الحلقة التاسعة عشر والعشرون
بقلم شيمو الخطيب
الحلقه ١٩
من جراح القلب
هنا شافت فارس واقف في الشارع استغربت جدا وسألته
هنا.... فارس، انت واقف هنا بتعمل ايه
فارس.... أنا عايز اتكلم معاكي ياهنا في موضوع مهم
هنا..... موضوع ايه اللي انت عايز تتكلم فيه
مي بتضغط على ايد هنا لأنها خايفه حد يشوفهم ولأن وقفتهم دي غلط جدا
وطبعا هنا عارفه كده فقالت
هنا... فارس، اظن ده لا وقته ولا مكانه، وبصراحه مفيش بيني وبينك مواضيع نتكلم فيها
فارس... بس انا لازم اتكلم معاكي، انا مش عارف انتي بتصديني ليه، اديني فرصه اشرحلك الموضوع
هنا.... تشرح ايه، يافارس انا يدوب كلمتك كلمتين قبل كده ومحصلش بينا اي كلام تاني يسمح لينا بالوقفه دي
وبصراحه انا مينفعش اتكلم معاك خالص
فارس.... هنا انا ممكن اعملك اللي انتي عايزاه، تعالي نقعد في اي مكان، وهقول اللي عندي وامشي على طول
هنا.... انت مجنون،، انا اقعد معاك في مكان بمناسبة ايه، لا اخويا ولا خطيبي ولا حتى قريبي ، يبقى اقعد معاك ليه، عن اذنك يا فارس مضطره امشي
فارس.... طيب بصي اعتبري اني سواق تاكسي واركبي معايا هوصلك المكان اللي انتي عايزاه وامشي على طول
مي.... هو حضرتك مش خايف على زعل صاحبك
فارس... وهو احمد هيزعل ليه، انا معملتش اي غلط، انا هوصلكو ونتكلم في الطريق
هنا... بمجرد متكلمو ا عن أحمد ادايقت منه جدا وقررت انها تركب مع فارس يوصلها وتسمع عايز ايه
هنا.... ماشي يا فارس احنا رايحين المستشفى لوالدة مي ممكن توصلنا لهناك وتمشي على طول
فارس.... بفرحه كبيره،، وانا تحت امرك في اي حاجه
مي.بضيق.... هنا اعتقد مينفعش
هنا بنظرة تحدي.... لا هينفع واظن اني حره في تصرفاتي، تعالي وانتي ساكته
مي عارفه ان هنا بتعند مع احمد لكن للأسف هي بتعند مع نفسها مش مع احمد
ركبوا العربيه وهنا قالت
هنا..... ها كنت عايز ايه يافارس..
فارس.... كنت عايز اطمن عليكي، امبارح كنت عند احمد وسمعت صوتك بتعيطي.. بجد كان نفسي اطمن عليكي جدا
هنا.... أنا كويسه يافارس، سوء تفاهم وراح لحاله
فارس.... هنا انا معجب بيكي ونفسي بجد في بنت تكون زيك وفي أخلاقك
هنا مذهوله ومي فتحت بقها من الصدمه وسكتوا الاتنين
فارس.... أنا عارف انك مستغربه جرأتي، لكن مفيش حل غير كده لأنك مش هتسمحي اني اتكلم معاكي تاني، وده انا متأكد منه
هنا..... ف... ف... فارس انا مش عارفه اقول ايه
فارس... متقوليش؛ حاجه دلوقتي، انا بس حبيت اقولك على احساسي ومش عايز منك رد
مي..... بضيق،، هي دي المستشفى لو سمحت نزلنا
فارس وقف بالعربيه... اتفضلوا، لو تحبو استناكم انا معنديش مانع
مي... لا شكرا تقدر تمشي دلوقتي
ومشي فارس فعلا وهنا واقفه مذهوله من اللي حصل واللي سمعته ومي بصتلها بصت لوم ومحبتش تتكلم معاها في الوقت ده
طلعوا لوالدة مي
مي.... ماما حبيبتي عامله ايه
عايده.... الحمدلله على كل حال بخير يا حبيبتي
هنا.... لا احنا النهارده احسن والحمدلله، انا بقترح عليكي يا خالتي تخرجي بقه النهارده وبلاش قعدة المستشفى
عايده بفرحه..... ياريت يابنات انا زهقت قوي من القعده هنا وحاسه اني بقيت احسن
هنا.... حبيبتي ياقمر انتي، انتي تؤمريني امر كده، اوك انا هروح عند الدكتور واسأله على الحاله واشوف هيقول ايه
مي... تسلمي ياهنا تاعبينك معانا
هنا.... متقوليش كده دي عايوده دي حبيبتي،، ومشيت هنا
مي.... ها يا أمي طمنيني عليكي
عايده... أنا كويسه ياحبيبتي الحمدلله، انتي اللي عامله ايه
مي... أنا مبسوطه قوي معاهم ياماما حاسه انهم عيلتي وكل اهلي بجد بحبهم كلهم والله، بس كل اللي ناقصني وجودك جنبي يا حته من قلبي
عايده..... ربنا يسعدك يابنتي انا بطمن طول مإنتي معاهم،، مؤمن كان عندي الصبح، قالك
مي..... اه ياقلبي قالي وقال انه اتفق مع صاحب البيت وخلص كل حاجه
عايده.... ربنا يباركله ويوقفله ولادالحلال، مؤمن ده ابني اللي مخلفتهوش
مي...... هههههه لا هيزعل لو قولتي ابني هو مش عايز يبقى اخويا
عايده.... هههههههه ربنا يسعدكوا ويجمعكو ا في الحلال يارب
