الحلقه الثامنة عشر
روايةقلوب تنزف عشقاً
بقلمي :عبير سليم
🌹🌹🌹🌹🌹🌹🌹
انتي مخصوم منك يومين
ياسمين :يومين هو المرتب في إيه عشان يتخصم منه يومين
المدير :على أساس انك مش عارفه إنك اتاخرتي اكتر من مرة
ياسمين :مش انا بلغت حضرتك اني ساكنه بعيد وباخد وقت في المواصلات
المدير :دي مشكلتك مش مشكلتي واتفضلي ياللا على شغلك
ياسمين :استغفرالله العظيم ياربي
المدير :بتقولي حاجه
تنظر له ياسمين وتخرج دون ان ترد عليه
تخرج من ذاك المكان الذي تعمل به وهي تسب وتلعن حظها الذي اوقعها في هذا المكان
كانت تسير في الطريق متوجهه إلى منزل أم حسين والتي اعتادت على زيارتها منذ استقرارهم في القاهرة
فتجد أمامها من يوجه لها الحديث :القمر بتاعنا رايح فين
ياسمين :سامي
سامي :شفتك وانتي بتعدي الشارع قلت شكلك مش مروحه
ياسمين :اه فعلا رايحه مشوار عالسريع كده قبل مااروح
سامي :طب خللي بالك أحسن حد يعاكسك
ياسمين :لا اطمن اختك راجل
سامي :طب بقولك ايه ياراجل كنت عاوز اتكلم معاكي فموضوع وانتي شكلك مستعجله
ياسمين :اوعى يكون نفس الموضوع تاني ياسامي
سامي:ايوة هو
ياسمين :مش قلتلك ردي قبل كده عالموضوع ده
سامي :وانا مش مقتنع ياياسمين
ياسمين :ودي مش مشكلتي ياسامي
بقولك إيه انا حركب من هنا ياللا سلام دلوقتي
سامي :ماشي سلام ياستي بس بردو الكلام مخلصش
🌹تجلس إلى جوارها تتحدث إليها عن حالها
طيب ماتدوري على شغلانه تانيه يابنتي مامدمتي مش مرتاحه مع الناس دول
ياسمين :مش بالسهوله دي ياخالتي صعب اوي تلاقي شغلانه هنا عارفه كأنك بتدوري على ابرة فكوم قش
ده انا لقيتها بعد عذاب
كريمه :ان شاء الله ربنا حيكرمك وبكرة تقولي ام حسين قالت
ياسمين :دعواتك معايا ياخالتي وتنهض للوقوف
كريمه :ايه ده انتي قمتي ليه
ياسمين :يادوب بقى عشان الحق اروح
كريمه :ملحقتش اقعد معاكي ياياسمين
ياسمين :معلش حقك علية والله انا عارفه اني مقصرة معاكي بس يادوب على مااروح وادي لأمي علاجها واخلص اللي ورايا بترمي انام زي القتيله طب تصدقي بالله ياخالتي
كريمه :لا اله الا الله
ياسمين :انا اوقات لما بصحى ببقى مش فاكرة اذا كنت صليت العشا قبل ماانام واللا لاء
كريمه :ياضنايا يابنتي الله يعينك ويقويكي يارب انا مش زعلانه منك والله ده انتي من ريحة الحبايب انتي بس بتوحشيني وبحب قعدتك اوي
ياسمين :انتي اكتر والله ياخالتي ياللا معلش بقى حسيبك وحعدي عليكي قريب ان شاء الله
كريمه :ان شاء الله يا حبيبتي
خدي بالك من نفسك
ياسمين :حاضر يا خالتي
كريمه :ربنا يكفيكي شر ولاد الحرام يارب
ياسمين :الله الدعوة دي حلوه أوي
خالتي هو انتي لسه زعلانه مني
كريمه :وازعل منك ليه ياحبيبتى هو انا حد بيطل علية غيرك
ياسمين :يعني اكمني كنت السبب في اللي حصل لحسين
كريمه :كله مقدر ومكتوب يابنتي انا وقتها بس زعلت عشان ده ابني ضنايا لكن سبحان الله اللي حصل ده كان وش الهنا عليه.
