رواية غمرتني عشق
الحلقة السادسة عشر والسابعة عشر
بقلم شيمو الخطيب
الحلقه ٢٦
من (غمرتني عشق)
اللهم صل على سيدنا محمد صلاة تنجينا بها من جميع الأهوال والآفات، وتقضي بها جميع الحاجات، وتطهرنا بها من جميع السيئات، وترفعنا بها عندك أعلى الدرجات، وتبلغنا بها أقصى الغايات من جميع الخيرات في الحياة وبعد الممات، وعلى آله وصحبه وسلم تسليماً كثيراً.💕♥️🌹
بسم الله نبدأ
قاسم بيلف في المول وناسي هو داخل ليه، لكن بيلف بدون تركيز، وفجأه سمع بنت بتنادي
بسمه بصوت عالي: عشق،،، بت يا عشق استنيني
(عشق سبقت بسمه وبترخم عليها)
قاسم قلبه اتخطف اول ما سمع الاسم، وبص ناحية البنت دي وجرى عليها
قاسم قرب منها بحرج: احم،،، لو سمحت يا انسه
بسمه بصت عليه، وتاهت في جماله، وتنحت وقالت ببلاهه: هاه،، هو حضرتك عايزني
قاسم مش مركز معاها ولا مع نظارتها: معلش يعني في سؤالي بس حضرتك كنتي بتنادي على واحده اسمها عشق، مش كده
(عشق في اللحظه دي كانت راجعه لبسمه، لكن اول ماشافت قاسم من ضهره، جريت بعيد، واستخبت ورا رف عالي، وحطت اديها على قلبها، وبتتنفس بصوت عالي. وعنيها بتنزل دموع، ومش عارفه تعمل ايه. نفسها تروح تترمي في حضنه، لكن كبريائها مانعها، وخايفه بسمه تقول على مكانها،، لكن قررت انها تخرج من المكان خالص، وتطلع بره، وفعلا خرجت، وعرفت عربية قاسم، ووقفت قريب منها عشان تقدر تشوفه وَهو خارج، وتملي عنيها منه، لأنه وحشها
قاسم سأل بسمه على عشق
بسمه بلبخه: هاه، عشق،، اااه عشق،. وافتكرت صورة قاسم وعرفت انه هو ولحقت نفسها وقالت،، ايوه فعلا انا كنت بنادي على اختي الصغيره،، قاسم بص لفوق بخنقه، وكأنه كان نفسه تطلع هيا،،،،،،، بسمه كملت،،، ممكن حضرتك توسعلي الطريق، لأن زمانها خرجت وتاهت مني،
قاسم اتنهد بزعل، وقال:اتفضلي وانا اسف جدا لو ضايقتك
بسمه بزعل لمنظره: لا يا استاذ مفيش ضيقه ولا حاجه،، وبصتله كتير وقالت،،، بعد اذنك
قاسم وسع ليها الطريق ومسح وشه بايده، واشتري احتياجاته ، وحاسب عليها وخرج
عشق متبعاه، واول مشافته،. قلبها كان هيوقف من سرعة دقاته، وحطت اديها على بقها، وعيطت في صمت،، وقاسم فتح عربيته، ودخل سند راسه على الدريكسيون شويه، وبعدها، شغل العربيه ومشي بخنقه
بسمه خرجت بره المول وبتنادي على عشق، وشافتها سانده على الحيطه بضهرها، ودموعها نازله، اخدتها في حضنها، وقلتلها،،،، حرام عليكي اللي انتي عاملاه في نفسك، لو تشوفي لهفته عليكي، مش هتعملي كده،،
عشق مسحت دموعها، وقالت: يلا يابسمه، انا عايزه اروح
بسمه بصتلها بحزن وسكتت
وفعلا رجعت البيت، ودخلت اوضتها، وكانت فاديه في المطبخ، واترمت عشق على سريرها وطلعت صورة قاسم، وعيطت بصوتها كله لدرجة فاديه سمعتها وجريت عليها
فاديه قربت من عشق بخوف وقعدت جنبها على السرير ومسحت على راسها: عشق، مالك يا حبيبتي، فيكي ايه، طمنيني عليكي يابنتي
عشق بشهقات : م، م، مفيش ياماما، ا، ا، انا مخنوقه بس شويه،
فاديه بحب : مخنوقه عشان د محمد عايز يرتبط بيكي ولا فيه حاجه تانيه
عشق قامت بسرعه ومسحت دموعها: وانتي عرفتي منين ياماما
فاديه: بصراحه هو لسه ماشي من شويه، وقالي انه قالك انه معجب بيكي، وعايزك تفكري في مصلحتك وحياتك ومتوقفيهاش على حد مالكيش نصيب معاه
عشق اتنهدت بوجع السنين كلها،، وسكتت
فاديه مسكت وشها بين اديها : بصي ياعشق يابنتي، انا امك، وكل اللي يهمني في الاخر، مصلحتك وسعادتك،، قاسم خلاص ياعشق، شاف طريقه واختار حياته،، حتى لو بيحبك،، هو اتجوز خلاص، وانتي مكنش ينفع تتجوزيه وهو عازب، تفتكري هينفع دلوقتي تتجوزيه في ظروفه دي؟ ،، عشق،، لازم تفكري بالعقل ، لأن تفكير القلب دلوقتي مرفوض، ومحمد بصراحه انسان كويس، ومحترم وشاريكي، يبقى ليه لا،. بلاش تعيشي في ماضي صعب انه يتحقق منه حاجه،، بلاش أحلامك المستحيله دي يابنتي، بلاش الوهم اللي انتي ساجنه نفسك فيه، و إدي لنفسك فرصه تشوفي العالم بطريقه مختلفه، قاسم مهما كان، ، بقه راجل متجوز، يبقى خلاص ياعشق، لازم تخرحيه من حياتك،،
عشق اترمت في حضنها وعيطت، بحبه، بحبه قوي يا ماما
فاديه حضنتها،،، مع الوقت يا قلب امك هتنسي، بس ادي لنفسك فرصه ياعشق وحضنتها اكتر، و عدلتها على السرير وقرأت ليها قرأن كتير، ودعت ربنا يسعد قلبها،، لحد ما عشق استكانت و نامت،،
فاديه باستها،، وقفلت النور وخرجت.
تليفونها رن وراحت ترد
فاديه: تصدق ياواد انت خساره فيك العشره، بقه تتجوز ومتعزمش امك يا واد
حسام بضحك: قلبي يا فوفه والله، انتي عارفه الظروف، وعارفه انه مينفعش، ودي كانت رغبة عشق. يعني انتو تتشرطوا عليا،، وبعدين تزعلوا هههههه
فاديه بضحك : ههههه خلاص هعديهالك، المهم،، عامل ايه ياحبيبي. و عروستك عامله ايه،
حسام: كله تمام يا أمي الحمد لله،، انتي وعشق عاملين ايه.
