رواية خارج قانون الحب
الفصل الحادى والعشرون
والثانى والعشرون
دفا ، دفا وأمان غريب كانوا محاوطيني ، كإن في حد جاب أستيكة ومسح من دماغي كل الذكريات الوحشة في اللحظة دي
بدر بيحضني ! الإنسان الوحيد اللي لما بيلمس إيدي بالغلط قلبي بيقوم ثورة وبيدق جامد ، محسيتش بنفسي غير وأنا بحاوط رقبته بإيدي وبحضنه وبغمض عيني ، ماهو لو في لحظة حلوة لازم أحسها وأعيشها بتفاصيلها زي ما عيشت كل الوحش بتفاصيله
الغريب إنه مش حاضني مضطر ، هو كمان كان شادد عليا في حضنه
كينان قربلهم وهو بيفصل إيديها عن بدر وبيقول : سيبي الزعيم يا بت ، سيبي الزعيم لأخنفك
بعدت إيديها ورجعت لورا وهي بتاخد نفسها بالعافية ، بدر قال ل سيا : معلش هاخد كينان ونروح مشوار وهنرجع تاني ، متفتحيش لحد وخلي بالك من نفسك
سيا بسعادة : حاضر
كينان بتفاؤل : هطلع ألبس أنا ع السريع
قرب بدر ل سيا ومسك رقبتها من ورا وقرب راسها ليه ، حست إن رجليها مش شيلاها راح حاطط شفايفه على جبينها وباس راسها وهو بيقول بهمس ونفسه الدافي محاوط وشها : حقك عليا
بعد عنها بالراحة وخصلات شعرها لازقة في دقنه
بصلها لقاها عينيها بتلمع وواسعه ومبتسمة ع الاخر
بدر بأستغراب : إنتي كويسة ؟
سيا بتتنفس بالعافية : أنا زي الفل
بدر بإبتسامة : هطلع أغير هدومي طيب
طلع من المطبخ راحت سيا وقعت على الأرض وهي بتهوي على وشها عشان تتنفس ، وقعت من فرحتها بمعنى أصح
* برا البيت في عربية بدر
كينان : طب فهمني في إيه في دماغك يا زعيم
بدر بملل : لما نوصل هقولك ، أنا متعكنن من الواد دا ومن كلامه
كينان بحزن : شوفت البجاحة ؟ قالك عشان يتيمة محدش هياخد حقها
بدر بيعض شفته اللي تحت بغيظ وقال : أنا في ضهرها ، أشوف بقى واحد إبن **** بيتكلم عنها عشان أقطع رقبة أمه
وصلوا لمحل هدايا كبير ومشهور
بدر وهو بيبص على المدخل : عاوز أجيبلها هدية ك إعتذار لإني طردتها وكان ممكن تتعرض لخطر بسببي
كينان بيوطي وبيبص على بدر بتعجب ، بعدين بيحط إيده على جبين بدر يتأكد من سخونيته
بدر بينطر إيده وبيقول : في إيه يالا !
كينان وهو بيرفع أكتافه : ولا حاجة يا زعيم بس مستغرب أصلك عمرك ما جيبت هدية لحد
بدر بعصبية : يالا بقولك ضربتها وطردتها وطلعت مظلومة
دخل ودخل وراه كينان وبدر بيبص على الحاجة من غير نفس
حط إيده في جيبه وهو بيقول لكينان : هي البنات بتحب إيه ؟
كينان بيبص للحاجة وبيفكر بعدين قال : أنا رأيي نجيبلها إتنين كيلو كباب وكفته أقسم بالله هتفرح أوي
بدر بعصبية : إمشي يالا برا
كينان بضحكة : يا زعيم أنا زيي زيك معرفش إيه أكتر حاجة بتحبها البنات ، بس هو الأكل بيفرحهم أوي
بدر للبنت اللي بتظبط الحاجة : لو سمحتي
البنت جت : تحت أمرك يافندم
بدر بإحراج : عاوز هدية كويسة لبنت
البنت : طب هي طفلة ولا أنسة ؟
بدر : أنسة
البنت : أختك ولا خطيبتك ؟
كينان بإستغراب : هي الأسئلة ضمن المنهج ولا إيه ؟
البنت : لا يافندم بس على أساس الأسئلة دي هختار الهدية لحضراتكم ، يعني مثلاً عندي شيء لطيف هنا
