رواية جراح القلب الجزء الثاني2 الفصل الثالث3 بقلم شيمو الخطيب

💔جراح القلب  الجزء الثانى💔

بقلم شيمو الخطيب

طبعا الكل راح لهنا واحمد وبارك ليهم وقضوا وقت حلو جدا مع بعض، وفجأه الباب خبط وكان وليد

مي فتحت الباب

وليد:السلام عليكم، ممكن تنادي استاذ احمد لو سمحتي

مؤمن : مين يامي، اللي بيخبط

(وزق مي ورا ضهره)، خير يا استاذ في حاجه

وليد :انا كنت عايز استاذ احمد، اقدمله ده (بوكيه ورد) اعتذار مني ليه

مؤمن باستغراب:معلش يعني، ايه المناسبه، واعتذار عن ايه

احمد :خير يا مؤمن فيه ايه (وبص لوليد)،، وليد، اهلا وسهلا اتفضل، وبص للبنات يدخلوا جوه وفعلا دخلوا كلهم،

وليد :لا مالوش لازمه، يا استاذ احمد، كفايه القلق اللي سببته لحضرتك امبارح، وبالصدفه   النهارده، عرفت من البواب انكو عرسان جداد والزفاف كان امبارح، بجد انا بعتذر جدا عن اللي حصل، بس غصب عني

مؤمن وفارس بيبصوا لبعض ومش فاهمين حاجه خالص

مؤمن :متفهمونا يابشر، ايه اللي حصل امبارح، وليه كل الاعتذارات دي

احمد:مفيش فايده، الفضول هيموتك،

مؤمن :ده اكيد، هههه، أنجز بقه وقول

احمد حكالهم اللي حصل امبارح، ورحبوا كلهم بوليد، اللي قعد شويه واخد واجبه واستأذن ومشي

وقبل مالعيله تمشي، ناديه طلبت تستفرد بهنا شويه

ناديه، :بعد اذنكو يا جماعه، هتكلم مع هنا كلمتين، ونمشي على طول

احمد :اتفضلي ياخالتي براحتك طبعا

مؤمن :ناديه، هتقوليلها ايه، ها، قوليلي وانا مش هقول لحد، أو اقولك، توعديني انك بعد منرجع البيت تقوليلي قولتلها ايه ههههههه

ام احمد :وانت مالك، يابني، حرام عليك فضولك هيزعل الناس منك في يوم من الايام

ناديه، :لا يا ام احمد متقوليش كده،هههههه، مؤمن لو مبقاش كده بحس انه زعلان او فيه   حاجه مدايقاه، احنا اتعودنا عليه كده، وحابينه قوي

مؤمن :وربنا انتي اللي في العيله دي يادودي، وعشان ذوقك ده. خلاص ياستي، مش عايز اعرف حاجه واتكلمي مع هنا براحتك،

ناديه، :ههههه ماشي، بعد اذنكو

مؤمن :ناديييه، متنسيش انتي وعدتيني هتقوليلي،

احمد حدفه بمخده صغيره على الكرسي، :متخرس بقه يا اخي، انت ايه

وكلهم ضحكوا حتى ناديه وهنا،

ناديه دخلت مع هنا الاوضه 

ناديه :طمنيني عليكي ياقلب امك، عامله ايه

هنا بكسوف، :فرحانه قوي يا ماما، احمد حنين عليا قوي، ونفسه يعمل كل حاجه انا بحبها

ناديه :ربنا يسعدكوا يا حبيبتي، المهم يا هنا، انا عايزاكي يا حبيبتي تبقى زوجه صالحه، بكل    المعاني انا عارفه انك طول عمرك مطيعه، بس طاعتك لجوزك تختلف، اوعي في يوم تكسري كلمه هو قالهالك وتعندي معاه، اوعي تنيميه زعلان، وانتي عارفه ان الملايكه بتلعن الزوجه اللي زوجها بيغضب عليها، اوعي في يوم تسيبي البيت غضبانه منه او متخانقه معاه، دايما خليكي انتي ملاذه الوحيد، انتي الحضن اللي بيحتويه، انتي القلب الحنين اللي بيطبطب عليه، بلاش في يوم يبقى جاي مخنوق،    تقعدي تزني عليه وتسأليه مالك، استنى لما يهدأ وهو اللي هيتكلم لوحده، الراجل يا بنتي مبيحبش الزن الكتير، لازم تختاري الوقت المناسب اللي تطلبي منه فيه طلب، أو تكلميه في حاجه مهمه، يعني متبدأيش الكلام، وهو مدايق او تعبان، راعي ظروف جوزك يابنتي، واقفي معاه واستحمليه على   الوحشه قبل الحلوه، هنا ياحبيبتي، انا مش عايزه في يوم احمد يجي يشتكي منك، ساعتها هحس اني تعبي في تربيتك ضاع هدر، ربنا يسعدك يا بنتي يارب

