رواية قلبي_ليسَ_بيدي
الفصل الاول والثاني
بقلم حسناء رمضان
"كنت قاعده ف اوضتي لوحدي ف الضلمه وحاطه الهاند فري وضامه رجلي وحاضناهم وشارده"
فجأه الباب خبط وبابا دخل
ـبابا: جاكي.
=جاكي: نعم يابابا..
ـبابا: حضّري نفسك عشان هنروح نقعد عند واحد صاحبي يومين كدا.
=جاكي: نعم؟؟... ليه!
ـ بابا: هتفهمي بعدين..
= جاكي: ايوا بس ليه يابابا؟
ـ بابا: جاكي اسمعي الكلام بدون نقاش..
=جاكي: طب والجامعه!
ـبابا:هتنقلي جامعه هناك
=جاكي: نعم!.. لا طبعا مش هسيب جامعتي... اسيبها ليه اصلا؟
ـ بابا: "بعصبيه" قولت مش عايز أسئلة كتير.. هتعرفي كل حاجه في وقتها
= جاكي: "بكسره ".. حاضر.
ـ بابا: تصبحي على خير.
=جاكي: وحضرتك من اهل الخير..
"خرج بابا وقُمت صليت قيام الليل وقرأت قرآن ونمت"
تاني يوم......
ـبابا: جاكي انجزي عشان منتأخرش..
= جاكي: حاضر جايه اهو..
ـبابا: اي دا؟؟
=جاكي: ايه؟؟
ـ بابا: مجهزتيش شُنَطِك ليه؟
=جاكي: شُنط ايه يابابا؟... مش حضرتك قولت هنقعد يومين بس!
ـبابا: اسمعي الكلام وبلاش اسئله كتير.. هاتي حاجاتك كلها، متسيبيش اي حاجه هنا..
=جاكي: ليه احنا هنقيم عندهم ع طول ولا ايه؟
ـبابا: قولت مش عايز أسئلة كتير..
=جاكي: حاضر..
"دخلت الاوضه ولميت كل حاجه وحسيت احساس غريب اول مره احسه وكنت تايهه ومش فاهمه في اي"
ـبابا: خلصتي؟
=جاكي: ايوا اهو..
ـ بابا: حطي الحاجات في العربيه دي
=جاكي: عربية مين دي يابابا؟
ـ بابا: دي عربية عمك احمد.
=جاكي: عمي احمد مين؟
ـ بابا: صاحبي اللي هنقعد عنده..
=جاكي: اه تمام..
" حطيت الشنط في العربيه ولقيت عمو احمد داا في وشي... كان راجل كدا ف الاربعينات..
ـ عمو احمد: ازيك ياقمر..
=جاكي: الحمد لله ياعمو ازاي حضرتك..
ـعمو احمد: ماشاء الله كبرتي وبقيتي عروسه اهو..
=جاكي: ربنا يخليك..
ـ عمو احمد: يلا اركبوا
" ركبنا العربيه وانا فضلت باصه من الشباك وشارده ومش فاهمه اي حاجه.. ليه سايبين البيت وماشيين.. وليه هنقعد عند عمو دا.. ومليش حق اني اسال حتى.. طول الطريق بابا وعمو احمد كانوا بيتكلموا في الشغل وصدعوني حرفيا.. ".. بعد وقت طوووويل قوووي وطريق طويل..
اي دااااا!!.. اسكندريه!!.. جينا اسكندريه؟؟... بس ليه!!
ـعمو احمد: وصلنا
" فوقت ع صوته ونزلت...اتصدمت من المنظر...اي داا..احناااا هنقعد هناااا!!... اي الجماااال داااا... كانت ڤيلا تحفه وكبيره..
روحت انزل الشُنَط
ـعَنِك .... " ببص لقيت واحد حلو كدا وطويل"
=جاكي: "بصوت خافِت".. شكرا.
ـليه الحزن دا بس!
= جاكي: حزن ايه؟
ـ اللي ف عنيكي دا..
مردتش عليه وخدت الشُنط ودخلت.. لقيت ناس واقفين كانوا في انتظارنا تقريبا..
ـ بابا: تعالي سلمي ياجاكي على ولاد عمك..
ـ هاي ازيك انا نور.
=جاكي: "بابتسامه"... اهلا.. ـ وانا سما..
= جاكي: تشرفنا..
ـ وانا هند.
=جاكي: اهلا.
"لقيت الواد الحلو دا قرب وبيقولي..
ـ وانا محمد
هزيت راسي ومتكلمتش..
ـعمو احمد: يلا ياولاد خدوا جاكي وروها اوضتها..
مشيت معاهم.. الفيلا كبيره جدا ماشاء الله..
ـ هند:اهي دي اوضتك..اتفضلي..
دخلت الاوضه وكانت حاجه عظمه والله.. الاوضه فيها حمام خاص وبلاكونه كبيره كدا وواسعه وشكل الاوضه قمر اصلا.. لا كدا انا هفضل منعزله طول عمري..
ـ عجبتك!
لفيت لقيت محمد دا ورايا ومعاه هند..
=جاكي: ااه كويسه.
ـمحمد: طب ياستي عندك الدولاب اهو حطي هدومك فيه وهند هتساعدك..
= جاكي: لا شكرا انا هعرف اتصرف..
ـمحمد: لا ازاي لازم تساعدك عشان لو احتاجتي حاجه
= جاكي: شكرا بجد اناا....
قاطعِتني..
ـهند: لا متقلقيش مش هرخم عليكي انا اصلا عسل وهتحبيني..
ابتسمتلها وهزيت راسي..
ـ هند: وانت يا اخ انت، اتكل ع الله عشان ناخد راحتنا..انت بتعمل اي هنا اصلا!...
ـ محمد: اي دا لا خليني معاكوا شويه..
ـ هند: ولااا اطلع بررره..
ـ محمد: يوه بقاا اي الرخامه دي..
ـ هند: بررره بقولك..
ـ محمد: ماشي ياختي خارج بطلي صريخ..
طلع وقفلِت الباب وقعدت تنقل معايا حاجتي .. عدا شوية وقت ف سكوت تام.. بعدين هند قطعت الصمت دا..
ـهند: اي ياجميل، ساكت ليه!
=جاكي: لا عادي.
ـهند: اه انتي شكلك لسه متعودتيش علينا بقااا..
=جاكي: لا مش كدا بس انا يمكن كلامي قليل شويه..
ـهند: لا قليل اي دانتي هتفرفشي معانا كدا وهتحبينا ع الاخر والله..
=جاكي: اكيد، بس هو انا ينفع اسالك ع حاجه!..
ـ هند: اه طبعا اسالي..
=جاكي: متعرفيش احنا هنا ليه؟
ـهند: يعني ايه!
=جاكي: يعني احنا جايين نقعد هنا ليه؟
ـ هند: هو انتي متعرفيش!
=جاكي: لا
ـ هند: بصي هو انا معرفش السبب بس انا بصيت لقيت بابا بيقول جهزوا الاوض ياولاد عشان في ضيوف.. فبقوله ضيوف مين.. قال واحد صاحبي وبنته وهيقعدوا معانا حَبّه.. سألته ليه.. قالي مش شغلك.
" بيحبني قوي بابا داا"
= جاكي: ابتسمت.. يعني مقلكوش اي السبب؟
ـهند: لا ياقمر والله
= جاكي: تمام.
ـ هند: بس تعرفي.. اسمك حلو قوي " جاكي"
= جاكي: شكرا.. دا من ذوقك بس..
=جاكي: انتوا كلكوا اخوات!
ـهند: لا ياستي.. انا ومحمد وسما اخوات.. نور تبقى بنت عمنا..
=جاكي: ااه..
ـ هند: اهو خلصنا ياقمر اسيبك انا بقاا عشان احضر الاكل مع عطيات..
=جاكي: عطيات مين..
ـهند: الشغاله
=جاكي: ااه تمام.
ـهند: محتاجه حاجه!
= جاكي: تسلمي شكرا
قعدت ع السرير وانا حاسه اني غريبه.. دا مش مكاني.. انا بعمل اي هنا.. ههه واي الجديد.. حتى ف بيتنا كنت غريبه..
دخلت اخدت شاور وفضلت ابص لنفسي ف المرايا بشرود ودموعي بتنزل لوحدها..
فوقت ع صوت خبط الباب.. فتحت لقيت نور..
ـ نور: يلا عشان الاكل جاهز..
= جاكي: لا شكرا انا مش جعانه
ـ نور: لا ازاي مينفعش طبعا.. لازم تنزلي معايا
بعد اصرار منها نزلت وانا اصلا مبحبش اكل مع حد..
ـعمو احمد: يلا يابنتي اخرتي كدا ليه!
ـ نور: مكانتش عايزه تنزل ياعمو..
ـ عمو احمد: ليه بس كدا يابنتي.. انتي مش حابه تاكلي معانا ولا اي!..
= جاكي: لا والله ياعمو مش كدا.. انا بس مش جعانه..
ـمحمد: مش جعانه ولا زعلانه!
=جاكي: وهزعل ليه؟
ـ محمد: مش عارف بس حاسك زعلانه..
بصتله بقرف..
=جاكي: متحسش تاني..
ابتسموا
ـمحمد: بابتسامه.. حاضر ..
بابا كان قاعد ساكت وباصص ف الاكل..
ـ عمو احمد: مالك يعم بس شايل الهم ليه كدا!
ـ بابا: لا ولا هم ولا حاجه.. انا بس مصدع شويه..
ـ سما: تحب اجيب لحضرتك برشام ياعمو؟
ـبابا: لا يابنتي شكرا.. انا هبقاا كويس دلوقتي..
ـ عمو احمد: طب يلا الاكل هيبرد، كُلوا..
بدأنا ناكل وكله مركز ف اكله.. وبعدين بدأوا يتكلموا..
ـ عمو احمد: الا قولي يامحمد..
ـ محمد: نعم يابابا..
ـ عمو احمد: عامل اي ف الكليه بتاعتك؟
ـ محمد: وليه السيره دي بس ماحنا كنا حلوين..
ـ عمو احمد: هتفضل طول عمرك فاشل كدا ياولد!.. ركز يابني ف مستقبلك وسيبك من صحابك دول.. مش هينفعوك دول عيال صيع..
