الحلقه التاسعة عشر
روايةقلوب تنزف عشقاً
بقلمي :عبير سليم
😰😰😰😰😰😰
يدخل الفيلا ويرمي بنفسه على أحد المقاعد يفك ربطة عنقه ويقذفها باهمال
تأتي من خلفه بوجهها الباسم وهيئتها الانثويه الصارخه التي اعتاد عليها
تضع يديها على كتفه وتدلكهم له برقه :حبيبي مالك في إيه شكلك مضايق
يامن:انا مش مضايق انا حنفجر من اللي انا فيه
شاهنده:حبيبي وجوزي أنا مضايق طب تيجي ازاي دي معقوله تبقى زعلان أو مضايق وانت متجوز شاهنده السمري
يامن:طبعا ياحبيبتي وجودك فحياتي أهم شئ في الدنيا وهو ده اللي مصبرني بس معرفش اللي بيحصل معايا ده تفسيره ايه
تتحرك لتجلس أمامه واضعه قدما على الاخرى :والله شوف انت بقى انا عن نفسي عملت معاك كتير وانت شفت بنفسك الصفقات اللي جبتهالك رفعت اسهم الشركات ازاي وبقى اسم الشريف ملعلع في السما
يامن:أيوة فعلا ياحبيبتى ياااه ده انا بعد ماكنت حاسس ان الدنيا باظت بعد موت راغب انتي بفضلك علية ووقفتك معايا رجعت الشركه احسن من الأول واسمها بقى زي الطبل
شاهنده :وإيه اللي حصل بعد كده
يامن :مش عارف ياشاهنده مش فاهم في إيه كل مااتفق على صفقه ونبقى على توقيع العقوم تتعطل فاخر لحظه
مش ممكن تكون مجرد صدفه استحاله انا قلبي بيقوللي ان في حد ورا كل المصايب اللي بتحصل دي
شاهنده :مش يمكن تكون مزعل حد منك وهو اللي بيعمل معاك كده
يامن :وانا حزعل مين يعني ده انا حتى بتعامل مع الكل بشكل كويس عشان مخسرش حد
شاهنده:انت حتقوللي ده انت أستاذ في التعامل الكويس
ده انت مش شاطر في حاجه غير بوس الأيادي
يمسك يديها ويقبلها:حبيبتي انا محتاجك أوي جمبي
شاهنده:طب مانا جمبك من قبل حتى مانتجوز ووقفت جمبك كتير
يامن :عارف ياحبيبتي ربنا يخليكي لية بس انا دلوقتى محتاجك بجد محدش حيقدر ينقذني من اللي انا فيه زيك انتي الوحيده اللي حتقدري تتصرفي وترجعيني اقف على رجلي زي الأول
شاهنده:وانا اعملك إيه بس يايامن مش انت بتقول ان هما بيتفقوا معاك وبيرجعوا فكلامهم انا مالي بقى حروح يعني اتحايل عليهم واقولهم عشان خاطري مترجعوش فكلامكم
يامن :حبيبتي انا عارف ان اتصالاتك كبيرة ومعارفك كتير وتقدري تقنعيهم يشتغلوا معايا
شاهنده:والمقابل
يامن :عينيه ليكي شوفي عاوزة ايه
شاهنده:نص الشركات
يامن:نعم انت إيه اللي بتقوليه ده
شاهنده:يعني انت عاوزني اعمل كل ده ومش واثق فية خلاص ياحبيبي شوف حالك مع نفسك بقى
يامن :شاهنده اللي بتطلبيه ده غالي أوي
شاهنده:وانا الغالي يرخصلي ياحبيبي وبردو على كيفك اعمل اللي يريحك
طب اقولك حاجه مش انت كل يوم بترجعلي متأخر وبتقوللي سهران مع اصحابي طيب خللي اصحابك بقى دول هما اللي يشوفولك شغلك
يامن :حبيبة قلبي اصحابي دول بسهر معاهم سهرة حلوة لكن معرفش اعتمد عليهم فحاجه لكن انتي
شاهنده:انا ايه ياقلبي انا مينفعش تسهر معايا زي اصحابك واللا انت شايفني كبرت ومش اد السهر
