رواية قلوب تنزف عشقآ الحلقه الثانيه والعشرون بقلم عبير سليم

الحلقه الثانيه والعشرون 

روايةقلوب تنزف عشقاً

بقلمي :عبير سليم

😰😰😰😰😰😰

خير يا خالتي ماما قالتلي انك عاوزاني

صفاء :اه ياحبيبتي عاوزة اتكلم معاكي شويه

سميرة :قولي ياخالتي سمعاكي

صفاء :صللي عالنبي

سميرة :عليه الصلاة والسلام

صفاء :انتي عارفه انك انتي واخواتك غلاوتكم عندي من غلاوة ياسمين واللا انتي مش شايفه كده

سميرة :لا والله ياخالتي ربنا يعلم والله احنا بتقول عليكي ايه من وراكي وعن معزتك لينا واحنا كمان بنحبك أوي خير يا خالتي هو حصل حاجه

صفاء : ان شاء الله كل خير

 انا بس عاوزة ادردش معاكي شويه

سميرة :دردشي يااختى ولا يهمك وانا ورايا ايه يعني ياحسرة مانا من البيت للشغل ومن الشغل للبيت

إلا قوليلي صحيح ياسمين مكلمتكيش تطمنا عملت إيه

صفاء :لا والله من ساعة ماخرجت مااتكلمتش ورنيت على موبيلها مقفول

سميرة :ربنا معاها ان شاء الله

صفاء :ربنا معاها ومعاكم كلكم نفسي اطمن عليها واشوفها متهنيه فبيت جوزها قبل مااموت

سميرة :بعد الشر عنك يا خالتي ان شاء الله تشوفيها احلى عروسه في الدنيا دي ياسمين صغيرة و قمر وألف مين يتمناها

صفاء :الصغير بيكبر يابنتي والعمر مبيستناش والواحده مهما راحت وجت مسيرها لبيت جوزها بس الأهم انه يكون ابن حلال يخاف عليها ويراعي فيها ربنا

سميرة :اه على رأيك

صفاء :الا قوليلي بقى عمرك ماحبيتي

سميرة:إيه انا حبيت لا وححب مين ياحسرة هو في متسع من الوقت عشان احب بلانيله

صفاء :ليه معندكيش زمايل في الشغل واللا حد يمشي وراكي ويقولك ايه الحلاوة والطعامه دي وتلاقيه بيخبط عالباب

سميره :ههههههه ههههههه وربنا ضحكتيني الشغل اللي انا فيه كله عاهات طالعين من التربه بكفاله معدي عليهم القطر رايح جاي ومعظمهم متجوز ومخلف وطول اليوم يشتكوا من المصاريف والحياه بلاهم

وعمري ياخالتي وغلاوتك ماحد مشى ورايا ولا عاكسني هو انا وحشه ياخالتي

صفاء :وحشه ده ايه ده انتي اللهم صل عالنبي ده كفايه وشك المدور وعينيكي الواسعه ووسطك الملفوف لا ياحبيبتي مين اللي قال كده

سميرة :الفقريين اللي جوة

صفاء :مين سامي اللي عامل شبه عود القصب  واللا سحر اللي شبه خلة السنان لا ياحبيبتي دول اخواتك بيحبوكي دول بس بيعاكسوكي

سميرة :طب انا ليه عمر ماحد عدل اتقدملي ولا بص فوشي

صفاء :طب و سعد

سميرة :سعد قطيعه تقطعه وتقطع إسمه انا الفار كان بيلعب فعبي وحسه ان قعدت امي معاكي وراها حاجه

وعماله تجرجري رجلي من الصبح اتاري الموضوع فيه سعد انا شامه ريحته طالعه من وسط الكلام جته الهم

صفاء :فار إيه وقطة إيه بس ياسمورة يابنتي اسمعيني ومتوجعيش قلبي الله يخليكي

سميرة :ياخي جاله وجع فقلبه هو

صفاء :ليه بس كده ياحبيبتي مش قلبه ده هو اللي حبك وعاوزك

 ياعبيطه خدي اللي بيحبك ومتاخديش اللي بتحبيه واللي فهمته من سعاد ان الواد بيحبك وشاريكي يبقى ليه الرفض

سميرة :حقولك ليه عشان انا خلاص اتخنقت انا تعبت ياخالتي تعبت من الشغل والبهدله وقلة القيمه تعبت من الفقر وقلة الحيله

كام مرة كان بيبقى نفسي في الحاجه ومعرفش أجيبها.

