في قرية صغيرة من قري صعيد مصر كانت تعيش اسرة فقيرة مكونة من أب وأم وثلاث بنات وولدين....
كانوا يتناولون وجبة العشاء فالليل....
الأب: أسكتي يا ام احمد مش ابن عمي الي شغال بواب عمارة في مصر جايبلي شغل....
الأم: يا حلاوة هنسافر مصر يا ابو احمد انا من زمان نفسي اشوف مصر....
الأولاد كانوا مبسوطين جدا لأنهم عمرهم ما خرجوا برة القرية بتاعتهم وبيقولوا لأبوهم
_ ها يا ابويا نجهز نفسنا امتي...
_ من بكرة يا ولاد ...
ماعادا انتي يا ريحانه مش هينفع تيجي معانا
_ ليه بس يابا هتسيبني هنا لوحدي
_ لا يا بنتي أسعد ابن عمك طلبك للجواز وانا وافقت
_ هترميني يابويا انا لسه ١٣ سنه
_ ومالو يا بت امك اتجوزت وفتحت بيت وهي ١٢ سنة ...
عايزه تعنسي زي بنت عمتك الي بقي عندها ١٩ سنه ولسه متجوزتش....
_ لا يابا بس انا مش عاوزه اتجوز دلوقتي انا عايزة اسافر معاكم مصر....
ماتتكلمي ياما...
_ هتكلم اقول ايه يا بنتي هو في بعد كلام ابوكي كلام....
_ افهم من كدا ايه هترموا بنتكم ...
_ نرميكي ايه يابت احنا هنسترك ونجوزك لأبن عمك زينة الرجال....
_ ايوة بس انت عارف من زمان ان مرات عمي بتكرهي يابا ومبتحبنيش لانا ولا امي ...
_ وانتي مالك بيها بس انتي في حالك وهي في حالها....
_ منا هعيش معاها في نفس البيت....
_ يوووووه اكتمي يابت احنا معندنا بنات تتشرط ...
البنات تقول حاضر وتسكت...
_ حاضر يابا.... حسبي الله ونعم الوكيل...
_ بتقولي ايه يابت...
_ مبقلش خلاص انكتمت اهو...
بدأت ريحانه في تجهيز نفسها للفرح الي هي اتغصبت عليه....
كان نفسها تسافر زي اخواتها....
وتشوف الدنيا لكن هي لو كسرت كلام ابوها هيكسر راسها....
اسبوع بظبط واتجوزت .....
بعد الفرح الأهل لموا حاجتهم واستعدوا للسفر علي القاهرة....
وصلوا محطه مصر ومن هناك راحوا عالمهندسين ومسكوا عمارة هناك.....
كل يوم الأب يطلع يلم الزبالة من السكان والأم تكنس السلم ...
والبنات الصغيرة كانوا بيشتغلوا في تنضيف البيوت مع امهم...
والولاد اشتغلوا شغل برة وفيوم كانوا قاعدين ودار بينهم حوار....
_ انا قلبي واكلني علي ريحانه قوي يا ابو احمد....
_ هيكون جرالها ايه يا ولية هتلاقيها مش مصدقه نفسها مع أسعد ....
_ الخوف من أمه العقربة دي...
_ متخافيش ي ام احمد ...
_ طب انا عاوزه اكلمها اتطمن عليها....
_ هنكلم البت وهي بقالها اسبوع عروسه دا حتي يبقي عيب...
_ لا يا اخويا انا هكلم بنتي بكرة....
تاني يوم ام احمد اتصلت ب ريحانه....
_ ايوا يا ريحانه يا بنتي عاملة ايه....
ريحانه بصوت مكسور...
_ الحمد لله ياما كويسه ...
_ مالك يابت صوتك ماله....
_ ايه ياما مش سمعاكي التليفون بيقطع....
ايوة استني ياما اطلع بره....
ايوة ياما انا تعبانه اوي هنا انا عملت نفسي مش سامعه عشان اكلمك من برة....
_ مالك يابت...