ـ محمد: وانا مالي يابابا.. اذا كان هما حلوين ولا وحشين.. انا ليا دعوه بنفسي.. طلاما مبعملش حاجه غلط يبقى خلاص..
ـ عمو احمد: خلاص اي يابني وبتاع اي.. صُحبة الصالح تصلِح.. وانت مش مصاحب حد صالح.. صحابك كلهم مش كويسين.. وهتتأثر بيهم..
ـ محمد: لا متقلقش ياحاج مش هتأثر ولا حاجه.. وبعدين مانا بقالي كتير معاهم اهو.. عمرك شوفتني بعمل حاجه غلط!.. غير حاجتين تلاته كدا🙄..
ـ عمو احمد: يبني انا عايز مصلحتك..
ـ محمد: متقلقش ياحاج والله..
ـ نور: سيبك منه ياعمو دا واحد فاشل اصلا
ـ محمد: والله.. بقاا كدا!
ـ هند: ايوا يامحمد انت من زمان فاشل.. اي الجديد يعني..
ـمحمد: الله الله.. كلكوا قلبتوا عليا ف ثانيه..
ـ عمو احمد: الله يكون ف عون اللي هتكون من نصيبه يابنتي..
ـ محمد: بابختها وياهناها بيا والله ياحاج.. دي هتاخد حتة سكر🥱..
ـنور: قصدك حتة كوسه..
ـ سما: اه يابت والله دي هتدعي ع نفسها مليون مره انها وافقت عليه..
"قعدوا يتكلموا ويضحكوا ويهزروا وانا ماسكه المعلقه وبقلب ف الطبق وشارده.. "
ـ عمو احمد: مبتاكليش ليه يابنتي!.. هو الاكل مش عاجبك!
= جاكي: لا والله ياعمو ابدا.. باكل اهو..
ـ عمو احمد: صحيح جامعتك هتبقي فين؟..
=جاكي: مش عارفه والله انا لسه منقلتش الورق..
ـ عمو احمد: انتي ف كليه اي يابنتي؟
= جاكي: "بابتسامه مكسوره " طِب ياعمو..
ـ عمو احمد: بسم الله ماشاء الله.. اللهم بارك.. برافو عليكي والله يابنتي.. ربنا يحفظك..
ـ هند: اي دا داحنا طلعنا جامدين اهو..
ـ عمو احمد: شايف البنات القمر اللي تفتح النفس.. مش زيك يافاشل.. اتعلم..
ـ محمد: شوفتي اديكي فتحتي عليا فتحه اهو من اول يوم..
ـ نور: بس يافاشل انت.. بس قوليلي هتنقلي امتى؟..
= جاكي: مش عارفه والله.. المفروض بابا اللي يقول..
ـ بابا: بكرا ان شاء الله هروح اجيبلك ورقك وانقلك..
ـ عمو احمد: انت هات ورقها وهي تروح مع محمد يقدموا.. متتعبش نفسك انت.. دا غير انك متعرفش حاجه هنا...
ـ بابا: مش عايز اتعبكوا معايا.. كفايه انكوا مستحملينا هنا..
ـ عمو احمد: اخص عليك.. مكنش العشم.. دا بيتك.. هو انت ف بيت حد غريب!
ـ بابا: ربنا يخليك ليا ياصاحبي..
ـ محمد: هتقدمي ف انهي جامعه بقى؟
= جاكي: مش عارفه.. انا معرفش حاجه هنا..
ـ محمد: جامعه اسكندريه دي كويسه وكمان قريبه من هنا.. اظن دي مناسبه
ـ جاكي: اللي يشوفه بابا..
ـ محمد: ايه رأيك ياعمي!
ـ بابا: لو كويسه يبقى تمام، ع بركة الله.. اهم حاجه تبقى قريبه من هنا..
ـ عمو احمد: خلاص كدا اتحلت.. روح انت هات الورق والولاد يروحوا يقدموا..
"بابا طبعا مش عايزني اروح مع محمد لوحدي.. بس مكسوف اكيد من عمو احمد عشان كدا سكت"
ـ بابا: مش عايز اتعبه معانا..
ـ محمد: تعب اي بس ياعمي.. انا تحت امرك..
ـ بابا: ربنا يخليك يابني..
= جاكي: طب استأذن انا..
ـ نور: رايحه فين!
=جاكي: هطلع اوضتي..
ـ سما: اه بس كملي اكلك انتي مكلتيش حاجه.. الاكل زي ماهو..
= جاكي: لا الحمد لله اكلت..
ـ عمو احمد: لو الاكل مش عاجبك ممكن نعملك اكل غيره..
=جاكي: لا والله ابدا ياعمو..الاكل جميل خالص.. بس انا اكلي كدا والله..
ـ عمو احمد: خلاص يابنتي براحتك.. منين ماتجوعي كُلي..
= جاكي: عن اذنكم
"طلعت ع اوضتي وقفلت الباب وكنت حاسه انه افراااج.. اخيرا بقيت لوحدي..
قعدت قدام المرايا وشيلت الطرحه وفردت شعري.. وسَرحَت..شردت كالعاده..
كانت الساعه حوالي 7 المغرب.. اتوضيت وصليت وقريت قرأن..
ونعست من غير مااحس..
تاااني يوم..
صحيت لقيت نفسي نايمه مكاني ع الارض وبصيت ف الساعه لقيت الساعه 5 الفجر.. صليت..
دماغي كانت هتتفرتك وهموت واشرب شاي..
"هعمل اي انا دلوقتي.. انا مكسوفه انزل.. افرض حد صاحي.. طب انزل ولا اعمل اي دلوقتي!.. ياربي كان عليا بإي دا كله... مانا كنت براحتي ف بيتنا.. انا هنزل وخليها ع الله اكيد محدش لِحِق يصحى"..
نزلت بالراحه ودخلت المطبخ وبدأت اسخن ف المايه..
وقفت جنب المايه وببص كدا شوفت ضهر حد قاعد لوحده ف الضلمه وساكت.. احييييه... مين دا!!... ياربي هي ناقصه رعب.. قربت منه عشان اعرف مين وانا مرعوبه..
قربت.. لقيته محمد وماسك صوره ف ايده وعاطيني ضهره.. الحمد لله مش عفريت يعني..
= جاكي: صباح الخير
لف بسرعه وخبى ايده وراه بخوف..
ـمحمد: صباح النور
=جاكي: ان.. اناا اسفه لو خضيتك.. انا بس كنت بعمل شاي وشوفت حد قاعد فقول...
ـمحمد: لا عادي حصل خير
=جاكي: تحب اعملك شاي معايا!
ـ محمد: متشكر.. عن اذنك..
"كان في بواقي دموع ف عينه وباين انه حزين.."
عملت الشاي وطلعت اوضتي وقعدت افكر هو ماله ولا اي اللي مضايقه.. اي دا في اي وانا مالي!.. اي التطفل داا...
طلعت وقفت ف البلاكونه وقعدت اقلب ف الموبيل.. وببص لقيته واقف ف البلاكونه وسرحان..
بصيتله باستغراب.. هو اي اللي مزعله كدا ع الصبح بس...
شويه والباب خبط..
ـ نور: صباح الخير
= جاكي: صباح النور
ـ نور: الفطار جاهز..
=جاكي: حاضر جايه وراكي..
عدلت لبسي ونزلت
= جاكي: صباح الخير
ـ الجميع: صباح النور
قعدت وكنت ف قمة احراجي.. الله يسامحك يابابا ع الاحراج دا والله..
ـ سما: يعني منزلتيش امبارح..
=جاكي: انزل فين؟
ـ سما: هِنا معانا.. اكلتي وطلعتي ع طول وفضلتي قاعده لوحدك..
=جاكي: لا اصل انا نمت والله ومحستش بحاجه..
ـ بابا: انا رايح اجيبلك الورق النهارده..
ـ عمو احمد: محمد هييجي معاك يوصلك..
ـ بابا: لا ياحمد انا هروح لوحدي.. الطريق طويل ومش عايز اتعبه
ـ عمو احمد: لا مينفعش طبعا بلاش مُكابره..
بابا: اللي يريحكوا..
خلصنا اكل وانا طبعا اكلت قليل جدا..ساعدت البنات ف المطبخ وعملوا الشاي وقعدنا نشرب مع بعض..
ـعمو احمد: يلا يامحمد روح مع عمك وخليك معاه لحد مايخلص..
ـ محمد:"بحزن" حاضر..
مشيوا مع بعض وانا طلعت الاوضه وقعدوا اكتر من نص اليوم وانا قلقت فقولت اتصل ببابا عشن اتطمن..
= جاكي: الو
ـمحمد: الو..
= جاكي: اي دا امال فين بابا؟
ـمحمد: باباكي بيعمل الورق جوا وساب معايا الموبيل عشان ميضعش منه..
=جاكي: انتوا لسه مخلصتوش؟.. قدامكوا كتير!
ـ محمد: بنعمل ف اخر حاجه اهو وهنيجي ع طول..
=تمام ماشي
ـمحمد: عايزه حاجه؟!
= جاكي: لا شكرا.. سلام
ـ محمد: "بصوت خافت".. سلام
قفلت معاه وانا متضايقه انه متضايق كدا..
دعيتله ربنا يشيل عنه ويفرحه..
عدى شوية وقت ورجعوا.. وانا نزلت..
= جاكي: اتفضل مايه يابابا..
اخد المايه من ايدي وشرب وبعدين عطيت المايه لمحمد..
= جاكي: اتفضل
ـ محمد: شكرا..
ـ بابا: اتفضلي ياست ورقك اهو.. تروحي بقاا تقدمي وقت ماتحبي..
=جاكي: حاضر..
ـ محمد: عن اذنكم
محمد خرج وانا استأذنت وطلعت اوضتي..
وبصيت لقيت الباب خبط.. لقيت البنات كلهم
ـ نور: بصي بقاا ياستي احنا حاسين انك مكسوفه ومش واخده ع الجو فقولنا نيجي نرخم عليكي شويه..
"دخلوا وقفلت الباب.. "
=جاكي: رخمي ياقمر براحتك..
ـ سما: قاعده لوحدك ع طول لي بقااا... انتي خايفه مننا ولا اي؟
ـ هند: لو مضايقينك ممكن نمشي
=جاكي: لا طبعا.. بس انا انطوائيه شويه ومبعرفش اتعامل مع الناس بسهوله..