كام مرة كان بيبقى نفسي اخرج واصرف وامتع نفسي وارجع أقول لا خسارة يابت الفلوس دي تنفعك لآخر الشهر

ومفيش حاجه كانت مصبراني غير إني عايشه على امل ان يجيلي إنسان كويس مرتاح ماديا يعوضني ويريحني من الشغل والمرمطه 

عارفه اني كبرت ومبقتش صغيرة وان قطر الجواز قرب يفوتني بس برضو مش حستسلم يعني  اصوم أصوم وافطر على سعد ياناس

اللي لا شكل ولا منظر ولا تعليم عدل فرحانين أوي بالمحل اللي فاتحه وبالشقه اللي بردو فنفس المنطقه اللي احنا فيها يعني ينكتب علية أعيش طول عمري فالفقر والهم

وكله كوم وعيلة ابوه اللي عايشين معاه في البيت كوم تاني ياباي حاشرين مناخيرهم فكل حاجه عاوزين يعرفوا كل حاجه  دي خالتي نفسها بتشتكي مر الشكوى منهم يبقى انا اروح برجلي عندهم

لا ياخالتي انا بقى حقعد كده على رأي المثل قعدة الخزانه ولا جوازة الندامه وانا محدش بيصرف علية انا بشتغل ومباخدش حاجه من حد يبقى محدش ليه حاجه عندي

صفاء :خلصتي كلامك خلاص ممكن تسمعيني بقى

سميرة :والله حتتعبي نفسك عالفاضي ريحي نفسك ياحبيبتي مش حتجوز سعد يعني مش حتجوزه حتى لو اتطربقت السما عالارض يادي النيله علية مش كفايه اسمي اللي مش عارفه اغيره حيبقى اسمه هو كمان يعني بدل ماارفع قضيه ارفع قضيتين 

صفاء :هههههه والنبي دمك زي العسل بطلي رغي بقى واسمعي الكلمتين اللي حقولهوملك بصي ياسمورة انتي مش محتاجه تكلميني عن الفقر والشقا لأني اكتر واحده دقته وعرفت طعمه واتكويت بيه

وعشت بردو زيك كده على امل اني اجوز ياسمين جوازة حلوة تعوضنا كلنا عن الشقا لقيتها طالعه مش زيي نفسها راضيه بأي حاجه عمرها لابصت لحاجه فايد غيرها ولا طمعت فحاجه عند حد وده كان بيخليني أقسى عليها وكنت بعاملها زي مااكون مراة ابوها

 كنت مخنوقه من حمزة اللي كان خاطبها كنت عايزة اطفشه بأي طريقه بعكس أسامه هو بقى اللي كان زيي غرست فيه الانانيه و الطمع

وفي الاخر انا اللي جنيت كل ده واهي النتيجه إيه هي جوزها اللي كنت فاكراه حيغرقنا في النعيم مات واهله طردوها من البيت ومااخدتش ولا ابيض ولا اسود

 والتاني محدش بقى عارف عنه حاجه ولا اعرف اذا كان عايش واللا لاء

ولما ربنا اراد انه يبتليني بالمرض محدش شالني غيرها ولا حد نفعني غير قلبها الطيب وحنيتها

ياريتني كنت اقدر ارجع الزمان بايديه والله ما كنت عملت اللي عملته وكنت جوزتها للي قلبها عايزه بس خلاص ياريت عمرها مابتعمر بيت