البنت قربت للكاونتر وجابت علبة زرقا فيها سلسلتين فضة أصليه وقالت : دول سلسلتين ، السلسلة الأولى فيها قلب والسلسلة التانية فيها مفتاح ، ممكن حضرتك تلبس المفتاح وخطيبتك تلبس القلب
بدر قال ببرود : مفيش حاجة أفضل ؟
البنت بإبتسامة : في يافندم ، ثانية واحدة
* في هايبر ون
بعد ما بدر جاب الهدية ل سيا دخل هو وكينان هايبر ون عشان يجيبوا حجات
بدر وهو بيبص لثلاجات الشوكولاتة وبيقرأ
كينان جاب إتنين جالاكسي بندق وقال : دي جامدة دي
بدر بتضييق عين : البت بتحب إيه ؟
كينان بغباء : بت مين يا زعيم ؟
بدر بضيق : سيا
كينان : ااااه ، مش عارف الحقيقة بس ممكن تجبلها نوعين مختلفين
بدر مسك شوكولاتين من كل نوع وهو بيحدفهم في العربانة
وبيقول : تخيل واحد من الرجالة يشوف اللي بعمله يقول عليا إيه ؟ يخربيتك على بيتها
كينان بضحك : ربنا يخليك لينا يا زعيم
راح يحاسب مع كينان بعد ما خلصوا
* في بيت بدر بعد ما رجعوله
سيا واقفة في المطبخ بتحضر أكل على ما ييجوا
فتح كينان الباب وهو بيشم وبيقول : الله ، إيه الريحة الحلوة دي
دخل بدر وهو شايل الحاجة وبيقول بالراحة : خد إديلها الهدايا
كينان بصوت واطي : يا زعيم مينفعش إنت اللي زعلتها ف إديها إنت
قفل بدر الباب برجليه ودخل المطبخ وهو ماسك الحاجة
بدر : ممم ، خدي دي حجات جبتهالك وأنا بتسوق عادي جداً
كينان بيبصله بنظرة * يا ديني ع الكذب ! *
سيا بسعادة وهي بتسيب اللي في إيديها : الله ! إيه دا
كينان بسعادة : إيه الريحة الحلوة دي
سيا بسعادة : إنت بقيت تشم يا كينان خفيت خلاص ؟
كينان وهو بيدوق الأكل : يعني كلابي كدا
سيا فتحت الصندوق الكبير لقت شوكولاته بالهبل
رفعت راسها لبدر وهي مبتسمة بسعادة وبتقول : ياااااه أنا بقالي كتير مأكلتش شوكولاته ، مكانش عندي الرفاهية دي بجد
بدر : إحم ، ما يعني قولت أجيبلك وأنا بشتري
سيا بتفتح الهدية التانية لقت علبة كدا فتحتها
لقت إسورة فضة أصلي وعليها حرف ال s
سيا وهي بتخرجها من العلبة : وااااو ! دي تحفة أوي
بدر : دي ك إعتذار عن أي شيء عملته فيكي ، وطلعتي بت جدعة في الأخر
سيا بلمعة عين وهي واقفة قدامه : عشان تعرف إن صوابعك مش زي بعضها يا زعييم * وضحكت *
فضل بدر متنح فيها شوية وهي بتضحك بعدين غمض عينه وقال : ممم ، أنا هطلع أغير عشان ورايا مشوار شغل
سيا بنظرة تعاطف : والأكل اللي وقفت أعمله ؟
بدر بهدوء : هخلص مشواري وهاجي أكل
خرج بدر من البيت متجهه لتوفيق عشان يتمم معاه الشغل وساب كينان مع سيا
سيا بترفع إيديها في وش كينان وبتقول بطفولية : بص جابلي إييه
كينان : ننينيني أنا كنت معاه ياختي
سيا بسعادة : قالك هجبلها حاجة بتحبها صح ؟
كينان وهو بياكل : لا هو مكانش يعرف إنتي بتحبي إيه ف جبنالك بقى شوكولاتات كتير عشان مش عارفين ذوقك
سيا وهي بتبوس الإسوارة : مش هقلعها من إيدي أبدااا
* في فيلا توفيق
وصل بدر ودخل وهو بيبص حواليه بتكبر ، أول ما دخل قعد وحط رجل على رجل قدام توفيق وقال بلهجة مُتقلبة : مكانش إتفاقنا
توفيق بإستغراب : على إيه ؟
