رواية قلبي ليس بيدي
الفصل الحادي والعشرون والثانى والعشرون
بقلم حسناء رمضان
Part 21:
دخلت اتوضيت وصليت ولفيت طرحتي ونزلت اشوف في اي...
لقيت واحده ست اول مره اشوفها وبتتخانق مع جاك..
فيروز: تعالي ياحبيبتي واقفه عندك ليه!
جاكي: هو في اي!.. مين دي!
فيروز: دي مامت جاك.. تعالي احطلك تفطري..
"دخلت معاها المطبخ"
جاكي: هو انتي سايباهم يتخانقوا لي!
فيروز: لا علاقتي بيها مش قد كدا وكلامنا قليل..
بصيت لقيت جاك صوته علي جامد...
جاك: سيبوني ف حالي بقاا.. انتوا عايزين مني اي!.. مش كفايه اللي حصلي بسببكوا!..
مامته: انت كمان بتعلي صوتك عليا ياقليل الادب..
جاك: لا انا مش قليل الادب.. بس انا زهقت.. طاقتي خلصت معاكوا ع كدا.. هتفضلوا تبيعوا وتشتروا فينا كدا لحد امتى!
مامته: اللي انا قولت عليه يتعمل فورا.. ومش عايزه كُتر كلام..
جاك: مش هيحصل... ومن هنا ورايح ملكيش دعوه بيا ولا بنور بعد كدا..
وسابها ومشي...
مامته: عاجبك اللي اخوكي بيعمله دا؟
نور: هو مغلطش.. انتوا فعلا بتبيعوا وتشتروا فينا
وسابتها هي كمان وطلعت اوضتها..
جاكي: الموضوع متطور جدا معاهم.. اتدخلي او اعملي اي حاجه..
فيروز: لا ملناش دعوه.. اسكتي بس..
فجأه عمي دخل..
عمو احمد: مالك.. اي الدوشه اللي عملاها ع الصبح دي!
ـ تعالى شوف اللي متربوش دول..
عمو احمد: لا متربيين.. ومتربيين قوي كمان.. احترمي انتي نفسك وبطلي تغلطي فيهم.. وبعدين انا مش فاهم اي اللي مضايقك.. عايزه منهم اي تاني!.. مش كفايه اللي حصلهم بسببك!
ـ بسببي انا!.. ولا بسبب اخوك المحروس اللي مريح دماغه..
عمو احمد: بسببكوا انتوا الاتنين.. سيبوهم ف حالهم بقاا..
ـ ماشي.. انا هعرف شغلي معاهم..
سابته وطلعت فوق...
هند: هي لحقت!
فيروز: ربنا ينتقم منها المفتريه دي!.. نكدت ع العيال..
جاكي: طب حد يطلع لنور احسن تكون بتعيط او حاجه..
هند: انا هطلعلها...
فيروز: تعالي ياحبيبتي افطري..
جاكي: طب والباقيين!
فيروز: فطروا من بدري ياحبيبتي..
جاكي: ااه تمام..
قعدت فطرت معاها وبعدين طلعت اوضتي..
شويه والباب خبط..
جاكي: ادخل..
محمد: جيت اتطمن عليكي..
جاكي: ااه اتفضل..
دخل قعد معايا ف البلاكونه...
محمد: عامله اي دلوقتي..
جاكي: كويسه الحمد لله..
محمد: خدتي دواكي!
جاكي: ايوا..
قعد ساكت واتنهد..
جاكي: مالك!
محمد: مفيش...
جاكي: امال قالب وشك لي!
محمد: متضايق من اللي حصلك..
حطيت نفسي مكانك وتخيلت ان ابويا بيرمي امي وبيعاملني وحش وف الاخر يبيعني لحد ممكن يأذيني ف اي لحظه لمجرد انه ينقذ نفسه من السجن.. لا وكمان يخليهم يمدوا ايديهم عليا.. وافضل عايش ع امل اني الاقي امي.. ومعرفش اي بيحصلها ولا هي عايشه ولا ميته.. كل دا صعب جدا..
