رواية قلوب تنزف عشقآ الحلقه الثالثه والعشرون بقلم عبير سليم

روايةقلوب تنزف عشقاً

بقلمي :عبير سليم

🌹🌹🌹🌹🌹🌹🌹

تعلن اشعة الشمس ونورها عن ميلاد يوم جديد

يوم يحمل معه الآمال للبعض و الآلام للآخرين

يخرج من بيته يتجه إليه فهو في حاجه شديده إلى التحدث مع أحد يريد أن يصرخ بشده ليخرج مافي قلبه لعله يرتاح ولكن كيف له أن يرتاح بعد الآن وقد كتب بيديه سطور العذاب

يجلس أمامه يتحدث اليه وكانما يسمعه يشكو إليه مرارة مايشعر به من مرارة مااصابه من الهوى

غير مصدق ماحدث غير مدرك أنه تقابل معها وجها لوجه أمامه بين يديه لا يفصل بينهما شئ

هي من هي من عشقها الفؤاد وهواها القلب وتعذب لفراقها

ولكنها في ذات الوقت هي من طعنته طعنه غادرة في نفس الحين الذي كان هو يود لو يضحي بحياته لأجلها

تذرف دموعه بشده على وجهه غير مصدق مافعله بها

مش قادر انا قلبي واجعني أوي انا مش قادر أصدق ازاي عملت فيها كده مش قادر أصدق ازاي قدرت اقسى عليها بالشكل ده

انا كنت ناعي الهم اني حشوفها أوي كنت مراهن قلبي انه أضعف من انه يقدر يواجهها وانه مش حيقدر يقاوم حبها ولا شوقه ليها وان لهفته عليها هي اللي حتنتصر

وانا نازل اقابلها  كنت حاسس ان رجلي مش شايلاني زي عيل صغير لسه بيتعلم المشي كان نفسي اخدها فحضني أوي واشم ريحتها اللي اشتقتلها

وارمي نفسي فحضنها حضنها اللي ياما حلمت واتمنيت انه يكون لية مش لحد تاني

أيوة انا الأحق بيه انا الوحيد صاحب الحق فيه بس ازاي وهي سلمته لغيري

بس انا خليت قلبي يخسر الرهان وكسبت انا بس مش مبسوط ولا سعيد حاسس اني اتعي واحد في الدنيا كلها

ياااه عالوجع اللي حسه حاسس ان قلبي متقطع الف حته

 أنا لحد مانا قاعد هنا وبكلمك وانا والله مامصدق اني شفتها مش مصدق انها كانت واقفه ادامي وحتى ممدتش ايدي ليها بالسلام

انا حلفت اني حنتقم منها وادوقها اللي دوقتهولي بس خايف خايف ان قلبي ييجي علية ويضعف قدام حبها خايف يهدني اكتر مانا اتهديت خايف يتحداني ويقوللي حنشوف مين اللي حيضحك في الآخر خايف يخذلني

بس لاء انا حبقى اقوى من قلبي وحتحداه وحقف ادامه بكل قوة حدوس عليه برجلي حوقف دقاته اللي بتحلف انه لسه بيحبها وعمره ماحيعشق غيرها 

ايوة هي دي الحقيقه اللي مش ممكن حقدر اخبيها انا كنت بحاول اقنعكم واقنع نفسي اني كرهتها لكن لاء أنا بحبها بحبها اوي وكل يوم بيعدي حبها بيكبر جوايا غصب عني مش بأيدي طول مافية نفس حيفضل حبها جوايا 

جابر جابر فوق الله يخليك انا محتاجك أوي محدش حيحس بوجعي غيرك انت الوحيد اللي شفت اللي انا عشته انت الوحيد اللي حتقويني على اللي انا فيه انت اللي حتديني الحق فاللي بعمله

أنا برغم اني فبلدي بس حاسس اني وحيد غريب لا أهل ولا صحاب

أهلي واهوه لحد دلوقتي مش عارف اوصلهم سنين بدور عليهم ومش عارف راحوا فين انا خايف يكون حصللهم حاجه خايف مشفهمش تاني ابويا وامي ومنى وحشوني اوي