هنا :متقلقيش يا أمي، انا فهمت كل اللي انتي قولتيه، وعمري مهزعله ابدا، ربنا يباركلي في عمرك ياماما ويخليكي ليا يارب

وحضنوا بعض وناديه عيطت في حضن بنتها، اللي كلها دقايق وتودعها وتمشي من غيرها

خرجوا، والكل بره كان مستني وفعلا الكل استأذن ومشي،

احمد :(قرب من هنا)، ياااااه انتي مش متخيله، انتي وحشتيني قد ايه، (وحاوطها من وسطها بايديه، وقربها منه قوي)

هنا بتلعب بكسوف في  التيشيرت : وانت كمان وحشتني قوي والله، 

احمد :حيث كده بقه، في موضوع مهم عايز اتكلم معاكي فيه 

هنا : بخوف، خير يا احمد، 

احمد :غمز يعنيه،،، لا الموضوع ده مكانه مش هنا، احنا ندخل ونتكلم في الاوضه، 

هنا : بدلع، احمد، متهزرش بقه، وقعت قلبي 

احمد شال هنا ودخل بيها على الاوضه،،، ، سلامة قلبك يا قلب احمد، 

وعاشوا أجمل وقت مع بعض وقت مليان حب ورومانسيه وحنيه، وحسوا انهم دخلوا   جنة الحب اللي كانو بيحلموا بيها

شيمو الخطيب 

*****************

عند نادر وولاء 

نادر راح لولاء، دخل وسلم على عمته (والدة ولاء) 

نادر :ازيك ياعمتي، وحشاني والله 

_ :انت كمان يا حبيبي وحشتني، اخبار اخويا ايه، ووالدتك، وشغلك ياحبيبي، مش ناوي بقه تشتغل مع ابوك وتسيبك من المهمات دي بقه 

نادر : (فهم ان ولاء اشتكت لوالدتها واتضايق جدا من كده)، عمتي انتي عارفه ان ده شغلي وانا بحبه، وولاء عارفه كده من قبل منتخطب، ايه لازمة الكلام ده، وبعدين اكيد ولاء اللي قلتلك تكلميني 

عمته :لا خالص دي هي كانت مدايقه، وانا سألتها، وبصراحه فضفضت معايا بكلمتين، وبعدين انا مامتها، يعني لو متكلمتش معايا هتتكلم مع مين يا نادر

نادر :ياعمتي طبعا انا مقصدش، بس كل الحكايه، اننا اتكلمنا كتير قوي في الموضوع ده، وهي مش قادره تستوعب مشاعري من ناحيته، ياريت تعقليها بقه، وتخليها تتأقلم على الوضع ده 

ولاء: نادر!!! ايه ده، انت هنا من أمته، انا كنت بصلي ومعرفتش ارد على الموبايل لما اتصلت 

نادر بضيق : لا عادي ولا يهمك، المهم هتيجي معايا لأحمد وهنا، ولا اروح لوحدي 

ولاء باستغراب : مالك يانادر انت مدايق من حاجه 

والدتها: ادخلي بس انتي    يا ولاء غيري هدومك عشان تروحي لهنا يا حبيبتي، ومتتاخروش، راعو برده انهم عرسان 

ولاء بصت ليهم باستغراب ودخلت فعلا لبست وخرجت ونادر سبقها وقعد في العربيه مخنوق، وهي ركبت وساكته خالص 

