رواية بائعة الورد
الفصل التاسع عشر والعشرون والحادي والعشرون
#بائعه الورد..
الفصل التاسع عشر....
بغرفه تامر بالمستشفى كان الطبيب يتفحص حاله تامر وبدأ بالكشف عليه وخلال فحصه احتلت الصدمه عليه فالحادث أثر علي ساقيه ورغم إجراء الجراحه إلا أنه يؤدي إلي فتره علاج كبيره .
تامر: يادكتور انا رجلي علي طول حاسس بتنميل فيها وأوقات من بقدر احركها.
الطبيب: بتوتر ده طبيعي ماتقلقش ومع الوقت والعلاج ها تتحسن وكمان لازم الحاله النفسيه هاتأثر عليك فأنت اجمد كده عشان تعدي الفتره دي علي خير.
منير: يادكتور لو محتاج أسفره بره مصر ماعنديش مانع المهم يقوم يقف علي رجليه .
الطبيب: صدقني منير بيه مش مستاهله هي مسأله وقت مش اكتر استأذنكم .
تامر: اتفضل يادكتور بس ممكن اطلب من حضرتك طلب .
الطبيب: طبعا اتفضل.
تامر: عايز ارجع البيت وأكمل العلاج هناك مش هنا وكمان عشان أقدر ألحق مذاكرتي.
الطبيب: في الوقت الحالي صعب لكن اوعدك في اقرب وقت هاكتبلك علي خروج وبعدين انت تقدر تذاكر هنا وما تقلقش هاوفرلك كل سبل الهدوء والراحة.
خرج الطبيب وخلفه منير والد تامر وقال يادكتور انا عارف ان ابني فيه حاجه كبيره ارجوك قولي وانا اوعدك تامر مش هايعرف حاجه .
الطبيب: للاسف الحادثه أثرت علي الأعصاب والعضلات في الساقين وده محتاج وقت كبير وعلاج طبيعي عشان نقدر نرجع زي الاول .
منير: يعني ابني بقي عاجز لاحول ولا قوة الا بالله .
الطبيب: يافندم الطب أتقدم كتير عن الاول والحمدلله أنه بيحس بتنميل يعني كده في امل أنه مع العلاج يرجع لطبيعته وانا معاه وخلي ايمانك بربنا كبير .
منير بحزن شديد علي ابنه ونعمه بالله العلي العظيم.
بالجامعه كانت ناني تبحث عن أحد من أصدقاء تامر لتعرف عنوان المستشفي وبالفعل قابلت صديق له وعرفت العنوان وقررت الذهاب لزيارته والاطمئنان عليه..
روضه: ناني انتي يابنتي بنادي عليكي من بدري وانتي مش هنا مالك يابنتي.
ناني: معلش يا روضه ما أخدتش بالي وكنت بدور علي حد اعرف منه عنوان المستشفي اللي فيها تامر.
روضه: تامر مين يابنتي ومستشفى ايه .
ناني: ماهو تامر الاسيوطي هو اللي عمل الحادثه وانا عايزه اروح أزوره .
روضه: اوبس ده الدنيا مقلوبه عشانه ورجال أعمال بتبعتله ورد زي ماجاش علي بالي اني اقولك طيب انا هاجي معاكي الحمدلله مافيش محاضره النهارده مش عارفه ليه دكتور فادي أجلها.
ناني: طيب وشغلك مش عايزه اعطلك وكمان شدوي هاتقلق عليكي.
روضه: يافالحه انتي ناسيه انك هاتيجي معايا الشركه وشدوي هاتستنانا هناك يالا.
؛؛؛؛؛؛؛؛؛؛؛؛؛؛؛؛؛؛؛؛؛:::::::::::::::::::::::::::::::::::::::::::
الحج قاسم: يعني دلوقك المهندس جاي مع العمال عشان يشوف الجناح طلباته ويحسب حسبته.
طاهر: ايوه ياابوي وكمان شيعت لمعتصم عشان يكون واقف معاه ويقوله يعمل جناحه علي كيفه ويوسف لما يعاود يبقي يشوف جناحه وياسمين ماهي مهندسه كد الدنيا ترتبت جناها علي كيفها .
الحجه حسيبه: كيف ده ياولدي اتصل بيوسف يعاود النهارده يقول عايز ايه ويبقي يرجع شغله تاني.
طاهر: كيف ده ياما هو شغال لحاله ومتخافيش اني مرتب كل حاجه.
الحج قاسم: علي بركه الله ياولدي اومال فين جوزك يا إلهام .
إلهام: محمود رجع متأخر من المزرعه ولساه نايم هاقوم اشوفه يابا الحج.
نغم: خليكي مرتاحه ياماما وانا هطلع اشوفه وكمان اجيب تليفوني اتصل علي سالم اشوفه هايرجع امتي من مصر.
الحجه حسيبه: روحي يابتي ربنا يكملك بعقلك ويكتبلك الخير والسعاده.