واهوه الحمد لله خف واتجوز وكفايه اني شفت ابنه قبل مااموت ياما نفسي بقى اخده فحضني كده واشم ريحته
ياسمين :ان شاء الله قريب ياخالتي حنشوفه ونلعبوا معاه يااه انا كمان نفسي اشوف حمزة اوي ده انا حسه اني حاكله أكل
كريمه :وانتي يابنتي حتفضلي مستنيه حمزة الكبير كتير العمر بيجري وبيعدي شوفي حالك
بقى كل اللي فسنك اتجوزوا وخلفوا وانتي قاعده بتعملي إيه
ياسمين :مستنياه يا خالتي
كريمه :محدش بيعمل كده وانتي عملتي اللي عليكي وعملتي باصلك وهو لو كان حيرجع كان زمانه رجع من زمان
ياسمين :مينفعش مقدرش أكون لحد غيره
وزي ماانا قلتلك مستنياه ياخالتي
كريمه :لحد امتى
ياسمين :لآخر العمر
🌹🌹🌹🌹🌹🌹🌹
فى احدى الشركات الكبرى تجلس أمامه وهي تقدم له كل الشكر والامتناء
أنا مش عارفه اشكر حضرتك ازاي يااونكل مهما عملت وقولت مش حقدر اوفيك حقك
مأمون :لا طبعا ياميرا مفيش شكر ولاحاجه انتي زي نيهال بنتي ياميرا وانتي اجتهدتي وكنتي ذكيه وتستحقي كل خير
ميرا :حضرتك صاحب الفضل علية إني أتعلم الشغل واقدر اقف على رجلية انا عمري ماتخيلت اني حقدر أوصل إني ابقى مسئوله بالشكل ده لو بابا الله يرحمه كان عايش كان حيكون مبسوط أوي
مأمون :الله يرحمه ميرا انتي باباكي كان ليه افضال كتير علية كان استاذي واتعلمت منه كتير كان راجل بمعنى الكلمه وصاحب صاحبه زي مابيقولوا كان منافس شريف
وعمره ماظلم حد ولاجه على حد أبدا وأكيد هو دلوقتي حاسس باللي وصلتيله وأكيد مرتاح
ميرا :ياحبيبي يابابا كان نفسي اوي يبقى جمبي اتحرمت من حضنه بدري اوي
مأمون :الله يرحمه والله ياميرا انا لوكنت موجود وقت الخسارة اللي اتعرضتلها الشركه عنده انا مكنتش سيبته يبيع كل حاجه ويخسر الخسارة دي كلها واللي تتسبب فموته
ميرا وهي تمسح دموعها:انا عارفه يااونكل والله
مأمون :انا كنت مسافر برة مع مراتي الله يرحمها وهي بتعمل العمليه ولما اتوفت ورجعت حالتي النفسيه كانت سيئه واللي حواليه خبوا عني حتى خبر وفاة والدك عشان متضايقش ولما عرفت رحت لمامتك أعرض عليها اي مساعده تحتاجوها بس هي اللي رفضت وقالتلي انك حتتجوزي يامن الشريف وهو حيتكفل بكل شئ
ميرا :مفيش داعي لكل الكلام ده يااونكل انا كفايه عندي إني يوم ماجيت لحضرتك وطلبت مساعدتك لية حضرتك مبخلتش علية بأي شئ وسيبتني أخوض التجربه بنفسي واتعلم كل شئ والحمد لله دلوقتى اقدر اعتمد على نفسي وأسس مكاني الجديده وانا واقفه على أرض صلبه
مأمون :وانا بتمنالك كل التوفيق وطبعا ده مكانك ياميرا وانا مكان باباكي الله يرحمه لو احتاجتي لأي حاجه اواتعرضتي لأي مشكله اوعي تتردي انك تلجئيلي
ميرا :أكيد طبعا يااونكل
مأمون :العمال خلصواالشغل