نادر ماشي بسرعه ومش بيبصلها ولا بيكلمها، 

ولاء :هو في ايه يا نادر، انت مدايق مني في حاجه 

نادر :وهو انتي شايفه نفسك عملتي حاجه تدايق، 

ولاء: لا طبعا، وعشان كده مستغربه رد فعلك بصراحه، هو في ايه بجد

نادر فرمل مره واحده وولاء اتخضت جدا 

نادر :انا  امبارح اتكلمت معاكي فموضوع شغلي، واتفقنا انك تأقلمي نفسك على وضعي، تقدري تقوليلي ليه اشتكيتي لعمتي، بالرغم اني قولتلك مدخليش حد بينا ولا تحاولي يبقى جواكي حاجه تقوليها لحد غيري

ولاء:يعني كل اللي مدايقك اني فضفضت مع ماما شويه، دي امي مش حد يا حضرة الظابط 

نادر بصوت عالي :بقولك ايه ياولاء، متغلطنيش في الكلام، مامتك على عيني وراسي، لكن حياتي وشغلي محبش حد يتكلم فيهم، لأنهم محسومين   بالنسبالي، لو امي نفسها اتكلمت انا هدايق، فياريت تستوعبي كلامي ومتبقيش غبيه، ولاخر مره هقولك، اي حاجه مدايقه مني فيها، ياريت تبلغيني انا بيها مش اي حد تاني، 

ولاء بدموع: انت بتزعقلي يا نادر، دي اول مره تعملها، وكل ده ليه، عشان مخنوقه من بعدك عني، عشان بقلق عليك وبحبك. عايزني اقدر ظروفك، لكن   انت تقدر احساسي لأ، خلاص يا حضرة الظابط، انا هقدر ظروفك، واوعدك اني مش هخاف عليك ولا هقلق عليك تاني، اظن ده يريحك، (وربعت ايديها وبصت قدامها) 

نادر بصلها بنفاذ صبر وشغل العربيه وطلع بيها بسرعه وضيق 

شيمو الخطيب 

***************

عند احمد وهنا 

احمد واخد هنا في حضنه وبيمسح بإيده على شعرها 

احمد :هنا يا حبيبتي، انا نسيت اقولك، نادر كلمني وقالي ان هو وولاء شويه وهيجو، وقالي مش هنقعد كتير لانه عازم ولاء بره على العشا ويقضوا سهره جميله، ايه رايك لو خرجنا معاهم، 

هنا : ايه!!! نخرج!!! بجد، من تاني يوم كده على طول، انا اعرف ان العريس والعروسه مبيخرجوش الا بعد اسبوع تقريبا، ههههه 

احمد : وايه اللي يحبسنا اسبوع، احنا نخرج معاهم النهارده، وانا كلمت فارس يحجزلنا لألمانيا زي موعدتك، ياقلب احمد 

هنا :بجد!!! لا يا احمد بالله عليك، انا مش عايزه اروح لا ألمانيا ولا غيره ممكن اسكندريه، شرم، خلينا في بلدنا وبلاش تكلفه عاليه، 

احمد: لو على التكلفه، ولا يهمك ياقلب احمد، انا معايا قرشين صغيرين كده ، مش خساره فيكي،ههههه، انا بحب اشوفك مبسوطه ياهنا، ضحكتك وسعادتك عندي بالدنيا كلها

هنا: حضنت احمد،،، ربنا ميحرمني منك ابدا ياحبيبي، بس انا بصراحه عندي مشكله، اني   مقدرش احس اني في دوله وماما في دولة تانيه خالص، احمد عشان خاطري، بلاش تبعد المسافات بيني وبين ماما، وخلينا نكتفي اننا نروح اسكندريه، 

احمد : خلاص ياحبيبتي، اللي تؤمري بيه،اعتبريه عُلم وينفذ فورا، (وقرب منها وباسها) اللي انتي عايزاه ياقلب احمد انا هعمله 

هنا :حبيبي يا احمد، ربنا ميحرمنيش منك ابدا، وباسته في خده وقامت تاخد شاور وتغير هدومها وتستعد لاستقبال نادر وولاء 

احمد، ابتسم لحب عمره، وحس انه وصل بمنتهى العشق مع حبيبته لدرجة انه مش   عايزها تغيب عن عينه لحظه واحده،،، خرج الحمام الخارجي واخد دش، وخرج 