هنا جت ومعاها الدكتور واطمن على عايده وسمح ليها بالخروج
وفعلا خرجوا،، وهما بيوقفوا تاكسي
بصوا لقيوا فارس بيرجع بضهره ووقف بالعربيه وقال تقدروا تتفضلوا وانا هوصلكوا، عشان والدتك يا انسه مي متتبهدلش وتتعب من المواصلات
طبعا هنا ومي اتصدم وا لما شافوه وعايده واقفه مش فاهمه حاجه
مي.... لا شكرا يا استاذ فارس احنا هنوقف اي تاكسي
فارس.... أنا موجود اهو، ونزل فتح باب العربيه لعايده وفعلا عايده ركبت واضطرت هنا ومي يركبوا
فارس وصل بالعربيه وكان مؤمن واقف تحت مع العمال بينزلو ا العفش واحمد في الشقه مع الباقي بيتابعهم وهما بيظبطوا العفش،، وقف مؤمن واتفاجئ منهم وهما نازلين من عربية فارس
مؤمن.... حمدلله على السلامه يا خالتي نورتي بيتك يا حبيبتي
عايده... تسلم من كل شر ياحبيبي
مي.... مؤمن انا رنيت عليك وانت مردتش فقولت اسيبك نايم
مؤمن.... تجاهل مي تماما وقال..... تعالي يا خالتي اطلعك عند خالتي ناديه فوق
فارس.... مؤمن،، عامل ايه،، واحمد فين
مؤمن.... أنا الحمدلله بخير يافارس واحمد فوق، في شقه خالتي عايده
بس قولي، هو ايه اللي لمكوا على بعض
فارس..... امممم انا شفتهم خارجين من المستشفى فعرضت عليهم اوصلهم وده واجب عليا طبعا
مؤمن... يعني انت معدي صدفه فشوفتهم!!! مش وسعت منك دي يا فارس قوي يعني قول كلام معقول انا مش عبيط
فارس.... هو انت مدايق ليه كده، انتو بتعتبروني غريب ولا ايه يا مؤمن
مؤمن.... انت مش غريب يافارس،، بس عني انا واحمد، لكن مي وهنا لأ يا فارس،، انت غريب عنهم والمفروض انك تحترم ده
فارس.... اسف لو كنت دايقتك بس انا بعتبرهم اخواتي يا مؤمن
مؤمن..... اممممم ماشي يافارس، اتمنى افهم الموضوع منك الأول وبعدين اشوف اخواتك ولا لأ، اظن فاهمني يافارس
فارس..... ا،، اا،، ه طبعا فاهمك يا مؤمن
احمد شافهم من البلكونه نزل علي السلم جري واصطدم بهنا
احمد... اسف ياهنا مكنش قصدي
هنا.... قلبها دق جامد وقالت... لا ولا يهمك بس انت نازل ليه كده
فارس ومؤمن طالعين
فارس.... احمد، ازيك يا حبيبي، انا عارف انك زهقت مني
احمد..... فارس،، انت اللي موصل البنات ولا انا متهيألي
هنا.... اه يا احمد، فارس اللي وصلنا
فارس بص لهنا واعجب بجرأتها قوي
ومؤمن... اتغاظ منها جدا لأنها بتعند على حسابها هي، مش احمد
مؤمن.... كتر خيره يا احمد شاف البنات وعمل معاهم الواجب( بيحاول يلطف الجو لانه عارف رد فعل احمد)
احمد وشه بيطلع نار.... فعلا كتر خيره وبص لهنا وسابها ومشي
وقرر يفهم من فارس اللي حصل قبل ميتهور ويعمل اي حاجه لكن هو متغاظ جدا من هنا لدرجة انه عايز ينفجر فيها
دخل احمد شقتهم، ومؤمن دخل عايده ومي عند ناديه، وفارس دخل ورا احمد
فارس.... مالك يا احمد انت غريب قوي على فكره، انت بتدايق على حاجات هايفه جدا
احمد.... فارس ممكن تفهمني ايه اللي حصل بالضبط
فارس..... شفتهم ووصلتهم فيها حاجه دي، عاملينها مشكله انت ومؤمن قوي ليه مش عارف كأني خطفتهم
احمد.... عشان احنا رجاله يا فارس، رجاله يعني بتحافظ على اي علاقه يدخلوا فيها، سواء اخوه، أو حب او صداقه يا فارس اظن فاهمني، يعني بحترم صديقي ومبقربش من حاجه تخصه
فارس.... وانا قربت من ايه يخصك يا احمد مفيش واحده فيهم تخصك ولا انت بتخصص الناس ليك بمزاجك
احمد بزعيق..... أنا عمري مكنت كده بس انت عارف كويس ان هنا ومي يخصوني انت ليه بتعمل كل حاجه تدايقني يا فارس
فارس..... انت مدايقتش كده يوم مكلمتني على ندى، ولا هي ندى متخصكش زي هنا
احمد.... متتكلمش معايا بالطريقه دي وبعدين انت عايز ايه من هنا يافارس، ممكن اعرف
فارس... احمد بصراحه انا معجب بهنا
احمد وقف مصدوم ومسك فارس من قميصه بايديه الاتنين وقال...... انت بتقول ايه يافارس،، هنا مين دي اللي معجب بيها،، وزعق جامد،، انت مدرك انت بتقول ايه
فارس.... نزل ايدك يا احمد انا مغلطتش ومش فاهم بصراحه انت عايز ايه، ومدايق من ايه
مؤمن وهنا ومي دخلوا علي صوتهم
مؤمن.... ايه يا احمد فيه ايه، وسيب فارس واتكلم بهدوء
احمد.... ده جبان، امنته على بيتي ودخلته، وهو خاني يعني ميستحفش يتقال عليه صاحب