يامن :كبرتي ده إيه فشر اللي يقول عليكي كبرتي هو انتي في فحلاوتك واللا جمالك بس يعني
شاهنده :بقولك إيه يايامن انت عارفني مبحبش الكلام الكتير وانا قلت اللي عندي تنفذ اللي طلبته من بكرة حتلاقي الصفقات نازله عليك زي المطرة مش موافق خلاص ولايهمك ياحبيبي متزعلش نفسك بس شوف نفسك مع نفسك بقى
مش بيقولوا كل واحد ينام عالجنب اللي يريحه
يامن:وانا مبلاقيش راحتي غير معاكي ياست الكل خلاص حاضر اللي تقولي عليه بس تلحقيني
شاهنده:تمام بكرة العقود حتكون جاهزة تمضي واشوف انا بقى شغلي
يامن :طب بقولك ايه مادمنا اتفقنا خلاص ماتيجي نطلع فوق نحتفل بالاتفاق ده
شاهنده :لاياروحي مش فاضيالك انا خارجه
يامن:رايحه فين دلوقتي
شاهنده :مشوار خاص يايامن
يامن :أيوة بس انا جوزك ومن حقي أعرف
شاهنده :من حقك إيه
لا ياقلبي انت عارف ان مش شاهنده اللي تاخد اذن من حد ولو انا عاوزة اقولك حقول من غير ماتسال ومادمت مقلتش متسالش سلام
تتركه وتخرج دون ان تنتطر جوابه
يامن لنفسه :ماشي ياشاهنده تظبطيلي الشغل بس وحوريكي يامن حيعمل فيكي إيه
بقى عاوزة تاخدي نص الشركات طب وحياتك اني انا اللي حاخد حياتك كلها الصبر طيب يا شاهنده
🌹🌹🌹🌹🌹🌹🌹
في داخل الفيلا التي يقيم بها حمزة وسيلا
مانتي عارفه ياداده اني أنا وسيلا منقدرش نستغنى عنك لحظه
الداده:معلش يابني أهلى وحشوني أوي بقالي سنين طويله مشوفتهمش
نفسي أقعد معاهم واطمن عليهم
حمزة:انتي سافرتي إيطاليا وانتي صغيرة ياداده
الداده :كان عندي ييجى عشرين سنه وقتها جوزي الله يرحمه مكنش لاقي شغل فالبلد وحاله كان واقف سافر اشتغل وبعد شويه جه خادني كان شغال عند ناس كويسين أوي وكانوا بيعاملونا كأننا منهم وعدت سنين وسنين واتعودنا عالعيشه معاهم ولما جوزي الله يرحمه مات فضلت عندهم ممشيتش لحد ماالراجل ومراته الله يرحمهم ماتوا ساعتها ولاده قسموا الورث وباعوا كل حاجه وكل واحد راح فحته والصراحه كان كل واحد فيهم عاوزني معاه وانا مكنتش عارفه اعمل ايه
لحد ماربنا حلها من عنده الست صوفيا الله يرحمها كانت من معارفهم وكانت بتشوفني على طول ودايما كانت حنينه علية وكانت كل ماتشوفني تطلب مني ادعيلها أن ربنا يكرمها وتخلف اكمنها هي والبشمهندس ربنا يشفيه يارب كانوا لسه ربنا مكرمهمش
ولما لقت الولاد كل واحد فيهم حيعيش فمكان طلبت مني اروح عندهم وانا الصراحه مقلتش لاء والحق يتقال من ساعة مادخلت البيت عندهم عمرهم ماحسسوني اني خدامه عندهم الله يرحمك يا ست سيلا ويغفرلك ويسامحك يارب
كانت بتحسسني كأني أمها تسمع كلامي وتشورني وحتى لو زعلت مع البشمهندس فحاجه مع ان دي كانت قليل لما بتحصل كانت تحكيلي وتسمع مني
عشت معاهم وتونست بيهم وبقوا هما كل اهلي
حمزة :طب وأهلك ياداده كانت علاقتك بيهم إزاي الفترة دي كلها
