قسوة أب....
اسكريبت بقلمي روني محمد
الجزء الثالث
-: بس انا منتحرتش....
ده كان جوابي لما الدكتور سألني حاولتي تموتي نفسك ليه....
الطبيب : بس بباكي اكد انه دخل المطبخ ولقاكي ماسكه السكينه وبتحطيها على دراعك...
-: كنت بقطع خيط في كوم الترنج الي كنت لبساه ، مكنتش ناويه انتحر ابدا...
الطبيب : طيب وايه الي خلا السكينه تغرز في دراعك ، انتي جيتي المستشفى كنتي فاقده دم كتير...
سكت مش رديت عليه
الطبيب : طب حد حاول يموتك...
بصيتله وسكت
الطبيب : صدقيني انا عاوز اساعدك...
-: لو عاوز تساعدني بجد تخليني امشي من هنا...
الطبيب : بكره باذن الله هكتبلك على خروج ،بعد ما نتاكد ان صحتك كويسه...
-: انا مش عاوزه استنى لبكره ، انا عاوزه امشي النهاردة...
لسه الدكتور هيتكلم ولقيت بابا اتكلم وقاله
-: خلاص يا دكتور اكتبلنا على خروج واحنا هنتابع حالتها فالبيت....
الدكتور حاول يعترض الا ان بابا كان مصر اننا نرجع البيت ، ما هو خايف اني اتكلم واقول الحقيقه...
الباب اتفتح ولقيت طنط نيره ظهرت ولقيتها جريت عليه وهي بتعيط وبتحضني وبتقولي
-: كده بردو يا ساره ، عاوزه تموتي نفسك ، عاوزه تموتي كافرة ؟
بصيت لبابا بتحدي وقولتلهم
-: انا مموتش نفسي انا منتحرتش
طنط نيره بعدت عن حضني ولقيتها بتبصلي وتقولي
-: ازاي بس ابوكي قال...
-: كداااااب
نيره: مين الي كداب احكيلي يا ساره على الي حصل...
ساعتها بابا رد بسرعه وقال
-: الدكتور قال ان اعصابها تعبانه ومتجهودهاش بالكلام ، ياريت نسيبها تستريح شوية...
طنط نيره كانت حاسة ان في حاجه غريبة طول عمرها كانت عرفاني وكانت عارفه اد ايه انا قريبه من ربنا وبصلي ومستحيل كنت انتحر ولما هددتهم بالانتحار لما كانو عاوزين يجوزوني رامي غصب عني فده كانت ساعة غضب مش اكتر ، لقيت طنط نيره مسكت ايدي وبتقولي
-: قولي يا سارة مين عمل فيكي كده...
ساعتها بابا حاول يعترض الا ان رامي وقف قصاده هو وعمي وقالوا
-: سبها تتكلم..
بصيت لبابا جامد وقلت
-: انا منتحرتش ، انا دخلت المطبخ باليل بعد ما الكل نام عشان اعمل لنفسي أكل وبعد ما خلصت لقيت مرات بابا جيه واعدت تزعقلي ان فيه مواعين في الحوض وشدت معايا فالكلام ، غسلت المواعين وقولت اريح نفسي لقيتها عماله بدور على اي مشكله تخلقها وتزعق خلصت ومش رديت عليها ولسه هخرج اروح اوضتي لقيتها بتشدني جامد من هدومي وشتمت ماما الله يرحمها ، مش حسيت بنفسي غير وانا بزوقها وقعتها فالارض وحزرتها تجيب سيره ماما تاني ، قامت بكل غل وراحت جايبه السكينه وضرباني في ايدي ، بابا دخل وشاف المنظر ، اول لما شاف الدم مجراش عليه لا جرى على مراته كان بيطمن عليها ، ساعتها انا محستش بالدنيا ووقعت ومفقتش غير وانا هنا....
الأب : دي كدابة.... كدابة ... متصد قوهاش كدابه زي امها ،امها طول عمرها كانت بتكدب عليه واهي طلعتها زيها....
عمي : حرام عليك بقى يا خي اتقي ربنا
لقيت بابا قرب مني وكان غضبان لدرجه مميته مد ايده ومسك شعري جامد وكان لسه هيضربني الا ان ايد رامي هي الي منعته ، عمي كان مريض قلب قعد على الكرسي ومقدرش ينطق ، اما رامي الي طلع جدع اوي لما اخد بابا وطلعه بره الاوضه بالقوة وقفل الباب ....
بابا فضل شويه يزعق وبعد شويه الصوت اختفى ورامي دخل وقال انه مشى ، الدكتور جه وبعدين كتبلي على خروج ، وخرجت مع عمي ورامي وطنط نيره ورحت معاهم على بيتهم....
وقضيت معاهم يوم واتنين والتالت صحينا من النوم على خبط ورزع جامد عالباب ، كلنا خرجنا من اواضنا مفزوعين ورامي الي جرى وفتح الباب
واتفاجأنا بالشرطه ضابط واتنين عساكر
لما عمي سألهم عن سبب وجودهم قال الضابط
-: معانا أمر بالقبض على الانسه سارة.....
رامي : ليه ؟
الظابط : متهمه بقضيه سرقه... احنا مضطرين نفتش البيت....
فعلا العساكر دخلت وانا مزهوله ومش عارفه اعمل ايه ولقيت العسكري طلع من الاوضه الي بنام فيها وبيقو ل
-: تمام يا فندم لقينا الحاجات الي متبلغ عنها...
بصيت فايد العسكري لقيت كيسه سودا والظابط فاتحها وكان فيها دهب .......
الظابط : يلا يا انسه قدامي عالقسم تحبي تغيري هدومك ولا هتيجي زي مانتي...
انا بصيت حوليا لقيت طنط نيره جيه تحضني انا ساعتها انهرت وقولتلها
-: ولله يا طنط مظلومه مش عملت حاجه انا مسرقتش حاجة ، انا مش عارفه ايه الحاجات دي ولا جت هنا ازاي...
الظابط : يلا يا انسه عاوزين نمشي....