سميرة :اديكي قلتي بنفسك هي كانت عايزاه لكن انا مش عايزاه مبطيقهوش اتجوزه بالعافيه يعني 

صفاء :كدابه فأصل وشك بتحبيه وعنيكي كلها حب ليه وكل الأفلام اللي انتي عاملاها دي من ورا قلبك

سميرة :ياسلام وانتي عرفتي ازاي بقى

صفاء :من شعري الأبيض ده عيب عليكي يابت طب اقطع دراعي ان ماكنتي بتحبي سعد

سميرة :يادي النيله متجيبيش اسمه قدامي بتعصب

صفاء :ههههههه

سميرة :اضحكي ياام ياسمين اضحكي طب ولو انا زي مابقول كده بحبه كان إيه بقى ان شاء الله اللي حيخليني ارفضه ده انا المفروض كنت ماصدق والا ايه

صفاء :عشان اللي قلتيه من شويه انتي بتحبيه بس كارهه الفقر

عاوزاه بس عاوزه العيشه المرتاحه

عارفه ان هو مش جاهل هو معاه دبلوم حلو مش وحش بس عاوزة الدكتور والا المهندس

كويس وتمام  بس نعقلها الدكتور بياخد الدكتورة اللي زيه والمهندس بياخد المهندسه والغني بياخد اللي من عينته عشان فلوسهم تكتر وتزيد

متفتكريش ان حيجيلك الفارس بحصانه الأبيض ويعيشك ملكه ويبقى حواليكي الحشم والخدم عيشي عيشة اهلك واحلمي على ادك عصفور في اليد خير من عشرة عالشجرة

خدوهم فقرا يغنيكم ربنا وياعالم يمكن بكرة ربنا يفتحها فوشه ويبقى كويس وساعتها والنبي حتضربي نفسك بالجذمه وتقولي كان ماله سعد ياريتني خدته

فوقي واعقلي وعلى راي المثل يابخت من بكاني وبكى علية ولا ضحكني وضحك الناس علية

سيبك من كلام الروايات اللي لا بيودي ولا بيجيب وفوقي 

سميرة :هههههه طب ملكيش دعوة بالروايات أحسن بيرو تزعل منك

صفاء :والنبي يااختي بيرو لو سالتيها حتقولك كده بنفسها

صح يابيرو

💙والنبي تسيبوني فحالي انا أصلا قاعده قلقانه عالبت اللي مختفيه من الصبح دي ومش عارفين عنها حاجه ولا عارفين عملت ايه

صفاء : وهو لو انتي مش عارفه احنا اللي حنعرف

💙مانا سيبتها وقلت اشوفكم بس مش عارفه للها إيه

صفاء :بت ياسميرة الباب صوته اتفتح اهيه ياسمين جت

ايه ده دي دخلت اوضتها على طول

انتي عملتي في البت إيه ياعبير

💙وحياتك مااعرف علمي علمكم قومي يازفته انتي كمان شوفيها مالها قبل ماالفانز يولعوا فية قطيعه تقطع الحب وسنينه

صفاء: مالها ياسمين لا تكون ربنا موفقهاش في الوظيفه قومي يابنتي شوفيها قلبي مش مطمن وانا تعبانه مش قادرة اروح لها

سميرة :خليكي انتي ياخالتي انا داخلالها

تفتح عليها الباب لتجدها جالسه على الفراش تضم ركبتيها إلى ذقنها تدفن فيهما رأسها

سميرة :ياسمين مالك

ترفع ياسمين وجهها فلا ترى سوى عينين حمراوتين من شدة  الدموع التي  تغرق وجهها

سميرة وهي تقترب بجوارها وتجلس أمامها :يالهوي مالك ياياسمين في إيه مالك حصل إيه

كانت ياسمين عاجزة عن الكلام من شدة الدموع المنهمرة على وجهها مما زاد قلق سميرة عليها