بصلي لقاني بصاله ودموعي نازله..
محمد: انا اسف.. مش قصدي والله.. طب حقك عليا والله انا اسف..
جاكي: لا لا مفيش حاجه.. انت مقولتش حاجه غلط.. مجرد التفكير ف دا كله صعب..
محمد: بس انتي قويه ع فكره..
جاكي: محصلش..
محمد: لا حصل.. انتي ف طب.. ع الرغم من حياتك الصعبه ومع ذلك قدرتي تدخلي كليه صعبه زي دي.. وكمان مستحمله اسلوب ابوكي طول السنين دي.. ومع ذلك لسه بتضحكي ومستحمله.. انا لو مكانك كان زماني مووت من زمان..
جاكي: بعد الشر.. لا عادي يعني.. صدقني كله محصل بعضيه..
محمد: بس انا خايف عليكي..
جاكي: متخفش.. اي اللي ممكن يحصل اكتر من اللي حصل..
محمد: انتي مش متخيله انا كنت مرعوب ازاي.. انا فضلت اصلي وادعي.. دعيت كتير جدا انك تكوني بخير... هتصدقيني لو قولتلك اني فعلا مبستحملش اشوفك تعبانه!
جاكي: احم.. هو انا مبسوطه الصراحه انكوا بتخافوا عليا كدا ومعتبريني اختكم..
محمد: متمشيش.. خليكي.. يعني مش مشكله لو قعدتي معانا..
جاكي: طب قولي ازاي!.. اقعد عندكوا بامارة اي!.. صدقني مينفعش.. انا مليش حاجه هنا عشان اقعد..
محمد: طب لو مشيتي هتروحي فين!.. عندك مكان!.. تعرفي حد هنا!
جاكي: لا..
محمد: امال اي!.. بلاش عند بالله عليكي.. صدقيني هترتاحي معانا هنا..
جاكي: طب انا موافقه بس عندي طلب..
محمد: اي!
جاكي: تشوفلي شغل..
محمد: شغل!.. ليه!
جاكي: عايزه اشتغل..
محمد: تشتغلي ازاي وانتي بتدرسي.. وليه اصلا!
جاكي: امال هصرف ع نفسي ازاي!
محمد: مش محتاجه تشتغلي.. لو احتاجتي حاجه انا موجود..
جاكي: لا طبعا.. انت كمان عايز تصرف عليا..
محمد: متخيله اني ممكن اخليكي تشتغلي عشان تصرفي ع نفسك وانا موجود!.. مينفعش طبعا..
جاكي: محمد لو سمحت... انا اول مره اطلب منك حاجه.. صدقني مش هينفع اعيش عاله عليكوا كدا..
محمد: عاله!.. احلى عاله ف الدنيا.. احنا مبسوطين ياست..
جاكي: يعم والله مينفعش..
محمد: لا ينفع.. ولو سمحتي متجيبيش السيره دي تاني عشان مزعلش..
جاكي: طيب..
محمد: فكي بقااا..
جاكي: مانا فاكه اهو..
بص ف عنيا شويه وبعدين قال...
محمد: كنت خايف معرفش ابص ف عنيكي تاني..
جاكي: لي يعني!
محمد: مش عارف.. ممكن اسالك سؤال!
جاكي: اسال..
محمد: هي عنيكي دي حقيقيه؟
ضحكت...
جاكي: امال تركيب.. اكيد حقيقية..
محمد: حلوه... بصراحه مشوفتش عيون جميله كدا قبل كدا..
جاكي: طب ياسيدي شكرا ع الكلام دا..
محمد: الهوا هنا حلوو... ماتشغلي اغنيه..
جاكي: "بهزار".. انت ناوي تطول هنا بقاا..
محمد: ايووون.. مظبوط..
جاكي: ماشي ياسيدي..
طلعت الفون وشغلت اغنيه لام كلثوم "كان لك معايا"..