ـ هند: لا متقلقيش هتاخدي علينا وهنبقاا اكتر من اخوات..
ـ نور: تعالي اقعدي جنبنا واحكيلنا عنك شويه بقاا ياقمر..
ـ سما: ايوا انتي منين..
=جاكي: من القاهره من مدينة نصر..
ـ سما: طول عمري نفسي اروح هناك.. حلوه ع كدا؟
=جاكي: عاديه.. اظن هنا احلى
ـ نور: بجد.. بس ليه!!
= جاكي: القاهره زحمه جدا.. انا هنا حسيت بهدوء وراحه نفسيه عن هناك..
ـ هند: الا قوليلي انتي معندكيش اخوات!
=جاكي: لا انا وحيدة..
ـ نور: خلاص يقمر اعتبرينا اخواتك.. لو تحبي يعني..
=جاكي: اه طبعا هو انا اطول....
= جاكي: هو محمد اخوكوا الوحيد؟
ـ هند: لا كان في مصطفي بس الله يرحمه..
=جاكي: انا اسفه مقصد..
ـ هند: لا عادي يبنتي... مصطفي كان عنده حوالي عشر سنين مات مع مامته ف حادثة...
=جاكي: مامته؟
ـ هند: ايوا..
= جاكي: اللي هي مامتك يعني..
ـهند: لا مش مامتي..
= جاكي:"بعدم فهم" يعني اي مش فاهمه.. مش انتوا المفروض اخوات!
ـ هند: بصي ياستي احنا اخوات بس مش من ام واحده.. يعني انا وسما من ام ومحمد ومصطفي من ام تانيه..
=جاكي: اه يعني مامت محمد هي اللي اتوفت..
ـ سما: "بضحك" ماشاء الله عرفتيها لوحدك..
=جاكي:"بابتسامه" ايون انا ذكيه اصلا.. بس ثواني.. نور اخت مين فيكوا!؟
ـهند: لا نور بنت عمنا.. وقولتلك قبل كدا..
جاكي: ااه صح..معلش نسيت...
بس انا مشوفتش حد غيركوا ف البيت من ساعة ماجيت.. امال فين مامتكوا..
ـ سما: ماما مسافره مع جدي عشان عنده عمليه ف عنيه
= جاكي: اه الف سلامه..
ـ هند: الله يسلمك..
بس مش ملاحظين تشابه الاسماء يابنات..
=جاكي: "باستغراب".. اسماء ايه!
ـ نور: اصل اخويا اسمه جاك وانتي اسمك جاكي
=جاكي: نعم؟؟!
ـنور: "بضحك" اه والله زي مابقولك كدا.. حتى احنا اتصدمنا زيك كدا لما عرفنا..
= جاكي: بس انا مشوفتش حد غيركوا هنا..
ـ هند: لا ماهو مسافر عشان شغله بره..
= اه ربنا معاه..
قعدنا نحكي ونهزر والوقت سرقنا لحد مالساعه جت 12... وكل واحده راحت اوضتها.. وانا طلعت اقف ف البلاكونه ف الهوا التحفه دا شويه..
سرحت ف جمال المنظر والهوا اللي يرد الروح... وكالعاده نفسي راحت للشاي فنزلت اعمل..
ـ مساء الخير..
لفيت بسرعه من الخضه..
ـاهدي اهدي انا محمد مش عفريت..
=جاكي: مساء النور.. لا انا اتخضيت بس..
ـ محمد: هو انتي مش بتشربي غير الشاي!
= جاكي: هااا؟
ـ محمد: هاا اي...بقولك مش بتشربي غير شاي!..
=جاكي: لا مبحبش غيره..
ـمحمد: قهوه مثلا!
= جاكي: اععععع مستحيل
ـمحمد: "بضحك ع منظري" ليه بس مش للدرجادي..
= جاكي: يابا صلي ع النبي بس كدا.. دي ريحتها بتقلب بطني..
ـ محمد: يابا؟؟!!... الله اكبر انتي منهم!!
=جاكي: هما مين؟
ـ محمد: البنات الدبش اللي بيقولوا يابا ويزميلي وياسطا ووو...
=جاكي: لا مش قووي يعني..
ـ محمد: طب ممكن انول الشرف وتعمليلي كوباية شاي معاكي!
= جاكي: لا يقمر هو كان عرض واحد وانت رفضته..
ـ محمد: انا يبنتي!!.. محصلش
=جاكي: ايوا انت.. بالاماره كنت قاعد هناك لوحدك وزعلان كمان..
ـ محمد:" بشرود حزين" اهاا افتكرت.. طب معلش ممكن تديني فرصه كمان وتعمليلي معاكي!... انا كنت جاي اعمل اصلا ولاقيتك بالصدفه... واهو بالمره ادوق شاي مختلف بدل البول اللي بعمله داا..
"ضحكت".. لقيته تنحلي كدا وسكت..
ـ محمد: "بشرود" ضحكتك حلوه..
=جاكي: هااا
ـ محمد: ااا االشاي ال المايه بتغلي..
=جاكي: ااه تمام..
"عملت الشاي"
=جاكي: اتفضل..
ـ محمد: تسلمي..
=جاكي: حاجه تاني!
ـ محمد: لا شكرا كفايه قووي كدا..
تعالي اقعدي معايا لو حابه..
=جاكي: فين!
ـ محمد: هنا ف التراس..
بصيت لقيت مكان مفتوح وبيطل ع الجنينه
=جاكي: ااه ماشي..
دخلنا وقعدنا وكان الجو تحفه حقيقي والمنظر قمر فعلا.. وسرحت مع المنظر.. وفوقت ع صوته
ـ محمد: نحن هنا..
= جاكي: هااا
ـ محمد: هاا اي.. بقالي ساعه بكلمك وانتي ولا هنا.. سرحانه ف اي!!
=جاكي:" بحزن وانا ببص بعيد" لا مفيش..
ـمحمد: الجو حلو قووي
=جاكي: "بحزن".. اه حلو
ـ محمد: مالك؟
بصيتله
=جاكي: مالي!
ـ محمد: مش عارف.. بس حاسك حزينه..
=جاكي: لا مش كدا بس بفكر ف حوار التقديم دا..
ـ محمد: وايه المشكله ف دا!
=جاكي: هقدم ف جامعه جديده..
ـ محمد: واي المشكله؟
=جاكي: بشرود" هبقاا لوحدي
ـمحمد: لا مش هتبقي لوحدك.. هتعملي صداقات وهتصاحبي ناس كتير وهتحبي الناس هنا قوووي..
بصيتله بحزن وهزيت راسي
ـمحمد: فكي بقاا مش ناقصه نكد بالله عليكي..
=جاكي: فين النكد بس!
ـ محمد: الا قوليلي انتي معندكيش اخوات!
=جاكي: لا
ـ محمد: طب انتي منين!
=جاكي: من القاهره..
ـمحمد: اه طب وفين مامتك.. مجتش معاكوا ليه؟
"بصيتله بصدمه وعيني اتملت دموع"
.. فلحقت نفسي وقولتله
=اااا اانا م مضطره اامشي عشاان عايزه اناام.. عن اذنك..
سيبته ومشيت وهو واقف مش فاهم حاجه ومستغرب رد فعلي...
... ماصدقت دخلت اوضتي وقفلت الباب وسندت بضهري عليه ويادوب اخدت نفَسي..
=ياربي... هو انا مش هخلص من السؤال داا... هيفضل يطاردني كدا طول حياتي!!..
رميت نفسي ع السرير ونمت ودموعي ع خدي..
تالت يوم...
الكل ع الفطار...
ـنور: امال فين جاكي!
هند: اطلعيلها يانور ممكن تكون نايمه..
"نور طلعت.. وفضلت تخبط ومحدش بيرد... نزلِت.."
ـ هند: ايه!
ـنور: بخبط مش بترد.. تقريبا نايمه ومش حاسه..
سما: خلاص سيبوها لما تنزل تبقاا تفطر براحتها..
ـعمو احمد: هي بنتك نومها تقيل ولا اي يامصطفي!
بابا: اه والله دي بتنام زي القتيله..
"محمد قاعد سرحان..بينه وبين نفسه "طب هي زعلت مني عشان سألتها!!.. طب هو انا زودتها معاها وتطفَلت زياده!!!.. بس انا مقولتش حاجه.."
صحيت كانت الساعه 12
=جاكي: احيه... انا نمت كل دا!!!...
طب هما طلعوا خبطوا ولا اي اللي حصل!.. غسلت وشي واتوضيت وصليت ولبست اسدال ونزلت..
=جاكي: السلام عليكم
كله بصلي وردوا السلام ماعدا محمد كان متنحلي اظن عشان اول مره انزل بالاسدال..
ـ عمو احمد: كل دا نوم يابنتي.. قلقنا عليكي.. منزلتيش تفطري معانا ليه؟؟
=جاكي: معلش والله ياعمو اصلي نمت متأخر شويه..
ـ نور: ولا يهمك ياحبيبتي.. هقوم احضرلك الفطار
=جاكي: لا لا متتعبيش نفسك انا مليش نفس..
بابا.. انا كنت محتاجه اروح الجامعه النهارده اقدم عشان اخلص من الموضوع دا...
ـبابا: وهو اللي بيروح يقدم بيروح الساعه ١ ولا اي ياهانم..
ـ عمو احمد: ايوا صح يابنتي.. خليها بكرا تكوني جهزتي كل حاجه وتقومي بدري تروحي انتي ومحمد.
=جاكي: خلاص ماشي تمام..
استأذنت وطلعت..
ـعمو احمد: مال بنتك يامصطفي! يعني ع طول قاعده ف اوضتها لوحدها!.. هي متضايقه من حاجه ولا اي!
ـبابا: لا والله ياحمد هي بس منطويه شويه ومبتعرفش تاخد ع الناس بسرعه...
ـ عمو احمد: لا اذا كان كدا متقلقش البنات هنا اهو هيطلعوها من الحاله دي وهتاخد عليهم...
ـ محمد: طب استأذن انا..
ـ عمو احمد: ع فين العزم..
ـ محمد: خارج
ـ عمو احمد: متتأخرش طيب
ـ محمد: باس ايده.. حاضر ياحاج..