بدر بعصبية : إحنا هنستهبل ؟ زااهي ! خدته تعمل بيه وأنا كنت رايح أصفيه
توفيق بإبتسامة : هتفرق معاك يا بدر ؟ الحصان الإسود خلاص وقعوا ولورا إتعمت كلياً بعد ما تم تصفية عينها السليمة كمان ، وزاهي مالوش أي لازمة حالياً في سوق المافيا بعد ما إنت علمت عليه لكني محتاجه ، محتاج أذل فيه شوية ، جهز نفسك إنت للتقيل
بدر برفعة حاجب : اللي هو ؟
توفيق وهو بيشرب من كاسه : بما إن كدا كدا بضاعة الحصان الإسود بقت ليا وهنتفق على سعرها ، أنا يومين بالظبط ومستني جماعة السراج ينزلوا من واشنطن عشان هنتعامل معاهم في شغل ، دول طالبينك بالإسم يا بدر
بدر إتعدل في قعدته وقال وهو بيضيق عينه : عرفوا عن اللي حصل لجماعة الحصان الإسود ؟
توفيق بإبتسامة : طبعاً ، إحنا دايرة الخبر بيلف فيها وبيوصل لكله ، لكن متقلقش هما مكانش في بينهم ود من الأساس ، الجماعة دول نازلين عشان شغل على تقيل ومعتقدش إنك هتندم من التعامل معاهم ، دي صفقة عمرك ، أكبر صفقة في تاريخ المافيا ، هي الأمورة اللي معاك هتتمم شغل معانا ؟
بدر بعصبية : لا هي ملهاش في شغلنا وياريت منجبش سيرتها وسط كلامنا تاني
توفيق : تمام بس خلي بالك ، المشاعر بتضعف الشخص ، مهما كانت قوته هيفضل عنده نقطة ضعف
سرح بدر شوية وهو بيفكر ..
* في نص الليل
سيا كانت بتتفرج على التي في في المطبخ لقت باب البيت بيتفتح وبيتقفل ، جريت بسرعة على برا وهي بتبص لقت بدر جه وهو ماسك جايكته على كتفه وبيبصلها ف قال : مساء الخير
سيا بإبتسامة : مساء النور
بدر بإستغراب : منمتيش يعني ؟
سيا : أه كنت بتفرج على فيلم حلو أوي
بدر : أها ، كويس سلي وقتك ، كينان فين ؟
خرج كينان من أوضة سيا وهو بيقول : أنا هنا يا زعيم ، نزلت سرير من فوق وحطيته في الأوضة اللي تحت عشان سيا تنام عليه كنت بركبه بس
بدر وهو بيتاوب : كويس دا
سيا بملاحظة : إنت كويس ؟
بدر إتنهد وبص لكينان وقال : جماعة السراج يومين بالظبط ونازلين من واشنطن لمصى عشان الصفقة الكبيرة اللي هنتممها
كينان بفتحة بوق : ودا مضايقك في إيه يا زعيم ، دا إحنا مستنيين شغل على كبير بقالنا كتير
بدر بتكشيرة : مضايقني إنهم أكيد عارفين إن قتلت الباشا اللي ريناد إتهببت معاه ، وهما كانوا على علاقة كويسة بيه ف دا هيخلي بيننا حساسية
كينان : أوبااا ، ربنا يستر على اللي جاي
بدر : سيبها على الله ، هطلع أغير
كينان بتعب : وأنا هطلع أنام هلكااان
طلع كينان وبدر ، ووقفت سيا في المطبخ بتغسل المواعين بعد ما أكلت الشوكولاتة
نزل بدر المطبخ عشان يشرب مياه ف قالها بإستغراب : بتعملي إيه ؟
سيا بصتله وقالت : بغسل المواعين عشان متتراكمش عليا ، أعملك حاجة سريعة تاكلها ؟
بدر حرك راسه يمين وشمال بمعنى لا
بص ل سيا ف قالها : إيه اللي على بوقك دا ؟
سيا وهي بتلمس شفايفها : إيه ؟
بدر بتركيز : شوكولاته ، مبهدلة نفسك ليه .. قربيلي هنا
قربت منه ف سحب منديل وبل طرفه مياه وهو بيمسح بوقها وبيقول : ينفع كدا ؟
وسيا سرحانة في عيونه .. من غير وعي ميل عليها وقربلها و ...
