رواية جراح الحب
الحلقة ٢٢و ٢٢ و ٢٣
بقلم شيمو الخطيب
الحلقه ٢١
من جراح القلب
احمد كلم ندى وقالها انها لازم تغير اسلوب حياتها
احمد... ندى،، يا اما تتغيري وتعيشي حياه طبيعيه، زي اي واحده وخطيبها، يا اما....
ندى.. يا اما ايه يا احمد، كمل
احمد.. بصراحه حياتنا كده انا مش حاببها، احنا مخطوبين لكن مش مع بعض، . ندى انتي عايزه اسلوب حياه غير اسلوب حياتي. وعايزاني ابقى واحد تاني غير أحمد المرشدي، وانا مقدرش ابقى كده، وللأسف حياتنا كده مش هتنفع
ندى.... انت عايز تنهي علاقتنا يا احمد، مش كده
احمد.... صدقيني ده في مصلحتك ومصلحتي،، ندى انتي عمرك محبيتيني، انتي حبيتي اهتمامي بيكي وبس، وإعجابك زاد، لما بقيت مدير حسابات وده طبعا انتي بتتباهي بيه وكل اللي يهمك المنصب والشكل العام، لكن مشاعري، واحساسي، مش من ضمن اهتماماتك، ندى انتي بجد....
ندى قاطعته... كل ده عشان هنا،، بتبعني عشانها يا احمد،،
احمد.. ندى افهميني
ندى بزعيق... أنا فاهمه يا استاذ احمد كل حاجه،، هنا لعبتها صح وللأسف اللعبه دخلت عليك، لكن وحياتك عندي، لهندمك انت وهيا، وحياتك يا احمد مهسيبك تتهني معاها لحظه، وبكره هتشوف انا هعمل ايه
وقفلت السكه في وشه
احمد... مصدوم من اللي سمعه منها، وأن هي دي البنت اللي حبها او أعجب بيها في يوم من الايام، ولام نفسه جدا انه حط نفسه في الوضع ده من الاول، لكن بعد كلامها ده، ارتاح جدا انه نهى علاقته بواحده زي دي، وحمد ربنا انه الهمه القرار. الصح
*********
عند ندى
فايزه.. مالك ياندي، بتزعقي ليه كده
مراد... مالك يابنتي في ايه
ندى.... استاذ احمد عايز ينهي علاقتنا، يابابا
مراد... وايه السبب يا حبيبتي، اكيد عملتي حاجه دايقته
فايزه... اه، انت لازم تطلعها هي اللي غلطانه، بدل متروح تهزقه هو، هو يطول ياخد واحده زي ندى بنتي، دي بنت فايزه مختاار
مراد... انتي تسكتي خالص،، ايه يعني فايزه مختار،، ولا حاجه، ست فاشله في حياتها وكل اللي يهمها المظاهر وبس، اسكتي انتي خليني افهم ايه اللي حصل
ندى.... بيقول اني مبهتمش بيه، لكن انا عارفه السبب، وحياته عندي لهندمه عليها طول عمره
فايزه.. اكيد البت اللي اسمها هنا، مش كده ياندي
ندى.. هي يا ماما، انا مبكرهش في حياتي قدها
مراد... ندى يا حبيبتي، لازم تقعدي مع نفسك وتشوفي فين الغلط، متسمعيش كلام والدتك، دي هتضيعك، اسمعي كلامي يابنتي، احمد انسان كويس متخسريهوش
ندى... هو اللي خسرني وباعني عشان واحده متسواش، لكن انا هعرف ازاي ارد كرامتي،
مراد... ندى، احمد كان بيحبك، واي راجل لو لقى إهمال اكيد بيبعد وبتحصل بينكو فجوه كبيره، وانتي بصراحه الفتره اللي فاتت غلطتي في حقه وفي حق نفسك، لما فضلتي الخروج والنوادي على خطيبك، وجريتي ورا والدتك، انتي قبل متلوميه، لازم تلومي نفسك يا ندى،، فوقي يابنتي قبل متضيعي نفسك
فايزه... بت يا ندى، متسمعيش الكلام الأهبل ده، وخليكي معايا، مبقاش فايزه لو مجوزتك جوازه الكل يحلف بيها، واندمه عليكي طول عمره
ندى.. بابا انا لازم انتقم لكرامتي،، مش واحده زي دي على اخر الزمن تيجي وتاخد مني حاجه تخصني
مراد... هو ده اللي تاعبك، ان واحده جت وخدت حاجه تخصك، للأسف احمد مش فارق معاكي خالص، وبص لفايزه، فعلا عرفتي تربى يا فايزه
فايزه... اسكت انت، طول عمرك طيب ومضيع حقوقنا، والله كويس انها جت منه ونهى العلاقه المهببه دي، ده انا كده ارتحت راحه كبيره قوي، يغور ياندي يا حبيبتي ولا تزعلي نفسك، وبكره هجوزك سيد سيده
مراد... لله الأمر من قبل ومن بعد، فوضت أمري إليك يارب، وسابهم ومشي
************
احمد قاعد في اوضته زهقان
ام احمد... احمد يا حبيبي، عامل ايه بقالي كتير متكلمتش معاك
احمد... تعالي يا أمي، انتي كمان وحشاني قوي والله
ام احمد.. طمني عليك يا حبيبي
احمد... أنا دلوقتي بالذات كويس قوي
ام احمد.. اشمعني دلوقتي
احمد... ماما،، انا فسخت خطوبتي بندي
ام احمد فرحت... بجد يا احمد، بس ليه عملت كده
احمد... ايه الفرحه اللي في عينك دي، للدرجادي كنتي مش موافقه
ام احمد.. دي حياتك ياحبيبي، بس انا كنت مش مرتاحه لأمها
احمد... للأسف، هي نسخه من امها، لكن خلاص ربنا يصلح حالها، ندى متنفعنيش
ام احمد... انت مش زعلان يا احمد
احمد... الغريبه اني فرحان قوي، وحاسس بارتياح كبير قوي ياأمي،، الحمد لله على كل حال
ام احمد... انت لازم تبلغ والدها يا احمد وتشرح موقفك، احتراما ليه، ده راجل طيب ومحترم ومش زيهم خالص
احمد... طبعا يا أمي، دي عمرها متفوتني ابدا، انا تربيتك برده يا ست الكل
ام احمد... طيب يا حبيبي، ربنا يسعدك ويكتبلك الخير يا رب،ويريح قلبك يارب
احمد،، يارب يا أمي
ام احمد... بس انت غلطان يا احمد، كان المفروض تروح تغير جو مع اخواتك. واهو تبقى معاهم برده
احمد الفكره لعبت في دماغه وقال،،، طب ايه رايك لما اروح دلوقتي
ام احمد.... وهو انت تعرف مكانهم
احمد.. هتصل على مؤمن واعرف، انا هقوم اخد دش والبس والحقهم هناك
ام احمد،، ربنا َمعاكو يا حبيبي يا رب
احمد لبس واتصل على مؤمن وعرفه انه جاي، لكن ميقولش للبنات، وكان نادر لسه برده موصلش
البنات قاعدين فرحانين جدا بالجو وفارس وصل عندهم
فارس.. السلام عليكم، ازيكو يا جماعه
مؤمن... ايه ده، هو انت ورانا ورانا ياعم، ايه اللي جابك هنا، وعرفت منين مكانا؟. والله انا شاكك انك بتراقبنا. هههههه
فارس.. ايه ياعم انت اتفتحت فيا كده ليه، كل الحكايه اني قابلت سلمي وقالتلي على المكان، قلت اجي اغير جو معاكو
سلمي،.. فرحت جدا لوجوده وكله لاحظ ده
قعدوا كلهم مع بعض ونادر خلص شغل وراحلهم وكان ليه مركزه برده وكله حبه جدا لانه متواضع ودمه خفيف
أدهم طلع على المسرح وقال إن اي واحد حابب يغني اغنيه لحبيبته او لخطيبته او اي اغنيه تانيه يطلع على الاستيدج
في اللحظه دي احمد جه، وهنا قبل متشوفه حست ان قلبها اتخطف مره واحده، وكل شويه ريحة برفانه المميزه اللي هي بتموت فيها بتقرب منها اكتر، وفجأه احمد همس ليها من ورا
احمد... هنا، وحشتيني
هنا لفت وشها للصوت، وبصوت مبحوح... احمد، انت هنا بجد
احمد عينه اتعلقت بعنيها ولأول مره يحس انه من حقه يبص في عينيها من غير اي قيود او احساس بالذنب
كله فرح جدا بوجود احمد خصوصا مؤمن ومي،
مي... انت كنت عارف انه جاي.
