رواية جراح الحب
الحلقة الحادية عشر والثانية عشر
بقلم شيمو الخطيب
الحلقه ١١
من رواية جراح القلب
مؤمن قاعد هو ومي في المستشفى منتظرين اي خبر يطمنهم على والدتها خرجت الممرضه وقالت لو سمحتو يا جماعه قعدتكو كده ما تنفعش المريضه في العنايه وممنوع عنها الزياره يعني القاعده مالهاش لازمه
مي... انا استحاله امشي واسيب ماما ابدا
مؤمن... اهدى يا مي فعلا الممرضه عندها حق قعدتنا ملهاش لازمه خالص
مي.. مؤمن لو محتاج انك تمشي ما فيش اي مشكله انت تقدر تمشي لكن انا لا
مؤمن... انا عمري ما هامشي واسيبك ابدا بس انا رايي انك بتتعبي نفسك وخلاص بالقعده هنا
الممرضه.... يا استاذ ممنوع القعده هنا يعني كده كده لازم هتمشي والا هتقعد في الاستقبال تحت وانا بنصحك تروحي افضل ولو في اي جديد هنبلغك حضرتك هتنزلي الاستقبال تسيبي رقم تليفون نكلمك عليه
مؤمن.. شفتي يا مي كده كده مش هتعرفي تقعدي هنا يبقى يلا بينا افضل
مي... انا مش هاقدر اقعد في الشقه من غير ماما يا مؤمن صدقني مش هاقدر
مؤمن.. ما تقلقيش انا مش هاسيبك تقعدي لوحدك لاني مش هابقى مطمن عليكي انتي هتيجي معايا
مي بدهشه... اجي معاك فين يا مؤمن
مؤمن.. ايه يا بت انتي تنحتي ليه كده متخافيش مش هخطفك
مي.. لا بجد انت تقصد ايه باني اجي معاك
مؤمن.. يا بنتي هتيجي تقعدي مع هنا وناديه هتقعدي معاهم اليومين دول وهم اثنين ستات يعني مش هتتحرجي منهم
مي.. لا طبعا مش ممكن وهروح للناس في الوقت ده اقولهم معلش استضفوني عندكم يومين لا مش ممكن طبعا
مؤمن... يا بنتي ما فيش حل غير كده لانك ما ينفعش تقعدي في شقتكم لوحدك وانا هابقى قلقان عليكي لكن عندهم هتبقى في امان و هنبقى كلنا جنبك
مي.. بس انا مكسوفه قوي انا ما اعرفهمش ازاي هروح وابات عندهم كمان
مؤمن.. صدقيني هتحبيهم جدا وتحسى انك تعرفيهم من زمان خصوصا دودي حبيبه قلبي
مي كشرت.. ودودي دي مين دي كمان
مؤمن ضحك.. دي ناديه والده هنا
مي... طيب،،،. ،،،، والله ما انا عارفه اقول ايه
مؤمن... ما تقوليش حاجه هنروح على شقتكم دلوقتي هاتي كل اللى تحتاجيه من هناك وهنطلع على ناديه على طول والصبح ان شاء الله نيجي نزور والدتك ونطمن عليها
مي.. طب انت كلمت هنا
مؤمن... اعتبريني كلمتها بلاش كلام كثير بقى انا تعبت بجد
مي.. ماشي يا مؤمن..... وطلعوا فعلا على الشقه ومي دخلت حضرت كل حاجتها، ومؤمن كلم هنا، وهنا رحبت جدا وده طبعا مؤمن كان واثق منه
وصلوا عند البيت وكان بعد صلاه الفجر
مؤمن.. عم عبده ياسكره صباح الفل
يا عم عبده.. صباح الفل يا باشمهندس
مؤمن.. ايه ده لحقتو دبحتوا الكلاب وتويتوهم هههههههه
عم عبده... برده يا هندسه مصمم ان لحمتنا كلابي
مؤمن.... والله انت راجل زي الفل انا باهزر معاك يا عم عبده اوعي تاخذ على كلامي
عم عبده.. والله يا باشمهندس انت لما مبتهزرش معايا بحس ان اليوم ناقصه حاجه ربنا يسعدك يا رب
مؤمن.. تسلم يا راجل يا طيب
هنا في البلكونه و ندهت على مي عشان ما تتحرجش والكل يعرف انها جايه لهنا.. ومي طلعت على طول
عم عبده.. الا قولي يا باشمهندس مين القمر اللي معاك دي،،، وجاي متاخر ليه كده يا ابني
مؤمن.. تصدق يا عم عبده انا عرفت انا جايب الفضول ده منين ما هو انا متربي في حي تقريبا كل اللي ساكنين فيه عندهم فضول هيقتلهم
عم عبده.. والله ما فهمت منك اي حاجه يا هندسه