وحسين اللي بردو مش عارف راح فين واختفى فجأة ومبقاش بينزل اسكندريه خالص مع اني كنت موصيه عليهم كلهم ياترى الدنيا ودته فين واخدته على فين

عارف ياجابر مفيش حاجه في الدنيا دي كلها مهونه علية اللي انا فيه غير بنتك هي الضحكه الحلوة فوسط المرار اللي عايش فيه ربنا يقومك ليها بالسلامه على فكرة انا حجيبهالك بكرة انا عارف انها أكيد وحشاك

ياااه لو شفتها حتفرح بيها اوي بقت شبه المرحومه سيلا بالظبط سبحان الله نفس لون عينيها وشكلها بس نظرة عينيها وهي بتكلمني كلها انت ببقى حاسس اني بكلمك انت

ربنا يعلم بحبها اد إيه وكأنها بنتي انا بس انا عاوزها تكبر فحضنك انت ياجابر عاوزك تفرح ببنتك اللي ياما حلمت بيها واتمنيتها

قوم بقى ياجابر قوم بقى الله يخليك كفاياك بقى  انت فبلدك اللي كان نفسك ترجعلها عايش على ارضها وبتتنفس هواها قوم بقى كلنا عاوزينك ومحتاجينك ياجابر

😰😰😰😰😰😰😰😰

تمارس عملها بكل نشاط حتى تحقق أحلامها وتصل إلى ماتتمناه بينما هو الآخر يساعدها بكل قوته لتحقق ذاتها

يعملان معا ألسنتهم تتحدث بشئ ولكن القلوب تنبض بأشياء أخرى يحاول كل منهما ان يظهر على غير مايبطن

انا بجد مش عارفه أشكرك ازاي

أكمل :مفيش شكر ولا حاجه انتي بس عشان لسه في البدايه وبتتعلمي بعد كده مش حتكوني محتاجه مساعده ان شاء الله

ميرا :ليه بتقول كده هو انت زهقت من الشغل معانا

أكمل بينه وبين نفسه:انا لو فضلت العمر كله معملش حاجه غير اني اكون جمبك وامتع عيني انها تشوفك عمري ماازهق أبدا

ميرا :أكمل رحت فين

أكمل :لا أبدا معاكي لا ياستي اطمني مزهقتش ولا حاجه بالعكس المكان هنا مريح جدا في الشغل 

ميرا :معلش اخدناك من الطلبه

أكمل :لا انا الحمد لله بعرف اوفق بين الشغل ومواعيد الجامعه

ميرا :طول عمرك منظم يا اكمل

أكمل :طيب بصي بقى انا عندي ليكي كام اقتراح حيخللوا اسم مكتبك في السما

ميرا :بجد طب قول

يعلن هاتف أكمل عن إتصال تليفوني ليقطع حديثهم فيستئذن للرد

 ايوة ياريم حبيبتي في ايه مال صوتك

مالها جنه هي لسه تعبانه

طيب حاضر اجهزوا وانا جايلكم حاجه

يغلق معها الهاتف وهو متوتر:معلش بعتذر بس لازم امشي دلوقتى

ميرا :مفيش مشكله اتفضل

ومتقلقش خير ان شاء الله

يخرج سريعا من المكتب بينما هي تجلس مكانها لتاخذها الذكريات

نفسي يبقى عندنا اطفال كتير ياحبيبي

أكمل :اطفال كتير طب قولي واحد او اتنين

ميرا :لاء مليش دعوة انا معنديش غير اخت واحده ونفسي اعمل عيله كبيرة اوي واخليهم كلهم يحبوا بعض وتبقى حياتنا كلها حب فحب

وبعدين مش بيقولوا اللي بيحب بيبقى عاوز يجيب من اللي بيحبه أولاد كتير

أكمل :حبيبة قلبي أنا مش بحبك انا بعشقك بس انا بقول لما يبقى عندنا واحد او اتنين حنعرف نربيهم كويس ونعلمهم كويس

ميرا :حبيبي متقلقش انا حساعدك في كل شئ وبعدين متنساش اني بنت رجل اعمال وطبعا انا حشتغل مع بابي و

أكمل :ميرا انتي بتقولي إيه انا لايمكن حقبل مساعده من حد ميرا انا محدش حيصرف علينا وعلى ولادنا جنيه انا حصرف عليكم من تعبي وشقايا

