صانعة الماضي
الجزء الثالث
بقلم نهي الشيخ
كل البنات اللي في الكورس بما فيهم هناء لابسين لبس شيك ومهتمين بنفسهم جداااا
شكلي وسطهم كان مميز بهدومي البسيطه ومظهري الباهت وقلت لنفسي اكيد هو ده اللي مخلي المعيد مركز معايا طول الكورس ولا يمكن علشان انا اللي جايه مجانا......
وفي نفس اليوم لقيت هناء بتكلمني وبتقولي......
_ ايمان... تصوري كمال قعد بعد الكورس يسألني عليكي بشكل غريب
= كمال مين يا بنتي
_ اللي بيدينا الكورس انتي بتهزري.... مش عارفه اسمه
= ايوه يعني بيسالك عني ليه بقي
_ شكله كده معجب بيكي.... ايوه ياعم الصراحه هو مز والبنات كلها بتكراش عليه
= ايه اللي انتي بتقوليه ده...... بتكراش يعني ايه معحبين بيه يعني
_ اه يا ختي متستعبطيش فيها.... الصراحه هو مز
= بطلي يا هناء التهريج بتاعك ده هو يعرفني اصلا ولا شافني غير مره... وبعدين واحد زيه هيبص لواحده زي ليه
_ بقولك قعد يسال عنك وعاوز يعرف كل حاجه عنك بس انا مريحتهوش
= وبعدين....
_ ولا قبلين.... عاوز يشوفك في مكتبه الكلية بكرة
= وانت رايك ايه..
_ روحي طبعا مش ممكن يكون عاوزك في حاجه مهمه... انا الفضول هيموتني
= طيب يا هناء..... اما اشوف اخرتها ايه
رحت انا وهناء مكتبه الكليه في المعاد وكان كمال هناك قبلنا
بعد ما سلمنا عليه طلب من هناء انها تسبنا لوحدنا واول كلمه قالهالي....
_ ايمان انت عملة نادرة
=شكرااا بس حضرتك.....
_ عارف هتقولي ايه اني مشفتكيش غير مره ومتكلمتش معاكي.... بس انا عاوز اقولك اني بقدر افهم الناس كويس تقدري تقولي فراسه او طول خبرة
= شكرااا لحضرتك تاني بس ممكن اعرف حضرتك عاوز ايه مني
_ بصراحه كده وبدون مقدمات انا عاوز اتجوزك وماتقوليش اننا منعرفش بعض لان انا بالنسبالي هقولك كل حاجه وبعدين قرري
= بس حضرتك كمان متعرفش انا مين واهلي مين مش ممكن لما تعرف تغير رايك
_ انا مش عاوز اعرف اي حاجه لان ده مش هيغير شئ انا معجب بيكي انت ومتاكد من اختياري انت اللي زيك عمله نادره ومش موجوده اصلا ...
روحت بعد ما كمال حكالي فعلا كل حاجه عنه وعن عيلته الكبيره وفعلا انبهرت بيه وباسلوبه قد ايه كلامه مريح ومنظم وقد ايه هو انسان مهذب وحساس وابن ناس فعلا.....
بس كنت مضايقه لاني لازم ارفضه واقفل الموضوع ده خالص ومش عارفه هعمل ايه
اول حاجه عملتها بعد ما اتخانقت مع ماما وبابا زي كل يوم علي نفس الهم والقرف اللي في البيت وبعد ما بابا طلع فوق السطوح وماما نزلت المستشفي اللي بتشتغل فيها عامله نظافه واللي ساعات بتنزل الصبح وساعات شغلها بيقي بليل....
كلمت هناء وحكتلها كل حاجه حصلت وحكتلها كمان علي بابا وماما وظروف اهلي اللي هتخلي اي حد يتقدملي يهرب ما بال كمال بشكله ومنصبه وعيلته الكبيرة دي .....
_ سيبك من كل الكلام ده انا شايفه انك لازم تحكيله كل حاجه وهو لو فعلا عاوزك مش هيهمه
= انتي بتقولي ايه يا بنتي... ليه يعني هو بيحبني ولا بيعرفني حتي ايه اللي ممكن يخليه يستحمل كل ده ويناسب عيله تعر الصراحه
_ برده لازم تحكيله وهو يقرر مش هو قالك انه مش فارق معاه عيلتك ولا اي حاجه عنك خلاص قوليله بقي
= هو بيقول كده علشان مفكرني اني فقيره لان ده اكيد واضح عليا لكن المصيبه الكبيره اللي عندي دي استحاله حد يستحملها انا ابويا يا هناء مش بيفوق وحاله في منتهي القرف استحاله حد عاقل يوافق علي الوضع ده ويخلي انسان زي ده جد لأولاده
_ انا شايفه انك معندكيش حاجه تخسريها... بالعكس انتي ممكن تكسبي نفسك وتنشليها من البيئه دي خالص يمكن ربنا بعتلك كمال علشان تعملي مستقبل ليكي مختلف عن الواقع المرير ده
= انا مش عاوزه اعمل مستقبل يا هناء انا عاوزه اعمل ماضي جديد...
قفلت مع هناء وكلامها بيدور في دماغي وفجأه نزل حمو الولد اللي عايش فوق السطوح...
_ انسه ايمان... الحقي ابوكي
= ماله بس... ايه مات
_ لا... مات ايه بس انا عملتله خلطه جديده ما انتي عارفه ده انا عامل فوق السطوح معمل انما ايه...
= انت هتحكيلي قصه حياتك.... متخلص وتقول ماله ايه اللي حصله
_ مش عارف اغمن عليه ومش عارف يتحرك ولا يتنفس
= اغمن عليه...... يارب يموت يا شيخ علشان اخلص واقولك يارب تموت انت كمان... يالابقي علشان عاوزه اقفل الباب وانام...
نمت وتاني يوم نزلت الكليه ماشغلتش بالي باللي حصل لبابا لان كذا مره يحصل كده ويرجع ولا كأن في حاجه
قابلت كمال وحكتله كل حاجه علشان اخلص بقي يرفص واخلص من الموضوع ده كله
بس الغريب انه ابتسم ابتسامه عمري ما هنساها وقالي
انه مايهمهوش كل ده وانه متمسك بيا اكتر من الاول وانه شاريني
وفضلت انا وكمال نتكلم لمده اسبوع وفي الاخر قلتله انا موافقه علي الجواز بس بشرط واحد.......