رواية لولاهم لم اصبح خائنه
الفصل الثالث والرابع
بقلم نورهان هانى
#الفصل_الثالث
لما فوقت سمعت صوت دوشه في الصاله طلعت أشوف فيه إيه شوفت ماما أيوا ديه ماما،
جيت عشان أجري أحضنها لقتها وقعت علي الأرض بصيت علي بابا اللي كان واقف
قُصادها لقيت في إيده سكينه وبتنقط دم رجعت نظري تاني علي ماما لقتها غرقانه في
دمها أتسمرت في مكاني صوت أنفاسي عِلييِ ودموعي نزلت وصوت شهقاتي كانت سريعه
لدرجة إني مقدرتش أوقفها كنت بترعش من المنظر بابا كان خرج من البيت معرفش راح فين وانا جريت علي ماما مسكت إيديها وهنا سمحت لصوت
عياطي يعلي أكتر وأكتر وانا بصرخ بماما وبحاول أفوقها بس هي مكنتش بتتحرك كنت بتكلم بسرعة وانا مرعوبه وإني أكيد بحلم يستحيل ده يكون
حقيقي انا عارفه إنها هتقوم دلوقتي وتاخدني في حضنها وأمشي معاها هي جت عشان تاخدني انا عارفه مَقدرتش تستحمل غيابي زي مانا مقدرتش
فضلت أحرك فيها وأقولها يلا ماما قومي نمشي قبل ما بابا يجي خلاص انا سامحتك
يا ماما قومي يا ماما متسبنيش تاني يا ماما بس للأسف ماما سابتني تاني.
سمعت صوت مفتاحه جريت إستخبيت تحت المكتب وشوفته داخل ومعاه الست اللي هيتجوزها ومعاهم راجل تاني.
عبير: بقا يا وليه عايزة تحبسي حبيبي وتتمتعي إنتي وبنتك بفلوسه بس ده بعينك وأهو شفتي النتيجه إيه
سيد: إهي خدت جزائها ودور الجاي هتبقا موج
الراجل: طب مش كفايا كدا ويلا نتاوي الجثه ديه بسرعه قبل ما حد يلاحظ
عبير: ٱه صحيح يا سيد أومال فين بنتك لتكون صحيت وشافت أمها وهي كدا
سيد: لا متقلقيش هتلاقيها نايمه فوق ولو كانت شافت حاجة كنا هنعرف
عبير: طيب يلا يلا بلاش تضيع وقت
انا كنت سمعاهم ومش مستعوبه إي حاجة مش شايفه غير صورة ماما وهي بتقع قدام عيني ومش حاسه غير بدموعي اللي كنت قربت أغرق فيها.
فعلاً لفوا ماما في شوال وشلوها وخرجوا، وانا طلعت من تحت المكتب قعدت مكان ما كانت ماما موجوده ودمها كان مغرق فستاني الأبيض فضلت أعيط وانا بنادي عليها_ماما انا عارفه انك لسه عايشه وانك موجوده هنا أرجوكي أطلعي انا مسمحاكي خلاص بس عشان خاطري متسبنيش تاني ماما يا ماما.
قومت زي المجنونه أدور عليها في كل الشقه لحد ما دخلت أوضتي وأفتكرت ذكرياتنا سوا.
الأم: عارفه يا موج انا ليه سميتك موج
موج: ليه يا ماما
الأم: عشان الموجه دايما صافيه ولما بتوصل للشط بتنظفه وتاخد هي اللي كان علي الشط زيك كدا يا حبيبتي عندك قلب صافي لما بشوفك تلقائي جروحي بتتنظف
موج: الله يا ماما إسمي جميل أوي
الأم: جميل بيكي
أفتكرت الذكري ديه كانت قبل ما تمشي بيوم
قعدت علي سريري ومن كتر العياط نمت، صحيت تاني يوم مكنتش قادرة أقعد في البيت خرجت من الأوضه قابلت بابا في وشي_ مبقتش قادرة أبصله بعد اللي حصل
الأب: علي فين
موج: عند طنط مني ووعد ونور
الأب: روحي انشالله ماترجعي
دموعي نزلت غصب عني ومشيت روحتلهم فتحتلي وعد
دخلت سلمت علي طنط وأكلتني ودخلت مع وعد الأوضه وفضلنا نلعب لحد ما نور أنضم لينا ولعبنا سوا وانا خلصت ومشيت رجعت البيت لقيت عبير في البيت وهي وبابا قاعدين في الصاله
عبير: أهلا أهلا بالغاليه بنت الغالي
الأب: أجري يا بت سَلمي علي مرات أبوكي
بصتلهم هما الأتنين بقرف وطلعت جري علي أوضتي.
