رواية احببت راعية الغنم
الفصل الرابع والخامس والسادس وعشرون
بقلم اسما خالد
البارت ال 24
مرت الايام سريعا ليأتى يوم الخميس..امتلأت الفيلا بالمدعوين
وزينت الفيلا بالانوار الملونة والزهور ..ووضعوا فى المسبح بلالين
على شكل اسم عمر وياسمين باللون الاحمر والابيض..
وكانت البوابة عبارة عن بلالين باللون البنفسج فى ابيض ..
وقف على وابناءه لاستقبال بقية المدعوين ..ووقفت سعاد وزينب ونور فى الجهه الاخرى
*******
جالسة فى غرفتها تشعر بالتوتر ومعها والدتها
علا :يابنتى بطلى بقى توتر ده انتى وترتينى انا
ياسمين :يا ماما خايفة اوى ..حاسة انى رايحة امتحان ..وكمان حاسة انى شكلى وحش
كانت مرتدية فستان نبيتى به فصوص فضية وطرحة نبيتى
وواضعة ميك اب هادئ..كان جمالها هادئ
علا :والله يا حبيبتى قمر ..مفيش داعى خالص للتوتر ده
وبعدين ده عمر وانتى عارفاه كويس ..يبقى ايه لزمته التوتر بقى
فتحت زينب الباب بعد ما طرقت ..واتجهت نحو ياسمين وسحبتها من يدها
فقالت ياسمين بفزع :فى ايه
زينب بضحك :يلا عمر وصل
ياسمين بصوت اشبه بالبكاء :مش عايزة اخرج يا عمتو خلينى هنا
زينب بصرامة :ياسمين بطلى دلع ويلا عمر واقف بره
ياسمين :طيب شكلى حلو
علا :اه يا حبيبتى ..يلا بقى
خرجت ياسمين مع والدتها لتجد عمر واقف مع والدها
كان فى غاية الوسامة (مرتدى حلة سوداء وقميص ابيض وجرافت نبيتى لون فستانها بناء على طلبها عندما اشترت الفستان )
فنظر اليها بإعجاب وذهب اليها ليقف فى مقابلتها
فقال هامسا :ايه القمر ده هو فى كده
قالت ياسمين بخجل مزود به نبره حدة :عمر عيب كده
عمر باسما:ده انا زى خطيبك يعنى
ليخرجه من حديثه صوت سامح قائلا
سامح :هتفضل واقف كده ولا مش هنخرج
تأبطت ياسمين ذراع عمر
فقال عمر :يلا عقبال الفرح
اكتفت بأبتسامة ونظرت فى الارض بخجل
Image
قبل وصول عمر كانت نور واقفة بجانب والدتها
نور بحنق :انا زهقت يا ماما من الوقفة دى ..حاسة انى شوية وهشحت
زينب :اومال مكناش احنا اللى هنقف مين اللى هيقف ..عقبال ما نقف يوم خطوبتك انتى كمان
نور :لا بعد الشر عليا انا لسة صغيرة..ثم اسطردت قائلة :انا عايزة اروح عند ياسمين
زينب :متستعجليش ما انتى على طول معاها ..لما يجى عمر ابقى روحى اقفى جنبها
لتنظر نور تجاه البوابة لتجد عمر ووالديه ..تلقائيا بحثت عيناها عنه لتجده خلف عمر يسير بجانب اخته وعلى محياه ابتسامة جذابة
كان وسيم بدرجة عالية (مرتدى حلة رمادية وقميص اسود )
ليخرجها من شرودها ايسل وهى واقفة امامها
ايسل :ايه يا نور انتى روحتى فين
نور بحرج :مروحتش منا اهو ..عامله ايه
ايسل بابتسامة :تمام اوى ..واخيرا عمر عملها وبقينا قرايب
نور بابتسامة :والله احلى حاجة ..
ايسل :طيب انا هدخل وانتى ابقى تعالى اقعدى جنبى
نور :حاضر
لتنظر جانبها لم تجد والدتها فتميل برأسها على سعاد :عمتو فين ماما
سعاد:راحت تقول لعلا ان عمر جه
نور :طيب احنا مش هندخل بقى
سعاد :انا عارفة انا كمان زهقت عايزة ادخل اشوف ياسمين
_________
ما ان رأوا عمر ومعه ياسمين قاموا بأشعال الالعاب الناريه وتشغيل الاغانى
اتجهوا الى الطاولة التى يجلس عليها والديه لتسلم عليهم
سارة بأبتسامة :بسم الله ما شاء الله يا حبيبتى ..تعالى اقعدى جنبى..
وقبل ان تجلس امسك عمر يدها ..ونظر الى والدته قائلا:ايه يا حاجة سارة تقعد فين مش لسه فى ناس هتسلم عليهم
ثم ابتسم لها ورحل ..
رمزى :بصى الواد عامل ازاى
سارة بفرحة لسعادة ابنها :ربنا يفرحه دايما يارب
**********
ياسمين :انت مودينى فين يا عمر ..وبعدين مخلتنيش ليه اقعد
عمر : يعنى هكون خاطفك..هو انتى فاكرة نفسك هتقعدى النهاردة ..
ثم اسطرد قائلا :ياسمين انتى مبسوطة
نظرت اليه بخجل واماءت برأسها
اتت صديقة لياسمين لتبارك لها ثم ذهبت
عمر بخبث :هو انتى كل اصحابك كده
ياسمين :مش فاهمة كده ازاى يعنى
عمر :يعنى حلوين ..متيجى تعرفينى عليهم
ياسمين بضيق وتجز على اسنانها :وماله
**********
علا بفرحة :بص يا سامح زى القمر ازاى ..ياسمين كبرت
ليقاطعها ياسين :كبرت ايه يا علا دى كانت لسه بتلعب مع الغنم امبارح ال كبرت
ضربه والده بخفه على ذراعه :يابنى بطل بقى انت دايما ناطت فى كل كلمة نقولها ..اتجدعن انت يا كبير واتخرج عشان نفرح بيك انت كمان
تهجم وجهه ليقول بحنق :معتقدش انا كده كويس
انتبهت نور لحديثه مع والده فمالت على اذنه قائلة :بقولك يا ياسين تعالى نروح لياسمين
ُُُُُُُُُُُ
بينما هما كانوا واقفين بجانب الطاولة التى يجلس عليها عائلة ادهم
ادهم :مبروك يا ياسمين ..ثم قال مازحا يشير على عمر :وربنا يعينك على ما ابتلاكى
ضحكت هى بخفوت ليغتاظ منها هو
فقال :ما تهدى بقى يا عم ادهم مش من اولها كده ..استنى حتى لما نلبس الدبل
ليأتى اليهم ياسين ومعه نور
نظرت ياسمين لها بضيق
نور :مالك يا ياسمينه يا حبيبتى بتبصيلى ليه كده
ياسمين :انتى كنتى فين كل ده
نور :كنت قاعدة هناك لاقيتك مجيتيش علينا قولت اجيلك انا
ياسين مازحا موجها كلامه لعمر :بص ياعمر عشان ابقى صريح معاك
انت رحمت الدنيا والبشرية كلها وظلمت نفسك
وكزته اخته وقالت بحده :ياسين
ضربته نور بخفه على كتفه قائلة :بلاش انت يا ياسين
نظر اليها بضيق على فعلتها كيف ان تمزح معه هكذا .. لكن لم ينتبه له احد
عمر :بس يا ياسين متعصبهاش فى الاخر هتطلعه عليا انا ..وانا راضى بنصيبى
ياسمين :بقى كده ..احنا لسه فى اولها على فكرة
عمر بضحك :الله يخربيتك يا ياسين
ياسين بجدية :انا بهزر طبعا ..أختى مفيش زيها ابدا ..ثم انحنى ليقبلها من جبهتها
عمر :ياسين مينفعش المنظر كده الناس تقول ايه
ياسين :اختى يا جدع الله ..
