رواية غمرتني عشق الحلقة الثانية عشر والثالثة عشر بقلم شيمو الخطيب

الحلقة الثانية عشر والثالثة عشر

بقلم شيمو الخطيب

الحلقه ١٢

من (غمرتني عشق)

🌹ربِّ، اجعلْني لك شكَّارًا، لك ذكَّارًا، لك رهَّابًا، لكَ مطواعًا، لك مخبِتًا، إليك أوَّاهًا منيبًا.🌹

             بسم الله نبدأ 

عشق اتفاجئت من طلب قاسم ليها

عشق باستغراب: ايه،!!! اجي الرحله،!!! طب ازاي؟،،، ، وليه؟ ، وهقول ايه لأمي؟ ، وهقول ايه للست هدى؟ ،ومشيت بعيد عنه.،، لا يا قاسم بيه، انا مش بتاعة رحلات، انا عمري ماطلعت رحله في حياتي، انا اول مره ابعد عن امي، يوم ما جيت اشتغلت هنا، تقولي اطلع رحله 

قاسم بخبث : اممممم، ماشي ياعشق، خلاص انتي تنزلي وتبلغي هدى هانم اني رافض السفر، لأني مش هسافر من غيرك، قولتي ايه؟ 

عشق باستغراب: طب ليه،؟ وليه انا، واجي معاكو بمناسبة ايه، بصراحه ياقاسم بيه طلبك ده مش منطقي ابدا

قاسم: هو ده شرطي الوحيد ومن غير اسئله كتير، فكري مع نفسك، وبلغيني قرارك 

عشق: ياقاسم بيه بلاش،، انا....... (في اللحظه دي زهره دخلت تنادي عشق) 

زهره: ياعشق، ست هدى بتقولك انزلي عشان تحضري لوازم الرحله، 

عشق: حاضر يا زهره، انا نازله اهو (وبصت لقاسم)، انا هنزل ياقاسم بيه، واتمنى انك تغير شرطك، لاني بصراحه مش مقتنعه بيه 

قاسم ببرود: مش مهم انتي تقتنعي، المهم انا اكون مقتنع، 

عشق بعند: طب بذمتك،انت مقتنع بالطلب ده، انا متأكده. انك متعرفش انت طلبت مني الطلب ده ليه، ومتأكده كمان انك بعد منزل هتقعد تفكر انت ليه قولت كده. لانه بكل المقاييس مينفعش تطلب طلب زي ده مني  ،، عن اذنك ياقاسم بيه 

وسابته ونزلت مع زهره 

قاسم واقف مذهول من كلامها، لأنه فعلا مش عارف هو ليه طلب الطلب ده، وليه هيا، وهو فعلا مش مقتنع بكلامه، لأن مفيش اي مبرر يبرر طلبه، فكر كتير لكن صمم على طلبه، لأنه فعلا حابب وجودها معاه، ليه، ميعرفش

--------------- بقلم شيمو الخطيب 

عند رنا

جيجي كلمت رنا، ورنا ردت عليها 

رنا بتعب: الو، ايوه يا جيجي

جيجي: روني حبيبتي، عامله ايه، عرفتي اننا مسافرين بكره ان شاء الله 

رنا بحزن: اه يا جيجي عرفت، 

جيجي بفرحه: انا فرحت قوى اول ما مامي قالتلي الخبر ده، بس كنت عايزه أسألك هو قاسم جاي معانا، ولا هيرخم زي عادته 

رنا : لا، هيرخم زي عادته،،

جيجي؛ نعم!!! ، لا متقوليش كده، بجد هتخنق منه جدا، اخوكي ده غريب جدا، انا بجد زهقت من التعامل معاه 

رنا بضيق: جيجي بليز، انا بجد تعبانه ومش قادره، حاولي تحلى مشاكلك مع ابيه قاسم من غير تدخل من حد، حاولي تفهميه وتتأقلمي على طبعه، والا بلاش منه أي ارتباط بينكو 

جيجي بخنقه: مالك يا رنا، انتي معايا ولا معاه، طول عمرك بتغلطيه، اشمعني دلوقتي، مالك يا رنا فيكي ايه؟ 

رنا بعياط وخنقه : لان محدش يستاهل انك تذلي نفسك عشانه، هو بيعاملك وحش،، ليه تستحمليه،؟ هو مش عايزك ليه انتي عايزاه؟ ، كل ده عشان ايه، بتحبيه؟ . ملعون ابو الحب اللي يذل صاحبه، مبقاش فيه حب يا جيجي خلاص، افهمي بقه،، وعيطت جامد ، (وطبعا هيا كانت بتتكلم عن نفسها) 

جيجي مصدومه من كلام رنا: انتي تقصدي ايه يا رنا، تقصدي ان قاسم مبيحبنيش، تقصدي اني فعلا ذاله نفسي عشانه، ردي يا رنا هو قالك كده 

رنا بوجع وخنقه: هه، لا يا جيجي انا بتكلم في العموم، لأن الحب صعب تلاقيه، لكن ابيه قاسم متكلمش ولا جاب سيرتك 

جيجي: طب انتي ليه زعلانه كده، هو حسام دايقك

رنا: حسام،، انا مفيش بيني وبين حسام حاجه عشان يدايقني او لا، حسام كان فتره وانتهت، ومبقاش ليها وجود في حياتي خلاص 

جيحي بتأكيد: يبقى هو السبب في تعبك ده، صارحيني يارنا ، 

رنا: اتنهدت: جيجي انا تعبانه ومحتاجه انام عشان اقدر اسافر بكره، وصدقيني لو حصل حاجه اكيد هقولك 

جيجي؛ ماشي يارنا، بس بليز حاولي تقنعي قاسم يجي، وانا هكلمه واحاول أقنعه 

رنا: براحتك يا جيجي، يلا سلام 

جيجي؛ سلام يا روني،،، 

وقفلوا مع بعض 

----------------- بقلم شيمو الخطيب 

عشق نزلت 

هدي: ها ياعشق، قاسم مقالكيش هيجي ولا لا 

عشق: لا ياست هانم مقالش، لكن ان شاء الله خير، اطمني 

هدي: اطمن ازاي بس، والبيت كله هيولع بسبب قاسم، لكن حازم عنده حق، قاسم عمره مسمع كلام حد غير نفسه وبس، وده غلط، لازم يبقى فيه حوار، وبعدين ده ابوه، ازاي يتعامل معاه كأنه ند ليه 

عشق: ياست هانم ده طبع، صعب انه يغيره بالسهوله دي، لكن ان شاء الله خير، وربنا يفرح قلوبكوا يارب 