|22|
قرب منها وهو بيميل عليها وباس رقبتها بهدوء ، أعصابها سابت وكانت زي الورقة بين إيديه ومغمضة عنيها
إتعدل بدر وهو بيتنفس بصعوبة وبعد عنها بمسافة شوية وقال وهو متوتر : ت .. تصبحي على خير
طلع أوضته وفضلت سيا واقفه في المطبخ حاطة إيديها على رقبتها وقلبها هيقف من كتر الدق
* صباح تاني يوم
نزل بدر من أوضته وهو بيدخن سيجار على الصبح ، أول ما نزل لقى سيا بتقفل باب أوضتها ولابسة فستان نوعاً ما ضيق
بدر بصلها كدا وقال : إيه اللي إنتي لبساه دا ؟
سيا بتبص على جسمها : لابسة إيه ؟ فستان
بدر بتريقة : بجد والله ؟ حسبتك لابسه بنطلون ، ما أنا شايف إنه فستان
سيا بإستغراب : وحش يعني ولا إيه ؟
بدر بتدقيق : حلو .. بس متلبسيهوش وإنتي وسطينا ، روحي غيري هدومك هاخدك مشوار
سيا بتساؤل : هو كينان فين ؟
بدر ببرود : عند الباشا توفيق بيقضي معاه اليوم من بدري جداً ، غيري هدومك يلا
سيا بسعادة : حاضر
دخلت سيا غيرت هدومها ولبست فستان أوسع شوية ولونه أزرق فاتح ، خرجت من الأوضة لقت بدر واقف مستنيها وساند على الحيطة
سيا بتساؤل : هنروح فين ؟
بدر بسرحان فيها : الإسطبل .. لسه بتخافي من الفرس ؟
حركت راسها يمين وشمال ف قال بهدوء : طب يلا
طلعوا برا البيت وركبوا العربية ، صوت في العربية ف سيا قالت بإستغراب : صوت إيه دا ؟
بدر وهو بيسخن العربية : صوت الحزام بتاعك ، إربطيه
مسكت سيا الحزام وبتحاول تقفله مش عارفه ، شرب بدر أخر نفس في السيجار وطفاها وبعدين قرب ل سيا وقفلها الحزام وهو قريب منها وقال : بيتقفل كدا
بعد عنها بالتدريج وقعد في كرسيه ، بعدين ساق العربية للإسطبل
* في فيلا توفيق
كينان لسونيا : بس تصدقي الأحمر بيبقى جامد عليكي
لفت له سونيا وقالت : إنت عاوز مني إيه مسيو كينان ؟
كينان بفرفشة : لا مسيو إيه إنتي شيفاني مدرس الفرنساوي بتاعك ، بقولك جاي من الصبح عشانك
سونيا بجدية : أهلاً وسهلاً بيك في أي وقت ، بس اللي في دماغك من ناحيتي إنساه عشان مش هيحصل
بصت لنصار وقالت : كان غيرك أشطر
كينان بضيق : هو أيه اللي في دماغي من ناحيتك ؟ هو إنتي شيفاني عيل يعني عشان أرتبط بيكي يومين وأسيبك
بيقربلها وبيقول بمعاكسة : أنا ناوي أعمق العلاقة
سونيا ببرود : و ؟
كينان : وهيبقى نهارنا زي الفل إن شاء الله ، بقولك إيه ما تخليهم يجبولي عصير فراولة فريش زيك كدا
سونيا : لا إحنا هنا بنشرب صبح وليل خمرا ، تشرب خمرا ؟
كينان بيقربلها بمعاكسة وهو بيقول : طب مش حرام الشفايف اللي زي العسل دي تشرب سموم ؟ الشفايف دي أتخلقت عشان ..
