الجزء الخامس♡
الكاتبه: سما طارق ♡
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
انا نزلت من عندهم وفجأة شوفت عربيه جت وقفت قدامي وحد بيرش حاجه على وشي... وبعدين محستش بحاجه... صحيت لقيت نفسي قاعده في اوضه كبيره وايدي ورجلي مربوطين.
اتكلمت بصوت عالى.
- في حد هنا... يا ناس... هو انا كده اتخطفت طيب... حد يفهمني.
دخل عليا راجل طويل ولابس اسود في اسود.
= نعم ايه الزن ده.
- زن مين... ده انا قولت كلمتين... مش مهم... هو انا مخطوفه صح.
= ايوه.
- طب مين خطفني.
= معنديش أوامر اني اقولك اي حاجه.
- طب خلاص... غور.
اتقدم ليا كده وزعق في وشي.
= قووولتي ايه يا روححممك.
انا خوفت اوى.
- احم... قولت اتفضل يا باشا... يا استاذ اللى معرفش اسمك... اتفضل روح للريس بتاعك قوله يجي يكلمني علشان نتناقش وافهم انا اتخطفت ليه.
خرج من غير ما يتكلم.
- ايه ده.. جايبين عمود نور يخطفني... طب انا هعمل ايه دلوقتي... انا مخطوفه ياتري عايزين مني ايه... وايه المكان ده.
قعدت اسأل نفسي اسأله كتير لحد ما دخل نفس الراجل ومعاه سكينه.
- يا نهار ابيض... متقولش هتقتلني... لا والنبي ابعد عني.
فضل يتقدم لغايه ما نزل قدامي ولسه ماسك السكينه في إيده.
- عاااااااااا... ايه ده انت بتفكني... هوووف ياعم رعبتني... كنت تقولي طيب.
= بطلي زغي بقى... زهقتيني.
- طب انت بتفكني ليه... اكيد مش همشي من اول خمس دقايق يعني.
= بفكك علشان جالي أوامر اني افكك.
بعد ما فكني انا قومت اقف.
- أخيراً.
هو كمان وقف... كان اطول مني بمتر.
- يا استاذ عمود النور... احم قصدي يا استاذ اللى معرفش اسمك.
= يخربيت رغيك... اتزفتي عايزه ايه.
- مش قولتلك ناديلي الريس بتاعك علشان نتشاور ونوصل لحل... وبعدين بتخطفوا عيله ليه.
= الريس هيجي بمزاجه مش هيستناكي تقوليله تعالى... وانا معرفش اصلاً حاجه عنك... ولا اعرف احنا خطفناكي ليه فاهدى.
- طب انا جعانه.
= انت مستوعبه انك مخطوفه.
- هو مال الجوع بالخطف... وبعدين مش فارقه مخطوفه او لا طالما مش هتقتلوني والغرض من الخطف شريف.
= انتي اكيد مجنونه.
- هو انا مجنونه فعلاً... بس بعيداً عن الجنون... الروايات سهلت في نظري الخطف اوى.
خرج من قدامي وهو بيبرطم.
- بس هما في الروايات بيحبوا اللى خطفهم... وانا اصلاً قافله قلبي بالمفتاح... فرصه تانيه ان شاء الله.
ببص في الساعه بتاعتي علشان هما خدوا التليفون... لقيت الساعه تلاته الفجر... روحت نمت على السرير اللى في الأوضه... ولما صحيت الصبح.
- صباح الخير يا سمسم.
لقيت حد اتكلم وهو قاعد علي الكنبه اللى فى الأوضه.
= نايمه.
بصيت جنبي وصوتت من الخضه.
- عااااااااااا انت بتعمل ايه هنا.
كان نفس الشخص بتاع امبارح.
= جاي اقولك ان الريس بيقولك... علشان تبقي تلعبي مع الغول.
رديت عليه بإستغراب.
-غول مين... افهم من كده ان الريس بتاعك ده... رجل اعمال او زعيم مافيا.
= ما انتى طلعتي تعرفيه اهو.
- ياعم معرفوش والله... انا اصلاً مسمعتش اسم الغول ده غير في الروايات بيبقى في غول وشيطان ونمر وشارك وحاجات كتير كده.
= احنا خاطفين واحده من عالم الروايات... يابنتي فوقي انتي مخطوفه واللى خاطفك مش سهل... وكمان انتي في الحقيقه مش روااايه.
- اوووف ماشي... هاتلي اكل بقى كفايه انك نيمتني امبارح جعانه.
= انا اللى جبته لنفسي عارف.
- اخلص بقى انا هموت من الجوع.
خرج وهو بيبرطم تاني... وبعد نص ساعه دخل وهو معاه فطار.