هدي: تسلمي ياعشق، طيب انتي هتعملي ايه لما نسافر، هتفضلي هنا  ولا هتروحي لوالدتك 

عشق: هقعد مع والدتي ان شاء الله، وهبقي اجي هنا من وقت للتاني انا وزهره، واهو نطمن على زينب، وعلى ريكس ، 

هدي: اه انا عرفت ان ريكس اتعود عليكي جدا، والله برافو عليكي ياعشق، انتي بجد بنت ممتازه 

عشق: ربنا يجبر بخاطرك ياست هانم 

قاسم نازل علي السلم، ولابس تريننج اسود، وشكله وسيم جدا 

هدى؛ رايح فين يا تاعب قلبي معاك 

قاسم: خارج اقعد في الجنينه شويه، فيها مشكله ولا حازم بيه هيدايق 

هدي: عيب ياقاسم تتكلم بالطريقه دي، والدك عايز مصلحتك 

قاسم بضيق: مصلحتي انا عارفها كويس، انا مش عيل صغير عشان تمشوني بمزاجكوا 

هدي: يابني حرام عليك، بلاش اسلوبك ده، حازم على آخره منك، وقرر انك تعلن خطوبتك اول منرجع 

قاسم: قصدك اول مترجعوا، مش اول منرجع، وبعدين انا مش هسمح لحد انه يبني حياتي بمزاجه، وياريت تبلغيه بكلامي 

هدى بدموع: لا حول ولا قوة الا بالله، ياقاسم كده مينفعش، طب انت عايز ايه واحنا نعمله، ياقاسم انت؛ شايف اختك ونفسيتها، وده وقت مناسب جدا انها تخرج من حالتها دي، عشان خاطري يابني حاول تعدي الأمور، وبلاش مشاكل 

قاسم بزعيق: أووووف، انتي ليه كل مره تيجي عليا انا، انا تعبت بجد،، ياريت تسيبيني امشي حياتي بمزاجي، مش بمزاجكو انتو، 

هدي: اوعدك ياقاسم ان كل الأمور هتعدي بس لو وافقت تيجي، عشان خاطري ياقاسم، انا بجد تعبت من ضغط الأعصاب ده (وعيطت) 

قاسم قلبه حن و قرب منها: خلاص يا ماما، انا هحاول افكر في الموضوع، لكن في حاجه في دماغي لو اتنفذت اعتبريني معاكو، اما لو متنفذتش، فإنسي اني اجي (وبص ناحية عشق) 

عشق اتلخبطت واتكسفت وسكتت) 

هدى بأمل: حاجه ايه يا قاسم. قولي وانا انفذهالك حالا 

قاسم بمكر: هو صحيح ياماما، زينب وزهره وعشق، هيجو معانا ولا هيقعدوا هنا 

عشق: احم، احم، انا هقعد اكيد ياقاسم بيه، امي مقدرش اسيبها لازم اطمن عليها كل يوم 

قاسم بعدم اهتمام : ها ياهدي مردتيش، هيجو ولا هيقعدوا 

هدى باستغراب: احنا اخدنا زينب مره واحده قبل كده، لكن مجاش في دماغي انهم ييجو، انا عامله حسابي انهم هيقعدوا هنا، ولو حد جه، فهتبقي زينب

قاسم بص لعشق: وليه متكونش عشق يا ماما 

هدى بصدمه وبصت لعشق، : عشق!!! وانت عايز عشق ليه ياقاسم، ومن امتى بتتدخل في مين يجي ومين يقعد

قاسم: انا مبدخلش يا ماما، انا بس عايز عشق لاني اتعودت على فنجان القهوه من اديها، وبصراحه هو ده الحاجه الوحيده اللي هتصبرني على القعده هناك، 

هدي: يعني لو عشق جت انت هتيجي 

قاسم : بالظبط، لو القهوه جت انا هاجي، اظن فهماني

هدي ؛ ماشي ياقاسم، (بصت لعشق)، معلش ياعشق، اعملي حسابك تيجي معانا، وبكره من بدري، روحي لوالدتك زي النهارده كده وبلغيها بسفرك ومتقلقيش احنا مش هنتأخر هناك، وأبقى كلميها من هناك كل دقيقه ياستي

عشق بصت بغيظ لقاسم وقاسم ابتسم وغمز ليها بعنيه 

عشق: نزلت وشها في الارض: تحت امرك ياست هانم، اللي تشوفيه حضرتك 

هدي: الحمد لله انها اتحلت، انا هطلع أبلغ حازم بموافقتك ياقاسم 

وطلعت وسابتهم

عشق بغيظ: كده حضرتك ارتحت، نفذت اللي في دماغك 

قاسم ابتسم وكمل ببرود: انا قولت عايز القهوه، مش عايز عشق، في فرق، حظك بقه انك بتعملي فنجان قهوه يظبط الدماغ

عشق بغيظ مكبت: ماشي ياقاسم بيه،

قاسم ابتسم: طيب يلا ادخلي جهزي حاجتك، عشان لو صحيت بدري هوصلك لوالدتك، ونرجع بسرعه، 

عشق بغيظ: لا شكرا، انا مش هتعب حضرتك، انا هروح لوحدي، 

قاسم ابتسم:انتي حره، انا بس كنت خايف عليكي، 

عشق بغيظ ونرفزه: لا يا قاسم بيه، وفر خوفك للست جيجي مش انا، 

قاسم بصلها باستغراب وكمل بخبث: افهم من كلامك انك غيرانه 

عشق اتلخبطت: ايه، ايه، غيرانه، وهغير ليه، وعلى مين، حاسب على كلامك ياقاسم بيه، ومش عشق الالفي اللي تكلمها كده 

قاسم قرب منها وبهمس: طيب وهي عشق الالفي الناس بتكلمها ازاي، عشان ابقى عارف (وضحك) 

عشق قلبها دق بسرعه، من قربه ليها، وبصتله وعنيها اتعلقت بعنيه لثواني، وبعدين جريت على المطبخ بتنهج

قاسم ابتسم، ومسح وشه باديه، واستغرب اشمعني دي اللي بيحب عنادها وكبريائها واسلوبها الحاد في الكلام،، 

خرج قاسم الجنينه، واتصل على حسام وبلغه انهم مسافرين الصبح، وقفلوا مع بعض بسرعه، لأن حسام كان مخنوق ومش قادر يتكلم 

----------------- بقلم شيمو الخطيب 

عدي اليوم على أبطالنا وكل واحد فيهم بيفكر في نصه التاني، 

قاسم منامش طول الليل بيفكر في عشق وعنادها قصاده وطريقتها معاه، ومش قادر يعرف هي ليه شاغله تفكيره وحياته بالشكل ده 