مؤمن... طبعا، هو حد يقدر يعمل حاجه من غيري
مي ضحكت وبصت لهنا اللي مش قادرين يحددوا هي فرحانه ولا ايه بالضبط
فارس.. ايه ده يا مدير مش تقولي انك جاي
احمد فاق على صوت فارس وقال.....
انت جاي قبلي المفروض انك انت اللي تقول يافارس
هنا... فاقت من عشقها لأحمد وحبت تداري حبها وقالت... هي فين ندى يا احمد، كنت جبتها معاك،
احمد.. هبقي اقولك بعدين خلينا نستمتع بالجو الجميل ده
هنا سابته وراحت قعدت جنب ولاء وبتحاول متبصلوش خالص وهو ادايق من كده، هو جاي مخصوص عشانها هي وعشان يعترف ليها بحبه ، لكن هي قافله كل السكك، وفجأه احمد طلع على الاستيدج والكل مذهول منه
احمد... اخد المايك... ياجماعه، انا هغني اغنيه انا حاسسها قوي، ونفسي كل كلمه فيها توصل لحبيبتي، واتمنى انها تحس بيا، وبدء يغني، اغنية (بعدنا ليه لحماقي)
تعبت في بعدي عنك كان ناقصني حاجات كتير
وحاسس برده بيكي وعارف انك مش بخير
علشان فاهمك وعارفك، تملي حبيبتي شايفك، بتحني لكل ذكرى حلوه جنبك عشتها
وانا زيك برده واكتر
، أوقات بسرح وافكر
، انا وانتي بعدنا ليه
ملقتش اجابه جتلك
منا يمكن لو حكتلك
تقوليلي كسبنا ايه
(ونزل لهنا ووقف قدامها وبص في عنيها)
تعبت في بعدي عنك كان ناقصني حاجات كتير
وحاسس برده بيكي وعارف انك مش بخير
علشان فاهمك وعارفك
تملي حبيبتي شايفك
بتحني لكل ذكرى حلوه جنبك عشتها
(هنا نزلت وشها في الأرض وبتعيط،
احمد رفع وشها بايده وبص في عينيها)
محدش فينا عارف لسه بكره مخبي ايه
لكن كل اللي فاتك ممكن احكيلك عليه
أصعب ايام في عمري
مقدرش اوصفها عمري
واكيد حسيتي بيا وعيشتي ايام زيها
وانا زيك برده واكتر
اوقات بسرح وافكر
انا وانتي بعدنا ليه
ملقتش اجابه جتلك
منا يمكن لو حكتلك
تقوليلي كسبنا ايه
تعبت في بعدي عنك كان ناقصني حاجات كتيييير
احمد كان صوته حلو جدا وكل اللي موجودين اعجبوا بيه قوي خصوصا انه كان مهتم بنفسه وشكله قوي لانه لأول مره رايح يقابل حبيبته
كل الموجودين اندمجوا معاه جدا الا فارس اللي كان مدايق منه قوي وصور كل حاجه بتليفونه وبعتها لندى
ندى وصلتها رسالة واتساب فتحت ولقتها فيديو من فارس
ندى شافته كله وهي في منتهى الغيظ وجريت على مامتها وباباها
ندى.... شوفت يا بابا اللي انت بتدافع عنه، شوفت بيعمل ايه
مراد شاف الفيديو.... وبأسف،،، ندى، احمد ملقاش منك اهتمام ولقاه في حد تاني، لو كنتي اهتميتي بيه كان زمانه معاكي انتي مش معاها، لكن انا عارف مهما اقول مش هتسمعي ولا هتستوعبي كلامي
فايزه... انت ايه يا راجل انت، انت مش شايفه بيعمل ايه، ده بيحب على بنتك، وكمان بتغلطها، والله امرك غريب قوي
مراد... أنا مش هحكم غير لما اسمع منه، للأسف يافايزه بنتك واخده منك كتير، وده كفيل يخلي احمد يسيبها، بجد انا عاذره
فايزه بغيظ... قصدك ايه ان شاء الله، ولما انا وحشه كده، مخلصتش مني ليه، ولا عشان متقدرش تمشي من غيري
مراد... متقلقيش يافايزه اكيد هيجي يوم وهخلص ان شاء الله
ندى.... انتو بتقولوا ايه، خليكو معايا، انا قلبي هيقف من الغيظ، بقه يسيبني ويروح لدي، ماما، انا مدايقه قوي ونفسي اخنقهم الاتنين
مراد.... كل تفكيرك انه سابك وراح لواحده تانيه، لكن فكرتي فيه هو لا، ربنا يهديكي يابنتي
******
سلمي... فارس انت مالك مدايق من حاجه
فارس... لا ابدا، بس حابب افهم اللي شوفته ده
سلمي... بصراحه انا مش فاهمه برده، اللي اعرفه ان هنا بتموت في احمد، بس احمد مش حاسس بيها، عشان كده خطب ندى، لكن اعترافه ليها دلوقتي ملخبطني بصراحه
فارس.... يعني هنا كانت بتحب احمد
سلمي... اه يافارس، ايه ادايقت؟
فارس... لا ابدا، وهدايق ليه
سلمي.... عشان كنت معجب بيها
فارس.... انتي قولتي اهو، معجب، لكن مش بحبها
سلمي... يعني انت محبتهاش
فارس... لا طبعا كان مجرد إعجاب مش اكتر
سلمي ابتسمت وفارس فهم انها معجبه بيه، لكن هو لسه محددش مشاعره
مؤمن... فرحان قوي لأحمد لانه خلاص قرر انه يعترف بحبه ويعلنه على الملأ
ومي فرحانه جدا لهنا، لكن كله مستغرب هيعمل ايه في ندى وهيقولها ايه وازاي خاطب وبيحب واحده تانيه
حتى ولاء كانت حاكيه لنادر كل حاجه لان هنا أقرب واحده ليها وكله كان فرحان وفي نفس الوقت مستغرب
احمد... هنا استنى بس رايحه فين، اسمعيني ياهنا
هنا... ارجوك يا احمد سيبني في حالي، انا لما صدقت بدأت افوق،، ليه ترجعني تاني لنقطة البدايه، حرااام عليك، وسابته ومشيت بسرعه
احمد.وقف مكانه وبصوت عالي.... هناااااااا، انا بحبك
الحلقه ٢٢
من رواية 💔جراح القلب💔
ندى قاعده في اوضتها هتموت من الغيظ ومش عارفه تنتقم منهم ازاي وكل شويه تتفرج على الفيديو وتعيده تاني وتقف عند احمد لما بص لهنا ورفع وشها بايديه وغني الاغنيه بقمة الاحساس
وتوقف الفيديوعلي وش احمد وتقول
ندى... هو انا اللي ضيعتك يا احمد. ولا هنا اللي خدتك مني،( ورمت التليفون على السرير) وقالت.،
وحياة كل لحظه قضتها معاك يا احمد مهسيبك تتهني بيها ابدا ولهندمها هي بالذات انها فكرت تتحداني وتاخد حاجه تخصني انا