ميرا :ايوة خلاص الحمد لله والمكتب بقى شبه جاهز بس فعلا اللي محتاجاه مدير مالي واداري يفهمني الصح عشان
مأمون :اطمني خالص عندي ليكي منفذ مالي واداري ممتاز وعنده ضمير جدا فشغله واكيد حينفعك جدا
ميرا :يعني حضرتك تعرفه يااونكل
مأمون :اتعرفت عليه وانا مسافر برة كان في بعثه وهو الصراحه انسان محترم جدا وخدوم بشكل بيفكرني بباكي الله يرحمه وانا نفسي استشارته فاكتر من حاجه وافادني بيها
وهو رجع مصر قريب وكمان مقيم هنا فاسكندريه انا حكلمه واتفق معاه وان شاء الله حيفيدك جدا
ميرا :ربنا يخليك لية يارب يااونكل بجد مش عارفه اقولك ايه
فتجد من يفتح عليهم الباب:تقوليله يبجي يعزمنا عالغدا عشان انا عصافير بطني بتزقزق
ميرا :نهال حبيبتي عامله ايه
نهال وهي تحتضنها:زي القرده اهوه وحشتيني ياميرو الشغل هنا اخدك مننا خالص ومبقتش لاعارفه اشوفك ولا اقعد معاكي
ميرا :حقك علية والله يانهال المكتب واخد كل وقتي
نهال :اه ياعم خلاص حتبقى سيدات مجتمع ومحدش حيعرف يكلمك بقى وكده
ميرا :ههههههه حبيبة قلبي انتي يانونه
نهال:طب بقولك إيه ياللا بينا نقعد كده مع بعضينا شويه وتعزميني عالغدا عشان عندي كلام كتير اوي أوي عاوزه اقولهولك
ميرا :حاضر يا ستي من عينيه بعد اذن حضرتك يااونكل
مأمون :اتفضلي ياميرا وانتي يااستاذه من بكرة تلتزمي في الشغل والا حيتخصم من مرتبك
نهال وهي تزم شفتيها:اممم بقى كده هي دي اخرتها شفتي ابهات اخر زمن
ميرا :ههههه حبيبتي بابا عاوزك تتحملي المسئوليه
نهال:ماشي يابابتي استعنا عالشقا بالله صحيح محدش بياكلها بالساهل
ماشي اشطا يامعلم النهارده فري ومن بكرة نبدأ البعب على تقيل تمام كده يامعلم
مأمون :اشطا ومعلم مين دي
نهال:بنتك يابرنس والا عندك مانع
مأمون :بنتي ونور عيني كمان
❤️بعد قليل في احدى النوادي العامه يجلسان سويا يتحدثان
أنا سمعت ان شركات الشريف في النازل الكلام ده صحيح والا اشاعات
ميرا :لا صحيح هو من الأول مكنش اد المسئوليه راغب هو اللي كان شايف الشغل صح ويامن كان بيتحامى فيه وواضح ان الشيله طلعت تقيله عليه ومقدرش عليها لوحده
نهال :انا كمان سمعت عنه ان علاقاته النسائيه كتيرة وهي اللي مأثرة على شغله
ميرا :طول عمره حقير
نهال:انا مش عارفه انتي ازاي كنتي متجوزة واحد أخلاقه زباله بالشكل ده
ميرا :انخدعت فيه يانهال كان ظاهرلي الملاك البرئ طلع شيطان نهال الله يخليكي انا بحاول أنسى الفترة دي من حياتي مش حابه افتكرها تاني
نهال:حبيبتي سوري والله طب بقولك إيه مفيش حب كده واللا كده
ميرا :حب لا خالص والله مانتي شايفه معظم وقتي ضايع في الشغل ومعنديش وقت حتى اتنفس
نهال:ياسلام يعني انتي حتضيعي وقتك كله فالشغل وتنسي نفسك واللا إيه
مينفعش ياميرا انتي لازم تبدأي حياتك من جديد انتي تستاهلي انك تحبي وتتحبي ياميرا