عدي 3 سنين وانا لسه فاكرة إمي وخيانتها وموتها، ومرات أبويا اللي بتعاملني كإني حيوانه، وأبويا وجبروته وقساوته اللي يوم عن يوم بتزيد، ونور اللي بقا محور حياتي، ووعد اللي مش ممكن أقابل زيها، إنهاردة عيد ميلادي ال14 وعد نادتني عندها بإنها عيزاني ضروري كنت عارفه إن هي ونور عاملنلي مفاجأة زي كل سنه ظبطت نفسي وروحت لقيت الباب مفتوح والبيت فاضي دخلت وانا بنادي علي وعد لحد ما فتحت اوضتها ولقيت بلالين نازله عليا من فوق ووعد ونور وطنط بقوا قدامي
وعد: كل سنه وانتي طيبه يا موج ومعايا دايما
حضنتها وانتي طيبه يا وعد ربنا يخليكي ليا يا أجمل أخت
نور: كل سنه وانتي طيبه يا موجي ومعايا ومعانا علطول
موج: وانت طيب يا نور
طنط مني حضنتني وقالتلي كل سنه وانتي طيبه يا بنتي
الحقيقه كنت فرحانه أوي مش عارفه لو مكنوش موجودين في حياتي كنت هبقي عامله ازاي.
أستمتعت جداً وفرحت من قلبي وودعتهم ومشيت مبسوطة وبغني لحد ما وصلت للبيت وشوفت عبير وكانت...
#الفصل_الرابع
وصلت البيت وبدندن مع نفسي لحد ما عديت من قدام اوضة بابا وسمعت صوت شخص جوا الأوضه مع عبير وكانوا بيقولوا:
عبير: متقلقش سيد ده مش هياخد شهر في إيدي وهكون أخدت منه كل حاجة.
هو: وبعد ما ناخد منه اللي عايزينه لازم نخلص منه يا عبير وإلا مش هسيبنا في حالنا.
عبير: أكيد يا حبيبي المهم انت لازم تمشي دلوقتي قبل ما البت بنته تيجي وتشوفك وتبقا مصيبه.
هو: متخافيش مش انتي قولتيلي إن سيد بيكرها وأكيد لو قالت حاجة مش هيصدقها بس همشي حاضر.
عبير: طيب يلا سلام وبليل هكلمك.
هو: سلام يا حبيبت قلبي.
جريت علي أوضتي بسرعة يعني عبير اتجوزت بابا مش عشان هي بتحبه اتجوزته عشان فلوسه وبابا هيقتلوه يعني هيتقتل زي ماما بس لازم أقول لبابا_ساعتها أفتكرت كلام الشخص اللي كان مع عبير لما قال إنه بيكرهني ومش هيصدقني" هو عنده حق بابا مش هيصدقني عشان كدا هسيبه يموت زي ما قتل ماما هو ميستحقش يعيش أبداً
"كل خاين هيتخان بنفس مقدار خيانته".
نمت وصحيت علي حاجه سقعه بتتحدف عليا لما فتحت عيني كانت عبير ودلقت عليا ميه تلج.
عبير: إنتي لسه هتبصيلي يا بنت تهاني قومي يلا روقي الشقه وبهدومك المبلوله ديه.
انا:....
عبير: يلااااا يا بت بدل والله لحبسك في الأوضه الضلمه فكراها ولا تحبي أفكرك بيها.
قومت من غير ما رد عليها ولا حتي أبُصلها، وبدأت أروق الشقه ركن ركن لحد ما وصلت للمكان اللي أتقتلت فيه إمي بصيت عليه وقربت منه ساعتها حسيت بالجفا والقسي ورددت جمله واحده بس"مَصير كل خاين الخيانه"
وبدأت أنضف المكان وانا حاسه بتعب جامد بسبب ضعف جسمي وهدومي المبلوله اللي عبير أصرت إني أنضف بيها خلصت وطلعت علي أوضتي ومن التعب نمت صحيت تاني يوم مكنتش قادرة أتحرك لإني كنت تعبت وقتها ومحدش أهتم بيا حاولت أقوم أشوف إي علاج يقلل من تعبي بس ملقتش حاجه خالص روحت لبابا أوضته وقولتله إني تعبانه بس هو مكنش مهتم حتي مشوفتش نظرة الخوف اللي بتكون موجوده عند كل أب إزاي ممكن إنسان يكون بالقساوة وعدم الرحمه ديه إزاي ممكن يكون في إنسان بلا قلب انا حقيقي بكرهه انا عُمري ما حسيت بحنانه ده انا كل وجع مريت بيه كان بسببه من أول اليوم اللي إمي إتخلت فيه عني لحد آخر كلمه هحكيها، خرجت من أوضته وكالعاده مخذوله.