فضلت قاعده ف البلاكونه ولمحت محمد وهو خارج.. كان بيتمشى جنب البيت ولمحني..راح شاورلي..
"اي دا احيه هو بيشاورلي!!.. طب اعمل اي اشاورله طب ولا اجري ولا اي!!." روحت شاورتله انا كمان.. مانا مش هسيبه مستني كدا...
كمل مشي وانا حطيت الهاند فري وقعدت اسمع اغاني.. وفجأه موبايلي رن..
...........
ندى: اللي واحشني ومش معبرني..
جاكي: معلش والله ياصاحبي الدنيا ملغبطه معايا خالص الايام دي... عامله اي يابت وحشتيني
ندى: انا الحمد لله بخير.. بس قوليلي اي اللي حصل..
جاكي: مفيش.. نقلنا ف بيت جديد..
ـ ندى: نعم ياختي!!... دا لي ان شاء الله؟
=جاكي: لا والصدمه الاكبر كمان انه ف اسكندريه
ـ ندى: اسكندرية اي!!... انتي عايزه تفهميني انك دلوقتي ف اسكندريه؟؟.. انتي بتهزري صح
= جاكي: لا والله يابنتي مش بهزر.. احنا نقلنا ف اسكندريه وانا مش فاهمه حاجه خالص
ـندى: طب وجامعتك!
= جاكي: "بتنهيد" هنقل هنا
ـندى: "بصدمه" انا مش مصدقه... انتي بتقولي اي بس
.. طب وانا!!... مش هشوفك تااااني!!!....
ـ جاكي: مش عارفه بقااا.. بس مظنش يعني.. بابا قال هما يومين وهنرجع..
ـ ندى: يومين اي.. لو يومين فعلا مكنش نقلك جامعه هناك يااذكى اخواتك..
ـ جاكي: والله مانا فاهمه حاجه بقاا.. انا زهقت.. المهم فكك مني وطمنيني عنك شويه.. عملتي اي ف الموضوع اياااه..
ـ ندى: "بحزن".. مبيحبنيش..
مبيحبنيش ياجاكي...قالي كدا بنفسه... قالي مش بحبك.. انتي زي اختي مش اكتر.. وياريت تشيلي اي حاجه من دماغك.. ياريتك شوفتي النبره اللي بيتكلم بيها..
"بدأت تعيط بطريقه رهيبه.. "
ـ ندى: انا كنت بحبه ياجاكي.. انا معملتش حاجه غلط.. انا حبيته بس... ليه كسرني كدا.. عارفه؟؟.. قالي كدا قدام الناس..
= جاكي: اهدي بس كدا واحكيلي اللي حصل بالراحه وكفايه عياط..
ـ ندى: هو كلمني وعزمني وروحنا كافيه مع بعض.. انا كنت طايره من الفرحه والدنيا مش سايعاني... وكنت حاسه انه هيعترفلي بحبه هو كمان.. بس محصلش.. لقيته بيقولي..........
ـ شريف: هو انتي عايزه مني اي؟
ـندى: نعم؟؟.. يعني اي!
ـ شريف: بصي احنا نتكلم من غير لف ودوران.. واضح جدا انك معجبه بيا وبتحبيني كمان.. دا غير انك معظم الوقت بتفضلي بصالي وع طول مهتمه بيا... والكل لاحظ دا مش انا بس يعني... وانا بصراحه حبيت اقولك اني مبحبكيش وان لو في اي حاجه ف دماغك ياريت تنسيها.. انتي مش في دماغي اصلا... انتي بالنسبالي اختي او صاحبتي مش اكتر.. اتمنى تفهمي كلامي..
ـ ندى:.........
قام وقف وعلى صوته..
ـ شريف: انا اسف بس ياريت تبعدي عني وتسيبيني ف حالي.. وبلاش تراقبيني وتدوري وراايا... ايوا ياستي انا بحب... انا بحب هَناا.. بحبها فوق ماتتخيلي.. متخيله ان انا ممكن اسيب هناا وابصلك.. ههه انتي مش شايفه نفسك ولا ايه... دانتي قد الفيل ياقمر... طب بلاش دي.. قارني كدا بينك وبينها وشوفي الفرق.. ههه فرق اي دا حتى مفيش مقارنة.. ابقي بصي لنفسك ف المرايا قبل ماتطلعي من البيت وقبل ماتبصي لحد.. ولو معندكيش مرايا..
"راح طلع الموبيل وفتح الكاميرا ".. اهو مرايا اهي.. شوفي نفسك كدا... تخيلي انتي كدا وانتي خارجه.. فمابالك بقاا وانتي ف البيت بتبقي عامله ازاي... هو انتي ازاي فعلا فكرتي اني ممكن احبك او ابصلك حتى.. محدش هيبصلك صدقيني.. بلاش تتعبي نفسك ع الفاضي.. ابعدي عني احسنلك..
ـ ندى: عياط..............
................
سابني ومشي والناس كلها بتتفرج عليا... كنت حاسه اني مشلوله ومش قادره اقوم... معرفش روّحت ازاي.. بس اللي اعرفه ان روحي كانت بتطلع...
روحتلك البيت عشان كنت محتاجاكي معايا قوووي.. بس ملقتكيش وقالوا انكوا مشيتوا..
= جاكي: "بعياط".. انا اسفه.. غصب عني والله...
مسحت دموعي..
وبعدين انتي بتعيطي ليه هااا؟؟.. دا واحد قذر اساسا.. معرفش اصلا كنتي بتحبيه ع ايه!.. واحد متعجرف ومغرور وشايف نفسه... اصلا دا واحد زباله وميتحبش... انا من الاول قولتلك دا باين عليه بتاع بنات ومش كويس... وانتي اصريتي تقربي منه.. وادي النتيجه... كسر قلبك ف الملأ كدا ومن غير اي احساس.. بطلي عياط.. دا واحد ميستاهلش دمعه واحده منك... انتي اصلا كتير عليه..
ـ ندى:" بعياط" لا هو معاه حق... مين هيبصلي بشكلي داا....
= جاكي: ماله شكلك ياختي... دانتي قمر... اقسم بالله قمر.. عنيكي ملونه وفيكي غمازات وشكلك بدر منور... اي الوحش فيكي قوليلي!!..
ـ ندى: جسمي ياجاكي.. انتي مش شايفه جسمي عامل ازاي؟؟.. مين هيبصلي بجسمي داا!!..
= جاكي: بطلي غباء بقااا... ماله جسمك!!.. هااا... ماله!!..
مليان شويه!!.. ومين قال ان دا عيب!!.. هااا.. مين شريكك اصلا... دا جسمك انتي... تاكلي اللي تحبيه وتخلي جسمك بالشكل اللي انتي عايزاه وتحطي صوابعك ف عين اي حد... محدش له عندك حاجه... محدش بيصرف عليكي ولا ليه عليكي فَضْل...
عارفه ليه قالك كدا؟؟.. عشان انتي اديتيله مساحه يقولك كدا.. انتي اللي سمحتيله... افتكر ان بقااا ليه الحق يقولك اي حاجه.. ماهو انتي هبله ومدلوقه عليه ومابتصدقي تسمعي كلمه منه... لازم يقولك كداااا... انتي اللي عملتي ف نفسك كدا ياندي..
ـ ندى: جاكي!.. هو انا وحشه فعلا..
=جاكي: لا ياندي.. مش وحشه... مش وحشه خالص.. اقولك ليه!!.. عشان انتي لو ركزتي ف شكلك هتلاقي نفسك جميله جدا... ودمك خفيف... ومحترمه وملكيش ف المشي البطال... وبتصلي وقريبه من ربنا واخلاقك الكل يشهد بيها... دا غير انك خاتمه القرآن... هل هو عامل اي حاجه من الحاجات دي!!!.... ردي... ارد انا... لا مش عامل اي حاجه...
شكل عادي خالص... انتي بس اللي شايفاه كدا عشان بتحبيه... اخلاق، قذره... اخلاقه قذره ياندى وبتاع بنات وسهر وبيروح اماكن مشبوهه... ياندى دا عمره ماركعها... مظنش اصلا انه يعرف حاجه اسمها مصحف... هل لو كان فعلا بيحبك واتجوزتوا... كنتي هتأمني ع نفسك معاه ولاّ ع اولادك!!!... كنتي هتبقي ف امان مع واحد بيشرب!!!... طب هل دا هياخد بإيدك ولا ايد ولادك للجنه؟؟... هل دا ولاده هيطلعوا كويسين!!!.... دا هيعرف يربي ويطلع ناس عارفه ربنا!!!...
=جاكي: ردي عليا..
ـ ندى: لا..
=جاكي: ولما هو لا... ليه بنمرمط كرامتنا كدا ف الارض... ليه ندخل ف علاقات مش من مقامنا ولا تشرفنا... بلاش نتعب نفسنا ع الفاضي... ازعلي ع حد يستاهل انك تزعلي عليه... مش واحد ملقاش حد يربيه اصلا..
ـ ندى: انا بحبك قوووي.. حقيقي انتي اجمل حاجه حصلتلي ف حياتي... انا مش عارفه من غيرك كنت هعمل اي!.... انا برتاح جدا لما اتكلم معاكي... ياريتني كلمتك من وقتها بدل مانا عماله اعيط كدا...
=جاكي: وتعيطي ليه ياهبله... خلاص ع كدا مفيش عياط تاني..
ـ ندى: طب انا عايزه اخس..
=جاكي: لااااااا... لا والف لا
ـ ندى: ليه.. دي حاجه كويسه..
=جاكي: قولت لا... انتي دلوقتي عايزه تخسي عشان انتي حاليا تحت تاثير كلامه بإن شكل جسمك وحش... وعشان كدا بقولك لاااااا... اقولك خسي لما تكوني عايزه تخسي عشان انتي حابه تعملي تغيير عشان نفسك مش عشان حد... اقولك خسي عشان نفسك مش عشان حد..
ـ ندى: طب اقولك اي اكتر من بحبك طاااه!!...
= جاكي: "بابتسامة".. لا عادي انا اتحب اصلا...
قومي بقاا كدا اغسلي وشك واتوضي وصلي واقرأي قرآن وانتي هترتاحي ع الاخر...
ـ ندى: حاضر.. بس ابقي طمنيني عليكي..
=جاكي: حاضر ياقمري.. سلام
ـ ندى: سلام
..................