وكان الباب بيخبط، عرف انه نادر 

احمد : يا اهلا بحضرة الظابط المحترم، نورتونا والله، اتفضلوا 

نادر داخل بيحاول يبين انه كويس، لكن ولاء داخله مدايقه جدا 

احمد : هو ايه ده أن شاء الله، مالكو، هو انتو جايين غصب عنكو ولا ايه، هههه،  متفك ياض منك ليها، 

نادر : احنا تمام يا احمد والله، وبعدين غصب عننا ايه بس، احنا جينا بكامل إرادتنا، هههههه 

احمد : مهو واضح فعلا، (وبص لولاء)، ايه يا ولاء مالك، هو حضرة الظابط مزعلك ولا ايه 

ولاء: لأ يا احمد مفيش حاجه، هي هنا فين 

احمد : بتغير هدومها وجايه حالا، انا هدخل استعجلها، وسابهم ودخل ينادي على هنا 

نادر : ممكن تفكيها شويه لحد مننزل من هِنا، وبعدين نبقى نتكلم 

ولاء: انا مش هتكلم في حاجه تاني خلاص، لحد كده وكفايه، اعتبر الموضوع انتهى 

نادر وقف :موضوع ايه اللي انتهى يا ولاء 

دخل احمد وهنا عليهم 

هنا : السلام عليكم، ازيك يا حضرة الظابط (وطبعا من غير سلام بالايد) 

ازيك يا لوءه، وحشتيني من امبارح والله، هههههه

نادر، : الله يسلمك ياهنا، والف مليون مبروك ليكو 

هنا : الله يبارك فيك يا نادر عقبالكو، بقه خلينا نفرح فيكو 

ولاء: حضنت هنا،، مبروك يا هنون، 

هنا :مالك يابت، زعلانه كده ليه، عملت فيها ايه يانادر 

احمد : (حس انهم مش حابين يتكلمو، ودي طبعا حريه شخصيه وهو بيحترمها    جدا) هنا حبيبتي ياريت تقومي تعمليلنا حاجه نشربها وهما هيفكو لوحدهم،

هنا :عيوني حاضر، ومسكت ايد ولاء وشدتها معاها وراحو المطبخ 

احمد : ها يا حضرة الظابط، عامل ايه في حياتك، وناوي على ايه، 

نادر : والله يا احمد متلخبط، انا كنت قولتلك  احتمال اتجوز بعد شهر، وكلمت جوز عمتي ووافق طبعا، لكن للأسف، مدير الجهاز كلمني، وقالي ان فيه مهمه قريب ولسه متحددش معادها، مش عارف يا احمد، اعمل ايه، بجد كلام مدير الجهاز ده موترني ومعصبني قوي، ومخلي تفكيري مشلول 

احمد : طيب متحاول تقعد مع مدير الجهاز وتفهمه موقفك، بحيث لو المهمه دي قريب، تروحها ولما ترجع بالسلامه تتجوز على طول، ولو قدامها شويه، انا رأيي خير البر عاجله واتجوز حتى لو في خلال أسبوع، ايه رايك 

نادر،: اسبوع، ده قليل قوي وممكن اهل ولاء ميوفقوش ولسه الشقه مجهزتش وحاجات كتيره كده، مش عارف هقدر اخلصها ولا لأ 

احمد : انت معقد ليه كده يابني، انا وهنا اتجوزنا في أقل من كده، وكلكو كنتو معانا، وعدت على خير.،الجواز ده شرع ربنا، يعني ربنا دايما بييسر كل   الأمور اللي بتؤدي ليه يانادر، وصدقني لو ليك نصيب هتتحوز بعد يومين، بس انت أنوي وسيب الباقي على ربنا ثم علينا، وانا اوعدك أن انا ومؤمن وفارس مش هنسيبك ابدا، والواد علاء جدع برده وهيسد، يعني متعقدهاش، وشوف انت ظروفك وبلغني 

نادر، : طيب انت قلتلي انك مسافر تقضي شهر العسل في ألمانيا، هتعطل نفسك عشاني، 

احمد : اولا احنا غيرنا الخطه وخليناها اسكندريه، ثانيا، انا أاجل اي حاجه عشانك يانادر، كفايه وقفتك معايا قبل كده، اللي عمري بجد مهقدر انساها، وبعدين بطل كلام كتير، وانوي وربك هيسهلها، السفر ممكن يتعوض في اي وقت، لكن فرحتي بصاحب جدع زيك هي اللي مش هتتعوض ابدا 