معتصم من الخلف وانا ماليش دعوه حلوه من دول ولا ايه.
الحجه حسيبه: ولدي ليك كل الخير والهنا ياضنايا وافرح بيك وبخلفك الصالح ياااارب.
طاهر: يا هنيالك ياعم معتصم ست الكل راضيه عنيك يبقي راحت علينا احنا بقي.
الحجه حسيبه: كيف عاد ياولدي انت واخوك وولادكم ضي عيوني .
لبني ومني في صوت واحد ربنا يباركلنا في صحتك وفي عمرك ياما وفي ابوي الحج.
صعدت نغم لكي توقظ والدها طرقت الباب ودخلت وقف أمام والدها وتنظر له عده نظرات مختلفه منها الحزن والشفقه فهي تحب والدها ولكن تحزن علي معامله لها ظلت واقفه لفتره تحدث نفسها ياتري يابابا بتحبني زي ما بتحب سالم نفسي اترمي في حضنك وقت زعلي واحس بأمانك نفسي يوم ما افرح تبقي اول واحد اجري عليه واشوف فرحته بيا.. وبعدها ربتت علي ذراعه لتفيقه
نغم: بابا يا بابا قوم جدي بيسأل عليك وعايز حضرتك.
محمود: فين امك يابت وانتي اللي طالعه لحالك ليه.
نغم: ماما بتحضر الغدا مع عمتي لبني ومني وانا قولت لجدي اطلع اقولك.
محمود: طيب انزلي قولي لجدك هاتسبح واجي .
________________________&______
بمحل الورد كانت ياسمين تتحدث بالهاتف مع شدوي
ياسمين: مبروك ياقلبي وربنا يتمم بخير وامتي بقي الخطوبه.
شدوي: بابي مسافر مطروح عشان المشروع الجديد واول مايرجع هانعمل الخطوبه علي طول.
ياسمين: يارب علي خير حبيبتي انا مش هاجي الجامعه النهارده عندي شغل كتير وكمان يوسف جاي وهانتغدا بره.
شدوي: مافيش حاجه مهمه النهارده وفادي لاغي المحاضره بيقول عنده مشوار مهم.
ياسمين: تمام ياقلبي باااااي.
دخل يوسف عليها وقال مين قلبك غيري ياسو
ياسمين: انت طبعا قلبي دي شدوي صاحبتي بتقولي أن النهارده مافيش محاضرات وكمان اتخطبت لدكتور سراج.
يوسف: تمام اوي الف مبروك لها شدوي بنت محترمه وتستاهل كل خير.
ياسمين: يارب المهم فين المجنون ابن عمك سافر ولا نايم.
يوسف: ده جنني كل شويه روضه روضه لما قربت اخنق روضه.
ياسمين: هههه ده مارضيش يمشي امبارح غير لما شافها .
يوسف: سالم جدع وراجل وربنا يكرمه ببنت الحلال وروضه بنت بميت راجل وهاتمشيه زي الساعه.
في المستشفي كانت وصلت ناني وروضه وسألت علي رقم غرفه تامر استقلوا المصعد وصعدوا الي غرفه تامر طرقت الباب ودخلت وألقت السلام.
تامر: اهلا ياناني ازيك عامله ايه.
ناني: الحمدلله بخير انت اخبارك ايه دلوقتي والف سلامه عليك.
تامر: الله يسلمك ياناني ازيك ياروضه عامله ايه ومتشكر اوي انك جيتي .
روضه: الف سلامه عليك ياتامر وربنا يتمم شفاك علي خير.
ناني: انا ماكنتش اعرف عنوان المستشفي وعرفته من واحد صاحبك.
تامر: صحابي مين ده مافيش حد سأل عليه ولا حتي اتصل بالتليفون.
روضه: يبقي ماتقولش عليهم أصحاب لان الصحاب بيبانوا وقت الازمه مش في الفرح.
ناني: ده حقيقي تعرف ياتامر انا دلوقتي بعدت عن كل الشله وبقيت مع روضه .
تامر: تعرفي احسن حاجه ياناني وانا اتكلمت مع دكتور فادي ووعدني يقف جنبي .
ناني: بجد ياتامر .
فادي: بجد طبعا اخبار البطل النهارده ايه.
تامر: اهلا وسهلا يادكتور اتفضل .
روضه وناني بكسوف رحبوا بالدكتور فادي وجلسوا جميعا.
فادي: ايه ياعم تامر هنبدأ امتي بقي كلها كام شهر علي الامتحانات.
تامر: يومين كده يادكتور لان العلاج فيه نسبه مخدر ومش بقدر اركز.
روضه: واحنا معاك ياتامر في وقت لحد ما تقوم بالسلامه.
ناني: طيب احنا اطمنا عليك ياتامر وهانبقي نجيلك وقت تاني.
تامر: تسلمي ياناني وميرسي بجد علي زيارتكم.
ناني وروضه وهما خارجين من الاوضه قال فادي....نااااااني هو انتي افتكرتك.....