قفلت معاها ولقيت الباب بيخبط" اووووف بقااا هو انا معرفش انعزل شهرين تلاته من غير ماحد يخبط عليا!!! ".. فتحت الباب.."
ـ عطيات: اتفضلي ياهانم الاكل جاهز..
= جاكي: هانم!!!!.... مين حضرتك!!
ـ عطيات: انا عطيات الشغاله..
=جاكي: ااه عرفتك... طب اتفضلي وانا جايه وراكي..
حطيت الطرحه ونزلت.. لقيت البنات واقفين مع بعض وبينقلوا الاكل..
= جاكي: هاي ياشباب
هند: اخيرا نزلت يعم..
=جاكي: نزلت اهو يست... بس قوليلي اساعدكوا ف اي...
ـ نور: تعالي اعملي السلطه..
= جاكي: اشطا..
قعدنا نجهز الاكل ونحطه ع السفره.. وفجأه سمعنا صوت عالي...
طلعنا نجري..
عمو احمد: "بصوت عالي" اخرس ياحيوان..
محمد: اخرس ليه هااا؟؟... اخرس ليه... عملت اي اناااا...
عمو احمد: اي اللي وداك هنااااك... انا مش قولت مليون مره محدش يروح هناك..
ـ بابا: اهدى شويه مش كدا ياحمد..
ـ محمد: انا حر.. اروح مكان مانا عايز... محدش هيقدر يمنعني اروح هناك.. انااااا حررر ياخي..
ـ عمو احمد: اخي ياقليل الادب "ضربه بالقلم"..
وسط صدمه وذهول الجميع وصمت تااااام... محمد
سابنا من غير ولا كلمه وخرج وهو كُله غضب...
.........
عداا يومين الحال زي ماهو ومحمد لسه مرجعش والكل بيرن عليه وموبايله مقفول... معرفش اي اللي حصل بس انا قلقانه عليه جدا..
كنت قاعده بالليل ف البلاكونه وسرحانه وفجأه لمحته جاي من بعيد... انا فرحت ومعرفش ليه.. انا مالي!.. يمكن عشان بقاله يومين بره..
طِلع اوضته ع طول والكل كان نايم...
"طب هو اكل حاجه طول اليومين دول!!... اكيد جعان ومحدش صاحي دلوقتي يعمله اكل.. اعمله انا طيب؟؟!.. لا لا ياجاكي عيب ملكيش دعوه.. ف الاول وف الاخر انتي ضيفه هنا.. ومينفعش تروحي اوضته فِ الوقت دا اصلا.. طب ماهو بردو اكيد جعان.. وبعدين كان باين عليه انه تعبان...
فضلت ف الصراع دا لحد ماقلبي انتصر ف النهايه ومهانش عليا..
نزلت عملتله اكل وشاي وطلعته وانا خايفه..
طلعت وخبط ع الباب كتيير... لحد ماربنا نفخ ف صورته وفتح.
ـمحمد: نعم!
=جاكي: ااا.. اانا كن...
ـمحمد: "بعصبيه" هنفضل نتهته كتير!
=جاكي: جبتلك اكل..
ـ محمد: شكرا مش عايز
= جاكي: بس انت مأكلتش حاجه..
ـمحمد: قولت مش عايز.
=جاكي: بس مينفعش
ـ محمد: "بعصبيه" وانتي مالك! هااا.. انتي اي اللي يدخلك!.. انتي مالك انتي اكلت ولا لا.. دي حاجه متخصكيش.. انتي مجرد ضيفه هنا.. اتفضلي امشي ومتجيش هنا تاني..
= جاكي:...........
رواية قلبي ليس بيدي
الفصل الثانى
بقلم حسناء رمضان
غاوية الترحال وأنا نفسي طويل. ♥️
"طلعت اجري ع اوضتي وقفلت الباب وفضلت اعيط...
عدا وقت كتير وانا بعيط وصعبان عليا نفسي.. "ماهو معاه حق فعلا.. انا مالي انااا... كاااان اي اللي يدخلني.. وبعدين انا واخده راحتي كإنه بيتي كدا ليه!... اي القرف داا... وكملت عياط"..
نمت وصحيت تاني يوم ع صوت خبط الباب.. فتحت..
ـهند: يلا ياجي الفطار جاهز..
=جاكي: لا شكرا انا مش جعانه..
ـ هند: اي دا مالك؟؟.. في حاجه حصلت!!
=جاكي: لا لا مفيش انا بس تعبانه شويه وعايزه انام..
ـ هند: فيكي حاجه طيب!!
=جاكي: لا لا مفيش مصدعه بس..
ـ هند: طب لو احتاجتي حاجه نادي عليا..
=جاكي: متشكره..
مشت وقفلت الباب..
...........
الكل قاعد ع السفره ماعدا انا ومحمد...
ـ عمو احمد: امال فين جاكي!
ـ هند: انا طلعتلها يابابا وقالتلي انها مصدعه شويه وعايزه تنام..
ـعمو احمد: وسيبتيها ليه!!... روحي اطلعي يلا شوفيها مالها..
ـ بابا: لا لا سيبيها.. متتعببيش نفسك معاها.. هي كدا ماشيه ب دماغها..
ـ عمو احمد: ومحمد لسه مرجعش؟؟.
ـ سما: لا رجع يابابا امبارح بالليل...
ـ عمو احمد: اطلعي نادي عليه.. ومتنزليش من غيره..
ـ سما: حاضر.
ـ سما: محمد.. مححححمددد.... افتحح انااا سماااا... محمممااااد..
"فتح الباب بعصبيه.."
ـ محمد: نعم!!... عايزه ايي؟؟! .
ـ سما: بابا بيقولك تعالي عشان تفطر..
ـ محمد: مش عايز..
ـ سما: لا بابا قالي متنزليش من غيره... ولو نزلت هيشلوحني..
ـ محمد: طيب انزلي وانا جاي..
ـ سما: لا هتنزل معايا..
ـمحمد: متعصبنيش عليكي بقااا.. قولت جاي..
"نزلت سما وبعدين نزل محمد وراها.."
ـ محمد: نعم!!
ـ عمو احمد: اقعد افطر..
ـ محمد: مش عايز
ـ بابا: معلش يابني اقعد عشان خاطري انا.. الاكل ملوش دعوه..
قعد محمد وبدأوا ياكلوا.. وعدا شوية وقت..
ـعمو احمد: هند.. خلصي اكلك واطلعي اتطمني عليها احسن تكون تعبت..
ـ بابا: لا لا انا خلصت اكل اهو وهطلعلها..
"محمد افتكر اللي عمله ولام نفسه وعرف انه زودها معاها حبتين.."
".. طلع بابا وانا كنت منهاره من العياط.. مانا اصلا غلطانه.."
ـ بابا: جاكي.. افتحي ياجاكي
"مسحت دموعي وفتحت الباب وبابا دخل.."
ـ بابا: مالك بقاا ياست.. حابسه نفسك ليه؟..
=جاكي: مش حابسه نفسي ولا حاجه..
ـ بابا: امال في اي!!... بيطلعوا ينزلوكي بالعافيه ليه؟؟!..
=جاكي: في اي يابابا.. مانت عارف اني مبعرفش اخد ع الناس بسرعه.. وبعدين انا عايزه افهم بقااا احنا هناا ليه... بنعمل اي هناا.. وسيبنا بيتنا ليه!..
ـ بابا: متساليش كتير ياجاكي.. هتعرفي كل حاجه مع الوقت..
=جاكي: يابابا انا عايزه ارجع بيتنا.. انا مش مرتاحه هناا..
ـ بابا: حد ضايقك؟؟
=جاكي: لا خالص.. بس هاخد راحتي ازاي وانا ضيفه هناا!!..
ـبابا: لا خدي راحتك.. دا بيت عمك مش حد غريب..
=جاكي: "بتنهيد" ماشي.. بس احنا هنطول هنا!!
ـ بابا: قولت هتعرفي كل حاجه مع الوقت.. اسيبك انا بقااا عشان ورايا شغل..
خرج وقفل الباب وانا قومت قلبت ف الفون شويه وبعدين قعدت ارسم...
معرفش برسم اي.. ايدي بتمشي لوحدها.. قعدت كدا فتره ومحستش بنفسي غير بعد ماخلصت..
لقيتني رسمته.. رسمته هو.. طب ليه!... انا مالي بيه!.. ارسمه ليه.. شيلت الرسمه وقولت انزل اتمشى ف الجنينه شويه بدل الملل دا..
نزلت مكنش في حد تحت.. فقولت كويس والله بدل الأسئلة الكتير دي...
حطيت الهاند فري ف ودني وانا بتمشي..
ـممكن اتمشى معاكي!!
لفيت بخضه كبيره...
ـ اهدي دا انا بردوو..
=جاكي: نعم!!..
ـ محمد: انا اسف..
=جاكي: "بضيق" ع ايه؟..
ـ محمد: على الطريقه البايخه اللي اتكلمت معاكي بيها.. انا اسف بجد بس انا كنت متعصب..
"بصيت ف عنيه حسيت بدموع بيداريها"..
=جاكي: حصل خير.. وبعدين معاك حق.. انا فعلا تخطيت حدودي.. انا مجرد ضيفه هنا وماشيه..
ـ محمد: بجد انا اسف.. معرفش قولت كدا ازاي!... صدقيني معرفش اتكلمت كدا ازاي بس اانااا اناا ممك مكوونتش....
"بدأ يتهته وباين انه متوتر قووي ومش متمالك نفسه"
=جاكي: بس بس اهدى خلاص مفيش حاجه.. حصل خير..
ـ محمد: "بكسره" يعني مش زعلانه مني؟؟
حسيت قلبي وجعني والله من الجمله دي..
=جاكي: لا مش زعلانه..
كملنا مشي من غير كلام.. عدا شوية وقت وهو واضح انه حزين..
=جاكي: ممكن اسالك سؤال؟
ـ محمد: اتفضلي..
=جاكي: حزين ليه؟!..
بصلي بسرعه بنظرة احتياج..
ـ محمد: مين قال اني حزين؟
=جاكي: مفيش مرايا ف اوضتك؟
ـمحمد:"باستغراب" ليه؟!..
=جاكي: عشان تشوف عيونك فيهااا..
ـ محمد:"بتنهيد" مالها عينيا!..