فارس.... انت بجد امرك غريب جدا هو انا قلت حاجه غلط، كل اللي قولته اني معجب بهنا فيها ايه دي
احمد.... رجع مسكه تاني،، قولتلك متنطقهاش تاني وضربه في وشه لدرجة انه نزف
فارس.لسه هيشتبك مع احمد
مؤمن خلصهم من بعض وهنا قالت
هنا.... احمد اهدي، في ايه،، فارس مغلطش
احمد ساب فارس واتصدم من رد هنا ومؤمن بصلها بصدمه والكل تنح ليها الا فارس اللي كان فرحان بيها جدا
احمد.... برعشه، يعني ايه ياهنا انتي موافقه على اللي بيقوله،
هنا..... وهو قال ايه، كل اللي قاله انه معجب بيا وباخلاقي،، وانا برد عليه اهو وبقوله، شكرا لذوقك يافارس، وربنا يرزقك ببنت حلال تسعدك، يعني الموضوع مش مستاهل تخسر صاحبك لمجرد انه قال رأيه فيا
مؤمن.... ههههههه والله!!! لا صح انتي كده حلتيها،، ولأول مره مؤمن يتنرفز على هنا ويقول
... هنا انتي غلطتي بأنك سمحتي لنفسك تركبي عربيه مع واحد غريب، لا وكمان جايه تتكلمي بكل جرأه، ومسكها وزقها على شقتهم وقالها مشوفكيش تخرجي من هنا خالص انتي فاهمه
احمد.واقف مصدوم من برودها ومصدوم من رد فعله هو، وفي اللحظه دي اتأكد أن هنا كل حياته وانه محبش غيرها، وندى كانت مجرد إعجاب وانبهار مش اكتر،
طبعا كله خرج راح شقه ناديه
الا أحمد وفارس ومؤمن
احمد.... فارس انا عمري مهنسالك الموقف ده، انت تعديت حدودك معايا والواجب منك يا صاحبي انك تيجي تكلمني انا مش هنا. المفروض تعرفني انا مش هنا يا فارس، لكن للأسف انت معملتش كده
فارس.... أنا كنت عارف اني لو قولتلك هتزعل
احمد... بزعيق،،، وهو انا كده مزعلتش
فارس.... انت غريب يا احمد بجد انا مش قادر افهمك، اللي يشوف رد فعلك يقول انك بتحب هنا
مؤمن..... فارس ياريت ننهي الخلاف ده فورا وكل واحد يعرف غلطه واتمنى انه ميأثرش على علاقتكوا ببعض
احمد.... أنا داخل اوضتي ارتاح بعد اذنكوا
فارس بصله باستغراب واستأذن ومشي
مؤمن كمل شغله مع العمال وطلعوا كل العفش وبعد مخلص قفل شقه عايده وراح عند ناديه
مي فتحت الباب
مي.... مؤمن.،تعالي ادخل
مؤمن.... بضيق، خالتي ناديه فين
ناديه تعالي يا مؤمن
مؤمن... ده مفتاح شقتك ياخالتي (عايده) نقلنا كل العفش وكله تمام وان شاء الله هنفرشها واحده واحده، ووجودك الفتره دي مع خالتي ناديه افضل كتير
عايده... تسلم من كل شر يا حبيبي
ناديه.... متقعد يا مؤمن رايح فين
مؤمن.... معلش يا خالتي جسمي ودراعي شادين عليا قوي ومحتاج ارتاح، محتاجين مني حاجه تاني
هنا.... مؤمن انا عايزه اتكلم معاك
مؤمن.... بس انا مش عايز،، بعد اذنكوا
وسابهم وخرج وكله زعل على زعل مؤمن
هنا دمعت وزعلت ان مؤمن لأول مره في حياته ميسمعلهاش، وانها زعلت احمد للدرجه دي بغبائها
ومي زعلانه لانه مش بيكلمها نهائي ومتجاهلها تماما
مؤمن دخل لأحمد اوضته
مؤمن.... احمد انت ليه عملت كده
احمد... عملت ايه ده جبان ومعندوش دم
مؤمن.... بس انت زودتها قوي ورد فعلك غير طبيعي
احمد... انت كمان هتقول زيه
مؤمن بصوت عالي.... لانه فعلا كده،،،، طيب انا اهو وهنا اختي زي ماهيا اختك،، ليه معملتش زيك ليه رد فعلي كان اهدي منك،، لانها اختي بجد مش حاجه تانيه
احمد.... تقصد ايه بحاجه تانيه
مؤمن.... احمد فكر مع نفسك وحدد مشاعرك لكن كده مينفعش انت بتظلم جميع الأطراف
احمد.... أطراف ايه يا مؤمن، انت ليه مكبرها قوي كده
مؤمن.... لأنها كبيره ولازم تعرف ده، احمد انت بتظلم نفسك قبل أي حد، ده غير ظلمك لهنا وندى
لازم تقرر انت هتعمل ايه بالضبط اظن انت فاهمني،، وسابه ومشي
احمد... فكر كتييير مع نفسه وكل اللي مجننه رد هنا على فارس وقام فجأه وقال
يعني هنا ممكن تتجوز فارس.. لا، مش ممكن، مستحييييل
وطرد الفكره من دماغه وقرر يقوم يتوضي ويصلي ويتمنى من ربنا يلهمه الصح
*************
عند مي وهنا
هنا..... أنا اسفه يامي،، انا السبب في المشكله اللي بينك وبين مؤمن