مؤمن... احسن برده يا عم عبده عموما انا عشان اريحك دي قريبه خالتي ناديه من البلد والدتها تعبت ونقلتها المستشفى في القاهره وخالتي بعتتني اجيبها تبات معاهم، اي استفسار ثاني يا عم عبده
عم عبده.. تصدق كده انا ارتحت اصل كنت هافضل افكر يا ترى مين دي هههههههه
مؤمن.. والله ما انا عارف شكلي اللي بنعمله في الناس هيطلع عليا سلام يا عم عبده
عم عبده بضحك... سلام يا هندسه
مي طلعت وهنا استقبلتها على السلم
هنا.. حبيبتي يا مي تعالى اتفضلي،، و بقولك ايه من اولها كده بلاش نظام الكسوف ده احنا ما عندناش الكلام ده
مي.. تسلمي يا هنا والله ما انا عارفه اشكرك ازاي
مؤمن... انتي هتشكريها هي ليه هي عملت حاجه،، يا بنتي هنا دي مهما عملتلك فده رد لحاجات كثير انا عملتها عشانها يعني تقعدي وبقلب جامد
هنا بصت لمؤمن بشرز.... مؤمن انت جبت اخرك معايا ادخل ومش عايزه اشوف وشك ثاني
احمد خرج علي صوتهم... يا بنتي انا قلتلك قبل كده اقطعي علاقتك بمؤمن ما سمعتيش كلامي اهو طلعك ما تسويش حاجه،، وكمل، نورتينا يا انسه مي يا رب يكون الواد ده ما ضايقكيش اصل انا عارفه
مي.. شكرا يا استاذ احمد وبصت لمؤمن بالعكس ده مؤمن ده طيب قوي وبجد مش عارفه من غيره كنت عملت ايه احم قصدي من غيركم طبعا
احمد.. يا ستي من غيره او من غيرنا المهم انه موجود
مي اتكسفت ونزلت وشها في الارض
هنا... ممكن بلاش الالقاب انسه، واستاذ، احنا كلنا اخوات يبقى نتعامل عادي
احمد ومي مع بعض.. احنا لينا الشرف طبعا
مؤمن..والله!!! بتحفلو عليا حضراتكم، ماشي انا مش هاتكلم لاني تعبان ونفسي انام ومش فايقلكوا دلوقتي،، ونده على مي وقال
مي اول ما تصحي الصبح ان شاء الله رني عليا عشان ننزل لمامتك نطمئن عليها
مي.. لا يا مؤمن روح انت الجامعه وانا هانزل انا
مؤمن.. ملكيش دعوه بالجامعه علاء هيروح ويضبط الدنيا هناك،، مي يا ريت ما تعمليش حاجه الا لما تقوليلي ممكن
مي بحب. ممكن طبعا يا مؤمن وبصو لبعض وعينيهم اتعلقت ببعض
احمد مسك مؤمن من تيشيرته من ورا ورفعه زي المخبرين وقاله... مش يلا بقى عشان مي ترتاح شويه ولا هتبات على السلم
مؤمن بص لهنا ومي بقله حيله وهما ضحكوا على شكله
وكله دخل على بيته،، ناديه خلصت صلاه
ناديه.... اتفضلي يا حبيبتي نورتينا (طبعا هنا حكت لمامتها كل حاجه)
مي.. تسلمي يا طنط اسفه على الازعاج
ناديه.. متقوليش كده يا حبيبتي انتي زي هنا بالضبط وبعدين بلاش طنط خليها خالتي زي الواد مؤمن ما بيقول
مي.. ولا نقول لك يا دودي احسن
ناديه ضحكت قوي.. هو الواد ده قالك ما لوش حل والله
هنا.. تعالي يا مي خدي دش وغيري وارتاحي شويه
ناديه.. انا محضره الاكل تاكلوا وتناموا يا حبايبي
مي... لا يا خالتي معلش معدتي بتتعبي من الاكل بالليل
ناديه.. خلاص يا حبيبتي اشربي كوبايه لبن انتي وهنا ونامو على طول،، وفعلا دخلوا وبدات مي تاخذ على الجو الجديد وتعلقت بيهم جدا وحست فعلا كانها متربيه معاهم من صغرها واتكلمت هي وهنا كثير لحد مغلبهم النوم
*****************
احمد صح الصبح لبس بدلته وجرى لانه طبعا مش عايز يتاخر في اول يوم شغل
احمد دخل على السكرتيره
احمد... السلام عليكم
زينه... وعليكم السلام استاذ احمد مصطفى بيه في انتظار حضرتك
وفعلا احمد دخل لمصطفى بيه
مصطفى... اهلا بحضرة المدير
احمد... اهلا بحضرتك يا فندم