***************
نروح لهنا واحمد
احمد.... هنا استنى بس رايحه فين، ارجوكي اسمعيني ياهنا
هنا... بعياط.... ارجوك انت يا احمد ابعد عني، انا لما صدقت افوق، ليه بترجعني لنقطة البدايه من تاني، حرام عليك، سيبني في حالي يا احمد عشان خاطري
وسابته ومشيت بسرعه
احمد....بصوت عالي..... هناااااااا، انا بحبك
هنا وقفت اول ماسمعت اللي هو قاله وكل اصحابهم اتصدموا لما سمعوا كده وفارس اكتر واحد اتصدم لانه عارف ان احمد بيحب ندى
هنا اول ماسمعت رجلها مشلتهاش ونزلت على الرمله بركبها وحطت راسها بين ايديها وعيطت بصوتها كله لدرجه وجعت قلوبهم كلهم حتى فارس
احمد ومي وولاء وسلمي جريو عليها
احمد قعد قدامها ومسك ايديها اللي بترتعش وهو كمان مش قادر يسيطر على اعصابه ولا حابب يشوفها بتعيط بالشكل ده وحس انه جرحها قوي لكن ان شاء الله هيعوضها عن كل ده
احمد.ماسك ايد هنا..... هنااا حبيبتي قومي معايا وبطلي عياط
هنا.... بصتله من غير كلام لكن عينيها قالت كل الكلام اللي المفروض يتقال
احمد... حبيبتي، انا اسف على كل لحظه جرحتك فيها، اسف على كل دمعه نزلت من عينك بسببي، اسف على كل كلمه قولتها وجرحتك، هنا انا بحبك ومقدرش ابعد عنك ابدا، انتي بالنسبالي الحياه، الدنيا وما فيها (وسند راسه على جبهتها) انتي اختي وحبيبتي وبنتي وصاحبتي وكل حاجه ليا في الدنيا، ارجوكي ياهنا تسامحيني
هنا.... قامت لكن رجلها فعلا مش شايلاها وحاسه انها بتحلم احمد سندها وبيقومها وكانت فعلا في حضنه، هنا بتبصله وهي مغيبه تماما وحاسه انها في حلم حلو قوي ومش عايزه تفوق ابدا
مؤمن.... هنا، انتي كويسه ياحبيبتي
هنا بصت لمؤمن وبرده مبتردش كل اللي هي بتعمله انها بتبص على أحمد وبس، نفسها انها تكون حقيقه مش حلم
احمد.... يلا بينا يا مؤمن نمشي، انا هاخد هنا واسبقك
نادر... استنى يا احمد انا معايا عربيه تعالي هوصلكوا
وفعلا ركبوا في العربيه ماعدا فارس اللي قال هيستني شويه وسلمي فضلت معاه برده
نادر وصلهم البيت، ومؤمن صمم انه يطلع، على الاقل يتعرفوا عليه اكتر، وولاء تتطمن على هنا
طلعوا على شقه احمد عشان ميقلقوش ناديه، وقعدوا هناك
احمد.... هنا ممكن تتكلمي بقه، بجد صوتك وحشني قوي،
هنا بتعيط وبس
مؤمن... سيبها يا احمد اعصابها تهدي وبعدين هتتكلم، وبص لمي،،،
مي ياريت تعملي حاجه نشربها، انتي عارفه ماما عند خالتي ومش عايزين نقلقهم
مي... من عنيا الاتنين
ولاء.... هنا حبيبتي، طمنيني عليكي، وبطلي عياط عشان خاطري
نادر... انسه هنا، اللي اعرفه لو واحده في مكانك وحصل معاها اللي حصل تبقى طايره من الفرحه، فوقي كده، واتعودي دايما تسرقي الفرحه،، بلاش تاخدي كل حاجه على أعصابك
هنا بصت لنادر واتكلمت في اللحظه دي.... انت متعرفش انا تعبت قد ايه،، متعرفش انا انجرحت قد ايه، متعرفش انا استحملت ايه، انا كنت بموت كل لما اكلمه والاقيه بيقول انه بيحبها، كنت بموت كل مشوفه معاها، كنت بموت كل لما اشوف دبلتها في ايده، تعبت والله ومبقتش قادره (وبصوت عالي قالت) كل ده وتقولي اسرق الفرحه، انا ملقتهاش اصلا عشان اسرقها، احمد ضيع كل حاجه حلوه جوايا، احمد طلعني انسانه وحشه لما اتهمني اني ببوظ علاقته بندي، احمد جاي يكمل على الشويه اللي بكمل بيهم حياتي وجاي يقولي بحبك
(وبصت لأحمد) تقدر تقولي المفروض اقولك ايه بعد كل ده، اقولك سيب خطيبتك، ولا اقولك انا بحبك وانسى كل العذاب اللي اتعذبته بسببك، ولا اقولك هكمل حياتي معاك عادي،، مترد عليا، اقولك ايه،
وفي اللحظه دي دخلت ناديه وعايده وأم أحمد لأنهم سمعوا صوت هنا، بس مش فاهمين اي حاجه
احمد... هنا انا بحبك فعلا، وهعوضك عن كل لحظه عشتيها في عذاب، هنا اغفري وسامحني ياهنا عشان خاطري
هنا... انت مدرك انت بتقول ايه، انت خاطب يا استاذ، وبصت على ايده لكن ملقتش الدبله،
احمد... هنا، انا فسخت خطوبتي بندي
كله طبعا اتصدم من الخبر لكن ارتاحوا نوعا ما لان العقبه الاساسيه في موضوعهم اتشالت والحمدلله
هنا بصدمه.... ايه،،،، فسخت الخطوبه،، ليه يا احمد
احمد... عشان للأسف مننفعش لبعض، اسلوب حياتنا مختلف، وعمرنا مهنتفق،، وقبل متقولي انك انتي السبب، انا بقولك لأ، بيكي او من غيرك عمري مكنت هكمل مع ندى، ياريت تفهميني وتفوقي بقه
هنا..... احمد انا تعبانه قوي وحاسه اني بجد بنهار، انا مضطره اسيبكو ا دلوقتي
وجريت على شقتهم ومعاها مي وولاء
ناديه... في ايه يا احمد، وايه اللي انا سمعته ده
احمد... خالتي انا بحب هنا وبجد مش قادر استغني عنها،
ناديه... فجأه كده يابني،، ده انت لسه كنت بتقول ان ندى كل حياتك