ياسمين الله يخليكي ردي علية انتي كويسه حصلك حاجه

ياسمين :انا انا

سميرة وهي تمسكها من يد وتتطبطب عليها:بالراحه بالراحه ياحبيبتي عشان افهم مالك

انتي رحتي المكان اللي كنتي رايحه تقدمي فيه

ياسمين والدموع تنهمر بشده: رحت رحت يا سميرة

سميرة :وبعدين اتخانقتي هناك ضايقوكي زعلوكي فحاجه حد جرحك بكلمه

ياسمين :اتجرحت جرح جامد اوي جرح عمر مافي حاجه ممكن تداويه

قلبي موجوع أوي حسه اني حموت مش قادرة ياسميرة مش قادرة

سميرة :ألف بعد الشر عنك من القهرة ووجع القلب ياحبيبتى إيه اللي وجع قلبك يا ياسمين إيه اللي حصل ياحبيبتي انتي مش كنتي رايحه تقدمي لشغل شفتي إيه قابلتي مين عشان يحصلك كده

ياسمين : حمزة

سميرة :حمزة حمزة مين اوعي تكوني بتتكلمي عن حمزة خطيبك

ياسمين :أيوة هو حمزة

سميرة :حصله حاجه انتي وصلك عنه أخبار اوعي يكون حصلله حاجه

ياسمين :شفته ياسميرة شفته شفت حمزة

سميرة :بجد شفتيه وشافك وقالك إيه وقلتيله إيه

أهلا يامدام ياسمين مش مدام بردو

ياسمين بصدمه ومفاجاة غير متوقعه :ح ح حمزة لا مش ممكن معقوله حمزة حمزة حبيبي انت هنا ادامي حمزة انت عايش

تقترب منه لتضع يديها على وجهه للتأكد من أنه يقف أمامها 

فرحه غامرة على وجهها مع مفاجأة دموع تهبط بغزارة على خديها مشاعر مختلطه تنتابها كيف هذا أيعقل أن تكون أمامي بعد كل تلك السنوات أيعقل أن أراك الآن

كم انت رحيم بنا يالله استجبت لدعائي وحققت حلمي أن تجمعني بحبيبي وان تحفظه لي من كل شر

أين انتم يامن كذبتم قولي لكم بأن حبيبي لن يتركني ويتخللى عني

أين انتم الان لتاتوا وتروا حبيب العمر وهو أمام عيني

حمزة حبيبي انت عايش صح انت حمزة مش كده رد علية طمني انك انت حبيبي اللي مستنياه بقالي سنين

لحظة حب تجمع بين عاشقين كم تمنى في هذه اللحظه ان يختطفها من العالم كله كم تمنى ان يحملها بين ذراعيه ويطوف بها وهو يصرخ بحبها كم تمنى ان يدخلها في صدره ليشعر بانفاسها وهي تعيد له الحياه التي افتقد طعمها منذ سنوات

ياااه ياليتك تعلمين بمدى حبي واشتياقي لكي ياليتك تدركين مااصاب قلبي في سنوات بعدك وهجرانك لفؤادي

لو انتي حقا تعلمين لسمعتي دقات قلبي منذ دخولك هذا المكان وماانتظرتي هبوطي اليك لتلتقي بي

ولكن ماهذا الهراء كيف لي ان اسمح لقلبي بالضعف أمام من خانت عهد الهوى كيف ابيح لمشاعري أن تسيطر على فؤاد نزف من شدة ما ألم به من فراق الأحباب. لا ياقلب فلتصمد فليس أمامك الا الوعد الذي اخذته على نفسك ليس أمامك سوى ان تذيقها من نفس الكأس الذي ذاقتك إياه

فلتصمد ياقلب ولتتمسك بالقوة فكفاك ياقلب

 لا لا  لن اسمح لك ان تظهر ضعفك امامها بل ستكون قوي وبعدها فلتنهار حصونك وتبكي كما تشاء فلتترك لقلبك الحريه في ان ينزف كيفما يريد ولكن ليس الآن ليس الآن

