رواية جرح غائر
الفصل الاخيرالخاتمه
في بيت اخو ندي
انتي ياهانم انتي مفكره نفسك ايه كل ما اجبلك عريس ترفضي شايفه نفسك علي ايه يعني
ندي بدموع وعصبيه ....انا مش شايفه نفسي ولا حاجه يالبني ..بس مش من العدل ان ماما وبابا الله يرحمهم يتعبو عشان يعلموني واكون دكتوره واشرفهم ..وفي الاخر كل شويه تجبيلي عريس يا اما جاهل يا اما بلطجي ..حرام اوي كده يعني
لبني باستفزاز ..لا ياحبيبتي مش حرام ولا حاجه ..بس اديكي شايفه مش من كتر العرسان اللي بتجيلك يعني ..سكتت شويه لما شافت وش ندي بان عليه الوجع من كلامها وكملت بسخريه ..وبعدين الراجل بيجي للبنت الحلوه لكن انتي يعني زي مانتي شايفه كده مفتقده الموضوع ده
ندي كانت بتبصلها بزهول وصدمه من جبروت وقوه اللي واقفه قدامها وبتجرح انسانه زيها بكل دم بارد
مقدرتش غير تنطق بقهر ووجع ..حسبي الله ونعمه الوكيل فيكي يالبني
لبني عصبيه الدنيا اتملكت منها ساعتها قربت منها ومسكت ايديها بعصبيه واتكلمت بقرف
..بقولك ايه انتي بت قليله الادب ولما يجي اخوكي ليا كلام معاه ..ماهو انا مش متجوزه اخوكي بيكي ..دي حاجه بقت تقرف والله
ندي شدت ايديها منها وجرت علي اوضتها عشان تطلع كل اللي جواها براحتها من غير شماته اللي قدامها
قفلت عليها الاوضه وجرت علي السرير وكتمت نفسها بالمخده وانهارت من العياط
كانت دموعها وقهرها دموع يتم وكسره واحتياج
كانت بتعيط علي امها وابوها اللي كان وجودهم بس امان ودفا وسند
كانت بتفكر لو كانوا موجودين ماكنش مرات اخوها اتمتعت بكسرتها وعذابها ومعايرتها في كل وقت بانها قاعده معاهم وانها مش حلوه وحاجات كتير تكسر وتوجع وتعدم الثقه في النفس
قاطع انهيارها تلفونها اللي رن قامت بصت علي الرقم لقت نور اللي بترن عليها حاولت تهدي نفسها عشان صوتها يبان طبيعي لكن طلع فيه بحه غصب عنها ..الو
نور بمشاكسه ..ايه يابت انتي ..لسه نايمه ولا بتاكلي ..ولابتذاكري يادحيحه كالعاده
ندي ابتسمت رغم وجعها واتكلمت بهدوء
..ايه يا هانم انتي هتحسديني ولا ايه ..من بعض ماعندكم يادكتور
نور حست بيها رغم صوتها الهادي اتكلمت بجديه ..مالك ياندي ..حاسه ان في حاجه مضيقاك
ندي اتخنقت بالدموع ...مفيش يانور انا كويسه
نور بتصميم ..لا في حاجه وهتحكيلي ..بس انزلي نتقابل في الكليه ونتكلم
ندي باستسلام ...ماشي يانور ..هغير وانزل علي طول
بعد ساعتين كانت ندي في الكليه وقاعده قدام نور وبتحكيلها كل اللي حصل
نور كانت بتسمعها بحزن وخنقه ردت بضيق بعد ماندي خلصت كلامها ..هتفضلي لغايه امتي تسكتي ومتحكيش لاخوكي علي اللي مراته بتعمله فيكي ياندي ..هي كده زودتها اوي معاكي ومش من حقها علي فكره
ندي بدموع ..اقوله ايه يانور واعمل مشاكل وانا مليش مكان غير بيتهم ..وبعدين هي معاها حق انا مش حلوه فعلا