هنا وولاء دخلوا عليهم بعصير وكيك، وقدموه، 

هنا: ايه ياحضرة الظابط هي البت ولاء مالها، شكلها زعلان وبقالي ساعه عايزه اقررها مش راضيه تقر وتعترف، فقر انت واعترف احسن انا هموت واعرف مالكو، هههههه 

نادر :شكلك متأثره بمؤمن قوي ياهنا، والفضول تاعبكو انتو الاتنين، ههههههه

هنا :لا مؤمن ده مالوش زي،ههههههه، انا بس عايزه اطمن عليها، لأن فعلا شكلها مدايق، وبعدين احمد وعدني اننا هنخرج مع بعض النهارده، ايه رايكو 

ولاء: لا معلش ياهنا، انتو اخرجوا براحتكو، لكن انا تعبانه بجد ومزاجي مش حلو، ومش    عايزه اتقل عليكو في أول خروجه واكسر فرحتكو، بجد مش هسامح نفسي 

هنا : وليه متقوليش اننا هنخرجك من حالة الكآبه اللي انتي فيها دي، ونفرفشك كمان، وبعدين يا لوءه انا نفسي كلنا نبقى مع بعض، بليز بقه يا رخمه وافقي 

احمد :على فكره يا ولاء، دي فكرة نادر، هو اللي قال انه هيقعد معانا شويه، وبعدين هياخدك يعشيكي بره، بس احنا رخمين، وهنيجي معاكو، غلاسه بقه 

ههههههه

ولاء بصت لنادر ومستغربه، :: خلاص يا جماعه اللي تشوفوه 

احمد وهنا قامو يغيروا هدومهم، 

احمد : هنا حاولي تتأخري شويه، بس مش كتير قوي يعني هههههه 

هنا : ليه يا احمد، هو نادر قالك حاجه 

اصلي بحاول اعرف من ولاء مالها ومش راضيه تتكلم 

احمد : انا حسيت ان الامور متوتره بينهم، وعشان كده قصدت اقول ان نادر هو اللي مظبط الخروج من الاول، يمكن ولاء قلبها يحن، وحبيت نديهم فرصه يتكلموا براحتهم، وعايزك ياهنا بعد كده، متحاوليش تضغطي عليها انها تقولك حاجه، سيبيها براحتها وهي لو حابه تقول هتقول، نادر من النوع اللي بيحب مشاكله هو ومراته، هما بس اللي يحلوها ومحدش يعرف بيها، وانا بحترم ده جدا، لاني انا كمان كده، فأتمنى تكوني كده انتي كمان ياهنا 

هنا، : حضنته، ربنا ميجيب بينا مشاكل ابدا ياحبيبي 

احمد : طب بقولك ايه، متيجي نريح شويه وبعدين نبقى نقوم نلبس ونمشي 

هنا شهقت : وجريت من قدامه، وقالت والله مجنوووووون

احمد :ههههههههه، مجنون بيكي يا قمري 

بقلمي شيمو الخطيب 

****************

نادر :  ها، هتفضلي كده كتير 

ولاء: انت عايز مني ايه يا نادر، 

نادر : عايز اعرف، تقصدي ايه بالموضوع انتهى، انتي مش عايزانى يا ولاء، 

ولاء بلهفه وقامت قعدت جنبه : اوعي تقول كده تاني، انا قصدي ان موضوع شغلك   ده خلاص انت حسمته، يعني انهي الكلام فيه، نادر انا بحبك في كل حالاتك، انت بجد مش متخيل انت ايه بالنسبالي، نادر انت قلبي اللي بعيش بيه 

نادر : حضنها وضمها لصدره : وانتي روحي يا ولاء، انا اسف لو اتنرفزت وعليت صوتي عليكي، صدقيني غصب عني، واوعي تفتكري اني ببقى فرحان وانا بعيد عنك، بالعكس، انا بجد ببقى مشتاق ليكي جدا، بس غصب عني، 

ولاء: خلاص يا حبيبي، انا هحاول استحمل الوضع ده، بس عشان خاطري....... 