#بائعه الورد..
الفصل العشرون...
قد تأتي علينا مواقف نود أن نبوح مابداخلنا ولكن عاصفه ثلجيه تجتاح حواسنا تجعلنا نعاني من شده برودتها ، فكم التراكمات التي تسكن بقلوبنا تجعلنا غير قادرين علي الاستمرار في الصمت وتأتي لنا لحظه اشتعال النيران فتنفجر ألسنتنا بكل ما تحمله الرياح......
تلك كميه المشاعر والأحاسيس التي عصفت بناني عندما تحدث إليها فادي وطلب منها الجلوس سويا بمكان هادئ فهي تحبه وتود التقرب إليه فهي تعي ما اقترفته في بادئ الأمر من محاوله التسلل الي قلبه وها هي الفرصه اتيحت لها لكي تعيد حساباتها مره اخري وتقترب منه بشكل سوي...
فادي: هاتفضلي ساكته كتير عايز اسمعك ومش عايزك تفكري في اي حاجه من الماضي خلينا نتكلم ونشوف تأثير كلامنا علي بعض ايه.
ناني: تصدقني لو قولتلك اني مش عارفه ابدأ كلامي ازاي أو منين أو بمعني اصح مش مستوعبه اللي انا فيه.
فادي: طيب انا هاقصر عليكي الكلام وأبدأ انا يمكن بكلامي اقدر اكسر الحاجز الموجود بينا دلوقتي.
نظرت له ناني بابتسامه هادئه علي طريقته الجذابه في تناول الحديث وكسر حاجز التوتر التي تحتلها.
فادي: بصي انا عرفت حقيقه مشاعرك ناحيتي وان محاولاتك في لفت نظري ليكي كانت لمجرد التقرب ليه علي الرغم من أنها غلط لكن احب اقولك انك فعلا لفتي نظري ليكي مش هانكر اني تجاهلتها بس في حد رجعها لتفكيري تاني ولما شوفتك النهارده عند تامر اتأكدت أن جوايا حاجه عايزه تقرب منك.
ناني ظلت صامته تستمع له وبداخلها مشاعر وأحاسيس متخبطه فهي أمامه وقريبه منه وهو بذاته يعبر لها عن إحساسه ويتفهم ما قامت به معه .
فادي: بردو هاتفضلي ساكته ناني عايز اسمع صوتك عايز اعرف هل احساسك بيه حقيقي ولا مجرد اعجاب بدكتور ليكي في الجامعه ومجرد احساس عابر.
ناني مسرعه بالحديث لا إحساس حقيقي مس مجرد دي خالص ووو........
فادي: ووو ايه هانرجع تاني للسكوت انا مقدر مشاعرك حاليا و اكيد هنتقابل تاني ونتكلم اكتر بس ليه طلب عندك ماحدش يعرف حاجه عن علاقتنا في الوقت الحالي ممكن.
ناني: اكيد طبعا بس تعرف احساسك لما الدنيا تخيرك بين اللي تحبه وإللي يريحك، اختار اللي يريحك .. راحتك أهم من اللي تحبه، لإنك لو مش مرتاح مع شيء بتحبه هتكرهه وده كان احساسي اول مره شوفتك فيها حسيت بالراحه قبل ما.....
فادي: وده نفس احساسي وبجد مبسوط جدا انك قبلتي تيجي معايا ونعقد ونتكلم .
ناني: انا اللي بشكرك علي الفرصه دي وعن اذنك بقي امشي عشان روضه هاتقتلني علي التأخير عليها.
فادي: طيب تحبي اوصلك عشان ماتتأخريش عليها اكتر من كده.
ناني: معلش خليها وقت تاني...ابتسمت له ومدت يدها تسلم عليه وتركته وخرجت استقلت سياره اجره واتجهت الي شركه المرشدي لاستلام عملها مع روضه ...
_________________________________
بمرسي مطروح كان مراد المرشدي بالفندق ينتظر فؤاد الالفي للذهاب الي موقع المنتجع السياحي وخلال دقائق أتي إليه وتبادلا السلام وخرج كلا منهما واستقل كل واحد سيارته وبعد نصف ساعه وصلا الي الموقع...
ترجل السيد مراد المرشدي ومعه فؤاد الالفي وبدأ إلقاء النظر علي كل شئ في الموقع وأعجب كثيرا بالتصاميم المقدمه لإنشاء المنتجع واتفق علي أن يتم إرسال مجموعه من المهندسين الجدد في عمل الديكور بعد ثلاث اشهر من البناء والاستعداد لعمل كل ما يلزم الديكورات المطلوبه للمنتجع....
مراد: حاجه عظيمه جدا يافؤاد ماكنتش متوقع حجم المشروع كده.
فؤاد: المشروع ده حلم حياتي أن يكون عندي أكبر منتجع سياحي في الشرق الأوسط علي الرغم من مجموعه المشاريع اللي عملتها خلال الفترة القصيره دي إلا أن المنتجع ده هايقلب موازين كتير بالنسبالي.