أدهم وهو ينظر بعيدا :طب اسمحيلنا بقى يا ياسمين ناخد منك عمر عشان اصحابه جم ..ثم نظر الى ياسين :وانت هتقف كده يلا تعالى
فذهبوا سويا
نور:تعالى عشان بنات خالتك جم
وقبل ان ترحل نادت على ايسل
ٌٌٌٌٌٌٌٌٌٌ
اتت اخت علا الكبرى تدعى حنان
حنان بتساؤل :اومال فين ياسمين عشان اسلم عليها
علا :واقفة مع اصحابها ..ثوانى اروح اندهالك
Image
واقفين حولها يهنأوها ويمزحون معها
اردفت ابنه خالتها حنين قائلة وهى تغمز بعيناها لياسمين :الا قوليلى يا ياسمين القمر ده جبتيه منين
ياسمين بغيرة :مجبتهوش من حته هو اللى جالى
نور مازحة :تقدرى تقولى كده يا حنين حب من اول حادثة
حنين بتعجب :حادثة ..انا عارفة من اول نظرة
قاطع حديثهم مجئ علا لتخبر ابنتها عن قدوم خالتها
علا :بعد اذنكم يا بنات هاخد ياسمين
ٌٌٌٌٌٌٌٌ
انتى بتدورى على ايه
تفوهت بها نور وهى تراها تبحث بعيناها على احد
ايسل :بدور على ادهم انتى مشوفتهوش
نور :لا..انتى عايزة حاجة
ايسل :موبايلى معاه وعايزة اخده عشان اصور ياسمين وعمر مع بعض
نور :ما هما كده كده هيتصوروا
ايسل :لأ انا عايزة اصورهم
نور :طيب روحى شوفيه
تركتها ورحلت ..لتسمع احد ينادى عليها من خلفها ..فألتفتت لترى من ينادى عليها
نور بأبتسامة ساحرة :ياسر اذيك
ياسر يبادلها الابتسامة :الحمدالله كويس ..عامله ايه
نور :تمام ..جاى متأخر ليه انت مش عارف الحفلة معادها كام
ياسر :يدوب خلصت الشغل وجيت
نور بتساؤل :انت اشتغلت
ياسر :اه من شهر كده ..اومال فين ياسمين
نور :هتلاقيها عند جدو
ياسر :عقبالك
نور مازحة :لا ياعم مش عاوزة ..لما نفرح بيك انت الاول
ياسر :مش لما الاقيها الاول
نور :ان شاء الله هتلاقيها
ليقطع حديثهم ذلك الصوت من خلفهم :مساء الخير
لينظروا اليه
نور بتعجب من اين أتى :أدهم مساء النور ..ثم اسطردت قائلة :ياسر اقدملك أدهم ابن خالة عمر خطيب ياسمين
ثم نظرت لأدهم وهى تشير على ياسر :ياسر ابن اخو عمتو سعاد
ياسر وهو يمد يده بالمصافحة :مبروك يا أستاذ ادهم
أدهم ببرود :الله يبارك فيك ..ثم نظر لنور نظرة لم تفهمها
أدهم :مامتك عايزاكى
نور :طيب بعد أذنكم اروح اشوفها ..تركتهم وانصرفت
بينما أدهم نظر لياسر بحدة ورحل
Image
والله وهتدخل القفص يا عمر
تفوه بها سليم صديقهم
عمر :قفص ايه ياعم انت هو انا لسه اتجوزت
سليم :مسيرك هتدخله ..ما انت بدأت اول خطوة
ياسين مازحا :قولتله كده بس هو حر
فقال احد اصدقاءه :انفد بجلدك لتقع زى ما احنا وقعنا واخرتها
جينا خطوبتك بالعافية
عمر ضاحكا :اسكتوا الله يخربيتكم ..انتوا جايين تفركشوا الدنيا ولا ايه فى مخابرات وسطينا
سليم :ليه يعنى ياعم في ايه
ياسين بأبتسامة :اصلى انا اخو العروسة
وقفت تبحث عن اخيها لتجد عمر مع مجموعة من الشباب فنظرت اليهم لم تجد اخيها معهم
فأنتبه لها فرمقها بنظرات غضب لعلها تذهب ..فوجدها ماذالت واقفة ..استأذن منهم واتجه نحوها
ياسين بغضب :انتى واقفة هنا بتعملى ايه
ايسل :بدور على ادهم
ياسين :ادهم لسه ماشى دلوقتى ..يلا اتفضلى امشى
ايسل بحدة :وانت مالك بتكلمنى كده ليه ..وبعدين انت مالك انت امشى ولا ممشيش ..شئ ميخصكش
ياسين وهو يزفر :بت هو انتى مبتفكريش ..انتى جاية تدورى على اخوكى وانتى واقفة اوادم شباب ..يلا روحى اقعدى مكانك
ايسل بعند :مش رايحة بقى ..وادينى واقفة
ياسين بصرامة :عارفة يا ايسل لو ممشيتيش دلوقتى والله لهتشوفى وش تانى ..احسنلك امشى
نظرت له بحنق ورحلت ..ليبتسم هو ويعود اليهم مرة ثانية
********
بحثت عن والدتها لتجدها جالسة مع اخوات سعاد فتوجهت نحوها
نور :ماما انتى كنتى عايزانى ليه
زينب بإستغراب :مستغناش عنك يا حبيبتى ..