ميرا :انا مقصدش حبيبي والله انا اقصد اني حشتغل واساعدك مش الحياة مشاركه

أكمل :ميرا انا أملي في الدنيا اني اعيشك ملكه

تمسح ميرا دموع عينيها: يااه معقوله ييجي الوقت اللي نتعامل فيه كأننا اغراب يا اكمل 

تطرق عليها الباب وتدخل:

ميرا :نهال حبيبتي وحشتيني

نهال:انا لقيتك مبتساليش قلت اسأل انا

ميرا وهي تقبلها :معلش حبيبتي والله حقك علية المكتب واخد كل وقتي

نهال:طبعا ياسيدي خلاص بكرة محدش يعرف يكلمك

بقولك إيه صحيح هو المز بتاعك خارج بيجري كده ليه

ميرا :عيب يانهال كده

نهال:الجميل بيغير والا إيه

ميرا :مش من حقي اغير ولا اجي ناحيته اصلا ده واحد متجوز وعنده ولاد ربنا يخليهومله

نهال:هو حكالك كل حاجه

ميرا :لا خالص بالعكس هو مبيتكلمش عن اموره الشخصيه بس يعني احيانا بفهم يعني مثلا دلوقتى مراته كلمته وسالها عن واحده اسمها 

جنه لسه تعبانه وبعدها قفل ونزل على طول تبقى أكيد بنته وتعبانه

نهال:اه قلتيلي عشان كده خارج من هنا يجري على ملا وشه

ميرا انتي لسه بتحبيه

ميرا :عارفه يانهال انا كنت فاكرة ان زعلى منه فالقرار اللي اخده انه يخرج من حياتي من غير حتى مايسمعني

وانه يتنازل عن حبنا بالبساطه دي لمجرد كلمتين سمعهم من ماما حيخلوني اكرهه لكن بالعكس أول مااتقابلنا تاني حسيت ان قلبي لسه بينبض بحبه ولسه جوايا

كنت فاكرة اني حكون زعلانه منه وحاخد منه موقف لقيت نفسي مش قادرة اعمل كده مش قادرة حتى ازعل منه

نهال:بس انتي حكيتيلي عاللي حصل بينه وبين مامتك واي حد عنده كرامه مش حيقبل بحاجه زي دي

ميرا :يعني هو زعل على كرامته طب وانا مزعلش علية مفكرش انا ممكن يحصللي ايه فبعده

نهال الله يخليكي انا ماصدقت انسى بلاش نتكلم في الموضوع ده أصلا انا مش من حقي حتى اني افكر فيه

نهال :هو ده اللي بناخده من الحب وسنينه بقولك ايه انا النهارده قاعدالك لحد ماتخلصي ونروح النادي نتغدا سوا ونغير جو ايه رأيك

ميرا :ماشي

😰😰😰😰😰😰😰

خير ياسميرة مروحتيش الشغل النهارده ليه

سميرة :............

سعاد :مبترديش علية ليه يابت الجذمه

سميرة :هو مش انا قلت الف مرة محدش يناديني بالاسم الزفت ده واللي حيناديني بيه مش حرد عليه

سعاد :ياخي ردت المياه فزورك يا زفته

بت انتي اتعدلي معايا احسن وربنا اجيبك من شعرك انا خلاص فاض بية الكيل منك

سميرة :ليه ده كله هاه عشان ايه بتعملي فية كده

سعاد :مجنونه بنتي اتجنت ياناس ربنا يهديكي يابتي يارب

سميرة :ليه شايفاني بشد فشعري واللا واقفه في الشارع بحدف الناس بالطوب انا عارفه انتي بتعملي كده ليه كل ده عشان اللي انتي فرحانالي بيه امال لو كان دكتور والا ظابط كنتي عملتي إيه

سعاد :يادي الظابط اللي حيعبطك وانتي كان جالك الدكتور واحنا قلنا لاء مانتي متلقحه اهوه محدش بيبص فوشك

سميرة :انتي بتعايريني ياماما ماشي كتر خيرك

سعاد :يا بنتي ياحبيبة امك استهدي بالله كده واعقلي ياهبله واعرفي مصلحتك ده محدش في الدنيا دي كلها بتمنالك الخير ادي انتي منفسكيش تفرحي مش عاوزة تعيشي حياتك زي بقية البنات وتلبسي وتدلعي 