الداده :أهلي غلابه أوي وانا والله عمري مانستهم كل أول شهر ببعتلهم اللي ربنا يقدرني عليه اصلي حشيل لمين انا ربنا مرزقنيش بولاد وأهلي أولى
حمزة:وهو في حد زي سيلا الله يرحمها والبشمهندس جابر
خلاص ياداده روحي شوفيهم بس اعملي حسابك هما كام يوم وترجعي على طول
الداده :ان شاء الله يا بني
حمزة :السواق حيروح معاكي يوصلك للبيت اللي حتكوني فيه وأول ماتحبي ترجعي حبعتهولك يجيبك
وانا حكلمك باستمرار اطمن عليكي
الداده:ربنا يكرمك يارب يابني ويخليك لسيلا يارب
صوفيا:حمزة انت مش حتروح الشركه بقى الموظفين لازم يشوفوك ويتعرفوا عليك
حمزة:حاضر ياصوفيا بكرة ان شاء الله حكون في الشركه
صوفيا :على فكرة الشركه محتاجه موظفين خبرة واكتر اللي موجودين لسه خريجين ومحتاجين تدريب
حمزة :مفيش مشكله نعمل اعلان عن موظفين خبرة وهما اللي يقوموا بتدريب الشباب على الشغل
صوفيا :تمام ياحمزة انا حمشي بقى دلوقتى
حمزة :ماشي ياصوفيا اشوفك بكرة في الشركه
صوفيا :أوكيه سلام
ثم تسلم على الداده وتضع مبلغا في يديها:خللي دول معاكي ياداده
الداده :ليه كده يابنتي انا معايا والله وحمزة ربنا يكرمه مش مخليني عاوزة حاجه
صوفيا:انا مليش دعوة بحمزة ياداده دي حاجه مني انا عشان تجيبي حاجات حلوة وانتي رايحه لأهلك
الداده:بس ده كتير اوي يا بنتي
صوفيا :داده هو انا يعني مش زي بنتك
الداده :بنتي ده كتير علية اوي يابنتي هو انا كنت اطول يكون عندي بنت زيك كده ربنا يكرمك ويسعدك ويعللي مراتبك يارب
صوفيا :الله على الدعوة الحلوة دي اهو انا بقى مش عاوزة غير كده ياللا سلام بقى
تتحرك صوفيا ناحية السيارة الخاصه بها
حمزة:داده ياداده
الداده:ايوة يابني انا أهوه
حمزة:انتي رحتي فين
الداده :كنت بوصل البشمهندسه صوفيا وادتني دول وكنت بشكرها
بت حلال اوي ربنا يسعدها يارب
حمزة :صوفيا انسانه طيبه ومحترمه وكفايه انها كانت اد ثقتي فيها
الداده :طب مادامت عجباك كده ماتتجوزها يابني دي بنت حلال أوي
حمزة:اتجوزها كده علطول ههههههه والله انتي عسل ياداده
الداده:انا عارفه انك لسه منستش البنت اللي كنت بتحبها زمان بس زي ماهي نسيتك واتجوزت انت كمان شوف حالك يابني واتجوز
حمزة:وانتي عرفتي منين بقى اني منستهاش
الداده :احساسي يابني
حمزة :مش بالسهوله دي ياداده صدقيني لو كنت أقدر كنت عملتها من زمان
داده :لسه بتحبها يابني
حمزة وهو يمسح دمعه من عينيه :غصب عني مش بايدي حاولت اطلعلها من قلبي كتير مقدرتش حبها ساكن جوة قلبي محفور فيه استحاله يطلع منه
الداده :بص يابني مينسيش الواحده واحده بيحبها غير واحده زيها ايوة اسمع مني وانت تكسب الست تتنسى بست زيها
وحتى عشان خاطر سيلا يابني البنت محتاجه أم
حمزة :ياحبيبتي ياسيلا
طب بقولك ايه سيبك مني وقوليلي ناويه تسافري امتى
الداده :بكرة ان شاء الله
حمزة:تروحي وتيجي بألف سلامه
يصعد حمزة لغرفة سيلا يقوم بوضع الغطاء عليها جيدا ويقبلها ويتجه لغرفته
