#قلب_فاضي
الحلقه { 54 }
( حمزه داخل هو وامه وابوه )
ابو حمزه : السلام عليكم
ام فارس : عليكم السلام
حمزه : ( قرب من تقى ووقف جنب سريرها ) انا اسف
تقى : ( دايرت وشها النحيه التانيه عشان متشوفوش ولا تعرف هو بيقول ايه )
نجوى : اهو دايرت وشها مش عاوزه تشوفك تانى اطلع باره بقى
فارس : ابعد عنها كفايا اللى انتى عملتو فيها
نجوى : ( قاعده جنب تقى وبتطبطب عليها ) متحطش اديك عليها لو قربت منها تانى هقوم اكسرك فاهم ولا لا
حمزه : على فكره تقى لسه مراتى وانتى ملكيش كلام معايا اصلا
نجوى : متخلنيش اقوملك اتقى شرى
انا عامله حساب للناس الكبيره دى لاكن والله ماهيهمنى حد وهقوم اضربك
ام فارس : نجوى مش كدا خلاص هو عرف غلطتو وخلاص مش كدا يا حمزه ؟
حمزه : اه والله وندمان على اللى عملتو ومستعد اعمل اى حاجه عشان تقى تسامحنى
ام حمزه : والله هما اتحسدو اتاخدو عين انا عارفه طب والله يا جماعه دى تقى دى زى بنتى دانا عمرى ما زعلتها والله دانا مش بخليها تعمل حتى كبايت شاى مريحاها على الاخر وانا كمان ليل نهار شايله الواد عشان اريحها هما اتحسدو
ابو حمزه : يا ما بيحصل بين الراجل ومراتو انا يا ما اتخنقت انا وكنزى بس بنرجع ونتصالح
انته مش بتتخانق مع هدى يا فارس ؟
فارس : بتخانق طبعا بس مش بمسكها اعملها تمزق فى الاربطه واعملها شرخ فى الجمجمه
بزعق اشخط كبيرى اسبها وانام فى الصاله بس مش بضربها ضرب موت
عربى : هو ده بقى جوزها اللى ضربها سبهولى ( ورح مطلع مسدس من الجلبيه )
ام فارس : يا نهار اسود امسكو يا فارس
منير: لالا يا عمى السلاح يطول خلاص
فارس : لا يا عمى مش كدا
نجوى : سيبو يا فارس يديلو طلقتين نخلص منه
ام حمزه : حرام عليكى يا نجوى هو كان عمل ايه يعنى
عربى : عمل ايه خلاص انا هكسرلك صوابعو واقطعلو لسانو واكسلو دماغو وابقى معملتش حاجه
ابو حمزه : وحد الله يا حج احنا فى مستشفى احنا مش بنقول انو مغلطش لا غلط بس اللى حصل حصل واحنا مستعدين ننفذ كل طلبتكم بس من غير عنف
نجوى : كل طلبتنا انو يطلقها هى مش عوزاه
ام حمزه : قولى كلمه حلوه يا نجوى حرام عليكى
نجوى : هو انا الى قولت اهو هى اللى كاتبه اهو خود اقرا يا حموزه حبيب ماما
ام فارس : متخربيش على اختك اتقى الله
نجوى : اخرب على اختى ؟
ام فارس : اسكوتى انتى هو اهو بيعتزر ومستعد يعمل اى حاجه عشان يرضيها
حمزه : انا غلطان انا اسف يا تقى تقى انا بحبك
تقى : ( عنيها جات في عينو وبتحاول تدوى على الموبيل )
نجوى : خودى الموبيل اكتبى
تقى : ( واحده واحده كتابة بصباعها الصغير ) انته عايرتنى انى خارسه وطارشه انا مش ذنبى انى كدا انته معندكش قلب
نجوى : ( مسكت الموبيل تشوف كتابة ايه ) انته عايرتنى انى خارسه وطارشه انا مش ذنبى انته معندكش قلب
اه يا واطى
طب والله لاضربك ( وقامت نطت عليها عض وتلطيش )
( هدى وفارس شالوها من عليه بالعافيه )
فارس : خلاص يا نجوى خلاص
عربى : اهدى يا بنتى الواطى لا تحسبو ولا تناسبو كل واحد يروح لحالو