سميرة :نفسي ياماما والله نفسي بس مع حد عدل مش مع سعد

سعاد :وماله سعد بس ناقصه ايه ناقصه ايد واللا رجل يابنتي حرام عليكي ده بيحبك وشاريكي

و خالتك طيبه وغلبانه وعمرها ماحتعمل عليكي حما  يبقى حتى ابوه من البيت للجامع ومن الجامع للسرير خالتك نفسها مبتشوفهوش

يبقى فين المشكله عاوزة ايه اكتر من كده فوقي يابنتي بقى واعقلي 

فوقي قبل ماتلاقي اللي حواليكي كلهم بقوا فبيوتهم وانتي قاعده لوحدك وقتها حتضربي نفسك بالجذمه القديمه 

سميرة :ريحي نفسك مش حتجوز واحد اسمه سعد

سعاد :مش انتي عاوزة ترفعي قضيه خليهم قضيتين عوض علية عوض الصابرين يارب

سميرة :انتي بتتريقى علية ياماما انتي مش مقدرة الحاله النفسيه اللي انا فيها

سعاد :ليه بس ياقلب امك هو انتي اسمك سعديه ولا ستهم ده انتي اسمك جميل وسعد ماله ربنا يجعله وش السعد عليكي يارب

فوقي ياحبيبتي متضحكيش الناس عليكي بصي يابنتي الصبر له حدود والواد ده انا مستخسراه ولو مشى انا حبقى زعلانه

يابنتي  سعد احنا عارفين أخلاقه ده متربي معاكم مش محتاجين نسأل عنه ده الواحد بيعمل مصايب وبلاوي يعني نسيب اللي مننا وناخد واحد غريب منعرفش عنه حاجه

سميرة :وانا مش عاوزة اعيش معاهم في البيت مش حعيش مع اهله الفقر دول

سعاد :بصي انا حخليه ييجي يقعد معاكي واتفاهمي معاه وقوليله اللي مضايقك ماشي

سميرة :طيب طيب ارتحتي

سعاد :ربنا يريح قلبك ياسميرة يابت بطني يارب

سميرة :مامااااااا

سعاد :قطيعه تقطعك وتقطع امك الله يحرقه حرف السين ويقطع معاه أبوكي هو السبب في الهم اللي احنا فيه ده 

🌹🌹🌹🌹🌹🌹🌹🌹

يعود إلى الفيلا التي يسكنها وكله لهفه وشوق لرؤيتها فهو على علم بوجودها منذ الصباح فهذا أول يوم للعمل بها

يدخل الفيلا بسيارته فيسمع صوت ضحكاتهم العاليه

نعم هي ضحكتها الجميله التي دائما ماكانت تسعدني وكيف لي ان انساها

تجري عليه الصغيرة :بابي جه بابي جه

ينزل من السيارة فيحتضنها وعينه مركزة على الواقفه وعيناها في اتجاه آخر

حبيبة بابي بتعملي إيه

سيلا :بلعب

حمزة :طب خللي بالك تقعي ياروحي

سيلا :يويو العب معايا تخفش

حمزة وهو يحملها على ذراعيه ويحتضنها:وهو انا لو مخفتش عليكي حخاف على مين ياحبيبتي

كان يقول هذا الكلام بصدق لتلك الصغيرة التي تملاء عليه حياته وليس له مقصد اخر

بينما كانت الاخرى تظن بأنه يرمي بالكلام عليها

نزلت دمعه رغما عنها ولكنها سرعان ماانتبهت ومسحتها قبل أن ينتبه فلقد اخذت عهدا على نفسها لن ترجع فيه ثانية

يقترب منها :يارب يكون الشغل عجبك اظن مفيش راحه اكتر من كده واعتقد انه احسن من مرمطه المحلات والمصانع والا إيه رأيك

ياسمين :اهو كله قرف

حمزة :نعم بتقولي حاجه

ياسمين :بقول متفقناش عالمرتب حضرتك

حمزة :اتفضلي قولي عاوزة كام مانتي خلاص مبقيتيش بتفكري غير فالفلوس

ياسمين :لا ماهو انا حضرتك مش من كتر وقتي الفاضي قلت اجي اضيعه واللا من كتر مانا مش لاقيه حاجه اعملها قلت اسخر وقتي فخدمة الوطن