مصطفى... بص يا احمد انا هابعت معاك عم سيد وده يا سيدي عامل البوفيه هنا هو هيعرفك مكتبك فين واللي تحتاجه بلغني بيه
احمد... ان شاء الله يا فندم،، وفعلا راح احمد مع عم سيد اللي من كلامه مع احمد ارتاح لتواضعه وطريقته معاه
عم سيد... اتفضل يا استاذ احمد ده مكتبك ولو احتجت اي حاجه قولي على طول هتلاقيني في خدمتك
احمد.. تسلم يا راجل يا طيب
احمد دخل وقاعد على مكتبه فرحان باللي هو فيه والمنصب الجديد وحاسس ان الدنيا مش سيعاه دخل عليه الاستاذ حسن وده محاسب قديم
حسن.. اهلا وسهلا استاذ احمد الف مبروك يا فندم
احمد.. اهلا بحضرتك الله يبارك فيك
حسن.. انا حسن محاسب هنا في الشركه من زمان وشايل اغلب شغل الشركه
احمد .. اهلا بك يا استاذ حسن اتفضل
حسن... انا كنت جاي ابارك لحضرتك يا استاذ واتعرف على مديري الجديد
احمد بعدم ارتياح.. انا تشرفت بيك يا استاذ حسن
وطبعا كثير من الموظفين باركوا لاحمد وهو رحب بيهم جدا
احمد طلب حسن يجيله على المكتب
احمد... اتفضل يا استاذ حسن
حسن... خير يا فندم
احمد... كنت عايز افهم منك نظام الشركه ومعلش هتقل عليك وهحتاجك تساعدني الفتره الجايه
حسن.. انا تحت امرك يا فندم في اللي تحتاجه
احمد... تمام قوي كنت محتاج منك ملفات حسابات الشركه من فتره كبيره عشان اعرف الشركه ماشيه ازاي وبعدين اي حد يقدم لوظيفه محاسب لازم تبلغني و تحدد معاه ميعاد لمقابلتي وما فيش اي ورقه ولا جنيه يخرج من الشركه الابعلمي
حسن بضيق.. بس يا فندم في حاجات بسيطه ممكن احنا كمحاسبين نخلصها وما تحتاجش لحضرتك
احمد.. لا انا مش عايز ده يحصل انا لازم اعرف كل كبيره وصغيره في الشركه ومش عايز ازعل من حد هنا ولا حد يزعل مني اظن فاهمني يا استاذ حسن
حسن.. فاهمك يا فندم تحت امرك
احمد.. اتفضل اعمل اللي طلبته منك،، قبل حسن ما يخرج كانت ندى داخله لاحمد
ندى... مبروك يا احمد حبيت اجي و اكون اول واحده اباركلك على المنصب الجديد
احمد... اهلا يا ندى اتفضلي، اتفضل حضرتك يا استاذ حسن اعمل اللي قلتلك عليه
حسن.. تمام يا فندم عن اذن حضرتك وبص لندي بصه اعجاب
احمد... الله يبارك فيكي يا ندى ايه المفاجاه الجميله دي
ندى.. مكتبك حلوه قوي يا احمد والشركه فعلا كبيره ربنا يوفقك يا رب على كده بقى هتاخذ مرتب عالي
احمد... ما فكرتش في مرتب المهم عندي اثبت نفسي في الشغل وده هيجبر صاحب الشركه على تقديري وكله بيعتمد على الاجتهاد والاخلاص والضمير يا ندى
ندى... يعني انت ما تعرفش هتاخذ كام ولا مش حابب تقولي
احمد.... لا ما اعرفش يا ندى
ندى... طيب انت هتخلص شغل امتى
احمد.. انا لسه في اول يوم، ربنا بس يقدرني على المهمه الصعبه دي
ندى.. ان شاء الله، انت قدها يا احمد اوك انا هامشي واكلمك لما تخلص
احمد.. هتروحي فين دلوقتي
ندى.. الجامعه ان شاء الله
احمد.. اوك يا ندى مع السلامه وطمنيني عليكي لما توصلي
ندى.. حاضر يا حبيبي سلااااام
*****************
هنا صحيت من النوم وكانت مي نايمه مش حاسه باي حاجه حولها لانها بقلها فتره صاحيه مع مامتها عشان تراعيها
هنا قامت بالراحه من جنبها وصبحت على مامتها
ناديه.. صباح الفل يا حبيبتي هي مي لسه نايمه
هنا.. اه يا ماما نايمه وصعبانه عليا اصحيها بصراحه
ناديه... يا حبيبتي،، سيبيها شكلها ما كانتش بتنام يا قلبي ربنا يشفيلها والدتها يا رب