احمد. ليه محدش قادر يصدقني، ندى بالنسبالي كانت انبهار وبس، بنت جميله واسلوبها حلو، غير أن اهتمامها بيا كان زايد وده شدني ليها في الأول، لكن بعد الخطوبه بدأت اكتشف حاجات كتير، منها اننا عمرنا مكنا شبه بعض تربيتنا مختلفه، اسلوب حياتنا مختلف، اهتمامتنا مختلفه، يبقى ازاي هنكون اسره وبيت، خالتي،، انا الاحساس المسيطر عليا في الأول أن هنا اختي، لكن اتأكدت انه غلط لما حسيت انها ممكن تضيع مني، ولما حسيت ان ممكن واحد زي فارس او غيره ياخدها مني،، قلبي رفض كل ده، وعقلي كان هينفجر من التفكير، ليه انا بغير عليها كده وندى لأ، ليه مبحبش حد يقرب منها وندى لأ، ليه عايز دايما اطمن عليها وندى لأ، لاني بحب هنا، بحبها بجد، ومش هسمح لحد ياخدها مني ولا يبعدها عني، حتى لو الحد ده هو هنا،، اه مبنكرش اني اهتميت بندي في الأول، وده خلاها تتشد ليا، لكن بجد انا عمري محبتها، بعد محسيت طعم الحب مع هنا، اتأكدت أن عمري محبيت ندى ابدا، صدقوني بجد هنا بالنسبالي حياتي كلها،
مؤمن... خالتي، اطمني على هنا الأول وبعدين نبقى نكمل كلامنا،
وانت يا احمد، تعالي نقعد ونهدي كده، وأن شاء الله كله هيبقى تمام
نادر.... احمد صدقني كل حاجه هتتظبط بس سيبها لله وهو هيعدلها
احمد... إن شاء الله
مؤمن.... ايه الدراما دي،، ده ولا كأننا كنا في فيلم عربي ياجدع،،، متفكها ياحضرة المدير، ده احنا في بيتنا حضرة الظابط نادر باشا المنياوي، أجدع ظابط مخابرات فيكي يامصر ههههه
نادر.... كل ده انا هههههه،، عموما الف شكر ليك يامؤمن، على التقديمه الحلوه دي
احمد... هو انت فعلا ظابط مخابرات
نادر... مش قوي كده، مؤمن بس بيحب يبالغ
مؤمن... عليا الطلاق ابدا،، انت ياراجل انت مش قايل انك مخابرات
نادر... خلاص ياعم متوصلش للطلاق، ايوه ياسيدي ملازم تاني في المخابرات، وبيني وبينكو طالع مهمه في بلد عربي قريب،، ياريت تدعولي بقه
مؤمن.. ايوه قول كده، كنت هظلم بنت عايده،، قصدي الحاجه عايده هههههه مهو مينفعش نبان قدام حضرت الظابط مش متربين. وعموما ربنا معاك يارب وترجع رافع راسنا يا بطل
احمد... انت اصلا اللي يشوفك من غير ماتتكلم يقول مش متربي، يعني متقلقش..( كلهم ضحكوا) ، ربنا معاك يانادر وينصرك يارب انت وكل اللي معاك
وقعدوا هزروا كتير وارتاحو ا لنادر جدا وهو كمان ارتاح ليهم قوي
وبعد فتره اخد ولاء ومشي
****************
عند هنا
ناديه... هنا،، انتي كويسه
هنا... الحمد لله ياماما
ناديه... وقررتي ايه
مي... قررت ايه في ايه ياخالتي
واحد قالها بحبك، واحنا كلنا واثقين انه بيحبها، تفتكري هتضيعه وتقوله لا
ناديه... أنا مش بقول كده، بس عايزه اعرف رأيها ايه
هنا... ماما، انتي عارفه اني بحب احمد قوي، انا بس هدي لنفسي فرصه اهدي وبعدين ربنا يعمل اللي فيه الخير
عايده... هنا يابنتي،، اللي زي مؤمن واحمد دول، رجاله بجد، متربين على مبادئ وأصول، معدومه في زمانا ده، اوعي تضيعيه من ايدك، احمد قالك بحبك، يعني لازم تتمسكي بالحب ده لآخر يوم، وربنا يسعدكو ا يابنتي
هنا... يارب ياخالتي، انا بس متفاجئه من اللي حصل، حاسه انه حلم
مي... بس بذمتك حلم حلو ولا وحش
هنا... مش عارفه يا مي، في خوف مسيطر عليا ان احمد مش ليا، مش من حقي، خايفه يضيع تاني
مي... يابت لو مخفتيش يبقى محبتيش، لازم تخافي، لأن شدة حبك ليه بتخليكي خايفه من اي لحظه ممكن يبعد فيها عنك، وده طبيعي على فكره، (وغمزت بعنيها) لاني انا كده برده
عايده ضربتها على دماغها وضحكوا كلهم عليها
*******************
في الشركه تاني يوم
احمد.... حسن انا شايف ان في عجز كتير في صفقة الحديد اللي جبناها
حسن... عجز ازاي يا فندم
احمد.. يعني انا عديت على المخازن ولقيت اللي موجود مش بنفس السعر اللي وصلني
حسن... ازاي يا فندم، ده كل حاجه في الأوراق وحضرتك ماضي عليها
احمد.... منا عارف كل ده، لكن فيه فرق في الحسابات يعدي ربع مليون ممكن اعرف ا زاي
حسن... أنا هراجع بنفسي يافندم وهبلغ حضرتك
احمد.... ياريت، وتجيبلي كل حاجه مظبوطه ، انا مش عايز افترض اي حاجه يا استاذ حسن
حسن... تحت امرك يافندم
حسن خرج من المكتب
حسن... شكله هيتعبنا،، عايزك يارشا تبقى فايقه، لأنه مش زي اي حد قبله، ده مركز وفايق قوي، ومفيش حاجه هتعدي عليه، لكن على مين، انا هعرف اتصرف معاه
رشا... متقلقش كل اللي هتقولي عليه هنفذه، بس نسبتي محفوظه هههه
حسن... طبعا، بس ركزي معاه ومش عايز اي غلط
احمد خرج من المكتب ورايح على مكتب مصطفى بيه
احمد.... ايه ده، انت لسه هنا،
حسن.... بارتباك.. أنا همشي حالا يافندم بعد اذنك
احمد... رشا، هو كان عايز ايه،
رشا بارتباك... لا،، لا،، لا ابدا يافندم مفيش اي حاجه
احمد..... امممممم، ماشي يارشا، اتمنى تركزي في شغلك وبس
رشا... تحت امرك يافندم
احمد راح لمصطفى
مصطفى.بتعب......اهلا يا احمد اتفضل
احمد..... خير يا فندم مالك، شكل حضرتك تعبان قوي
مصطفى... شويه، لكن الحمد لله هكون احسن. خير كان فيه حاجه
احمد... لا يافندم مفيش، انا هبقي اكلم حضرتك في وقت تاني، لكن دلوقتي لازم تقوم ترتاح، وانا هوصلك بنفسي
مصطفى،،، متتعبش نفسك يا احمد انا همشي انا
احمد... لا يا فندم مفيش تعب، اتفضل حضرتك يلا
وفعلا احمد وصل مصطفى
و بعد موصلوا....