ام حمزه : حرام عليكى يا مفتاريه انتى ايه مفترسه العضه بالدم كدا
ابو حمزه : احترمى نفسك شويه احنا سكتين بس عشان الضيوف بس انا مش عاوز اتكلم
نجوى : ضيوف مين يا ابو ضيوف منير لا دا صاحبو من زمان وعارف ان ابنك ابن امو وصابرين كانت ضرتى عادى وده عمى زى ابويا
حمزه : عاوزه اطلقها يا نجوى ؟
نجوى : اه طلقها
ام فارس : لا اوعى حسك عينك تطلقها وانتى اخرسى خالص
نجوى : اخرس انتى عجبك شكلها كدا وهى متكسره كدا
ام فارس : نصيب ربنا كاتب لها كدا ملكيش داعوه انتى يا خرابت البيوت
نجوى : اوعى يا هدى سبينى
انا يا ماما خرابت بيوت ؟
ام فارس : اه عاوزه تخربى على اخواتك زى ما خربتى على نفسك
نجوى : انا ؟
ام هدى : خلاص يا نجات متزعليهاش هى صعبان عليها تقى
ام فارس : لا ملهاش داعوه بتقى امشى يلا روحى شوفى حالك ملكيش داعوه بينا
نجوى : ( وهى مش مصدقه ودانها ) انا ؟
فارس : خلاص يا نجوى اطلعى باره دلوقتى
صابرين : تعالى معايا
عربى : ليه كدا يا ام فارس زعلتيها دى زعلانه على اختها معلش يا نجوى متزعليش امك بارضو
ام فارس : عاوزه تخرب على اختها
دى مش بتحب الخير لحد طالعه لمين انا مش عارفه
نجوى : انا ؟
ام فارس : اه انتى مش انتى رفضتى تدى الشقه لاختك مع انها محتاجها وجوزها هينزل ميلاقيش شغل وانتى عارفه ومع كدا مش عاوزه تديها الشقه
واخوكى كان محتاج فلوس فضلتى وراه لحد ما بيعتيه نصيبو فى البيت والارض
نجوى : ياه انا وحشه اوى كدا ؟
خلاص بقى انا همشى اصل الشيطان اللى زيى مينفعش يفضل مع ملايكه زيكم
( وفتحت الباب ومشيت )
فارس : ( خرج ورها هو ومنير وعربى وصابرين ) نجوى استنى هى متقصدش هى مش عاوزه تقى تطلق
نجوى : خلاص خليها تعمل اللى هى عوزاه وانته لو عاوز حقك فى الارض والبيت روح خودهم وانسونى انا مش اختكم كل واحد يروح لحالو
فارس : نجوى انا مقدر اللى انتى فيه بس انا مش عاوز لا ارض ولا بيت
نجوى : طب سيبنى امشى
منير: طب هتروحى فين ؟
نجوى : انته مالك اصلا
صابرين : طب اهدى بس كدا ارتاحى دكتور فارس روح شوفهم جوا اوحنا معاها هنا
نجوى : انا همشى اصلا
ومعلش يا فارس هبقى اكلمك اطمن على تقى
( جالهم هيثم )
هيثم : نجوى تقى عوازاكى جوا بتدور عليكى
نجوى : انا مش طيقه حد جوا
صابرين : عشان اختك معلش خليها عليكى ادخلى اقعدى جنبها وملكيش داعوه بحد
فارس : ويا ستى انتى اشتارتى منى انا والهام حقنا خلاص انا كنت عاوز فلوس انتى لا ابتزتينى ولاغصبتينى وادتينى الفلوس اللى طلبتها انا معنديش اى مشكله
عربى : ادخلى يا بنتى عشان اختك دى غلبانه
نجوى : هدخل عشان تقى بس
منير: فارس انا متر امشى الساعه بقة 8 معلش عشان الواد وصابرين بس هجلكم تانى
فارس : تعبناك يا منير
نورتى يا مدام
صابرين : ربنا عالم انا بحب نجوى ولما شوفت تقى حبتها قد ايه
بس قول لمامتك متجيش على حد فيكم على حساب حد غريب عشان مترخصوش فى عينو وقمتكم تقل عندو
فارس : هقولها متشكر اوى
عربى : والله كلامك صح يا مدام
منير: طيب السلام عليكم
عربى : عليكم السلام ( وبعد ما مشيو )
