رواية قضية ثأر انتهت بالزواج
الفصل الاول1والثاني2
بقلم مريم أيمن
في حوش الجامعة الطلاب كلهم متجمعين "هنا" كانت بتضرب شاب كالعادة عشان
عاكسها ومسك ايدها وهي طبعا مستحيل تسكت على حاجة زي كده
هنا وهي لافة ايد الولد ورا ظاهره جامد بعد ما ضربته كام بوكس في وشه:
هااااا اتعلمت واخدت درسك ولا لسة كنت مفكرني يا ولا عشان بعيون ملونة يعني هسكت
الشاب بوجع:
خلاص والله اسف حرمت والله حرمت
هنا زقته جامد وسابت ايده وقالت لكل اللى واقفين:
عشان تعرفوا انه اي حد هيحاول يعمل اللى عمله هيحصل فيه كده يلا بقا طرقونا كل
واحد يروح مطرحه
مشي الكل من قدامها في ثواني ما عدا بنت واحدة وهي منه صاحبتها
منه:
يا بنتي انت بنت واللى بتعمليه ده مينفعش المفروض تكوني رقيقة مش كده وبعدين
خلاص هو كل حد ييجي يعاكسك هتعملي معاه كده يعني ما كل البنات بتتعاكس
هنا:
منة مش كل مرة هتقوليلي نفس المحاضرة وبعدين انت عارفة كويس اني مضطرة ابقى
كده واتعامل كده لانه الكل عارف اني سايبة اهلي وجاية عايشة
هنا لوحدي يعني لو سكت مرة هيفكروني ضعيفة وبعدين انا جاية هنا عشان اتعلم مش عشان اتعاكس
منة اقتنعت بكلام هنا لانه هنا سايبة اخوها وابوها في الصعيد عشان تتعلم وبتروح تزورهم
كل اجازة كملوا طريقهم للشقة اللى هما ساكنين فيها
&________________________________&
نوح بغضب وهو بيرمي الاوراق اللى قدامه بعصبية في وش المهندسين:
ده نعمل بيه ايه ياريت لما تيجوا تشتغلوا تشتغلوا صح لانه المشاريع اللى انتوا مقدمينها
ده كلها بتاعت عيال صغيرة مش قد الشغل متشتغلوش
احنا داخلين على مشروع كبير هندخله ازاي بمشاريعكوا ده عايزين اعدائنا يشمتوا فينا بقا انا نوح الجبالي يتقال عليا مشغل عيال
احد المهندسين:
احنا اسفين يا فندم
نوح بعصبية:
اسفين ده اعمل بيها ايه مفيش قدامنا وقت ولازم المشاريع تكون جاهزة وانت جاي تقولي اسفين
قال كلامه وخرج برة غرفة الاجتماعات وهو متعصب
علي:
على فكرة يا نوح اللي انت عملتوا ده مينفعش كنت اشكرهم على الاقل بدل ما تهينهم
وبعدين دول مش اي مهندسين دول من احسن المهندسين اللى عندنا
نوح بعصبية:
اشكرهم على ايه مقدمينلي مشاريع مليانة اغلاط وانت اكتر واحد عارف المشروع
الجديد مهم بالنسبة ليا قد ايه
على سكت لانه فعلا المشاريع مكنتش مظبوطة ومفيش وقت كافي
&________________________________&
في الصعيد في بيت عبدالله "ابو هنا"
عمران(اخو هنا):
اه يابا الجو انهاردة حر جوي
عبدالله وهو يطبطب على كتف ابنه:
معلش يا بني اتحمل انت عارف اني لو جادر كنت جومت والله
عمران وهو بيبوس ايد والده:
ربنا يخليك لينا وميحرمناش منك وبعدين ازاي تشتغل اصلا وانا موجود
عبدالله:
ربنا يخليك ليا انت واختك وميحرمنيش منكوا واصل
عمران:
ويخليك لينا يا حاج
&&
في بيت عيلة الجبالي في الصعيد "عيلة نوح"
مدحت (اخو نوح الوسطاني):
انت يا حسن الكلب
حسن (اخو مدحت ونوح الصغير):
خييير
مدحت:
مش هتبطل تعاكس في بنات الناس بقا
حسن ببرائة مصطنعة:
هو انا عملت حاجة
مدحت بعصبية:
اذا كان انا شوفتك بعيني وانت بتعاكس الخدامة
حسن بلامبالاة:
طيب اعمل ايه يعني
مدحت بعصبية:
متهببش حاجة بس انا عارف ازاي هتتعدل
قلع حذام البنطلون وراح عشان يضرب حسن بيه ما هو كل مرة مدحت بيشوفه
بيعاكس بنت بيديله علقة بالحزام بس حسن برده مش بيحرم😂😂
&&