=جاكي: فيها حزن كبير.. واضح ع فكره مهما حاولت تخبيه..
ـ محمد: لا مش واضح.. لو واضح كانوا لاحظوا... بس محدش لاحظ.. يبقااا مش واضح.
=جاكي: امال انا لاحظت ازاي!!
ـ محمد: مش عارف... طب قولي مثلا عرفتي ازاي.. باين عليا اي؟؟
=جاكي: اممم.. باين عليك انك حزين يامحمد... نظره عينيك كلها حزن وملامحك كمان حزينه.. عمال تداري دا بالضحك والهزار بس هو باين فعلا... كمان بشوف نظرات احتياج..
"لقيته بيبصلي بنظره مكسوره"..
ـ محمد: لاحظتي كل دا ازاي؟؟... انتي مكملتيش كام يوم هنا... دا غير انك مقعدتيش معايا ساعتين ع بعض..
=جاكي: فاكر يوم ما كنت قاعد لوحدك بالليل وانا جيت قولتلك اعملك شاي معايا؟؟...وقتها انت اتخضيت جامد وحاولت تداري دموعك..
ـ محمد: دموعي!!
=جاكي: اهااا... دموعك.. شوفتها.. شوفت الدمعه الاخيره التايهه، مكانتش عارفه تنزل عشان انت مانعها.. وقتها قريت الحزن ع وشك وف عيونك..
وبردو لما طلعتلك بالاكل واتعصبت عليا... كنت شايفه بردو نظرات حزن بتداريها بالعصبيه...
ودلوقتي كمان.. عينيك بتقول بكل وضوح، انا حزين..
ـمحمد: ياااه.. للدرجادي باين عليا!!...
=جاكي: او يمكن باين بالنسبالي انا بس.. عشان فعلا محدش لاحظ غيري..
ـ محمد: طب اشمعنى انتي..
=جاكي: مش عارفه.. بس دا باين قدامي جدا...
ـ محمد: مش عارف.. حاولت اداري دا كتير.. بس بضعف ف الاخر.. بحس اني مكسور ومعنديش طاقه اداري اي حاجه..
عارفه؟؟... اول مره حد يقولي الجمله دي.." حزين ليه"..
محدش لاحظ حزني من سنين.. انا مستغرب الصراحه انك لاحظتي..
=جاكي: بتصلي!!
ـ محمد: ااا.. هو يعني مش منتظم الحقيقه..
=جاكي: هتفضل تعبان..
ـمحمد:............
= جاكي: "ومَن اعرض عن ذكري فإن له معيشةً ضنكا".. يعني ربنا بيقولك طول مانت بعيد عني هتفضل تعبان وشقيان.. ومهما عملت مش هتحس بالراحه حتى ف نومك... لان بذِكر ربنا قلوبنا بتطمن يامحمد.. بنبقااا جنبه وقريبين منه... فتخيل بقاا كدا لما تقع ف مشكله وتقول يارب وانت اصلا جنبه.. وقتها هيسمع صوتك ع طول وبدون حواجز... اما لو بعيد.. ذنوبك وبُعدك هيكونوا سبب فِ اعاقة صوتك... ربنا مفيش اكرم منه ولا ارحم منه... هو حاسس بيك كويس..
عارف ليه محدش واخد باله من حزنك؟؟!... لان ربنا اللي عمل كدا.. ربنا مبيحبش عبده يروح يشكي لحد غيره.. او يكون عنده احتياج او عشَم في حد غيره.. ربنا بيغير علينا جدا... عايزك تقول يارب.. مش يافلان..
جرب كدا.. جرب تروحله.. مش هتخسر حاجه دي مجرد تجربه.. ولو مرتاحتش ارجع.. بس مظنش انك هترجع.. لانك مش هتلاقي راحه غير وياااه.. هو عايز يسمع صوتك ع طول.. طول الوقت تكون بتقول يارب.. تفتكر ربنا ممكن يشوف عبده بيقرب منه وميريحوش ولا ياخد بإيده!.. داحنا واحنا بعيد بردو بياخد بإيدنا...لاننا مبنهونش عليه.. وعارف انه لا حول ولا قوة لينا من غيره.. جرب تمشيله، هتلاقيه بيجري عليك..
ـمحمد:......
=جاكي: احمم احمم..
ـ محمد: كلامك مُريح قوي... عارفه!!... اندمجت جدا معاكي لدرجة اني حسيت اني بسمع كلامك بقلبي مش بودني...معاكي حق ف كل كلمه قولتيها... بس
=جاكي: بس اي!
ـ محمد: مبعرفش انتظم... يعني حاولت كتير وبردو برجع زي الاول..
=جاكي: الموضوع مش بييجي ف يوم وليله.. دي خطوات... يعني مش منطقي ابدا انك تقول عايز اصلي واول ماتقف ع السجاده متبقاش عايز تسيبها... لا دا مبيحصلش ابدا... دي بتيجي بالتدريج..
ـ محمد: اقنعتيني...
فجأه موبيلي رن.. وكانت صاحبتي..
=جاكي: طب انا مضطره امشي بقااا..
ـ محمد: هنتكلم تاني؟؟!
=جاكي: قول يارب..
سيبته ومشيت... طلعت اوضتي واليوم عدى عادي
بس مشوفتش محمد خالص... تقريبا كان ف اوضته.....
..........
جه تاني يوم.. ونزلت وفطرنا بس محمد منزلش بردو..
وعدى اليوم في روتين كالعاده... وبردو مظهرش..
حسيت اني اتخنقت فطلعت اوضتي وقعدت اصلي واقرأ قرآن.. خلصت وبعدين دخلت البلاكونه استمتع بالهوا القمر داا.. لقيت محمد قاعد ع الارض ف البلاكونه وساند راسه ع الباب وسرحان تماما...
مرضتش ارخم او اتدخل واكتفيت بالصمت... عدا وقت وانا دخلت..
فجأه فوني رن..
رقم غريب.. ف العاده مبردش ع ارقام غريبه بس حسيت اني عايزه ارد معرفش ليه..
فتحت ومتكلمتش لحد ماعرف مين..
ـالوو..
=جاكي: مين؟..
ـ انا محمد.. ممكن اتكلم معاكي شويه!
كان صوته بيطلع بالعافيه وواضح انه بيعيط..
=جاكي: اتفضل..
ـ محمد: لا مش هينفع هنااا.. ممكن اكلمك واتس!..
=جاكي: انت كويس!!
ـ محمد: ممكن ولا لا!..
=جاكي: ايوا ممكن..
ـ محمد: تمام سلام..
لقيته قفل من قبل ما ارد حتى.. مكنتش فاهمه حاجه وعندي ذهول.. لقيته بعت مسدج واتس.. ففتحت..
ـ محمد: جاكي..
=جاكي: نعم..
ـ محمد: "بكسره" ممكن اطلب منك طلب!!
=جاكي: اتفضل..
ـ محمد: ممكن تفضلي جنبي لحد مانتظم ف الصلاه؟؟
تلقائي ابتسمت وحسيت اني عملت حاجه كويسه..
=جاكي: طبعا ممكن.. بس هو انت كويس؟..
ـ محمد: لا.. وعمري ماهبقى كويس... بس هسمع كلامك وهقرب من ربنا لعل وعسى..
=جاكي: معنى انك عايزني اساعدك انك هتسمع كلامي وتنفذه ع طول...
ـ محمد: يعني اي!
=جاكي: يعني لما اقولك حان وقت الصلاه تقوم فورا من غير نقاش او كسل... ولو قولت وقت القرأن نفس الكلام بردوو..
ـ محمد: انا معاكي ف اي حاجه..
=جاكي: تمام.. اول حاجه لازم تعملها اننا هنحط جدول ونمشي عليه احنا الاتنين عشان تلاقي حد بيعمل زيك ومتكسلش...
ـ محمد: كملي..
= جاكي: مبدئيا كدا الصلاه.. اول حاجه هتقوم تصلي كل الفروض ف وقتها.. ف الاول هتحس انها تقيله ع قلبك.. متقلقش دا طبيعي لانك مش متعود.. مع التعود هتروح تصلي بقلبك مش بلسانك كمان.. لو فاتك صلاه اول ماتفتكر تصليها ع طول ومتقولش هبدأ من بكرا.. لاننا مش ضامنين بكرا.. وان شاء الله مش هيفوتنا حاجه بس محدش يضمن الظروف.. هتنزّل برنامج ع موبايلك وتظبط الاذان فيه قبل الصلاه بخمس دقايق عشان تجهز نفسك ومتنساش او تقول مسمعتش الاذان... بعد الصلاه هتقعد ف الاول كدا خمس دقايق او عشر دقايق زي ماتتحمل، هتقعد تسبح وتستغفر وهكذا ع ايدك وانت لسه ع المصليه.. بعدين هتفتح المصحف ع الاقل لو هتقرأ صفحه واحده بعد كل صلاه.. وبكدا هتكون الصلاه ماشيه معاك تمام ف الاول كدا لو التزمت.. دا غير اني قبل كل صلاه هفكرك سواء هنا او ع الحقيقه.. وكدا موضوع الصلاه خلص.. في حاجه بسيطه بس، صلاة الفجر.. لازم تتصلى ف وقتها ودا يتطلب ان حضرتك تنام بدري عشان تقدر تقوم او لو متعود ع السهر، تدوس ع نفسك لحد مالفجر يأذن وتصليه.. بس انا برجح الحل الاول.. انك تنام بدري وتقوم تصلي فايق وكمان عشان الجامعه ع ابواب ف دا هيفيدك اكتر...دا غير ان السهر مش كويس.. وبكدا تكون انت برنس يامعلم ولو عملت كدا هجيبلك حاجه حلوه..
انت طلبت مني الانتظام ف الصلاه ولو عملت كدا هتنتظم بإذن الله.. اما بالنسبه للقرب من ربنا عمتا دا بيتطلب حاجات تانيه غير الصلاه لان الصلاه دا امر مفروغ منه..
ـ محمد: انا هقرأ كل دا؟!! 🙂..
=جاكي: بلاش كسل..
بعد وقت..
ـ محمد: اي القمر دا!!..
=جاكي: هااا
ـ محمد: قصدي يعني كلامك قمر قوي+انا عايز اقرب من ربنا ف العموم يعني الصلاه انتي هتساعديني فيها.. طب والحاجات التانيه... اي حاجه انتي شايفه انها بتبعدني عن ربنا قوليها بالله عليكي..