نور :مش انتى بعتيلى
زينب :لا يا حبيبتى
لتندهش هى لماذا قال لها ان والدتها تريدها ..بحثت عنه لتجده واقف بعيدا مع اخته ..فذهبت اليه
لتجد ايسل تأخذ منه هاتفها ورحلت لتلتقط بعض الصور لياسمين وعمر
بينما هو نظر اليها ببرود وقال :نعم ..كنتى عايزة حاجة
نور بغضب :ماما مكنتش عاوزانى ..انت ليه قولت كده
أدهم بنفس نبره البرود :مش لازم تعرفى
نور بحدة :هو ايه ده لعب عيال
أدهم بحدة :حضرتك خاطبة واقفه معاه وعقبالك وكلام فاضى
وكمان خدى بالك من تصرفاتك وانتى بتهزرى ..مينفعش تهزرى بالايد حتى لو كان ابن عمك
وتركها وذهب
ليتركها هى فى حيرتها
Image
بعد انتهاء الحفلة
جالسة فى غرفتها تتطلع بسعادة الى ذلك الخاتم الذى يزين اصبعها
فهتفت قائلة :بجد كان احلى يوم فى حياتى ..انا فرحانة اوى
نور وهى تغمز بعيناها :بركاتك ياعم عمر
تمددت على الفراش وهى تلف خصلات شعرها على اصبعها :عارفة يا نور انا لما بشوف عمر ..ولا اقولك مش هقول انتى لسه صغيرة
نور وهى تضع الوسادة على وجهها :انتى بتتكلمى على سنتين فرق بينك وبينى ..ده انا اعقل منك ..قولى بقى
ياسمين :لا اصلك هتتريقى
نور :لا مش هتريق اخلصى بقى وقولى
ياسمين بهيام :لما بشوف عمر بحس ان قلبى هيخرج من مكانه بيفضل يدق جامد اوى ..احساس حلو وببقى مش عاوزة اسيبه
ببقى عايزة نفضل مع بعض ..بس انا طبعا مش ببينله حاجة خالص
لا تعلم لماذا خطر ببالها أدهم ..لتشرد فى نظرته لها التى لا تعرف معناها..وكلامه الذى يدل انه كان يراقبها
ياسمين :بت يانور
نور بأنتباه :نعم بتقولى حاجة
ياسمين بغيظ :طيب قومى بقى امشى ..بقى انا عمالة احكيلك وانتى مش هنا
نور :ماشى انا اصلا كنت هروح انام عايزة اصحى بدرى عشان الجامعة كفاية سهر بقى
ياسمين :الجامعة لسه يوم السبت
نور :يادى الغباء ..انا عايزة اتعود فى اليومين دول ..يلا تصبحى على خير
*******
بينما هو كان واقف فى شرفته ينفث سيجارته بضيق
يتذكرها وهى تمزح معه فهو ابن عمها لكنه غريب عنها حتى لو تعتبره مثل اخيها لكنها لا يجوز ان تمزح معه بهذا الشكل
ويتذكرها وهى واقفة معه والبسمة على محياها
شعر بالضيق من نفسه لشعوره بالضيق عندما وجدها واقفة معه..ولماذا يفكر فيها دائما فهى فتاة عادية
فمن هى لتستحوذ على تفكيره
توقف عقله عند كلمة ابى ان يذكرها
القى سيجارته ودخل ليتمدد على فراشه ووضع الوسادة فوق رأسه ليخمد تفكيره
******
صباح يوم السبت
لتبدأ الدراسة
اول يوم جـــــامـــــــعــــــــــة
البارت ال 25
صباح يوم السبت
لتبدأ الدراسة
اول يوم جـــــامـــــــعــــــــــة
واقفة امام المرآة تمشط شعرها ..ليدق باب حجرتها
فتهتف قائلة :ادخل
أحمد:حبيبة بابا عامله ايه
ايسل بتوتر :بابا انا خايفة اوى ..مش عارفة هعمل ايه
أحمد باسما :لا متخافيش خالص هو ده احساس طبيعى عشان اول يوم لكن بعد كده هيبقى عادى ..
ايسل :طيب
احمد :انا كلمت ادهم ..هيجى معاكى عشان يوصلك اطمنى يعنى
وبما انه حافظ الجامعة فقولتله يوديكى لغاية المدرج
عقدت جبينها :بابا انا مش صغيرة ولا لسه فى مدرسة عشان يودينى لغاية المدرج
احمد :عشان ابقى مطمن عليكى
مازالت تشعر بالضيق
فقال :ليكى عندى مفاجأة ..فكرى كده ايه هى
ايسل وهى تمد شفيها للأمام :مش عارفة قول
أحمد وهو يعطيها مفاتيح لونها ذهبى
ايسل بسعادة وهى تقفز فرحا :جبتلى العربية..انا كنت بحسبك نسيت
أحمد:عيب عليكى انا بردو انسى حاجة وعدتك بيها ..مش انا قولتلك اول يوم جامعة هتكون عندك
قبلته من وجنته :ربنا يخليك ليا ..بس فى مشكلة انا مش بعرف اسوق
أحمد :هخلى عم صابر هو اللى يعلمك ..بس النهاردة اخوكى هو اللى هيوديكى ..ويلا بقى عشان اخوكى مستنيكى تحت
أيسل :طيب لونها ايه
أحمد :رمادى زى ما انتى كنتى حابه
**********
جالس منتظرهم فأخرج هاتفه حتى يأتوا
أنت هتروح الشركة من دلوقتى يا أدهم
تفوهت بها والدته وهى تجلس بجانبه
وضع هاتفه فى جيب بنطاله :لا ياماما هوصل ايسل الاول وبعدين هبقى اروح
نيفين :طيب يا حبيبى خلى بالك منها
ركضت نحوه وهى تصيح :يلا يا أدهم نمشى
أدهم :ما بدرى ..الشوفير بتاعك انا صح
أيسل :ده انت حبيبى يا دومى
أدهم :طب يلا
Image
بعد ما انتهوا من تناول الفطار ..كادت ان تذهب لكن استوقفتها
ياسمين :انتى رايحة فين يا نور
نور :هروح احضر لبسى
ياسمين :تحضرى مين ..يلا روحى البسى عشان هتيجى معايا
نور :بس انا محاضرتى الساعة 12
ياسمين :منا قولت بدل ما انا محاضرتى الساعة 10 يبقى تيجى معايا وبالمرة اوريكى المدرج بتاعك ..واهو اكسب فيكى ثواب
نور وهى تقبلها :ربنا يخليكى ..انا كنت مش عارفة اعمل ايه
ياسمين :خلاص انتى هتشحتى يلا روحى والبسى بس بسرعة عشان منتأخرش
نور :حاضر
ابدلت ملابسها سريعا وعادت لتجدها منتظرها فى حجرة الصالون ..فبحثت بعيناها :اومال فين ياسين