ميرا :انا المهم عندي دلوقتى اني انجح فشغلي واحقق ذاتي هو ده اللي حيفرحني بجد
نهال :ان شاء الله يا قلبي حتبقي احلى واجمل وأصغر سيدة اعمال في اسكندريه
ميرا :ههههههه يارب يانونه
🌹🌹🌹🌹🌹🌹🌹🌹
ياسمين ياياسمين
تقبل عليها سريعاً :نعم ياماما عاوزة حاجه
صفاء :انا سامعه صوت عالي عند سحر كأنهم بيتخانقوا شوفيهم ياياسمين ليكون في حاجه
فجأة يسمعون طرقا:
ياسمين :هههههه أكيد هما جايين يكملوا الخناقه عندنا
تفتح الباب لتدخل سميرة
ياسمين :سميرة مالك في إيه
سميرة :متقليليش سميرة محدش يقوللي سميرة
ياسمين :حاضر حاضر بس اهدي هههههه
سميرة :انتي بتضحكي ياياسمين
ياسمين :اصل بصراحه شكلك يضحك انا اصلا كنت رايحالكم صوتكم عالي اوي وماما خافت تكونوا بتتخانقوا
سميرة :على اساس اننا عملنا انجاز واللا حاجه جديده مااحنا كل يوم بنتخانق ايه الجديد
ياسمين :الجديد ان صوتكم النهارده عالي اوي وشكلك كده النهارده مشتركه في الخناقه يا سمورة
فتدخل عليهم سحر وهي تضحك بشده
سميرة:اقسم بالله ياسحر الكلب لو مخرجتي وغورتي من ادامي لحكون جايباكي من شعرك
ياسمين :لا انا كده لازم افهم في ايه الموضوع شكله كبير
سحر :اصل سميرة خلاص خلاص متبرئيش أصدي سمورة عاوزة ترفع قضيه وتغير اسمها ههههه ههههه وبابا وماما بهدلوها وقالولها انتي بتستعري مننا
عاوزة تغيري اسمك يابت ال........ النهارده تغيري اسمك وبكرة تغيرينا انتي سميرة وحتفضلي سميرة بمزاجك او غصب عنك
تمسكها سميرة من شعرها:بصي انتي اللي جبتيه لنفسك وديني لولع فيكي
ياسمين وهي تحاول فض الاشتباك:خلاص خلاص اهدوا يابنات مش كده
تخرج صفاء إليهم وهي تستند على الحائط:عيب اللي بتعملوه ده يابنات
سميره :حقك علية والله ياخالتي انا آسفه
صفاء :لا ياسميرة يوه يقطعني والله مابقيت عارفه اندهك بإيه
تضحك سحر وياسمين على ذلك الموقف
سميرة :ياناس افهموني ليه محدش حاسس بية انا مخنوقه ومش طايقه الدنيا
ياسمين :كل ده عشان اسمك للدرجه دي
سميرة :أيوة واكتر كمان
صفاء:طب احمدي ربنا انها جت فسميرة امال كنتي حتعملي ايه لو كانوا سموكي ستهم ولا ستوته
سحر:ستوته ههههههه ههههههه حموت مش قادرة
سميرة :ده انا اللي حموتك النهارده بايديه
تدخل أمهم هي الاخرى:فضحتونا فالبيت ياللي منكم لله كل يوم محدش طالع صوته غيرنا هو انا عملت إيه ياربي عشان ربنا يبتليني بيكم
صفاء :اهدي كده وصللي عالنبي يااختي
سعاد:عليه الصلاة والسلام مش عارفه الاقيها من الكبير واللا من الصغير
الناس دول حيجلطوني ياام ياسمين من كبيرهم لمصغرهم الصبر من عندك يا رب
❤️❤️❤️❤️❤️❤️❤️
فى احدى المناطق المشبوهه
انت حتفضل قاعدلي كده لاشغله ولا مشغله حد قالك اني فاتحاها سبيل
