية وعاوزاكي تختاري معايا عشان انتي زوقك احلى مني
ندى: نفسي مرة تشتري هدية على زوقك انتي
نهلة: اعمل ايه ياستي انا جبتله مرة بس حسيت اني عيلة اوي وهو اتريق عليا
ندى: عنده حق راحة تشتري ميدالية انتي اتجننتي بابنتي
نهلة: اعمل ايه مش بعرف و عشان كدا خليتك تختاري انتي بعد كدا
ندى: طب يالا ياختي ادامي
نهلة وندى دخلوا محل ملابس شيك وندى اختارت تيشرت زيتي مكتوب عليه بالانجليزي (Never give up) -لا تيأس ابدا- ، واختارت شورت چينز بارمودا وكوتشي ابيض
نهلة بإعجاب: واااو جمال اووي بس تفتكري هيعجبوه
ندى: اه بابنتي عادي وبعدين اي شاب بيحب اللبس دا
نهلة: ماشي تعالي بقى نختار نضارة شمس وبرفيوم وساعة
ندى باردوا اللي اختارت وكانت كل حاجة شيك جداااا تليق مع فهد المنياوي
بعد وقت طويل كل واحدة فيهم رجعت بيتهم
****************
فهد قاعد في الجنينة مع عبدالرحمن وفارس كان جالهم من ساعة
فارس: بقولكم ايه انا زهقان ماتيجو نخرج
عبدالرحمن: ياريت اهو نغير جو
فهد: هنروح فين؟
فارس: اي مكان ، اه صح نويت هنقضي الأجازة فين السنادي ولا كالعادة هنروح الساحل
فهد: اهم حاجة هعملها انا ونهلة هنروح لجدي الأول انت عارف اني كل سنة بروح بس السنادي مأكد علينا جامد عشان فرح ابن عمي
فارس: فرح مين سليم؟
فهد: اه
فارس: يعني انا كدا رايح اشطا
فهد: ايوا طبعا ولا انت عاوز مختار المنياوي يشتكي منك لحامد السيوفي
(مختار المنياوي: جد فهد ، ابو والده ، رجل له شخصيته وشديد جدا فهد واخد منه بعض الطباع والكل يخاف منه الا فهد ، عمره في اول التمنينات وكلمته مسموعة من الصغير قبل الكبير)
فارس برعب: انت بتحب ترعبني ليه
عبدالرحمن ضحك: انت ماينفعش معاك غير كدا اصلا
فارس: ماشي يازفت وبعدين اعمل حسابك انت جاي معانا
عبدالرحمن: لا انا هخلع منكم روحوا انتوا
فهد: مين دا اللي هيخلع؟ دا بعينك
عبدالرحمن: ماليش مزاج والله
فهد: لا بقولك ايه انت كل سنة بتروح معانا فمترخمش بقى وبعدين دا لسة شهرين يعني
عبدالرحمن: حاضر يافهد هاجي وامري لله
فارس: شاطر ياعبده كدا تعجبني
عبدالرحمن: بس يارخم
دخلت عليهم نهلة
نهلة: هاي يا جماعة
فهد: هاي بحبيبة قلبي
نهلة: اذيك يا ابيه فارس
فارس: ذي الفل
نهلة: اذيك يا ابيه عبدالرحمن
عبدالرحمن: تمام الحمدلله ، وسابهم وقام
م
فهد مستغرب من تصرفات عبدالرحمن
نهلة: هو انا جيت قومته ولا ايه
فهد: لا يا حبيبتي هو اللي مزاجه وحش النهاردة وزهقان شوية
نهلة بتفهم: ماشي ، عالعموم انا جبتلك هدية
فهد: وياترى من اختيارك ولا اختيار صاحبتك
فارس ضحك اوي: اكيد مش هي اللي اختارت
نهلة بصتله بغضب: شكرا يا ابيه
فهد: بس يارخم.....وبص لنهلة: وريني ياستي جبتي ايه بس استني انده لعبدالرحمن
فهد نده لعبدالرحمن وجه وقف معاهم تاني
فهد: تعالى ياعبده نشوف نهلة جايبة ايه ليا
نهلة فتحت الهدية اللي كانت متغلفة بعلبة هداية جميلة وشيك جدا
الشباب لما شافوا الهدية اعجبوا بيها جدا وبزوقها اوووي والهدية عجبت فهد اوي
عبدالرحمن بإعجاب: الهدية جميلة وشيك وكمان ذوقها حلو بجد ، البنت دي اختيارها منسق وجميل و اكبر من سنها
