رواية ياقوت الجزء الثانى
الفصل الاخير
دخلت علشان ألبس وأنا بفكر حاجات إيه اللي هشتريها، أنا مش عايزة حاجة ولا في
بالي حاجة أجيبها! طب أقوله إيه دلوقتي! أنا من الأساس عايزة أروح ليه، بس لأ مش
هسيب مني تستفرد بيه لوحدها ولسه أمها كانت بتشكر فيه أهو أكيد أي واحدة تتمنى تاخده لـ بنتها.
_ يلا يا ياقوت ياسين نزل
_ حاضر يا ماما أنا جيت أهو..
_ هي ياقوت رايحة معاهم ولا إيه يا طنط!
_ لا ياحبيبي دي عايزة تشتري حاجات خدها معاك في طريقك.
منى اتكلمت _ هو ياسين بيجي معاكي وأنتي بتشتري كل حاجاتك.!!
قربت منه ومسكت إيده _ طبعا هو أنا أعرف أعمل حاجة من غيره.
أفتكر أنه اتصدم من رد فعلي أو استغرب مش عارفة بس متكلمش، طول الطريق لما
مني كانت تسأله ع حاجة كنت برد عليها أنا من غير ما أديله فرصة للرد، كان بيبصلي من
مراية العربية ويبتسم، بس إيه دا هو ابتسامته غريبة كدا ليه، هو عايز يخطف قلبي
أكتر ماهو مخطوفله ولا إيه!
_ إيه بقى!
_ إيه؟
_ هنروح فين
_ أطلع ع أول مكان بيبع آيس كريم
_ نعم!
_ إيه نفسي فيه
_ عيوني حاضر..
آااه يا عيونك ياني
_ مني عايزة تدخل رياضة علشان أنت تشرحلها
_ مفيش مشكلة عادي
_ والله وكليتك..
_ ما أنتي عارفة إني مظبط وقتي وبعدين مني بنت ذكية ومش هتعطلني يعني..
_ طب أنا عايزاك تشرحلي.
_ إيه اللي أنتى مش فهماه
_ بعدين بقى
_ تمام، وبعدين إيه اللي أنتي عملتيه دا
_ عملت إيه نفسي في الأيس كريم واتكسفت أقول كدا..
_ لأ مش قصدي، اقصد يعني لما مسكتي ايدي وقولتي أنك متعرفيش تعملي حاجة من غيري..
_ هو احنا كدا بتخانق!
_ لا أبدا بنتكلم عادي، دا أنا لسه هسألك ع كلامي اللي كنتي بتقاطعيه و تردي بدالي ع بنت خالتك..
_ هو مش أنا وأنت واحد عادي لما أرد مكانك مفيهاش حاجة يعني..
_ والله !!
_ اه والله
_ طب خليكي هنا هنزل أجيب الآيس كريم..
_ياسين
لفلي _ نعم
_هاتلي الآيس كريم بالفانيليا..
_ بس أنتي مش بتحبي اللي بـ الفانيليا!
_ حبيته.
ياللي كان طيفك على بالي وأنا بتمناه مش هتصدق إيه كان حالي قبل ما ألقاه كنت بحسد كل فرحة أشوفها بين قلبين كنت أغير من أي نسمة حلوة بين حبيبين، ولما صحيت على حبك وشفت الدنيا من عندك اتمنى لو كل العشاق بيحبوا زي أنا ما بحبك.
_ خدي ياستي الآيس كريم اللي بالفانيليا..
_ شكرا
_ أنتي بتحبي الأغانى القديمة!
_ جدا
_ وأنا كمان
_ بس أنا عمري ما شوفتك بتسمع أغاني..
_ ما طبيعي متشوفنيش لأني بسمع في الخباثة كدا بليل..
ضحكت _ الخباثة!!
_ أهو شوفتي هنبدأها تريقة وضحك مش هقولك حاجة تاني عني..
_ طب أنا معرفش حاجة عنك.. أنت بقى عارف كل حاجة إزاي معرفتش إني بحب الأغاني القديمة لوحدك..
_ ما أنا بحبها علشان أنتي بتحبيها.
وقتها شغل العربية وطلع وأنا بصيت للشباك وابتسمت، عارفة أنه بصلي وقتها علشان كدا حسيت بـشبح ابتسامته لما شاف وشي اللي احمر، أكيد بردو استغرب هو أنا ليه مردتش! إلا صحيح هو أنا ليه مردتش!! "
_ صباح الخير يا ست البنات.
_رجعنا للتريقة تاني!
_ لا والله أبدا، أنتي ست البنات كلهم بالنسبة لي .. جهزتي؟
_ اه خلصت هجيب حاجتي وجاية وادخل بقى سلم ع عمك علشان هينادي حالا دلوقتي..