مراد: باذن الله خير وانا هعمل كل جهدي أننا نقدم شكل مشرف للديكور في المنتجع ده ووعد أن المهندسين هايسلمونا قبل الميعاد.
فؤاد: تمام اوي ودلوقتي بقي ممكن تقبل عزومتي علي الغدا في مطعم هنا بيعمل مأكولات بحرية انما ايه .
مراد: وانا مش هاكسفك يافؤاد مع اني لازم ارجع القاهره لان بنجهز خطوبه شدوي بس هاقبل عزومتك.
فؤاد: الف مبروك يامراد وعقبال دكتور فادي ولازم تبلغني قبلها عشان اقوم بالواجب.
مراد: متشكر ليك يافؤاد .....
بمديريه امن مطروح كان الملازم أول مصطفي يزور صديق له وتحدث معه بخصوص فؤاد الالفي واسرد له بعض المعلومات التي تخص القضيه واتفق معه أن يكون الطرف الثالث لمد يوسف ومصطفي كل ما يخص الالفي..
مصطفي: كده انت فهمت اللي مطلوب ياحسام بس اهم حاجه السريه .
حسام: ماتقلقش يامصطفي وطمن يوسف انا اصلا من وقت ما جيت مطروح وانا في علامات استفهام كتير حوالين الراجل ده والغريب ان شركه المرشدي داخله شريك في المشروع الجديد.
مصطفي: كله هايبان في وقته المهم تخلي بالك من الصغيره قبل الكبيره اسيبك بقي عشان ألحق ارجع القاهره.
حسام: يابني خليك الليله وسافر الصبح وانا هاسهرك سهره تحلف بيها طول عمرك.
مصطفي: هو انت لسه زي ما انت ماتغيرتش ماشي ياعم خليني معاك النهارده.
حسام: اشطاااا احنا هانخربها ياجدع.......
********************************
عندما نفقد الكثير في حياتنا يأتينا العوض من الله فقد يكون إنسان يحمل لنا الكثير من الحب والأمان وقد تكون صحبه محبه لنا وها أنا احمدك ربي علي عطاياك فمنحتني الحب والأمان والصحبه الرائعه ...
معتصم: حبيبتي بتكتب ايه ولا بتذاكر ايه ممكن اساعدك علي فكره.
نغم: تسلملي يامعتصم ابدا زهقت من المذاكره فقولت انزل الجنينه اكتب شويه حاجات جوايا يعني نوع من أنواع الفضفضه بس علي الورق.
معتصم: فضفضه علي الورق وانا موجود ياستي اعتبريني الدفتر بتاعك وفضفضي معاه.
نغم: انا مش عايزه اشغلك دي مجرد شخابيط مش اكتر .
معتصم: امممم طيب ممكن اخد الدفتر بتاعك اقرا الفضفضه دي ولا هاتضايقي
نغم: لا طبعا مش هتضايق وبعدين احنا هنكون حاجه واحده ولازم نتشارك في كل شئ.
سالم وهو يدخل من الباب الرئيسي للبيت رأي نغم ومعتصم يجلسون فقرر أن يمشي بهواده وبطء لكي لا يشعر أحدهم به وإذا به يقف خلفهم وبصوت عالي قال ...نحن هنااااااا..
فزعت نغم من صوت سالم وارتمت في أحضان معتصم وقالت تعرف انك رخم اوي .
معتصم: والله بني ادم معندوش دم بس تعرف لولا اللي حصل ده كنت ربيتك فيها وغمز له.
سالم: عشان تعرف بس خدماتي ياعم روميو وضحك .
نغم انتبهت لوضعها بين أحضان معتصم فعتدلت من جلستها وحمحمت فضحك كلا من سالم ومعتصم علي كسوفها.
أما نغم في نفسها كانت فرحه بمدي الامان والحنين التي شعرت به بين ذراعيه واحضانه وتمنت لو تظل طول الوقت في أحضانه.
معتصم: حمدالله على السلامه ياعم اخبار مصر واللي في مصر.
سالم: تمام التمام بس مش عايز اقولك البت عليها لسان عايزه قطعه بترد عليه الكلمه بعشره.
نغم: اهو تطلع عليك اللي بتعمله فينا تعرف اني نفسي اشوفها من كلامكم عليها.
سالم: استني هاخليكي تشوفي صورتها وأخرج هاتفه من جيب بنطاله وفتح معرض الصور ليريها صوره روضه فهو انتهز فرصه وجودها بمحل الورد وألتقت لها عده صور لها.
نغم: بسم الله ماشاء الله شكلها حلو وجمالها هادي يارب ياسالم تبقي من نصيبك.
معتصم: بس كده غلط ياسالم المفروض تستأذنها قبل ما تعمل كده .
سالم: ماقدرتش امنع نفسي يامعتصم بس صدقني انا ناوي ادخل البيت من بابه .