عشق جواها مشاعر ملخبطه، فرحانه ان قاسم عايزها معاه وخايفه لأنها بتفكر بعقلانيه وطبعا عمر قاسم مايكون بيحبها ولا هيحبها في يوم من الايام، واستسلمت للفكره دي، وقامت اتوضت وبدأت تصلي 

رنا طبعا بتفكر في كلام حسام وجرحه ليها، وازاي قدر يقول كل الكلام ده، وازاي شايفها بالشكل البشع ده، وقررت انها تحاول تنسى، وتعيش حياتها 

حسام عايش على تأنيب الضمير على كلامه وجرحه لرنا، ونفسه يعرف عنها أي حاجه، لكن للأسف مش قادر يوصلها ومش عايز يتصل بيها لانه واثق انها مش هترد عليه، واستسلم للنوم، ونام

تاني يوم عشق راحت لوالدتها قبل ما اي حد يصحى، وبلغتها انها مسافره معاهم، وفاديه وافقت غصب عنها، وده لان مش في اديها حاجه، ده شغلها واكل عيشهم 

--------------- بقلم شيمو الخطيب 

رجعت عشق، وكان الكل بيجهز، وبيستعدوا للسفر عشان يبدأوا اليوم من أوله 

هدي: حمدلله على السلامه يا عشق، كويس انك متأخرتيش 

عشق: انا مقدرش اتأخر عنك ابدا ياست هانم 

هدي: طيب ياستي حاجتك جاهزه ولا لسه 

عشق: طبعا ياست هانم من امبارح 

هدي: تمام قوي، يلا يا زهره انتي وزينب خرجوا الشنط دي وصبحي وناجي هيدخلوها العربيات، واطلعي ياعشق استعجلي رنا 

عشق من عنيا ياست هانم 

وطلعت عشق وخبطت على رنا 

عشق من ورا الباب: ست رنا، هدى هانم بتستعجلك،، جهزتي ولا لسه 

رنا بخنقه: ادخلي ياعشق تعالي 

عشق دخلت واتصدمت من شكل رنا : مالك ياست رنا، بتعيطي ليه كده، بقه ده شكل واحده مسافره تغير جو

رنا عيطت بصوتها كله : مش قادره ياعشق، قلبي وجعني قوي، حاسه اني عايزه اموووت 

عشق حضنتها: بعد الشر عنك ياست رنا، ليه بتقولي كده، محدش يستاهل انك تتمنى الموت بسببه 

رنا بصتلها بدموع: بس هو يستاهل ياعشق، حسام يستاهل 

عشق باسف: انا معاكي ياست رنا انه يستاهل، بس معلش متزعليش مني، هو لو مش مقدر حبك، يبقى بلاش تذلي نفسك ليه، وتوقفي حياتك عليه، انتي جميله ما شاء الله والف واحد يتمناكي، 

رنا بوجع: بس انا متمنتش غيره، ومش عايزه غيره ياعشق، انا اساسا مش شايفه غيره، ازاي هتعامل عادي، حسام ملك كل حياتي وقلبي وعقلي وتفكيري، نفسي ابعد،، لكن مش قادره 

عشق بحيره : طيب هو حسام بيه بيحب واحده تانيه؟ ، بس ازاي!!!! ده لما سألني عليكي كان باين انه قلقان، وده دليل انه بيحبك 

رنا بعياط: الموضوع كبير ياعشق، وانا مش عارفه اتكلم فيه مع حد، للأسف حتى الكلام مش قادره اتكلم 

عشق: انا هسمعك ياست رنا، اتكلمي واوعدك ان سرك في بير، ومفيش مخلوق هيعرف حاجه 

رنا : انا ارتحتلك قوي ياعشق من اول مره شوفتك، يمكن لانك فعلا صافيه وطيبه، وعشان كده انا هحكيلك،  بصي ياستي.... 

زهره قاطعتهم و دخلت : ياست رنا، هدى هانم بتقولك هما جهزوا، ويلا عشان متتاخروش ، وانتي ياعشق، ست هدى عايزاكي

رنا بخنقه : خلاص يازهره ، انزلي انتي دلوقتي وقولي لمامي انا نازله حالا 

زهره: تحت امرك ياست هانم،، ونزلت

رنا: خلاص ياعشق انزلي انتي، وانا لما الاقي فرصه اكيد هحكيلك، 

عشق باست جبهتها: وانا هستناكي،وبتمنى اني اكون سبب في ان قلبك يرتاح و يفرح، عن اذنك ياست رنا 

رنا ابتسمت بحب، وهزت راسها بالموافقه، 

-------------- بقلم شيمو الخطيب 

نزل قاسم والكل خرج عند العربيات 

حازم : هي عشق جايه معانا ياهدي ولا ايه 

هدي: ايوه يا حبيبي ، عشان لو احتاجنا حاجه تبقى موجوده، 

حازم :تمام تمام،طيب هي رنا فين؟ 

رنا من وراه: انا جيت اهو يا حبيبي، صباح الخير، (وباسته في خده) 

حازم ضمها ليه: صباح النور، على اجمل بنوته،(وبصلها بضيق) بس مش عجباني خالص 

رنا بتمثيل: متقلقش يابابي، هبقي كويسه ان شاء الله 

قاسم بضيق : صباح الخير، 

حازم : صباح النور يا قاسم بيه، انا عارف انك مش طايق حد قدامك دلوقتي، 

قاسم بيفتح عربيته ومردش......... 

حازم : طب على الاقل رد على ابوك 

قاسم بصله : المشكله اني كل ما ارد عليك، بتزعل مني، وردي بينرفزك، فقررت اني اسمعك وبس، يمكن ده يريحك 

حازم: تصدق فعلا ردودك بتعصبني، انا بقه عندي حل افضل، اني متكلمش معاك خالص، 

قاسم رفع نضارته الشمس وبص عليه من تحتها، ونزلها و فتح عربيته، من غير ماينطق بكلمه 

حازم بغيظ: شايفه ابنك، شايفه بروده 

هدي: بص بقه، انا مش عايزه نكد علي الصبح، سيبك منه خالص كأنه مش موجود، انا تعبت منكو بجد، 

حازم بضيق : ماشي يا هدى، يلا عشان نمشي 

ركبت هدي ورنا مع حازم 

حازم بص لقاسم: استنى انت عشق، وهاتها معاك وانت جاي، انا هسبق عشان منتأخرش على محسن بيه 

قاسم هز راسه بالموافقه وسكت 

مشي حازم، وفضل قاسم مستني في العربيه، لكن عشق اتأخرت 

قاسم نزل ونده على زينب 

قاسم: يا زينب،،،، يا زينب

زينب جت تجري: تحت امرك ياقاسم بيه 

قاسم بنرفزه: هي عشق فين، كل ده بتعمل ايه 

زينب: معلش ياقاسم بيه، دي بتصلي، 

قاسم باستغراب: بتصلي!!!! بتصلي ايه دلوقتي، 

زينب: ركعتين الضحى يا قاسم بيه، اهي جت اهي،،،، حرما ياعشق 

عشق: جمعا يا زينب ان شاء الله،، (بصت لقاسم) خير ياقاسم بيه، انا جاهزه، 

قاسم بغيظ: اتفضلي، لاننا اتأخرنا 

طلعت عشق معاه،

عشق: هو انا هركب مع حضرتك لوحدنا 

قاسم بنفاذ صبر: تحبي تيجي ورايا جرى، ولا تيجي مواصلات 

عشق بعند: فعلا ممكن حضرتك تقولي اركب ايه، وانا هركب موصلات افضل. 