نور بعصبيه ..ممكن تخرسي خالص...انتي ازاي تقولي علي نفسك كده ..كل واحده فينا ليها جمالها ياندي ..كل البنات حلوين ..وانتي اولهم ..اخر مره اشوفك بالضعف ده فاهمه ولا لا
ندي ابتسمت ليها بضعف ولسه هترد سمعت صوت الدكتور بتاعهم في الكليه
صباح الخير يابنات ..بعد اذنك يا انسه ندي حابب اتكلم معاكي كلمتين بس
نور وندي بصوله بصدمه نور كانت هتقوم بس ندي بصت ليها برجاء انها تقعد ..ردت عليه بصدمه وتوتر ...صباح النور يادكتور ..بس نور اختي حضرتك ممكن تقول قدامها عايزني في ايه
دكتور كريم وهو في 35 من عمره اتكلم برزانه وهدوء ..انسه ندي انا هكون صريح معاكي واتكلم علي طول انا معجب بيكي من اول السنه ..بس صبرت لغايه ما اشوف تصرفاتك واسال زمايلك عليكي والكل كان كلامه عليكي ان مفيش في اخلاقك واحترامك وانا مش عايز اكتر من كده عشان اسلمك اسمي وتكوني زوجتي لو حصل نصيب ..فحابب اعرف رقم والدك عشان احدد معاد معاه الا لو فيه مانع منك علي شخصي
ندي كانت بتبصله بزهول وعدم تصديق بصت لنور لقت الابتسامه والفرحه باينه في عنيها بوضوح
وجهت نظراتها ليه تاني كان مبتسم ومستني ردها
اخيرا لقت صوت تتكلم بيه نطقت بتوتر وخجل ...حضرتك قمه في الاحترام ومفيش مني اعتراض علي شخصك او حاجه ..بس انا اتفاجات شويه ..وبالنسبه لبابا الله يرحمه متوفي انا عايشه مع اخويا بعد وفاه ماما وبابا
كريم بحزن ..ربنا يرحمهم يارب .خلاص رقم اخوكي وانا اتواصل معاه
ندي ...اخويا وليد رقمه .......
كريم ابتسم بهدوء بعد ماخد الرقم واستاذن منهم ومشي
بعدها ندي بصت لاثره بتوهان كلمت نور ...هو اللي حصل ده حقيقي
نور بضحك عليها ..اه طبعا ياقمر طلع عندك معجبين ومحبين اهو ياخبيثه انتي ..وبعدين هو يطول اصلا ...انتي مفيش منك ياندود
ندي بحب ...انا بحبك اوي يانور ..انتي احسن صاحبه في الدنيا علي طول تديني ثقه في نفسي وامل في الدنيا ..وبعدين انا بس مستغربه ان مرات اخويا وكلامها ليا انهارده ..وواحد زي دكتور كريم في ادبه واخلاقه ووسامته يجيلي في نفس اليوم ويقولي انو عايز يتجوزني...كان فيه حكمه من الموضوع بس مش فهماها
نور بهدوء وتعقل ..الحكمه واضحه ياندي ..وهي ان مفيش حاجه اسمها حلوه ووحشه..في ربنا عايز ايه .. وقدرك ونصيبك هيكون مع مين ..وبالنسبه لدكتور كريم فانا حاسه انه هيكون العوض للي شوفتيه من اخوكي ومرات اخوكي ..فهمتيني
ندي هزت دماغها بالموافقه علي كلامها وعلي وشها احلي ابتسامه امل للمستقبل
في بيت نور كانت طالعه علي السلم لقت اللي بيشدها من ايديها وبيخدها في حضنه بصت عليه وهي بتترعش ومرعوبه