مي.... لو عايزه تتأسفي ياهنا اتأسفي لنفسك، لأنك غلطتي في حق نفسك لما وافقتي تركبي مع حد غريب، اتأسفي لنفسك لما أحرجتي احمد وعاندتي معاه ونصرتي فارس عليه وعلى مؤمن كمان،، للأسف ياهنا انتي غلطتي في حق نفسك مش في حق أي حد فينا، اما عن زعل مؤمن، فربنا هيصلح الحال وشويه وهيروق ان شاء الله، ربنا يهديكي ياهنا، وسابتها ومشيت
هنا عيطت بصوتها كله ومي سمعتها لكن محبتش تروح تخفف عنها، عشان تعرف غلطتها وتعرف ان الكل مش عجبه اللي هي عملته
تاني يوم الصبح للكل راح على شغله
مي قابلت مؤمن على السلم
مي... مؤمن انت هتروح ليه وانت تعبان
مؤمن.... براحتي وبعدين انا اللي تعبان ولا انتي،، ياريت توفري خوفك لنفسك
هنا.... مؤمن انت ليه بتكلمها كده،، لو في حد غلطان يبقى انا لكن هي لا
مؤمن..... هنا انا مش عايز اتكلم في حاجه ويلا عشان اوصلكوا،، ولا مستنين حد يواصلكوا
مي.... مؤمن لحد كده وكفايه، المفروض قبل متزعل مني تيجي وتسألني ايه اللي حصل
وانا مسمحش انك تكلمني كده وعموما انا مش هروح الجامعه، بعد اذنك وسابته ودخلت الشقه
هنا.... هي عندها حق، بجد انت غلطان انك مفهمتش منها عموما براحتك يا مؤمن
مؤمن.... أنا غلطان،،، طيب وانتي ايه،، مش غلطانه يا هنا
هنا.... لا مغلطتش هو عرض عليا وقالي اعتبرنا سواق تاكسي هتفرق ايه يا مؤمن
مؤمن... لا تفرق ياهنا لان دي عربيه خاصه بشاب مينفعش تركبي فيها لكن التاكسي عربيه أجره ومعروفه،، ليه تحطي نفسك في وضع مش كويس
هنا سكتت شويه وبعدين قالت... خلاص يا مؤمن مش هتتكرر تاني والله وعلى فكره انا اللي غلطانه مش مي،، مي رفضت تركب وحذرتني،، اوعي تزعل منها يا مؤمن
مؤمن.... إن شاء الله، سيبيها لله،، هتروحي ولا هتدخلي انتي كمان
هنا.... لا انا هروح الجامعه عندي محاضرات مهمه
***** عند احمد في الشركه
احمد..... حسن انا في حسابات ملخبطه انا مش فاهمها وانت مش موضحها
حسن.... حسابات ايه يافندم كل حاجه تمام قدام حضرتك
احمد.... الملف ده محتاج قاعده وتركيز، لكن انا دلوقتي لازم ادخل لمصطفى بيه، ياريت تبعتلي المحاسبين الجداد، عشان يقابلوا مصطفى بيه
حسن.... تحت امرك يا فندم
دخل احمد واللي معاه لمصطفى بيه وكان فارس معاهم
احمد... السلام عليكم يافندم
مصطفى.... وعليكم السلام،، ها يا بطل ايه الاخبار
احمد... كله تمام يافندم وحبيت اعرفك على المحاسبين الجداد
مصطفى.... اهلا وسهلا بيكو،، واتكلم معاهم كتير بخصوص الشغل وبعدين استأذنوا ومشيو
مصطفي.... احمد استنى انا عايزك
احمد.... تحت امرك يا فندم
مصطفى.... احمد، كنت عايز اتكلم معاك شويه بعيد عن الشغل انا معنديش اولاد، وبصراحه على المستوى الشخصي انا مرتاح ليك جدا، وبعتبرك ابني، اما بالنسبه للشغل فأنت لسه محتاج شويه عشان تكسب ثقتي وانا بإذن الله واثق انك هتكون قدها
احمد.... ده شرف ليا اني اكون ابن لحضرتك يافندم،، ربنا يعلم انا بحترم حضرتك قد ايه
مصطفى.... تمام، همتك معانا بقه يابطل وربنا يعينك
*********
في المكتب عند احمد
ندى جايه لأحمد بس ملقتوش في المكتب، حسن شافها دخلها مكتبه
حسن... اتفضلي يا انسه
ندى..... هو استاذ احمد مش موجود
حسن... زمانه جاي اتفضلي ارتاحي وهيجي علي طول،، قعد يتكلم معاها كتير ويضحكوا مع بعض، وندى أعجبت بخفة دمه وانه دايما يتغزل في جمالها ورقتها ( طبعا عكس احمد لانه خنقه بالنسبه ليها)
وطبعا حسن كان فرحان بتجاوب ندى معاه في الكلام عكس هنا اللي رفضت حتى تتكلم معاه او تقف معاه
احمد دخل عليهم.... ندى.... انتي هنا بتعملي ايه
الحلقه ٢٠
من جراح القلب
هنا نزلت الجامعه مع مؤمن وفي الطريق اتكلموا كتير في غلطها وانها سمحت لنفسها تركب مع شخص غريب مهما كانت تعرفه
هنا... خلاص يا مؤمن انا قولتلك اني بعترف اني غلطت بس الشيطان سيطر على تفكيري
مؤمن... انتي قصدتي تدايقي احمد، صح ياهنا ولا لأ
هنا بارتباك... و،، و،، وانا هدايقه ليه، احمد خاطب وبيحب خطيبته،، مش ده كلامك ليا يا مؤمن
مؤمن... هنا انا عارف انك بتحبي احمد وبتحاولي تدايقيه، أو بمعنى أصح تندميه وتحسسيه انه فعلا خسرك يوم مابص لواحده تانيه، وكمان انتي عارفه انه غيور فدخلتي من الناحيه دي، صح ولا ايه
هنا سكتت وبصت في الأرض...