محمد: اي الجمال دا؟... بتسمعي ام كلثوم!
جاكي: طبعا.. ام كلثوم دي حاجه عظمه كدا مفيش منها اتنين..
محمد: انتي احلى ع فكره..
جاكي: يابني بطل بقاا.. انت بتقارني بام كلثوم!
محمد: ايواا.. انتي احلى فعلا..
جاكي: مجنون والله..
محمد: طب ممكن اطلب طلب..
جاكي: انا عارفه اني مش هخلص النهارده.. اطلب ياسيدي..
محمد: ممكن ناخد صوره مع بعض!
جاكي: "باستغراب".. اي!
محمد: لو مش حابه عادي..
جاكي: لا مش كدا.. انا استغربت من الطلب بس..
محمد: يعني اخد!
جاكي: خد يعم وخلصني..
قرب الكرسي ولف وشه..
محمد: اضحكي...
خد الصوره وتقريبا طلعت حلوه لاني لقيته بصلها شويه وابتسم..
محمد: حلوه..
جاكي: طبعا.. مش انا فيها..
محمد: يراجل!
جاكي: ايون.. هتنكر!
محمد: لا بصراحه هي حلوه عشان انتي فيها فعلا..
جاكي: لا يعم حلوه عشان احنا فيها مع بعض...
محمد:" تنح".. اي!
جاكي: ايه!
محمد: لا لا تمام..
"بصيت للبحر شويه"
جاكي: بتعرف تعوم!..
محمد: اي دا لي!
جاكي: بسال..
محمد: ايوا بعرف..
جاكي: يابختك..
محمد: انتي مبتعرفيش!
جاكي: مجربتش اصلا..
محمد: طب اي رايك اعلمك!
جاكي: اي!.. ازاي!
محمد: البحر عندنا اهو وكمان في بسين هنا..
جاكي: لا طبعا..
محمد: لي!
جاكي: هعوم ازاي قدام اللي هنا..
محمد: طب اقولك.. انا اوريكي تعومي ازاي واحنا هنا وبعد كدا نبقاا نروح البحر ف حته ميكونش فيها حد وعومي هناك..
جاكي: انت خيالك واسع كدا ليه!.. انا بتمنى بس.. مقولتش اني هعمل كدا..
محمد: ومتعمليش لي!.. طلاما نفسك تتعلمي اي المشكله!
جاكي: لا يعم اخاف..
محمد: انا معاكي.. هتخافي من اي!
جاكي: انت مجنون وانا بشاركك افكاري عشان تودينا ف داهيه...
محمد: عادي ياست.. احنا هنعيش مره واحده.. اعملي اللي نفسك فيه كله..
جاكي: اممم.. نجرب..
محمد: ايوا كدا.. بصي اي حاجه عايزاها قولي عليها وانا اعملهالك دلوقتي..
جاكي: لا مش للدرجادي..
محمد: اكتر وحياتك..
............
هند: يانور خلاص بقاا..
نور: انا زهقت بجد.. هو كل شويه كدا!
سما: اهدي شويه يانور.. وبعدين ماهي من زمان كدا اي الجديد يعني..
نور: سيبوني لوحدي لو سمحتوا..
هند: يانور مش مستاهله والله..
نور: "بعصبيه".. طبعا مش مستاهله.. انتي واحده ابوكي وامك معاكي وبيحبوكي ومتحرمتيش منهم.. هتحسي بيا ازاي وانتي مشوفتيش يوم وحش ف حياتك..
هند بصتلها بصدمه وسابتها وخرجت وسما خرجت وراها...
..............
محمود: يعني جاي من غيرها!
بابا: معرفتش اجيبها..
محمود: لا كدا انت بتستهبل..
بابا: اعمل اي يعني!.. هما خدوها وكانوا هيطلبوا البوليس..
محمود: ميلزمنيش كل دا... انت تروح تجيبها دلوقتي حالا.. وكمان حسابي معاها عسير ع اللي حصل ف وشي دا..