ياسمين :طلع نام تانى وقالى انه مش هيروح النهاردة
نور :ليه بقى ..ثوانى هطلع اشوفه ومش هتأخر
دقت على باب حجرته لتسمع صوته يسمح لها بالدخول
نور : ما انت صاحى اهو ..يلا تعالى روح معانا
ياسين :مش عاوز اروح انا حر ..وبعدين يوم مش مهم
نور بحنق :والله عشان يوم مش مهم
ياسين :تقصدى ايه
نور :ولا حاجة
فهى علمت سبب عدم ذهابه فنظرت اليه بعدم رضا :براحتك يا ياسين متروحش
ثم صفعت الباب خلفها بقوة
*********
فى سيارة ياسمين ..جلست نور بالمقعد الامامى بجوارها
ياسمين وهى تربط حزام الامان :نور اربطى الحزام
نور :انتى ناوية تعملى بينا حادثة ولا ايه
ياسمين :والله انزلك ..اقعدى كده واسمعى الكلام وياريت مترغيش كتير عشان اعرف اركز وانا بسوق
نور :حاضر هسكت اهو
****
صف ادهم السيارة وترجل منها هو واخته
أدهم وهو يسير بجانبها :بصى كده من اولها ..متكلميش حد خالص ..شاب يقولك ممكن اقعد ولا الحوارات دى ..انتى فاهمة هتعملى ايه
قاطعته هى :ادهم حبيبى انت طول الطريق عمال تحفظنى والله حفظت تحب اسمعلك ..ورينى بقى فين الكلية بتاعتى
أدهم :طيب
أيسل بتذكر :اه يا ادهم متعرفش جدول مجموعة (د)
أدهم :معرفش ..وانتى عايزاه ليه
أيسل :عشان ابقى اشوف نور
أدهم بأهتمام:هى السن بردو
ايسل :اه
أدهم :كده كده مش هتبقى نفس المواعيد هى مجموعة (د) وانتى (أ)..ويلا بقى بطلى رغى احنا وصلنا
ويشير لها بأصبعه على المبنى
ايسل :طيب امشى انت بقى
ادهم بحزم :انا هاجى معاكى لغاية باب المدرج يلا
ايسل بتذمر :ادهم انا مش طفلة ..خلاص عرفت المبنى امشى انت
أدهم بصرامة :أيسل أمشى اودامى
أذعنت له وذهبا سويا
Image
تنظر حولها بأنبهار وفى نفس الوقت تنظر برهبة من هذا المكان الدخيل ..لترى اختلاط الفتيات مع الشباب وكأنه شئ عادى
ياسمين :ايه رأيك
نور :حلوة اوى بس انا خايفة اتوه
ياسمين بضحك :تتوهى ايه بس ..بصى اول أسبوع هتبقى عاملة زى القطة وخايفة ..بس بعد كده هتعرفى كل حاجة ..متخافيش انا هحاول اظبط مواعيد المحاضرات واجى معاكى وهشوف ياسين هيعمل ايه ..محلوله يعنى متخافيش ..وبعدين يا نور انتى لازم يا حبيبتى تعتمدى على نفسك مش كل حاجة تبقى معتمدة عليا او ياسين ..انا مش بقولك كده لحسن تاخديها بمعنى تانى ..انتى اكيد فهمانى لازم تعرفى العالم اللى حواليكى
خلاص انتى كبرتى
نور :فهماكى يا ياسمين ..ثم اسطردت قائلة :اه بمناسبة ياسين
شوفتى البيه ..انتى عارفة هو ليه مجاش
اومأت رأسها بضيق :ايوه عشان فرح
نور بحنق :يعنى ينفع كده يا ياسمين ..ده معناه انه لسه بيفكر فيها
ليقطع حديثهم صوت يعرفوه جيدا ..فيلتفتوا اليه ليجدوه هو
ياسمين بدهشة :عمر انت بتعمل ايه هنا
عمر بأبتسامة :جاى لخطيبتى عندك مانع
نور بحرج :احم احم ..طب امشى انا يعنى
عمر :معلش يا نور اصلها زى ما تكون شافت عفريت ..انتى عامله ايه
نور :تمام الحمدالله ..ثم التفتت لياسمين قائلة :ياسمين انا هروح اشوف المدرج بتاعى
ياسمين بجدية :لا استنى هنا ..انتى عارفة اصلا الاول هتروحى ازاى
نور :لا قوليلى اروح ازاى وانا هعرف
ياسمين :لا استنى هاجى معاكى
نور بعند :قولتلك انا هروح لوحدى ..قوليلى بقى امشى ازاى
رحلت بعد ما وصفت لها ياسمين كيف تذهب الى كليتها
نظرت الى عمر لتجده ينظر اليها بتمعن
ياسمين بخجل :بتبصلى كده ليه
عمر بلوم :مكنتيش عايزانى اجى
ياسمين :مقصدش والله ..بس انا مكنتش متخيلة أنك هتيجى ..اصلا انت عرفت منين معاد المحاضرة بتاعتى
عمر بتفاخر :مصادرى الخاصة
ياسمين :اااه يبقى ياسين
ياااااسمين
تفوهت بها فتاة واقفة بعيدا عنهم بعض الشئ ..تعرفها ياسمين جيدا
انتبه عمر لها فقال متسائلا :مين دى
ياسمين :دى يارا زميلتى فى الكلية ..معلش ياعمر انا لازم امشى عشان الدكتور اللى علينا بيقولوا عليه رخم وبيطرد وبيزعق
عمر :مين ده اللى يستجرأ يزعقلك ..طب يبقى يعمل كده بس
ياسمين :اه واشيل الماده بقى او اتفصل انا من الكلية صح ..انا لازم امشى
عمر :طيب خلى بالك من نفسك ..وياريت تخلى صاحبتك دى متناديش تانى عليكى بأسمك فاهمة
ياسمين بأبتسامة :حاضر
عمر :اه ومتكلميش اى حد ولا تقفى مع حد
ياسمين :حاضر ممكن امشى بقى
عمر باسما :اه ممكن ..لما تخلصى رنى عليا وانا هتصل بيكى
Image
تشعر بالخوف وهى واقفة تنظر الى تلك المبانى التى تحوطها
لا تعرف اى مبنى تتجه اليها
لفت انتباهه تلك الفتاة التى يعرفها جيدا فأبتسم على ملامح خوفها
فأتجه نحوها
أدهم بصوت رخيم :نور
التفتت اليه بذعر وعندما رأته شعرت بالاطمئنان فقالت :أدهم انت بتعمل ايه هنا
أدهم :كنت بوصل ايسل ..انتى ايه اللى جايبك بدرى اللى اعرفه ان (د) معادها مش دلوقتى
نور :جيت عشان اشوف المدرج بتاعى ..بدور عليه
أدهم بسخرية :بتدورى على عيل تايه ..ثم اسطرد قائلا بجدية :انتى المفروض دلوقتى هتكونى فى مدرج ايه
نور :مدرج....