فارس: فعلا ياعبده والله من جمال اختيارها وزوقها بقيت عاوز اشوفها
نهلة بغضب: انتوا ماحسسني اني طفلة مش بعرف اختار وبعدين انا اللي دفعت وهي بس اللي اختارت
عبدالرحمن بهدوء: الموضوع مش مين دفع الموضوع مين اللي عنده فن اختيار الهدايا
نهلة اضايقت اكتر: حضرتك تقصد اني مش بعرف اختار ولا عندي ذوق؟
عبدالرحمن: انا ماقولتش كدا
كل الحوار دا تحت انظار فهد
نهلة اضايقت وسابتهم وطلعت اوضتها ، وعبدالرحمن حس انه زودها شوية
فارس: كدا ياعبدالرحمن زعلتها بكلامك
عبدالرحمن: انا ماقولتش حاجة غير الحقيقة
فهد: انت عارف انت زعلت مين يا عبدالرحمن
عبدالرحمن: اسف يافهد بس انت عارف اني بقول رأيي من غير ما ازوقه
فهد: انت عارف لولا ما انت صاحبي كنت اتصرفت معاك تصرف تاني الوقتي
فارس: خلاص يافهد ما احنا عارفين ان عبدالرحمن كدا دبش
فهد: بس مش مع اختي
عبدالرحمن: بجد اسف يافهد انا فعلا حاسس اني زودتها
فهد: انا طالع اصالحها وانتوا خليكوا هنا ماتمشوش
فهد طلع لنهلة اوضتها وذي ماتوقع لقاها بتعيط
فهد: اخت فهد المنياوي دموعها ماتنزلش
نهلة: هو انا كدا وحشة يافهد
فهد: قطع لسان اللي يقول كدا بس عبدالرحمن مكانش يقصد كدا
نهلة: لا يقصد عشان طول الوقت كلامه بيحسسني اني طفلة واني مش بفهم حاجة
فهد مستغرب من كلام اخته بس قال يمكن عادي: عبدالرحمن عاوز يوصلك حاجة بكلامه لازما تكوني شاطرة في كل حاجة يانونو يعني مثلا صاحبتك في سنك بتعرف تختار هو مش عاوز حد يكون احسن منك فهمتي؟
نهلة مسحت دموعها: بس طريقته مش كويسة
فهد: انا معاكي انه فعلا غلط في طريقة كلامه بس هو اللي كدا هنعمل ايه
نهلة: ماشي
فهد باسها من خدها: يالا تعالي نخرج معاهم
نهلة وقفت على السرير ذي الاطفال😂 وحطت ايديها في وسطها: نعمممم اخرج مع مين لا ياعم اخرج انت معاهم وانا هنا قاعدة براحتي وبعدين انا لسة جايا من بارة جوايا فرحانة ومبسوطة.....وقربت من ودنه: ولا اقولك اخلع منهم وتعالى نخرج انا وانت وبس
فهد مسكها من ودانها: في بنت مؤدبة تقول اخلع
نهلة: اه انا
فهد ضحك بصوته الرجولي الجذاب: حاضر ياستي هنخرج سوا
فهد نزل وسابها تجهز وقال لاصحابه انه هيروح يفسح اخته
******************
في المساء في بيت ندى ، خالة ندى جات تزورهم هي وابنها حازم وندى مش بتحبهم خالص من الآخر يعني مش بترتاح لعيلة مامتها (دايما اعرف ان عيلة الأم هي اللي محبوبة وعيلة الأب مكروهة بس عند ندى الموضوع مختلف)
(هنية (خالة ندى) امرأه في اواخر الخمسينات ، اكبر من والدة ندى وعندها ولد وحيد وهو حازم )
هنية: اخبارك ايه ياهدى واخبار كمال وندى ايه مش شيفاهم يعني؟
هدى: كلنا تمام الحمدلله كمال لسة نازل من شوية وندى جوا بتصلي العشا
هنية: اها ربنا يتقبل منها يارب ، احنا قولنا نيجي نشوفك عاوزة حاجة كدا ولا كدا واتكلم معاكي في موضوع مهم
هدى اضايقت انها بتحسسها انها قليلة: انا الحمدلله مش محتاجة حاجة كمال ربنا يخليه لينا مش مخلينا محتاجين حاجة وبعدين ايه الموضوع المهم اللي عاوزة تتكلمي فيه معايا
حازم اللي اتكلم: احنا كنا جايين ياخالتي عشان نتقدم لندى