معتصم: ربنا يكتبلك اللي فيه الخير...
_____________________________
بالقاهره بمطعم راقي يطل علي النيل جلست ياسمين بصحبه يوسف لتناول الغداء فيوسف طلب لها طعامها المفضل وهو وجبه الميكس جيرل وعصير البرتقال الطازج..
ياسمين: لسه فاكر وجبتي المفضله ياجو .
يوسف: ومن امتي جو بينسي حاجه ياسمينه حياته بتحبها.
ياسمين: تسلملي حبيبي ربنا يخليك لقلبي ومايحرمنيش منك ابدا.
يوسف: بحبك ياياسو وبحلم باليوم اللي هاتبقي مراتي وفي حضني .
ياسمين: هانت ياحبيبي كلها كام شهر ونخلص امتحانات ونبقي مع بعض طول العمر.
يوسف: يااارب المهم معتصم كلمني وقالي أنه جاي اخر الاسبوع ومعاه نغم وسالم عشان نشوف الموبيليات مع بعض.
ياسمين: بجد والله حلو اوي وكمان فرصه نخرج نغم ونبسطها شويه.
يوسف: تمام يالا بينا اوصلك عشان ارجع شغلي عندي قضيه جديده وعايزه اجمع كل المعلومات عنها .
ياسمين: يالا حبيبي وانا كمان عايزه اروح انام شويه عشان عندي مشروع لازم اسلمه للدكتور بعد بكره.
يوسف: تمام ياقلبي ونادي يوسف علي النادل وطلب الحساب وأخذ ياسمين واستقلوا السياره وتحرك يوسف في طريقه الي السكن التي تعيش فيه ياسمين....
#بائعه الورد..
الفصل الواحد والعشرون...
يوم جديد تشرق فيه الشمس باشعاتها الذهبيه تداعب عيون عسليه صافيه كنقاء العسل تستيقظ علي أثرها ياسمين تقوم من نومها وترتب سريرها وتدلف الي المرحاض تنعم بحمام دافئ وتتوضأ وتخرج ترتدي إسدال وتؤدي صلاه الصبح وبعد انتهاء فرضها تستعد لاستبدال ملابسها لتذهب الي الجامعه تخرج ياسمين كعادتها من غرفتها وتصبح علي أصدقائها في السكن وتصطحب روضه ويذهبون الي الجامعه ولكن اليوم كانت بصحبتهم ناني التي تقربت منهم وأصبحت صديقتهم.
ناني: علي فكره يابنات عايزين ننزل نشتري هديه لشدوي عشان خطوبتها ايه رأيكم .
روضه: حلو اوي طيب تفتكروا نجيبلها ايه .
ياسمين: انا عن نفسي هعملها ديكور بالورد ليوم الخطوبه في جنينه الفيلا عندهم يعني هعمل كوشه مختلفه كمان بوكيهات الورد علي الترابيزات نعملها بطريقه جديده .
روضه: واو ياسو فكره تجنن واكيد طبعا هاتبقي مفاجأة ليها بس ازاي هتعملي كده من غير ما هي تعرف قبلها.
ناني: انا عندي الحل بس وعد يابنات اللي هقوله مافيش حد يعرفه ولا حتي شدوي.
ياسمين: ايه هو الحل واكيد طبعا شدوي مش هاتعرف حاجه.
ناني: انا هاقولكم كل حاجه ....وقصت عليهم ناني ما حدث بينها وبين فادي وتم الاتفاق علي ترتيب كل شئ بدون معرفه شدوي.
بعد وقت ليس بكثير وصلن الفتيات الي الجامعه وذهبن الي الكافيتريا لمقابله شدوي
ام عند شدوي قامت من نومها وقررت عدم ذهابها الي الجامعه لتستعد للخروج مع سراج لشراء الشبكه واتصلت علي ياسمين لتبلغها بعدم حضورها اليوم للجامعه..
ياسمين: ماشي حبيبتي واحنا اللي بندور عليكي في الجامعه كلها.
شدوي: معلش ياقلبي انا نسيت اكلمك بالليل اعرفك اني نازله مع سراج نجيب الشبكه بابي اتصل بيه من مطروح وقال نعمل الخطوبه بعد بكره.
ياسمين: حبيبتي الف مبروك وربنا يتمم بخير وماتقلقيش احنا هانرتب كل حاجه.
شدوي: حبيبتي تسلميلي ياسو انا كنت هطلب منك الورد الخاص بحفله الخطوبه عشان يبقي عندك وقت.
ياسمين: بصي ماتفكريش في حاجه غير انك تبقي مبسوطه بخطيبك وبس وانا والبنات هانجهز كل حاجه.
شدوي: اوك ياقلبي باااي ...
اغلقت الهاتف وتوجهت الي الحمام لتنعم بحمامها الدافئ ...