فاديه بزعل : عشق تعبانه قوي يا حسام.،، اتقدملها انهارده دكتور محمد،، ما انت عارفه، لكن هي لسه قاسم مسيطر عليها، انا مش عارفه اعمل معاها ايه يا بني
حسام بزعل : بصي يا امي انا بصراحه بفكر اقول لقاسم، انا تعبت وانا شايفهم بيتعذبوا بالشكل ده، وانا واقف ساكت، قاسم لو عرف اني كنت عارف مكان عشق هتبقى دي نهاية علاقتي بيه،،، فاديه،،، كلمي عشق واقنعيها
فاديه بضيق: يابني انت بتتكلم ازاي،، قاسم دلوقتي راجل متجوز،، يعني خلاص، مبقاش ينفع، احنا مش خرابين بيوت يا حسام، وانا لايمكن أقبل لبنتي عيشه زي دي، ولو عشق نفسها وافقت انا اللي هرفض يا حسام،. اوعي تفكر تقول لقاسم ولا تعرضنا لموقف زي ده،. وخلاص مفيش نصيب بينهم، يبقى ليه نعمل مشاكل،، خلينا زي ما احنا ياحسام.،، لأن ربنا مش رايد يجمعهم مع بعض
حسام: طب منحاول يا امي، احنا نعرّف قاسم ونسيب ربنا هو اللي يدبرها
فاديه : حسام،، . صدقني هندخل في مشاكل ملهاش اخر، وبعدين بصراحه محمد انسان كويس واي بنت تتمناه، يبقى ليه أوقف حياة بنتي على حاجه مستحيل تحصل، وبمعني أصح، هيبقى فيها وجع قلب وخساره كبيره ليها، لا يا حسام، انا لايمكن اعمل في بنتي كده، وإذا كانت هي بتفكر بقلبها، فواجبي انا ان افكرلها بالعقل، عشان نقدر نوزن الأمور ونوصل لحل يريحنا كلنا
حسام بخنقه :اللي تشوفيه يا أمي، وربنا يسعد قلبها يارب،
فاديه : يارب انت وهيا يا حبيبي، ابقى طمني عليك على طول
حسام بزعل: عنيا حاضر، صحيح يافاديه،، انا احتمال اسافر كام يوم عسل كده ونرجع على طول بس لسه محددتش المكان
فاديه بحب : بالسلامه ياحبيبي يارب، ربنا يسعد قلبك يابني،، وأبقى كلمني من هناك ياواد
حسام؛،، ربنا يخليكي ليا ياست الكل يارب،، سلام يا امي
فاديه :مع السلامه ياحبيبي، وقفلت وبتدعيله بالسعاده دايما يارب
----------------- بقلم شيمو الخطيب
في فيلا العزيزي
قاسم وصل ونزل وكان محسن وهدي وجيجي قاعدين
قاسم بتعب وخنقه : السلام عليكم،،
محسن مردش وهدى وجيجي ردوا : وعليكم السلام
قاسم نده بصوت عالى : يا زينب،، يا زينب
زينب جت بسرعه: تحت امرك ياقاسم بيه
قاسم: عايز فنجان قهوه مظبوط يا زينب بس بن تقيل
زينب :من عنيا يا قاسم بيه
جيجي: استنى يا زينب،، (وبصت لقاسم) ممكن اعملهولك انا ياقاسم
قاسم بصلها واترسم قدامه وش عشق، لكن فاق من أفكاره وقال؛ اي حد مش هتفرق، المهم يبقى مظبوط
جيجي بزعل؛ حاضر على متغير هدومك هكون جهزته
قاسم رايح ناحية أوضة عشق،
هدي: انت مش هتطلع ياقاسم
قاسم بخنقه : لا انا هدخل ارتاح هنا شويه
محسن قاعد هيطق من الغيظ وبص لبنته لقاها بتبصله بحزن نفخ بضيق واستأذن ومشي
هدي دخلت ورا قاسم
هدي بقلق من رد فعله: قاسم،، ممكن اتكلم معاك شويه،، وعشان خاطري مترفضش
قاسم اتخنق من نفسه، وبصلها وقال: اتفضلي يا امي انا سامعك
هدي فرحت جدا لانه قالها يا امي، وقربت منه وأخذته في حضنها وعيطت بصوتها كله،
قاسم رفع ايده وضمها ليه، ونزلت دموعه غصب عنه، وخرجها من حضنه وباس راسها وقعدها على السرير
قاسم مسح دموعها وهي مش مصدقه تغييره المفاجئ ده: ممكن افهم بتعيطي ليه دلوقتي
هدي : انا بعيط من فرحتي ياقاسم، انا بجد فرحانه اني رجعت اسمع منك أمي من تاني، كنت خايفه اموت قبل ما اسمعها تاني
قاسم باس اديها: بعد الشر عليكي،، واتنهد بتعب،،، انا تعبااااان قوي يا ماما.، حاسس اني تايه، مش عارف اذا كنت صح ولا غلط،، مش عارف اخطط لحياتي، حاسس بخسارتي لعشق اني خسرت كل حاجه،، وهز راسه بلأ،،، لا لا، انا مش حاسس، انا متأكد ان بخسارتي ليها خسرت كل حاجه،، (وبص لهدي)،،، ليه يا ماما،. ليه تعملي فيا كده،، انتي اكتر واحده كنتي قريبه مني، اكتر واحده كنت بتكلم معاها،، ليه تقضي عليا
هدي بعياط وندم: انا عارفه يابني اني غلطت في حقك، لكن مكنتش قادره أتصور انك تتجوز خدا.... و مكملتش،،
قاسم اتنهد: ليه تفكيركوا دايما محدود،، ليه واقفين عند زمن عدي وفات،، الدنيا اتغيرت،، وانتو لسه عايشين في زمن فات،، انا قولتلك سعادتي معاها، ليه تبعديها، تقدري تنكري ان عشق احسن مليون مره من جيجي.،،