أدهم بسخرية :وواقفة هنا ..المدرج بتاعك مش هنا ..ثم تابع بجدية :تعالى اوديكى
لم تعجبها طريقة كلامة فقالت ببرود:لا قولى اروح ازاى
أدهم ببرود مماثل :مبحبش اعيد كلامى ..بس لأخر مره تعالى اوديكى
نور بعند :خلاص مش عاوزة مساعدتك
أرتدى نظارته السوداء بغرور فقال :خلاص على راحتك ..سلام
نظرت اليه بتعجب وغضب فهى اعتقدت انه لن يتركها
ظلت تنظر عليه حتى اختفى تماما
فزفرت بضيق ثم لعنت نفسها على عنادها ..ماذا ستفعل الأن
نظرت مرة ثانية لعلها تجده لكن لم يكن له اثر
سارت عدة خطوات لتسمع صوته يقول :مش من هنا على فكرة ..انتى ماشية غلط
التفتت اليه بأبتسامة فشلت فى اخفاءها :أدهم ..ممكن تودينى
صمتت لعدة ثوانى عندما وجدته لا يصدر اى فعل فقالت بصوت خافت :انا اسفة
ليبتسم هو :ما كان من الاول ..يلا
ذهبا سويا ..كانت صامتة وهى تسير وتجول بعيناها فى المكان
لتتعجب من تلك العيون التى تنظر اليه بإعجاب وتتغامز عليه
فتنظر اليه تجده يسير بثقة غير مبالى بأحد
رسمت على ثغرها ابتسامة صغيرة ونظرت امامها حتى وصلوا
أدهم :هو ده المدرج بتاعك ..اكيد حفظتى
اومأت برأسها :اه حفظت ..شكرا بجد يا ادهم
نظر فى ساعته تانك السوداء الانيقة :الساعة 11 لسه فاضلك ساعة على محاضرتك
نور :انت عرفت منين معاد المحاضرة
أدهم وهو يشير على ورقة معلقة على الحائط خلفها :الجدول اهو
نور بحرج :طيب امشى انت بقى ..معلش عطلتك ..وشكرا لتانى مرة
أدهم غير مبالى لكلامها :انتى هتفضلى واقفة كده
نور وهى تمد شفتيها للامام :مش عارفة ..بس هقف هعمل ايه يعنى ..ثم نظرت اليه قائلة :ما تمشى بقى كده هتتأخر على شغلك
أدهم وهو يشير لها على احد المقاعد الموضوعة :طيب اقعدى هناك لغاية ما المحاضرة بتاعتك تبدأ ..ومتكلميش حد متعرفهوش فاهمة
نور مذعنة :حاضر
أدهم :طب عايزة حاجة
نور بأبتسامة رقيقة :شكرا
أدهم :خلى بالك من نفسك ..سلام
نور :سلام ..ظلت ناظرة عليه حتى اختفى من امامها
Image
مضى اليوم سريعا ليأتى المساء
جلست مع والديها تحدثهم عن ما حدث معها فى الجامعة
نور :بس شكلها سنة عسل باينة من اولها
زينب :ان شاء الله خير متقلقيش ..ثم تذكرت شئ :طلاما مواعيدك غير ياسمين انتى كده هتروحى ازاى
نور :عادى هروح منا مش صغيرة
محمد:زينب تقصد على اللى هيوصلك ..متقلقيش عامل حسابى جمال السواق بتاعى كلمته هو اللى هيوديكى بعد كده ويجيبك ..انا خلاص اتفقت معاه
نور بنعاس :طيب ..انا هطلع انام مش قادرة ..تصبحوا على خير
*****
استيقظت على صوت رنين هاتفها ..التقطت هاتفها بتكاسل شديد
نظرت الى الشاشة بنعاس ..لتحدق بشدة وذعر عندما وجدت اسمه ..نظرت فى الساعة وجدتها 9 مساءا
ضغطت على زر الرد ووضعته على اذنها بتردد
فقالت بسرعة :انا اسفة والله بس انا نسيت خالص ارن عليك لما خرجت من الجامعة
عمر بحدة :كده تخضينى عليكى ..اتصل بيكى بيدى غير متاح
وبعدين ازاى تنسى طول اليوم
ياسمين بصدق :والله انا جيت من الكلية تعبانة فنمت على طول ولسه صاحية دلوقتى على اتصالك
عمر بصرامة :اخر مرة يا ياسمين ..انا لولا اتصلت بعمى وهو طمنى عليكى وقالى ان انتى جيتى من بدرى ..كنتى زمانك هتلاقينى عندك
ياسمين :طيب خلاص مش هنسى تانى
عمر بهدوء :خلاص ماشى ..احكيلى كل حاجة من ساعة ما مشيت
بدأت بسرد كل شئ حدث معها
****
عندما وصلت للطابق الثانى تذكرت شئ فنظرت الى حجرته وجدت النور مضئ فعلمت انه مستيقظ فذهبت اليه ودقت الباب لتسمع صوته يأذن لها بالدخول ..دخلت لتجده جالس على فراشه وامامه اللابتوب الخاص به
جلست على مقعد مجاور لفراشه
ياسين بدون ان ينظر اليها:كنتى عايزة حاجة يا نور
نور بجدية :ممكن افهم بقى مجتش ليه النهاردة
ياسين وهو يزفر بضيق وماذال لا ينظر اليها :عادى يعنى ده اول يوم ..وبعدين هو تحقيق وانا معرفش
اغتاظت منه فنهضت واغلقت حاسوبه ..بينما هو نظر اليها ببرود ولم يصدر اى فعل
نور :متكدبش عليا ..انا عارفاك كويس يا ياسين ..
وعارفة كويس يا ياسين انت مروحتش ليه وانا عارفة ان انت عارف انى عارفة
ياسين مازحا :ايه عارفه ومش عارفة انتى توهتينى
نور بجدية :انا مبهزرش ..صمتت لثوانى وقالت :عشان فرح صح
نظر اليها بدهشة وارتباك :فرح ! انتى ايه اللى بتقوليه ده يا نور ..موضوع فرح انا نسيته
نور بحدة :لا انت مروحتش النهاردة عشان متشوفهاش ..طيب هتفضل طول السنة متروحش عشان خاطرها ..هتضيع مستقبلك عشانها ..تلاقيها عايشة حياتها عادى جدا ولا فى بالها اصلا
ياسين :يعنى انا اللى مش عايش حياتى ..منا اهو عادى انا كمان
نور:ياسين لأخر مرة هقولهالك ..انت مروحتش عشان متشوفهاش صح
نظر اليها بحزن ولم يجب ..فهى محقة هو لا يريد ان يراها
نور :يبقى انت لسه بتفكر فيها ..وكلامى معاك دخلته من ودن وخرجته من ودنك التانية
ياسين :لا مبفكرش فيها
نور :ده اكبر دليل انك لسه بتفكر فيها ..طلاما مروحتش عشانها الجامعة يبقى بتفكر فيها ..صدقنى يا ياسين هى عمرها ما حبتك ..لو كانت بتحبك مكنتش اتخطبت لحد غيرك ..شيلها من دماغك بقى
ياسين :والله يا نور بحاول انساها ..بس حكاية انى اشوفها فى الجامعة وكمان معايا فى نفس المدرج يبقى صعب
نور بصرامة :مفيش حاجة اسمها صعب ..انت تروح ولا تعبرها ولا تبص فى وشها حتى ..بينلها انها ولا فارقة معاك ..وصدقنى ربنا هيرزقك باللى احسن منها ..وشايلك الاحسن منها ..وكمان ان حاسة ان هيبعاتلك واحدة تحبك اوى
ابتسم هو :ان شاء الله
نور :يبقى هتروح بكرة الجامعة
ياسين :حاضر ..ثم اسطرد قائلا :اه صح انتى عملتى ايه النهاردة فى الجامعة
نور :انت لسه فاكر تقولى دلوقتى منا جيت من بدرى ..بس اه لو تعرف اللى جرالى ..ثم قصت عليه يومها
نور :اخس عليك بقى الغريب هو اللى يودينى المدرج وابن عمى موجود
مضى شهر سريعا من الدراسة
البارت ال 26
مضى شهر سريعا من الدراسة
زاد فيه تقرب عمر من ياسمين
واصبح ادهم يرى نور دائما
دخل غرفة اخته ليجدها تحضر ملابسها استعدادا للرحيل
فسألته بتعجب :أدهم كنت عايز حاجة
ذهب ليجلس على فراشها :ايه جاى اقعد مع اختى شوية فى حاجة . .عاملة ايه فى دراستك
ايسل :تمام اوى ..بس بيطلبوا مننا ابحاث كتيرة مش عارفة على ايه ده احنا اول شهر حتى