قاسم بنرفزه : بقولك ايه، انا مش فايق لعنادك ده، اتفضلي اركبي من سكات، لاني على أخرى 

عشق: وهو ايه اللي جبرك انك تروح، وبعدين انت مدايق، بلاش ديقتك تطلع عليا انا، لاني مبستحملش بصراحه 

قاسم: انتي مجنونه يابت انتي، انتي عارفه انتي بتكلمي مين 

عشق بضيقه وخنقه: ايوه عارفه، عارفه انك قاسم بيه العزيزي، واني مجرد حتة بت خدامه عندك، لكن ده ميمنعش انك برده متعاملنيش كده، لاني برغم اني خدامه، لكن عندي مشاعر وبحس، مش...... 

قاسم بنرفزه: خدامه، خدامه، انتي فرحانه بالكلمه دي، كل شويه تقوليها، ممكن تركبي وانتي ساكته بقه 

عشق: ايه،،، هو انا قلت حاجه غلط ياقاسم بيه. ولا كدبت، مش هي دي الحقيقه اللي انت نفسك تقولها، 

قاسم بصوت جهوري: عشششق، كفايه بقه، ويلا خلينا نغور من هنا 

عشق اترعبت من صوته، وفتحت باب العربيه اللي ورا، ولسه هتدخل 

قاسم: بتعملي ايه، اتفضلي تعالي اقعدي هنا(وشاور على الكرسي اللي جنبه) ، ومن غير اي تعليق، تقعدي وانتي ساكته 

عشق قفلت الباب وفتحت الباب اللي قدام وركبت من سكات، و قاسم مشي بنرفزه ومن غير اي كلام

وصل قاسم عند محسن بيه، ونزل يسلم عليه 

جيجي اول ماشافت عشق جنب قاسم نزلت من العربيه بسرعه، وفتحت الباب وقالت: ايه ده، انتي ايه اللي ركبك هنا يابت انتي، اتفضلي انزلي، انتي اتجننت ولا ايه، بتركبي جنب قاسم بيه 

عشق بخنقه وزعل : قاسم بيه اللي طلب مني اركب هنا. مش انا اللي ركبت لوحدي، 

قاسم سمع جيجي رجع بسرعه : في ايه يا جيجي، عايزه ايه من عشق 

جيجي وشها احمر واتنرفزت : هو ايه اللي عايزه ايه من عشق، انت ازاي تسمح ليها تركب قدام جنبك، انت مش عارف دي تبقي ايه، 

قاسم مسح وشه بايده بخنقه، وهدى زقت رنا تنقذ الموقف، 

رنا: ابيه قاسم، اهدي، وانتي يا جيجي. خلاص محصلش حاجه، وانتي يا عشق، تعالي اركبي معايا انا وبابي، وعدوا الليله خلي الأمور تمشي، انتو بجد تتعبوا الأعصاب 

عشق بتاخد شنطتها وماشيه، قاسم شد منها الشنطه ورماها في عربيته، وبص لجيجي واتكلم بصوت جهوري: بقولك ايه ياجيجي، عشق زي ما جت معايا هتكمل معايا، واوعى في يوم من الايام، تفكري تعملي اللي عملتيه ده مره تانيه، انتي فاهمه ولا لا 

فريده: هو في ايه بالظبط، انت عامل للبنت دي قيمه ليه، دي حتة خدامه لا راحت ولا جت، ازاي تزعق لبنتي وتزعلها عشان خاطرها 

حازم اتحرك ليهم بسرعه وحب ينقذ الموقف: احنا اسفين يا فريده هانم، وانتي يا جيجي اوعي تزعلي يا حبيبتي،( وبص لعشق) تعالي ياعشق معايا، وانتي يا جيجي، اركبي مع قاسم وحاولي تهدي الموضوع 

قاسم بغيظ : بابا بعد اذنك، كفايه كده، انا مبقتش قادر اتحمل، 

حازم بيصك على اسنانه: حل امورك مع خطيبتك بالراحه ياقاسم، (بص لعشق) يلا ياعشق تعالي 

عشق بصت لقاسم بدموع، وهو عينه اتعلقت بيها، ونفخ بضيق ودخل عربيته وقعد 

جيجي دخلت ركبت جنبه، وهو شغل العربيه ومشي بسرعه بدون مايستني حد، ومحاولش يبص لجيجي ولا يكلمها 

الكل وصل الشاليه، وكانو اتنين جنب بعض في قريه سياحيه جميله 

قاسم وقف العربيه ومن غير اي كلام نزل، وقفل بابه وراه، ودخل على الشاليه على طول 

جيجي نزلت ودموعها سابقاها، 

فريده بخضه : مالك يا حبيبتي،، بتعيطي ليه 

جيجي منهاره: مفيش يامامي، بس انا حاسه ان قاسم مش طايق يتكلم معايا، تصوري يا مَامي، طول الطريق منطقش بكلمه 

هدي: معلش يا جيجي انا عارفه ان قاسم صعب ومش من السهل واحده تستحمله، لكن اكيد انتي لو بتحبيه هتستحمليه لحد مياخد على الوضع ويهدي؛ اوعي تزعلي نفسك ياحبيبتي

فريده :حضنتها،، خلاص يا حبيبتي متزعليش، دلوقتي هيهدي ويجي يكلمك 

جيجي: طب عن اذنكو هدخل اغير هدومي وارتاح شويه 

رنا نزلت من العربيه، وعشق بتدخل الشنط، 

قاسم واقف قدام الشاليه شاف عشق شايله الشنط وبتدخلها. راح ناحيتها وشال معاها والكل مستغرب، ده عمره ما عملها، 

قاسم دخل الشنط وعشق نفسها مستغربه لكن هو ملامحه جامده ومبيبصش على حد ولا مهتم بحد

دخلوا كل حاجه الشاليه، 

قاسم بعد مدخل الشنط وقف ومسك دماغه وبص لعشق وقال: عشق بعد اذنك ياريت تلحقيني بالقهوه، هموووت من الصداع بجد 