فجاة يفيق فلا يجد سوى يدين تحيط بوجهه لا يشعر سوى بطعم الدمع الذي يحاول جاهدا ان يمنعه من الهطول بغزارة على وجنتيه

يتاملها والدموع تجري على وجهها يتأمل وجهها الذي لم يغب عن عينيه لحظه يتأمل عيناها التي اشتاق الي النطر إليهما:حمزة انت عايش حمزة انا مش مصدقه عينيه اخيرا رجعت حمزة انت رجعت امتى حمزة انت ازاي هنا وانا معرفش

هههههههه لا مش معقوله يااه ياحمزة انا كل ده مستنياك وانا متأكده انك

حمزة:اني إيه يامدام ياسمين

ياسمين :مدام ياسمين

حمزة انت انت بتقول إيه انت بتكلمني كده ليه حمزة انت مش فاكرني حمزة انا ياسمين حبيبتك

مالك ياحبيبي فيك إيه وبتكلمني كده ليه

حمزة:امال عاوزاني اكلمك ازاي مش فاهم هو مش انتي بردو بقيتي مدام ياسمين واللا انا غلطان انتي بتقولي ايه معلش مااخدتش بالي بتقولي انك مستنياني مستنيه مين مش فاهم

مستنياني ازاي حضرتك هو مش انتي بردو اتجوزتي  بعد سفري بأقل من شهرين هههههههه واستنيتيني مش كده

اه قلتي اتسلى شويه ادور على حد اقضي معاه يومين حلوين واضيع معاه وقتي لحد ماحمزة الاهبل يرجع مش كده

ياسمين وهي غير مصدقه ولا مستوعبه ماتسمع:حمزة انت بتقول إيه انت بتكلمني انا كده بتقوللي انا الكلام ده لا مش ممكن يكون اللي بيكلمني دلوقتى حمزة لا أكيد في حاجه غلط قول الله يخليك انك فقدت الذاكرة ومش فاكر حاجه ولا فاكرني حيكون اهون علية من اللي انا بسمعه منك دلوقتى بس ازاي ازاي ممكن تنساني انت لو حتى كنت فقدت الذاكرة ونسيت الدنيا كلها مش ممكن تنساني مش ممكن  تنسى ياسمين

حمزة :انا فعلا لو نسيت الدنيا كلها مش ممكن انسى ياسمين ولا انسى اللي عملته فية ياسمين ولا ممكن قلبي ده ينسى غدرها بيه

تنكري تنكري انك نسيتيني واتجوزتي تنكري انك خنتي عهدك لية

تحبي اجيبلك صور فرحك ياهانم أفكرك باللي عملتيه فية يمكن تكوني نسيتي الظاهر انك انتي اللي فقدتي الذاكرة مش أنا

انا لسه محتفط بيها لحد النهارده عشان كل شويه اشوفها واشوف غدرك بية واشوف ازاي انا كنت اهبل وعبيط يوم ماصدقت حبك لية وصدقت دموعك وانا مسافر عاهدتيني انك مش حتكوني لحد غيري وانا صدقت عاهدتيني انك حتستنيني العمر كله وانا صدقت

الاقيكي بعد كده بتتزفي لغيري والفرحه  مالية عيونك

انا لما أسامه اخوكي قاللي على فرحك انا مصدقتهوش لما قاللي انك قررتي تتجوزي وتعيشي حياتك كدبته قلت كداب لا يمكن ياسمين تعمل فية كده

كان نفسي أكدب عينيه اللي شافت الفرحه فعيونك كان نفسي اكدبها واقولها لاء دي مش ياسمين لا يمكن تكون ياسمين حبيبتي

