الحلقه السادسه
رواية قلوب تنزف عشقاً
بقلمي :عبير سليم
🌹🌹🌹🌹🌹🌹🌹
قبل بداية الحلقه حابه اقولكم حاجه بصراحه انا بعد ماكتبت رواية تضحيه بلاثمن وحياة اسرت قلبي وشمس تتحدى الغيوم وانا كنت بفكر جدياً اني مكتبش تاني
خصوصا ان الكتابه مرهقه جدآ وبتضيع الوقت وبتتعبلي عينيه اللي هي اصلا ضعيفه وتعباني من غير حاجه
لكن لما لقيت كتير من الفانز بيدخلولي خاص ويسألوني عن الكتابه قررت ارجع تاني للكتابه بس كنت حاسه ان شغفي للكتابه قل كتير وكان كل عشمي ان الفانز حيقدروا ده ويشجعوني اني اكمل الروايه
لكن اللي شايفاه ان المتابعه للروايه ضعيف جدا وخصوصا عالواتباد لا فى مشاهده ولافى كومنتات ولا تعليقات كويسه ترفع معنوياتي وتخليني اكتب بحماس
وده يمكن السبب الاساسي اللي مخليني اتأخر عليكم فى تنزيل الحلقه وانها كمان بتكون قصيرة بالمقارنة برواياتي اللي قبل كده
عشان كده انا بجد عاوزة اعرف رأيكم بصراحه فى الروايه عشان لو مش عجباكم اوقف كتابتها بدل مانا حسه اني بكتب حاجه ملهاش لازمه ولا فايده
لأني فى الأول وفى الاخر بكتب ليكم انتوا
ودلوقتى حقول بسم الله الرحمن الرحيم ونبدأ الحلقه الجديده
😢تفتح الباب فتتفاجا به جالسا أمامها
إيه ده ممكن أفهم حضرتك بتعمل إيه هنا
وازاي اصلا تتجرأ انك تيجي لحد هنا
أسامه :ياسمين احترمي نفسك الباشمهندس فبيتنا مينفعش كده دي مش أصول
ياسمين :اصول وهو اللي زي ده يعرف فى الأصول عشان نعامله بيها
نعم حضرتك عاوز ايه وجاي هنا ليه ايه جاي تاخد راي اهلي فى العرض الحقير اللي عرضته علية
راغب وهو يتحدث بمنتهى الهدوء:وهو لما واحد ييجي لحد بيت واحده عاجباه ويقرر انه يدخل البيت من بابه ويطلبها فحلال ربنا هل ده من وجهة نظرك يبقى عرض حقير
ياسمين :يطلب ايه انت بتقول ايه انت مجنون انا مخطوبه فاهم يعني ايه
راغب :قصدك كنتي مخطوبه واللي اعرفه ان خطيبك مات مش كده واللا انا غلطان
ياسمين :غلطان وستين غلطان انا خطيبي عايش مامتش واتفضل حضرتك من هنا
أسامه :انتي اتجننتي واللا ايه مالك طايحه فى الراجل من وقت مادخلتي فى إيه انتي محدش مالي عينك والا ايه
راغب :بالراحه عليها يااسامه هي بس متفاجئه من وجودي وطلبي لكن انا متأكد ان ياسمين ذكيه وحتفكر فى مصلحتها كويس
ياسمين :استغفر الله العظيم يارب
هو انت مبتفهمش بقولك اتفضل اخرج برة طلبك مرفوض
فلا تشعر سوى بصفعه قويه على خدها من اخيها
راغب وهو يبعد يده عنها:مش بالشكل ده يااسامه قلتلك هي
مكنتش متوقعه طلبي ولازم اديها فرصه تفكر وانا متأكد انها حتعقل وتوافق
أسامه :تعقل ايه وتنيل إيه على دماغها دي مخها ضرب خلاص وقعدتها عالبحر كل يوم جننتها اكتر وانا اللي حعرف حعقلها ازاي
كانت ياسمين تنتحب بشده
صفاء وهي تأخذها فحضنها:بالراحه على اختك يااسامه الله مش كده يابني
اسامه:خديها جوة واحده غبيه مش وش نعمه تموت فالفقر
راغب باشا احنا متاسفين وانا موافق على جوازك منها وحضرتك تقدر تيجي تخطبها وتلبسها الشبكه فأي وقت انت عاوزه
راغب :خطوبه إيه بس هو انا لسه حكون مستقبلي عشان اخطب انا عاوز كتب كتاب وجواز على طول
اسامه :تمام وانا موافق
راغب:بكرة حاجي اكتب كتابها واخدها