- لولولولولولولي أخيراً سمعت كلامي في مره.
= الريس اللى قالي اجبلك الفطار... مش علشان كلامك.
- طيب ماشي انت والريس بتاعك ده.
حط الأكل وانا كلت أخيراً كنت جعانه اوى الصراحه.
- الحمد لله... بقولك يا اخي في الله.
= ارغي.
- عايزه مصليه.. واسدال... وياريت طرحه يعني لو مفيهاش اسائة ادب.
= ايه ده هو انتي محجبه.
- ايوه محجبه... مش عارفه الطرحه اللي انا كنت لابساها راحت فين.
= حاضر هجيبلك.
- ازغرط أخيراً سمعت كلامي.
مشي من قدامي من غير ما يتكلم... ورجع بعد ساعتين.
- اتأخرت ليه يا معلم.
= معلم!!!
- خليك فريش بقى.
رمى عليا اكياس وقال.....
= خدي دول شوية لبس واسدال ومصليه.
- ثانكس.
ابتسم ليا وخرج.
- ده عنده سنان يا ناس.
حطيت اللبس في الدولاب ودخلت اخد دوش ولما خرجت لبست بنطلون جينز وبلوزه بيضه بكم واسعه شويه وحجاب باللون الأحمر وبعدين لبست عليهم الإسدال وصليت... دخل عليا وانا بصلي بس خرج تاني.
لما خلصت قعدت انادي عليه.
- يا طويل... يا عم انت.
هو دخل.
= عايزه ايه.
- انت اللى عايز ايه... انا سمعت صوت الباب بيتفتح ويتقفل.
= لا مكنتش عايز حاجه عادي.
- ماشي.
عدى على الموقف ده اسبوع وانا طول الأسبوع برخم عليه وهو بقى بيدخلي اكتر من الأول... في يوم على العصر كده.
= زفته.
- مش اسمي زفته... اسمي سما.
= الريس نص ساعه وهيجي.
- أخيراً.
= فرحانه!!.
- ياعم أخيراً هشوف شكله... كل شويه يبعت معاك رساله الغول ومش عارفه ايه... عايزه اعرف انا اعرفه ولا انا مخطوفه غلط.
= ماشي هو جاي بعرفك بنفسه.
- انت هتخرج لما هو يجي.
= هو هيجي ياخدك اصلاً.
- بيجاد... هياخدني ليه طيب.
= هيوديكي مكان تاني غير ده.
- بس انا حبيت المكان ده.
= هو بمزاجك.
- ماشي امشي بقى علشان انت عكننت عليا.
= زعلانه علشان هتمشي من هنا.
- ايوه.
= طب انا همشي علشان الريس لو شافني بتكلم معاكي هيموتني.
- ماشي.
خرج من الأوضه وبعد نص ساعه دخل راجل تاني... كان حلو اوى عينه لونها اخضر على ازرق... وطويل وعريض... فتى احلام اي بنت من الآخر.
- حضرتك الغول.
= هتستهبلي مش عارفاني.
- طب والله اول مره اشوفك.
= ملاك متستهبليش... انا جايبك هنا عل.......
قاطعته وانا مستغربه.
- ملاك مين.
= انتي يا زفته.
- معرفش حد بالأسم ده اصلاً.
رد عليا وهو متعصب اوى.
= انتي يابت متجننيش امي.
انا خوفت اوى من شكله حسيت ان عينه بدأت تتحول وهو بدأ يتحول وانا كل اللى قولته اني معرفش حد بالإسم ده.
- والله انا مش اسمي ملاك... انا اسمي سما.
= سما مين... انتي ملاك.
- و وانا هك هكدب عليك ليه.
زعق بصوت عالى.
= انت يا زفت ياللى اسمك هيثم.
جه الراجل اللى كان معايا طول الأسبوع.
- ايه ده هو اسمه هيثم.
اتجاهلني وزعق في وش هيثم.
= هو انا مشغل معايا بهايم... حتت عيله مش عارفين تجيبوها.
هيثم كان هيتكلم بس انا رديت ويارتني ما رديت.
- انت بتكلمه كده ليه... هو واخد الأوامر منك.
قرب عليا وعينه اتحولك للون الأسود... انا كنت برجع لورا وانا مرعوبه من شكله.
- و والله م ما تزعل نفسك يا باشا... عيله زباله وغلطت... م م مش هف هفتح بقي تاني والله.
مسك دراعي جامد اوى وبعدين وجه كلام لهيثم.
= جهز العربيه يازفت... وبعد كده انت مرفود.
جري هيثم من قدامه بسرعه.
= انتي بقى بتزعقيلي صح... انتي متعرفيش مين الغول... بس انا هعرفك يا حلوه.