مؤمن... اظن انه صح لكن انا بقولك ده أكبر غلط، ولو عايزه تفوقي احمد يبقى متقلليش من نفسك ولا تحطي نفسك في موقف غلط لازم دايما تبقى بطبيعتك وأخلاقك اللي اتربيتي عليها، احمد عارفك كويس ياهنا و اي سوء تفاهم بينكو اكيد هياخد وقته ويختفي، متسبيش موقف وحش يفتكرك بيه خلي كل مواقفك معاه بطبيعتها وكلها بتبينك علي حقيقتك، فهمتيني يا هنا
هنا... فهمتك يا مؤمن، انا هحاول أصلح الموقف، وربنا يسعده، صدقني يا مؤمن انا عمري مفكر اني اخد احمد من ندى، ولا عمري ابقى الشخصية دي ابدا، ربنا يسعدهم مع بعض يارب
مؤمن عارف ومتأكد ان احمد بيحبها هي، لكن محبش يتكلم في الموضوع ولا يعلقها،
هنا قررت انها تخلص المحاضره وتروح الشركه تعتذر لأحمد عن إحراجها ليه، لكن في الحقيقه هي نفسها تقعد وتتكلم معاه
وفعلا خلصت المحاضرات واستاذنت من أصحابها
هنا... أنا همشي يابنات مش عايزين مني حاجه
سلمي... استنى يا هنا انا هاجي معاكي
هنا.. حلو قوي يلا بينا، وانتي يا ولاء احضري باقي المحاضرات وقوليلنا،
ولاء... حاضر، انا كده كده نادر احتمال يعدي عليا
سلمي... اشطا ياعم سيادة الظابط هيعدي عليكي هههههه
ولاء.. أعوذ بالله،، قل أعوذ برب الفلق، ههههههه
هنا... يالا يا سلمى قبل البت ولاء ميجرالها حاجه من قرك ده، وضحكوا كلهم
وهنا وسلمي مشيوا
**********
في الشركه عند احمد
احمد... ندى انتي هنا بتعملي ايه
ندى.... احمد، ده انا رحت مكتبك ملقتكش، استاذ حسن قالي انك عند مصطفى بيه، وبصراحه هو ذوق جدا، قعدني في مكتبه على متخلص شغلك
حسن... حضرتك تؤمريني يا انسه ندى، كفايه انك خطيبة استاذنا، ومديرنا، وبص لأحمد يشوف رد فعله
لكن احمد كان في منتهى البرود، ومحبش يبين ضيقته قدام الموظفين
احمد... طب اتفضلي في مكتبي يا ندى
اول مدخلوا المكتب
ندى..... احمد وحشتني قوي
احمد.... وانتي كمان يا ندى
ندى... لو كنت وحشتك كنت اهتميت بيا وكلمتني
احمد... انتي دايما سهرانه طول الليل واوقات كتير بتصحي متأخر،، اكلمك امتي بقه
ندى... افضيلك نفسي يا حبيبي
احمد... امممم المهم، عمي مراد عامل ايه
ندى.... الحمد لله، والله بيسالني عليك على طول
احمد... ويا ترى بتقوليله ايه (وابتسم بحزن)
ندى... انت ليه بتكلمني كأني انا اللي مقصره ، مش انت
احمد... وانتي ليه كل غلط يبقى انا السبب فيه، ندى انا احب خطيبتي او مراتي، ابقى انا محور اهتمامها،، ابقى عارف عنها كل تحركاتها، اول متصحي تكلمني، وقبل متنام،تكلمني، وقبل متخرج اكون عارف رايحه فين، يعني ببساطه ابقى شريك معاها في كل حركه بتعملها، للأسف مفيش حاجه من دي بتحصل، انتي في دنيا تانيه غير دنيتي،
ندى.... دنيا تانيه ازاي، انا معاك يا احمد بس انت اللي مش مهتم،
احمد.. أنا،!!! انا يوم مقولتلك مخنوق معبرتنيش، وقولتي انك قاعده مع ناس هاي كلاس، وهو ده كل اللي يهمك،، بصي يا ندى اظن ده مش وقت كلام دلوقتي، انا عندي شغل، بعدين نبقى نتكلم
ندى... كل مره تقولي كده وتقفل الكلام من غير منكمل،.
