الحلقه الرابعة
من رواية 💔جراح القلب ج٢ 💔
بقلم شيمو الخطيب
مؤمن اعتذر عن السهره الجميله اللي عرضها عليه احمد ونادر، وده بسبب ان عايده تعبانه شويه
مؤمن : انا اسف ياجماعه ، بس مش هينفع اجي والله، خالتي عايده تعبانه شويه، ولازم ابقى موجود معاهم
هنا: خااالتي، مالها يا مؤمن، طمني عليها
مؤمن : متقلقيش يا هنا، بعد مرجعنا من عندك تعبت شويه، وانتي عارفه ان اقل مجهود بيتعبها، وهي الفتره اللي فاتت تعبت نفسها جدا معانا في الفرح والشقه، بس خير متقلقيش، استمتعوا بوقتكوا، وأن شاء الله خير،
احمد : طب الأمور عندك ايه يا مؤمن، ومي عامله ايه،
مؤمن : كله تمام والله، وخالتي نايمه شويه، ممكن بقه متقلقوش، وافرحوا، بلاش تنكدوا على نفسكو
احمد : ماشي يا مؤمن، اي جديد طمنا بالله عليك
مؤمن : عنيا يا عريس، سهره سعيده يا رجاله، 😂،، وقفلوا مع بعض
هنا،: احمد، هنعمل ايه، مش هنطمن على خالتي
احمد : ايه رأيك، نخلص سهرتنا ونروحلهم، اهو حتى خالتي تبقى صحيت ونطمن عليها بنفسنا
نادر : واجب احنا كمان نيجي معاكو
ولاء: خلاص، طالما احنا كده كده هنروح، يبقى ليه نروح متأخر، احنا نقضي معاهم القعده، اهو يفكو شويه معانا، ونطمن على خالتي، ونمشي
هنا: هي فكره جميله، بس الناس هتقول ايه، تاني يوم للعرسان ورايحين بيت أهلهم، والف كلمه وكلمه هتطلع علينا
احمد :، وانا من امتى بيهمني كلام الناس ياهنا، المهم عندي اطمن على اهلي، الناس مش هتبطل كلام مهما عملنا، سيبك منهم واللي تحبي تعمليه اعمليه
نادر، :انا معاك جدا في الرأي ده يا احمد،
اللي انتي عايزاه ياهنا اعمليه، وسيبك من الناس، لأن مهما عملتي مش هيعجبهم
هنا : حيث كده نتعشى ونطلع على هناك على طول،، وفعلا خلصوا العشا
واتحركوا كلهم بعربية نادر، لأن عربية احمد مع مؤمن
شيمو الخطيب
***************
عند مؤمن
مؤمن : ايه يامي هتفضلي قاعده حزينه كده، ان شاء الله هتبقى كويسه
مي : انا خايفه عليها يا مؤمن، دي امي، يعني كل حياتي، مقدرش اشوفها تعبانه واتعامل عادي
مؤمن ضمها لصدره : حبيبتي ان شاء الله خير، هي تعبت قبل كده وربنا سلّم، متقلقيش هتبقى بخير بإذن الله
مي :ياااارب يا مؤمن يارب،
مؤمن ومي سمعوا هيصه ودوشه على السلم، بصوا من على السلم لقيوا هنا واحمد ونادر وولاء بيسلمو على ناديه
وأم أحمد
ناديه :قلب امك ياحبيبتي، خير، فيه حاجه حصلت
احمد : ايه ياخالتي، انتي مش عايزانا نيجي ولا ايه
هنا : شكلها كده هههه، وبعدين انا جايه اطمن عليكو وعلى خالتي عايده
ام احمد، : طيب ادخلوا يا حبايبي، بس الاول، وبعدين اطلعو لعايده اطمنو عليها
نادر : معلش يا خالتي، احنا هنطمن عليها ونمشي على طول عشان منتأخرش، هو صحيح مؤمن فين
مؤمن : اطلعوا يا رجاله، نحن هُنا
طلعوا كلهم وهنا حضنت مي اللي فرحانه بوجود هنا معاها
مي : ليه ياهنا تتعبي نفسك وتيجي، كنتي اطمنتي بالتليفون
هنا : دي امي يا مي، مقدرش مجيش اشوفها، ربنا يطمنا عليها يا حبيبتي
مي : عارفه ياهنا، مجيتك دي، فرحت قلبي قوي، ربنا ميحرمني منك ابدا يا رب
مؤمن : سلم على أحمد،، كنت عارف انك هتيجي والله،
احمد: هو انا اقدر اسيبك في الموقف ده لوحدك، ده انت حبيبي يالا، هههههه
وحضنوا بعض جامد، وبعدها مؤمن سلم على نادر
دخلت هنا وولاء ومي لعايده وكانت بدأت تفوق
عايده :بهمس،، مي، هاتيلي، شوية ميه، عطشانه يابنتي
هنا : اتفضلي يا خالتي، وقومي بقه فرحينا بلمتنا مع بعض
عايده انتبهت لصوت هنا، مييين، هنا!!!