افتكر اني جايه اشتغل مش اؤدي مهمه انسانيه واكيد حضرتك زي ماكنت مخطط اني حاجي عارف حتدفع كام يبقى ملوش لازمه الكلام الكتير

حمزة :ياسمين الزمي حدودك في الكلام معايا ومتنسيش انك بتشتغلي عندي

ياسمين : حضرتك اللي تلزم حدودك معايا احنا مفيش بيننا غير الكلام في الشغل بس فبلاش تقعد تلقح بالكلام كده شبه الستات الفاضيه اللي مورهاش حاجه

حمزة :طبعأ أكيد هي دي الطريقه اللي اتبعتيها مع الباشا اللي اتجوزتيه عشان توقعيه في شباكك مش كده

تبتلع ياسمين غصه في حلقها:استغفر الله العظيم ياربي  وقعته موقعتهوش مش مشكلتك دي بقى خلينا في المهم 

حمزة : شوفي انتي عاوزة كام حددي مجهودك يتقدر بكام وانا حديكي اللي انتي عاوزاه وأكتر

ياسمين :لاء حضرتك المفروض ان صاحب الشغل هو اللي يقدر تعبي ويقدر اللي استحقه

حمزة :ماشي ياياسمين حاضر حشوف تعبك ده وابقى ارد عليكي 

 فين حسين ياياسمين 

ياسمين :حسين مين حسين فهمي والا حسين الجسمي

حمزة :ياسمين متهرجيش انتي عارفه كويس اقصد حسين مين

ياسمين :لا حقيقي معرفش لأن في حاجات كتير لا بقيت عارفاها ولا فهماها ياريت توضح كلامك

حمزة :حسين صاحبي ياياسمين انا قلبت عليه الدنيا حسين راح فين

ياسمين :استنى كده ادورلك فجيوبي لا مش موجود الصراحه

ياسمين :قلتلك الزمي حدودك معايا

ياسمين :وانت بتسألني عنه ليه أصلا هو حد قالك اني خطفاه

واللا يكون  زعلك فحاجه هو كمان وعاوز تنتقم منه

عالعموم معرفش روح دور عليه بعيد عني وخللي حبايبك الحلوين اللي كانوا بيجيبولك اخباري يعرفوا هو فين اما حاجه غريبه والله 

حمزة :طب وأهلي ياياسمين

ياسمين :اهلي والا زمالك ههههههه

حمزة :ياسمين متختبريش صبري اكتر من كده وبقولك للمرة الألف الزمي حدودك معايا 

ياسمين :انت اللي تلزم حدودك معايا انت تسأل عن بنتك وبس غير كده ملكش فيه ومتسالنيش عن اي شئ تاني

روح دور على اهلك وصحابك بعيد عني انا معرفش حاجه عن حد

حمزة :طبعا أكيد اهلي طفشوا لما لاقوكي طعنتي ابنهم فضهره وخنتيه لكن حسين اختفى فين راح فين ريحيني وقولي ياياسمين

لا ترد عليه فقط تاخذ منه البنت فيعجز عن الرد عليها:هات البنت

حبيبة قلبي ياللا عشان ناخد دش ونلبس حاجه حلوةونبقى حلوين

ونعمل الكيك اللي بنحبه

سيلا :هيييه ياللا بينا  ياللا بينا ذهبت معها وهي تضحك

حمزة  لنفسه :يانهار أبيض البنت مشت معاها ولا عبرتني معقوله حبتك بالسرعه دي ياياسمين

وبعدين انا مش عارف اخد معاها لاحق ولا باطل دي بترد علية الكلمه بعشرة ودي حنتقم منها ازاي دي

يعني تجي تصيده يصيدك

فينك ياهانم انتي يااستاذه ياللي كاتبه الروايه دي اعمل فيكي ايه دلوقتي شكلي انا ايه دلوقتي قدام القراء وانا واقف هلهوله كده ادامها