نادر قاطعها : عارف هتقولي ايه، وكمل عشان خاطري يانادر، تقدر احساسي وتستحملني لو ادايقت عليك في مره، مش ده اللي كنتي هتقوليه 

ولاء، : ايه ده!!!!!! انت عرفت منين اني كنت هقول كده، ده نفس اللي كنت هقوله   بالظبط، بسم الله الرحمن الرحيم، انت بتقرا أفكاري يانادر ولا ايه 

نادر : ههههههههههههه، بت يا ولاء، انا بحبك، وعارف انت بتفكري في ايه، وبعدين انتي ناسيه، اني ظابط مخابرات، يعني افهمك من غير متتكلمي ههههه

ولاء : لااااا ده انت يتخاف منك بقه، هههه 

نادر : باسها من خدها ، اوعي اسمع كلمة خوف وانا معاكي ابدا، حتى لو مني، بجد يا ولاء انا لو حسيت للحظه انك عايشه معايا وخايفه، هكره نفسي، 

ربنا يقدرني واسعدك يا حبيبتي 

ولاء بصت في عينيه وغرقت في سحرهم، والنظرات كانت هي لغة الكلام بينهم 

احمد :احم، احم، اييييه، انا واقف بقالي ساعه، انتو جايين تحبو بعض عندنا ولا ايه، هههههه 

ولاء، : باحراج،، احم هي هنا خلصت، انا هدخلها، وجريت على هنا 

واحمد ونادر هزروا مع بعض، ونزلوا، وقضوا سهره جميله مع بعض وكانو فرحانين جدا، 

الكل دخلوا مطعم كبير يتعشوا فيه

احمد، : بقولكوا ايه، انا نفسي اي وقت حلو يعدي عليا يبقى مشاركني فيه مؤمن، بصراحه   مبعرفش افرح من غيره، ممكن اتصل بيه اخليه يجي هو ومي ولا حد عنده اعتراض 

نادر : اعترااااض!! وعلى مين،، على مؤمن!!! والله عيب عليك، دي القعده متحلاش الا بيه، كلمه ياعم اتكل على الله 

احمد اتصل عليه ومؤمن رد، 

احمد : مؤمن، تصدق وحشتني الساعتين دول 

مؤمن : ها أنجز اكيد عايز مصلحه، اتصالك ده مش هيبقى لوجه الله ابدا 

احمد : دايما ظالمني، هو انا زيك يا واد، انا كنت عايزك تجيب مي وتيجي تسهر معانا، نادر وولاء معانا، 

مؤمن : نيجي فين ياعم، انتو عرسان جداد، اديني الواد نادر ده، بس اوعي تقول اني   بقول عنه واد، اصل يكلبشني زي مكلبش حسن، الله لا يسامحه، ههههه

نادر : سامعك يا ابو لسان طويل، وحسابك عمال يتقل معايا، 

مؤمن : اااه الواطي باع اخوه، (وطبعا الاسبيكر كان مفتوح) ومؤمن سمعهم كلهم بيضحكوا على كلامه 

نادر : يابني احنا بره في مطعم، وبعد منتعشي هنلف شويه بالعربيه، وبعدين نروح، تعالي بقه ومتبقاش رخم 

مؤمن : والله انتو مجانين، وبعدين هو في عرسان يخرجوا تاني يوم جواز، ايه لحقتوا تزهقوا من بعض 

احمد : انت عارفني مبحبش التزم بحاجه وابقى مقيد بيها، ومش عشان عريس    اتحبس يعني، خليك كووول وعيش براحتك، وبعدين انا طول عمري بحب اللمه وجو العيله، ونفسي تكمل بقه بوجودك،  ولو على هنا (بص لهنا) انا عمري مزهق منها ابدا، دي هيا قلبي اللي عايش بيه، فتعالي بقه ومتعملش فيها الواد التقيل، ههههه، 

مؤمن: ربنا يهنيكوا يا رب يا احمد، بس يا جماعه، انا بجد اسف، بصراحه كده مش 

هينفع، خالتي عايده تعبانه شويه وصعب اني اسيبهم وامشي، متعوضه مره تانيه ان شاء الله 

هنا : خاااالتي، مالها يا مؤمن طمني 

                   الحلقة الرابعة من هنا

لقراءة باقي الفصول الجزء الثانى من هنا

لقراءة الجزء الاول جميع الفصول كاملة من هنا