حبيبتي، انتي ايه اللي خرجك من شقتك يا قلب خالتك
هنا مسكت ايديها وباستها : تفتكري يا خالتي اعرف انك تعبانه واقعد في البيت من غير مطمن عليكي، مكنتش هقدر ابدا يا حبيبتي
عايده : ربنا ميحرمني منك ابدا يابنتي، ويسعدك، ويفرحك بطفل جميل زيك ويقِر عينك بيه،
هنا : يارب ياخالتي، بس فرحتي مش هتكمل، وانتي تعبانه كده، انا هشوف الناس دول عاملين اكل ايه واجيبلك تاكلي عشان الشباب بره عايزين يطمنوا عليكي، واكيد مش هتقابليهم وانتي وشك اصفر كده، عايزينك مُزه يا قمر انتي، وضحكت وعايده ضحكت على اسلوبها
ولاء: الف سلامه عليكي ياخالتي، ربنا يقومك بالف سلامه
عايده : تسلمي يابنتي من كل شر، ربنا يسعدكو يا حبايبي
خرجت هنا وقالت إنها عايزه تأكل عايده وناديه جابتلها الاكل بعد مسخنته، ودخلت هنا وناديه وأم أحمد
واكلوا عايده وبدأت تفوق شويه، والحمد لله
مي : ماما حبيبتي، الشباب بره عايزين يطمنوا عليكي ادخلهم
عايده : طبعا دول ولادي، دخليهم يا حبيبتي
دخل احمد ومؤمن ونادر
مؤمن : عيوووود حبيبتي، حمدلله على سلامتك، ايوه كده فوقي، وفرحينا،
احمد : حمدلله علي سلامتك ياخالتي، ربنا يعافيكي يارب
نادر : الف مليون سلامه عليكي يا خالتي، ربنا يبارك في عمرك يارب
عايده بفرحه ودموع من لمة العيله وخوفهم عليها : الله يحميكو يا ولادي ويسلمكوا من كل شر، ويفرحني بأولادكو جميعا يارب،
وقعدوا مع بعض ولسه نادر هيقوم يمشي لكن جرس الباب رن
مؤمن فتح الباب، وكانت امل جارتهم في الحي
مؤمن،: اهلا، ازيك يا امل، تعالي اتفضلي
امل : معلش يا بشمهندس، انا شفت هنا واستاذ احمد طالعين حبيت اجي اباركلهم
مؤمن: اتفضلي، ادخلي
هنا : اهلا يا امل، ازيك يا حبيبتي
امل : الحمدلله كويسه، الف مبروك ياهنا، هو استاذ احمد فين
هنا ومؤمن استغربوا سؤالها على أحمد لكن معلقوش
احمد : تعالي يا امل واقفه عندك ليه،
امل جريت بلهفه على أحمد وقربت منه، لكن هو بعد عنها
امل،: مبروك يا احمد، قصدي يا استاذ احمد
هنا اتخنقت من تصرفها وقربت مسكت ايد احمد، وقالت : الله يبارك فيكي يا امل، (وصكت على سنانها) شكرا يا امل على تعبك ومجيتك لحد هِنا،
امل باصه لأحمد ومنزلتش عينها من عليه : لا مفيش تعب ولا حاجه، كله فداه، احم قصدي فداكو
احمد واقف مذهول من البنت دي ومشاعرها اللي واضح جدا انها مراهقه وهيموت ويضحك على رد فعل هنا
ومؤمن لحق امل قبل مهنا تخنقها،
مؤمن : ماشي يا امل شكرا جدا لذوقك، وأبقى سلمي على والدك الراجل الطيب،
امل : الله يسلمك يا بشمهندس، بعد اذنكوا، وبصت لأحمد بعشق ولسه هتمشي احمد وقفها
احمد : امل استنى معلش، (هنا بصتله بغيظ) معلش كنت عايز اسالك هو انتي عندك كام سنه
امل : بفرحه ١٨ سنه يا استاذ احمد
احمد : اممممممم حلو قوي، ربنا يرزقك بابن الحلال يارب، اللي يسعدك
هنا : هو ايه اللي حلو قوي، (احمد ضغط على ايد هنا) وهنا سكتت خالص
امل : شكرا يا استاذ احمد، بعد اذنك
مشيت امل والكل كان متابع
نادر : ايه ياعم البت دي، دي شكلها دايبه، ههههههه
هنا بنرفزه : ناااادر، متغظنيش، والله اللي يقرب من أحمد اكله بسناني
مؤمن : ده انتي طلعتي شرسه قوي يا هنون، ههههه اشطا عليك يا ابو حميد يا مسيطر، البنات هتموت نفسها عليك