💙معلش بقى ياجماعه انا قاعده فحالي اهوه عاوزة اخلص البارت عشان متأخرة عليكم عارفه وهما برضوا اللي بينكشوني مضطرة بقى ادخله اشوفه عاوز ايه المز ده كمان

نعم بتنادي علية ليه

حمزة :ممكن افهم ايه اللي بيحصل ده هو ده اللي اتفقنا عليه

💙الله وانا مالي يالمبي انت بتزعقلي ليه هو انا اللي كنت واقفه قدامها واللا انت

ده انت واقف مش عارف تقول كلمتين على بعض  وعمال تقوللي انتقام انتقام ده انا حسبت انك اميتابتشان وحتمثل فيلم لقاء الجبابرة

متركز كده وخليك فهدفك واللا يكونش الحب عامل عمايله معاك ماهي الحب الحب الشوق الشوق

حمزة :والله انتي فايقه ورايقه

💙تفوق فوقتي وتروق روقتي يارب بقولك ايه انا ماشيه وهملوني لحالي لحد مانخلص بقى ياللا سلام

استنى استنى الله ايه الريحه الجامده دي

حمزة :هي مش دخلت تعمل كيكه تلاقيها ريحتها

تلاقيك شمتها بقلبك مش بمناخيرك

حمزة :طب والله لمعكنن عليها عشان ترتاحوا كلكم

💙طب براحه على نفسك احسن يجرالك حاجه قطيعه تقطع الحب وسنينه اما ارجع انا بقى اكمل البارت

يدخل الفيلا ليشم رائحة الكيك فيجد نفسه تلقائيا يتجه ناحية المطبخ

بينما كانت هي تخرجها من الفرن وتضعها على الرخامة :واو تسلم ايدك يابت ياياسمين طول عمرك استاذه في الكيك

تلتفت لتجده أمامها فتصرخ

حمزة :إيه شفتي عفريت

ياسمين :مش تقول حاجه خضتني في حد يدخل كده

حمزة :والله ده بيتي ادخل مكان مانا عاوز فين سيلا مش قلتي حتطلعي تغيريلها ايه اللي دخلك عالمطبخ كده على طول

ولحقتي تعملي العك ده كله امتى وانتي لسه داخله

ياسمين :سيلا حبيبتي طلبت مني اعمل الكيك الأول وبعدين تاخد دش محبتش ازعلها وهي فاوضتها بتلعب على مااطلعلها

وانا اصلا كنت محضره كل حاجه كانت على دخول الفرن

وبعدين العك اللي بتتكلم عنه ده ياماكنت بتاكل صوابعك وراه واللا نسيت

حمزة:انا اللي نسيت مش كده هههههههه ماتفوقي لنفسك كده واعرفي حجمك شويه ومتعيشيش الدور انا عمري مانسيت ياياسمين ولا عمري حنسى اللي عملتيه فاهمه

تدخل إليهم سيلا لتقطع كلامهم :عاوزة كيكه

ياسمين وهي تحاول الصمود أمام عينيه التي يتطاير منها الشرار:تعالي حبيبتي

ترفعها وتجلسها على الكرسي وتقطع لها الكيك بينما هو واقف لا يتزحزح

تضع قطعه من الكيك وتقدمها له :اتفضل شكلك عينك فيها

يأخذها من يديها فتشعر بالانتصار ولكنه سرعان ماينقلب الأمر يأخذ قطعه صغيرة يضعها في فمه

زي الزفت بقيتي فاشله فكل حاجه

يقذف بالطبق على الأرض الذي سرعان ماينكسر

تشعر ياسمين بأن قلبها هو من تكسر وليس الطبق بينما الصغيرة تخاف فهي لم تعهد حمزة يفعل هذا من قبل فتبكي

حمزة :حبيبتي حبيبتي انا

سيلا :انت زعق ليه ليويو يويو حلوة اهئ اهيء اهئ

ياسمين وهي تحتضنها:حبيبتي مفيش حاجه بابي بيهزر ياللا قوليلي بقى الكيك حلو عجبك

سيلا :اه حلو جميل

كل هذا دون أن تعيره اهتماما فتدخل عليهم الخادمه

فتتفاجا من وجودهم جميعا بالمطبخ :خير في حاجه

حمزة :كنتي فين يا نعمه

نعمه :كنت في السوق بشتري شوية طلبات

حمزة :حضريلي الغدا على مااخد دش عشان خارج

نعمه :حاضر

يتحرك من المطبخ ويخرج سريعا بينما هي تعلن دموعها عن الاستسلام فلقد تحملت لتظهر شجاعتها أمامه ولكن الآن لها ان تخرج مابداخلها