اسامه :لا ياباشا الأصول محدش يتعداها والكلام ده مينفعش
راغب :مش فاهم
أسامه :انا اختي ست البنات ودي اول فرحتها ولازم يتعملها فرح تتحاكى بيت المنطقه كلها والا الناس تاكل وشنا وتطلع الف اشاعه واشاعه عليها
وانا اللي يجيب سيرة اختي بكلمه اولع فيه وفأهله
راغب:يعني عاوز إيه
اسامه:تدينا فرصه اسبوع نجهز نفسنا واعزم كل شباب المنطقة واهلها واعمل لاختي فرح ماتعملش لحد وتاخدها من وسط اهلها
وقبل كل ده تدفع المهر اللي قلت عليه
راغب:ماشي يااسامه يبقى يوم الخميس الجاي كتب الكتاب والفرح وساعة كتب الكتاب حكتبلك شيك بالمهر
أسامه :لا ياباشا انا مفهمش فشيكات وكمبيالات انا عاوز اشوف ورق البنكنوت ادامي عالطربيزة
راغب :ماشي المهم اتجوز ياسمين
اسامه :حتتجوزها ياباشا مع السلامه ياابونسب شرفت ونورت
ينزل معه إلى الأسفل ليجد الأطفال يجلسون عليها :ياللا ياولد انت وهو من هنا
امرأة في الشارع :عربية مين دي يااسامه
أسامه :عربية راغب باشا خطيب أختي ياسمين
المرأة :هي ياسمين اتخطبت
أسامه :ايوة وفرحها الأسبوع الجاي والشارع كله معزوم
المرأه :لووووووووولي ألف مبروك ربنا يتمم بخير
يركب راغب السياره وينطلق بها وهو يسب ذاك الاسامه الذي لايهمه سوى ان يقبض الثمن الذي يبيع به اخته ولكنه ليس أقل منه حقارة وهو يرغم فتاه على الزواج منه بالقوة
يدخل لها الغرفه فيجدها تبكي بشده:بتعيطي على ايه ياغبيه يامتخلفه
ياسمين :بقولك ايه انا مش حتجوز الراجل ده انت فاهم واللا لاء
أسامه :لا مش فاهم ياياسمين واعملي حسابك انتي حتتجوزيه ورجلك فوق رقبتك
ياسمين :انت ايه يااخي معندكش نخوة الراجل ده كان عاوز يمشي مع اختك فى الحرام يعني المفروض بدل ماتحط ايدك فايده عشان تجوزني ليه المفروض تقتله انه كان يطعن شرفك بخنجر
صفاء :افهمي ياياسمين هو قاللنا انه قالك كده عشان بس يختبرك ويتأكد من اخلاقك كويس ولما انتي قلتيله انك حتسيبي الشغل اتاكد انك كويسه وجه يتقدملك رسمي
ياسمين :يتقدم لمين ياماما حرام عليكم وحمزة انتوا ناسيين انه خطيبي ودبلته فايدي
أسامه :حمزة مين وزفت مين على دماغك ال حمزة ال
وايه اللي يجيب الجربان ده اللي كان بيكمل عشاه نوم للباشا اللي جالك
ياسمين :وانا مش حتجوز غير حمزة مهما حصل
أسامة :حمزة مات وشبع موت خلاص انتهى زمان السمك أكله خلاص
ياسمين :لاء متقولش كده محدش يقول كده على حمزة حمزة مامتش حمزة عايش ايوه عايش وحيرجعلي انا متاكده
صفاء :وافرضي مارجعش ياياسمين
ياسمين :بردو حستناه حفضل مستنياه العمر كله لكن مش ممكن أكون لحد غيره انا اصلا مينفعش اكون لحد غير حمزة افهموني ياناس
اسامه وهو يشدها من شعرها بقسوة ويرميها فى الارض ويضربها بقدمه في كل انحاء جسمها:انتي بتقولي ايه بتقولي ايه يعني إيه مينفعش تكوني لحد غيره انتي ايه اللي حصل بينك وبينه ده انا حدفنك بالحيا حطيتي راسنا فى الطين ياياسمين ده انا حقتلك واشرب من دمك
سلمتيله نفسك عملتي إيه من ورانا كنتي بتغفلينا ياياسمين
ياسمين وهي تصرخ من شدة الضرب:والله ماعملت حاجه انا مفيش حد لمسني انا حمزة عمره مالمسني
صفاء وهي تحاول ابعاده عنها :اختك محترمه يااسامه اختك متربيه ومتعملش كده