أسامه :بقى كده يافيفي ياحبيبتي وانا اللي بقول مليش غير فيفي هي اللي بتحبني وشايلاني فعنيها
فيفي :شايلاك فايه ياعنيه لا بقولك إيه انا الكلام ده ميمشيش معايا اه ماهي مش تكية
أسامه :بت يافيفي انتي تتلمي معايه احسنلك واتكلمي بأدب بدل مااعلمك الأدب ولا شكلك كده اشتقتي للضرب اللي كنتي بتاخديه وعاوزة تفتكري
فيفي :هيهيه ضرب يااخي جاك ضربه فقلبك طب بس فكر كده ومد ايدك علية وانا كنت اجيبلك جوز الغفر اللي برا دول واخليهم يعملوك عجه
أسامه :والله وطلعلنا صوت يافيفي الله يرحم لما كنتي قطه مغمضه وماشيه فديلي اقولك يمين يمين شمال شمال دلوقتي خلاص القطه بقت بتخربش وطلعلها صوت كمان
ثم قام بلوي دراعها بشده خلف ظهرها:تتعدلي معايا ولا اعدلك
فيفي:اه سيب ايدي حتنكسر الله يخرببيتك
أسامه :لا مانا مش اهبل ولا برياله ماهو مش بعد مانضفتك وخليتك بني ادمه بعد ماكنتي مقشفه وصرفت عليكي دم قلبي
وبقيتي بتطلبي بالاسم تتكبري علية
انتي نسيتي أصلك والا إيه يابت
ده انا اشرحلك وشك ومخليش الكلب يطيق يبصلك
فيفي :اخص عليك ياسمسم ده انا بهزر معاك انا بس مش عاجبني قعدتك كده عاوزاك تشتغل وتبقى كسيب بدل مانت مقضيها حشيش وخمرة ومضيع كل فلوسنا على مزاجك
أسامه :وانا مزاجي أهم حاجه عندي عندك اعتراض
فيفي :لا اعتراض إيه طب بقولك ايه انا عندي سهرة الليله حتيجي معايه واللا حتقعد هنا
أسامه :جاي معاكي
فيفي بينها وبين نفسها :جتك داهيه تاخدك وتريحني منك
😘😘😘😘😘😘😘
بعد مرور يومين
يعود الغائب بعد طول السفر ليلتقي بمن كانوا هم السكن والأحباب ولكن هل لها ان تلتقي من جديد وتعيد عهدها بالحب
يجلس بالطائرة الخاصة وبرفقته تلك الطفله التي وهبت له الحياة ومعهما الداده
بينما جابر مازال في غيبوبته تحيطه الرعايه الطبيه حتى يصل إلى أرضه بسلام
تصل الطائرة بالسلامه إلى أرض الوطن الحبيب
كاد قلبه أن يختلع من بين ضلوعه وهو يعود لوطنه مرة ثانيه ولكنه يعود بطريقه تختلف كليا عن تلك التى رحل بها عن ارض الوطن
ينزل من الطائرة فيجدها في الانتظار
حمد الله على السلامة سنيور حمزة
حمزة:الله يسلمك صوفيا
بدأ يستعد طاقم الأطباء إلى اصطحاب ذاك الغائب فى عالم آخر منذ عدة سنوات الى المستشفى التى على أتم الاستعداد لاستقباله وتقديم كافة الرعايه الصحيه له
فى داخل المستشفى هو يتحدث للطبيب المسئول عن حالته
اطمن ان شاء الله خير وحيكون تحت رعايه شديده بامر الله
حمزة :يارب يادكتور احنا كل املنا فى الدنيا انه يرجع للحياة تاني
سيلا وهي تشد ذراعه:بابي يابابي
حمزة :أيوة ياروح بابي
سيلا :عاوزة العب
حمزة :حاضر ياسيلا حاضر ياحبيبتي
الدكتور :بنتك بسم الله ماشاء الله ربنا يحميها
حمزة:دي بنت البشمهندس جابر