عشق بفرحه من موقفه معاها: من عنيا ياقاسم بيه، ثواني وتبقى جاهزه، والف سلامه على حضرتك من الصداع،

قاسم بحب؛ تسلم عينك وايدك ياعشق، 

عشق كانت ماشيه سمعت كلمته ووقفت وبصت عليه، لقته بيبصلها واتعلقت عنيهم ببعض وكل واحد تايه في سحر التاني،وبعدها فاقت عشق ومشيت من قدامه بسرعه 

قاسم ابتسم لكسوفها، وافتكر جيجي وطريقتها ، واتدايق جدا لانه مش قادر يتعايش مع انه ممكن يتجوزها في يوم من الايام 

حازم داخل ولسه هيتكلم 

قاسم لحقه قبل ما ينطق: بابا، عشان خاطري بلاش كلام، انا تعبت من الخناق، سيبني امشي اموري هنا، وكفايه اني جيت غصب عني، 

حازم بهدوء : انت اللي دايما رافض اي كلمه من اي حد، صوتك من دماغك، وده غلط ياقاسم

هدي: بقولك ايه ياحازم، احنا جايين نتبسط، مش نتخانق، وفر اي كلام دلوقتي، لحد منرجع البيت، وأبقى قول اللي انت عايزه 

حازم بصلهم وسكت ودخل غير هدومه 

وعشق قدمت القهوه لقاسم ومشيت من قدامه بسرعه 

اما رنا فدخلت غيرت هدومها وخرجت قعدت مع جيجي وفريده بره 

جيجي حبت تدايق عشق 

جيجي بتكبر: يا عشق، ياعشق، انتي يابنتي

عشق بخنقه : نعم ياست جيجي، 

جيجي اتفاجئت من كلمته وردت بتريقه: ست جيجي، ايه الألفاظ البلدي دي، اسمي جيجي هانم، فاهمه ولا لا، 

عشق بغيظ: نعم يا جيجي هانم، 

جيجي: ياريت تحضريلي اي حاجه أكلها ، لاني بصراحه مفطرتش، 

عشق: واقفه وساكته خالص 

جيجي بنرفزه: انتي واقفه متنحالي كده ليه، متتحركي اعملي اللي قولتلك عليه، 

قاسم متابع الموقف من بعيد ونفسه يروح يخنق جيجي، 

عشق بصت بغيظ ولسه هتمشي

سمعت صوت وراها، بيقول 

رايحه فين ياعشق، استنى انا عايزك 

عشق ورنا وجيجي بصو عليه واتفاجئوا

الحلقه ١٣

من (غمرتني عشق)

💕اللهمَّ اكفِنِي بحلالِكَ عن حرَامِكَ وأغْنِنِي بفَضْلِكَ عمَّن سواكَ . 💕

                  بسم الله نبدأ

عند فاديه 

فاديه قاعده وقلقانه على عشق، وصعبان عليها بهدلة بنتها  وتعبها،، 

قامت تحضر غداها وهي ملهاش نفس لحاجه، دخلت المطبخ وبتخبط في كل حاجه بزهق، وفي الاخر سابتهم وطلعت قدام البيت، 

ام طارق راجعه من السوق : سلامو عليكو يا ام عشق، عامله ايه ياحبيبتي، انهارده 

فاديه بخنقه : بخير يا ام طارق نحمده على كل حال 

ام طارق: مالك ياحبيبتي، وشك اصفر ليه كده، لسه برده زعلانه على بُعد عشق

والله ليكي حق، دي البلد ملهاش حس من غيرها، ربنا يصلح حالها، ويفرحك بيها يا رب يا حبيبتي 

فاديه دموعها نزلت، وأم طارق اتخضت عليها وسابت الشنط اللي في اديها وقعدت جنبها 

ام طارق : مالك ياختي ، فيكي ايه، طمنيني عليكي، 

فاديه بدموع: عشق تعباني قوي، صعبان عليا اشوف بهدلتها قدامي واسكت، لكن مفيش بأيدي حاجه غير اني ادعيلها ان ربنا يعوضها خير، و مش قادره ابعد عنها اكتر من كده، ولا قادره اقولها سيبي اكل عيشك وتعالي اقعدي جنبي، لكن هقول ايه غير اللهم اني استودعتك بنتي فاحفظها لي فأنت الذي لا تضيع ودائعك 

ام طارق : ايوه كده ياحبيبتي، ادعيلها، والدنيا مبتدومش على حال ياختي، اكيد ربنا هيعوضها خير، ويرزقها بابن حلال يصونها ويستتها، عشق جميله والف واحد يتمناها 

فاديه: يارب يا ام طارق، ربنا يفرحني بيها يارب 

ام طارق : يارب ياحبيبتي، (وقامت وقفت تلم شنطها)، معلش بقه يا فاديه، هسيبك وادخل اعمل الغدا، وأبقى ارجع اطمن عليكي، تؤمريني بحاجه يا حبيبتي 

فاديه: تسلمي يا حبيبتي متحرمش منك ابدا، 

ام طارق : سلامو عليكو، 

فاديه:وعليكم السلام يا ام طارق،،،،،، وقعدت تدعي للعشق، وتستغفر ربنا، 

--------------- بقلم شيمو الخطيب 

عند سحر

سحر راحت شغلها، وخالد كان موجود 

خالد: اهلا ببرنسيسة البلد كلها، والله انتي مكانك مش هنا خالص، انتي المفروض تقعدي هااانم 

سحر باستغرااب: انت بتكلمني انا يا خالد بيه،!!!!! 

خالد؛ طبعا، هو فيه في البلد برنسيسه غيرك 

سحر: مذهوله من اللي بتسمعه،،، شكرا ياخالد بيه!! ، بس ليه كل الرضا ده يعني!!! 