ام عند ياسمين والبنات في الجامعه قرروا الذهاب الي محل الورد وناني استأذنت منهم لتذهب الي مكتب فادي لتقول له الاتفاق الذي تم بينهم في تجهيز جنينه الفيلا ليوم الخطوبه.
ناني صعدت الي مكتب فادي وطرقت الباب وسمح لها بالدخول..دلفت ناني ووقفت أمامه وقالت...صباح الخير يا دكتور.
فادي: صباح الورد وابتسم واذن لها بالجلوس اكيد حظي حلو النهارده انك جيتي مكتبي.
ناني بكسوف جلست وقالت أنا جايه عشان عايزه حضرتك في حاجه بخصوص شدوي.
فادي: مالها شدوي في حاجه او عرفت حاجه وضايقتك.
ناني: لا لا خالص الحكايه كلها أن ياسمين وروضه عايزين نعمل مفاجأة لشدوي وترتب لها حفله الخطوبه .
فادي: امممم فهمت عايزين مساعدتي في اني اشغل شدوي عنكم وانتوا بتجهزوا الجنينه كده صح.
ناني بابتسامه إعجاب علي تفهمه السريع قالت بالظبط كده استأذنك بقي عشان البنات بااااي.
فادي: باااي .....
عند شدوي كانت في غرفتها تستعد للخروج مع سراج ارتدت شدوي بنطال جينز ازرق فاتح وعليه قميص اسود وفوقه جاكيت من نفس اللون وحذاء اسود بكعب عالي وتركت العنان لشعرها الذهبي ينسدل علي ظهرها وبعد دقائق نزلت وألتقت بسراج وخرجوا معا لشراء شبكتها ودبل الخطوبه...
بمحل الورد كانت ياسمين وروضه يتحدثون معا فانتهزت الفرصه ياسمين لتحدثها عن إعجاب سالم ابن عمها بها.
ياسمين: روضه كنت عايزه اقولك حاجه بخصوص سالم .
روضه: ابن عمك ده مجنون وعايز يتعامل معامله اطفال انتوا مستحملينه ازاي.
ياسمين بضحك والله سالم ده جدع جدا ودمه زي العسل لو تعرفي هو مستحمل ايه هاتعذريه وتعرفي أنه الضحك والهزار ما إلا هروب من حاجات هو بيمر بيها.
روضه: ياااااه كل ده عن سالم بس ياسو كل ما يشوفني يرخم عليه.
ياسمين: لا والله ده علي اساس أن لسانك متاكل منه حته ده انتي لسانك مترين معاه يالا المهم أنه معجب بيكي جدا وعايز يتكلم معاكي اديله فرصه ياروضه.
روضه: ياسمين انتي بتقولي ايه مين ده اللي معجب بيه يابنتي انا مش بفكر في الارتباط دلوقتي خالص محتاجه اكون مستقبلي ومستقبل اخواتي .
ياسمين: وليه لا حاولي ياروضه سالم يستاهل تحاولي وانتي كمان ياحبيبتي جميله ومهندسه يعني الف من يتمناكي وعلي فكره هو جاي بكره مع معتصم ونغم واهو فرصه في خطوبه شدوي تتكلموا.
روضه: هحاول ياسو بس لو ماقدرتش ماتزعليش مني.
ياسمين: عمري ما ازعل منك انا كل اللي بتمناه تكوني معايا طول العمر ويارب ياروضه يكتبلك كل خير.
________________________________
بالصعيد في بيت الحج قاسم الشناوي كان جدال بين سالم وأبيه عن سفر نغم معه ومعتصم فكان محمود معترض علي سفرها بأن لا يصح السفر مع معتصم طالما لا يربطهما وثيقه زواج وسالم كان يعترض علي رأي والده فهو يكون معها ولا يتركها بمفردها وعلي صوتهم لدرجه اجتمع من في البيت علي الصوت وصعدوا جميعا الي الاعلي ...
طاهر: في ايه يامحمود صوتك عالي ومسمع الخلق بره حصل ايه لكده.
محمود: مافيش حاجه ياطاهر اني كنت بتكلم مع سالم وصوتي طلع .
سالم: لا ياعمي بابا مش موافق علي سفر نغم القاهره وبيقول مايصحش تسافر مع معتصم قبل كتب الكتاب وأنا بقوله اني هكون معاها يعني مافيش مشكله .
الحجه حسيبه: انت يامحمود ياولدي بتعارض كلمه ابوك ومعاوزش البت تسافر وتختار عفشها
محمود: اني ماقولتش أكده ياما اني خابر زين كلام الناس اللي هاتعرف أن البت سافرت مع ولد عمها من غير جواز.
معتصم: وانا مستعد اكتب كتابي عليها حالا ياعمي لو ده يطمنك مع أن مالوش لزوم طول ما سالم اخوها مسافر معانا .
إلهام: ماتقولش أكده ياولدي عمك مايقصدهاش عاد .
محمود: وانتي ايه دخلك في حديتنا ياوليه وايه كلامك الماسخ دي.