هدي بخنقه: عشق كانت بنت محترمه،، مقدرش انكر ده، وجيجي كمان ياقاسم، انت اللي مش مديها فرصه تبينلك حبها
قاسم ضحك بتريقه : هههههه، اه مش مديها،. ماما، انا مهما اتكلمت، للأسف الكلام مبقاش يفيد، انتو عملتو اللي انتو عايزينو، فخلاص بقه، سيبيني اعمل اللي انا عايزه
هدي: طب انت فعلا هتفض الشراكه ياقاسم
قاسم بنرفزه: ماما، اظن ان حضرتك مبتفهميش في شغل الشركه، يبقى مالوش لازمه الكلام . لاني اكتر واحد عارف مصلحتي كويس،،
هدي بزعل: طيب وابوك، هتبعده عن الشركه ياقاسم
قاسم : انا مقولتلوش ابعد، انا كل اللي انا قولته، أن الشركه شركتي انا، وانا المتحكم فيها، ومش عايز اسمع منه أي توجيهات ولا انتقادات واظن ده من حقي
هدي زعلت على ابنها ومشاعره المعدومه ناحية ابوه : ماشي يا قاسم، اللي تشوفه يا حبيبي، انا هطلع اطمن على حازم، وهنزل اكمل كلام معاك، انا لما صدقت انك رضيت واتكلمت معايا
قاسم ابتسم بخنقه وهز راسه وسكت،،
جيجي عملت القهوه ودخلت لقاسم الاوضه، وهدى استأذنت وخرجت
جيجي قفلت الباب وراها: ها ياقاسم، مش ناوي تطلع ترتاح في اوضتك
قاسم بيقلع قميصه، ومردش عليها
جيجي قربت منه، ومسكت وشه بين اديها : ممكن اعرف انت بتعاملني كده ليه،. قاسم انا بحبك،، بحبك بجد
قاسم نزل اديها من على وشه : وانا للاسف عمري ما حبيتك يا جيجي.،
جيجي بصدمه واتكلمت بصوت بيرتعش: ولما انت محبتنيش،. اتجوزتني ليه
قاسم ببرود؛ تخليص حق،، وبصلها قوي،،،، ايوه تخليص حق،
جيجي باستغراب:مش فاهمه،،، يعني ايه تخليص حق، وحق مين يا قاسم اللي عايز تخلصه
قاسم قرب منها وقال: عشق يا جيجي، ولا نسيتي القلم اللي ضربتيه ليها،، على العموم لو انتي بتنسي، فأنا عمري ما انسى اي حاجه تخص عشق،
جيجي بدموع: انت ايه يا اخي، مشاعرك ماتت، انت ازاي لسه فاكر البنت دي، ياقاسم دي لا يمكن كانت تنفعك ولا تليق بقاسم العزيزي
قاسم بزعيق: وانتي بقه اللي هتنفعيني؟ ،،، انتي الزوجه اللي المفروض افتخر بيها قدام الناس؟ ، تقدري تقولي ميزه واحده فيكي،.
جيجي بصوت عالي : انت ازاي بتقارني بيها، دي واحده زباله، جايه من الشوارع،، ازاي شايف فيها مميزات، ده يكفي اني من عيله الكل يتمنى يناسبها
قاسم مسكها من شعرها وصك على سنانه: اوعي تفكري تجيبي سيرتها على لسانك، لأنها اشرف منك مليون مره،، وعيلتك دي انا ميشرفنيش اني اناسبها من الأساس،
جيجي بتتألم:،،، ااااه ياقاسم شعري حرام عليه، (و بتحاول تفك ايد قاسم) قاسم رماها بغل على السرير وهي قعدت واتكلمت بعياط وخنقه
جيجي: طلقني ياقاسم، لو مش عايزني طلقني. وارحمني من القرف اللي انا فيه
قاسم ضحك : ههههه، اطلقك،، ده هيبقى حلم بعيد المنال يا جيجي هانم،، وبعدين لو طلقتك،، تقدري تقوليلي هتواجهي الناس ازاي، هتقوليلهم جوزك طلقك ليه، وتاني يوم جواز،، دي كانت فريده هانم تروح فيها هههه،، بصي يا جيجي، انا عايز افهمك حاجه، الاب والام اللي يرموا بنتهم لواحد هما عارفين انه مش طايقها يبقوا بصراحه مايستهلوش يتزعل عليهم، يابنتي انتي ابوكي وامك باعوكي،، وعشان مصلحتهم، نفس اللي حصل معايا،، بس انا قدرت اخد حقي، لكن انتي صعبانه عليا، عمرك مهتقدري تاخدي حقك، لأنك للأسف زيهم،،،، واطيه،، وكلبة فلوس
جيجي بتبصله ومذهوله من كلامه، ومش عارفه ترد عليه،،
قاسم ببرود؛ ايه،، وجعتك ولا انتي اصلا مبتحسيش،، انا بصراحه متأكد انك مبتحسيش،، وعشان كده قبلتي تبقى جاريه عندي،. عارفه،،، انا كان عندي استعداد ابقى خدام لعشق، لكن كنت واثق انها عمرها مكانت توافق على حاجه زي دي، عشق كانت متأكده اني بحبها، وقادر احميها من كل اللي حواليها، ورفضت بس عشان حست ان كرامتها هتتهان، وانها مينفعش تبعدني عن اهلي،، وكمل بتأثر،،، بس انا والله كان عندي استعداد اخسر الدنيا كلها عشانها، عشق سابت فراغ كبير جوايا، لا يمكن حد يملاه غيرها،،
جيجي اتخنقت من العياط ومقدرتش تستحمل كلامه وسابت قاسم وطلعت اوضتها تجري
وقاسم كمل لبس، وقعد وفجأه. دخلت زينب،.