هنا. يارب يا ماما،، انا هلبس واروح المستشفى اطمن على مامت مي وبعدين اروح الجامعه
ناديه.. ربنا يجازيكي كل خير يا حبيبتي
هنا لبست ونزلت وقابلت مؤمن على السلم
مؤمن.. هنا هي مي لسه نايمه ولا ايه
هنا.. اه يا مؤمن ومرضيتش اصحيها بصراحه
مؤمن.. طيب انتي نازله الجامعه بدري ليه
هنا... لا انا هاروح المستشفى لمامت مي وبعدين اروح الجامعه
مؤمن... والله يا هنا ما انا عارف اقولك ايه انتي وخالتي ربنا ما يحرمني منكم ابدا
هنا... ما تقولش حاجه مش انت جمايلك مغرقاني لو قعدت اسد فيها مش هوفيك حقك، خلاص يا عم سيبني اسد اللي عليا
مؤمن ضحك.. ده انتي قلبك اسود قوي، ضحكوا الاثنين ونزلوا على المستشفى
مؤمن دخل وسأل الممرضه وقالتله ان الحاله بدات تستقر
مؤمن.. طيب ممكن نشوفها
الممرضه.. لو ممكن تبقي الانسه هي اللي هتدخل لانها سالت عليها كثير مش حضرتك انسه مي
هنا.. لا انا صاحبتها مي شويه و هتيجي على طول
مؤمن.. احنا هندخل 10 دقايق وهنخرج على طول
الممرضه... يا استاذ حضرتك عارف انها عنايه مركزه يعني ممنوع الزياره لكن لو عشر دقايق يبقى تمام لكن ما تزودش عن كده
هنا.. . لا ان شاء الله مش هنتاخر
دخلت هنا ومؤمن وكانت مامت مي صاحيه ونوعا ما الحاله مستقره
هنا... ازيك يا طنط الف سلامه عليكي يا حبيبتي
عايده والدة مي.. الله يسلمك يا حبيبتي وبصت باستغراب انتو مين يا حبايبي
مؤمن.. اولا حمدلله على السلامه يا ست الكل،، ثانيا احنا اصحاب مي في الجامعه
عايده بخوف... وهي مي فين حصلها حاجه
هنا... لا يا حبيبتي اطمني مي في البيت عندي بس نايمه و بصراحه صعبت علىا اصحيها شكلها مرهق قوي،، هي هتصحى وتجيلك على طول
عايده.. هي راحت عندك ليه يا بنتي
مؤمن.. بصراحه يا خالتي،، وطبعا لو تسمحيلي اني اقول لك يا خالتي،، انا ما رضيتش انها تروح تقعد في الشقه لوحدها فقلت تبات مع هنا وما تقلقيش هنا ووالدتها عايشين لوحدهم يعني ستات في بعض
عايده.. ربنا يجازيكم خير يا ابني طيب انا مين اللي جابني هنا
مؤمن.... انا واخويا ومي وهنا، وممكن ما تتعبيش نفسك في الكلام عشان ما يأثرش عليكي
عايده... هو انت مؤمن
مؤمن بدهشه... ايوه انا عرفتي منين،،، اكيد مي هي فضحاني كده على طول
عايده... لا والله مي بتقول عنك كل خير
هنا.. وهو ده يا خالتي يجي من وراه خير ابدا وضحكوا كلهم
تليفون مؤمن رن وكانت مي....
مؤمن... ايوه يا مي صحيتي اخيرا
مي... مؤمن،، انتو ازاي تمشوا من غيري انتو فين دلوقتي
مؤمن خلي عايده تكلم مي،، والممرضه بتستعجلهم،،،
عايده.... حبيبتي يا بنتي اسفه اني تعبتك معايا
مي بفرحه ودموع.... ماما حبيبتي الف حمد لله على سلامتك انا كلي فداكي يا امي ربنا ما يحرمني منك ابدا
عايده... مؤمن وهنا موجودين ربنا يجازيهم كل خير
مي.. دول اغلى من الاخوات يا ماما انتي متعرفيش عملوا معايا ايه ولا خالتي ناديه هي عايزه تكلمك
ناديه... حمد لله على سلامتك يا ام مي ربنا يقومك بالف سلامه
عايده... تسلمي يا ام هنا ربنا يبارك لك فيها يا رب
الممرضه... يا استاذ والله كده ما ينفعش الدكتور لو جهه هيقطع عيشي من فضلك كفايه كده
مؤمن وهنا فعلا مشيوا بعد ما اطمنوا على عايده وكل واحد راح على جامعته،، ومي فضلت في البيت وقررت تنزل على ميعاد زياره بالليل لان دي كانت رغبه مؤمن
هنا راحت سلمت على ولاء وسلمى وفرحوا جدا لولاء لان خطوبتها كانت بعد شهر على ابن خالها..