فلا تشعر سوى بيد الصغيره وهي تمسح لها دموعها فتقبلها وتاخذها لتغير لها ملابسها

😰😰😰😰😰😰😰

يقف تحت المياه التي تنهمر بشده عليه يتذكرها وهي واقفه أمامه وانفاسها تقترب منه بشده كان يود لو اختطفها في احضانه ليروي اشتياقه لها

كم كان سعيد وهو يتذوق ماصنعته بايديها والذي طالما احبه بل وعشقه من يديه ههههههههههه

حمزة :بتضحكي على ايه يابت

ياسمين :شكلك يضحك اوي ناقص تاكل الطبق

حمزة :اعمل ايه مانتي بتعملي الكيك تحفه

ياسمين :ألف هنا وشفا ياحبيبي

حمزة :خدي بالك لما نتجوز لازم تعمليلي كيك كل يوم

ياسمين :حبيبي احنا لمانتجوز حعملك الحلو كله

حمزة :انتي الحلو اللي فحياتي ياياسمين

ياسمين :تسلملي ياقلب ياسمين

يضرب بيديه على الحائط بشده وهو يوبخ قلبه ويلعنه :اسكت بقى ارحمني بقى بطل بقى كفايه متفتكرش مش عاوزك تفتكر ليها غير الغدر والخيانه فاهم فاهم

يغمض عينيه ليختلط الماء بطعم الدموع التي يحاول ان يسيطر عليها أمامه

بينما هي وبعد أن ساعدت الصغيرة على الانتهاء من الاستحمام وتغيير ملابسها وقد قامت هي الاخرى بتغيير ملابسها التي قد ابتلت

تجلسها امامها وتقوم بتسريح شعرها تسرح في عيونها بلونها الأزرق الخالص النقي الذي يشبه لون البحر

تعرفي ياسيلا عيونك حلوه اوي بسم الله ماشاء الله تبارك الرحمن

سيلا :بابي قول زي عين مامي

ياسمين :طب ياللا عشان بابي عاوز ياكل معاكي

سيلا :ياللا بينا

تمسكها من يديها  وتخرج من الغرفه فتخترق انفها رائحة عطره التي استحوذت عليها

ولكنها تحاول الصمود ولا تعيرت اهتمام هي تلك الصغيرة من التفتت له

بابي بابي

ياخذها حمزة من يديها ويرفعها له ويقبلها:حبيبة قلب بابي

كانت الاخرى هائمه فيه وكيف لاتهيم فيه وهو حبيب القلب وعشق الروح هو من انتظرته سنوات على أمل اللقاء

أيعقل ذلك هو بين يداي ولا امتلك حتى النظرة اليه يالها من حسرة 

تفيق فلا تجدهما أمامها فلقد نزل وهو يحمل الصغيرة بينما هي تنزل خلفهما ولكنها تقف وتحدث نفسها:هو انتي حتنزلي ليه طب هو حياكل هو وبنته انتي حتعملي ايه حتقفي جمبهم لحد مايخلصوا اكل واللا حتخدمي عليهم

لاء انا حستنى هنا هو قال انه حياكل ويخرج لما يبقى يمشي حبقى انزل اخد البنت

معقوله ياربي اللي بيحصل ده انا مش قادرة اصدق اللي بيحصل معقوله ده حمزة حبيبي وانا اللي كنت مستنياه ينصفني وياخدلي حقي من كل اللي ظلموني يقوم هو اللي ييجي علية بالشكل ده

معقوله ده حمزة اللي انا حافظتله على نفسي ووقفت ادام راغب بكل قوتي عشان محدش يلمسني غيره ولا اكون لحد غيره يعمل فية كده