أدهم :اومال انتى عايزة كل حاجة راحة ..لازم تتعبى شوية
ايسل :طيب كنت عايز حاجة ..انا عايزة اغير
أدهم وهو يرفع حاجبيه :انتى بتطردينى يا ايسل
ايسل :اه ..انت هتأخرنى على المحاضرة
أدهم :طب يلا غيرى بسرعة عشان اوصلك
ايسل بتعجب :توصلنى! ما عم صابر بيودينى
أدهم :لا انا هوصلك فى مانع
ايسل بنصف عين :يسلام وده عشان خاطرى ولا عشان تشوف حد مثلا
أدهم بأرتباك اخفاه بنبره جدية :ايسل اتكلمى عدل انا اخوكى الكبير ..يعنى الحق عليا انى هوصلك
ايسل بخبث :ماشى براحتك ..بس احب اعرفك انها مش هتيجى بدرى النهاردة
أدهم :هى مين دى
أيسل:ولا حاجة ..لسه عايز توصلنى بردو
أدهم بغيظ :متستاهليش روحى لوحدك
ليخرج هو بينما هى ابتسمت بخبث
*****
فى قاعة مليئة بالطلبة لهذا المعيد الذى يأتون اليه لشرحه المبسط
نجدهم جالسين بجانب بعض فى وسط المدرج يكتبون خلف المعيد
يارا هامسة لياسمين :انا مش عارفة اركز فى الكتابة ولا مع المعيد اللى هيخلينا نسقط ده
ابتسمت ياسمين ثم وكزتها بخفة :اتلمى انتى مركزه فى شكل المعيد احترمى نفسك
يارا بهيام :قمر اوى يخربيته
نظر اليهم ياسين بحدة ليصمتوا ..فنظروا لبعض وصمتوا
وبعد نصف ساعة كانت المحاضرة انتهت وبدأ الطلاب بالخروج
نهض ياسين :ايه هتفضلوا قاعدين كتير يلا قوموا
ياسمين :مش لما يخرجوا ولا نخرج فى الزحمة دى
ياسر :طيب انا خارج اقعد فى الكافيتريا ابقوا تعالوا ورايا
ياسين :استنى يابنى انا جاى معاك دول هيشلونا
وقبل ان يخرج نظر لأخته بحدة :متتأخريش
اماءت برأسها ثم نظرت ليارا لتجدها واضعة يدها على وجنتها بهيام
ياسمين وهى تلوح بيدها امامها :يارا انتى روحتى فين ..اوعى تكونى لسه مركزة فى دكتور زياد (المعيد)
يارا :لا طبعا ..بس شوفتى عمايله يا ياسمين بيحسسنى انى واحد صاحبه مش بيحس خالص بيا..شوفى 3 سنين مع بعض وهو مبيحسش
ياسمين وقد علمت ما فى بالها :سيبك منه يا يارا ..اهم حاجة ركزى فى المذاكرة
يارا وهى تلملم اشيائها :هو فى حاجة تانية بنركز فيها ..يلا نخرج
Image
أعطته الدواء وقامت بقياس درجة حرارته وجدتها ليست مرتفعة
أحمد :خلاص يا نيفين انا كويس اهو
نيفين :يعنى الحق عليا انى بطمن عليك
قبل يدها :ربنا يخليكى ليا ..عارفة يا نيفين اكتر حاجة بحبها فيكى قلبك الابيض برغم تحكماتك وعصبيتك لكن مفيش احن منك
ابتسمت قائلة :منا ببقى عايزة مصلحتكم
صمتت قليلا لتفكر فى شئ
لاحظ احمد صمتها :نيفين بتفكرى فى ايه
نيفين :فى ادهم يعنى هيفضل كده ..مش المفروض يتجوز ..انا شوفت بنـ
قاطعها احمد سريعا :تانى يا نيفين انتى مش بتحرمى..سيبيه هو اللى يختار بقى
********
خرجت من المطار متشبثة فى ذراعه بسعادة وينظر اليها بحب
الان اختلف الوضع فقد اصبحت زوجته التى يعشقها
استقلوا السيارة وقبل ان يتحرك بها
امسكت يده بتوتر ..نظر فى عيونها فعلم ما يجول بخاطرها
فضغط على يدها برفق ليطمأنها فقال بنبرة حانية :متخافيش طول منا معاكى ..وبعدين دى مهما كان مامتك واكيد انتى وحشاها
الين بتوتر :انا خايفة من ردة فعلها لما تشوفنى بعد الكلام اللى قالتهولى لما اتصلت بيها
كريم :بصى يا الين احنا معملناش حاجة غلط انا روحت طلبتك من عمك وهو وافق ولما اتصلنا بيها عشان نقولها على كتب الكتاب هى رفضت تانى ..خلاص بقى مكنش اودامنا حل تانى
هنفضل لغاية امتى كده ..متخافيش انا هبقى معاكى
الين بأبتسامة توتر :حاضر
كريم :طيب تحبى دلوقتى نروح على مامتك ولا تشوفى عيلتى الاول
الين :عرفنى على عيلتك الاول وبعدين نبقى نشوف ماما
****
اتجه الى الطاولة وهو حامل بيده علب عصائر ووضعها امامهم
ياسر :متتعودوش على كده كتير ..مش كل مرة على حسابى
ياسين :انت جايبهم وباصص فيهم ..يلا اقعد بقى خلينا نركز
التقطت ياسمين العصير :شكرا يا ياسر ..ثم وجهت كلامها لصديقتها :يارا اشربى انتى من ساعة ما قعدنا وانتى مشيلتيش راسك ..يلا استريحى
رفعت رأسها بأرهاق ووضعت القلم على الطاولة :مش قادرة هو الدكتور ده فى حاجة فى مخه ..بقى يعملنا امتحان فى حاجات لسه مخدنهاش ..ده لو قاصد يشيلنا المادة مش هيعمل كده
ناولها ياسر العصير :يلا كلها سنة غير السنة دى ونخلص بقى من الهم ده
ياسمين وهى تلتفت حولها :هى نور أتأخرت ليه المفروض تكون جت من نص ساعة
ياسين :اتصلتى بيها الاول
وضعت يدها على جبينها :تصدق لا
اخرج الهاتف من جيب بنطاله واجرى اتصال بها لكنها لا ترد
ياسين :مبتردش
هتفت يارا :اهى جت وايسل معاها
اتجهوا نحوهم وجلسوا معهم
ياسمين بعتاب :اتأخرتى ليه يا نور
نور :اصلى استنيت ايسل على بال ما تخلص
ياسين :ومردتيش ليه لما اتصلت
نور :كنت قربت منكم
ياسر مقاطعا :ياجماعة براحة عليها سيبوها تاخد نفسها ..ثم نظر اليهم بأبتسامة :منورين يا بنات
التقطت يارا حقيبتها وهمت بالنهوض :طيب يا جماعة انا همشى بقى عشان مش قادرة بجد
ياسمين :تمشى ايه لسه فى محاضرة
يارا :هبقى انقلها منك ..وبالنسبة للتلخيص هكمله فى البيت وبكره نبقى نراجع سوا ..يلا سلام
نهض هو الاخر :استنى يا يارا اوصلك فى طريقى
ياسين بتعجب :انت كمان هتمشى
ياسر :ايوه يلا سلام
ايسل بحرج :هما مشيوا عشان انا جيت يعنى
ياسين بجدية :ايه اللى بتقوليه ده لا طبعا ما هما عارفينك اصلا وانتى كمان عارفاهم ..وبعدين هما اصلا فاشليين..سيبك انتى
ثم نهض :انا هروح اجيبلكم حاجة تشربوها عايزين ايه
نور :انا عصير جوافة
ياسين بأبتسامة :عارف والله ..وانتى يا ايسل
ايسل :زيها
رن هاتف ياسمين لتبتسم عندما رأت الاسم فردت على الفور
ياسمين :السلام عليكم ..ازيك يا عمر
عمر :وعليكم السلام ..انتى عامله ايه
ياسمين :كويسه ..فى حاجة ولا ايه
عمر :فى بنت تقول لخطيبها فى حاجة ..يعنى اقفل
ياسمين بتلعثم :لا مقصدش ..كنت عاوز ايه ..يووه عمر خلاص
ضحك هو :طيب خلاص اهدى ..انا معطلك عن حاجة دلوقتى
ياسمين بعفوية :لا خالص احنا لسه مخلصين مذاكرة
عمر :انتوا اللى هما مين
ياسمين :انا وياسين وياسر ويارا
عمر بغيرة :وياسر ده مين ان شاء الله يا ياسمين ..تقعدى ليه اصلا مع واحد
ياسمين :فى ايه ياعمر ده ابن اخو عمتو سعاد وبعدين هو انا قاعدة معاه لوحدى انا معايا صاحبتى واخويا وكنا بنذاكر وكمان نور جت ومعاها ايسل .