ياسمين :أسامه

حمزة :ايه ماقالكيش اني كلمته اول مافقت من الغيبوبه  اللي كنت فيها كلمته وانا حموت عشان اسمع صوتك كلمته وانا ببكي واقوله سمعني صوتها ماقالكيش ياهانم

ياسمين :أسامه كان عارف انك عايش

حمزة :حتفرق معاكي عالعموم خلاص الكلام خلص

ياسمين :هو إيه اللي خلص ياحمزة الكلام ماخلصش ولا يمكن يخلص حمزة انت ظالمني انت مش، فاهم حاجه حمزة اسمعني وانا حفهمك حمزة انت ازاي ممكن ييجي  فبالك اني ممكن اتجوز او ارتبط بغيرك حمزة انت

حمزة:انا واحد غبي لأني صدقتك ياياسمين وصدقت حبك لية

ياسمين :انت فعلا غبي لأنك صدقت ان ممكن ياسمين تخونك او تغدر بيك وتخلف عهدها معاك

غبي انك صدقت اخويا اللي انت اكتر واحد عارفه وعارف هو ايه

غبي انك صدقت عيونك اللي بتقول انها شافتني وانا بضحك وفرحانه مع انك لو كنت جيت على نفسك وركزت شويه فالصور اللي انت بتقول انك لسه محتفظ بيها مكنتش شفت فيها الغدر  والخيانه زي مابتقول لا كنت شفت فيها الحسرة والدموع كنت شفت فيها الحزن والكسرة

انت فعلا غبي ياحمزة غبي وحتندم على غباءك ده حتندم ياحمزة 

لا يقطع حديثهما سوى صوت تلك الصغيرة بابي بابي حمزة

ياسمين :بابا  بابا مين

مين دي يا حمزة

حمزة هي دي بنتك حمزة انت اتجوزت ياحمزة وخلفت

حمزة :اعتقد ان دي حاجه متخصكيش ولو عملت كده فأنا معملتش حاجه اكتر من اللي انتي عملتيها

ياسمين :حمزة انت كنت عارف اني جايه هنا اقدم على الوظيفه اللي اعلنتوا عنها كنت عارف اني جايه اشتغل بيبي سيتر لبنتك؟ 

حمزة :والله انا نزلت إعلان وانتي اللي جيتي

ياسمين :لا لا مش ممكن يكون ده صدفه مش ممكن يكون وجودي هنا صدفه

انا كنت شاكه ان في حاجه غريبه الحاح اماني علية اني اجي واقدم فالوظيفه مكنش مطمني كنت حسه ان في حاجه بس مكنتش فاهمه

دلوقتي خلاص كل حاجه وضحت ادامي وبقت زي الشمس

كون الوظيفه تفضل مستنياني  لحد مااجي واشتغلها مكنش مريحني دي زي ماتكون الوظيفه معموله عشاني عشاني انا عشان انا اللي جاي واشتغلها

 صح صح ياحمزة مش كده ايوة ايوة انا فهمت دلوقتى كل حاجه خلاص ياحمزة واللا تحب اقولك يااستاذ حمزة واللا حمزة بيه  أحسن

بعد مابقيت ساكن في الفلل وبتركب العربيات وعندك بودي جارد

ما خلاص اللعب بقى عالمكشوف وكل حاجه ظهرت وبانت خلاص انت اللي اتفقت مع المدير يكرهني فعيشتي لحد مااسيب الشغل وانتوا اللي اتفقتوا مع اماني تقنعني اجي هنا

صح عشان اشتغل خدامه عند بنتك اللي خلفتها من غيري

عاوز تشغل ياسمين حبيبتك خدامه فبيتك ياحمزة بيه

مش هو كده بردو

 طبعا عشان تعرف تذل فية وتنتقم مني براحتك مش كده مش هو ده اللي فدماغك

حمزة :والله فكري زي مانتي عاوزة انا اعلنت عن وظيفه محتاج فيها بيبي سيتر للبنت وفي جم واتقدموا بس مكنوش مناسبين وانتي اللي جيتي النهارده انا مجبتكيش