ماشي ياحمزة ماشي ياحبيب عمري خليك اقسى واظلم كمان براحتك 

😰😰😰😰😰😰

ينتهي أول يوم لها بالعمل وتعود إلى بيتها تصعد السلم قتقابلها سحر

ياسمين :مالك ياسحر واقفه كده ليه

سحر :مش حتصدقي سميرة قاعده حوة مع سعد

ياسمين :بجد واللا بتهزري

سحر :اه وربنا هههههههه بس، ياعيني لو شفتيه وهو قاعد قدامها زي التلميذ الخيبان

ياسمين :بيحبها ياسحر

سحر :ربنا يستر بس ويتفقوا

ياسمين :طب بصي ياسحر عشان انا والله جايه تعبانه حدخل اكل لي لقمه واستريح شويه وبعد كده اجيلكم

تدخل فتجد امها في انتطارها:اتاخرتي اوي ياياسمين

ياسمين :معلش ياماما على مااطمنت عالبنت وجيت

صفاء :الناس كويسين ياياسمين

ياسمين :أيوة ياماما كويسين اوي عن اذنك حدخل اغير هدومي

صفاء :ادخلي ياحبيبتي ربنا يريح قلبك ويطمني عليكي يارب

تدخل ياسمين فترمي بنفسها على الفراش وتبكي بمراره:لا انا مش حقدر استحمل مش حقدر اشوفه قدام عينيه ويبقى بيني وبينه الحواجز دي كلها

اعمل ايه بس ياربي اعمل ايه

يارب عني وقويني على اللي انا فيه

بينما في بيت الجيران

حيث يجلس سعد مع سميرة وكأنه تلميذ يؤدي امتحانا وينتظر نتيجته

سعد:انا ححاول والله ياسميرة اعمل اللي يريحك بقدر المستطاع

سميرة :يادي النيله اهي دي اول حاجه حتكرهني في الدنيا

سعد :هههههه خلاص حقولك ياسمر ايه رأيك

سميرة :تمام سمر سمر

المهم حتعمل ايه فموضوع الشقه

سعد :اصل المشكلة اني صرفت كتير اوي بنيتها وشطبتها والله لو شفتيها حتعجبك

سميرة :والله لو كانت قصر عابدين نفسه ماحدخل البيت ده ولا حسكن فيه اتصرف سيبها لاخوك بيعها ولع فيها المهم مش حعيش فيها ولا يوم واحد وهو ده شرطي الاساسي عشان اوافق

سعد :انا ممكن اسيبها لمصطفى هو كده كده هو محتاج شقه بس ده حيعطلنا شويه

سميرة :مش مهم نتعطل ورانا ايه المهم تفرحني بشقه حلوة بعيد عن بيتكم

سعد :حاضر ياسميرة خلاص كده في اوامر تانيه

سميرة :تفسحني وتخرجني وتدلعني  وتجيبلي اللي نفسي فيه

سامي وهو يدخل عليهما:يفسحك ده ايه ان شاء الله احنا معندناش الكلام ده

سميرة :انت بتتصنت علينا

سامي :ايوة طبعا مش اشوف حتعملي ايه في الغلبان ده

فسح ايه وخروج ايه اللي بتتكلمي فيه احنا معندناش الكلام ده ييجي هنا وتقعدوا ادامنا زي مانتوا عاوزبن خروج وفسح لاء

سميرة :ليه لاء مااصحابي كلهم بيخرجوا مع خطابهم اشمعنى انا

سامي :والله هو ده اللي عندي طول مانتوا مخطوبين مفيش خروج لما تروحي بيته ابقوا باتوا في الشارع ملناش فيه

سميرة :هي جوازه سوده انا عارفه

سامي :سوده على دماغك ان شاء الله

سعد :صللوا عالنبي ياجماعه خلاص ياسامي اللي يريحكم اهدوا بقى خلينا نخلص من ام الشبكه السوده دي

سامي :سوده على دماغك انت كمان

بقولكم ايه وديني شكلي حولع فيكم انتوا الاتنين جتكم الهم

سعد :هو في ايه

سميرة :فى محشي اغرفلك

سعد :ايوة بقى فك ياقمر والله لحفرحك ياسمورتي واعيشك الهنا كله بحبك يابت خالتي

سميرة :ماشي يافالح اما اشوف اخرتها ايه

           الفصل الرابع والعشرون من هنا

لقراءة باقي الفصول من هنا