أسامه :ليه متعملش كده ليه وهي كانت سارحه معاه ليل نهار
انا حخلص عليكي ياياسمين وديني لاقتلك
صفاء :وتقتلها ليه بس ماالراجل حيتجوزها اهوه
أسامه :اعملوا حسابكم كتب الكتاب والدخله يوم الخميس الجاي والبت دي متخرجش من البيت لحد مااغورها من هنا واعملي حسابك لو فتحتي بؤك بكلمه حجيب السكينه واغرزها فقلبك واغسل عارك بأيدي
صفاء :يعني عاوز تقتل اختك وتضيع نفسك يابني ده انا كنت اموت فيها لاء ياسمين عاقله مش حتعمل حاجه تضيع بيها نفسها وتضيعك
صح ياياسمين مش كده يابنتي
كانت ياسمين ترتجف من شدة البكاء ولا ترد بكلمه
أسامه :قلتي إيه سمعيني صوتك موافقه والا عندك اعتراض
ياسمين وهي تبكي بشده :والنبي يااسامه حرام عليك ده انا اختك اهون عليك تعمل فية كده اهون عليك ترميني لواحد معرفش ياخد مني اللي هو عاوزه فالحرام فجه يضحك عليكم بقرشين عشان ياخداللي عاوزه مني وبعد كده يرميني
اهون عليك تعمل فية كده هو انا للدرجه دي رخيصه اوي كده فنظركم للدرجه دي بايعني حرام عليكم تعملوا فية كده
ماما انتي طول عمرك قاسيه علية وعمري ماحسيت بحنانك مشفتش منك حنيه مشوفتش غير قسوة فى المعامله كأني مش بنتك ودلوقتى خلاص حتبيعيني للي حيدفعلكم التمن
حرام عليكي ياماما اقفي جمبي متسيبينيش لأسامة يعمل فية كده
صفاء:لا والله ياياسمين انا صحيح جامده عليكي بس مش عشان مبحبكيش ده انتي بنتي ياياسمين ضنايا انا بس مكنتش بتعجبني تصرفاتك ولاتفكيرك طول عمري شايفاكي بايعه الدنيا بتفكري فى اللي حواليكي ومبتفتكريش نفسك
ويوم ماحبيتي رحتي حبيتي واحد كحيان مش لاقي ياكل انا كان نفسي تكوني واعيه وعارفه مصلحتك تتجوزي جوازة حلوة ترفعك لفوق تعيشي الدنيا اللي طول عمرك محرومه منها مش تحكمي على نفسك تعيشي فالفقر والقرف طول العمر
عاجبك العيشه اللي احنا عايشينها دي انا طول عمري عايشه فى الفقر ودقت مرارة انك يبقى نفسك في الحاجه ومتقدريش تجيبيها عشان متحتكميش على حاجه
عيشي ياياسمين عيشي الحياة الحلوة دوقي طعم اللقمه الحلوة نامي على فرشه حلوة البسي اللبس اللي عمرك ماشفتيه غير على الممثلات فى التليفزيون
عاوزة تحرمي نفسك من كل ده ليه وعشان مين عشان واحد الله اعلم اذا كان حيرجع والا لاء
ياسمين :الواحد اللي بتتكلمي عنه ده حب عمري كله ياماما الحب اللي عينيه فتحت عليه
صفاء :الحب بيروح مع الفقر حيفضل يطلع من شغلانه على شغلانه حيرجعلك حيله مهدود من بهدلته فى الشغل ولا حيبقى في حب ولا اي حاجه وساعتها حتكرهيه وتكرهي نفسك وعيشتك كلها
ياسمين :لا ياماما انا لاعاوزة عيشه مرتاحه ولا عاوزة انام على حرير انا مش عاوزة غير حمزة وبس
أسامة :دي بني آدمه غبيه انتي بتتكلمي مع مين بت انتي انا اديت كلمه للراجل ومش حرجع فيها سامعه والا لاء جتك الهم بت فقر
يتركهم ويخرج
صفاء :ياسمين اسكتي خالص مش عاوزة اسمعلك صوت انتي عارفه اخوكي مش عاوزين فضايح
ياسمين :طب اعمل ايه انا دلوقتى يعني انتوا خلاص حكمتوا علية بالإعدام
صفاء :اعدام ايه بس ده انتي حتدخلي دنيا يابنتي
ياسمين :انتي بتكدبي وتصدقي نفسك ياماما دنيا ايه اللي حدخلها انتي مصدقه انه عاوز يتجوزني عشان اعيش معاه على طول انا وجودي معاه حيبقى فترة مؤقته ياماما حياخد مني اللي هو عاوزه ويرميني ياماما