بابا: سيبك منها واسمعني... جاك عرف احنا بنتاجر ف اي!
محمود: يعني اي!
بابا: زي مابقولك كدا... عرف اننا بنتاجر ف السلاح والمخدرات..
محمود: نعم ياخويا.. وعرف ازاي حاجه زي دي..
بابا: معرفش.. هو قالي كدا وقالي انه هيطلب البوليس عشان كدا سيبتهم وجيت..
محمود: انا غلطان عشان مشغل معايا شوية اغبيه.. طلاما عرف الحكايه دي يبقاا اكيد معاه حاجه تثبت دا..
بابا: وانا بردو بقول كدا لانه كان بيتكلم بثقه جدا..
محمود: مبسوط انت كدا... ادينا هنروح كلنا ف داهيه..
"فضل يلف حوالين نفسه وبعدين بص لبابا.. "
محمود: انت ملكش لازمه معانا دلوقتي.. فشلت ف كل حاجه طلبناها منك..
بابا: يعني اي!.. بعد كل اللي عملته دا ومليش لازمه!
محمود: فين اللي عملته دا!.. ضيعت تلاته مليون جنيه ومعرفتش تحكم ع بنتك ودلوقتي هتودينا ف داهيه..
بابا: يعني هو كل دا بإيدي!
محمود: ومش ذنبي بردو اني استحمل غبائك دا.. انت بقيت كارت محروق ولو فضلت عايش هتودينا كلنا ف داهيه..
"طلع المسدس ورفعه ف وش بابا"
بابا: "بخوف".. انت هتعمل اي!.. لا يامحمود.. انا معملتش حاجه.. لا يامحمود متعملش كداا... دانا دراعك اليمين..
محمود: وانا لازم اقطع دراعي بدل ما اودي نفسي ف داهيه... وبنتك دي انا هخليها تكره اليوم اللي اتولدت فيه..
بابا: انا همشي.. ومش هقول حاجه.. بس متقتلنيش.. سيبني اعيش.. ارجوك..
محمود: واحد..
بابا: لا ارجوك..
محمود: اتنين..
بابا: هعمل اللي انت عايزه..
محمود: تلاته...
وفجأه......
Part 22:
قومت مخضوضه..
محمد: في اي!
جاكي: مش عارفه..
محمد: اي اللي حصل..
جاكي: قلبي انقبض فجأه.. مش عارفه ليه..
محمد: طب اقعدي.. اقعدي وانا هجيبلك مايه..
"طلع جابلي مايه وجه"
محمد: تمام دلوقتي!
جاكي: مش عارفه.. في حاجه غلط..
..............
السكرتيره: يافندم في ميعاد النهارده مع العميل اللي جاي من فرنسا..
جاك: الغي اي مواعيد النهارده..
السكرتيرة: ايوا يافندم بس دا عميل مهم جدا واحنا ماصدقنا حددنا معاد..
جاك: الساعه كام الميتينج دا؟
السكرتيره: الساعه 6 يافندم..
جاك: طيب... روحي وقولي لمحمود يجيبلي قهوه..
السكرتيره: حاضر يافندم...
طلعت ومالك دخل...
مالك: اي ياعم فينك كدا!
جاك: هنا اهو
مالك: مالك يعم زعلان كدا ليه!
جاك: بطل رغي عشان انا دماغي هتتفرتك.. وقولي عملت اي!
مالك: جيبتلك معلومات بمليون جنيه... بس انا مش فاهم.. مين الناس دي!
جاك: ملكش دعوه قولت.. وقولي عرفت اي بسرعه..
............
عدى شوية وقت وفيروز طلعت نادت علينا عشان الغدا..
فيروز: يلا ياولاد الاكل جاهز..
محمد: حاضر يافيزو جايين..
يلا..
جاكي: هو انا لازم انزل!
محمد: ايوا.. لي!
جاكي: ايوا بس عندكوا ناس وكدا وانا هبقى محروجه يعني..