هى مين دى ؟
فارس : دى صابرين اللى اتجوزها منير على نجوى
عربى : ايه ومقولتش من بدرى ليه كنت طخيتو
فارس : هى نقصه يالا ندخل جوا
( داخلت نجوى وفضلت جنب تقى ومش بتكلم حد ولا بتبص لحد غير تقى )
نجوى : مالك ؟
تقى : ( كتبت على الموبيل ) ودنى وجعانى اوى
نجوى : فارس بتقول ودنها وجعاها
فارس : وجعاكى منين باره ولا جوا ؟
تقى : من جوا وجع جامد اوى
فارس : طب استنى هروح اجبلك دكتور
حمزه : سلمتك يا قلبى ( وقرب منها وحط ايدو على شعرها )
نجوى : ( بصوت واطى ) شيل ايدك بدل ما اعضك
حمزه : ( بخوف راح شايل ايدو )
منير : حالتها وحشه اوى يا بابا ربنا يقومها بالسلامه
ابو منير: انا من ساعت ما شوفت الكابوس ده وانا قلقان على البت دى حظها وحش هى واختها
منير: خلاص بقى يا بابا ادعلها ربنا يشفيها
ابو منير : ربنا يشفيها انا بدعلها والله طب مش واجب اجى انا وامك نشوفهم دى عشرت عمرو برضو
منير: لا اوعى امى لو عرفت هتفرح فيها ونجوى هناك ممكن يضربو بعض
ابو منير : لا مش للدرجادى
منير: مش للدرجادى دى ، لا دى نجوى شرانيه دى مسكت حمزه ضربتو علقه وفضلت تعض فيه العضه كانت بتطلع بالدم
ابو منير: حقها وحق اختها جادعه
على العموم ماشى مش هقول لامك على حاجه خلاص ربنا يشفيها
منير: يا رب
ابو منير: طيب يا منير خلى بالك من نفسك السلام عليكم
منير: وعليكم السلام
صابرين : مالك حسه انك فيك حاجه كدا غريبه
منير : نجوى لما عرفت انى اتجوزت عليها فضلت تعيط وتضرب فيها شويه بس فى الاخر قبلت تعيش
لاكن حمزه اول ما شك ان تقى بتخونو كان هيقتلها
انا كمان لو فى يوم انتى او كانت نجوى خانتنى كنت ممكن اضربها واقتلها كمان
صابرين : عشان تعرفو يا رجاله ان الخيانه صعب حد يستحملها وكمان تعرفو قد ايه بنضحى وبنستحمل
منير: اه صح
قومى بقى هاتى الواد واعملى اكل لحسن ميت من الجوع
صابرين : حاضر خود محمد خليه معاك
( بعد ما داخلت صابرين المطبخ )
منير: انته مش هتنم بقى هتفضل كدا صاحى
الحمد لله انك ابن صابرين مش ابن نجوى كنت طلعت مفترس زيها
انته امك طيبه وهبله
بتضحك يا حبيبى
صابرين : جبتلك اكل خفيف بقى مش قادره اسخن جبن وحاجات كدا
منير: ماشى تسلم اديكى
بقولك ايه هوانتى يهون عليكى تعضينى ؟
صابرين : اعضك لا طبعا
منير: طيب
نجوى : فى ايه مالها ؟
فارس : فى تجمع داموى ورا الاذن الوسطى ولازم عماليه
نجوى : يا رتنى كنت انا
ام هدى : متخفيش العمليات دى سهله اوى
فارس : متقلقيش هتبقى كويسه
ابو حمزه : طب ما ننقلها مستشفى احسن
فارس: الدكتور اللى هيعملها العماليه دكتور كبير استشارى
حمزه : طب اطمن هتبقى كويسه ؟
نجوى : خايف عليها اوى ؟
حمزه :اه خايف عليها طبعا
نجوى : لو خايف عليها وبتحبها ردلها كرامتها من خالتك وبنت خالتك
ام حمزه : ممكن ماتدخاليش بين راجل ومراتو ؟
نجوى : اوى اوى يا ام حموزه بس حق اختى لو ابنك ماجبوش ربنا هيجيبو
بس انتى عندك حق تكلمينى كدا اذا كانت امى هذقتنى انتى يا ام حموزه مش هتكلمينى اسوء من كدا ماشى ماشى