هنا اتصلت بمؤمن لانها عايزه تروح الشركه تبارك لاحمد وهي بتتكلم شافت فارس مع ندي في الجامعه قاعدين مع بعض وبيهزروا
مؤمن.. سكتي ليه يا بنتي مالك
هنا.. لا ما فيش حاجه يا مؤمن اصل شفت ندى وفارس هنا في الجامعه
مؤمن.. وايه المشكله،، وسكت،، بس غريبه فارس رايح الجامعه ليه
هنا... والله ما عارفه ومش اول مره يجي،، عموما مش موضوعنا انت هتيجي معايا نبارك لاحمد ولا ايه
مؤمن.. تمام انا هاجي انا وعلاء نعدي عليكي ونروح مع بعض
هنا... ماشي يا مؤمن مستنياك
مؤمن وعلاء فعلا عدو على هنا و اخدوها وراحو الشركه وانبهروا بحجمها وفرحوا جدا لاحمد
مؤمن.. اطلعي انتي يا هنا واحنا شويه و هنحصلك (طبعا مؤمن حابب ان هنا تبارك لاحمد لوحدهم)
هنا... تمام يا مؤمن
هنا طلعت وكان احمد قاعد في مكتبه وكان معاه حسن
هنا.. السلام عليكم مبروك يا حضره المدير
احمد.. هنا الله يبارك فيكي تعالي ادخلي
حسن لاحظ فرق المقابله بين ندى وهنا وقال اكيد هنا خطيبته او حد غالي عنده
هنا دخلت وقعدت وحسن استاذن ومشي
احمد.. ها يا قمر تشربي ايه
هنا.. لا ولا حاجه كنت جايه اباركلك بس،، هنا عايزه تقول لاحمد على ندى لكن متردده يفهم غلط وقررت انها تقوله عشان هي كتير شافتهم مع بعض في الجامعه، وكمان احمد مش هيفهم غلط لانه بيعتبرها اخته
هنا.... احمد كنت عايزه اقولك حاجه بس ياريت ما تضايقش
احمد.. خير. يا هنا قلقتيني
هنا... احمد انا شفت ندى النهارده في الجامعه وكان معها فارس
احمد... فارس!!! وفارس هيروح لندى الجامعه ليه
هنا... معرفش والله بس انا بشوفه معاها كتير في الجامعه انا حبيت بس اقولك
احمد... بص من الشباك وضهره لهنا،، وفي اللحظه دي هنا حست انها غلطت جدا ما كانش المفروض تقوله وتشككه في صاحبه وخطيبته لكن هي مش بترتاح ليهم ولا لتصرفاتهم خالص
هنا... احمد انت عارف انك اخويا وانا خايفه....... قاطعها احمد
احمد... بس انا مش اخوكي يا هنا......