بس اتنهدت براحه وحست بامان لما لقته عاصم حاولت تبعد نفسها عن حضنه بصعوبه واتكلمت بعصبيه لما شافت ابتسامته ..ممكن اعرف انت بتضحك علي ايه ..وبعدين هو حضرتك صغير ولامراهق عشان تشدني وتحضني كده ..افرض حد شافنا هيكون شكلنا ايه
عاصم بنفس الابتسامه وببرود ..والله انا معملتش حاجه غلط واحد وبيحضن مراته ايه المشكله في كده ..وبعدين انتي اللي بتتهربي مني ومش مدياني فرصه اشوفك
نور بضيق ...هتهرب منك ليه يعني ..وبعدين عن اذنك بقا عايزه اطلع عشان ارتاح شويه
عاصم بجديه مفاجاه ...مش عايزه تسامحيني يانور
نور اتنهدت بتعب واتكلمت بصدق ...عايزه اسامحك ياعاصم والله ..بس خايفه
عاصم بلهفه ...خايفه من ايه ياحبيبتي
نور بابتسامه حزينه ..خايفه منك ..خايفه تجرحني تاني ..خايفه توجعني وتكدب عليا تاني ..خايفه متكونش فعلا بتحبني وساعتها جرحي منك هيكون بموتي لاني بجد تعبت من كل حاجه ..ومعتش عندي طاقه اني استحمل
عاصم بصدق ..اديني فرصه واحده بس يانور ..وانا هثبتلك بكل نفس فيا اني بحبك ...ثقي فيا مره واحده بس ..وانا هثبتلك اني اد الثقه دي صدقيني
نور اتنهدت باستسلام ومسكت ايديه بحب واللي استقبلها وباسها بكل لهفه وفرحه انها سامحته واديتوا فرصه تانيه
بعد شهرين كانت خطوبه ندي وكريم
ندي كانت فرحانه بمعامله كريم اللينه ليها والحب والاحترام اللي باين في عنيه في كل تصرفاته معاها
كانت حفله بسيطه في مكان بسيط ولكنه راقي بيضم عدد بسيط من الناس وهما الاقرب والاهم للعروسين
ندي وكريم كانوا قاعدين بيستقبلوا التهاني والمباركه بخطوبتهم
وفي مكان تاني بتبص عليهم بفرحه وحب نور اللي كانت قاعده جنب عاصم وماسكه ايديه بحب
همست ليه بفرحه ..انا مبسوطه اوي ياعاصم عشان ندي فرحانه وكريم شكله بيحبها
..وكملت بغيظ لما لمحت نظرات لبني الغيرانه ...بس شوف مرات اخوها بتبصلها ازاي بجد مقرفه
عاصم ضحك عليها ورد بهدوء ..ندي تستاهل كل خير وكريم انسان محترم وملكيش دعوه انتي بمرات اخوها احسن تيجي تقتلنا واحنا قاعدين وهي شبه دركولا كده
نور ضحكت علي كلامه وردت ..طب ممكن تقوم تسلم علي كريم وانا اقف جنب ندي شويه عشان متزعلش مني
عاصم مسك ايدها بحب وقام سلم علي كريم وباركله ونور حضنت ندي وقعدوا يتكلموا بصوت هامس لبعض ويضحكوا
اجه عليهم امجد وملك اللي وجودهم صدمهم وامجد سلم علي كريم وحضنه جامد وملك سلمت علي ندي بابتسامه ورقه وباركتلها
بس صدمتهم زادت لما كريم عرف امجد لعاصم ..دكتور عاصم ده دكتور امجد اخويا الكبير ودكتوره ملك مراته
وده دكتور عاصم ومدام نورمراته صاحبه ندي
ايوه طبعا دكتور عاصم زميلي وعارفه ياكريم اهلا دكتور عاصم ..ووجه كلامه لنور اللي بتبصله بابتسامه ...اهلا يامدام
عاصم صدمته زالت واتكلم بهدوء وترحيب ...اهلا بيك يادكتور امجد والف مبروك لكريم وليك اتجوزت قريب اعتقد