عمر بعصبية :بردو يا ياسمين وانتى مقولتيليش
ياسمين بعصبية مماثلة :انا شايفاها حاجة عادية ..وكمان ياسين لو شايف ان ياسر مش كويس عمره يا هيخلينى اقعد اتكلم معاه ..وعشان تبقى عارف انا كلامى معاه نادرا ماشى
مع ان ياسر بيعاملنى كأنى اخته بالظبط
بعد ان هدأ :طيب خلاص اهدى قولتلك قبل كده متعليش صوتك
ياسمين بغيظ :هو انا صوتى على خالص
عمر ببرود :وانا هستنى لما يعلى ..المهم انا عملك مفاجأة وهعزمك على الغدا ومفيش اى اعتراض
ياسمين بسخرية :ياسلام ما انت قولت
عمر :ممكن تسكتى ..عازمك على الغدا اه لكن المفاجأة مش دى لما تيجى هتعرفى
ياسمين :مش هينفع اجى ..انا مقولتش لبابا
عمر :ريحى نفسك انا اتصلت بيه قبلك ..هتخلصى امتى عشان اعدى عليكى
ياسمين :هخلص على 3 كده
عمر :تمام اوى ..خلاص استنينى جوه فى الجامعة ولما اتصل بيكى تخرجى
ياسمين :حاضر ..ثم اسطردت قائلة بتردد :عمر ينفع يعنى
عمر :ايه انتى بتقطعى ..عاوزة ايه قولى
ياسمين :يعنى لو ينفع اجيب نور معايا
عمر :مفيش مشكلة خليها تيجى
ياسمين بفرحة :طيب اقفل بقى عشان شغلك ..يلا سلام
عمر :سلام
انهت المكالمة لتنظر لنور بتعجب :اومال فين ايسل
نور :ما انتى مش معانا خالص ..مشيت عليها محاضرة دلوقتى
ياسمين :طيب اعملى حسابك انتى معزومة على الغدا النهاردة
نور بدهشة :ده مين اللى عازمنى
ياسمين :عمر عازمنا على الغدا بعد الجامعة وهيعملنا مفاجأة
نور بجدية :ياسمين عمر عازمك انتى يبقى انا هاجى اعمل ايه يعنى جاية زى المخبر يعنى ..لا معلش يا ياسمين مش هاجى
ياسمين بترجى :عشان خاطرى يا نور هو معندهوش مانع خالص والله وقالى هاتيها ..وبعدين تغيرى جو ولو على عمى انا هتصل بيه اقوله ماشى
تدخل ياسين :مش الهانم بردو عليها امتحان بعد كام يوم ..ليكى نفس تخرجى
ياسمين بأبتسامة حانية :مهو البركة فيك يا ياسو ..هتذاكرلى لما ارجع
ياسين :ولا اعرفك ماليش دعوة بيكى اصلا
Image
كان يتحدث معها وهو جالس فى مكتب ادهم
عمر بجدية :اعمل حسابك انا هخرج النهاردة بدرى ادينى بقولك اهو من قبلها ..عشان متجيش تقولى مينفعش .