الدكتور :المريض
حمزة:ايوة
الدكتور :معقوله حد يبقى عنده بنوته جميله كده ويستسلم للغياب عنها
حمزة :حبه لمراته كان أقوى من حبه لأي حد فالدنيا وهو اللي موصلله انه مش متقبل الواقع نهائي
الدكتور :استبشر خير وان شاء الله ربنا يقف جمبه ويسترد وعيه
حمزة:يارب يا دكتور
الدكتور :احنا محتاجين الصغنونه دي تيجي تزور باباها كتير عشان ده حيكون دافع قوي ليه مع العلاج
حمزة:والله يادكتور واحنا برة كنت باخدها على طول وبقعدها معاه
الدكتور :اطمن ان شاء الله خير
حمزة:يارب يادكتور يارب
ممكن البنت تسلم على باباها قبل مانمشي
الدكتور :طبعا ده اكيد
سيلا وهي تقبله من خده:بابي بابي
حمزة :سيلا قولي لبابا انا بحبك
سيلا:بابي حبك
حمزة :ربنا يطمنا عليك ويرجعك لينا بالسلامه يارب
يخرج حمزة من المستشفى متوجها نحو المنزل
وهو في السيارة حيث يتحدث إلى صوفيا
بجد مش عارف من غيرك كنت حعمل إيه
صوفيا :متقولش كده سنيور حمزة انا قمت بواجبي مش أكتر
حمزة :لاء انتي عملتي كتير صوفيا تعبتي معانا فايطاليا وهنا فمصر
قمتى بحاجات كتير بجد برافو عليكي
خليتيني أقدر اثق فيكي واعتمد عليكي بشكل كبير
صوفيا :أنا أهم حاجه عندي اني أكون عند حسن ظنك
حمزة :ده أكيد طبعاً صوفيا
انا محتاج أنزل الشركه من بكرة طمنيني كله تمام
صوفيا :اطمن سنيور حمزة كل شئ جاهز وحتلاقي كل حاجه زي مابلغتك واحسن كتير كمان
ودلوقتي كمان حتعجبك الفيلا أوي
يصلون جميعهم الى تلك الفيلا الراقيه التي توجد في احدى المناطق الهادئه
يدخلون الفيلا جميعهم بينما كان هو يحمل الصغيرة على ذراعيه
فينظرلتلك الحديقه التي تحيط بها
وتأخذه الذكريات
الله ياحمزة بص الجمال ده
بص شوف الورد وجماله سبحان الله
حمزة:دي تحفه يابنتي والورد شكله مريح للاعصاب أوي
تعرفي يا حبيبتي كان نفسي أوي طول عمري اني اسكن فبيت واحوطه بالشجر والورد
ياسمين :ان شاء الله يا حبيبي ربنا يحققلك كل اللي بتتمناه
حمزة:ونعيش فمكان زي ده ونبقى اغنيا زي اللي عايشين هنا ههههههه استحاله طبعا
ياسمين :حبيبي احنا ممكن منبقاش اغنيا زي اللي هنا اه لكن احنا مشوفناش حياتهم جوة عامله ازاي ممكن يكون عندهم كل حاجه مش عندنا بس وارد انهم ميكونوش سعدا ولا مبسوطين
لكن انا كفايه علية حبك اغلى عندي من مليون فيلا زي دي
وبردو ان شاء الله ربنا يحققلك اللي تتمناه
حمزة :منين بقى وازاي مانتي شايفه اللي احنا فيه
ياسمين :وماله بقى اللي احنا فيه هو في احلى من كده
حمزة :أحلى من كده إيه وانا معايا حبيبتي ياسمين طول مانتي معايا انا اصلا ببقى حاسس اني مالك الدنيا كلها
ياسمين :انت ملك قلبي أنا
حمزة:وانتي الملكه المتوجه على عرش قلبي
ياسمين :لحد امتى ياحمزة
حمزة:لحد اخر العمر ياقلب حمزة