محمد: ااه قصدك ع مرات عمي يعني... بيني وبينك هي ميتقعدش معاها... بس عادي يعني انتي مالك بيها..
جاكي: لا معلش انزل انت وانا هبقى اكل بعدين..
محمد: طب شويه وجايلك..
سابني ونزل.. عدى شوية وقت وبعدين رجع ومعاه اكل..
جاكي: اي دا!
محمد: مش هاكل من غيرك يعني..
جاكي: انت جايب الاكل هنا لي!
محمد: عشان تاكلي معايا.. هما بياكلوا تحت وانا وانتي هناكل هنا..
جاكي: احسن حد يتضايق اني منزلتش..
محمد: لا انا فهمت فيروز وهي فهمت وقالت هتتصرف لو حد سال..
جاكي: اشطا.. بس انا مش عايزه اكل..
محمد: ليه!
جاكي: مليش نفس كُل انت..
محمد: ااه انتي بتتدلعي..
جاكي: لا والله مش بتدلع.. بس حقيقي مليش نفس..
محمد: لو مكلتيش مش هاكل... وبعدين ع فكره جبتلك حاجه حلوه..
جاكي: حاجه حلوه!.. اي هي!
محمد: لا لما تاكلي هقولك..
جاكي: مش متطمنالك ياسطا..
محمد: لا بجد حاجه حلوه.. بس كُلي بقاا..
جاكي: ماشي ياسيدي..
بدأنا ناكل وانا كنت باصه ف الاكل.. رفعت وشي لقيته مادد المعلقه بالاكل..
جاكي: اي!
محمد: خدي..
جاكي:!!!!!
محمد: كُلي يابنتي في اي!
جاكي: ااه
اكلني وانا اصلا عايزه الارض تنشق وتبلعني والله....
فضلنا ناكل واحنا مشغلين اغاني وبنهزر ونضحك..
__________
عمو احمد: امال فين الولاد!
فيروز: محمد ف اوضته وجاكي نايمه ونور ف اوضتها...
عمو احمد: مش هياكلوا!
فيروز: لا قالوا مش دلوقتي..
نهى: اذا حضرت الشياطين ولا اي!... اشمعنى دلوقتي مش هينزلوا!.. وبعدين مين جاكي!
عمو احمد: لا يانهى.. هما مش جعانين.. الاكل مش بالعافيه يعني... وجاكي دي واحده قريبتي وقاعده معانا شويه..
نهى: امال مشوفتهاش ليه!
فيروز: عشان هي تعبانه شويه.. فمنزلتش يانهى
نهى: اممم... طيب
سما: هو جاك مرجعش!
فيروز: لا لسه..
"بصت لنهى".. ومظنش انه هيرجع دلوقتي..
نهى: لا هيرجع ياختي ميرجعش ليه..
عمو احمد: بطلوا رغي وكلوا وانتوا ساكتين..
__________
ف الشركه..
جاك قاعد ف مكتبه وراكن دماغه ع الكرسي ومغمض عينه...
دخلت مايا..
مايا: احم احم
جاك: قولتلك قبل كدا تخبطي قبل ماتدخلي.. مش هكرر دا تاني..
مايا: حاضر.. انت هتتعصب عليا ولا اي
جاك: عايزه اي!
راحت قعدت ع المكتب قدام الكرسي بتاعه..
مايا:" بدلع".. شايفاك متضايق كدا.. في اي!
جاك: مفيش
مايا: اي رايك نخرج النهارده
جاك: لا عندي شغل كتير..
قامت وقفت وراه وبدات تعمله مساج...
مايا: اممم.. الشغل ممكن يتأجل.. انت شكلك تعبان
جاك: لا في شغل مهم..
مايا: امم.. طب خلاص.. بعد الشغل..
جاك: هشوف
مايا: هستناك.. اول ماتخلص رن عليا..
جاك: تمام..
مايا: "بدلع".. باي باي
_______
عدى اليوم وجاك ف الشغل وانا محمد ف الاوضه وشويه وفيروز دخلت...