نظر اليه بنظرة خالية من اى تعبير ثم نظر ثانية فى الورق الموضوع امامه :اوكيه مفيش مشكلة روح بس متتعودش على كده ..بس انت هتخرج بدرى ليه
عمر :ال يعنى مسمعتنيش
أدهم بتعجب :سمعت ايه ..انت مش شايفنى وانا كنت بتكلم فى الموبايل هركز معاك يعنى
عمر :خلاص يا عم ..انا عازم ياسمين على الغدا
أدهم :ايوه الله يسهلك..عشان كده جايلى بلبس كاجول .. ناس تخرج وناس قاعدة للشغل
عمر :ده نظام حقد ده ولا ايه ..عقبالك انت كمان لما يسهلك ..الا قولى يا ادهم انت لغاية دلوقتى لسه محبتش يعنى ملاقتش البنت المناسبة ..ولا هتفضل طول عمرك فقرى
قذفه بالقلم :لا لسه محبتش انا معنديش وقت للشغل الفاضى ده
عمر بسخرية :يعنى فقرى ..عمرك ما هتجرب احساس الحب ده ..ولم يكمل حديثه :اه صح بتكلم مع مين ..نسيت ان انت معقد
أدهم بنفاذ صبر :طيب ..مش خلصت اتفضل على مكتبك
عمر :ماشى هروح ..ثم اسطرد قائلا :ما تيجى معانا
أدهم :اجى فين
عمر :ايه اللى تيجى فين ..على الغدا انا هعزمك ومش هدفعك حاجة
أدهم :وانا اجى اعمل ايه ان شاء الله ..امشى يا عمر ..انت مش شايف الشغل فوق دماغى اليومين دول من ساعة ما بابا قعد
فتح عمر الباب واستدار له :خلاص هروح انا بيهم
أدهم متعجبا :بيهم مين يعنى.. مش انت وياسمين
عمر بخبث :هو انا مقولتلكش ..نور هتيجى معانا ..يلا بقى عشان معطلكش ده الشغل فوق دماغك ..يلا سلام
********
تنظر فى الساعة لتجدها 2.30 فزفرت بضيق وهى تنظر الى هؤلاء الطلاب ولم تجدهم بينهم ..ظلت تنظر اليهم حتى وجدتهم
خارجين سويا وعندما رأوها ذهبوا اليها
نور بضيق :كل ده انا رجلى وجعتنى من الوقفة
ياسين :معلش مهو الدكتور ده بينسى نفسه
ياسمين وهى تنظر فى ساعتها :طيب يلا يا نور هتصل بعمر اقوله اننا خلصنا وربع ساعة ويكون هنا
ثم نظرت لياسين :انت هتروح دلوقتى
ياسين :لا هطلع المكتبة اذاكر شوية وبعدين هروح
سحبت ياسمين يد نور :طيب يلا يا ياسو
******
بعد ما انهى عمله نظر فى هاتفه بأبتسامة ثم وضعه فى جيب بنطاله ..واتجه نحو الباب ليفتحه وجده واقف امامه
عمر بدهشة :أدهم ايه اللى موقفك هنا
أدهم وهو يعدل هندامه :يلا هنتأخر كده
عمر بتعجب :نتأخر على ايه ..مش انت قولت مش هتيجى
عشان الشغل
أدهم :خلصت بدرى ..وغيرت رأيى فى مانع
عمر بذات مغزى :لا مفيش يلا
*******
رن جرس الفيلا فذهبت سعاد لتفتح وجدته هو فعانقته ورحبت به ..دخلوا سويا وجلسوا فى الصالون
سعاد بلوم :بقى كده برضو يا ياسر مشوفكش غير فى مناسبة بس
ياسر :منا جتلك اهو يا عمتو ..وحشانى والله ..عامله ايه
سعاد :كويسه الحمدالله يا حبيبى ..والله وانتوا كلكوا واحشنى
سالم مجاش ليه ونيرة
ياسر :انا جاى من الكلية لهنا على طول
سعاد بقلق :فى حاجة ولا ايه
ياسر :لا مفيش ..بس كان فى موضوع ضرورى جاى اكلمك فيه
Image
توقفوا بسياراتهم أمام مدينة الملاهى ..استقل أدهم من سيارته وذهب لشراء التذاكر
بينما هما ظلوا فى السيارة
فقال عمر :ايه رأيكوا فى المفاجأة دى ..هناكل هنا وبعدين نلعب
ياسمين بفرحة :بجد مفاجأة حلوة اوى ياعمر ..يلا ندخل
نور :حلوة اوى انا بقالى كتير مجتش هنا
عمر :طب كويس انها عجبتكم ..يلا أدهم جاب التذاكر
وبعد ما دخلوا توقف عمر بهم قائلا :تحبوا نلعب الاول وبعدين ناكل ولا ايه
ياسمين وهى عيناها تدور بتلهف على الالعاب :انا بقول نعلب الاول
عمر :خلاص يبقى ناكل وبعدين نلعب
*********
مش هينفع نعمله من النت احنا نروح المكتبة وندور على كتب تفيدنا عشان نعمل البحث
تفوهت بها فتاة تدعى (أية ) واقفة مع ايسل بعد ما انهوا محضراتهم
ايسل :طيب يلا نطلع دلوقتى
أية :مع ان ماليش مزاج ..بس يلا
ذهبوا الى مكتبة الجامعة ودلفوا بهدوء ليجدوا السكون يعم المكان ..بدأوا بالبحث عن كتب تساعدهم فى عمل البحث
أية وهى تنظر على شخص :طب بصى دكتور حسام قاعد هناك هروح اسأله يمكن يفيدنا
أيسل :طيب روحى انتى وانا هدور
ظلت تبحث من بين الكتب حتى وجدت كتاب يمكن ان يفيدها
استدارت للناحية الاخرى ..ارتسمت ابتسامة رقيقة على ثغرها عندما وجدته جالس ينظر فى الكتب الموضوعة امامه ..وقفت شاردة فى هيئته ..كان يبدو هادئ تماما عكس الشخصية التى تعرفها ..اخرجها من شرودها صديقتها
أية وهى تنظر الى ما تنظر اليه ايسل :بت يا ايسل انتى بتبصى على ايه
أيسل وماذالت مبتسمة :بتقولى حاجة
أية بهيام :بقول حاجة ..مكنتش اعرف عنك كده مين ده اللى بتعاكسيه
أيسل بدهشة :بعاكس مين انتى هتجبيلى مصيبة ..ده ياسين قريبى
غمزت بعيناها:ااه قولتيلى قريبك
ثم نظرت اليه مجددا لتجده رفع رأسه ولم ينتبه اليهم فقالت بأعجاب :الواد ده خطر هنا ..انا لو فضلت ثانية كمان هقولك هاتيلى رقمه واطنش خطيبى
نظرت اليها بضيق وقالت بغيرة واضحة :طيب متبصيش عليه
أية بخبث :انتى متأكدة انه قريبك بس
ايسل بأرتباك :اه اومال ايه ..ثم قالت بتهرب :قالك ايه الدكتور
اعطتها ورقة :دول اسماء الكتب بس طلعته منه بالعافية
رن هاتفها وكان المتصل والدتها فردت وبعد انتهاء المكالمة
أية :معلش يا ايسل انا لازم اروح إسلام خطيبى فى البيت ..سلام يا حبيبتى
أيسل :سلام
بحثت عن أسماء الكتب المكتوبة فى الورقة حتى وجدتهم
تناولتهم واتجهت نحوه بإبتسامة :ياسين
رفع رأسه فقال بدهشة :ايسل انتى ايه اللى مقعدك هنا لغاية دلوقتى
ايسل :طب ممكن اقعد
ياسين وهو يأخذ منها الكتب ووضعهم على الطاولة :اه طبعا اتفضلى
ايسل :عندى بحث فجيت هنا عشان ادور على كتب وجبتها
ياسين :اه ما هى اول سنة بتبقى تعب كده ..وهو يحدثها انتبه الى تلك الفتاة التى جلست على مقربة منهم ومعها شاب
فشعر بالحنق منها وكاد فكه ان ينكسر من ضغطه عليه
ايسل بتعجب لتغير وجهه :ياسين مالك انت كويس
ياسين بوجوم :اه كويس مفيش حاجة
نظرت الى تلك الفتاة بإستغراب شديد ثم نظرت الى ياسين ..ودت لو تعرف ما علاقتها به حتى يتغير هكذا
فقالت بفضول :انت تعرفها
ياسين بغضب :وانتى مالك ..خليكى فى اللى انتى فيه
ادمعت عيناها على الفور وهمت بالنهوض
لكنه اوقفها بصوته :انتى رايحة فين
ردت دون ان تنظر اليه :ماشية
نهض هو الاخر :طيب تعالى اوصلك
ايسل :لا شكرا السواق هيجيلى
ياسين :خلاص على راحتك ..سلام
نظرت اليه بضيق شديد وهى تراه يرحل ..ثم نظرت مرة اخرى الى تلك الفتاة ورحلت