_ ايه ياولاد بتتوشوشوا في إيه
_ أهو مش قولتلك
دخل _ لا ياعمي ولا حاجة بشوف يعني ايه النشاط اللي هي فيه دا وكمان جهزت قبلي
_ اه ياسيدي صاحية بدري ومبسوطة وبتغني ومودها رايق، متعرفش من إيه؟
_ هتلاقي علشان حبت الآيس كريم اللي بالفانيليا بس
_ يعني إيه وايه دخله في اللي هي فيه..
بصلي وابتسم _ هي عارفة، مش يلا ولا إيه؟
_ يلاا..
_ ربنا يهديكم دايما لبعض يا ولاد..
كنت أول مرة أحس ب الدعوة الحلوة دي، أنا قلبى دق لـ مجرد الدعوة دي، وبقي نفسي زي ما ربنا هدانا لـ بعض، ربنا يجمعنا مع بعض أول ما فكرت في الكلمة دي اترددت في دماغي، قلبي دق ولقتني ببصله وأنا وشي أحمر، معقول!! أنا بدعي أننا نكون لـ بعض، بعد كل السنين دي واحنا مع بعض ولسه جاية أخد بالي منه! بس .. بس هو ازاي هياخد باله مني وهو أكيد بمعاملته دي شايفني أخته.
_ بقولك إيه يا ياسين
_ معاكي
_ هو أنت يعني، مش... اييه، أقصد يعني مش معجب بـ حد ولا بتحب حد كدا ولا كدا؟
بصلي _ حد مين يعني؟
_ حد بنت يعني..
ضحك _ هو أكيد لازم تكون بنت امال هحب ولد، بس ازاي تسألي السؤال دا وأنتي عارفة إني تقريبا أكتر واحد في الدنيا أطيق العما ولا أطيق البنات..
_ إيه دا يعني مبتحبنيش..
بصلي بحب _ أنتي حاجة تانية يا ياقوت..
_ يعني بتحبني..
مسك أيدي _ أكتر من أي حاجة في الدنيا..
في لحظة ساب ايدي واعتذر وشغل العربية وطلع، طول الطريق ساكت ومنطقش بـ كلمة، هو حصل إيه ما إحنا كنا كويسين، ضيع عليا اللحظة، مع ذلك كنت مبسوطة، هو اتعرفلي بـ طريقة غير مباشرة، يعني كدا ياسين بيحبني، لا لا بجد!! ياسين بيحبني! بصيتله وهمست "بحبك".
_ خلي بالك ع نفسك
_ وأنت كمان خلي بالك من نفسك
_ هتخلصي الساعة كام النهاردة!
_ نسيت ولا إيه؟
_ ها لأ خلاص تمام، لما تخلصي استنيني في الكافتيريا متروحيش هنا ولا هنا..
_ حاضر..
_ ياقوت!
لفيت _ نعم
_ وأنا كمان.
مشيت وأنا حاسة إني متكهربة أو حد ضاربني ع دماغي، إيه دا يعني سمعني وبيقولي وأنا كمان!!! وشي أحمر وحسيت بـ سخونة فيه، إيه الإحساس المتلغبط دا !! أنا حاسة إني مش شايفة حد قدامي، وفي دنيا غير الدنيا مش سامعة غير صوته! صوته هو وبس!!
_ طب والله فيكي حاجة مش طبيعية، هو أنا يعني هخفى عنك.
_ بس علشان أنا بحب جديد بقى ومحتاجة جو من الهدوء والسكينة
_ إيه بتحبي إيه ياختي
_ جديد..
_ جديد ايه ع دماغك، وازاي أنا معرفش
_ ما أنا لسه بقولك أهو
_ وبتحبي ليه أصلا قبل ما متستشاريني
_ ما تيجي تحبي مكاني أحسن
_ إيه دا، سوري انفعلت شوية.. ها مين المحروس؟
_ ياسين
ضحكت _ ما تقولي يابنتي بتحبي مين.
_ أنا مبهزرش ع فكرة أنا بحب ياسين..
_ ياسين مين
_ ياسين ابن عمي
_ لأ بتهزري ياسين بتاعنا
_ لأ دا بتاعي أنا لوحدي..
_ وقولتيلي بقى مالك!!
_ بحبه
_ تقصدي مين، اللي وراكي دا..
لفيت ببطء علشان ألاقيه ورايا وهو مبتسم _ مش أنا بحبك يا ياسين بردو!
_ أنا بعد كدا هخلي التليفون معايا أحسن.
اخدت منه الموبايل _ أنا نفسي أعرف بنساه ازاي دا.
_ اللي واخد عقلك
_ لأ وحياتك دا واخد قلبي..
_ احمم احمم نحن هنا.
_ احم طب يلا خلي بالك على نفسك
غمزلي _ وعلى موبايلك هاا..