زينب: قاسم بيه، الحق حازم بيه،
قاسم قام من على السرير بسرعه : فيه ايه يازينب ايه اللي حصل
زينب : تعبان قوى ياقاسم والست هدى جنبه
قاسم طلع بسرعه ودخل اوضته
قاسم بقلق : ايه يا ماما،، ايه اللي حصل
هدي بعياط : مبيردش عليا يا قاسم ولا قادر يتحرك
قاسم بص لحازم، وحازم لف وشه الناحيه التانيه وسكت
قاسم اتصل بالدكتور وبعد ساعه كان وصل وكشف عليه
قاسم؛ ها يا دكتور، طمني
الدكتور؛ للأسف ياقاسم بيه، دي جلطه في المخ واثرت على الحركه والكلام
هدي شهقت وعيطت؛: لا،، مش ممكن، يعني ايه يادكتور
الدكتور؛ يعني للأسف، مش هيقدر يتحرك حاليا، هو لازم يتنقل المستشفى عشان نتابعه، ويكون تحت اشرافي،
حازم سمع كلامهم وحاول يتكلم لكن مش قادر، ودخلت هدى وفهمت انه مش عايز مستشفى
قاسم؛ طيب هو رافض يروح مستشفى، ممكن يتعالج هنا واحنا هنوفرله كل احتياجاته
الدكتور؛ خلاص مفيش مشكله، انا هبعتله ممرضه تتابع معاه في الأول، وبعدين ممكن حضرتك او مدام هدى تكمل معاه باقي العلاج بس لازم نعمل اشعه على المخ، وشوية فحوصات وبعدين نرجعه على طول
قاسم: متشكر جدا يا دكتور لحضرتك،، وأن شاء الله هجيبه المستشفى لحضرتك
ووصله ومشي، وهدى كلمت رنا وقلتلها، ورنا وحسام جم بسرعه
رنا طلعت لمامتها وحسام وقاسم طلعوا الجنينه،،
حسام: ايه اللي حصل ياقاسم
قاسم بص لحسام، واتنهد وحكاله كل حاجه
حسام استغرب من تفكير قاسم، وازاي قدر يدمرهم كلهم بين يوم وليله،
قاسم: ايه ياحسام، بتبصلي كده
حسام: مش عارف ياقاسم، بس حاسس اني شايف حد تاني غير قاسم العزيزي
قاسم ضحك وبص بعيد وسكت
حسام : ايه ياقاسم، انت مش حاسس انك اتغيرت
قاسم : طبعا حاسس، بس اكيد للأحسن، قدرت اعرّف كل واحد قيمته،،. قدرت اوصّل لكل واحد رساله انه ميلعبش مع قاسم العزيزي، ولا يفكر يعمل حاجه ضد رغبته، انا استحملت كتير يا حسام. وطاقتي خلصت، وللأسف اتقلبت للضد
انا فضلت اشيل جوايا كتيييير قوي لحد مخلاص، جه الوقت اللي انفجرت فيه، والانفجار ده هيدمر كل اللي حواليا
حسام بيسمعه وعايز يقوله انه عرف مكان عشق، لكن خاف من رد فعله، خاف انه يثور ويفكر ينتقم منه هو كمان لانه حرمه من حبيبته، فضّل انه يسكت ويشوف القدر مخبي ايه وقال لنفسه،، للأسف كل مره احب اقولك الحقيقه يا قاسم الظروف متساعدنيش. لسه القدر مقالش كلمته يابن العزيزي،،،
--------------- بقلم شيمو الخطيب
عدي يومين
والنهارده كتب كتاب فاديه وامجد
وفعلا كتبو الكتاب وكتبو كتاب سحر وطارق كمان، والكل كان فرحان جدا
محمد قام وقدم لعشق علبه، وطلب اديها قدام كل الموجودين
محمد قرب من عشق: تسمحيلي وبمناسبه التجمع ده، اني اطلب ايدك رسمي قدام كل الموجودين، واقولهم اني بحبك ياعشق
عشق اتصدمت وبصت لمامتها وفاديه شاورت بدماغها انها توافق وقربت منها وبصتلها بصت ترجى
عشق تايهه ومخنوقه ومش عارفه تعمل ايه، لكن استسلمت للموقف ووافقت ، وسحر زغرطت ومحمد لبسها الخاتم والدبله، وحسام داخل عليهم
حسام اتصدم اول لما شاف ايد عشق في ايد محمد وحس بغيرة اخ علي اخته وغيرة لانه عارف انها لقاسم وبس، واتخانق من نفسه انه سكت من الاول
امجد قرب من حسام وكلمه لكن حسام عنيه متعلقه بعشق ومحمد
عشق شافت حسام ونزلت وشها في الأرض ودموعها نزلت غصب عنها لكن مسحتهم بسرعه، وحبت تبان قويه وقربت من حسام
عشق: ايه، مش هتقول لاختك مبروك
حسام بخنقه : والله،، كويس انك عارفه اني اخوكي والمفروض ابقى عارف اول واحد
فاديه زعلت على رد حسام لكن عذرته : والله ده لسه الموضوع حاصل حالا ومحدش فينا كان مخطط لكده،، اوعي تزعل يا حسام انت عارف معزتك عندي
حسام بخنقه : لا يا أمي أنا مقدرش ازعل منك ابدا،، انا كنت جاي ابارك لامجد بيه وليكي، واهو الحمد لله جيت في الوقت المناسب عشان احضر خطوبة اختي، وبص لعشق وسابهم وراح سلم على محمد وباركله وسلم على طارق وسحر، ووالدة طارق، ورجع لامجد حضنه وسلم على فاديه
وبص لعشق وقال: مبروك ياعشق، ربنا يسعدك يارب
عشق عنيها اتعلقت بيه، ودموعها بتهدد بالنزول لكن حاولت تبقى أقوى،
حسام حس بحزن عشق لكن قال : انا هستأذن انا عشان متأخرش على رنا،،
فاديه : انت مش كنت قولت انك هتسافر،.
حسام : لا مهو مقدرتش اسافر
امجد : ليه ياحسام،، خير
حسام: للأسف حازم بيه تعب جدا، ومنفعش اني اخد رنا ونروح نتفسح ونسيبه في الظروف دي
امجد: لا حول ولا قوة الا بالله ليه ايه اللي حصل لحازم بيه
حسام بص لعشق واتكلم : عنده جلطه للأسف منعته من الحركه والكلام
عشق شهقت، وزعلت عليه جدا،
امجد : الف سلامه عليه، انا لازم ابقى اطمن عليه، ده واجب طبعا
حسام: تنور يا أمجد بيه طبعا، استأذن انا، والف مبروك للجميع
عشق مسكت دراعه وسابته بسرعه، وحسام وقف ولف وشه لعشق، وهي بصتله وكان نفسها تسأل قاسم عامل ايه، لكن مقدرتش، وحسام حس بيها، وبص على محمد لقاه متابعهم
حسام : ابقى طمنيني عليكي ياعشق،
عشق بصوت مبحوح : وانت كمان ياحسام،، وياريت متزعلش مني،
حسام اتنهد : حصل خير، اتمنى ان ربنا يسعدك، ويوفقك في حياتك
عشق عنيها اتعلقت بيه وقالت : هو،، هو ،،
حسام: اه،، كويس ياعشق،، انا كويس.