_______________
الحلقه ١٢
من رواية جراح القلب
مؤمن وعلاء قاعدين على كافتيريا وعلاء مستغرب ليه مؤمن مطلعش مع هنا يبارك لاحمد
علاء..... ايه يا ابني انت جايبني تقعدني على كافتيريا مش هنطلع لاخوك ولا ايه
مؤمن... انت تطول تقعد معايا يا واد انت،، انت لك الشرف اصلا بقعدتك دي
علاء..... لا اله الا الله منا بتنيل اقعد معاك كل يوم ايه اللي جد ولا في اي شرف حصلي يعني
مؤمن. تصدق انت عيل فصيل على راي اخويا احمد اتنيل اقعد هنشرب كوبايتين شاي ونطلع على طول
علاء... اللهم طولك يا روح انا مش عارف والله انا ايه اللي مصبرني على رخامتك دي
مؤمن... عشان انا محدش يقدر يستغنى عني يا خفيف ههههههههه
عنداحمد( فلاش باك)
احمد سمع هنا وهي بتعترف بحبها ليه وبتتكلم مع مؤمن في المطبخ
هنا.. تحب اقولك يا مؤمن انا ليه بقيت عامله في نفسي كده عشان للاسف بحب اخوك وهو مش حاسس بيا، بحبه من وانا صغيره حبه كبر معايا لحظه بلحظه لدرجه ان ربي جذور للاسف مش قادره اشيلها و بتسالني عامله في نفسك ليه كده منتظر مني اعمل ايه وانا حب عمري بيضيع مني شايفاه مع واحده ثانيه وساكته، والمشكله انه بيعشقها تقدر تقولي اعمل ايه يا مؤمن
مؤمن.. رغم انه عارف انها بتحبه لكنه اتصدم من كمية الحب ده وقال.... هنا انا لسه بقولك انك لازم تواجهي وتبقى قويه
كل الكلام ده طبعا احمد سامعه وسمع كل الحوار اللي دار بين هنا ومؤمن لكن للاسف كان واقف مصدوم جدا مش عارف يقرر ولا يتصرف ازاي في الموقف ده، لكن فكر شويه وقرر انه هو لازم ميعرفش هنا ولا مؤمن ان هو عارف ولا انه سمع حاجه زي دي وده طبعا عشان علاقته بهنا كاخت تستمر لانه لو فهمها ان هو عارف انها بتحبه علاقتهم طبعا هيبقى فيها توتر شديد جدا لكن مع الوقت احمد كان بيستغرب مشاعره ناحية هنا، في نفس الوقت مش قادر يحدد هل هو فعلا بيحب ندى بجد ولا الامور ممكن تتغير،، وده اللي هنعرفه بعدين
ونرجع للوقت الحالي احمد في المكتب
هنا... احمد انت عارف اني بعتبرك اخويا، بجد انا خايفه......
قاطعها احمد ولف وشه ليها وخبط باديه على المكتب وقال بس انا مش اخوكي يا هنا ولا انتي بتعتبريني كده اظن كفايه كده قوي
هنا بصدمه وقلبها كان هيقف... يعني ايه مش اخويا يا احمد
احمد... يعني انا سمعت كل حاجه حكيتيها لمؤمن
هنا.... دموعها نزلت سمعت ايه بالضبط
احمد... بصي يا هنا انا عرفت انك بتحبيني لكن اللي ما كنتش متوقعه انك ممكن تبوظي علاقتي بندى بانك تشككيني في سلوكها ندى اه متحرره شويه لكن مش وحشه ولا اخلاقها وحشه
هنا.... بصدمه انت ازاي تفكر فيا كده انا عمري ما كنت كده ولا هاكون وبجد انا اسفه اني خفت عليك،، وعموما اى كلام سمعته مني لمؤمن و اي كلمه حب حكيتها عنك اتقلبت دلوقتي للنقيض، انا بجد في اللحظه دي مبكرهش في حياتي قدك كفايه انك كنت عارف اني بحبك وكنت بتعذبني بكلامك،، (ووقفت وقالت وكأن القوه اللي في العالم اتجمعت فيها في اللحظه دي).. احمد، وحياه كل دمعه نزلت مني عشانك، وحياة كل دقه قلبي دقها في حبك، وحياه كل فرحه فرحتها عشانك ما هفكر فيك ابدا انت بالنسبالي مش موجود انت بالنسبالي انتهيت يا احمد وسابته وخرجت من المكتب
احمد خبط ايده في الحيطه ومش عارف ليه قالها كده وليه وجعها بالشكل ده لكن خلاص للاسف اللي حصل حصل
************
عند فارس وندى في الجامعه
فارس... على فكره يا ندى هنا شافتنا مع بعض يعني ممكن تقول لاحمد
ندى... انت غريب قوي يا فارس طب ايه المشكله ما تقول هو احنا كنا بنعمل حاجه غلط احنا قاعدين مع بعض واظن انك مش جايلي مخصوص ولا ايه
فارس.. لا طبعا بس خايف يزعل و يعمل مشكله معاكي
ندى... لا عادي احمد عقله مش صغير قوي للدرجه دي،، باقولك ايه انا عايزه اروح دلوقتي ما تعمل حركه جدعنه و تيجي توصلني
فارس... عيوني طبعا يلا بينا
فارس وصل ندى لبيتها وكانت فايزه خارجه
فايزه.... ندى حبيبه ماما عامله ايه يا حبيبتي
ندى... الحمد لله يا ماما، اعرفك فارس زميلي وزميل احمد كمان
فايزه... ما شاء الله هي دي الناس اللي تفرح، ازيك يا حبيبي.