ابو حمزه : خلاص يا كنزى بقى اسكتى
نجوى : عمى تعالى نقف بعيد عن النايتى دى
حمزه :انا نايتى ؟
نجوى : انا وجهتلك كلام انا بقول على حد تانى
عربى : يلا يا بنتى
( وراح عربى ونجوى اخر الطرقه )
عربى : هتسيبى حق اختك يانجوى ؟
نجوى: لا حق اخت هيتجاب وانا اللى هجيب حقها
عربى : اكلم سراج دلوقتى يبعت رجاله بالنبابيت يستنو حمزه وابوه وامه وقصاد البيت وينزلو عليهم بالنبابيت يكسروهم
نجوى : لالا مش دلوقتى وبعدين حمزه وابوه حقنا منه ان احنا مندخلهمش شركا معانا فى المشروع فى البلد
الطار الحقيقى مع جيجي وجنى
عربى : طب ناويه تعملى ايه وانا معاكى
نجوى : بفكر يا عمى بفكر
عربى : طب انا جعان اوى مش جعانه ؟
نجوى : جعانه بس ماليش نفس
عربى : لا لازم تاكلى عشان تصلبى طولك يلا ننزل ناكل
نجوى : طب استنى انا جاتلى فكره هروح اعمل حاجه بس لو حد سئل عليا قول انى فى الحمام
عربى : هتتأخرى ؟
نجوى : لا بس دارى عليا
ابو منير : (صلى ركعتين لله وفضل يدعى لتقى بالشفاء ) [[اللهمّ اشفها شفاءً ليس بعده سقماً أبداً، اللهمّ خذ بيدها، اللهمّ احرسها بعينيك التّي لا تنام، واكفها بركنك الّذي لا يرام، واحفظها بعزّك الّذي لا يُضام، واكلأها في الّليل وفي النّهار، وارحمها بقدرتك عليه. أنت ثقتها ورجاؤها، يا كاشف الهم، يا مُفرج الكرب، يا مُجيب دعوة المُضطرين. اللهمّ ألبسها ثوب الصحّة والعافية عاجلاً غير آجلاً ياأرحم الراحمين، اللهمّ اشفها، اللهمّ اشفها، اللهمّ اشفها...اللهمّ آمين. إلهي أذهب البأس ربّ النّاس، اشف وأنت الشّافي، لا شفاء إلا شفاؤك، شفاءً لا يغادر سقماً، أذهب البأس ربّ النّاس، بيدك الشّفاء، لا كاشف له إلّا أنت يارب العالمين آمين، إنّي أسألك من عظيم لطفك وكرمك وسترك الجميل أن تشفيها وتمدّها بالصحّة والعافية، لا ملجأ ولا منجا منك إلّا إليك، إنّك على كلّ شيءٍ قدير]]
ام منير: انته بتدعى كل ده لمين مين اللى عيانه دى ؟
ابو منير : دى بنت كدا عيانه ربنا يشفى كل مريض
ام منير : اه مين يعنى ؟
انو منير : واحده والسلام يا رزقه المهم البت سومه اخبارها ايه ؟
ام منير : اه كل يوم بتروح الجامعه وترجع
فضلت تذاكر وجابت 80% وفى الاخر داخلت تجاره
ابو منير : متعرفيش لسه بتكلم حد ولا لا ؟
ام منير: لا طبعا دانا كنت قطعة رقبتها
ابو منير: ربنا يكرمها ويبعد عنها ولاد الحرام ويكرمها بالزوج الصالح
ام منير : يا رب اقوم اعملك حاجه تشربها ؟
ابو منير: لا الساعه 12 هنام بقى
ام منير : طب تصبح على خير
( وتانى يوم الصبح داخلت تقى العمليات وعملت العماليه )
فارس : الحمد لله العماليه تمام
نجوى : طب الحمد لله
حمزه : انا عاوز اشوفها
فارس : مش دلوقتى كمان كام ساعه
حمزه : مش هتكلم معاها والله هفضل واقف جنبها بس
ام فارس : داخلو يا فارس يمكن لما تصحى وتلاقيه واقف جنبها تسمحو
حمزه : اه يمكن صح والله ما هزعلها عمرى تانى والله
فارس : طب تعالى اتعقم الاول
( داخل فارس وحمزه وسابوهم كلهم باره )
هيثم : انا كنت عاوز اروح اغير مين هيجى معايا ؟