=جاكي: صحابك.. بص انا مليش اني اتدخل ف حياتك.. بس بما انك طلبت فانا هقولك ع الصح وانت حر في اللي هتعمله.. اولا صحابك دول مظنش انهم بيصلوا.. لانهم لو بيصلوا كان زمانك بتصلي انت كمان لان ع رأي باباك صحبة الصالح تصلح.. لو هما مش كويسين خالص وبيعملوا حاجات تغضب ربنا اتمنى تبعد عنهم لان دا هيأثر عليك من غير ماتاخد بالك.. الالفاظ اللي مش كويسه اللي بتتقال خاصة من الشباب.. مع الوقت هتلاقي نفسك بتقول نفس الالفاظ دي ودااا حراااام... المعاكسات... اكبر حرااام لان اصلا ربنا قالك غُض بصرك مش افضل بص ع البنت وهاتها من فوق لتحت وتقولوا كلام هتتحاسبوا عليه بالكلمه ف الاخر... الكدب.. السرقه.. النفاق.. او انك توقع اتنين ف بعض.. النيه.. اهم حاجه النيه... طول مانيتك سليمه ربنا هيفضل معاك.. وهيديك ع قد نيتك.. اهم حاجه اخلاقك.. لو اخلاقك كويسه وربنا راضي عنك، هتلاقي نفسك متوفق ف كل حاجه..
بعد وقت..
ـ محمد: شكرا..
=جاكي: الشكر لله 🖤..
=محمد: ♥♥
قفلنا ع كدا وانا حسيت براحه نفسيه فظيعه والله.. ع الاقل بحاول اخد بإيده... نمت..
اليوم التاني....
نزلت مع البنات وجهزنا الفطار وكله نزل ماعداا محمد..
هند: جاكي ممكن تطلعي تصحي محمد!!
=جاكي: اناا!..
ـهند: لو مش عايزه خلاص..
=جاكي: لا لا مش قصدي.. خلاص انا طالعه..
خبطت ع الباب.. فتح🙂.. فتح حته صغيره من الباب..
كان واقف ومش قادر يفتح عينيه من النعس وملامحه كلها نعسانه.. بس اي الجمال داا.. لا تبارك الخلاق فيما خلق فعلا..
=جاكي: ص صباح الخير..
ـمحمد: اي اللي جايبك دلوقتي ياسما.. سيبيني انا عايز انام..
فتح الباب ع الاخر ودخل واتفاجئت انه مش لابس حاجه غير البنطلون.... احيييه.. ايييي داااااا... لفيت وشي بسرعه وكلمته..
=جاكي: انا مش سما.. انا جاكي..
اتصدم كدا وفتح عينيه بسرعه..
ـمحمد: اه اه اسف مخدتش بالي.. اصل سما اللي بتصحيني ع طول..
=جاكي: هما قالولي اصحيك عشان الفطار..
ـمحمد: اه متشكر.. جاي حالا..
سيبته ومشيت وانا قلبي هيطلع من مكانه من الكسوف.. نزلت وهو لبس ونزل وراياا..
ـمحمد: صباح الخير..
ـالجميع: صباح النور..
الكل قاعد يدردش مع بعضه وهو بيبصلي من تحت لتحت كدا وانا نفس الحوار كدا... لييه كددددا بسسس... انا مااالي انااا اطلع اصحيه ليهههه...
حسبييي الله واالله...
ـمحمد: صحيح ياجاكي هتروحي تقدمي امتى..
=جاكي: المفروض النهارده او بكراا..
ـمحمد: تمام ممكن النهارده لو حابه.. انا مش ورايا حاجه.. طبعا لو عمي معندوش مانع..
ـبابا: لا يبني معنديش روحوا وتعالوا ع طول عشان نخلص من الحوار دااا...
ـمحمد: خلاص خلصي فطارك ولما تبقي جاهزه عرفيني..
جاكي: تمام..
سابنا وقاام طلع اوضته وانا خلصت وطلعت البس..
اي دا!!. هو انا هركب معاه ف العربيه!!... لووووحدي!!.. احييييه عليييا... طب ازااااي!!....
لبست دريس ابيض لحد الركبه وتحتيه بنطلون اسود وعليه طرحه سودا وشوز ابيض.. وحطيت ميكب خفيف ولبست نضاره شمس قمر كدا وحطيت بيرفيوم قمر بس كنت قمر عااادي يعني ماهو دا الطبيعي...اخدت ورقي وشنطتي وبعتله مسدج.. "انا جاهزه"..
شاف المسدج ورد " تمام"..
خرجت ولقيت واحد مز قدام العربيه كداااا...لابس تيشرت ابيض وبنطلون اسود ونضاره شمس قمر كدا..وشعره طاير من الهواا..دا غير ريحة البرفيوم اللي جابتني من فوق دي... اي الجمااااال داا يلااااا يخربيتك...
=جاكي: انا جاهزه..
ـمحمد:..........
=جاكي: احم احم..
ـمحمد:............
كان متنحلي وفاتح بوقه
=جاكي: انت يا اخ انت..
ـمحمد: هااا.. ااه بتقولي حاجه؟
=جاكي: سرحان ف اي ع الصبح كدا!!...
ـمحمد:"بشرود" ف النضاره..
=جاكي: نضارة اي!!...
ـمحمد: نضارتك...
=جاكي: اتفضلها.. بس ممكن نخلص عشان اليوم بيطير..
ـمحمد: مش لايق..
=جاكي: هو اي دا!!
ـمحمد: الاسلوووب... الاسلووب مش ماشي مع الكائن دااا..
=جاكي: احم.. طب ممكن ننجز..
ـمحمد: انتي هتخرجي معايا كدا!!
=جاكي: ايوا اي المشكله!!
ـمحمد: لا لا مفيش... يلا اتفضلي اركبي..
ركبت ومشينا بالعربيه..
ـمحمد: ع فكره انا مش بَعُض
=جاكي:"باستغراب" اي!!
ـمحمد: لازقه ف الباب كدا ليه هو انا هاكلك !!
=جاكي: لا عادي اهو..
روحت عدلت نفسي.. وكنت مكسوفه بجد روحت طلعت فوني وقعدت اقلب فيه وشويه ولقيته شغل اغنية لعامر منيب"كلااااام"...
اتصدمتتتت.... احيييييه... دانا بعشق الاغنيه دييي... انت بتراقبني ولا اي ياضضض يامز انتتت..
ـمحمد: مالك متنحه كدا ليه!
=جاكي: لا لا مفيش..
بدأت اغني ف سري مع الاغنيه.. واندمجت مع الاغنيه من غير ما احس..
بعد شوية وقت...
ـمحمد: الله يافنانه ابهرتيني...
ببص لقيته ميت من الضحك وكاتم الصوت بالعافيه...
=جاكي: ايي دااا احييه هو انااا صوتي عالي!!
ضحك بصوت عالي..
ـمحمد: "بضحك" عالي قوي الصراحه...
=جاكي: اححم.. ااه ااسفه مخدتش بالي..
"
احييييه عليااا... هو مفيش غيري ف ام الدنيا دي يحصل معاه المواقف دييي... استغفر الله العظيم يارب..."
ـمحمد: "بابتسامه" متزعليش مكنش قصدي اضحك عليكي والله بس مقدرتش امسك نفسي قدام صوتك..
راح ضاحك تاني المهزء...
=جاكي: ابسط يعم اديني ضحكتك اهوو.. انا اصلا عملت كداهون عشان اضحكك... بس هو انا بقالي كتير بغني بصوت عالي؟؟
ـمحمد: لحد مالاغنيه خلصت... لا خلاص متبرريش حاجه.. عارف انك اندمجتي زياده بس..
=جاكي: "بقرف" طب قفِّل ياقمر انت مش حوار بقااا...
ـمحمد: وانا مالي هو انا اللي كنت قولتلك غني وطلعي مواهبك!!..
=جاكي:"بصيتله بغضب".......
ـمحمد: خلاص خلاص هسكت اهو..
..................
ف الفيلا..
ـهند: امال فين محمد!!
ـنور: محمد خرج مع جاكي عشان حوار الجامعه دا..
ـهند: اه صحيح دانا نسيت..
ـنور: عايزاه ف حاجه!!
ـ هند: اه كان هيوصلني مشوار كدا بس خلاص..
فجأه الفون رن..
ـ هند: الووو ياماما
ـفيروز: ازيك ياقلب ماما... وحشاني..
ـهند: انتي اللي وحشاني قووي ياماما.. عامله اي طمنيني عليكي..
ـفيروز: انا بخير ياحبيبتي.. انتي عامله اي واخواتك عاملين اي..
ـهند: كويسين الحمد لله بخير. طمنيني ع جدوو.. اي اخباره..
ـفيروز: جدو بخير الحمد لله العمليه نجحت وبقاا زي الفل..
ـهند: طب الحمد لله طمنتيني..
ـسما: اديني اكلمها..
ـسما: الوو ياماما عامله اي وحشتيني قووي..
ـفيروز: الحمد لله ياقلبي بخير.. طمنيني عليكي بس... عامله ايه..
ـسما: مش هتيجوا بقاا.. انتوا بقالكوا كتير هناك..
ـفيروز: ابسطي ياست.. انا اصلا رنيت عشان اقولكوا اني ف الطريق اصلا..
ـسما: بجدددد... قولي والله كدا... اااععععععع... ماماااا جااايه... ياباباااا مامااا جايه..
ـهند: بجد.. اي الخبر الحلو دا.. الحمد لله..
ـنور: اخيرا يامرات عمي..
ـفيروز: معلش يابنتي هنعمل اي مانتي عارفه جدك كان تعبانه ازاي..
ـنور: طب وجاك اخباره اي!!... مش هيجي معاكوا!!
ـفيروز: جاك بخير الحمد لله يابنتي.. لا هيجي ورانا عشان عنده شوية شغل كدا.. يلا بقاا مضطره اقفل واشوفكوا بخير لما اوصل ياحبايبي..
ـنور: ماشي مع السلامه
ـ عمو احمد: اي الهيصه والظيطه دي كلهاا؟؟... في ايهه؟؟!..