خالد بمكر : انا راضي عنك من زمان، بس انتي اللي مكنتيش واخده بالك 

سحر بعدم تصديق: والله،،، اممممممم ماشي ياخالد بيه، عن اذنك انا عشان اروح اشوف شغلي 

خالد: لو حابه تريحي انهارده، معنديش مانع 

سحر كانت ماشيه لفت ليه بنفاذ صبر: بقولك ايه ياخالد بيه ، متجيب من الاخر كده، لأن بصراحه المراره عندي مش متحمله 

خالد لنفسه :اتقل ياخالد مش كده، 

سحر: هااا، هتقول عايز ايه دوغري، ولا هتلف وتدور 

خالد: مالك بس ياسحر حاميه عليا كده ليه، انا مش عايز منك حاجه، انا بس مستخسرك في البهدله، ويا ستي لو دايقتك انا بعتذر لك. و اتفضلي كملي شغل ده لو حابه تكملي طبعا 

سحر: اممممممم، ماشي ياخالد بيه، انا هعديها، بس احب اقولك، انا مبحبش اسلوب السهوكه ده، عايز حاجه قولها على طول، سلام ياباشا

خالد: بص عليها وهي ماشيه، وقال، اصبر علي جارك السو، يايرحل، يا تيجي مصيبه تشيله، داهيه تاخدكو كلكو بلد عره، (وعلى صوته)، يلا يا اخويا انت وهو اشتغلوا بضمير شويه خلونا نخلص، 

--------------- بقلم شيمو الخطيب 

في السخنه 

جيجي حبت تدايق عشق، 

جيجي: ياعشق، انتي ياعشق 

عشق جايه بهدوء : تحت امرك ياست جيجي 

جيجي: ايه،!!! ،، ست جيجي،!!!!! ،  انتي من زمن ايه يابنتي، هههههه، اسمي جيجي هانم، مش ست جيجي

عشق نفخت : اممم، تحت امرك يا جيجي هانم 

جيجي: ايوه كده اتعدلي، روحي حضريلي حاجه خفيفه أكلها لاني مفطرتش

عشق : واقفه وساكته ومردتش، وبتحاول تهدي اعصابها 

قاسم واقف متابع من بعيد ونفسه يروح يخنقها 

جيجي بخنقه: انتي متنحه ليه يابت انتي، متتنيلي تروحي تعملي اللي قولتلك عليه، ولا مبتسمعيش 

عشق اتخنقت، وقالت: حاضر، عن اذنك 

ولسه هتمشي سمعت صوت وراها بيقول 

استنى ياعشق رايحه فين 

عشق ورنا وجيجي بصو واتصدوموا لما شافوه 

عشق بفرحه: حساااااام باشاااااا،، والله الدنيا كلها نورت بوجودك 

حسام تسلمي ياعشق، (وبص على رنا) دي منوره بيكو انتو 

جيجي بضيق: حلوه المفاجئه دي يا حسام والله،، اكيد قاسم هيفرح قوي

حسام بصلها: واااضح جدا انها عجباكي يا ست جيجي، ههههههه

جيجي بنرفزه : انت هتعمل زي البنت البلدي دي، اظن ياحسام انت مستواك أعلى من كده بكتير 

حسام: ههههه، انا مش فاهم مدايقاكي ليه الكلمه، ده حتى كانت زمان بتتقال للهوانم، دي كلمه عريقه وليها تاريخ يابنتي، لكن يلا، انتي حره. (وبص على رنا اللي ساكته خالص و عنيها متعلقه بيه ومليانه دموع) 

حسام: وانتي يا انسه رنا، ياترى المفاجئه عجبتك، ولا لأ 

رنا قامت وقفت ومردتش عليه، وقالت :بعد اذنكو انا تعبانه ومحتاجه ارتاح، (وبصت لعشق)، عشق ياريت لما الغدا يجهز تصحيني

عشق بزعل: انتي هتنامي بدري كده، ده احنا لسه واصلين من شويه، اقعدي معانا شويه ياست رنا 

رنا بصت لعشق ورجعت بصت على حسام، وسابتهم ومشيت 

عشق زعلت عشانها جدا، وحسام حس ان قلبه موجوع جدا على شكلها، لكن صبر نفسه انه لازم يكلمها، ويراضيها

قاسم كان دخل مدايق من جيجي ومعاملتها لعشق، ومشافش حسام، لكن قرر انه يخرج يشوف ايه اخرتها مع جيجي 

لمح حسام من بعيد وفرح جدا بوجوده 

قاسم جاي بسرعه :اهلاااااا بأحلى ظابط فيكي يا جمهوريه، واحشني والله يا حسام،، وحضنه جامد 

حسام في ودن قاسم: اظن جايه على هواك المفاجئه دي، 

قاسم بهمس :دي احلى حاجه عملتها في حياتك، انا كنت حاسس اني هرتكب جريمه في الرحله دي 

حسام بضحك وبهمس برده :ههههه، يعني انا جاي اشتغل مش ااجز،، حرام عليك. حتى في الاجازه هقبض عليك 

قاسم خرجه من حضنه وضحك: لا ياصاحبي انت هتمنعها خالص و تسيطر على الوضع 

جيجي بخنقه وغيره من علاقتهم: انتو واحشين بعض قوي للدرجه دي، جرا ايه يا حسام، ابقى سيبلنا مكان في قلب قاسم، عشان نعرف نعيش 

حسام : والله يا جيجي، ده متوقف عليكي انتي مش انا 

جيجي بخنقه (بصت لعشق)، انتي لسه واقفه يابت انتي، انا مش قولتلك روحي هاتيلي حاجه افطر بيها 

قاسم ببرود: عشق من فضلك ياريت، تعمليلي انا وحسام القهوه المعتاده، واي حد،(وبص لجيجي) اي حد مهما كان لو كلمك بقلة ذوق، متنفذيش طلبه، انتي فاهمه ولا لأ 

جيجي فتحت عنيها على الآخر، : ايه ده يقاسم، انت بتقويها عليا، انت اتجننت ولا ايه ياقاسم 

قاسم وشه احمر وصك على سنانه، عشق حست ان فيه بركان هينفجر في وشهم كلهم دلوقتي، وحسام حس ان جيجي نهايتها قربت 

عشق بسرعه قربت من قاسم : قاسم بيه،، ملهاش لازمه المشاكل، دي كلها حاجات بسيطه، سايق عليك النبي متدايق نفسك 

جيجي: ايه ده، انتي كمان بتترجيه ميدايقش، ههههههه، لا بجد انا اول مره اشوف كده، والمفروض انه هيعديها لمجرد انك اتكلمتي معاه.،،، لا ده انتي بجد مجنونه 

قاسم بص لعشق وركز في عنيها وقال : عشان خاطرك انتي بس ياعشق انا مش هدايق نفسي، اعملي انتي بس القهوه، والحقينا بيها

حسام ضحك غصب عنه، وقطع الضحكه اول لما بص لجيجي ولقاها بتطلع نااار 

جيجي بغضب: ماشي يا قاسم، انا هعرفك مين هي حيجي القناوي، وسابته ودخلت منهاره 

حسام: هههههههههه، يخربيت برودك، بجد ياقاسم انت انسان مستفز، عندك قدره تقتل اللي قدامك بالبطيء، 

قاسم بخنقه: هي اللي مستفزه يا حسام، (وبص لعشق)، وبعدين معاكي ياعشق، جيجي هتحطك في دماغها ومش هتسيبك في حالك، اوعي ياعشق تديها فرصه تذلك او تدايقك، اوعي 