ملقتش حد أروحله غير طنط مني روحتلها وانا بتحرك بالعافيه وأول ما وصلت وخبطت عليها محستش غير براسي وهي بتتخبط علي الأرض، فتحت عيني لقتني في أوضة وعد وكانوا كلهم جمبي.
هو ايه اللي حصل؟
وعد: إنتي خبطتي علي الباب وفتحتلك ولسه هكلمك لقيتك وقعتي ولما جبنالك الدكتور قالنا إنك بقالك فترة مبتاكليش كويس وده سببلك ضعف غير إنك واخده نزلة برد شديدة_والغريب إننا في الصيف إزاي جالك برد.
انا: يمكن عشان مش بتغطي كويس بليل.
"معرفش ليه مقولتش الحقيقه يمكن لإني مكنتش عايزاهم يحسوا بضعفي مش عارفه"
نور: قلقتينا عليكي يا موج إنتي أحسن دلوقتي.
الحمدلله أحسن، انا لازم أمشي بقا.
طنط مني: لا تمشي فين يا بنتي إنتي هتقعدي هنا فترة لحد ما تتحسني.
لا يا طنط مالوش داعي.
طنط مني: انا خلاص قولت كلمه ودلوقتي هروح أعملك حاجه تكليها يا حبيبتي.
شكرا يا طنط بجد مش عارفه من غيركوا كنت هعمل ايه.
طنط مني: إنتي بنتي يا موج.
وعد: الله يا موج كان نفسي اوي تقعدي معايا واخيراً.
انا كمان كنت مبسوطة إني هكون معاهم وإني هكون قريبه من نور.
أكلت وجه وقت النوم وكنت انا ووعد في أوضه واحده فضلنا طول الليل سهرانين بنتكلم.
وعد: أقولك سر يا موج.
قولي يا وعد.
وعد: تعرفي إن نور بيحبك.
بيحبني!
وعد: اه مالك متفاجئه ليه أكيد كنتي حاسه بده.
هو قالك كدا.
وعد: من غير ما يقولي يا موج حبه واضح في عيونه وتصرفاته ده كان أكتر واحد خايف عليكي.
بجد يا وعد هو بيحبني
وعد: اه يا واد يا واقع انت ايوا بيحبك يا عيون وعد ومش هحتاج أسألك علي مشاعرك لإنها فضحاكي ويلا ننام.
وعد من صغرنا وهي أكتر واحده فهماني وعرفاني من غير ما اتكلم والحقيقه هي أجمل وعد في الكون وجمال الكون ميجيش حاجة جمب جمال قلبها.
_عدي يوم واتنين وانا ونور بنقرب من بعض أكتر لحد ما فـ يوم كنت قاعده في البلكونه ونور دخل قعد جمبي
نور: تعرفي إن عيونك شبه السماء
إزاي!
نور: لإنها صافيه وسحابها محاوطينها زي كدا.
يعني ايه!
نور: هسيبك تفهمي لوحدك.
وسابني ومشي وفضلت أفكر في معني كلامه بس مفهمتش.
كنت خلاص أتحسنت وجه اليوم إن أمشي وشوفت نظرة الحزن في عيونهم كلهم.
خلاص يا جماعه فكوا كدا انا مش مهاجرة انا هنا جمبوا لو مفكتوش كدا هاكولكوا، ايوا كدا أضحكوا.
وعد: بت إنتي فصلتيني وخرجتيني من المود وده شئ انا أسمح بيه عادي.
ضحكت من قلبي عليها وحضنتها.
طنط مني: والله كنتي ماليه علينا البيت واتعودنا علي وجودك.
انا موجوده علطول وهاجي كل يوم، وحضنتها من قلبي.
نور: هتوحشيني يا موج.
وانت يا نور وكلكو_ انا همشي بقا.
نور: إستني هاجي أوصلك.
طيب يلا.
كنا ماشيين ونور متكلمش ولا كلمه لحد ما وصلنا وقالي.
_لسه مفهمتيش يا موج!
الحقيقه لاء.
_السماء هي إنتي والسحاب هي انا وانا وانتي مع بعض ومحاوطك لإنك ليا.
_انا بحبك يا موج.
وسابني ومشي حتي منتظرش إني أرد عليه بس ثواني هو قال ايه قال إنه بيحبني بجد_كنت بتنطط من الفرحه طلع بيحبني طلع بيحبني دخلت البيت ومهتمتش بحاجة وطلعت علي أوضتي وانا برقص من
الفرحه، وعد كلامها طلع صح وعد ولا مرة قالت حاجة غلط ونمت من الفرحه ومكنتش أعرف إني هقوم علي كابوس هيغير حياتي النقيه لحياه كلها خيانه بما فيهم انا...