رواية قلبي ليس بيدي
الفصل الخامس والعشرون والسادس والعشرون
بقلم حسناء رمضان
Part 25: 👀♥
ممتلئٌ بك.. فما عُدت أنظر لأحدٍ إلا وأراك به♥🖇
جاكي: انت!!!!!
ادم: بتعملي اي هنا!
جاكي: انا هنا ف الجامعه دي!
ادم: مقولتيش انك ف طب يعني!
جاكي: مجتش فرصه.. بس هو انت ف طب بردو!!
ادم: ايون ياست..
جاكي: طب اقعد اقعد.. صدفه حلوه خالص دي ع فكره..
ادم: اه والله.. مكتوبلنا نتقابل تاني...
جاكي: لا دا كل يوم بقاا..
ادم: قاعده لوحدك ليه!.. امال فين صحابك!
جاكي: لا دا اول يوم ليا هنا ومعرفش حد..
ادم: انتي لسه ف اولى!
جاكي: لا اولى اي.. دانا ف تالته..
ادم: امال ازاي متعرفيش حد هنا!.. دا غير اني مشوفتكيش ولا مره..
جاكي: لا ماهو انا من القاهره فبالتالي جامعتي ف القاهره بس حصل ظروف كدا ونقلت هنا..
ادم: ايوا فهمت تمام..
جاكي: دي اول سنه ليك!
ادم: "بضحك".. لا ياست دي تالت سنه..يعني قدك..
جاكي: طب كويس هتكمل معايا المشوار اهو..
ادم: ان شاء الله... محاضرتك هتبدأ امتى!
جاكي: الساعه 8.. بس انا معرفش حاجه هنا.. كنت لسه هقوم ادور...
ادم: لا تعالي معايا وانا اعرفك الاماكن كويس...
جاكي: اشطا...
قومت معاه وانا بحمد ربنا اني لقيت حد معايا.. اينعم هو مش هيبقى معايا طول الوقت، بس ع الاقل هبقى عارفه حد...
كنت ماشيه جانبه وفي شباب كتير جدا وعمالين يعاكسوا ويقولوا كلام كدا.. راح مسك ايدي جامد ومشي بسرعه لحد مادخلنا جوه...
قعدنا نلف كتير وعرفني كل حاجه وحقيقي كنت متطمنه جدا.....
دخلنا المحاضره وحضرناها سوا والحقيقه كان في شوية حاجات كدا فلتت مني ومفهمتهاش...
خلصنا المحاضره وطلعت قعدت لوحدي وهو كان مع صحابه تقريبا... قعدت احاول افهم الحاجات اللي فلتت مني دي ومركزه معاها....
ـ لو سمحتي!
رفعت وشي لقيت شاب كدا وشكله غريب...
جاكي: نعم!
ـ ممكن اقعد معاكي!
جاكي: بامارة اي!
ـ هقولك حاجه بس..
جاكي: قول وانت واقف..
ـ ماشي ياست.. هو بصراحه انا.. يعني انا شوفتك قبل كدا هنا بردو.. وبصراحه...
جاكي: هنفضل كدا اليوم كله!
ـ بصراحه معجب بيكي وعايز اتعرف..
جاكي: وبعدين!
ـ اي اللي وبعدين!.. بقولك معجب بيكي..
جاكي: ايوا المفروض اقوم ارقص يعني ولا اي!
ـ لا المفروض تقولي اي شعورك ناحيتي!
جاكي: انت اهبل!.. انا اول مره اشوفك.. شعور اي!
ـ خلاص ياست اعرفك ع نفسي...
جاكي: لا شكرا مش عايزه.. لو سمحت امشي..
ـ ع فكره دا مش اسلوب تعامل خالص..
جاكي: سمعت انا قولت اي!
ـ طب اسمك اي ع الاقل!
جاكي: انت هتمشي بكرامتك ولا اقوم امشيك من غيرها!!
ـ لا وعلى اي.. انا ماشي..
ـ في اي!
بصيت لقيت ادم...
جاكي: شوف الاخ دا عايز اي!
ادم: مالك بيها ياادهم!
ادهم: انت تعرفها!
ادم: ايوا.. ادهم خف حواراتك دي شويه..
ادهم: انا مقولتش حاجه يعم.. وبعدين مكنتش اعرف انها تخصك...
ادم: واديك عرفت اهو... ادهم ملكش دعوه بدي بالذات..
ادهم: ماشي يعم.. وانا اسف لو ضايقتك..
جاكي: حصل خير..
ادهم مشي وادم قعد قصادي...