مصطفى.... احمد، شايف العربيه دي،
احمد.... بص لقى عربيه جميله موديل حديث، ايوه يا فندم مالها
مصطفى،... كنت جايبها لمراتي، من سنه لكن ربنا افتكرها واتوفت قبل متركبها
انا عايزك تاخدها يابني،
احمد بصدمه... أنا اخدها، طب ليه
مصطفى،... لاني بحبك وبثق فيك وبعتبرك ابني، انا عارف انك هتستغرب، بس بجد انا مرتاح ليك جدا يا احمد، وكنت أتمنى يبقى ليا ابن زيك وفي طموحك واجتهادك، وبعدين انا متابع شغلك من يوم ماستلمته وعجبني انك كل حاجه بتعملها بايدك ومهتم بشغلك جدا، غير طبعا اخلاصك في الشغل وتفانيك فيه، عايز بقه مدير حسابات باجتهادك ميبقاش معاه عربيه، .،بعدين اهو تترحم من المواصلات والبهدله
احمد....، ربنا يعلم حبي واحترامي لحضرتك قد ايه يافندم، بس دي غاليه عليا قوي
مصطفى... دي هديه مني ليك
احمد.... مش ممكن يافندم، دي هديه غاليه قوي، وانا لايمكن هقبلها
مصطفى ابتسم لانه واثق ان احمد هيعمل كده
خلاص يا احمد انا هخصم كل شهر مبلغ من مرتبك، اظن ملكش حجه
احمد...بفرحه.... والله منا عارف اقول لحضرتك ايه،، ربنا يخليك ليا يا فندم والله انا بعتبر حضرتك زي والدي بالضبط
مصطفى... خلاص يابطل خدها روح بيها وانا أن شاء الله بكره هسجلهالك
احمد فرح جدا وشكر مصطفى وخد العربيه ومشي واول حاجه فكر فيها انه يتصل على هنا
احمد.... الو ايوه يا هنا
هنا.... ايوه يا احمد ازيك
احمد... أنا كويس ياقلب احمد طول مانتي كويسه
هنا اتكسفت ومردتش
احمد.... انتي فين ياهنا عندي ليكي مفاجئه حلوه قوي
هنا... أنا في الجامعه، انت عارف ان الامتحانات على الابواب، بس مفاجئة ايه
احمد.... اوك انا هجيلك الجامعه واقولك بنفسي، سلام بقه عشان الحق
هنا وقفت مذهوله وفرحانه ومش مصدقه ان احمد جيلها الجامعه
مؤمن ومي راحوا لهنا شافوها متنحه وسرحانه
مؤمن.... هاااااا انتي فين يابنتي، سرحانه كده ليه
مي... اكيد في احمد هو فيه غيره
هنا.... انتو باردين ايه اللي جابكو
مؤمن... تصدقي احنا غلطانين اننا بنعبرك اصلا،، واقفه سرحانه كده ليه
هنا... احمد كلمني وقال انه جاي وعاملي مفاجئه
مي.... بجد،، مفاجئة ايه، ها، قولي يابت
هنا.... يانهار ابيض على الفضول،، لا كده كتير والله وسابتهم ومشيت
والاتنين بصوا لبعض وضحكوا
احمد كلم هنا وقالها تخرج وخرجت هي ومي ومؤمن
احمد.... حبيبتي وحشتيني
هنا.... سكتت واتكسفت
مي.... احمد فين المفاجئه
احمد.. ضحك... فعلا نفس العينه الفضوليه ههههه
مؤمن.... متنطق ياعم انت هتزلنا
هنا.. على فكره المفاجئه دي ليا مش ليكو يعني انا اللي المفروض اسأل
احمد.... فتح باب العربيه وقال اتفضلي ياقلب احمد، عشان تبقى اول حد يركبها
هنا بصدمه.... انت بتعمل ايه يا احمد، وايه دي
احمد.... عربيتي ياهنا، انتي وش الهنا والسعاده ليا دايما،، هنا بجد ربنا يديمك اكبر واحلى نعمه في حياتي
مؤمن... ياابن المحظوظه، جبتها ازاي دي
واد يا احمد انت خبطتها منين هتودينا في داهيه
احمد.... اولا عيب لما تقولي ياواد،
ثانيا، دي بتاعتي والله، مصطفى بيه هيخصم كل شهر جزء من المرتب وهيكتبهالي بكره ان شاء الله
هنا.... مبروك يا احمد، الف مبروك
احمد... مبروك عليا انتي ياهنا، انتي الهديه الحقيقيه اللي القدر قدمهالي، بحبك ياهنا
هنا بصتله بمنتهى العشق واكتفت ان عنيها هي اللي اتكلمت
مي.... احمد،،،، احمااااد ، متفوق بقه وترد عليا
احمد.... يااا ام الفصلان، نعم عايزه ايه، انتو عملي الأسود انتي ومؤمن
مي... أنا عايزه اتفسح، يلا بقه لف بينا شويه ههههه
احمد... لا ياماما،، طريقكوا أخضر، انا هاخد حبيبتي وامشي وتعالو انتو ورانا جري
بصوا لقوا مي بتضحك وبتجري تركب العربيه
مؤمن ركب العربيه وشاور لمى تركب وقال.... طريقكو ا انتو اللي أخضر يا حضرة المدير، وأبقى سلملي على الحاجه ام احمد لما تروح ومشي بالعربيه
احمد.... بذمتك ده مهندس واول دفعته، والله محصل بياع في سوق هههههه
هنا ضحكت قوي وضحكتها دوبت احمد فيها اكتر
احمد.... هنا، انتي جميله قوي وكل يوم بتحلوي اكتر،، انا مش عارف انا كنت غبي قوي كده ليه
هنا.... انسى يا احمد خلاص ومتتكلمش في اللي فات،
المهم دلوقتي هنروح موصلات ولا ايه
احمد.... كان نفسي تركبيها اول واحده، لكن كالعاده، عمره مهناني على حاجه ابدا.. بس انا كفايه عليا انتي ياهنا، ومش عايز حاجه تاني
مؤمن رجع وبصلهم،،،، ايه مطولين ولا نتكرم وناخدكوا معانا
احمد لف ونزل مؤمن.... انزل يالا انا اصلا اتخنقت منكو
يلا يا هنا اركبي وسيبك منهم
هنا ضحكت،، يلا ناخدهم ونحِن عليهم يا احمد، حرام نسيبهم، وضحكوا كلهم
لكن كان متابعهم شخص من بعيد
تفتكروا مين الشخص ده
الحلقه ٢٣
من رواية💔 جراح القلب💔
في الشركه عند احمد وبعد مرور اسبوع
،***********
احمد قاعد في مكتبه ومستني حسن يظبط الحسابات ويجيبله الملف
حسن... اتفضل يافندم كل حاجه مظبوطه، انا بتأسف لحضرتك على العجز اللي حصل