إلهام نظرت له نظره لوم وعتاب وأمتلئت اعيونها بالدموع ودخلت غرفتها مسرعه بينما نظر الجميع لمحمود بنظره غضب ودلفت الحريم الي غرفه إلهام لمواستها علي فعله زوجها أمام الجميع..
سالم: حرام عليك بقي يابابا طول عمرها وهي مستحمله وبتراعي خاطرك هي قالت ايه يعني طول عمرك بتعاملها وحش ايه ذنبها اللي عملته عشان تعاملها كده حرام بقي وتركه ودخل لوالدته..
طاهر: طول عمرك وانت قلبك قاسي عليها ليه ماخابرش مش هي دي إلهام اللي كنت هاتموت عشان تتجوزها حرام ياولد ابوي واحمد ربك أن ابوك لساه في المزرعه ومش موجود وشاف اللي حصل .
محمود: أني مش خابر عملت أكده ليه وان كان علي سفر نغم تسافر واني محقوقلك يااخوي .
طاهر: من غير اي حاجه ولدي هيسافر ومعاه عروسته وأخوها تشتري عفشها وخلص الكلام واني هادخل اشوف إلهام وطيب خاطرها لانها قبل ما تكون مرات اخوي تبقي بت خالي وليها حق علينا كلنا.
بغرفه إلهام كانوا يجلسون جميعا يحاولون مواساتها وهي كانت تبكي بصمت وجلست بجوارها نغم تبكي علي بكائها....
مني: في ايه يانغم يعني احنا بنحاول نسكتها انتي بتبكي ياحبيبتي ياما بيحصل بين الواحد ومراته .
لبني: عندك حق يامني طيب ده كتير كان طاهر يفزع فيه واني كنت اقلبها بهزار عشان ما يطولش الزعل بنتنا..
مني: انتي بتقولي فيها والله سالم الله يرحمه كان بردو بيحصل بينا زعل وبعدين بقي عايزين ننزل نحضر العشا زمان بابا الحج علي وصول مش عايزين نخليه يحس بحاجه ولا ايه.
الحجه حسيبه: عين العقل يابتي وانتي يا إلهام ياضنايا متزعليش منيه وحقك عليه.
سالم: هو في زي قلب إلهام الطيب هي بس حابه تشوف غلاوتها عندنا يالا يالوما بقي عايز اكل من ايدك احلي فطير ومعاه عسل بالقشطه ياقشطه.
إلهام بضحك علي طريقه ابنها ومحاولاته في ارضائها قالت: ربنا يخليكم ليا ويسعدك ياسالم واشوفك عريس عن قريب.
سالم: يااارب يا اختي يسمع منك ربنا....
ضحك الجميع علي مزاح سالم مع والدته ونزلوا جميعا لتجهيز العشاء للجميع ...
ام نغم فقد أخذت دفترها وقلم وخرجت الي الجنينه الخاصه بالمنزل وجلست تسطر بعض الكلمات ....
مافيش حد اناني قد اللي مش عاوز يخسرك لكن مش عاوز يتعب عشان يحافظ على وجودك، مش عاوزك تمشي لكن سايب ايدك .. عاوزك تفهم وتعذر وتسامح ومش عاوز يجرب مايعملش اللى بيوجعك ويزعلك .. عاوزك تحب وتحن وتصبر ومش مهم هو يقدر ده حتى !
معتصم: حبيبتي قاعده لوحدها ليه وسائق الحزن والدموع في عيونها الجميله كمان.
نغم: معتصم انت هنا من أمتي انا ماحستش بيك.
معتصم: انا هنا من بدري كنت بشوف الورد المزروع في الحوض الشرقي عشان محل ياسمين وانا داخل البيت لمحتك قاعده قولت اجي اشوف قمري بتعمل ايه.
نغم: مش بعمل كل الحكايه اني متضايقه من اللي بيحصل بين بابا وماما فحبيت أخرج اشم هوا.
معتصم: نغم ممكن تسمحيلي بالدفتر ده نفسي بجد اقرأ كلامك .
نغم: طبعا اتفضل اهو..وأعطته الدفتر وفتحه معتصم وكانت أول كلمات مكتوبه هي...
رغم سهولة الصمت إلا أنه أشد ثقلاً من الكلام ورغم أنه لا يبذل فيه أي مجهود إلا أنه أكثر إرهاق وتعب من الحديث ."
انتقل الي صفحه اخري وكان مكتوب فيها....
إن رأيتني معك فكن معي..
وأن رأيتني أتجاهلك فكن أيضا معي..
فربما هنالك حزن منك ولا علاج منه إلا بك..
كن لطيفا بحديثك معي..
فقد أعاني من وجع الحياه وأنت لا تعلم..
كن معي وعانقني بالكلمات..
ف بعض الكلمات لها يد حنونه تعانق الروح...
وبعد أن قرأ معتصم تلك الكلمات نظر لها وقال طول عمري هاكون معاكي وجنبك لانك روحي اللي عايش بيها وعشانها ومن غيرها ماقدرش اعيش .