عشق فهمت حسام، وبصوت على محمد، وحسام سابهم ومشي،
محمد متأكد ان عشق مش فرحانه، لكن صبّر نفسه، أنه هيقدر ان شاء الله انه يشدها ليه،
--------------- بقلم شيمو الخطيب
بعد مرور شهر
ونقول نبذه مختصره
عشق حاولت تتعايش مع الوضع الحالي، وقررت انها تضحي بسعادتها في مقابل اسعاد الآخرين، (فاديه ومحمد) وبدأت الدراسه، وانتظمت عشق في الكليه
قاسم، عمل الإشاعات لحازم، وجاب ممرضه تابعته اسبوعين ومشيت بعد معرفتهم العلاج، وازاي يقدرو يتابعوه
وقاسم دايما بيسأل على حازم بدون ميدخل اوضته ولا يشوفه، وبيحاول يشوف احتياجاته ويطمن عليه من بعيد، هو صعبان عليه، لكن مش قادر يحس ناحيته بالرضا،،، ده غير انه متابع نادر في التليفون وبيسأله على عشق، ونادر قاله انه موصي ناس عليها لكن هو لسه راجع من مهمه كبيره امبارح والحمد لله ربنا قدره ونجح فيها كالعاده
هدي حزينه جدا على اللي بيحصلهم وحاسه انه ذنب عشق، وكما تدين تدان، لأن من بعدها وحياتهم اتدمرت بالكامل،
فريده وجيجي، متغاظين من قاسم وتصرفاته لانه بيعتبر جيجي مش موجوده من الأساس، وده مضايقهم جدا، غير أن جيجي فكرت في كلام قاسم، (وده اللي كان قاسم عايزه طبعا) ،، وبدأت ثقتها تهتز في نفسها، وبدأت متسمعش كلام فريده، وقلتلها انتو بعتوني، ورمتوني عشان مصلحتك وبس، والكلام طبعا صدم فريده و حست
أن بنتها اتغيرت
شركة العزيزي، كل يوم في ازدهار، اما شركة القناوي بدأت في الانهيار، وده بسبب انه قاسم هو اللي كان ممشى الشركتين والكل كان بيحب يتعامل معاه هو، وطبعا محسن حالته النفسيه وحشه جدا، ومبقاش عايز يبص في وش قاسم ولا حازم، وبعد عن الكل
فريده مصدومه من كلام بنتها، وحاسه انهاخلاص مبقتش قادره تستحمل حد، حتى هدى رغم صداقتهم الا ان هدي اتغيرت، وبقت اهتمامتها مختلفه وكل حياتها بقت في خدمة جوزها، وولادها وبس مبقاش فيه نوادي ولا حفلات ولا مصايف ولا فسح ولا كوافيرات ولا موضه، ولا اي حاجه خالص، هدى التزمت في الصلاه جدا، وحاسه انها بقت احسن، وفي كل صلاه بتدعي لعشق وقاسم ان ربنا يجمعهم (سبحان مغير الاحوال)
رنا عايشه اجمل قصة حب مع حسام، ودايما حسام بيدلعها لكن بيعمل كده وجيجي مش موجوده عشان ميجرحش شعورها، لكن هي حاسه بكل حاجه، ومتغاظه جدا،، ومتبعاهم من بعيد
؛ - - - - - - - - - - بقلم شيمو الخطيب
في الكليه عند رنا وجيجي
جيجي قاعده مع زميل ليهم في الجامعه
جيجي: واد ياعلاء، هو انت لسه بتحب رنا وعايزها
علاء ببرود: وليه بتسألي، هيفيد بايه يعني ياجيجي مهي خلاص اتجوزت
جيجي بخبث: طب واللي يطلقها من جوزها ويرجعهالك راكعه
علاء بأمل : ده انا ابقى خدام ليه العمر كله،، بس انتي ناويه على ايه
جيجي بصت بخث لرنا وهي واقفه مع صاحبتها وابتسمت وسكتت
الحلقه ٢٧
من (غمرتني عشق)
💕اللهم كما سيّرت الجبال سيّر لي رزقي
ونصيبي وأكرمني بكرمك وأعطني ما أتمنى💕
بسم الله نبدأ
قاسم رجع من الشركه تعبان وهلكان لقى هدى قاعده في الليفينج
قاسم: السلام عليكم،،، ازيك ياماما
هدي: حبيبي، حمدلله على السلامه،، انا بخير يا حبيبي، طول ما انت بخير
قاسم قعد جنبها بتعب وقال: اااااه،،، يبقى انتي مش بخير يا أمي عشان انا فعلا مش بخير
هدي قربت منه بخوف وحطت اديها على راسه: ليه يا حبيبي، مالك،، طمني ياقاسم
قاسم بصلها بحزن: لا ياماما متقلقيش، بس الشغل كتير عليا، وتاعبني جدا
هدي بزعل: انت اللي كنت عايز كده من الاول يا قاسم،، وانت اللي بعدت ابوك،، وانت الس... و مكملتش وبصت بعيد
قاسم بص قدامه بزعل: كملي ياماما سكتي ليه،، قصدك تقولي أن انا السبب في اللي حصله مش كده
هدي بدموع: لا يا قاسم بس،...
قاسم قاطعها : لا انتي قصدك كده،، على العموم ده كان مكتوب ليه، سواء انا السبب او لا، ده قدر يا أمي، وقام وقف،،، اهم حاجه هو، صحته عامله ايه دلوقتي
هدي بزعل: على طول في اوضته ومكتئب، وفين وفين لما بيرضى ينزل
قاسم: حاولي معاه يا ماما، الحاله النفسيه شيئ اساسي جدا في العلاج،
هدي قربت منه بحب: قاسم ياحبيبي، متحاول تقرب منه، حاول تتكلم معاه وتصفي قلبك من ناحيته، ده مهما كان والدك، صدقني ياقاسم، هتتحاسب من ربنا على اللي بتعمله ده،، ارضى يابني عشان ربنا يرضى عليك
قاسم سرح شويه : ان شاء الله ياماما هحاول،. وبص حواليه،، هي رنا مجاتش ولا ايه، دي كلمتني وقالت انها هتطلع من الكليه على هنا، وحسام كلمني وأكد كلامها فعلا وقال هيجو يتغدو معانا
هدي: لا يا حبيبي لسه مجتش،، بس زمانها على وصول متقلقش،، بس صحيح ياقاسم، انت مش هتقعد في اوضتك بقه وترحم البنت اللي انت ذاللها دي
قاسم بغضب: ماما، يا ريت بلاش كلام في الموضوع ده، انا لو سامحت الدنيا كلها، عمري مهسامح جيجي، انا عارفها كويس، تفكيرها كله شر، وعمرها محبت الخير لحد، وانا بصراحه ميشرفنيش انها تبقي مراتي
هدي: خلاص يابني طلقها، بس حرام عليك المعامله دي، بجد بتصعب عليا
قاسم:اكيد هطلقها بس في الوقت اللي انا عايزه،، انا هدخل اغير هدومي تكونو حضرتو الغدا، لاني واقع من الجوع،،