وهو هائم في ذكرياته مع من هواها القلب وعشقها الفؤاد
🌹🌹🌹🌹🌹🌹🌹🌹
ليه بس كده ياياسمين طب فكري تاني يمكن تغيري رأيك
ياسمين :سامي الله يخليك انا قلتلك ردي أكتر من مرة وانت اللي كل شويه تكلمني في الموضوع ده وانا لو قعدت مليون سنه مش حغير رأيي ممكن بقى تريح نفسك ومتتكلمش فالموضوع ده تاني
أسامه :الحق علية يعني اني عاوز مصلحتك
ياسمين :وانا عارفه مصلحتي كويس ياسامي
سامي :ياسمين انتي عارفه غلاوتك عندي عارفه واللا مش عارفه والله شكلك مانتي عارفه حاجه
ياسمين :هههههه لا عارفه والله
سامي :تمام يعني انتي عارفه ان غلاوتك من غلاوة المتخلفه سحر والمخفيه سميرة اللهم احفظنا يارب يالهوي لو سمعتني مش بعيد تولع فية
ياسمين :ههههه وربنا سميرة دي عسل
سامي :وربنا انتي اللي عسل وسكر قلتي إيه بقى ياسكر
تخرج إليهم صفاء:ريح نفسك بقى ياسامي يابني ومتوجعش قلبك ياسمين مش حتوافق
سامي:بس كده هي بتظلم نفسها ياخالتي وانا والله لو ماكنت متأكد من أخلاقه كويس وعارف انه يستاهلها مكنت دخلت نفسي فمشوار زي ده
يابت ياعبيطه يحي طيب ومحترم وابن ناس وبيحبك أوي وحيعيشك ملكه
ده غيرنا خالص واد كده ابن ناس ومتربي عالغالي يكش بس هو اللي فقري وبيحبني ومتمسك بصداقتي
صفاء :ده من حظه هو ياسامي انك مصاحبه هو في فاخلاقك
سامي :ربنا يخليكي ياست الكل طب همتك معانا بقى نقنع البت دي تتجوزه
ياسمين :سامي الله يخليك انا بجد اتخنقت من الكلام فالموضوع ده قفل بقى
سامي :لا حول ولا قوة الا بالله ياربي والله انتي مش وش نعمه
ياسمين :شكرآ ياسيدي
سامي:انتي زعلتي انا بهزر معاكي والله ياياسمين
ياسمين :عارفه والله ياسامي طب ربنا يعلم اني كنت اتمنى يبقى عندي اخ زيك بس للأسف ربنا حكم علية باخ ياللا منه لله حسبي الله ونعم الوكيل فيه
صفاء :متدعيش عليه والنبي ياياسمين ده مهما كان اخوكي
ياسمين :انتي بتدافعي عنه ياماما بعد كل ده
صفاء :ابني يابنتي حعمل ايه ربنا يهديه ويصلح حاله يارب
سامي :ماشي ياياسمين خلاص وانا اوعدك مش حتكلم معاكي في الموضوع ده تاني مع اني مستخسره والله بس ياللا كل واحد بياخد نصيبه انا حروح اشوف البلاوي اللي هناك دول كمان
ياسمين :ماشي ياسامي
يدخل سامي فيجد سحر جالسه امام التليفزيون تشاهد احد الافلام :ازيك ياتحفه
سحر:اهلا يافالح
سامي :امال فين الباقيين مش سامع صوت يعني هما طفشوا
سحر :امك وابوك بيتودودوا جوة والست سميرة سعيد لسه مرجعتش من الشغل
سامي:طب انا داخل انام
سحر :تنام واللا تحب
سامي:الله يخرببيتك وطي صوتك حتفضحيني
سحر:وافضحك ليه يامعلم هو الحب فضيحه وبعدين مانت مفضوح أصلا على فكرة لسه مكلماني من شويه
سامي :بجد
سحر :اه يافالح والله ماعارفه بتحب فيك ايه
سامي :طب اتكتمي خالص انا داخل متفتحيش علية الباب انتي فاهمه
سحر لنفسها:عيله مجانين توب علينا يارب