ثم بعد ذلك اكمل قراءه ووقف عند تلك الكلمات...
سألت قلبي: أتظن القلوب المتحابه تتخاصم؟ قال: احرص على صون القلوب من الأذى فهي نقطة سوداء إن دخلت القلب وكبرت أفسدت الحب الذي فيه! قلت: أو يقسو الحبيب على حبيبه؟ قال: أو لسنا بشرا لنا قلوب تقسو وترق؟ قلت: أو يهجر الحبيب حبيبه؟ قال: وينسى إن كان الخصام شديدا فالأسى يفسد الود! قلت: وأي طريق أقرب للرجوع؟ قال: ما أصعب رجوع الأحبه إن ضاع الحب بينهم! قلت: أو ما من سبيل؟ قال: إلا رحمة من الله بأن لا يكون القلب كقلوب البشر قلت: وهل يحق للحبيب الخصام دون عتاب؟ قال: فذاك ليس بحبيب!! فمن يحبك يعاتبك ويجتهد حتى لا يفقدك!
ونظر لها مره اخري واقترب منها وأمسك يدها بين يديه مثل أم تخفي ابنتها بين احضانها وقال...بحبك ياكل عمري .
______________________&&_______
عوده مره أخري إلي القاهره
يوسف بعد أن انتهي من عمله أخذ مفاتيح سيارته ونزل من مكتبه صعد سيارته وتحرك بها الي محل الورد ليقابل ياسمين..وبعد دقائق وصل وترجل من السياره ودخل المحل وألقي عليهم السلام...
ياسمين: جو حبيبي حمدلله علي سلامتك اتأخرت كده ليه..
يوسف: معلش حبيبتي كان عندي شغل كتير اوي النهارده وحبيت اخلصه عشان ابقي فاضي بكره ولاد عمك جايين الصبح.
ياسمين: بجد حلو اوي يبقي نغم هاتقعد معايا في السكن وانت خلي معاك سالم ومعتصم.
وأثناء حديثهم مع بعض ناني اقتربت من روضه وبهمس قالت ...هو مين المز ده يابت وكمان ياسو بتقول حبيبي ايه النظام.
روضه بنفس الهمس ده يوسف ابن عم ياسمين وخطيبها وظابط شرطه يا اختي حمدالله علي السلامه يايوسف.
يوسف: الله يسلمك ياروضه ايه ده في حد جديد معاكوا ولا ايه.
ياسمين: دي ناني صاحبتنا معانا في الجامعه وفي السكن واسكندرانيه كمان يعني لما نحب نصيف يبقي عندنا سند هناك.
ناني: عيوني ليكي ياسو واهلا بحضرتك استاذ يوسف.
يوسف: اهلا بيكي ياناني المهم أكلتوا حاجه انا واقع من الجوع.
روضه: والله انت انسان عظيم انا ميته من الجوع والظلمه دول مش راحمين .
ياسمين: يابنتي اومال مين اللي أكل البيتزا أمي مثلا اهدي ياماما ياخوفي علي ناس اعرفهم.
ضحك يوسف علي مقصد ياسمين وقال...ماتقلقيش ياسو ده هايبقي دويتو هايل والاتنين مافيش عندهم تفاهم في موضوع الاكل ده.
ياسمين: عندك حق ياجو بس الاول قولي رأيك في تصميم البوكيهات دي .
يوسف: حلوه اوي لمين دي شكلها كده لحفله صح.
ياسمين: اه دي بوكيهات الورد لتربيزات حفله خطوبه شدوي وكمان التصميم ده عشان الكوشه ايه رايك.
يوسف بإعجاب شديد تحفه ياسو بجد الوان الورد وترتيبه رائع تسلم ايدك حبيبتي.
روضه: طيب والنبي خلي وصله الحنيه دي بعدين وتعالوا نتعشا في اي مكان هموت جعانه ياناس ...
بمكان اخر كان يجلس سراج ومعه شدوي في مطعم يتناولون العشاء بعد انتهائهم مش شراء الشبكه ...
سراج: تعرفي ياشدوي انا كنت بحلم قد ايه باليوم ده انك تبقي قاعده كده قدام عينيا وأنك تبقي شريكه حياتي .
شدوي: مش عارفه بس كل اللي اعرفه حاليا اني مبسوطه جدا وحاسه اني في حلم بتمني يفضل علي طول.
سراج: حلم ايه ده حقيقه وبعد بكره خطوبتنا وكلها كام شهر وتبقي مراتي.
شدوي: طيب انا عايزه اقولك حاجه مهمه كان نفسي اقولها من زمان اني كنت معجبه بيك من اول يوم شوفتك فيها في الجامعه .
سراج: هاتصدقيني لو قولتلك كنت حاسس بيكي وعشان كده طلبت تكوني في التيم معايا وتبقي قصاد عيني طول الوقت وانا حاليا عايز اعترفلك اني بحبك....