نتعرف على الشخصيات
(هنا عبدالله: بطلتنا بنوتة جميلة بعيون زرقا تشبه البحر وكمان عنيها واسعة زي القطة بشرتها
بيضة زي الاطفال كده وشعرها اسود وبيوصل لنص ظهرها
بس هي محجبة مجنونة ومتهورة بس في نفس الوقت في المواقف الجد بتبقا عاقلة وجدعة هي عندها 21 سنة في اخر سنة
ليها في الجامعة اصلها في كلية تمريض عايشة في شقة
مشتركة مع منة قريبة من جامعتها في القاهرة الشقة عبارة عن غرفة وحمام ومطبخ كل واحدة ليها سريرها ودولابها سايبة
باباها واخوها مامتها متوفية لما كان هنا عندها عشر سنين و هي بتنزلهم الصعيد في الاجازات)
(عمران عبدالله: شاب بملامح شرقية عنده 23 سنة بيحب اخته جدا بيعتبرها بنته
الصغيرة وبيخاف عليها رغم انه مش مكمل تعليمه الا انه
بيعرف يقرأ ويكتب لانه خلص الثانوية وبدأ يشتغل عشان يقدر يخلي
اخته تكمل تعليم زي ما وعدها وكمان يعالج والده لانه عنده الضغط والسكر عنده الكرامة وعزة النفس قبل اي حاجة
وهو بالفعل اخ وابن مثالي)
(عبدالله: ابو عمران وهنا راجل كبير في السن عنده 56 سنة بيحب عياله جدا وبيخاف
عليهم رباهم كويس وفعلا عرف يربيهم وهو اب مثالي جدا
رغم انه حالتهم المادية مش كويسة اوي الا انه علم ولاده ازاي يرضوا باللى ربنا كتبه)
( نوح الجبالي: بطلنا وسيم عيون سودة وشعر اسود كثيف وعنده عضلات وضخم
ده غير انه مهندس كبير ومشهور جدا في مصر بإختصار فتا احلام اي
بنت عنده 27 سنة شخصية نرجسية متكبر ومتعالي وكمان متملك و خبيث في بعض
الاحيان وقبل ما انسى هو اكبر واحد في اخواته)
(مدحت الجبالي: الاخ الوسطاني لنوح عنده 25 سنة شخصية عاقلة ومتفهمة عكس نوح ولكنه عصبي ولما يتعصب عينك ما تشوف الا النور)
(حسن الجبالي: شاب عنده 22 سنة مستهتر جدا عكس اخواته بتاع بنات ومش حاطط
في دماغه فكرة المسؤوليه ده خالص وكمان مدمن مخدرات
بس للأسف مفيش حد من العيلة عارف ده اهل البلد في الصعيد
عارفين بس ميقدروش يتكلوا اصل هو متدلع يعني لانه اصغر
واحد واخر العنقود يعني جده وابوه مدلعينوا رغم انه نوح ومدحت معارضين انه
يكون مدلع كده ولازم يبقى مسؤول زيهم لانه كبر خلاص)
الجزء الثاني
بقلم مريم أيمن💙👑
هنا لمنه:
يلا سلام بقا يا منمن انت عارفة المواصلات والزحمة و هبقى اكلمك كل يوم تمام ولو مردتش اعرفي انه الشبكة وحشة
منة:
تمام يا حبيبتي في رعاية الله لما توصلي اتصلي بيا وطمنيني
هنا وهي بتحضنها:
ماشي يا حبيبتي عايزة حاجة انت
منة:
لا عايزة سلامتك بس
ودعت منه صاحبتها هنا لانها رايحة الصعيد
لم تكن تعلم انه بدءا من هذا اليوم بل هذه اللحظة ستتغير حياتها وتنقلب رأسا على عقب
&__________________________________&
على وهو بيكلم نوح اللى كان بيراجع بعض الاوراق:
نوح انت هتروح الصعيد انهاردة
نوح:
اه ما انا بروح كل اسبوع انت عارف ليه فيه حاجة
على:
لا بس افتكرتك مش هتروح عشان المشروع الجديد يعني
نوح:
لا هروح ولما اجي بكرة الاقي تصاميم عدلة وتنفع للمشروع اللى احنا هنفذه
على:
تمام
نوح وهو بيبص على ساعته:
يلا سلام هتحرك انا عشان متأخرش
علي:
سلام
ومشي نوح خرج برة الشركة وركب العربية بتاعته بس طبعا ليه سواق خاص وانطلقوا متجهين للصعيد
&________________________________&
بعد ساعات وجهد اخيرا وصلت هنا للصعيد وتحديدا البلد اللى هي عايشة فيها كانت شايلة الشنطة بتاعتها اللى فيها هدومها بأيد والايد التانية ماسكة شنطتها بتاعت الكتف