ام هدى : ام فارس تعالى نروح نغير ونرتاح وكمان نغير لهيثم الصغير
ام فارس : مش هسيب بنتى وامشى
هدى : طيب انا هروح عشان هيثم وشويه وهاجى
ام حمزه : انا كنت عاوزه اروح عشان الولد بس يغير ويرضع اللبن بتاع هيثم دا مش لعمرو مصطفى
هدى : طب هاخدو معايا
ام حمزه : لا هتيه يا نجوى شويه هروح اغيرلو وأكلو اللبن بتاعو وهجيبو تانى
نجوى : مش هسيبو وابعيدى ايدك دى
ابو حمزه :مش كدا يا نجوى احنا عارفين انك زعلانه بس مش كدا
نجوى : حق اختى يجى اديكم الواد
ابو حمزه : طب نعمل ايه يعنى ؟
نجوى : زى ما حمزه عمل فى تقى وعملها تمزق فى الاربطه فى صوبعها يعمل كدا فى جنى
ام حمزه :انتى اتجننتى ؟
نجوى : لو معملش كدا والله ما فى مشروع ولو حد قرب من الارض هدفنو فيها
ابو حمزه : والله المشروع فى مصلحتك انتى مش انا
ام فارس : متزعلش يا ابو حمزه دى زى بنتك معلش
ابو حمزه : مش زعلان بس الكلام يبقى بعقل
نجوى : واللى ابنك عملو ده كان فيه ريحت العقل
على العموم خودو الواد انا همشى بس هاجى تانى
كلامك يا ماما ليها طول عمرى مش هنساه وشكرا
( ادتهم الولد ومشيت هى )
عربى : عندها حق ربنا يصبرها
ام فارس: اه طبعا ما هى واخده طبعكم حمقة الصعيدا
عربى : دمها حامى ست بميت راجل صعديه اصيله
ام فارس : حسبى الله ونعم الوكيل انته اللى مقويها
جيجي : تليفونك يا جنى بيرن
جنى : حاضر جايا يا ماما
الو
نجوى : الو
جنى : ايوه مين معايا ؟
نجوى : انا من بمبم للموضه والجمال ممكن تحبى تدخلى معانا السحب على جوايز المسابقه
جنى : بمبم دى بتاعت ايه دى ؟
نجوى : احنا شركه للموضه والجمال وبنعمل مسابقة لاختيار مس ايجبت عام 2016 - 2017
جنى : بس جبتى رقمى منين ؟
نجوى : دى عينه عشوئيه جبنها من الشركه المصريه للاتصالات وكمان معانا اذن من وزارة الداخليه والهيئه العامه للاتصالات
جنى : اوك طب ايه المسابقه دى
نجوى : الاول هسئلك 3 اسئله لو جاوبتى عليهم هتبقى مترشحه رسمى وهنبعتلك داعوه على البيت عشان تحضرى المقبله فى الشركه
جنى : يعنى انا ممكن اكون مس ايجبت ؟
نجوى : ايوه طبعا ؟
جنى : طيب ماشى قولى الاسئله
نجوى: خلى بالك عشان هيكون متسجل عشان المدير بتاعى هيسمع المكلمه عشان يعرف انك مؤهله فى الثقافه
جنى : اوك قولى
نجوى : السؤال الاول ~ ما هو الرئيس رقم 3 لجمهورية مصر العربيه ؟
جنى : اااااااا اااااا حسنى مبارك
نجوى : برافو
السؤال التانى ~ شرم الشيخ بتوجد فى محافظة ؟
جنى : فى سينا ؟
نجوى: برافو
نجوى : السؤال التالت والاخير
ما الطائر الذى يوجد فى علم مصر
جنى : عصفوره
نجوى : برافو كده انتى اتأهلتى للمسابقه
مطلوب منك بقى صوره والعنوان بتاع حضرتك ورقم البطاقه
وتبعتيهم على الواتس على نفس الرقم ده
جنى : اوك ماشى حالا
نجوى : ولو قدرتى تكسبى المسابقه مش هتكونى مس ايجبت بس لا كمان هتكسبى عربيه منى كوبر
جنى : لا تمام خلاص هبعتلك الصوره والعنوان وكمان رقم البطاقه
نجوى : وخلل اسبوع الدعوه هتجيلك على البيت بس اكتبى العنوان صح