فارس.. الحمد لله يا طنط ربنا يخليكي يارب
فايزه.. لا طنط ايه بقى انا حتى لسه صغيره ممكن تقولي يا فايزه او فوفه لو تحب
فارس.. فعلا اللي يشوف حضرتك ما يقولش انك والدة ندى خالص ممكن يقول اختها، لأ والصغيره كمان (يا ابن النصابه يا فارس😂😂😂)
فايزه.... تصدق يا واد انا قلبي ارتاحلك اول ما شفتك، كان فين ده من زمان يا بت يا ندى
ندى.... ماما في ايه!! اهدي كده
فايزه.... ده بيفهم في الاصول مش زي خطيبك الرخم بصراحه انا مش بطيقه ولا هو ولا اهله لكن نعمل ايه بقى القلب ومايريد
فارس... احمد انسان كويس قوي على فكره هو بس جد شويه وعملي قوي
ندى.. صحيح يافارس احمد اتعين مدير حسابات في شركه كبيره شوف كده ممكن يكون عنده وظيفه ليك ولا حاجه
فارس. شركه؛!!! شركه ايه
.ندى. الشركه المتحده للمقاولات
فارس اتصدم.... نعم!!! انتي بتتكلمي بجد.. و ضحك يااااه علي الصدف ده انا مقدم فيها ولسه محدش كلمني
ندى.. حلو قوى انت ممكن تروح واحمد يتوسطلك هناك
فارس. يتوسطلي ايه يا بنتي احمد هو اللي في ايده يعيني،، لكن غريبه هو عرف ازاى، آآآآآآه اكيد هنا
ندى... هنا!!! وانت عرفت منين
فارس... انا قابلت هنا هناك وكان معاها صاحبتها وبتقول انها بنت اخو صاحب الشركه
ندى... اااااه انا كده فهمت عشان كده بقى هو بيقولي ان هنا لها فضل كبير عليه فانه يتعين في المنصب ده
فارس بخبث... اكيييد،، هنا دي شكلها بتعز احمد قوي
ندى بغيظ.. انا بتخنق من البت دي جدا لكن انا هعرفها مين هي ندى مراد
فايزه.... هي دي عربيتك يا فارس
فارس.. اه يا طنط...... قصدي يا فايزه تحبي اوصلك اي مكان
فايزه... يا ريت ياحبيبي عايزه اروح النادي عندي ميعاد مع صحباتي و هنقضي اليوم هناك
فارس... اتفضلي يا فوفه انا تحت امرك
فايزه.. ندى ما تيجي معايا يا حبيبتي غيري جو، اهو هتخرجي شويه من الحبسه اللي سي احمد حبسهالك
ندى لا يا ماما روحي انتي و احتمال اجيلك بالليل شويه
فايزه... ماشي يا حبيبتي يلا بينا يا فارس
عند ناديه في البيت مي دخلت المطبخ لناديه
مي... خالتي محتاجه مني مساعده
ناديه.. لا يا قلب خالتك انتي ارتاحي وانا قربت اخلص ما تتعبيش نفسك خالص يا حبيبتي
مي.. خالتي ما تحسسنيش اني غريبه
ناديه... انتي غريبه!!! ابدا والله ده انا حاسه اني اعرفك من زمان حاسه انك متربيه معنا،، انك بنتي زيك زي هنا بالضبط
مي.... والله نفس احساسي يا دودي هههههه
و ناديه ضحكت وقالت... ربنا يسعدك يا قلب خالتك بس تعالي هنا
مي... خير يا خالتي
ناديه.. مش غريبه ان مؤمن يحكيلك على كل حاجه عننا ويبقى خايف و مهتم بيكي قوي كده
مي اتكسفت وسكتت
ناديه.. انتي مش بتقولي اعتبرك زي هنا، طب يا ستي هنا بتحكيلي على كل حاجه، اصلي بصراحه نفسي افرح في الواد مؤمن ده،، ده مغلبنا ومش عاجبه حاجه خالص
مي.... بصي يا خالتي مؤمن ده حاله خاصه بحس وهو جنبي بالامان والحب اللي اتحرمت منهم، انا عشت مع امي لوحدنا، هي كانت ليا كل حاجه بعد وفاه والدي عوضتني عن كل عائلتي كانت ليا الاب والام، لكن مؤمن حسيت معاه احساس ثاني خالص بصراحه انا حبيت مؤمن وقلبي دق بحبه من اول مره شفته،، اسلوبه، واحترامه، وهزاره، وخفه دمه، وتدينه، كل حاجه فيه عجبتني، غير طبعا رجولته وجدعنته، في اي موقف يقابلني عمري ما احتاجه فيه وخذلني ابدا، كان دايما اول واحد جنبي، وكملت، على فكره يا خالتي مؤمن كنت بالنسباله مجرد زميله مش اكثر، لكن احساسه اتغير من اول السنه دي، وانا حسيت بكده، مؤمن جدع مع كل الناس لكن انا حسيت باهتمام زايد من ناحيتي وده علقني بيه اكثر