يالهوي عليه وعلى جماله كان مستخبي فين كل الجمال والحلاوة دي طول السنين اللي فاتت، دا أنا عاملة زي اللي كانت نظرها ضعيف وعملت ليزك.
_ اه ياختي اتنحنحي، اتنحنحي حبيتيه في يوم وليلة!
_ أيوة أوي..
_ يا شللي
_ مشوفتيش ابتسامته طب سيبك نظرته طب بلاش، غمزته دي وقعت قلبي من تاني والله..
_ أنا مشوفتش كل دا أنتي اللي شوفتي، أنا عمري ما شوفته بيضحك أساسا غير دلوقتي.
_ فكرتيني، تعالي هنا بقى بتسلميني له تسليم أهالي.
ضحكت _ بس والله كان شكلك مسخرة وأنتي بتقوليله أنك بتحبيه ولا وهو فطسان من الضحك وراكي..
_ خلاص بقى اسكتي، مش عايزة أفتكر سيبيني أعيش اللحظة..
روحنا البيت اليوم دا وإحنا بنتكلم بطريقة مختلفة تماما، كان بيمشي صوابعه لحد ما توصل لـ أيدي ولما يلمسها يبصلي ويبتسم ويحرك شفايفه بحروف ب ح ب ك .. أنا حاسة أني بحلم أنا عايزة حد يقرصني! إيه دا هو أنا ممكن أكون بحلم! "
_ أنا جاي لـ عمي بليل أشرب معاه الشاي
_ إيه دا بس أنت مش بتحب الشاي
_ بقيت بعشقه.
ابتسمت _ قد إيه؟
_ ممم قد ما بقيتي تحبي الآيس كريم بالفانيليا!
_ دا أنت بقيت تحبه أوي بقى
_ وكنت بحبه بس مكنتش عايز أشربه غير لما أتأكد أنه بيحبني..
_ مين دا؟
_ الشاي
_ يولا.
مش نظرة وابتسامة .. مش كلمة والسلامة، دي حاجات كتيرة ياما .. لو ناوي تحبني، إيه يعني قلبك حنين؟
إيه يعني رمشك يجنن؟
لو حلو أنا بردوه حلوة .. وتجيني واقول يحنن، لا هخاف ولا انحني.
_ عمي أنا جاي أطلب منك أيد الآنسة ياقوت.
_ أيد إيه وآنسة إيه وإيه البدلة اللي أنت لابساها دي..
_ أقصد يعني أنا عايز أتجوز ياقوت
_ هو دا الموضوع المهم اللي عايزني فيه!
_ أيوة
_ يابني دي مكتوبة ع اسمك من وأنتم في اللفة أنت بتقول إيه بس!
_ إيه!
_ أبوك الله يرحمه خاطبها ليك من زمان وقارين فاتحة ع الكلام دا بس وعدته إني مقولش الكلام دا لحد علشان لو حد فيكم حب حد تاني، وبعدين أنا سيبت أمورها كلها ع كتافك علشان تاخد ع أنك مسؤول منها، مش علشان أنا خايف عليها..
_ طب إيه مش هنقرأ الفاتحة..
ضحك _ قولتلك قريتها مع أبوك بس يلا تاني علشانك أنت وهي..
بصلي بنظرة مليانة بكل الحب اللي في الدنيا، ورفع ايده علشان يقرأ الفاتحة، كنت بقولها وأنا بصاله وكأني أول مرة أقرأها في حياتي، أنا مش عارفة أنا إزاي وقعت فيه كدا بس هو لحقني.
_ كنت عايز أطلب منك طلب يا عمي
_ إيه يابني أنت مش لسه طالب بنتي طلب إيه تاني أنت داخل ع طمع من أولها..
ضحك_ بصراحة آه، الطلب الأول كان بتاع بابا لكن المرة دي طلبي. انا عايز اكتب الكتاب بعد امتحاناتنا علطول..
_ طب كدا تحرق المفاجأة بتاعتكم، ع خيرة الله يابني.
مش عايزة حب كلام وسهر وحنين ودموع وآهات، ولاعايزة قلب يبيع حواديت وكلام وبتاع حكايات، وأسمع من ناس ملامة
مش نظرة وابتسامة .. مش كلمة والسلامة
دي حاجات كتيرة ياما .. لو ناوي تحبني
أنا قلبي أصله جرئ وبرئ وصريح دايما على طول، إن حب يعشق عشقه حريق لا هو عاقل ولا معقول، أنا عشقي له علامة.
_ بحبك يا ملكة زمانك.
_ دا أنا اللي واقعة في حبك يا سلطان عصرك.
ابتسم _ بقيتي مراتي على سنة الله ورسوله يا برنسيسة.
_ هنعيش في تبات ونبات ونخلف ولاد وبنات يا برنس..
_ بنت!!
ضحكت _ بنت بنت أنا بحب البنات.
تمت بحمد الله