سونيا بصتله بصة ليها معنى ف قال : عشان تتقدر ، أو البني أدم يتأمل فيها بس ، أنا قررت هحطك في النيش بتاع بيتنا عشان متتوسخيش
ضحكت هي ف كينان إبتسم وقال : الصلاة على النبي ، بقولك إيه نفضيلهم وتعالي معايا ، هخرجك خروجة مخرجتيهاش ولا هتخرجيها مع حد غيري ، هعرفك على كينان الحقيقي بقى
سابت هي الكاس وقالت بابتسامة : إستنى طيب أغير هدومي
سند كينان على البار وهو بيقول : ياريت لأحسن الفستان محليكي بزيادة وخايف حد يبصلي في الفراولة بتاعتي
بص نصار لكينان بنظرة غيظ ف قال كينان بكيد : أزور ، اللقمة توقف في زوري
* في الإسطبل
بدر وهو لابس تيشيرت إسود نص كُم بيقول لسيا وهو بيطبطب على الفرس : مش ناوية تركبي لوحدك برضو ؟
سيا وهي بتدفي دراعها : لا مش هعرف ، هو إنت مش بردان من الجو ؟
بدر : دلوقتي لما نركب ونتحرك بيها جسمنا هيسخن ، تعالي أطلعك
قربتله سيا ف مسكها من وسطها بيحاول يرفعها ف بتوقع قدامه تاني
ضحك وقال : متقوليش إنك الأيام اللي فاتت أكلتي محشي
سيا بضحك : لا بس خلصت نص الشوكولاتة اللي إنت جيبهالي ، ف هتلاقيني دبدوبة شوية ، إيه دا هو إنت عينيك عسلي فاتح ؟
بدر بتركيز في عينها : ممم لا ، بني ، إنعكاس الشمس عليها بيخليكي تشوفيها كدا
سيا بتوهان : دي حلوة أوي
نزل بدر راسه وقال : تسلمي ، تعالي أطلعك
رفعها بكل قوته لحد ما قعدت على الفرس وثبتت نفسها
نط على الفرس وقعد وراها ، ومسك اللجام وهي بين إيديه وقال : إمسكي في الفرس نفسه جامد عشان متوقعيش ، هنمشي مسافة بعيدة شوية لحد البحيرة ، جاهزة ؟
سيا بسعادة : أه
حرك بدر الفرس ف إتحركت بيهم لبعيد
سيا بتعب في نص المشوار وبعد ما وصلوا للبحيرة : ب بدر دايخة مش قادرة
وقف بدر الفرس وسند سيا بإيده وهما فوق الفرس عشان متوقعش
نزل وفتح إيده عشان تنزل هي بين إيديه ، نزلت ف سندها وقعت في حضنه
بدر بهمس : إنتي كويسة ؟ حاسة بإيه !
سيا بتعب : دايخة أوي يمكن عشان إتحركنا بسرعة
بدر بضيق : لا هي غلطتي .. أنا أصل أكتر مكان بحبه الإسطبل ف توقعت هتكوني مبسوطة لو جينا
سيا رفعت راسها وبصتله وقالت : أنا فعلاً مبسوطة ، بكون مبسوطة وأنا معاك يا بدر
مسكها بدر من وسطها وقربها منه وهي بتبص لعيونه الحلوة في إنعكاس الشمس وقال : يعني مبتخافيش مني ؟
سيا : تؤ
بدر بنبرة حلوة للمرة الأولى هي نفسها إستغربتها : أنا
مستحيل أأذيكي يا سيا ، مستحيل حتى أحط بصمة بدر الكابر عليكي من غير ما تكوني ملكي
سيا بتوهان : أنا ماليش غيرك وعارفة إنك مش من نوع الرجالة الشهوانيين المقرفين ، ودا اللي خلاني أحب..
مكملتش جملتها ، بدر ميل عليها وباسها ، بمعنى أصح كتم باقي الحروف اللي هتطلع منها ، وهي دابت بين إيديه
لكنه متجاوزش عن شيء غير البوسة دي ..
* عند كينان
سايق العربية التانية بتاعة بدر وجمبه سونيا ، وبيحاول يتصل على بدر عشان يقوله إنه هيتأخر إنهاردة وبدر مبيردش ، بيتصل بسيا مبتردش
في الأخر ساب الفون بعد ما بعت لبدر رسالة إنه هيتأخر ، بص لسونيا وقالها : إحنا ناكل الأول عشان اليوم كدا شكله طويل
سونيا بتبص لساعتها وبتقول : بس بقولك إيه مش عاوزين نتأخر عشان البا ..
قاطعها كينان وهو بيقول : أنا الباشا دلوقتي ، ركزي معايا وهفرحك
رجعت سونيا ظهرها لورا وهي بتقول : بس غريبة يعني إنت اللي هتختار الأكل ، خلي بالك أنا مبحبش السمك
كينان بثقة : سمك إيه أنا هأكلك حاجة أحلى بجد
سونيا بسعادة : أما نشوف
كينان قاعد بيشرب شوربة كوارع وبيبص لسونيا بيقولها : مبتاكليش ليه
سونيا بغضب : كوارع يا كينان ! عاوز تأكلني كوارع !