ياسمين :وياترى بقى حضرتك شايفني مناسبه للشغلانه ولا لاء

حمزة :والله انا اللي شايفه انك محتاجاها وخصوصا فالظروف اللي انتي فيها

بس اللي انا مستغرب له ازاي تخرجي من الجوازة اللي اتجوزتيها دي بلوشي كده ياحرام يعني تتجوزي شهر وجوزك يموت وكمان متاخديش حاجه اكيد اهله كانوا عارفين انك طمعتي فيهم

ياسمين :ملكش فيه بقى مش انت صدقت نفسك وعيشت نفسك فدور الضحيه واني انا الجلاد اللي دمرك خلاص يبقى ملوش لزوم الكلام والكلام خلص زي ماقلت يااستاذ حمزة

بس صحيح قللي انت محتاج بيبي سيتر ليه امال مامة الامورة فين مش هي بردو اولى بتربية بنتها والا هي مش فاضيالها طبعا تلاقيها سيدة اعمال بقى وبتروح نوادي وكده وعاوزة واحده تيجي تربيلها البنت ماهي مش فاضيه ياعيني

سيلا :انا مامي عند ربنا

لم تشعر سوى بنغزة في قلبها لا تعلم لما شعرت بالشفقه تجاه هذه الطفله فبرغم ماهي فيه من الآلام الا ان هذه الطفله ليس، لها ذنب

حمزة :هاه حتقبلي الشغل والا اشوف حد تاني

ياسمين بكل قوة:موافقه يااستاذ حمزة حشتغل هنا بيبي سيتر لبنتك اللي المفروض كانت تكون بنتي

بس من فضلك طول مانا هنا ياريت تراعي اني بشتغل  وباخد مرتبي على شغلي مش اكتر من كده وتتعامل معايا عالاساس ده وتخللي انتقامك لنفسك لانه انتقام باطل ويوم ماحتعرف الحقيقه مش حتلوم غير نفسك

تحب استلم الشغل من امتى

حمزة:من دلوقتى لو عاوزة

ياسمين :لاء من بكرة من بكرة حكون هنا

سيلا بفرحه:هييبه هيييه انتي حتقعدي معايا

ياسمين :ايوة باحبيبتي

سيلا :وحتلعبي معايا

ياسمين :ايوة ياحبيبتي

بعد اذنك يايا استاذ حمزة

لم تترك له المجال للحديث اكثر من ذلك فكفاها من سمعته مته كفاها من تهم القاها عليها

لم تعلم كيف سارت بها قدميها لم تدرك هل ما مرت به منذ لحظات اكان حلما ام حقيقه لا تدرك اي شئ، حولها كانت تمشي ولا تعلم اين تمشي

أيعقل ماحدث لا بالتأكيد هو  كابوس ليس أكثر

لا لن اصدق ان من كان أمامي منذ لحظات حمزة حمزة الذي انتظرته لسنوات كيف له ان يظن بي السوء كيف له ان يصدق انني تزوجت بارادتي كيف له الا يسمعني ويعطيني الحق في الدفاع عن نفسي قبل ان يصدر علية حكمه بالاعدام

أسامه يالك من بلاء، في حياتي اكنت على علم بأن حبيبي على قيد الحياة ولم تخبرني بعد كيف لك ان ترى اختك الوحيده وهي معذبه ولا تمد لها يد المساعده وتنتشل الحزن من فؤادها وتطمئن قلبها الذي انفطر من ويلات الهوى بان حبيبها مازال حيا يتنفس بحبها

ولكن اي حب هذا الذي اختلط بالكراهيه والرغبه في الانتقام ولكن لن استسلم ولن اتركك قبل ان تندم على فعلتك هذه بي وعلى افترائك على قلب عشق وتالم ونزف من شدة الهوى

ويوم ان تتاكد من برائتي فسوف تندم ندما لن يضمد ولا يشفي مااصبته من  جراح لقلب شقى من الهوى