السلام عليكم
جنى : عليكم السلام
جيجي : ايه ده مين دى ؟
جنى : دى مسابقة مس ايجبت خودى صوارينى عشان ابعتلهم الصوره
جيجي : طب واشمعنى اتصلو بيكى ؟
جنى : بتقولى عينه عشوائيه مش مهم بقى صوارينى عشان الحق ابعتلهم البيانات
جيجي : ماشى تعالى اصورك
( جنى اتصوارت وبعتت البيانات لنجوى وهى معتقده انها مسابقة مس ايجبت )
نجوى : ههههههه وحلاوتك وجمالك لاندمك عليهم يا جنى العقربه انتى وامك بس اختى تقوم بالسلامه
"
"
عربى : ها عملتى ايه ؟
نجوى : عيب انا قدها كلو تمام جبت صورتها وعنونها
عربى : طب ناويه على ايه انا بقول نكلم سراج يبعت الرجاله بالنبابيت يكسروهم
نجوى : يخرب بيت النبابيت اللى معقداك
نبابيت ايه يا عمى دانا هخليها متساويش فى سوق البنات نكلا اصبر بس يومين عشان محدش يشك فينا ويبقى قضاء وقدر
عربى : فهمتك هطخيها ؟
نجوى : لا اصبر بس
انا هشوف كدا احاول ادخل لتقى
نجوى : هى لسه نايمه يا فارس
فارس : فاقت من شويه بس نامت تانى العماليه كانت جنب المخ
نجوى : بس يعنى هترجع زى الاول ؟
فارس : ان شاء الله
نجوى : يا رب ملناش غيرك يا رب
فارس : انا داخلتك تشوفيها اطلعى باره بقى كدا غلط
نجوى : الله ما حموزه وافق اهو اشمعنى انا
حمزه : احترمى نفسك ومتقوليش حموزه دى
نجوى : حاضر يا حموزه مش هقول حموزه هقول يا نايتى حلو كدا يا نايتى
حمزه : عجبك كدا يا فارس ؟
فارس : بجد يا حمزه انا سبحان اللى مصبرنى عليك يمكن عشان خايف اترفد من المستشفى مش عارف
بس بجد علقت نجوى ليك امبارح ومنظرك وانته معضوض من رقبتك وايدك كدا ولا البوكس اللى فى عينك ده مبرد نارى
نجوى : عشان تعرف يا فارس انك ليك اخ راجل
فارس : سيد الرجاله كمان يا نجوى يلا بقى نطلع باره عشان ممنوع
نجوى : ماشى كمان انا ورايا كام مشوار كده
نجوى : معايا ورانا طالعه كدا
هنتأخر شويه متخافوش علينا
ام فارس : هتروحى فين ؟
نجوى : يلا يا عمى عشان منتأخرش ( واخدت عربى ومشيو من غير ما ترد على امها )
ام فارس : شفت قلت ادبها ؟
فارس : انتى زعلتيها امبارح اوى يا ماما
هى مغصابتش عليا ابيع حقى فى البيت والارض وكمان الهام هى اللى اختارت
ام فارس: وفيها ايه لما تبقو اخوات كدا تدو بعض وتحبو بعض انا عوزاكم كدا اللى معه يدى للتانى
فارس : بس انتى كدا وقعتينا فى بعض مش بتحبيبينا فى بعض
ام فارس : هو انا مش امكم هو انا عدوتكم يا رب خودنى بقى وريحنى لا واد مريحنى ولا بنت مريحانى
فارس : بتدعى على نفسك ليه بس ليه كدا؟
عربى : ها اكلم سراج يبعة الرجاله ؟
نجوى : تصدق انك هتحبسنا
بص يا عمى موضع تقى وبنت خالت حمزه ده سيبو عليا انا هتصرف
عربى : طب طالعة ايه اللى انتى عوزاها ؟
نجوى : بص هنكلم عمرو يجيب عربيتو وهنروح سوى بنها هناخد الديب فريزر اللى هناك ونفضى الشقه هنودى 3 لسليمان و5 انته تاخد عمرو بالعربيه بتعتو وتروحو على البلد وقول لشوقيه تجيب بضاعه وتحطها فى الديب فريزر دول وكمان توزن كل حاجه وتغلفها ماشى
عربى : بس الشقه دى بتعتك