تخرج أمها من الحجرة:بت ياسحر هو سامي جه
سحر :ايوة ياماما جه ودخل يحب قصدي دخل ينام
سعاد :نامت عليه حيطه خليه ييجي الزفت ده لابوه عايزه جوة
سحر :حاضر
تفتح عليه الباب :سامي بابا عاوزك
سامي :وطي صوتك يامتخلفه
سحر :معلش يافالح قطعت عليك لحظاتك السعيده
سامي :معلش ياجميله حروح اشوف بابا عاوز ايه وارجعلك
يدخل غرفة ابيه:أيوة يابابا
سعيد :تعالى ياسامي عاوزك
سامي:وادي قعده خير
سعيد :في عريس متقدم لاختك سميرة
سامي :وده مين سعيد الحظ ده اللي امه داعية عليه
سعيد :احترم نفسك ياحيوان
سامي :حاضر المهم قللي هو مين الحيوان ده قصدي مين العريس ده
سعيد :سعد
سامي :سعد مين فيهم سعد وغلول واللا سعد اليتيم
سعيد :اقسم بالله لو مااتكلمت عدل لحطفشك من البيت جتك الهم
سامي :مانت قلت سعد وسكت وكأنه يعني أحمد زويل ماتقولي مين سعد ده كمان
سعيد :سعد ابن خالتك يا جذمه هو احنا نعرف سعد غيره
سامي :يالهوي سعد ابن خالتي ياسوادك ياسميرة دي لو عرفت حتصوت
فتدخل سعاد:نعم ليه ياحبيبي ماله سعد ابن خالتك راجل وكسيب وملو هدومه مش زيك ياموكوس
سامي:ههههههه سعد
دي سميرة مش طايقه نفسها وكارهه الدنيا كلها عشان اسمها سميرة امال لما تعرف انها حتتجوز سعد حتعمل إيه
عالعموم انا مليش فيه اه انتوا احرار
سامي:هي مش اختك يامتخلف وبعدين كفاية ان اسمه بادئ بحرف السين زينا عقبال مانت وسحر تجيبولنا ناس بادئه بحرف السين عاوز اعمل امبراطورية
سامي :هههههه هههههه وربنا انت حتشلني حرف سين ايه اللي بتتكلم عنه ياوالدي العزيز اللي يسمع كلمة إمبراطورية دي يفتكرك بتتكلم عن الشركات والمصانع اللي حتورثهالنا قال حرف السين قال الصبر من عندك يارب
سعيد :شايفه قليل الأدب ده بيتكلم إزاي
سعاد :ماهو الصراحه عنده حق حرف سين ايه انت كمان حتشلني
يسمعون صوتها فى الخارج :اهيه شكلها وصلت
سامي بص انت بصنعة لطافه كده تفتح معاها الموضوع بلاش ابوك يابني احسن لو ابوك اللي اتكلم حترفض
سامي :تدفعي كام
سعاد:يااخي اتنيل امشي ياولا
سامي:طب سيبوها تاكل الأول حرام عليكم حتسدوا نفسها ليه بس من اولها
سعاد :ماشي ياجذمه سامي وديني لو بوظت الدنيا لكون سايبالكم البيت وماشيه
سامي :انا من يوم مااتولدت بسمع الكلمتين دول وعمرك مارحتي ولا جيتي
عديني اما اطلعلها ياحبيبتي ياسميرة يااختى كان مستخبيلك ده كله فين
سمورة يااختى سمورتي سماميره
سميرة :نعم خير ياسامي شكلك في حاجه
سامي :قلبك حاسس ياغاليه بصي كلي الأول وبعدين عاوز اتكلم معاكي فموضوع كده
سميرة :موضوع ايه خير تكونش جايبلي عريس
سامي :لا إله إلا الله عرفتي لوحدك ازاي قلبك حاسس يااختي
سميرة :بجد يعني في عريس بجد هو مين طيب شكله ايه بيشتغل إيه عنده كام سنه قول انطق اتكلم
سامي :بالراحه ياحبيبتي أعصابك بصي كلي الأول وبعدين أقولك
سميرة :لا مش حقدر استنى عاوزة اعرف