عشق بفرحه : ان شاء الله ياقاسم بيه ، وشكرا جدا لوقفتك معايا، حتى حسام بيه، مسمحش ليها انها تدايقني ، ربنا ميحرمني منكو ابدا، هدخل حالا اعمل القهوه، عن اذنكوا،،، وجريت من قدامهم بفرحه كبيره 

قاسم عينه اتعلقت بعشق، لحد مدخلت الشاليه واختفت عن نظره 

حسام واقف متابع قاسم، وساكت خالص، ومستغرب حالة صاحبه الغير معتاده 

حسام: يا عزيزي، ياعزيزي،،، ايه يابني، هتفضل متنح كده كتير، لا ياقاسم، الموضوع خطر جدا، حِسي المهني بيقول ان الموضوع مش طبيعي 

قاسم لف وشه ليه وسكت خالص

حسام: مالك ياقاسم بجد، تصرفاتك بصراحه، مش تصرفات واحد مع خدامه،، اسف،، ، قصدي واحده بتشتغل عنده 

قاسم اتخنق لما سمع خدامه وحب يغير الموضوع: قولي ياحسام، انت ايه اللي جابك، ومقولتليش ليه انك جاي 

حسام: انت ليه بتغير الموضوع ياقاسم، انا بسألك بجد وعايز اجابه 

قاسم لف وشه بعيد وقال: تعالي يا حسام نقعد في الشمس هناك، صدقني هتبقى القعده احلى، 

حسام سكت ومشي معاه وهو مخنوق منه وراحو قعدوا مع بعض، 

عشق في المطبخ جهزت القهوه وطلعتها لقاسم، ودخلت 

هدى دخلتلها: عشق، بقولك ايه، انا عايزه اطلب منك طلب 

عشق: تحت امرك ياست هانم اؤمري

هدى :احنا هنطلع على البحر بالليل، عايزاكي معلش تقعدي هنا، انا مش عايزه مشاكل، وقاسم بيعند مع جيجي، وواخدك انتي وسيله لغيظها، فياريت متسمحيش ليه بكده ياعشق

عشق بخنقه : حاضر ياست هانم من عنيا، 

هدي: تمام قوي،،، يلا خلصي الغدا بسرعه لان الكل جعان 

عشق بانكسار : حاضر، حالا هيكون جاهز 

هدى خرجت من المطبخ وعشق انهارت من العياط وحاسه ان قلبها هيوقف، وقالت لنفسها 

ايه ياعشق، كنتي فاكره انه ممكن يكون حبك، كنتي فاكره انه ممكن يكون بيفكر فيكي، ده انتي بتحلمي ، انتي فين وهو فيييييين،

- اوعي تكوني حبتيه يابت، 

_اه حبيته، ببقه حاسه اني طايره وانا معاه، بحس معاه باحساس، عمري متخيلت اني احسه مع حد، 

-تبقى هبله، ده باشا، وانتي حتة خدامه 

_بس الحب مش بأيدينا، وقلبي وقع فيه خلاص، اعمل ايه 

-لازم تبعدي والا هتغرقي نفسك، ده بحر غويط وموجه عالي، وانتي مش قده 

_صح، انا فعلا مش قده 

فاقت عشق من أفكارها على صوت رنا 

رنا: عشق، انتي لسه مخلصتيش، انا جعانه قوي، وبتفتح في الحلل، وبتدوق 

عشق بوجع: ليه تبعدي يا ست رنا، مش هو ده اللي انتي متقدريش تستغني عنه، ليه مشيتي 

رنا وقفت وقفلت الحلل، وبصت لعشق: لاني مش لعبه ياعشق، وقت ميدايق يدايقها ووقت ميحس انه غلط يجي ويصالحني عادي، 

عشق بوجع: عندك حق يا رنا هانم، بس هو حسام باشا عنده حق يزعل منك ولا الموضوع مش مستاهل؟ 

رنا بدموع : الموضوع يستاهل، بس هو مادانيش فرصه أفهمه، بني أفكاره لوحده،،،، عشق بجد انا تعبانه ومش عايزه اتكلم دلوقتي، 

عشق : حاضر ياست رنا، الاكل جهز وانا هطلع احضر السفره، (وحبت تغير الموضوع) انا بصراحه اول مره اشوف قريه سياحيه ومفيهاش اكل جاهز، انا طول عمري عارفه، ان الأكل بيبقى فيها بمعاد 

رنا: دي القرى السياحيه اللي زي الفنادق، بتيجي تقعدي فيها يومين وتمشي، لكن الشاليه ده ملك لينا، يعني انتي المسؤوله عن اكلك وشربك 

عشق؛ :اااااه، انا كده فهمت، لما اطلع احضر السفره بسرعه عشان ست هدى متتدايقش، وسابتها ومشيت 

عشق حضرت السفره والكل اتغدى، واعجب بالأكل جدا، وطلعوا وقضوا سهرتهم وعشق رفضت انها تروح معاهم لانها تعبانه ومحتاجه ترتاح

------------------- بقلم شيمو الخطيب

عدي ٣ ايام في السخنه 

عشق بتحاول بقدر الإمكان تبعد عن قاسم، وتتجنبه، وده طبعا لتنفيذ رغبة هدى..وعشان متعملش اي مشاكل 

رنا مبتديش فرصه لحسام ينفرد بيها نهائي ومن يوم ما وصل وهو هيموت ويكلمها لكن هيا رافضه، 

جيجي بتحاول تقرب من قاسم، لكن قاسم تفكيره كله مع عشق و مستغرب هي ليه مش مدياله فرصه حتى يبصلها 

هدى وفريده متابعين الموضوع من بعيد، وفريده حاسه ان علاقة قاسم بعشق غير طبيعيه، لكن محبتش تقول لبنتها عشان متدايقش 

حازم ومحسن كل كلامهم عن الشغل والمشاريع والشراكه اللي بينهم، وبيحاولو يفصلوا شويه عشان يستمتعوا بالاجازه 

؛--------------- بقلم شيمو الخطيب 

نرجع للوقت الحالي

عشق قاعده في المطبخ وماسكه مصحفها، وبتقرا فيه 

دخل قاسم يدور عليه. 

