رواية صانعة الماضي
الفصل الاول والثاني
بقلم نهي الشيخ
واخيراا انا في الكلية.. قد ايه كنت مرتبكة وفرحانه وقد ايه حاسه انها هتبقي بدايه جديده لحياه تانيه انسي بيها قسوه الماضي......
انا ايمان عندي ١٨ سنه من اسره فقيره بس مكنتش دي المشكله
انا عندي سر في حياتي علي قد ما عنيت بسببه علي قد ما كان هو الحافز اللي خلاني اوصل واكمل تعليمي وادخل كليه الالسن
_ اكيد انتي سنه اولي لسه.. َشكلك مرتبك
= اه فعلا
_ انا كمان سنه اولي بس لتاني مره تقدري تعتبريني معيده ههههه انا هناء
= اهلا بيكي انا ايمان
_ طب تعالي معايا بقي اعرفك علي الشله بتاعتي دول شويه عيال ايه هيعجبوكي اوي
= شله... لا شكرااا انا مليش في جو الشلل ده سامحيني
فضلت هناء تطاردني ومصممه انها تبقي صحبتي وانا بروح بعد المحاضرات علطول
بس بعدين قربت منها وبقت صحبتي جدااا بس برده مردتش اتعرف علي الشله بتاعتها
وفي يوم حصل اللي مكنتش ابداا حباه
تعبت جدااا وحسيت بدوخه وهناء صممت توصلني لحد البيت
_ كفايه لحد هنا يا هناء بتنا اهو اللي هناك ده
= لا طبعا لازم اوصلك لحد فوق واتعرف علي مامتك واخواتك اوعي تكوني فكراني من المعادي يا بت ده انا من امبابه يا حبي ههههههه
طلعت هناء معايا فوق والحمد لله مكنش في حد فوق غير ماما وهي ست اميه بسيطه استقبلتها بكل ترحاب وانا كان نفسي الصراحه تمشي بسرعه بس اتفاجأت بماما بتقولها
_ والله لا انت متغديه معانا انا عامله صينيه مسقعه انما ايه
= مسقعه ايه بس يا ماما هناء ساكنه في شبرا والمسافه كبيره من شبرا لحلوان
__ انتي مالك انتي بتتكلمي علي لساني ليه؟؟ انا بموت في المسقعه يا طنط
مبقتش عارفه اقول غير حاجه غير اني فضلت ادعي ربنا يستر ويعدي اليوم ده علي خير
وقعدنا واكلنا وبعد الاكل حصل اللي كنت خايفه منه.......
الجزء الثاني
بقلم نهي الشيخ
لقيت بابا نازل من فوق السطوح وهو بيزعق زي عادته وبيقول حضريلي الاكل يا ولية.....
مبقتش عارفه اروح فين ولا اجي منين والظاهر ان هناء فهمت انا كنت عاوزه اخبي ايه وكنت عوزاها تمشي ليه فلقتها فجأه ارتبكت واستأذنت ومشيت....
_ شفتي يا ماما كان لازم تمسكي فيها يعني.... حرام عليكي
= ماهو الحمد لله ما حصلش حاجه اهو وصحبتك مشيت متغديه ومتهنيه ٢٤ قيراط
_ ايه اللي انت بتقوليه ده بس كفايه جوزك نازل بالشيشه وريحه الزفت اللي بيشربه ده ماليه المكان..
= متكبريش الموضوع يا ايمان محصلش حاجه واكيد صحبتك مخدتش بالها
_ انت علطول كده مبسطه كل حاجه مش كفايه اللي انا شفته في البيت ده.... حرام عليكي بجد... انت السبب في كل ده
= انا السبب برده يا ايمان...... ليه كده مش كفايه بشتغل طول عمري علشان اصرف عليكي واعلمك
_ اه تصرفي عليا وعليه... وتوفريله تمن الزفت اللي بيشربه ياريتك ما عملتي كده ليه ماثورتيش علي الوضع ده ليه ما اختنيش وهربتي في اي حته..... ليه؟؟
_ اهرب فين بس يا بنتي هو في حد بيهرب من نصيبه ده مكتوب علينا
= لا يا ماما ربنا مبيكتبش علينا الظلم والهوان احنا اللي بنظلم نفسنا
_ حرام عليكي متشيلنيش زنبك.... انا شفت الزل علشانك
= الزل.... الزل ده انا اللي شفته واستحملته.... ياما كنت بعيطتلك بالدموع واشتكي لك منه ومن تصرفاته وانه كان بيصحيني بليل والاقيه بيعمل حاجات غريبه وانت ولا انت هنا تقوليلي ده شارب ومش حاسس بحاجه....
_ اسكتي يا بت حتفضحينا ايه لازمته الكلام ده دلوقتي
= اه فعلا ملهوش لازمه وحاضر هسكت بس لازم تعرفي اني مش مسمحاكي انت كمان لانك السبب في كل اللي انا فيه ده
انتهي الحديث مع ماما زي كل مره بعياطها والدعاء علي نفسها وانا قعدت اعيط على نفسي وعلي اللي حصل واللي لسه هيحصل طول ما انا عايشه في البيت ده.
ومرحتش الكليه يومين بعدها لاني مكسوفه اشوف هناء بعد اللي حصل مع انها كانت بتبعتلي علي الواتس عادي ولا كان في حاجه وبتسالني ليه مجتش الكليه دي كمان عرضت انها تجيلي تاتي تديني كشكول المحاضرات بس انا رفضت وقلتلها اني نازله خلاص الكليه...
_ ايه يا بنتي... حبه دوخه تقعدي علشانهم يومين بحالهم من الكليه
=انا نزلت بس علشانك يا هناء... لانك بجد وحشتيني
_ بصي بقي يا جميل دلوقتي في معيد بيدينا كورس محادثه لاكتر من لغه بنبقي جروب وبنقعد نتكلم علشان نحسن النطق ومهاره الاستماع.... وعلي فكره انا علشان جبت ٥ من صحابي للكورس المعيد خلاني اختار حد معايا اكون انا وهو مجانا... وطبعا انتي معايا في الحوار ده...
_ هناء انتي بتقولي ايه بس... انا الصراحه بعد ما جيتي البيت عندي وشفتي الوضع اللي انا فيه كنت متخيله انك مش هتعرفيني تاني...
= هههههه ايه يا بنتي افلام الابيض واسود اللي انتي عايشه فيها دي وبعدين مافيش حد بيختار اهله يا ايمان احنا كلنا في للاول والاخر ولاد تسعه
_ انتي مش عارفه حاجه يا هناء انا مش بتكلم علي الفقر لان اكيد ده كان باين علي لبسي انا بتكلم عن حاجات لو عرفتيها اكيد هتغيري رايك ده خالص
= انا مليش دعوه بكل اللي بتقوليه ده انا ليا دعوه بيكي انت وباخلاقك واسلوبك اللي انا بموت فيه ده... ربنا يخليكي ليا حبيبتي
_ ربنا يخليكي ليا انت..... بجد انا مش عارفه اقولك ايه....
= قوليلي انك موافقه وهتيحي معايا الكورس
_ اكيد هاجي......
وفعلا رحت الكورس مع هناء ومن اول يوم في الكورس حصل حاجه غريبه كانت السبب في تغير حياتي كلها ١٨٠ درجه.....