ادم: مالك متضايقه كدا ليه!.. هو قالك حاجه!
جاكي: لا هو ميفرقش معايا.. دانا بس بحاول افهم البتاع دا...
ادم: انتي مفهمتيش من الدكتور!
جاكي: دا بالع راديو ياعم... اي اللي هيحصل يعني لو اتكلم بالراحه.. دا محسسني ان في كلب بيجري وراه..
ادهم: "بضحك".. لا انتي بس عشان مش متعوده عليه... وريني مش فاهمه اي!
جاكي: اهو بص دي ودي...
ادم: لا دول سهلين خالص.. بصي ياستي....
_________________
ف الشركه:
جاك: تعالى يامالك..
مالك: عامل اي!
جاك: كويس.. عملت اللي قولتلك عليه..
مالك: كله تمام.. خليت اتنين يخلوا بالهم منها ولو حصل اي حاجه هيبلغوني...
جاك: تمام.. والموضوع التاني!
مالك: ملهمش اثر.. الاتنين اختفوا..
جاك: يعني اي!.. هيكونوا راحوا فين يعني!
مالك: معرفش.. انا دورت وملقتش حد فيهم هنا.. بس في واحد فيهم سافر والتاني لسه موجود بس منعرفش فين!
جاك: اكيد محمود اللي لسه هنا..
مالك: تقريبا..
جاك: اسمع اللي هقولك عليه وتنفذه بالحرف الواحد.. مفهوم!
مالك: مفهوم...
__________
ف الفيلا..
عمو احمد: امال فين الولاد!
فيروز: الولاد ف الجامعه... وجاك ف الشغل..
عمو احمد: يلا ربنا معاهم.. طب انا رايح الشغل انا كمان.. لو حصل حاجه بلغيني..
فيروز: حاضر..
عمو احمد: يلا مع السلامه..
فيروز: مع السلامه..
هو مشي ونهى نزلت... دخلت المطبخ ع طول من غير ماتقول كلمه واحده... عملت قهوه ووقفت تشربها قدام فيروز..
نهى: انا مش عارفه تاعبه نفسك ليه!.. مش في خدم هنا..
فيروز:.......
نهى: اظن اخرك كدا اصلا... يعني احمد اتجوزك وقعدك ف فيلا ماشاء الله مكنتيش تحلمي تدخليها... وجايبلك خدم وحشم ومع ذلك مصره تخدمي وتقللي من نفسك...
فيروز: وانا لما اخدم جوزي وولادي، ابقاا بقلل من نفسي!
نهى: "بغرور".. تؤتؤ.. انتي بتخدمي الكل.. يعني لو جاك ابني قالك اعمليلي حاجه هتعمليله..
فيروز: ماجاك ابني بردوو.. اعمله من عيني..
نهى: تؤتؤ.. مش ابنك يافيروز.. مش ابنك.. دا ابني انا.. انتي معكيش ولاد... معاكي بنات بس..
فيروز: واي العيب ف دا.. ومحمد دا يبقى اي!.. واخوه مصطفى الله يرحمه دا يبقى اي!..
نهى: بردو مش ولادك يافيروز.. دول ولاد جميله... انتي عندك سما وهند بس..
فيروز:" بتنهيد".. كلهم ولادي.. سواء بمزاجك او غصب عنك ولادي.. ولادك اللي انتي فرحانه بيهم قوي وعماله تقولي ولادي ولادي، سيبتيهم سنين.. سنين يانهى ومسألتيش فيهم.. وانا اللي احتويتهم وربيتهم وكبرتهم... ودا يدل ع انهم ولادي انا.. طب حتى اساليهم كدا.. قوليلهم انا ولا فيروز.. وشوفي هيختاروا مين..
نهى: هيختاروكي.. هيختاروكي انتي يافيروز... عارفه لي!.. عشان انتي زرعتي الكره جواهم من ناحيتي... اقنعتيهم اني عدوتهم واني مبحبهمش..
فيروز: هما مش صغيرين عشان اقنعهم بحاجه... متضحكيش ع نفسك يانهى.. انتي مش بتحبيهم فعلا.. وسيبتيهم فعلا.. انتي اللي ضيعتي ولادك منك.. انا مليش دعوه.. انا يدوب راعيت ضميري وربيتهم واعتبرتهم ولادي مع اني مكنتش مجبره اعمل كدا... بس دول يتامى.. لا ام ولا اب.. كل واحد راح شاف حياته ورميتوهم...
نهى: ملكيش دعوه.. اتقي ربنا انتي بس وبطلي تبُخي سمك جواهم عشان يكرهوا امهم..