هدي: من عنيا يا حبيبي، ابقى كلم حسام
شوفه فين، عشان منتغداش من غيره
قاسم وهو ماشي: حاضر يا أمي،
--------------- بقلم شيمو الخطيب
عند المقدم نادر المنياوي
نادر قاعد في مكتبه، ومستني على يتكلم معاه شويه
على دخل : السلام عليكم ياحضرة المقدم (وسلم عليه)، حمدلله على السلامه يا فندم، والله ليك وحشه
نادر بضحك: الله يسلمك ياعلي، بس وحشة ايه ياراجل، ده انا متأخرتش يعني هههه
علي: يا باشا انت لو غبت عني يوم بحس اني تايه، انت السند بتاعي يا باشا، ودايما رافع راسنا
نادر: ههههه شكلك حبتني يا علي،،، على رأي مؤمن،، يا راجل ده مراتي مبتقوليش كده، بس الحمد لله، بسمعه من حد تاني بدل الفراغ العاطفي اللي عايشين فيه، هههههه
على ضحك : هههههه ياباشا محدش يقرب منك انت وبشمهندس مؤمن الا ولازم يحبكو، بجد كفايه جدعنتكوا، وحبكوا للناس والتواضع اللي انتو فيه، شرف ليا اني اكون من ضمن رجالتك يا نادر باشا
نادر: وانت شرف لأي حد تشتغل معاه يابطل،، المهم، وصلت لحاجه ولا لسه،
على : عيب يا باشا ده انا تلميذك
نادر بفرحه : طب الحمد لله، ها طمني عملت ايه
علي: بص يا باشا، والله هي جت صدفه، انا كنت بقدم ورق اختي الصغيره في كلية طب، وصادفني اسم بنت هناك وكان اسمها عشق، ولان مش كتير بنات اسمهم عشق، آثار فضولي بصراحه، وقريته كله، ولقيت فعلا ان اسمها عشق احمد الالفي زي ما حضرتك قولت
نادر بحماس: حلو قوي، عرفت حكايتها ولا لا
على :طبعا يا باشا عرفت عشق دي كانت بنت بسيطه وبتشتغل باليوميه في الأراضي، بس كانت متفوقه في دراستها وده طبعا قبل ما تسيبها وتشتغل،، راحت اشتغلت في فيلا العزيزي، وبعدين خرجت في ظروف غامضه، وعملت حادثه، دخلت بعدها مستشفى الأمل واللي صاحبها امجد بيه طبعا،، وهو اللي وفرلها مكان بجانب المستشفى وحاليا بيصرف على تعليمها، واللي عرفته كمان، أنه اتجوز والدتها
نادر: حلو قوي ياعلي برافو عليك، بجد انا بحييك
علي: تسلم يانادر باشا، بس في حاجه تانيه
نادر بقلق : حاجة ايه تاني ياعلي،
على : عشق اتخطبت لدكتور محمد وده دكتور في مستشفي الأمل
نادر بصدمه :اييييه......
--------------- بقلم شيمو الخطيب
في المستشفي
عشق بتمر على المرضى
محمد شافها ومتابع تحركتها بحب وقرب منها: ايه، ياعشق، انتي رجعتي امتى من الكليه
عشق بتعب: لسه راجعه حالا والله يامحمد، حتى معدتش على ماما ولا قولتلها
محمد بحب : طب ليه ياعشق، كنتي حتى ريحتي شويه وبعدين طلعتي،
عشق بضحك: ما انت عارف بقه، المرضى بيطلبوني بالاسم، يابني انتو من غيري متعرفوش تمشوا
محمد ضحك قوي:ههههه، لا في دي عندك حق، وقرب منها،،، احنا فعلا من غيرك منعرفش نعيش ياعشق
عشق بعدت شويه بكسوف: احم،، احم،، اه طيب يا محمد، احم، انا هنزل انا بقه، اطمن ماما،، عن اذنك،،،، ونزلت جري من قدامه
محمد وقف يبصلها كتير كأنها وحشاه بقالها فتره، وابتسم وكمل شغله
نزلت عشق ودخلت البيت عند والدتها
عشق: حطت مفاتيحها على السفره وقلعت البالطو وبتنادي: يا فاديه، يا فوفه
فاديه طلعت من اوضتها: حمدلله على السلامه يا قلب فوفه
عشق قربت منها وحضنتها: الله يسلمك ياست الحبايب،، عامله ايه من غيري
فاديه: عامله محشي ورق عنب، ههههه
عشق: واااااو، قلبي ياناس،، لا ده انا كده اخد دش على السريع واسخن الاكل، وناكل على طول، بس صحيح، هو بابا امجد فين
امجد بيفتح الباب وداخل: بابا امجد موجود دايما يا حبيبتي
عشق بصتله وهو اخدها في حضنه
عشق: حمدلله على السلامه يا بابا،
امجد: الله يسلمك يا حبيبتي، عامله ايه في الجامعه
فاديه قاطعتهم : لا جامعة ايه دلوقتي، انتو تدخلوا تغيروا هدومكو وابقو اتكلموا على السفره، انا بصراحه جعانه جدا
امجد بصلها بحب: ومين سمعك يافوفه، وغمزلها بعنيه، وعشق ضحكت جامد، وفاديه اتكسفت ودخلت المطبخ
عشق بضحك: اه منك انت يا أمجد ياشقي
امجد: طول عمري يا عشق يابنتي بس محدش كان واخد باله،
فاديه من جوه : سامعاك يا أمجد ياشقي،
امجد وعشق ضحكوا، وعشق قالت : البس يامعلم، اهي سمعتك أهي
امجد ضحك قوي وحضن عشق ، ووصلها لاوضتها، ودخل اوضته والدنيا مش سيعاه من السعاده باسرته الصغيره الجميله
--------------- بقلم شيمو الخطيب
في فيلا العزيزي
قاسم اتصل على حسام وقاله انه جاي في الطريق، ورنا وجيجي كانو وصلو
جيجي : هاي يا طنط، عامله ايه
هدي؛ الحمد لله يا حبيبتي،، هي رنا مجتش معاكي ولا ايه
جيجي: لا ياطنط جت، بس واقفه بره بتكلم حسام،، ولفت وشها بضيق
هدي: ماشي ياحبيبتي، اطلعي غيري هدومك،، بس خلي بالك،، قاسم فوق
جيجي بفرح : بجد يا طنط،،. طب انا هطلع بسرعه،، وطلعت تجري
هدي ابتسمت : ربنا يهديك ياقاسم، وتحس بالبت دي شويه
رنا دخلت، وسلمت على هدي: السلام عليكم يا مامي،
هدي؛ وعليكم السلام ياقلبي، كويس انك قولتي السلام، ومقولتيش هاي، زي جيجي
رنا : ههههه، ده تعود يا أمي ،. ها مش هنتغدي ولا ايه
هدي: مستنين جوزك ياستي،.