امجد بص لملك بحب ومسك ايديها وهي كانت في منهي الخجل من الموقف خاصه وهما كانوا في اجازه بيقضوها سوا ولسه راجعين ومتعرفين علي
ندي دلوقتي بس نظرات امجد ليها طمنتها وخلتها تقف بثقه ..انا ودكتوره ملك متجوزين من شهور وفي بيبي جاي عقبالكم ان شاء الله
عاصم بابتسامه وهدوء ...باذن الله ...الف مبروك ليكوا ربنا يقومها بالسلامه ان شاء الله
عن اذنكوا يلا يانور
ثواني ياعاصم هسلم علي ندي واحصلك
بالفعل سلمت علي ندي اللي كانت مزهوله من الموقف هي كمان ونور استغلت انشغال امجد مع كريم في الكلام وقربت من ملك وسلمت عليها وهمستلها ...مبروك ياملك ..معرفش انك اتجوزتي غير دلوقتي ..فرحتلك اوي والله ..بس اتمني مايكونش في زعل بينا وتكوني مسمحاني من قلبك
ملك ابتسمتلها واتكلمت بهدوء ..الله يبارك فيكي يانور ..واعتقد انك اخدتي بنصحتي واديتي لعاصم فرصه ..علي العموم يانور انا مسمحاكي لانه في الاخر نصيب ..ولو مكانش ده حصل مكونتش قبلت احسن راجل في الدنيا واتجوزته ولا ايه
نور ابتسمت ليها بفرحه انها سامحتها وهزت دماغها بموافقه علي كلامها ونزلت عشان تروح لعاصم اللي تقريبا خرج من القاعه لانها معدتش شيفاه
في بيت عاصم ونور دخلوا وقفلوا الباب بهدوء عاصم قعد علي الكنبه بارهاق سمع سؤال نور المفاجئ ..كنت عارف ان ملك اتجوزت ياعاصم
عاصم بهدوء ..اه عرفت من زمايلنا في المستشفي ..بس مكونتش اعرف ان جوزها يبقي اخو كريم فاستغربت من حضورهم الحفله
نور اتنهدت بارتياح انه بيتكلم عادي ومش زعلان راحت قعدت جنبه ومسكت ايديه باستها بحب ..انا بحبك اوي ياعاصم
عاصم بزعل ...بقالك شهرين معايا يانور مسمعتش الكلمه دي ولا سامحه اني انام في اوضتك حتي ..لما انتي مش قادره تسامحيني من جواك رجعتيلي ليه
نور بحزن حطت دماغها علي رجله واتكلمت بخنقه ..مسمحاك ياعاصم من جوايا علي فكره ..بس مقدرتش اخليك تلمسني طول الفتره دي لاني مش قادره انسي ليله فرحي كانت ازاي وانت عملت فيا ايه انا اسفه
عاصم رفع دماغها من علي رجله ومسك وشها بين ايديه واتكلم بحب ...انا اللي اسف يانور ..بس كان غصب عني ..انا كنت تايه مش قادر احدد
مشاعري من ناحيتك ايه ...بس دلوقتي مفيش في قلبي غيرك صدقيني ..وخلينا نبدا سوا وننسي اللي فات
نور ابتسمت بحب وغمضت عنيها مستنياه يبدا هو فهم مشاعرها وانها عايزاه
يقرب وده اللي كان مستنيه قرب منها وباسها بحب وهدوء وحنان بعد شويه بعد عنها وهمس ...وحشتيني
نور فتحت عنيها واتكلمت بتقطع ..وانت كمان
عاصم باشتياق ...متاكده يانور انك عايزاني زي ما انا عايزك
نور بخجل هزت دماغها بموافقه لقت نفسها مرفوعه في حضنه في ثواني ورايح ناحيه
اوضتهم دخل وقفل الباب وراهم علي وعد منه بحياه بينهم كلها صدق وحب وسعاده وبس
تمت بحمد الله