نجوى : ماشى بتعتى بس انا كنت عامله المخزن ده عشان البضاعه اللى باجبها من سلمى ودلوقتى سلمى خلاص مش بشتغل معاها فا المخزن مالوش لزمه
عربى : طب وهتسبيه لاختك كدا ؟
نجوى : انا مش عوزها هى تستفيد بيها
عربى : خلاص اللى تشوفيه
( نجوى كلمت عمرو وراحو سوى حمل الديب فريزر على العربيات )
نجوى : عمى خود انته بقى عمرو وروحو على البلد وانا هروح اودى الحاجه دى لسليمان
ولو شوقيه معاها بضاعه خليها تديها لعمرو وانته يا عمرو وديها لسليمان
وكمان خود يا عمرو 300 جنيه اهم وعمى هو اللى هيدفع البنزين وكمان هتبات عندو
عربى : طب ارجعلك تانى ؟
نجوى : عاوز ترجعلى تعالى عاوز تخليك وانا كام يوم وجايالك برضو اوك
عربى : طيب هشوف
نجوى : اه صح اى حد من المهندسين يقرب من الارض ان خلاص مفيش مشروع احنا اللى هنعملو
عربى : وهنجيب الفلوس منين ؟
نجوى : انا فكرت فى كل حاجه اصبر بس امشى ورايا
عربى : ماشى يا بنت اخويا لما اشوف اخرتها
نجوى : الشقه انا فضتها اى وقت عوزنها المفتاح معاكى
الهام : انتى مش قولتى انك عوزاها ؟
نجوى : انا سبت الشغل مع سلمى والبضاعه كنت هخزنها فيها لاكن دلوقتى خلاص
الهام : طيب عاوزه كام فى الشقه انا بعت حقى البيت دلوقتى بتاعك انتى وماما وتقى
نجوى : انا مش عاوزه حاجه لو لازم يعنى قولى لماما وابقى اديها هى الفلوس
الهام : من قلبك يا نجوى
نجوى : اه طبعا يا الهام احنا اخوات صحيح انا كنت عاوزه الشقه بس بجد كنت محتاجها ودلوقتى خلاص اختى حبيبتى ليه بقى متخودهاش
الهام : والله انتى مافيش زيك يا نوجى
نجوى : خودى بقى 3 فرخات دى اعمليهم للعيال
انا همشى بقى
بصى انا ماكنتش هقولك بس لازم تعرفى
الهام : فى ايه يا نجوى وغوشتينى ؟
نجوى : حمزه اتخانق مع تقى وضربها وهى دلوقتى فى المستشفى
الهام : يا لهوى ومحدش برضو يقولى هو انا مش اختكم
نجوى : بس انتى اتفتحتى مانا بقولك اهو تيجى معايا ولا لا
الهام : اه هاجى واد يا تامر خلى بالك من محمد ووائل وانا هاخد كركر انزلو اقعدو مع ستكم تحت ولو ابوك اتكلم قولو خالتو تقى فى المستشفى
تامر : طب نيجى معاكم
نجوى : لا هناخد كركر بس
( نجوى اخدة الهام وكركر واخدت الحاجه وراحت بيها على سليمان ادتو الديب فريزر واخدت الهام وراحت المستشفى وكانت تقى خارجت من العنايه وراحت غرفه عاديه )
الهام : كدا برضو محدش يقولى
فارس : ماحنا عرفين انك عندك العيال
الهام : ولو برضو دى تقى دانا اجلها على رموش عينيه
ام فارس : ربنا يخليكم لبعض يا رب ويهديكى يا نجوى
ام حمزه : مدام الهام لو سمحتى شيلى كركر عشان بتدايق مصطفى
كركر : بوس النونه
ام حمزه : بوسى رجلو بس
كركر : لا بوس خدو رجلو لا
الهام : كركر تعالى هنا اسمعى الكلام
كركر : لا بوس النونه
هدى : تعالى بوسى هيثم
كركر : لا دا وحش دا احلى
ام حمزه : ابعدى بقى
الهام : هضربك يا كركر
كركر : بوس النونه
ام حمزه : انتى مش بتبوسيه انتى بتكليه
الهام : ( قامت اخدت بنتها وقعدت كركر تعيط )
تقى : ( فتحت عنيها بشكل مفاجئ ) { ايه ده }