رنا بفرحه : الله، حلو قوي جوزك دي،. بصراحه بحب الكلمه دي قوي
هدي ضحكت : ههههه، لا والله، طيب هقولها لك على طول بقه
رنا بحب: ايوه ياماما قوليها على طول، انا بجد حسام وحشني قوي،
هدي ضحكت: يابت، يابت اتقلي شويه،،
رنا : اتقل على ايه يا مامي، ده سمسم ده قلبي من جوه، وهو عارف كده
حسام داخل ومسك رنا من قفاها : بت انتي،،، مين سمسم ده،،
رنا ضحكت وباسته من خده : حمدلله على السلامه يا حبيبي
حسام داب فيها اكتر : الله يسلمك ياقلب سمسم، بس بلاش قدام الناس كده، برستيجي هيطير
هدي ضحكت: هههههه لا يا حبيبي متقلقش،، انا مش غريبه،. ههههه، ربنا يسعدكوا يا رب يا حبايبي،، وقعدوا منتظرين قاسم و جيجي
جيجي طلعت وفتحت الباب، ولقت قاسم نايم على كنبه صغيره في البلكونه
جيجي قربت منه : ازيك يا قاسم، وحشتني قوي
قاسم ببرود: الحمد لله،، حسام جه ولا لسه
جيجي بخنقه من انه مهتمش لكلامها:
انا طلعت وسيبت رنا بتكلمه
قاسم قام : ماشي تمام، انا هنزل عشان استقبله، وانتي غيري هدومك وتعالي
جيجي:طيب متستناني وننزل مع بعض
قاسم بصلها بقرف وسابها ونزل، وهي هتموت من الغيظ مكانها
قاسم خارج من الاوضه وقابل حسام ورنا طالعين
قاسم: على فين كده ده الغدا تحت مش هنا،، وسلم عليهم
حسام: لا ياعم طالعين نشوف عمي حازم ونطمن عليه وننزل تاني،
رنا بصت لقاسم بترجي: متيجي معانا يا ابيه، صدقني هيفرح جدا
قاسم بص لحسام وحسام شجعه انه يدخل وفعلا قاسم راح معاهم
رنا دخلت وجريت عليه وكان قاعد على كرسي متحرك وباصص من الشباك
رنا: بابي حبيبي، عامل ايه دلوقتي
حازم بدموع هز راسه فيما معناه الحمد لله، وبص على حسام وقاسم وعنيه اتعلقت بقاسم اللي مش فاهم نظرته نظرة لوم ولا ندم
حسام قرب منه وسلم عليه، وقاسم واقف ساكت مش عارف يتصرف ازاي
وفضل فتره حازم مستني قاسم يقرب منه لكن قاسم واقف وبس
قاسم اخيرا اتكلم : احم، تحب تنزل تحت ولا انت مرتاح كده
حازم هز راسه بلا
رنا انتهزت الفرصه وقالت: لا يا بابي تعالي انزل معانا، صدقني هتغير جو بدل حبستك دي،، وبصت لقاسم
قاسم قرب منه وشاله، وقال لحسام : هات الكرسي ياحسام وتعالي ورايا، حسام ورنا فرحوا جدا من تصرف قاسم وحسام شال الكرسي ونزل وراه
قاسم شايل حازم ومبيبصلوش، وحازم عنيه متعلقه بيه، وفي الاخر رمي راسه على كتفه وكان نفسه يقدر يضمه لأنه وحشه من زمان، وقاسم حس بيه واتنهد بوجع
هدي شافت قاسم منزل حازم فرحت جدا ودعت ربنا يهديه، ويحنن قلبه
حسام حط الكرسي، وقاسم نزل حازم وقعده، وقال: بص بقه، انت كل يوم لما ارجع من الشركه هنزلك تقعد هنا، وقبل ما انام هطلعك تاني، ومالوش لازمه ننادي لا على ناجي ولا علي صبحي، اللي تحتاجه قولي عليه وانا انفذه
هدي جريت عليه وحضنته : ربنا ما يحرمنا منك ياقاسم، وهو مين اللي هيخدمه غير ابنه حبيبه وسنده
حازم عنيه دمعت ونزل وشه في الأرض
قاسم بجمود : طب يلا بقه نتغدى،
جيجي متابعه كل ده من فوق، وعوجت شفايفها بضيق، ونزلت مخنوقه، ومكلمتش حد خالص
هدي ملاحظه ضيقت جيجي: مالك يا جيجي، مضايقه من حاجه
جيجي برخامه: لا، وانا هضايق من ايه، ما حياتي زي الفل اهي
كلهم بصو لقاسم اللي ابتسم وكمل اكل
جيجي بصتله بغيظ وسابت السفره بنرفزه وقامت
قعدت فتحت التليفزيون وبتتفرج بخنقه
كله خلص اكل وطبعا قاسم معبرهاش، وخرج قعد في الجنينه مع حسام، ورنا
قامت تغسل اديها، وهدي بتساعد زينب في عمايل القهوه،
حازم قاعد وعايز يشرب، وبيحاول ينادي على جيجي تسمعه
جيجي بصتله ونفخت بضيق، بقولك ايه، انت هتقرفني وتقعد تعمل زي الخُرس كده، انا بصراحه مبقتش طايقه عيشتي هنا، دي عيشه تقرف، وسابته وطلعت
حازم نزل وشه في الأرض ولعن نفسه كتير، وقال لنفسه بقه دي اللي كنت بحارب ابني عشان يتجوزها، واتنهد بوجع وسكت، وجت رنا وعرفت انه عايز ميه وشربته وباست اديه وخرجت لحسام وقاسم بره،
قاسم قاعد وبيحسس على ريكس
وريكس بيلف حواليهم، وقاسم سرحان في حب ريكس لعشق، وافتكر لما سمعها وهي بتكلم ريكس وتقوله ان قاسم طيب وحنين لكن يبان قاسي، وابتسم على برائتها واتمني انه يلاقيها لأنها فعلا وحشته،
قاسم وحسام ورنا قضوا السهره مع بعض وطبعا جيجي متبعاهم بغيظ كبير جدا، وفي الاخر اتكلمت في التليفون
جيجي بخنقه : ايوه يا علاء، انت لازم تنفذ انهارده
----------------- بقلم شيمو الخطيب
عند امجد
عشق قاعده وبتتفرج علي التليفزيون ومعاها ورقه كاتبه فيها مواعيد العلاج للمرضى،
امجد قرب منها وقعد جنبها وحط ايده على كتفها: ها يا عشق، مش ناويه تقتنعي وتيجي انتي وفاديه تعيشي معايا في الفيلا بدل القعده هنا
عشق : يابا انا قولتلك انتو تروحوا وانا هبقي ازوركوا خميس وجمعه، لاني بصراحه حابه القعده هنا، حاسه ان الاستراحه دي وش السعد عليا، واتعلقت بيها جدا، وبعدين يا أمجد بيه احنا مش بتوع فيلل، احنا الحمد لله راضيين بأقل حاجه، وبنحمد ربنا كمان،،