قاسم : عشق، يا عشق 

عشق قفلت المصحف (صدق الله العظيم) وقامت: افندم يا قاسم بيه تؤمر بحاجه 

قاسم بيبصلها ومركز قوي لأنها وحشاه وحاسس انه مش عارف يشوف عينيها من زمان 

عشق بكسوف: احم،، قاسم بيه، فيه حاجه ولا ايه 

قاسم : احم،، اه،، اه انتي قاعده هنا ليه كده، متيجي تقعدي معانا بره 

عشق: اسفه ياقاسم بيه، انا قاعده بقرأ قرأن، ولو حد احتاج حاجه ينادي عليا 

قاسم بنرفزه : وانا مبقولكيش اطلعي عشان لو حد احتاج حاجه تعمليها، انا بقولك، عشان عايزك تطلعي تقعدي معانا 

عشق بخنقه: بصراحه كده ست جيجي بتتخنق من وجودي، وانا معنديش استعداد اذل نفسي، واطلع واسمع كلمتين 

قاسم بلهفه : وهو مين يقدر يذلك وانا موجود، عشق، انتي متعرفيش انتي ايه...... وسكت 

عشق عنيها اتعلقت بيه ودموعها نزلت : ايه ياقاسم بيه، مكملتش ليه، ولا يمكن عشان انا مش قد المقام 

قاسم لف وشه الناحيه التانيه،،، ورجع بصلها: عشق، عشان خاطري تعالي اقعدي معانا، ممكن ولا هتكسفيني 

عشق قلبها دق بسرعه، وصوت نفسها عالي ،، وهزت راسها بالموافقه 

قاسم ابتسم : خلاص انا هطلع دلوقتي وانتي اغسلي وشك وتعالي ورايا، 

عشق بتعب : حاضر ياقاسم بيه، 

وخرج قاسم وخد قلب عشق معاه، اما عشق حاسه انها ميته من غيره، ومبقتش عارفه تعمل ايه، لا هي قادره تبعد ولا قادره تقرب 

حسام انتهز فرصة ان رنا لوحدها وقرب منها وقعد جنبها 

حسام : ممكن افهم هتفضلي زعلانه مني لحد امتى 

رنا بصتله واتنهدت: اظن ان مش من مستواك يا حسام باشا انك تكلم واحده زيي وفي اخلاقي، ليه بتنزل بمستواك للدرجه دي 

حسام اتصدم من ردها : رنا!!! ،، انتي بتقولي ايه!!!!! 

رنا بخنقه : بقول الكلام اللي انت قولته، مش هو ده كلامك ياحسام، مش انا البنت اللي تآمن على ولادك معاها، صح، انا بقه بعفيك من الحرج وببعد، لأن فعلا. مينفعش حسام المغازي يحب واحده شمال 

حسام مسك اديها : رنا، اوعي تقولي كده تاني، انتي متعرفيش انا من يوم مقولت كده، وانا هموت، روحتلك الجامعه بعدها عشان اشوفك واطمن عليكي وعرفت انك مروحتيش اليوم ده، ولما قاسم قالي انه مسافر معاكو قلت لازم اجي واعتذرلك،، رنا الموضوع مكانش سهل عليا. انتي عمرك مهتستوعبيه لأنك مش راجل، عمر اللي انا حسيته مهيوصلك ابدا، رنا، انا عارف اني جرحتك، بس جرحك ليا كان أكبر، وجرحك لنفسك كان أكبر واكبر، 

رنا بدموع :وانا اخدت عهد علي نفسي يا حسام، ان على قد الحب اللي حبيته ليك، على قد مهكرهك وابعد عنك، لأنك خلاص انتهيت بالنسبالي ولا يمكن هرجع في عهدي ده ابدا 

حسام بصدمه ووجع: تكرهيني!!!! ماشي يا رنا، انتي حره، وانا مش هجبرك على حاجه، وبص في عينيها كتيييير وسابها ومشي

رنا قعدت مكانها وانفجرت في العياط، وجيجي جت تجري عليها 

حيجي: رنا، مالك يا حبيبتي، فيكي ايه

رنا بشهقات : م،، م، مفيش، ح، حا حاجه يا جيجي، انا، انا هدخل اغسل وشي، واجي على طول، وسابتها وجريت

وفعلا دخلت واترمت على السرير وعيطت بصوتها كله وقالت لنفسها :

حسام، انا بجد بحبك، بس انت جرحتني، ليه تعمل كده، ليه تقولي كده، انا عمري ما حبيت حد قدك، عمري متخيلت نفسي غير معاك وفي حضنك، ليه توصلنا لكده يا حسام، ليه، ليييه، حرام عليك، وعيطت جامد وبعد وقت، قامت بتعب وصداع، وغسلت وشها، وحطت لمسات خفيفه من الميكب ، وخرجت تقعد معاهم على البحر

قاسم خرج، ولقى حسام واقف سرحان 

قاسم حط ايده على كتفه : ايه ياكبير، سرحان في ايه 

حسام: مفيش يا قاسم، انت كنت فين 

قاسم : كنت بقنع عشق تيجي تخرج معانا 

حسام: انت مش هتقولي ايه حكاية عشق، ولا مش ناوي 

قاسم بخبث : لما تقولي انت الاول، انا هقولك 

حسام فهم قاسم، ولف وشه بعيد عنه، لأنه معندوش استعداد يتكلم دلوقتي، وقاسم بص لحسام بحيره وسكت 

عشق خرجت والكل استعد يطلع على البحر كالعاده

جيجي قربت من قاسم ومسكت ايده،، وعشق بصت على اديهم وبصت لقاسم، اللي فهم نظرتها، ووجعته جدا وتلقائي ساب ايد جيجي 

جيجي: ايه يا قاسم، فيه حاجه ولا ايه 

قاسم بيبص لعشق: لا، ابدا يا جيجي، بس كده احسن 

جيجي بتنقل نظراتها من عشق لقاسم، واتغاظت جدا، وقربت اكتر من قاسم، وقالت: بس انت ملكي انا، ومحدش يقدر ياخدك مني ابدا 

عشق : احم،، انا هسبق انا يا قاسم بيه

قاسم: استنى ياعشق احنا جايين معاكي، 

جيجي: جايين مع مين، وهي مين دي اللي هتيجي اساسا،، امشي يابت انتي ادخلي امسحي المطبخ، ولا شوفيلك حاجه تعمليها على مانيجي، 

عشق بدموع : بصي بقه ياست جيجي، واه هقولك يا ست جيجي، لاني بلدي، وافتخر اني فلاحه، انا مش هسمحلك تكلميني بالطريقه دي بعد كده،انا مش شغاله عندك، ولو احتاجتي حاجه، ابقى قومي انتي اعمليها، عن اذنك 

جيجي واقفه مصدومه : استنى عندك يابت انتي، انتي ازاي تكلميني كده، انتي نسيتي نفسك ولا ايه 

عشق: لا يا ست هانم منسيتش نفسي، وتقريبا كده حضرتك اللي نسيتي اني بشتغل عند الست هدى، يعني بخدمهم هما وبس، غير كده لأ 

جيجي:انتي شكلك كده  قليلة الربايه، وانا بقى اللي هربيكي، وقربت من عشق، وضربتها بالقلم 

                  الحلقة الرابعة عشر من هنا

لقراءة باقي الفصول من هنا