سميرة :يالهوي بقى معقوله حمزة اللي انتي قارفانه بيه طول الفترة دي ورافضه اي عريس يتقدملك عشان خاطره يطلع متجوز ومخلف كمان

صحيح جنس واطي وعلى رأي المثل يا مأمنه للرجال يا مأمنه للميه في الغربال

ياسمين وهي منهارة من البكاء :مش قادرة حسه اني حموت قلبي واجعني اوي مش مصدقه حسه ان مخي حينفجر من التفكير

 معقوله معقوله ده ممكن يكون حمزة اللي استنيته سنين معقوله ده حمزة حبيبي اللي كنت مستنيه رجوعه لية بفارغ الصبر  ده حمزة اللي عشانه كدبت كل اللي قاله انه مات وانا اقول لاء حبيبي عايش حبيبي مش ممكن يسيبني

معقوله ياناس ده انا كنت مستنياه ينصفني مستنياه يجيبلي حقي من كل اللي ظلموني وجم علية يارب يارب صبر قلبي يارب لا انا كنت حموت ياسميرة كنت حموت وانا شايفاه واقف قصادي ادام عيوني ومش قادرة ابكي فحضنه ولا عارفه اشكيله

مكنتش شايفه ادامي غير واحد الكره ماله عيونه والانتقام عامي قلبه عن انه يفكر ويشوف الحقيقه يشوفها بقلبه اللي حب وعشق

كان جوايا كلام كتير اوي نفسي اقولهوله كان جوايا نار بقالها سنين قايده كان نفسي اطفيها فحضن قلبه يقوم هو اللي يقضي علية هو اللي يعمل فية كده

اتجوزت اه اتجوزت بس مكنش بمزاجي كان غصب عني ياناس طب كان يسالني كان يسمعني لكن هو صدق كلمتين قالهومله اسامه

اسامه منك لله ياسامه حسبي الله ونعم الوكيل فيك

وهو صدقه وقرر ميسمعنيش وازاي حيسمعني هو خلاص صدق ان ياسمين باعته وغدرت بيه وخانت عهدها معاه

وراح اتجوز اتجوز ياسميرة عارفه يعني ايه بالنسبه لي يعني قدر ياخد حد فحضنه غيري قدر يكون لحد غيري انا مش قادرة اتخيل ان في حد غيري كان معاه عاش معاه الحياه اللي كانت المفروض تكون من نصيبي لا وخلف كمان البيه خلف يعني اتجوز وخلف وبقى غني وانا مستنياه ياسميرة اه ياوجع قلبي نار حسه بنار فقلبي بس والله لكويك بنفس النار ياحمزة بقى انا انا ياسمين حبيبتك تهون عليك تعمل فيها كده

شفتي شفتي لما قلتلك اني مش مطمنه للشغلانه اللي اماني كانت بتلح علية فيها طلع احساسي صح ايوة كانوا هما اللي زقينها علية عشان اروحله برجلي ويذل فية ويهيني ياسميرة بقى كده ياحمزة بقى تعمل فحبيبتك كده اهون عليك كده ياحب عمري

سميرة :وانتي نويتي على إيه ياياسمين حتشتغلي عنده 

ياسمين :انتي لو مكاني ياسميرة حتعملي ايه

سميرة :انا لو مكانك افرسه واغيظه اولع النار فقلبه وافضل كده ادام عينيه واخليه يشوفني وانا بضحك وعايشه حياتي ولا هاممني وهو خليه كده ياكل فنفسه

ويندم على اللي عمله ومسير الأيام تعرفه الحقيفه ووقتها حيجيلك راكع على رجليه

ياسمين :وهو ده اللي انا نويت عليه ياسميرة وحوريك ياحمزة

بكرة تشوف ياسمين حتعمل فيك إيه

               الحلقه الثالثه والعشرون من هنا

لقراءة باقي الفصول من هنا