احمد.... واسفك هيفيد بايه لو كنت انا عديتها، كنت هتطلعنا كلنا حراميه، الحسابات مفيهاش اسف يا حسن، الغلطه هنا بفوره، وانا معنديش استعداد اتحمل غلطك، ياريت تفوق بعد كده
حسن بغيظ....حاضر يا فندم وبتاسفلك للمره التانيه، بعد اذن حضرتك
طلع حسن وكلم رشا
حسن... الوضع كده مش هينفع، ده واخد باله من كل حاجه انا لازم اخلص منه في أسرع وقت
رشا.... انت ظبطت الدنيا ازاي
حسن.... حطيت فرق الفلوس في الخزنه ونزلت المخزن، وظبطت الحسابات على اللي موجود فيه،، يعني الصفقه مطلعناش منها بحاجه،،
رشا... ازاي، انت مش اخدت الفرق وكان ٢٥٠ الف جنيه،، انت هتاكل حقي ولا ايه
حسن.. انتي غبيه يابنتي، بقولك رجعت الفلوس تاني الخزنه، فوقي بقه، عشان منروحش في داهيه، انا همشي قبل مايطلع ويشوفنا، زي كل مره
احمد في مكتبه بيراجع الحسابات، وافتكر هنا وانها عندها امتحان، وبص في ساعته، وكلمها
هنا.... الو،، ازيك يا احمد
احمد اتنهد... حبيبتي، وحشتيني، طمنيني عملتي ايه في الامتحان
هنا.... أنا لسه خارجه حالا، بس الحمدلله حليت كويس، ربنا يسهل بالباقي
احمد.... الحمدلله ياحبيبتي ربنا معاكي يارب،، المهم انا هعدي عليكي ونتغدي بره، ممكن،، وياريت بلاش تقولي لمؤمن ومي مش ناقصين رخامه هههههه
هنا.... لا متقلقش، هما معندهمش امتحانات النهارده،، بس معلش يا احمد أجلها، لأن الماده اللي جايه بعد بكره ولازم اروح اذاكرها كويس لأنها ماده رخمه، خليها آخر يوم في الامتحانات
احمد... اللي تشوفيه ياقلب احمد، وانا ميرضنيش اني اعطلك، انتي هتروحي الوقتي
هنا..... اه ان شاء الله، نادر جاي ياخد ولاء وهيوصلوني،
احمد... حلو قوي، ابقى سلميلي على نادر كتير، وطمنيني لما توصلي
هنا.بفرحه.... حاضر يا احمد ان شاءالله
وقفلت وحضنت التليفون، هي نفسها تقوله انه كل حياتها، لكن جواها رهبه ومش قادره تتغلب عليها
نادر وصل هنا للبيت واستأذن ومشي على طول هو وولاء
*************
عند ندى
ندى شافت احمد وهو معاه العربيه وواقف مع هنا، وده زاد الكره والحقد اللي في قلبها ناحية هنا، لأنها عمرها مشافت احمد بالسعاده دي معاها وقررت انها لازم تعكر صفو السعاده اللي بينهم
ندى راحت الشركه لأحمد
ندى.... بلغي احمد اني عايزه اقابله
رشا... اقوله مين يافندم
ندى...، قوليله ندى هانم
رشا باستغراب... هانم،، ماشي
دخلت ندى لأحمد
احمد... اتفضلي يا ندي،، خير في حاجه
ندى... لا ابدا كنت بطمن عليك، اللي بينا مكنش قليل يا احمد، ولا انت شايف ايه
احمد.... اممممم، اكيد مش قليل، المهم انتي كويسه
ندى.... أنا كويسه جدا،، وكنت جايه اباركلك على العربيه الجديده، شكل هنا وشها حلو عليك
احمد... يااااه،، انتي لسه فاكره، وبعدين هنا طول عمرها وشها حلو عليا، هنا السبب في كل اللي انا فيه، انا لولفيت الدنيا بحالها مش هلاقي زيها، ياندي
ندى....والله،، تمام والدليل على كده انك غنتلها، واترجتها تسامحك، صح، فعلا لايقين على بعض، انا مكنش ينفع ابقى في وسطكو، هي شكلك ونفس بيئتك، لكن انا لأ انا احسن منكو بكتير، وبكره ربنا هيرزقني بواحد احسن منك الف مره يا احمد لأنك متستاهلنيش
احمد.... هههههههههه، لا فعلا ضحكتيني، (واتكلم بعصبيه) اوعي تجيبي سيرة هنا على لسانك، انتي فاهمه ولا لأ، دي احسن منك مليون مره، والبيئه اللي مش عجباكي، احسن من بيئتك اللي انتي فرحانه بيها، ولو فكرتي تغلطي فيها تاني، اقسم بالله مهرحمك، ولا هعمل حساب لحد حتى لو والدك، انا مش فاهم ازاي انتي بنته وفايزه مراته، مستحملكوا زاي، انا بحمد ربنا ياندي اني فوقت قبل مضيع حلم عمري من ايدي،،(ندى متفاجئه من كلامه)، ايوه هنا هي حلم عمري وحياتي كلها، واللي هيفكر يأذيها، همحيه من على وش الأرض،، انتي فاهمه ولا لأ،، ويلا اتفضلي من هنا وقتك خلص
وقعد على مكتبه واداها ضهره وحط رجل على رجل
ندى.بغيظ....ماشي يا احمد، ماشي
خرجت واصطدمت في حسن
حسن... انسه ندى،،!!! خير مالك، ومين يقدر يزعل القمر ده
ندى... شكرا يا استاذ حسن، بس معلش مضطره امشي
حسن،... طيب ممكن تستنيني ثواني، انا كده كده داخل استأذن استاذ احمد امشي لاني رايح مشوار مهم، هوصلك في طريقي
حسن، رشا قالتله أن فيه مشكله بين احمد وندي، وهو قال لازم يستغل ندى ضد احمد وهتبقى هي سبب نجاح خطته ضد احمد
ندى نزلت مع حسن فعلا
حسن... ممكن افهم القمر ده زعلان ليه
ندى... لا مفيش حاجه، هو انت قولت لأحمد انك هتوصلني
حسن... . لا طبعا، انا استأذنت امشي وخلاص (وقال بخبث. لانه عايز يعرف هي لسه خطيبته ولا لا) بس اوعي انتي تقوليله، انتي عارفه انه هيدايق اني وصلت خطيبته
ندى.... لا متقلقش، عمره مهيدايق لاني مبقتش خطيبته خلاص
حسن بتمثيل.... ايه ده بجد!!!! طب ليه كده،، حد يبقى معاه القمر ده ويفرط فيه
ندى... أعمى،، وحتة بنت ضحكت عليه وخدته مني، لكن على مين والله لهندمهم الاتنين
حسن بخبث.... تقصدي انسه هنا...