كان في عربية وراها والعربية عايزة تعدي وللأسف هنا متقدرش تبعد شوية لانه ممكن تقع في قنوات الماية اللى جنب الطريق السواق في البداية فكرها هتبعد بس لما لقاها مبعدتش اداها كلاكس وبرده مبعدتش عمل كلاكس تاني راحت بصت وراها بغضب والسواق من جوة العربية شاورلها بأيده انها تبعد هزت راسها بمعنى لا وقف السواق العربية ونوح رفع راسه من التليفون وسأل السواق في ايه
السواق:
نوح بيه ده واحدة ماشية في الطريق والطريق ضيق جدا ممكن العربية تغرز في الطين
نوح:
اتصرف اعمل حاجة
السواق:
حاضر
ونزل فعلا وكلمها
السواق:
يا مدام
هنا بعصبية:
انسة مش مدام خير
السواق:
حضرتك سادة علينا الطريق ومش عارفين نمشي ده غير يعني انه مشي حضرتك بطئ جدا والبيه مستعجل
هنا بعصبية:
وانا اهبب ايه يعني اقع انا في الطين عشان البيه بتاعك يعدي يعني ولا ايه لو مش عاجبكوا كنتوا امشوا من طريق تاني
السواق بنرفزة:
مفيش طريق غير ده بيودي للمنطقة ده من الصعيد
هنا كانت لسة هتتكلم ولكن جه ظل كبير ناحيتها وحجب ضوء الشمس عنها ولا اراديا توسع بؤبؤ عينيها لانه في ظل رفعت عينها لقت راجل وسيم ضخم بيبصلها بغموض
نوح بيبص في عيون هنا وحاسس انه شايف البحر قدامه وخدودها اللي بقت حمرة من الشمس اداها هيئة طفولية جذابة
هنا لاحظت انه الشخص ده باصص ليها اوي فدايقت جدا وقالت
هنا بحدة:
الطريق كمان شوية هيوسع وهتقدروا تمشوا
السواق كان لسة هيتكلم وقفه نوح بأشارة من ايده وقالو
نوح:
الطريق هيبدأ يوسع شوية سيبها
السواق وافق ورجعوا للعربية وهنا كملت مشي وتعمدت انها تبطأ من مشيها عشان تغيظهم نوح فهم حركتها ولكنه قرر ميعصبش نفسه
&____________________________________&
بعد فترة مش طويلة وصلت اخيرا قدام باب بيتها
خبطت بمرح وسعادة زي عادتها ولكن محدش فتح خبطت تاني ففتح باباها فأستغربت لانه في العادة اخوها هو اللى بيفتحلها ده غير انه باباها مضحكش زي عادته لما بيشوفها
فسألت هي بمرح:
ايه يا حاج عبدالله امال فين الحضن بتاعي
حاول باباها انه يبتسم لكن معرفش كان تعبان وباين انه في حاجة حاصلة دخلت هنا شنطتها واخدت باباها وسألته
هنا بقلق:
في ايه يا بابا انت تعبان في حاجة وجعاك ولا ايه وبحثت بعينيها في ارجاء المنزل واكملت وبعدين فين عموري
عبدالله حط ايده على راسه *بمعنى مصيبة* وقال لهنا
عبدالله:
اخوكي يا هنا
هنا بقلق:
ماله عمران يا بابا
عبدالله بدأ صوته يبقى مخنوق لانه هيعيط بحزن على ابنه
عمران ببحة:
اخوكي قتل حفيد الجبالي يا هنا
لطمت هنا على وشها بصدمة وقالت
هنا بصدمة:
يالهوي انت بتقول ايه بس يا بابا
&____________________________________&
وصل نوح للبيت بتاعهم اللى في الصعيد
البيت كالتالي كبير وضخم على الطراز الصعيدي بيتكون من طابقين مش فيلا لا دوار وحواليه بشكل دائري مساحة خضرا وحاطة بسور
استقبله باباه واخوه مدحت دخل وقعد بعد ما سلموا على بعض وبعدين قال
نوح:
امال حسن فين
مدحت بقلق:
منعرفش حاجة عنه من امبارح يا نوح
نوح:
ازاي هو مختفي من امتى
مدحت:
من امبارح بليل بعد العشا كده
نوح:
يعني قبل ما تكلمني انت وتسألني لو هو عندي
مدحت:
اه منعرفش اختفى فين
نوح:
هنلاقيه يعني هيروح فين
مدحت:
ده اول مرة يختفي كده وميديناش خبر وكمان تلفونه خارج نطاق التغطيه ده اللى مقلقني