احمد... لأنك دايما بتختاري اوقات مش مناسبه للكلام
رشا دخلت في اللحظه دي
رشا... استاذ احمد، انا اسفه لدخولي، بس في واحده بتقول اسمها هنا وعايزه تقابل حضرتك
احمد... هنا!!!!! طيب خليها تتفضل
ندى... ودي جايه ليه أن شاء الله
احمد بصلها بنفاذ صبر وسكت
هنا... السلام عليكم،( واتفاجئت هنا بوجود ندي)
احمد.. وعليكم السلام، اتفضلي ياهنا
ندى.. اهلا، خير يا هنا في حاجه
هنا بغيظ... كنت عايزه احمد في موضوع، لكن من الواضح اني جيت في وقت مش مناسب
ندى... هو انتي على طول أوقاتك مش مناسبه، وبعدين موضوع ايه اللي حضرتك عايزه تتكلمي فيه مع خطيبي
احمد... ندى، اظن هي جايه وعايزاني في موضوع مش من حقك تسأليها ايه هو، تعالي يا هنا اقعدي
هنا قعدت، وندى بصتلهم بغيظ شديد وقعدت، مع انها كانت هتمشي
هنا.... احمد انا هروح اسلم على مصطفى بيه، وبعدين ارجع تكونوا خلصتوا كلامكو
ندى... على فكره انا مش همشي يا هنا يعني لو حابه تتكلمي، اتكلمي دلوقتي ومتضيعيش وقت
احمد... هنا لو الموضوع مش حابه تتكلمي فيه قدام حد، خلاص استنيني لما ارجع البيت ونتكلم براحتنا
ندى قامت وقفت بغيظ.. يعني ايه يا احمد انت كده بتطردني
احمد... لا طبعا انا مقولتش كده انتي بس اللي حساسه زياده عن اللزوم،
ندى... ماشي يا احمد، انا سيبهالك وماشيه
هنا... استنى يا ندى،، ندى،، ندى
الحقها يا احمد عشان متزعلش
احمد... سيبك منها، محدش فينا زعلها، هي بتتدخل في اللي ملهاش فيه،
المهم كنتي محتاجه ايه مني
هنا... احمد انا،، انا،، انا بصراحه عايزه اعتذرلك عن موقف امبارح
احمد... هنا،، ، هو انتي ممكن توافقي على فارس لو اتقدملك
هنا بصدمه من السؤال.. فارس،، ليه بتسأل يا احمد
احمد... عايز اعرف بس،، اعتبريه اطمئنان عليكي مش اكتر
هنا....بتفكير،، لو هو إنسان كويس ليه لأ
احمد... امممممم، عموما ربنا يوفقك يا هنا،، واتمنى انك تختاري صح بقلبك ياهنا، مش بعقلك
هنا.... قلبي،، قلبي اتقفل من زمان يا احمد، وكل قراراتي دلوقتي، المتحكم فيها عقلي وبس
احمد.... هنا انا تعبت من أسلوب حياتنا ده ، انا مش عايز علاقتنا تبقى كده
هنا... مش وقت كلام يا احمد دلوقتي، واتمنى انك تصالح ندى، لأنها بتحبك، بعد اذنك مضطره امشي
احمد.. استنى شويه ونروح مع بعض
هنا... لا معلش سلمي معايا وهروح معاها
هنا خرجت وشافت سلمي واقفه مع فارس
سلمي... ازيك يا استاذ فارس
فارس... اهلا وسهلا بحضرتك، مش تقريبا حضرتك صاحبة هنا
سلمي... ههههه ايوه بالضبط كده،، كويس انك لسه فاكر
فارس... هههه لا في ناس مبتتنسيش خالص واكيد حضرتك منهم
سلمي... ربنا يخليك يارب، هو انت اتعينت هنا
فارس... ايوه ياستي احمد عيني الحمدلله
سلمي... مبروك يا فارس،، ده لو تسمح اني اتكلم من غير القاب
فارس... أنا ليا الشرف طبعا
سلمي... اتكسفت،، ربنا يخليك طيب عن اذنك لان هنا مستنياني نمشي
فارس بص لقى هنا واقفه بعيد مستنيه يخلصوا. اتحركوا وقربوا منها
فارس... ازيك ياهنا، عامله ايه
هنا... الحمدلله يافارس،، (وبصت لسلمى) ها هنمشي ولا قاعده
سلمي... لا جايه معاكي، يلا بينا
فارس.... طيب استنوا كلها نص ساعه ونخلص ونمشي كلنا مع بعض
سلمي فرحت لأنها معجبه بفارس من اول مره شافته، لكن هنا رفضت
هنا... اسفه يافارس انا لازم امشي عشان متأخرش
