رواية ياقوت الجزء الثانى
الفصل الرابع
بقلم فاطمة محمد
هو أنا إزاي مفكرتش في كدا، ياسين قدامي طول الوقت حياتي كلها معتمدة عليه، أنا
مفيش في حياتي غيره هو وورد، بحس بـ فرحة وأنا بضايقه طول عمري وطول الوقت
بفكر إزاي هضايقه تاني، ازاي
هوقعه في الغلط، وإحنا صغيرين لما أكسر اللعب وكان بيقول أنا اللي كسرتها علشان محدش
يزعقلي، أنا ازاي مأخدتش بالي من نظرة البنات ليه وهو ماشي جنبي واحنا داخلين الكلية،
أنا ببقى ماشية مع واحد ألف بنت تتمنى بس يقولها إزيك وأنا مش واخدة بالي منه كل دا!
_ لو سمحت!
_ ياقوت إيه اللي جابك هنا..
_ ياسين فين؟
_ عنده محاضرة هو اتأخر عليكي؟
_ هي هتخلص امتى؟
بص في ساعته _ يعني بالكتير أوي ١٠ دقايق..
_ قوله إني مستنياه في الكافتيريا بتاع كليتي بعد إذنك..
_ حاضر..
روحت أستناه وأنا مش عارفة أنا عايزاه ليه؟ أيوة هقوله إيه يعني، أنا حتى مش عارفة أنا
روحت أشوفه ليه، بس أنا عايزة أشوفه حتى لو هتكلم معاه في أي كلام وخلاص!
_ أنتي ايه خلاكي تتكلمي مع حد من صحابي؟
_ طب وأنا هعرف ازاي أنت فين!
_ نعم ومبعتيش رسالة ع الموبايل ليه؟
_ بعت وأهو لحد دلوقتي أنت مشوفتش حاجة..
شد الكرسي وقعد _ كنتي عايزاني في حاجة!
_ لأ، قصدي آه
_ والموضوع دا ميتأجلش لحد ما نروح البيت
_ وهو أنت هتوافق تقعد تكلمني أوي يعني يا ياسين.. هنا أفضل علشان مش هتقدر تمشي وتسبيني.
_ أمشي وأسيبك! إلا صحيح مش المفروض كان عندك محاضرة دلوقتي انتي مش فيها ليه؟
_ماهي عديت
_ والله وعديتي محاضرتك ليه يا هانم، مش هي دي الكلية اللي كنتي هتموتي عليها..
_ خلاص بقى يا ياسين هي مكنتش مهمة أصلا، أنا كنت متضايقة وعايزة اتكلم معاك..
_ متضايقة من إيه؟ ولا أنا بسأل ليه، أكيد ع العريس صح، طب ياستي لو عاجبك
وموافقة أنا موافق عادي، هه هو أنا اللي هتجوزه يعني..
_ موضوع العريس دا مش فارق معايا، قد ما علاقتنا فارقة معايا.. ياسين أنا مفيش أى
حاجة في حياتي غيرك أنت، حرام نكون ناقر ونقير كدا طول
حياتنا، خلينا نبقى متصالحين مع نفسنا شوية، نحاول ندي نفسنا فرصة نبقى صحاب..
تعرف أني بخاف أحكيلك
حاجة وأي مشكلة بقع فيها أنت لو معرفتهاش لوحدك أنا بخاف أجيلك و أحكيلك عليها.. ياسين أنا نفسي نقرب لبعض زي
ما الناس كلها شايفين وبتحسدنا ع كدا وفاكرين أننا متفاهمين..
_ أنتي عارفة كويس يا ياقوت إني أكتر واحد بيخاف عليكي فـ متخافيش من أي حاجة
وأنا موجود، وموجودلك في أي وقت وجنبك في أي حاجة من قبل حتى ما تحصلك..
_ يعني هنروح ونيجي مع بعض زي كل يوم؟
ضحك _ مين قال إن محصلش كدا، أنا ببقى قاعد وراكي في العربية ولا أنتى هنا، وببقي
هموت من الضحك وأنتي بتسوقي وأنتي بتركني وببقي ماسك نفسي بالعافية..
_ بتهزر، ياربيي إيه دا أنت ليه قولتلي كدا هخليني أقعد أفكر عملت إيه وقولت إيه وكلمت مين وأنا في العربية..
_ أنا عارف عنك اللي أنتي متعرفيهوش عن نفسك يا ياقوت مش محتاج أسمع كلامك ولا أعرف كلمتي مين ولا قولتي إيه، أنا واثق في كل تصرفاتك..
مديت ايدى _ يعني صافي يا لبن..
ابتسم ومسك ايدي وطبقها وخبط ايديه فيها _ حليب ياقشطة.
طول عمري بخاف من الحب، وسيرة الحب وظلم الحب لكل أصحابه، وأعرف حكايات مليانة آهات، ودموع وأنين
والعاشقين دابوا ما تابوا
طول عمري بقول لا أنا قد الشوق وليالي الشوق، ولا قلبي قد عذابه..
وقابلتك انت لقيتك بتغير كل حياتي، ما عرفش إزاي حبيتك، ما عرفش إزاي ياحياتي
من همسة حب لقيتني بحب وأدوب فى الحب وصبح وليل علي بابه.
_ الله الله..
_ياربي ياماما فصلتيني من اللحظة
_ فصلتك من اللحظة! وسرحانة وكمان بتسمعي أغاني حب، وأم كلثوم كمان، لااا دا أنتي محتاجة أبوكي يجي يظبطك دلوقتي..
_ بابا إيه بس يا ماما حرام عليكي،