كينان بيبص حواليه : المطعم دا نضيف أوي وغالي كمان
سونيا : وأيه فايدة كل دا وإحنا بناكل كوارع ، أدي أخرة اللي يثق فيك
كينان بتعجب : أنا بستغرب ، إنتي بتقرفي منها والزعيم بيقرف منها ، دي أكلة ملوك دي .. إفتحي بوقك بس
سونيا بتشاورله بصوباعها : مستحيل أحط البتاع دا في بوقي
* after 5 minutes
سونيا : ممم ، تحفة ، هات ليمون كمان
كينان بيعصرلها ليمون وبيقول : قولتلك هتعجبك قعدتي تعوجي شفايفك الحلوة دي وتقولي مش هدوق
سونيا بصتله بطرف عينها : لم نفسك طيب
كينان رجع ظهره لورا وقال : إنتي إيه دخلك العالم بتاعنا ، أقصد إيه الظروف اللي وصلتك لكدا ؟
سابت سونيا الأكل وقالت بملل : هقوم أغسل إيدي ، حاسب عشان نمشي
قامت وسابته وهو بيبص ليها مستغرب
حاسب كينان وإستناها برا لحد ما خلصت وطلعت
سونيا وهي موطية راسها : يلا رجعني فيلا الباشا ورايا شغل كتير
كانت بتتحرك عشان تركب العربية شد كينان دراعها وقال : أوقفي هنا كلميني !
مسم وشها ورفعه ناحيته لقاها معيطة ، بعدت إيده عن وشها ف قال بصدمة : إنتي دخلتي الحمام تعيطي !
سونيا بضيق : يلا يا كينان من فضلك
كينان بعناد : مش هنروح لا ، بتعيطي ليه
سونيا بضيق : مش حابة أحكي
كينان قالها : طب إركبي هاخدك مكان نتكلم فيه
سونيا بتعب : مش هقدر بجد تعبانة
كينان بعصبية : يابنتي إركبي متطلعيش عين أمي
ركبت معاه وراحوا قعدوا على البحر ، بدأت هي تحكي وتقول : خطيبي كان شغال معاهم ، متربيين سوا من وإحنا صغيرين ، إختصار حكايتي يا كينان إنه إتقتل بسبب شغله معاهم قبل فرحي بإسبوع .. دخلت الشغل مكانه وخدت حقه ، لكن مقدرتش أطلع من الشغل دا بعد كدا
وعيطت ومكملتش حكي ، حط كينان إيده على كتفها وهو بيقول : أنا أسف ، أنا حقيقي مكنتش أعرف ، بس أوعدك إني هعوضك
رفعت راسها وبصتله وقالت : متعلقش أمل قصة معايا ، أنا ميته من جوايا يا كينان ، وهتتعب كتير
كينان بتنهيدة : يا ستي خلينا نتعب ، مش هخسر حاجة إديني فرصتي
وحضنها وهي بتعيط وهوا البحر البارد بيحرك شعرهم
* عند البحيرة .. بدر وسيا
بدر كان نايم على ظهره وسيا نايمه جمبه وسانده راسها على دراعه وباصه للسما بتقول : أول يوم شوفتك فيه هو اليوم الوحيد اللي كنت خايفة فيه منك ، كنت قاسي وبارد لدرجة إني إستغربت إن في بني أدمين كدا ، مكنتش أعرف إنكم هتكونوا كل حاجة ليا إنت وكينان
بدر بتحذير : أنا بس ، أنا بس اللي كل حاجة ليكي
سيا بتتعدل وبتبصله وهو نايم على ضهره وبتقول : طب إنت حبتني ؟
بدر بصلها بطرف عينه وقال : واثق فيكي ، دا شعور كافي
قامت إتعدلت وهي بتبصله وبتقول : شعور كافي ؟ لا مش كافي بالنسبة ليا ! أنا عوزاك تحبني يابدر .. عوزاك تحبني زي ما بحبك
إتعدل هو وقربلها وهو بيرفع وشها ناحيته وبيقول : أكذب وأزيف مشاعري عشان أسعدك ؟ ولا أقولك الحقيقة ؟ أنا بحب وقتي معاكي وبثق فيكي .. إنتي الست الوحيدة في حياتي اللي قربتها ليا للدرجة دي ، دا مش كفاية بالنسبة ليكي ؟