فارس،، طيب انتي ردك امبارح ده كان آخر كلام ياهنا،، انا فهمت منه انك رفضتيني بس بالذوق
هنا... بص يافارس بوضوح، انا مش بفكر في اي حاجه حاليا ولا عندي استعداد ادخل في اي علاقه من اي نوع، ياريت بجد متزعلش مني
سلمي واقفه مصدومه وبصت لفارس
سلمي... فهموني، علاقة ايه اللي بتتكلموا عنها
هنا.... هبقي افهمك بعدين يا سلمى
فارس بص لسلمى، ولقى رد فعلها غريب كأنها مصدومه
سلمي... اوك ياهنا يلا بينا، وبصت لفارس بصه، مقدرش يفهم معناها
ومشيت هنا وسلمي، وطول الطريق سلمي ساكته ومش حابه تتكلم في حاجه عشان متتصدمش اكتر
وهنا تقريبا فهمت ان سلمي معجبه بفارس
لكن حبت تفوق صاحبتها
هنا..... بت يا سلمى، مش فارس امبارح قالي انه معجب بيا
سلمي... بدموع،،، اممممم ماشي ياهنا وانتي ردك ايه
هنا... بت يا سلمى مالك انتي بتعيطي
سلمي،، لا ابدا مفيش حاجه
هنا،،، اتكلمي بصراحه، انتي بتحبي فارس
سلمي... ليه بتقولي كده ياهنا
هنا.. انتي مش شايفه شكلك وصدمتك اول متكلمت انا وفارس
سلمي.... بعياط،، هنا فارس من اول يوم شوفته فيه وانا أعجبت بيه، غير انه جه كتيير قوي الجامعه وكنت بشوفه وبتابع كل تحركاته، حاسه انه خطف قلبي بجد، حاسه اني بفرح لما بشوفه، لكن بصراحه اتصدمت لما قولتي كده،، عموما ربنا يوفقكوا
هنا... سلمي حبيبتي انا عارفه انه صعب الاحساس اللي بتحسيه دلوقتي، لاني مجرباه وعايشه فيه، لكن فارس مش بيحبني ولا حاجه، فارس مجرد معجب بس، يعني معجب بأخلاقي معجب باسلوبي في التعامل، بصي ياسلمي اللي زي فارس يحب البنت الصعبه، اللي تتعبه على ميوصل ليها، اللي بجد يحس انه خلاص مش قادر يكمل من غيرها، وعلى فكره تقريبا كل الشباب كده، مش فارس بس، سلمي،، انتي قدامك فرصه تشدي فارس ليكي، باهتمامك بس ميكونش مبالغ فيه، وبادبك، ومحافظتك على كل الحدود اللي المفروض تبقى بينكو، خليكي دايما غاليه في عنيه، اوعي حبك يضعفك يا سلمى
سلمي.... انتي ليه بتتكلمي بوجع يا هنا، انا حاسه ان كل كلامك بتوجهيه لنفسك قبلي ، لأنك بتحبي احمد، مش كده ولا انا متهيألي
هنا بوجع... كده ياسلمي، لكن للأسف مش من حقي احبه، لكن انتي موقفك غيري، حاولي تشدي فارس ليكي،بأدب واحترامك وأخلاقك ياسلمي مش بحاجه تانيه، وربنا ينولك اللي في بالك ياحبيبتي
سلمي ابتسمت.. يارب، انا وانتي ياهنا،
هنا روحت البيت واتكلمت مع مي كتير وقلتلها متكبرش الموضوع مع مؤمن
واحمد رجع من شغله عدي عليهم عند ناديه وسلم على الكل وكانت والدته معاهم وهو خارج لمح كتاب عن الشعر، فتحه وبيقلب فيه لقى ورقه وقعت منه مكتوب فيها
لم يكن هجري لك من فراغ؛ كان عن عمد، نعم.. قصدته وكنت أرتب له منذ فترة بعيدة، لعلك تتعجب من كلامي الآن! ولعلك ظننت الصبر لم يعتصرني فتراتٍ وفترات، لقد التمستُ لك جميع الأعذار، وأرغمت قلبي على الأذى من أجلك، وقلت:
غدًا ستعرف قدري، أو بعد غدٍ ربما، مر الغد وبعد الغد وأنت أنت، لم تتغير ولم تنتبه أنني في أشد لحظاتي ألمًا ووجعًا منك، ولكنك ما رأيت! أنا ما طلبت منك شيئًا فوق طاقتك، ولا تمنيت أكثر من حقي معك، كنتَ قاسيًا غليظًا مُهمِلًا، وأنا والله كنت فقط أود أن أهدأ أو أطمئن.. أكان كثيرًا عليَّ أن أطمئن؟! لا سامح الله خرابًا زرعته يداك بداخلي، وضياعًا لروحي، وجُرحًا أصابني منك؛ لو عشت ألف عام ما بَرِئَ وما طاب.