امجد: ياحبيبتي انا عارف، بس كنت اتمنى نقعد كلنا هناك، اهو تغيير برده،،، حتي والدتك رافضه انها تسيب هنا،، ، و بصراحه انا نويت اشتريلك عربيه عشان تقدري تروحي بيها جامعتك بدل البهدله في المواصلات
عشق بزعل وعدلت نفسها وقعدت قدامه: بص يابابا، انا طبعا فرحانه جدا بكلامك ده، بس بتمنى انك متجبش عربيه ولا حاجه،، يابابا، انا بجد حابه عيشة البساطه اللي انا فيها، اتعودت عليها وبقت جزء مني، بحب انزل وسط الناس واعرف مشاكلهم واحس بيهم، واشوف معاناتهم ،، لكن عربيه وابقى من ولاد الذوات، لا يا عم يفتح الله، انا واحده فقريه، واحب عيشة الفقر
امجد ابتسم : يا عم،،، انتي بتكلمي ابوكي يابنت، عشق حضنته،، خلاص ياعم احنا اسفين،، هههههه
امجد ضحك :ههههه بذمتك فيه دكتوره محترمه تقول يا عم
عشق بمشاكسه : اه فيه طبعا. اناااا
ضحكوا الاتنين وقعدوا مع بعض وانضمت ليهم فاديه، وفجأه تليفون عشق رن وكان محمد
عشق دخلت اوضتها وردت : الو، ايوه يا محمد
محمد: احلى الو في الكون كله،، عامله ايه يا عشقي
عشق كشرت، وقلبها دق بسرعه لما سمعته قال عشقي،، : انا كويسه يامحمد، بس بلاش عشقي دي، ده انا ملحقتش ابقى عشقك،، ههه ولا ايه
محمد اتخنق من ردها لكن قال: لا يا عشق لحقتي ومن زمان كمان، انتي بجد وحشتيني
عشق مش عارفه ليه بتتخنق من كل كلمه حلوه بيقولها، لكن لازم تواجه احساسها ده،
عشق: وانت كمان يامحمد،،
محمد ابتسم : حلوه المجامله دي ياعشق، لكن طالما جاملتيني، يبقى عندك استعداد تتغيري
عشق اتفاجئت من رده: ايه،،، مجامله،،، ليه بتقول كده يا محمد
محمد: لأنها فعلا مجامله ياعشق،، لكن انا موافق على اي حاجه منك ، انتي بجد متعرفيش انتي ايه بالنسبالي
عشق اتنهدت بوجع، وسكتت
محمد حس بوجعها وقال: ادي لنفسك فرصه تحبيني ياعشق، انا عارف ان مشاعرك من ناحيتي عاديه او اقل كمان،، بس عايزك تدي لنفسك فرصه، وتديني انا كمان فرصه اقربك مني، وصدقيني مش هتندمي
عشق: انا واثقه ان مفيش حد هيقرب منك يا محمد ويندم ابدا، انت بجد تستاهل كل خير
محمد بفرحه: وانا مش عايز غير ثقتك دي، وصدقيني انا كفيل اني اخليكي متشوفيش غيري
عشق اتنهدت : وقالت لنفسها،،، مستحيل يا محمد للأسف.، لاني مش شايفه غيره هو وبس،.
واتكلموا كتير، وقفلوا عشان يناموا
__-_________ بقلم شيمو الخطيب
عند قاسم
قاسم قاعد هو وحسام ورنا
قاسم : بقولكوا ايه، انا تعبان جدا وهدخل انام، عشان اقدر اروح الشركه الصبح، وانتو بقه لو جدعان بجد، اطلعوا أوضة رنا وباتو فيها، بدل متروحوا دلوقتي
رنا بفرحه : ايوه فكره حلوه قوي يا ابيه، وبصت لحسام بدلع،، ها ايه رايك ياسمسم
حسام تنح، ورنا حطت اديها على بقها واتكسفت وقاسم ضحك جامد وقال،،،
سمسم هههههههه، سمسم، هههه، يانهار ابيض، اخرتها يا حضرة الظابط بقه اسمك سمسم،، على العموم هو اسم حلو، ولايق عليك
حسام قام بضيق : بقولك ايه يا قاسم، دي اخر مره تفكر تقولي كده، انا بقولك اهو
قاسم ضحك جامد : هههههه متركز يا سمسم،، قصدي يا حضرة الظابط، مراتك اللي قالت مش انا،، لا ده انت الجواز غيرك خالص
رنا قاعده نفسها تضحك لكن خايفه من رد فعل حسام، وحسام واقف شايط منها وقال : عاجبك كده، اهو مش هيسبني، وكل شويه هيقولي تعالي ياسمسم روح ياسمسم، وكله بسببك انتي
قاسم ضحك : ههههه، جرا ايه ياسمسم، والله دي مش اخلاق حد اسمه سمسم خالص، عيب كده، ده حتى انت كيوت خالص هههههه ومسكه من خده
رنا مقدرتش تمسك نفسها وضحكت غصب عنها، وحضنت حسام، وحسام بصلهم، وبص لرنا وضحك هو كمان وضمها وقال : تعالي يابنت الايه جايبالنا الكلام من اللي يسوي واللي مايسواش
قاسم وهو ماشي : سمعتك ياسمسم،، ويلا عشان نلحق شغلنا، ولا انت ناوي تدلع،، ههههه
حسام وطي وجاب حجر صغير ورماه على قاسم وقاسم تفاداه، ودخلوا كلهم بيضحكوا وبيهزروا، وجيجي طبعا متبعاهم و هتموت من الغيظ
قاسم لقى هدى وحازم قاعدين،،
قاسم : ايه يا حازم بيه، مش ناوي تطلع اصل انا بصراحه محتاج انام
حازم زعل انه لسه مقالوش بابا،
هدي: لا ياحبيبي احنا يادوب نطلع لان انا تعبت واكيد حازم محتاج يريح شويه
قاسم قرب من حازم وشاله، وحسام طلع بالكرسي،
حازم حط ايده على دراع قاسم، وحاول يضغط عليه، وقاسم حس بيه، وبصله، ولقى عنيه مليانه دموع، قاسم عينه اتعلقت بيه، وعايز يفهم نظرته ليه،، لحد موصله على السرير، ونزله، وغطاه وخرج،
قاسم خرج بسرعه وبيحاول يهرب من مشاعره، ومش عايز يضعف ولا يحن ليه، لأنه عذبه وحرمه من سعادته. ونزل بسرعه لاوضة عشق، لأنها هي اللي بتقويه وبتفكره بماضيه كله، وقعد على السرير وسند راسه لورا، وسرح في كل حاجه حصلت، ومواقف حازم معاه، وكرهه لعشق، وتحديه ليه انه مش هيجوزه عشق، وافتكر لما اشترط عليه يتجوز جيجي، ولعن نفسه انه رجع وحن ليه تاني، وفاق من أفكاره على تليفون
قاسم بص في الفون واتفاجئ ورد بسرعه
قاسم : الو، ايوه يا نادر بيه، وصلت لحاجه،،،،،،،،،،
الحلقة الثامنة والعشرون من هنا