إتنهدت وهي بتبتسم وبتقول : هوووف دا إنت تقيل لدرطة طلعت عيني معاك ، أنا معرفش أنا حبيتك إمتى بس كل اللي أعرفه إنك الحاجة الوحيدة الصح اللي أخترتها .. إوعى تسيبني في يوم يا بدر
قرب منها وباس طرف شفتها وحضنها ، ملس على شعرها وهو بيقول : الفرس محتاج يرتاح ، وإحنا إتأخرنا ، مش هنقوم عشان ورايا شغل ؟
قام وقف ومد إيده ليها ، حطت أيديها في إيديه راح سحبها وركبها فوق الفرس ، نط وركب وراها وهو بيميل راسه على رقبتها وبيتحرك بالفرس
* عند بيت بدر
وصلوا البيت لقوا كينان بيركن عربيته ، نزل بدر وقفل باب العربية وهو بيقول بصوت عالي : إنت يابني
كينان بسعادة مبالغ فيها : يا زعيييييم ، وحشتني يا زعيم
سيا نزلت من العربية بدر بإستغراب : اللهم إجعله خير ، مالك سعيد كدا ليه هي القعدة مع توفيق بتفرح ؟
كينان وهو حاطط إيده على رقبته من ورا وبيبتسم : مقعدتش مع توفيق أوي يعني
بدر فهمه وقال : أهاا ، لا عاوزين نركز في الشغل يا حبيبي
كينان بإستغراب وهو بيبص على بوق بدر : أيه الأحمر اللي على شفايفك دا يا زعيم ؟
بدر بطرف صباعه ملس على شفايفه وبص لقى أحمر
بص ل سيا وقالها : أنتي حاطة روج ؟
سيا حطت إيديها على بوقها بخوف وقالت : أه
بدر بعصبية : أنا مبحبش المكياج مش عاوز احس إني ماشي مع أراجوز
سيا بعصبية : أنا أراجوز يا بدر ؟
كينان بشك : ثواني ثواني ، إنتوا كنتوا فين وبتعملوا إيه ؟
ضربته سيا وهي بتقول بعصبية : إيه بتعملوا إيه دي ما تحترم نفسك يابني أدم
كينان بوجع من إيديها : اااه يخربيتك ، يا غبية بسأل عامة هو في إيه يا زعييم
بدر بعصبية : في إن ماليش كلمة عليكم في أم البيت دا ! أنا مجبتلكيش مكياج أشتريتلك لبس جبتيه منين ؟
سيا وهي موطية راسها : نزلت مع كينان في يوم
بدر بص لكينان راح كينان قال بصدمة : كينان إيه إنتي هتلبسيني مصيبة !!
سيا بزعل : أسفة
بدر بصلها بغضب بعدين قال لكينان : إدخل نام إنت كمان وأنا هدخل أنام عشان عندنا تاني يوم ميعاد مع جماعة السراج
كينان بطاعة : حصل يا زعيم
دخل بدر ف غمز كينان ل سيا وقال : واضح إنكم إتطورتوا ماشاء الله
سيا بصت لكينان بخنقة وقالت : والنبي تسكت عشان أصلاً منطقش وقال بحبك دا يادوب باسني
كينان بهزار : بتخونيني يا سافلة
سيا بضيق : أنا بتكلم جد يا كينان ، تفتكر مبيحبنيش فعلا ؟
كينان : اللي أعرفه إن الزعيم بدأ يثق فيكي ، ودا شيء مش أي حد بياخده من الزعيم .. الثقة
سيا بعشق : بس عوزاه يحبني ربع ما بحبه حتى
كينان بتكشيرة : ما إنتي بصراحة خفيفة أوي ، يابت إتقلي متقعديش تصدميه فيكي
* ميعاد مقابلة السراج - صباح تاني يوم
على السادة المسافرين لدولة الإمارات التوجه للبوابة ٣ ، الطائرة على وشك الإقلاع ، مطار القاهرة الدولي يرحب بكم
نزلاء طيارة واشنطن ، ثلاث رجالة وست بيحطوا جواز سفرهم قدام ظابط المطار
بيبص في الجواز الأول بعدين بيرفع عينه يبص لصاحب الجواز وبيقول : السيد سراج البهتيني ؟
سراج : أيوة يا فندم ! ...