انا في كارثه هنا ومش عارفه اعمل ايه
الفصل الثاني
بقلم/غادة سعيد
_ من تاني يوم جواز وانا شغالة زي الساقية طبيخ وغسيل
وكنس ومسح كأنهم جابوا خدامة....
الله يسامحك يابا كان زماني معاكم دلوقتي....
اقفلي ياما دلوقتي عشان بيندهولي....
قفلت ام احمد وهي قلبها واكلها ع بنتها الي ملحقتش تفرح حتي اول شهر في جوازها....
ودخلت تكلم ابو احمد جوه....
_ مش قلتلك انا قلبي واكلني عالبت...
_ ايه الي حصل ...
_ البت متبهدلة عندهم ومشغلنها زي الخدامة ..
_ ومالوا مهو بيت جوزها ومن حقه يخليها تخدم امه
_ ياراجل دي بنتك المتبهدلة انت ايه مبتحسش....
_ انتي بس الي كنتي مدلعاها دلع ماسخ
فات اسبوع وأبو احمد لقي ريحانه بتتصل بيه....
_ ايوة يا ريحانه يابنتي...
_ ايوة يابا الحقني انا خلاص قرفت انا مش هعد معاهم تاني....
أسعد منه لله نازل ضرب فيا....
و أمه العقربة مشغلاني خدامة ابوس رجلك تعالي خدني انا عاوزة اعد معاكم....
_ انتي اتخبلتي يا بت الناس تقول علينا ايه اننا معرفناش نربي....
_ يابا مش مهم الناس منا هسافر معاك ومش هنيجي هنا تاني....
_ استحملي يابنتي.....
قفل معاها وريحانه اعدت حزينه كل يوم تصحي من الفجر تجيب طلبات البيت وترجع تنضف البيت وتجهز الفطار وتصحيهم وكانت خلاص تعبت من شغل البيت....
وفي يوم كانت دايخه ووقعت اغمي عليها....
حماتها كانت فكراها بتعمل كده عشان تهرب من شغل البيت....
بس اتفاجئوا ان الدكتور بيقول انها حامل....
بس حتي الحمل مغيرش حاجه فضلت ريحانه بنفس الوضع لحد ما ولدت وجابت بنوته .....
أسعد مكنش مبسوط بالبنت كان نفسه في ولد ....
وأمه كانت كل يوم تخليه يضرب ريحانه لأي سبب تافه....
لأنها من زمان مبتحبهاش هي ومامتها....
فضلت ريحانه مستحملة سنتين ....
وفيوم كلمت ابوها قالتله....
_ والله يابا لو مجتش خدتني النهاردة هرمي نفسي دلوقتي فالبحر وأموت نفسي....
_ استحملي يا بنتي عشان بنتك....
_ لا خلاص انا مش قادرة استحمل....
_ لازم تستحملي عشان بيتك ميتخربش
_ هو اصلا مخرووب ... سلام يابا وسلملي علي امي....
قفلت ريحانة التليفون وباباها كان فاكرها بتهدد وخلاص....
لكن فعلا نفذت الي في دماغها قلعت شبشبها وحطت جمبه تليفونها ونطت جوة الترعه.....
في حد خد باله وهي بتعمل كده نزل وراها والناس كلها اتلمت ....
واعد يحاول يجيبها .....
جابها علي اخر لحظه كانت خلاص علي وشك الموت....
الناس اتصلت علي اخر رقم كانت ريحانة مكلماه رد ابوها
_ ايوة يا بنتي....
سمع صوت ناس كتير وحد بيقوله
_ صاحبة التليفون دا انتحرت وطلعناها بس لسه مغمي عليها حد يجي يلحقها من اهلها.....
بنتيي الحقي يا ام احمد ريحانة انتحرت.....
_ يا حبيبتي يا بنتي منك لله اشوف فيك يووم انت الي قتلت بنتي....
_ تفي من بؤك هنلاقيها زي الفل....
همي يا وليه عشان ناخد اول قطر عالصعيد ....
طلعوا يجروا وسابوا اولادهم فالعمارة عشان يلحقوا ريحانة ....
عدا ٨ ساعات فالطريق ....
واخيرآ وصلوا وعلي ما وصلوا كانت ريحانة....