ندى... ايه ده!!! انت عرفت ازاي
حسن.... كان باين جدا الفرق بينكو في المعامله، كنت بحس انه بيفرح لما بيشوفها، وبستغرب ازاي يبص لدي ويسيبك انتي، جمال ورقه وأدب وكل حاجه حلوه
ندى... فرحت قوي بكلامه وارتاحت ليه وللكلام معاه
حسن.. حس بندي وحب انه يضغط على النقطه دي عشان يكسب ندى في صفه
حسن وصل ندى، وندى كانت فرحانه بيه جدا، لأنه برستيج ووسيم، ومتفتح، وغير كده عارف قيمتها وقيمة جمالها وده اللي هي عايزاه
*********
عند احمد في الشركه
احمد قاعد هينفجر من كلام ندى وازاي عرفت اللي حصل في الرحله،
احمد.... فارس!!!! هو مفيش غيره اللي ممكن يقولها، واتصل عليه
احمد.... فارس انت في الشركه ولا مشيت
فارس... لا لسه في الشركه، خير في حاجه
احمد.. تعالالي على المكتب حالا دلوقتي
فارس راح لأحمد
فارس... خير يا احمد فيه ايه
احمد.... انت ليه مصمم تخسرني يافارس، ليه
فارس... وضح كلامك يا احمد، انا مش فاهم حاجه
احمد... انت بتصورنا في الرحله وبتبعت الفيديو لندي ليه يافارس، انا نفسي اعرف انت بتعمل كده ليه
فارس اتصدم... اه يا احمد صورتك واتبعت بالغلط، انا كنت بصور الرحله كلها من الاول
احمد... والله!! انت مقتنع باللي انت بتقوله، فارس انت ليه كده، ليه اتغيرت، انت كنت أقرب حد ليا وعمري ماقصرت معاك، ليه يافارس، ليه عايز افهم
فارس... عايز تعرف ليه يا احمد.،لانك كنت مفضل في كل حاجه، كل حاجه انا عايزها كانت بتجيلك انت وانا لأ، مع اني احسن منك بكتييير. ندى كنت معجب بيها جيت انت واخدتها، الكرسي اللي انت قاعد عليه جيت عشان يبقى من نصيبي جيت انت واخدته.،العربيه والوظيفه اخدتهم من غير اي تعب منك، حتي هنا، برده اخدتها، انت اللي خلتني كده يا احمد، انت اللي كرهتني فيك
احمد واقف مصدوم َمش قادر يستوعب كل اللي سمعه، كل ده يا فارس، بس لازم تبقى فاهم ان كل ده نصيب، اكيد انا مش قاصد اخد حاجه انت عايزها، وظيفتي وجاتلي عشان تعبت واجتهدت وذاكرت، وده كان عوض ربنا ليا والعربيه كذلك، اما ندى فأنا اول مره اعرف انك كنت معجب بيها، ده انت يافارس اللي عرفتني عليها، وهنا انت عمرك محبتها وانا متأكد، وبعدين هنا بتحبني انا، ليه كل الكره والحقد ده ناحيتي يافارس، انا عمري ماقصرت معاك في موقف، حتى برغم كل اللي عملته معايا الا اني قبلتك في الوظيفه بالرغم ان كان في ناس تستحق، انا بجد مصدوم فيك، مصدوم في صاحب عمري،( وسكت شويه وقال،)، وعموما يافارس انا برده هفضل صاحبك واخوك، واي حاجه تحتاجها انا هنفذهالك، تقدر دلوقتي تتفضل
فارس... بص لأحمد، ولسه هيتكلم
احمد... لا يافارس خلاص، مالوش لازمه الكلام دلوقتي، انا سالت سؤال وانت جاوبت، يبقى خلاص، اتفضل على شغلك يافارس
فارس خرج وحاسس بالندم لكن لسه برده مشاعر الحقد مسيطره عليه ومش قادر حاليا يتخلص منها
*******************
هنا خلصت امتحانات هي ومؤمن ومي
وفي يوم نتيجة هنا
هنا خرجه لقيت احمد مستنيها بالعربيه
احمد جري على هنا... ها يا حبيبتي طمنيني عملتي ايه،
هنا.... الحمد لله يا احمد نجحت وبتفوق لأول مره هههههههه
احمد..... حبيبتي الف مليون مبروك ياهنا، حيث كده تعالي معايا ونقي احلى هديه لاحلى هنا في الدنيا
هنا.... لا يا احمد، احنا نروح نفرح ماما الأول لأنها قلقانه قوي، وبعدين نتيجة مي ومؤمن انهارده، لازم نطمن عليهم
احمد.... تعالي نكلمهم ونتغدي كلنا بره، وانا متأكد انهم طفسين، وهيوافقوا
مؤمن.من وراهم..... اكيد الطفسين دول يبقوا احنا، مش كده ولا ايه
مي.... احنا بقينا ماركه مسجله يا مؤمن في الطفاسه
احمد.... والرخامه كمان والله،، ههههه،،، عملتو ايه في النتيجه
هنا.... اكيد نجحوا بامتياز،، دول ناس متوفقه يابني
مؤمن..... أنا بس اللي متفوق،، البت دي فاشله (وشاور على مي)
مي..... اخص عليك يا مؤمن، انا فاشله،
احمد.... متقولو عملتو ايه،،
مؤمن... أنا نجحت بامتياز، والفاشله دي جيد جدا هههههههه
مي ضربته في ضهره وقالت تصدق انت فعلا رخم
هنا..... وااااو ماشاء الله، انت الاول يا مؤمن
مي... كالعاده ياختي، طول الليل بنذ اكر مع بعض، وفي الاخر يطلع هو الأول
مؤمن بيعدل ياقة التيشيرت بس ملقاش ياقه
ايه ده،!!! بت يا مي المره الجايه فكريني البس قميص عشان اعرف اعدل الياقة ههههههههه وكلهم ضحكوا عليه،
احمد كلم ناديه وقالها على نتيجة هنا ومؤمن ومي وفرحت جدا بيهم، وكمان قالها انهم هيقضوا اليوم مع بعض