سامي :يابنتي اسمعي الكلام كلي الاول قبل مانفسك تتسد
سميرة :انت قصدك إيه
سامي:تعالي بقى انتي اللي جيبتيه لنفسك
اقعدي ياغاليه صللي عالنبي
سميرة :عليه الصلاة والسلام قول بقى
سامي :سعد
سميرة :مش فاهمه
سامي :سعد ابن خالتك هو العريس اللي متقدملك
سامي:يالهوي البت ماتت الحقيني يااما بتك اغمى عليها
🌹🌹🌹🌹🌹🌹🌹🌹🌹🌹
فى اليوم التالي
يدخل الشركه في هيئه تجعل الجميع ينظر إليه بانبهار ولما لا وحمزة يتمتع بالشباب والحيوية والوسامه
يتحرك بين الموظفين بنظرات متواضعه تجاه الجميع
يلقي التحيه على كل من يقابله حتى يصل إلى المكتب الخاص به
كل ذاك بصحبة صوفيا المسئوله عن كل ذاك
صوفيا :سنيور حمزة كل الموظفين حيكونوا موجودين بعد ساعه بالظبط للاجتماع
حمزة :تعرفي ياصوفيا اكتر حاجه بتعجبني فيكي انك بتعرفي تفصلي كويس بين الصداقه اللي بيننا وبين الشغل
صوفيا:عشان بقولك هنا سنيور وبرة الشركه بناديك بأسمك
تقدر تقول زي مابيقولوا دي نقرة ودي نقرة
حمزة:طب ممكن بقى يااستاذه نتغدى سوا بعد الشركه
صوفيا :طبعا ممكن بس دلوقتى خلينا فالشغل
على فكرة انا نزلت الاعلان اللي اتفقنا عليه
حمزة :تمام
بعد مرور ساعه
يجلس حمزة وحوله الموظفين الذين التحقوا للعمل بالمصنع
حمزة:السلام عليكم ورحمة الله وبركاته
يرد الجميع :وعليكم السلام ورحمة الله وبركاته
حمزة :نبدأ الاجتماع
🌹🌹🌹🌹🌹🌹🌹🌹
بعد مرور عدة أيام
ليه حرام كده والله حرام
الرجل:انا مليش فيه اهوه المدير عندك جوة ادخلي قوليله هو كده
ياسمين :انا داخلاله عشان انا وربنا زهقت خلاص جبت اخري ده ايه الظلم ده
تطرق عليه الباب وتدخل
المدير :أيوة ياياسمين في ايه عاوزة حاجه
ياسمين :في ان الشهر اللي فات اتخصم مني يومين الشهر ده اتخصم عشر ايام ليه كل ده
المدير :نعم يعني انتي مش عارفه انك غيبتي يومين واتاخرتي كذا مرة والا إيه
ياسمين :وهو انا مش بلغت حضرتك ان امي كانت واخده جرعة الكيماوي وكانت تعبانه جدا وكان لازم افضل جمبها وكمان البيت بعيد والمواصلات بتكون زحمه اعمل ايه انا اعمل ايه قللي
المدير :والله دي مشكلتك انتي مش مشكلتنا انا مش فاتحها تيكيه ودي مش عزبة ابوكي تيجي وتتاخري وتغيبي وقت مانتي عاوزة
هو ده نطام الشغل عندنا عاجبك اهلا وسهلا مش عاجبك الباب يفوت جمل
وياللا اتفضلي ورايا شغل
تخرج ياسمين وهي تلعن حظها الذي اوقعها في ذاك المكان
زميلتها في الخارج اهدي يا ياسمين مش كده كل مشكله وليها حل متزعليش نفسك
بينما هو في الداخل وبعد ان رآها من النافذه وهي تخرج من محل العمل وتمشي برفقة زميلتها
يفتح الهاتف ليتصل به
تمام ياباشا كله تمام
عملت كل اللي حضرتك طلبته مني بالظبط
ايوة مشيت واماني زميلتها حتقوم بالواجب
العفو ياباشا طلباتك أوامر وسيف على رقبتنا
لا ياباشا ده حضرتك مغرقنا من خيرك
كله حيتم زي ماحضرتك أمرت وأماني حتنفذ المطلوب منها بالحرف