احمد قرأه واتنهد وعرف ان الكلام ليه لان اسمه مرسوم بطريقه جميله، لكن هو موجوع قوي ومش عارف يعمل ايه، هو بيحب هنا بجد وفعلا مبقاش قادر يستحمل
خرج وراح على اوضته يفكر، وبعد تفكير قرر
انه لازم يعرفها ويحط حد لعلاقته بندي
عدي اليوم ومؤمن مكلمش مي كنوع من العقاب وطبعا ده دايق مي جدا، لكن حاولت انها كمان تتجاهل مؤمن ومتحاولش تكلمه
تاني يوم مي نزلت الجامعه قبل هنا ومؤمن وهي قاصده ده عشان تدايق مؤمن
مؤمن.. مي فين ياهنا
هنا.. أنا فكرتها مشيت معاك، دي نزلت من بدري
مؤمن... امممم ماشي ماشي، يلا بينا ونبقى نقابلها هناك
مشيوا الاتنين
مي قاعده في المدرج وشافت مؤمن داخل، لكن تجاهلته تماما
بعد محضروا المحاضره، خرجت مي وراحت كلية هنا
مي.... السلام عليكم يابنات، اخباركو ايه وحشتوني
ولاء وهنا وسلمي.. وعليكم السلام، انتي كمان وحشتينا اكتر
هنا... انتي نزلتي بدري ليه يا ندله
مي... عادي انا قلت اسيبك براحتك
قاطعهم أدهم
أدهم... السلام عليكم، ازيكوا يا بنات
البنات.. ازيك يا أدهم
أدهم... ها قررتو ايه، عايز اعرف عشان لو وافقتو ا يبقى كده العدد اكتمل، ولو. لا، اشوف حد غيركو يطلعها
مؤمن... سمع كلامه،، وقال،، وافقوا ياكابتن خلاص بس فيه مشكله (مي في اللحظه دي بصتله وفرحت قوي)
أدهم... نتعرف بس الاول، انا اسمي أدهم،
مؤمن.. وانا مؤمن، كلية هندسه
أدهم... تشرفنا،، بس ايه المشكله اللي بتتكلم عنها
مؤمن... إن حضرتك قولت بيهم هيبقى العدد اكتمل، طيب واللي حابب يطلع معاهم
أدهم... مفيش مشكله هنظبطها متقلقش، قولي بس قد ايه هيطلع زياده
مؤمن... أنا، وبص لولاء،، ها ياولاء نادر هيطلع
ولاء... لحد دلوقتي مش عارفه بس ثواني هعمل مكالمه وارد عليكو
استنوا ولاء وجت وقالت إن هي وخطيبها هيطلعوا معاهم
وكله كان فرحان بالذات مي اللي كانت هطير من الفرحه ان مؤمن محبش يزعلها ووافق
مؤمن راح لمى.... ينفع تنزلي من غير متقوليلي ولا حتى تستنيني
مي.بكسوف... انت اللي زعلان ومحبتش ادايقك
مؤمن بصلها بعشق... مي مهما كنت زعلان منك، متحرمنيش من بصة عنيكي، دي اللي بتديني دافع اكمل يومي، مي انا زعلت لاني بحبك وبغير عليكي، ومحبش حد يتكلم معاكي ولا حتى يبصلك، ممكن تكون غيره زياده، لكن انا بحاول اتحكم في اعصابي، فمتضغطيش عليا زياده، وياريت مهما كنت زعلان متسيبنيش وتمشي، حاولي تسيطري على غضبي، يابت والله بحبك
مي... مؤمن،، انا كمان والله بحبك قوي، واسفه لو دايقتك وصدقني عمري مهعمل حاجه تدايقك تاني
مؤمن... حيث كده يلا بينا نتغدى مع بعض النهارده
مي،.. طب وهنا
مؤمن.. تعالي نقولها تيجي معانا
وقالو لهنا لكن رفضت تروح معاهم وسابتهم على راحتهم
وجه يوم الرحله،
وسلمي رايحه لعمها بس نفسها تشوف فارس
دخلت لعمها وسلمت عليه وهي خارجه لمحت فارس في ممر الشركه
فارس... سلمي،، سلمي
سلمي... خير يا استاذ فارس حضرتك بتنادي عليا
فارس.. استاذ!!! احنا مش قولنا بلاش استاذ دي
سلمي... اممم، اوك، خير في حاجه
فارس.. َمالك انتي زعلانه من حاجه
سلمي... لا ابدا انا بس مستعجله،
فارس.. خير هو فيه حاجه ولا ايه
سلمي... ابدا، بس انا طالعه رحلة سفاري انا والبنات، ومؤمن اكيد تعرفه، فبصراحه لازم اجهز حاجتي
فارس... حلو قوي لو كنتي قولتيلي كنت حاولت اطلع معاكو
سلمي ردت بسرعه... لا مهو ممكن تطل
وسكتت واتكسفت من رد فعلها
فارس.... امممممم،، يعني ممكن اطلع معاكو عادي؟
سلمي.. ده لو تحب يعني
فارس... احب جدا، اوك ممكن رقم تليفونك وبعد مخلص شغل اكلمك واعرف التفاصيل
سلمي عرفت فارس الرقم ومشيت وهي في قمة الانبساط من اللي حصل
اما فارس،، مش عارف ليه عمل كده يمكن عشان يبقى مع هنا ويشوفها!!
احمد روح البيت لقاهم كلهم جاهزين ونازلين
احمد.. هنا خلي بالك من نفسك
هنا.. إن شاء الله يا احمد، وبعدين مؤمن معانا
متقلقش
مؤمن.. يلا يابنات عشان منتأخرش وفعلا مشيو كلهم
احمد دخل اوضته ولقى ندى بتكلمه
احمد... الو ازيك ياندي
ندى...أنا تمام الحمدلله، ازيك انت يا احمد
احمد.... أنا بخير،. ايه مال صوتك كده
ندى.. مدايقه يا احمد،
احمد.. ليه خير يا ندى
ندى... مدايقه منك، مدايقه من تجاهلك ليه، مدايقه من بعدك عني، انت ليه بتعمل كده، كل ده عشان هنا
احمد بصدمه... هنا؛!!! وايه دخل هنا في الموضوع، ندى، احنا بجد مش قادرين نفهم بعض، انتي مش عايزه تغيري اسلوب حياتك، وانا مش قادر اأقلم نفسي على اسلوبك،
حاولت ومش قادر
ندى.. يعني الحل ايه يا احمد
احمد... ياما تتغيري وتعيشي حياه طبيعيه وتهتمي بيا زي اي واحد وواحده،، يا اما.....
ندى.... يا اما ايه يا احمد!!
الحلقة الحادية والعشرون من هنا