احمد : ههههههه الله يخربيتكو، جيتو تكحلوها عمتوها، ربنا يستر، بقولك يانادر، انت مش كنت ماشي،
نادر : فعلا، هذا حصل، ههههه
احمد : خلاص يا اخويا يلا، قبل متقلب بخناقه ونتكلبش كلنا
والكل ضحك ومشيوا فعلا كلهم، لكن هنا كانت متغاظه جدا من البنت دي ونظراتها لاحمد،،،،
نادر وصل احمد وهنا لشقتهم، ووصل ولاء ومشي على طول
شيمو الخطيب
**************
تاني يوم في الشركه
فارس زهقان لان الشغل كله عليه، وفيه حاجات محتاجه رأي احمد وامضته، وطبعا احمد اجازه، ومصطفى بيه في الشركه لكن صحته تعبانه وعلى طول حزين، لأن اخوه والد سلمي، تعبان وفي المستشفى
فارس دخل لمصطفى بيه :: السلام عليكم، اخبار حضرتك ايه يافندم
مصطفى اتنهد : الحمد لله يافارس، خير فيه حاجه ، وايه الأوراق اللي في ايدك دي
فارس،: دي أوراق محتاجه مراجعة حضرتك وامضتك
مصطفى، : ماشي يافارس، تقدر تسيبها دلوقتي وهبقي اطلبك اول مخلصها
فارس: تحت امرك يافندم، بعد اذن حضرتك
مصطفى : فارس، انت كلمت سلمي النهارده
فارس : النهارده بصراحه لأ، لكن آخر مكالمه كانت امبارح بالليل
مصطفى: امممم ماشي يافارس، اتفضل انت
فارس: معلش يافندم، هو في جديد في حالة عمي ولا ايه
مصطفى : للأسف يافارس هو على الاجهزه، لكن اول مبيفصلوا جهاز التنفس عنه بيزرق، وده طبعا بيأكد انه اكلينيكيا، منتهي، ربنا يستر يارب
فارس :قلبه وجعه على حبيبته جدا، طيب هي سلمي ووالدتها عارفين بكده
مصطفى : بصراحه انا قولت للدكتور انه يحاول يجيبها ليهم تدريجي، بطريقته بقه، لحد مربنا يسهل، وجايز يقوم بالسلامه وربنا يستجيب لدعائنا
فارس :يارب ، وان شاء الله هيقوم بالسلامه، ولو احتاجت حاجه يا فندم ابقى بلغني، بعد اذن حضرتك، وسابه ومشي
فارس راح مكتبه وقرر يكلم سلمي
فارس،:الو، سلمي حبيبتي عامله ايه
سلمي بعياط: بابا يا فارس، الدكتور بيقول ان الحاله خطر، وبابا مش بيستجيب لأي علاج
فارس : ادعي يا سلمى وخليكي قويه، على الاقل عشان خاطر اخوكي الصغير ووالدتك،
سلمي : مش قادره يافارس، بابا صعبان عليا قوي، وبعدين انت عارف جلطة القلب محدش بينجي منها
فارس: متقوليش كده ياسلمي، استغفري ربنا، وبعدين مفيش حاجه كبيره على قدرة ربنا، والدعاء بيغير القدر، ادعيلو يا حبيبتي وان شاء الله خير، وانا هخلص وهجيلك على طول بإذن الله
سلمي: يااااااااارب يا فارس يارب،
شيمو الخطيب
، **************
عند ولاء
والدتها :صباح الخير يا لوءه
ولاء، : صباح الفل يا احلى ام
والدتها: شكلك رايقه النهارده والحمدلله، يبقى اكيد اليوم كان حلو امبارح
ولاء،؛ : كان حلو قوي يا أمي، قضينا وقت حلو قوي مع احمد وهنا وبعدين خدناهم ورحنا عند خالتي ناديه البيت لأن والدة مي كانت تعبانه شويه
الام: الف سلامه عليها، وبقت احسن دلوقتي،
ولاء : دي اول مشافت لمتنا حواليها، فرحت قوى ورجعت يجي ٢٠ سنه ورا
الام: ربنا ميفرقكوا ابدا يابنتي، ويسعدكو يارب
ولاء:يارب يا ماما، انتي مش متخيله، قد ايه العيله دي طيبه قوي، يعني خالتي ناديه وأم أحمد واحمد وهنا ومؤمن، تحسي لو قعدتي معاهم، انهم اهلك وناسك، وانك تعرفيهم من يوم ولادتك، بجد بحب قعدتهم جدا، والغريبه ان نادر خد عليهم بسرعه جدا، وبقي يحب يقعد معاهم اكتر من صحابه القدام، حتى مش بيدايق لما نهزر كلنا مع بعض