فيروز: انتوا لسه قاعدين مكانكوا!!!
محمد: امال هنقعد فين يعني!
فيروز: انتوا عارفين الساعه كام.. الساعه ١٠.. وانتوا قاعدين كدا من الصبح...
محمد: عادي يعني... محسناش بالوقت..
فيروز: انت ياواد انت مفيش وراك شغلانه تعملها!
محمد: لا مفيش وبعدين جاك ف الشغل..
فيروز: ماتبات معاها بالمره..
محمد: ياريت والله....
فيروز: طب اتلم و اتفضل يلا ع اوضتك..
محمد: ياست هو كان حد اشتكالك!
فيروز: يلا عشان تسيبها ترتاح شويه..
محمد: لا هي مرتاحه معايا..
فيروز: ولاااا اخلص واطلع بره..
محمد: طب مش طالع يافيروز... وادي قعده..
فيروز: يعني مش هتطلع!
محمد: لا
راحت ميلت ع الشبشب مسكته ف ايدها وهو جري استخبى ورايا..
فيروز: انت هتطلع ولا انزل بالشبشب دا ع وشك..
محمد: لا دا انا بهزر معاكي يافيزووو.. هو انا اقدر اقولك لا..
فيروز: طب يلا اطلع..
محمد: طب ماتخليني شويه بالله عليكي..
فضلت تلف وراه وهو يلف حواليا..
فيروز: ياواد خلي عندك دم... زهقت البت
محمد: لا هي مزهقتش ولا حاجه.. بطلي رخامه اني بس..
فيروز: رخامه ياقليل الادب..
محمد: اعااا.. جه ع ايدي ياشيخه بيوجع..
فيروز: بعد كدا هجيبه ع وشك.. اطلع يلا
محمد: انتي عايزاني امشي ياجاكي!
جاكي:"بضحك" اااه
محمد: اهو شوفت... ايه!.. اي النداله دي يابت انتي!
فيروز: يلا خلي عند اهلك دم بقاا
جاكي: خلاص يامحمد ابقى تعالى بكرا..
محمد: لا ياست لا بكرا ولا بعده.. انتوا جايبيني تهزقوني هنا... وانتي ابقي شوفي مين هيجيبلك طلبات البيت تاني..
فيروز: مش عايزه منك حاجه يامعفن...
سابنا وطلع..
فيروز: معلش يابنتي اكيد صدعك.. بعد كدا متخليهوش يدخل هنا تاني..
جاكي: لا والله بالعكس.. دا عسول خالص ودمه خفيف..
راح دخل راسه من الباب...
محمد: والنبي انت اللي عسل ياعسل..
رحت فيروز رمت عليه الشبشب..
فيروز: غور يلاا من هنا..
جاكي: "بضحك"... معلش هو مجنون شويه..
فيروز: يلا بقاا خدي دواكي وحطي مرهم للجروح دي عشان تخف قبل الجامعه.. وارتاحي شويه..
جاكي: حاضر.. بس هو جاك رجع!
فيروز: اه رجع ودخل اوضته..
جاكي: هو لسه متضايق!
فيروز: دا مش شايف قدامه.. حتى سما دخلتله بالاكل طلع عصبيته عليها.. ومفيش حاجه نزلت معدته من الصبح..
جاكي: طب.. هو ينفع ادخله انا بالاكل!
فيروز: لا يابنتي احسن يتعصب عليكي وتتخانقوا تاني.. وبعدين طول ماهو متعصب كدا محدش هيعرف يتكلم معاه..
جاكي: لا متقلقيش يمكن اعرف اقنعه..
فيروز: بصي.. طب ماشي بس لو لقيتيه متعصب تخرجي ع طول.. انتي فاهمه!
جاكي:
ايوا متقلقيش...
نزلت جابت الاكل وانا روحتله.. فضلت اخبط شويه لحد ماربنا نفخ ف صورته وفتح...