وكان يوم جميل جدا كله ضحك وهزار والكل اتبسط بيه جدا
*****،،، ***********
وبعد مرور فتره كبيره
حسن كان بيكلم ندى واتقربوا من بعض كتير، حسن عدي على ندى في البيت يتعرف على والدتها ووالدها
حسن... ندى انا وصلت قدام البيت
ندى... ، ثواني وهنزل افتحلك حالا
ندى نزلت جري
فايزه... خير يا ندى مالك نازله بسرعه ليه كده
ندى... حسن قدام البيت يا ماما
فايزه... ماشي يابنتي، لما نشوف حسن اللي قارفانا بيه
حسن... السلام عليكم،، ازيك يافايزه هانم، ازيك يا مراد باشا
مراد بضيق وعدم ارتياح... اهلا وسهلا اتفضل يا استاذ حسن
فايزه انبهرت بشكله لانه كان مهتم جدا بيه... ماشاء الله ليكي حق ياندي، تفضلي تتكلمي عليه طول اليوم، اتفضل يا استاذ حسن
حسن... شكرا ليكي فايزه هانم، انا اتشرفت بمعرفة حضراتكو والله
مراد.. الشرف لينا يابني.. ندى قدمي للأستاذ حسن حاجه يشربها
حسن... لا ياندي متتعبيش نفسك انا كنت جاي اتعرف عليكو وماشي على طول
مراد... معلش يابني انا مضطر استأذن لاني عندي شغل، وبصراحه انت نورتنا،
حسن... اتفضل ياعمي، انا شويه وهمشي على طول. وبعدين ربنا يعلم اني حاسس اني في وسط عيلتي
مراد بغيظ... اممممم، ماشي يابني بعد اذنك
فايزه... قولي بقه ياحسن ، انت لسه شغال مع،،،، والله مليش مزاج اقول حتى اسمه
حسن... قصدك احمد.... للدرجادي مش حباه
فايزه.... والله يابني انا مبكرهش حد قده، متكبر وعامل فيها مهم وهو ولا حاجه، عمري مقتنعت بيه ابدا
حسن فرح جدا لأن ده اللي هو عايزه بالضبط... طب واللي يكسر عينه ويخلصكو منه، تساعدوه
فايزه.... ده انا اساعده قوي، بس قولي ازاي
ندى.... لا ياماما!! انتو ناوين تعملو ايه
حسن اتفاجئ ومثل الزعل،،، ايه يا ندى، انتي لسه بتحبيه، بعد كل اللي عمله فيكي
انا لو عايز اخلص منه، فده عشان ارد لك كرامتك، واخليكي تمشي رافعه راسك فوق، ومش حتة بنت زي هنا هتنتصر عليكي
عموما، براحتك، انا بعمل لمصلحتك بس، انا مضطر امشي
فايزه... استنى بس رايح فين يا حسن، دي ندى بتهزر، هي اكيد عايزه ترد كرامتها، وهتنفذ كل اللي هتطلبه منها
ندى بعد كلام حسن اتغاظت من أحمد وهنا وده اللي حسن كان عايزه
ندى.... ماشي ياحسن، شوف انت عايزني اعمل ايه وانا هعمله
حسن... كده تمام قوي،،، سيبوني اخططلها وبعدين ابلغكوا، استأذن انا بقه
ومشي حسن وكله بيفكر ياترى هيخطط لايه،، و فايزه كانت نفسها ترد كرامتها هي وبنتها من أحمد باي طريقه
**************************
نادر كان معدي من قدام الشركه عند احمد، وقرر انه ينزل يسلم عليه
نادر،،، السلام عليكم
رشا..... وعليكم السلام
نادر..... بلغي استاذ احمد اني عايز اقابله
رشا... اقوله مين يافندم
نادر.... حضرة الظابط نادر المنياوي
رشا.... ت....ت....تحت امرك يافندم
نادر مرتحش لارتباك رشا واستغرب جدا منه
احمد.... نادر!! تعالي والله واحشني قوي
نادر... انت كمان واحشني يا احمد. أنا كنت معدي من قدام الشركه قلت اطلع اسلم عليك، انت عامل ايه
احمد.... أنا تمام الحمدلله، وبقيت احسن لما شوفتك
نادر... حبيبي يا احمد... هنا عامله ايه والأمور اتظبطط معاكو ولا لسه
احمد... الحمدلله احسن من الاول، بس والله انا فرحان بزيارتك دي قوي. ها تشرب ايه يابطل
نادر... لا ولا اي حاجه، انا همشي على طول، عشان رايح لولاء
احمد... اخبار مهمتك ايه،
نادر... لسه يا احمد والله، ادعيلنا بس ربنا يسترها معانا، اللي مطمني أن معايا اكبر رجال المخابرات، ناس كده تشوفها تخاف بس من هيبتهم، بس قمه في التواضع يا احمد، برغم انهم من أكبر عائلات البلد،
احمد.... هي دي الناس اللي بجد لازم نحترمها، التواضع مفيش احسن منه يا نادر، اهم ظباط في المخابرات ومن عائلات كبيره واكيد عمرهم مستغلوا ده ابدا
نادر.... لا، عمرهم مشتغلوا وظيفتهم ابدا، وعندهم تدين مش موجود في ناس كتير، ربنا بجد يباركلهم، هما اللي ساعدوني اوصل للي انا فيه وشجعوني عليه،
احمد.... ماشاءالله يا نادر ربنا يوفقك يا حبيبي يارب
نادر... تسلم يا احمد،، بص انا لو قعدت اتكلم عنهم مش هوفيهم حقهم، انا في يوم هعرفك عليهم أن شاء الله
احمد... إن شاء الله يانادر وانا يزيدني شرف طبعا
حسن دخل يقدم لأحمد بعض الأوراق وسلم على نادر، وبحكم خبرة نادر في المخابرات، مرتحش لحسن ابدا، وبعد مخرج
نادر... احمد،، هو مين ده؟
الحلقة الرابعة والعشرون من هنا