ـهند: ماما جايه ف الطريق يابابا
ـعمو احمد: بجد؟؟.. امال مكلمتنيش ليه!!..
ـسما: لا ماهي رنت علينا عشان تعرفنا..
ـ عمو احمد: طب وجدك اخباره ايه!!
ـنور: العمليه نجحت وبقاا زي الفل الحمد لله..
المهم يلا نعملهم اكل عشان اكيد هييجوا جعانين..
ـهند: ايوا صح يلا..
..............
محمد: وصلنا..
كنت شارده وباين عليا التوتر..
محمد: في حاجه!!
جاكي: هاا لاا لا مفيش..
محمد: طب يلا
نزلنا من العربيه ودخلنا وكان في شباب كتير جدا وبنات... دخلنا جوا وماشيين ف امان الله وفجأه بدات اسمع معاكسات وكلام كتير طول ماحنا ماشيين.. ببص ع محمد كدا لقيته عمال يجز ع اسنانه وباين انه متعصب... وصلنا جوا الجامعه وكان في شباب جوا وفضلوا متنحين وفي منهم كان بيبص بنظرات مش كويسه... واللي عمال يبتسملي... "اي دا هو في اي!... هما ماشافوش بنات قبل كدا ولا اي!! دا اي القرف داا؟؟.....
ـ محمد: جاكي هاتي الورق وروحي العربيه..
=جاكي: نعم؟! .. ليه!!.
ـ محمد: اسمعي الكلام وتعالي اوصلك للعربيه وانا هعمل كل حاجه..
=جاكي: لا مش هروح.. هفضل هناا.. هو احنا جايين نلعب!.. وبعدين هما محتاجيني انا وانا اللي عارفه ورقي وحاجاتي واي اللي محتاجينه..
ـ
"كنت فاهمه قصده وعارفه انه متضايق من نظرات الشباب دي لياا.. فوَقفني جنبه وحاول يداريني"
وقعدنا كتتتييير قوووي نقدم ف الورق ونروح من هنا لهنا.. وبصراحه الواد القمر دا هو اللي عمل معظم الحاجات واتشلوح ياعيني ف الشمس دي.. قضينا اليوم كله... وكان قاعد اخر حاجه..
محمد: روحي انتي اقعدي ف العربيه وانا هصور اخر ورقه دي وبكدا نكون خلصنا..
جاكي: لا كفايه اللي انت عملته دا كله، هات انا اصورها وانت روح العربيه..
بصلي بقرف..
جاكي: اي في اي!!
محمد: هو انتي هبله!!
جاكي: لا ليه!!
محمد: روحي ياقمر اقعدي ف العربيه وبلاش رغي كتير.. مش كفايه اللي كانوا هياكلوكي بعنيهم جواا .. كمان عايزه تروحي تصوري ورق!.. هو انتي تعرفي حاجه هنا اساسا!!!... يلا اقعدي ف العربيه بدل الشباب اللي هياكلوكي بعنيهم دوول..
جاكي: مابووراحه طاااه.. متزقش..
سيبته ومشيت روحت العربيه.. وهو واقف شايط.. وبعدين مشي...
فجأه موبيلي رن..
جاكي: الو يابابا..
بابا: ها يبنتي عملتوا ايه!!..
جاكي: خلصنا كل حاجه مفيش غير حاجات بسيطه بس ومحمد بيخلصها هناك..
بابا: هناك!.. امال انتي فين!!..
جاكي: انا ركبت ف العربيه عشان الشمس كلِت وشي..
بابا: طب يابنتي متتاخروش.. ولو حصل حاجه بلغيني..
جاكي: ماشي يابابا.. سلام
بابا: سلام..
قفلت معاه.. وقعدت شويه وصاحبتي رنت.. نزلت اكلمها بره العربيه... ومندمجه معاها.. برفع وشي كدا لقيت محمد ف وشي وباصصلي بغضب...
محمد: انا قولت اي!!..
جاكي: اي!
محمد: "بعصبيه" مش قولت متطلعيش من العربيه لحد مااجي..
جاكي: طب خلاص ياحبيبتي هكلمك بعدين.. وقفلت معاها..
جاكي: في اي.. انت بتزعق كدا ليه!!
محمد: والله!!... مش شايفه اللي حواليكي!!..
ببص حواليا اشوف في اي.. لقيت شباب كتير متنحالي فعلا ع الرغم من ان في بنات كتير غيري يعني.. سكت ومردتش عشان تقريبا معاه حق..
محمد: هاا عرفتي ليه!...
جاكي: ع فكره انا مليش دعوه بيهم... انا كنت بكلم صاحبتي ومخدتش بالي من حد.. انا مقولتش لحد يبصلي.. ولو سمحت متزعقليش كدا تاني..
سييته وركبت العربيه.. وهو ركب ورايا..
قعد ساكت شويه وفضل ينفخ.. وفجأه جه شاب كدا جنب الشباك وبيقولي..
الشاب: لو سمحتي يا انسه.. ممكن دقيقه!!
محمد: نزل ووقف قدامه.. كنت بتقول عايز اي بقاا يقمور؟!..
الشاب: وانت مالك.. انا بكلمها هي..
محمد: ااه بتكلمها هي..
وفجأه وبدون اي مقدمات ضربه بالبوكس ف وشه وقعه ع الارض..
"احييييه.. اي اللي بيحصل دا.."..
نزلت من العربيه..
جاكي: محمد اي اللي انت بتعمله داا؟؟.. انت اتجننت!!..
الشاب قام وكان وشه مليان دم... وجه ناحية محمد عشان يضربه بس معرفش ومحمد كمل ضرب فيه.. تقرييا كدا بوَّظ وش الواد..
الناس اتلمت وفضوا الخناقه دي..
وركبونا العربيه.. ومشينا بالعافيه..
فضلنا ساكتين..
جاكي: انت كويس!
محمد: ممكن مسمعش صوتك!...
جاكي وانا مالي انا بتتعصب عليا ليه!!..
ركن ع جنب بسرعه..
محمد: والله!.. امال مين اللي ليه دعوه.. مانتي السبب ف كل داا..
جاكي: هو انا اللي كنت قولتله تعالي اتكلم معايا!..
محمد: لا انتي اللي نزلتي من العربيه وانا قولت تفضلي جواا..
جاكي: قولتلك مكنش قصدي.. مكنتش اعرف ان كل دا هيحصل.. وبعدين انا مش عارفه مين اداك الحق انك تزعقلي كدا!!!...
محمد: صح.. انا غلطان كان المفروض اسيبك تديله الدقيقه اللي عايزها..
جاكي: مكنتش هديله حاجه.. مكنتش هرد عليه اصلا طول مانت موجود..
... سكتنا شويه وبعدين طلع بالعربيه ف سكووت تاام..
شويه ولقيته وقف...
محمد: خليكي هنا وانا جاي..
نزل وانا قعدت العب ف الفون لحد ماييجي وفجأه جتلي مسدج صدمتني وكنت ع وَشَك اني اعيط..
.. معداش وقت كتير ورجع وجاب اكل معاه...
محمد: اتفضلي
كنت شارده ف الفون..
محمد: جاكي.. خدي
جاكي: هاا ايه!!
محمد: جبتلك اكل.. اي دا مالك.. في اي!!
جاكي: "بحزن" لا مفيش..
محمد: طب انا اسف.. عارف اني عليت صوتي جامد.. انا اسف..
جاكي:..........
محمد: جاكي بجد اسف انا مكنتش اقصد.. انا بس اتعصبت لما لقيته واقف بالبجاحه دي..
جاكي:......
محمد: جاكي انتي معايا!...
جاكي: اطلع..
محمد: طب زعلانه مني!
جاكي: لا
محمد: امال مالك..
جاكي: مليش مانا عادي اهوو..
محمد: طب خدي الاكل دا.. انتي مأكلتيش..
جاكي: شكرا مش عايزه..
محمد: لو مأكلتيش مش هطلع..
جاكي: يوووه هو بالعافيه!...
محمد: ايوا بالعافيه.. عشان انا مش هروحك زعلانه كدا..
جاكي: يعم مش زعلانه منك ولا حاجه..
محمد: امال اي البوز داا.. حد ضايقك تاني؟؟..
جاكي: لا.. خلاص باكل اهوو..
محمد: ماكان من الاول..
قعد ياكل هو كمان وفجأه راح شغل نفس الاغنيه"كلااام".. فانا تلقائي ابتسمت عشان فهمت قصده..
محمد: ماحنا بنضحك اهو.. امال ليه البوز داا..
جاكي: ممكن تبطل رغي!... انت مش ملاحظ ان كلامك كتير..
محمد: تصدقي بالله انا الغلطان اني مكلف نفسي وجايبلك اكل غالي...
صحيح بقولك..
جاكي: شوفت!.. مش بقولك رغااااي..
محمد: اسمعي وانتي ساكته..
جاكي: ارغي يعم..
بصلي وقال..
محمد: انا فضلت صاحي امبارح اقرأ قرآن لحد الفجر وقومت اتوضيت وصليت وعملت زي ماقولتي وفضلت اذكر ربنا ع السجاده.. وبعدين كملت قراءة قرآن لحد مانمت.. ونمت ع قرآن كمان..
بصيتله بحب وفرحه كبيره وابتسامه عريضه...
جاكي: شطوور.. براڤو عليك..
بصلي بحزن..
محمد: شطور!!
جاكي: ااه.. في حاجه!!
محمد: لا لا مفيش..
كملنا اكل وطلع بالعربيه..
محمد: وصلنا
جاكي: شكرا
محمد: ع اي!
جاكي: تعبتك معايا.. مكنتش مضطر تعمل كل دا..
محمد: تعبك راحه ياقمر.. بس عندي طلب..
جاكي: اي!
محمد: ممكن لما تخرجي تاني بلاش ميكب!..
جاكي: نعم!.. انا مش حاطه غير خفيف خالص..
محمد: ياريت متحطيش خالص.. كفايه اللي حصل النهارده..
جاكي: وهو اللي حصل حصل بسبب الميكب!!
محمد: للاسف لا.. مش عشان الميكب.. دا عشان انتي حلوه من غير حاجه..
جاكي: احم طب اانا هنزل.. وشكرا مره كمان..
سيبته ونزلت وكنت تعباااانه وهموت واوصل اوضتي..
نزل ورايا ولسه داخلين..
سربرااااااايز.......