الام : اكيد لأنه عارف احترامهم وتربيتهم،
ولاء: بصراحه ياماما لو على الاحترام والتربيه، هما كلهم قمه في الأدب، سواء احمد او مؤمن، وكلامنا كله في حدود الإحترام، هزار وبس، لكن بصراحه القعده معاهم ميتشبعش منها
الام: الحمدلله، ربنا يسعدك يابنتي، انا كنت خايفه من شكل نادر وهو خارج، انا اسفه يابنتي لو اتدخلت في حاجه متخصنيش، انا بس كنت عايزه اريحك
ولاء: ماما!!! اوعي تتأسفي يا حبيبتي، وعلى فكره نادر مدايقيش منك، هو ادايق من انه اتكلم معايا كتير في الموضوع ده، وانا مصممه كل مره اني افتحه، يعني انتي بره الموضوع خالص، (وطبعا ولاء محبتش تزعل والدتها من نادر، وفي نفس الوقت احترمت رغبة نادر)
الام: طمنتي قلبي يابنتي، وبعدين يا ولاء، نادر ابن اخويا طيب، وبيحبك، اوعي تزعليه منك في يوم، متخسريش حبه ليكي يابنتي بتصرف اهوج منك، لازم تعرفي ايه اللي بيدايقه وتبعدي عنه،
ولاء :حاضر يا أمي، متقلقيش عليا
وحضنتها ووالدتها بادلتها الحضن، ودعتلها ان ربنا يسعدها يارب
شيمو الخطيب
*************
هنا صحيت من النوم وكانت فرحانه بسهرة امبارح وجو العيله الجميل لكن افتكرت امل واتغاظت جدا وقررت متديش للموضوع اهتمام، لأنها واثقه في احمد جدا، وبتعشق كل تفاصيله، ومش عايزه تعملها مشكله، ودعت ربنا انه يخليلها عيلتها و يديم عليهم السعاده
هنا بصت على أحمد وكان نايم، قامت دخلت الحمام، واتوضت وبدأت تصلي
احمد صحي وبيدور على حبيبته لقاها بتصلي ابتسم وكان فرحان ان ربنا رزقه بزوجه صالحه تصونه
قام دخل الحمام اتوضي وخارج هنا قابلته
هنا: باسته من خده، صباح الفل على اجمل رئيس مجلس اداره فيكي يا مصر
احمد :احلى صباح على اجمل عيون في الكون كله،
هنا : قلبي والله، تعرف انك وحشتني، فترة النوم، انا بفكر منامش بعد كده، عشان اشبع منك
احمد :انتي بقه موحشتنيش، عارفه ليه
هنا كشرت زي الأطفال : تؤ تؤ، ليه أن شاء الله
احمد : عشان لما بنام بحلم بيكي، واول مقوم ببص في عيونك ياقمري،
هنا عملت نفسها دايخه واترمت في حضنه، اااااه، دوختني بكلامك يا حبيبي، ربنا ميحرمني منك ابدا، وحضنته
واحمد شالها من على الارض وضمها ليه جامد، نزلها وقالها، حبيبتي اعملي حسابك هنسافر النهارده على اسكندريه
هنا: نطت بفرحه، اشطا عليك يا ابو حميد يا جامد، هروح بقى احضرلك احلى فطار
احمد،:، الله يسامحك يامؤمن، هبلت البت معاك، هههههه ماشي ياحبيبتي، انا هصلي واتصل بفارس اشوف الدنيا ماشيه ازاي
هنا : هههههه، متظلمش مؤمن، انا من يومي وانا كده، ههههه، وعموما ماشي يا حبيبي خلص بقه وتعالي ساعدني
احمد:من عيوني ياقلب احمد
احمد خلص صلاه، وكلم فارس
احمد: الو، ايوه يافارس
فارس: اهلا بالعريس، عامل ايه يامعلم
احمد: انا تمام، انت عامل ايه، والشغل، اخباره ايه، ماشي تمام ولا هتفضحنا، ههههه
فارس: انا مش عارف انت ليه مش واثق فيا، كل الحكايه، اني زهقت، الشركه وحشه من غيرك يا مدير
احمد : حبيبي يا فارس، تسلم، ربنا يعينك انت قدها وقدود
دخلت واحده على فارس المكتب
وفارس سكت مره واحده وقاااال
مييين، ندددي