ناديه... يااااااااااه كل ده يا حبيبتي شكلك بتحبيه قوي
مي... قوي قوي يا خالتي كنت بقعد احكي لماما عنه كثير وكان نفسها تشوفه
ناديه... ربنا يقومها بالسلامه يا رب وتفرح بيكي يا قلب خالتك
الباب خبط ومى راحت تفتح
ام احمد... انتي بقى مي مش كده
ناديه... تعالى يا ام احمد اتفضلي
مي... حضرتك والدة مؤمن
ام احمد... اه يا ستي انا والدة مؤمن
مي.. اتفضلي يا خالتي
ام احمد... ما شاء الله زي القمر يا بنتي ربنا يحميكي يا حبيبتي
مي... تسلميلي يا خالتي يا رب
ام احمد.. والدتك عامله ايه دلوقتي
مي.. بقت احسن الحمد لله و مؤمن قالي انها ممكن تتنقل غرفه عاديه بالليل ان شاء الله ادعيلها يا خالتي
ام احمد.. ربنا يقومهالك بالسلامه يا قلبي
ناديه.. تعالى بقى اقعدي معانا واعملي حسابك هتتغدو معانا كلكم
ام احمد... لا والله انا كنت جايه اطمن عليكو وهامشي على طول
ناديه.. ايه يا ام احمد انا عملت حسابكو كلكو معانا نتغدى ونروح كلنا ان شاء الله نزور ام مي في المستشفى وما تقوليش لأ، هتتغدوا يعني هتتغدوا
مي وام احمد ضحكوا.. وقالت خلاص اللي تشوفيه
يا ناديه وقعدوا مع مي اللي حكتلهم قصه حياتها كلها من يوم ما اتولدت لحد وقتنا الحالي وكانت كل ماتيجي سيره مؤمن عينيها تلمع بحب، وده باين عليها جدا وام احمد حاست بده ودعت من قلبها تكون من نصيب مؤمن لانها ارتحتلها جدا
*********
نرجع لفارس وفايزه... فارس وصل فايزه
فايزه. ما تيجي يا فارس تدخل اعرفك علي اصحابي دول ستات هاي كلاس قوي
فارس... لا معلش يا فوفه خليها يوم ثاني اصل ورايا شغل ومضطر امشي،،، وسابها ومشي هو بيقول لنفسه
ايه الست دي،، دي مجنونه،، شكل احمد هيشوف ايام سودا على ايديها وضحك ضحكه بمكر
نرجع لهنا واحمد
هنا قالت لاحمد انه خلاص انتهى من حياتها وبقى بالنسبه لها ولا حاجه وهي خارجه
حسن.. انسه هنا استنى لو سمحت
هنا بعياط.. نعم هو حضرتك تعرفني
حسن.. انا بس كنت عايزه اسال هو حضرتك خطيبه استاذ احمد عشان نعمل الواجب معاكي، وبعدين ده شكله مزعلك قوي
هنا.. لا مش خطيبته ولا عايزه اعرفه اصلا ومن فضلك سبني في حالي
حسن... طب استني بس هتمشي ازاي وانتي بالشكل ده.. هاجيبلك كوباية ليمون يهدي اعصابك وبعدين تقدري تمشي
هنا بصوت عالي... من فضلك قلتلك سيبني في حالي انت ما بتفهمش
احمد سمع صوت هنا خرج بسرعه وقال.... هنا، حسن في ايه وايه الصوت العالي ده
هنا... انا اسفه يا استاذ احمد عن اذنك
احمد... استني بس هو حسن ضايقتك ولا حاجه
حسن.... لا يا فندم والله انا شفتها زعلانه قلت اجيب لها ليمون يهدي اعصابها
احمد... متشكرين لافضالك يا سيدي اتفضل انت دلوقتي
هنا لسه هتمشي لقيت احمد مسكها وقالها.... ممكن تيجي ونتكلم مع بعض شويه استنيني بس نصف ساعه في المكتب و هنزل معاكي على طول
هنا.. لا مش ممكن يا احمد انت متعنيش ليا اي حاجه عشان استناك او اتكلم معاك،، الكلام بينا خلص يا استاذ احمد، وقصه اختي و متربين مع بعض دي تنساها خالص،، عن اذنك
هنا مشيت وهي بتعيط وخرجت من الشركه بسرعه الصاروخ
مؤمن شافها وقام بسرعه يشوف مالها لكن هي كانت بتعدي الطريق ومش شايفه اي حاجه قدامها
وفي عربيه جايه بسرعه
مؤمن.. هنا استني يا مجنونه،، هناااا... هناااااااااا