صفاء :انتي وشطارتك بقى حببيه فيكي واعمليله كل اللي هو عاوزه ولو شاطرة اتجدعني وجيبيله عيل ساعتها مش حيقدر يستغنى عنك ابدا
بقولك ايه اعقلي كده وفوقي لنفسك واعرفي مصلحتك ياللا قومي غيري هدومك دي وكليلك لقمه واللي عاوزه ربنا هو اللي حيكون
😰😰😰😰😰😰😰
انتي بتعيطي ليه ياام حمزة بس هي البنت مش من حقها تتجوز وتفرح
واللا حنحكم عليها بالإعدام
فاطمه:وحمزة خلاص مش ده اللي كانت روحها فيه هو ايه اللي ضيعه مننا مش عشان خاطرها هيا ماالواد كان فحضننا ياحبيبي يابني
ياخسارة شبابك اللي راح هدر ياضنايا وفى الاخر اهيه اللي انت ضيعت نفسك عشانها نسيتك وبسرعه اوي هي ايه ماصدقت اتخطبت وحتتجوز وتفرح وانت رحت خلاص ياضنايا يابني
منى:بس ياماما بقى الله يخليكي كفاياكي عياط ياماما حتروحى مننا
فاطمه :مااروح وانا اقعد ليه وعشان مين بعد ماالغالي راح
محمد :خلاص بقى يافاطمه كفاكي الله جاب الله خد الله عليه العوض
انت الحنين يارب العوض من عندك انت يارب
منى: انتي متأكده ياماما من الكلام ده
فاطمه :بقولك اسامه بعضمة لسانه هو اللي قال لام السيد انه خطيبها لاء وايه بتقولك شكله بيه
عينك عليك ياحمزة رحت بلاش ياحبيبي
تعالى شوف حبيبتك اللي سيبت الدنيا كلها عشانها وهيا بتتجوز غيرك
فجأة يسمعون طرقا عنيفا على الباب
تقوم منى سريعا لترى من الطارق تفتحه لتجدها تدخل سريعا
فيتفاجا الجميع بوجودها
فاطمه:اهلا بالعروسه مبروك يا حبيبتي طب مش تعزمينا ده احنا بنعرف نعمل الواجب بردو واللا خلاص حمزة نسيتيه ونسيتي أهله كمان
ياسمين :لا لا والله ياطنط انا عمري مانسيت حمزة ولا قلبي يقدر ينساه ابدا
فاطمه :اه متقدريش تنسيه لكن تقدري تتخطبي وتتجوزي غيره مش كده
محمد :بس بقى يافاطمه الله يخليكي حرام عليكي البنت متعمليش فيها كده تعالي يابنتي
ياسمين وهي تبكي :والله العظيم ياعمي انا اتفاجئت بالراجل ده وانا موافقتش والله ماوافقت
انا هربت من البيت وحتى خفت اروح عند خالتي لأن ده أول مكان حيدوروا علية فيه
اول مكان فكرت فيه هنا عندكم قلت مليش مكان غير وسط اهل حمزة
حتقفوا جمبي وتخلوني فوسطكم واللا اروح للبحر انا كمان مانا خلاص مبقليش غيره ارمي فيه نفسي واروح انا كمان بس انا عايشه على أمل ان حمزة حيرجعلي خايفه عليه يحصلله حاجه لو رجع وملقانيش
محمد :لو الأرض ماشالتكيش نشيلك فوق راسنا يابنتي ده انتي تنورينا ياحبيبتى انتي عارفه غلاوتك عندي
بس يابنتي انتي ليه مش موافقه عليه اتجوزي يابنتي وافرحي والحي ابقى من الميت
ياسمين :لاء ميت لاء حمزة عايش وحيرجع وانا حستناه ولو مكنتش لحمزة مش حكون لحد غيره
فاطمه :ياحبيبتى ياياسمين وانا اللي قلت انك نسيتيه خلاص وبتدوري على مصلحتك ياحبيبتى يابنتي
ياسمين :انسى مين انسى حمزة ده روحي حد ينسى روحه قعدوني
فوسطكم وانا والله مش حتقل عليكم ومش حضايقكم
فاطمه :تضايقينا ده انتي حبيبة الغالي ربنا يرجعك بالسلامه ياضنايا ويطمن قلوبنا عليك يارب
محمد:لاحول ولا قوة الا بالله العلي العظيم
خليكي يابنتي معانا وربك ان شاء الله حيحلها
قومي ادخلى غيري هدومك خديها يامنى تستريح تبات نار تصبح رماد وليها رب يدبرها