فيروز: لا حول ولا قوة الا بالله... اتقي ربنا يانهى ولمي الدور..
سما دخلت...
سما: بس ياجماعه.. صوتكوا عالي كدا ليه..
فيروز: صباح الخير ياحبيبتي.. ع فين كدا..
سما: عندي دروس كتير النهارده...
فيروز: تعالي ياروحي افطري عشان متتاخريش...
سما دخلت معاها ونهى طلعت الجنينه....
________
نور: هند!.. انا اسفه
هند: ع اي!
نور: ع الطريقه اللي كلمتك بيها قبل كدا...
هند: لا ياحبيبتي عادي..
نور: يعني مش زعلانه مني!
هند: ياعبيطه انتي اختي.. هو في حد يزعل من اخته!
نور: والله انا بحبك مووت ياقمر انت...
هند: خدي بوسه اهي...
ـ وانا عايز واحده..
بصوا وراهم لقوا شاب...
هند: انت تاني!
ـ وتالت وعاشر كمان.. ماتحن بقاا ياجميل..
هند: انت معندكش دم!.. ماتسيبني ف حالي بقاا..
ـ انا مش عارف انتي بتعامليني كدا ليه!... انا عملت اي!
هند: معملتش.. داير ورايا ف كل حته بس..
ـ مانتي اللي مش راضيه تديني وش..
هند: ومش هديك يايوسف.. انت بتاع بنات يابابا..
ـ ياست والله دول صحابي مش اكتر..
هند: ميخصنيش.. لو سمحت ابعد عني عشان مش عايزه اعملك مشاكل..
يوسف: مش هبعد ياهند.. بقالي كتير بحاول اقربلك وانتي بتصديني... بس مش هيأس ع فكره.. وهفضل وراكي..
هند: يلا يانور عشان دا مبيفهمش...
_____________
ادم: بس كدا...
جاكي: اي السهوله دي!... دانا مكنتش فاهمه كلمه..
ادم: لا هو سهل بس انتي مش متعوده ف شرح الدكتور دا..
جاكي: شكرا والله مش عارفه من غيرك كنت هعمل اي...
ادم: هو احنا مش صحاب ولا اي!..
جاكي: صحاب طبعا..
ادم: خلاص.. مفيش الكلام دا بين الصحاب.. المهم المحاضره التانيه بعد نص ساعه.. تحبي تشربي حاجه ولا لما نطلع!..
جاكي: لا لما نطلع احسن..
ادم: صحيح!.. هو جاك ماله كدا!
جاكي: ماله ازاي!
ادم: مش بيطيقني ليه!
جاكي: مش عارفه والله بس هو عصبي شويه وخلقه ضيق... هو دا مش سبب مقنع.. بس انا حقيقي معرفش هو بيعاملك كدا ليه!
ادم: "بخبث"... بس انا عارف..
جاكي: طب ليه!
ادم: لا مش هقولك..
جاكي: لا قول والنبي مترخمش...
ادم: مش دلوقتي.. ويلا عشان نلحق المحاضره...
جاكي: ماشي يلا...
دخلنا المحاضره وهو جه قعد جنبي والصراحه شال من عليا حمل وتوتر كبير جدا باسلوبه ولطافته والحمد لله المحاضره خلصت وخرجنا.....
ادم: تعالي نروح ناكل حاجه..
جاكي: هي المحاضره الاخيره امتى!
ادم: بعد ساعتين كدا.. انتي مجوعتيش!
جاكي: لا جوعت جدا طبعا.. يلا
روحنا جبنا اكل وقعدنا ناكل وكنت مرتاحه جدا معاه ومش حاسه اني متوتره خالص... فضلنا ناكل ونتكلم ونهزر... وبعدين حضرنا المحاضره..
اليوم عدى وخلصت محاضراتي وطلعنا...
ادم: تعالي اوصلك..
جاكي: لا شكرا.. محمد هييجي دلوقتي..
ادم: طب خلاص هقف استناه معاكي..
وقف معايا وشويه ومحمد وصل...
محمد: جاكي..
جاكي:اخيرا جيت.. اتاخرت لي
محمد: كنت بعمل كام حاجه كدا... ازيك ياادم..
ادم: الحمد لله.. انت عامل اي!
محمد: انت بتعمل اي هنا!
ادم: جامعتي هنا.. معاها
محمد: فعلا!.. طب كويس.. نمشي ولا ايه..
جاكي: ااه يلا.. ادم ماتيجي معانا..
ادم: اجي فين!
جاكي: البيت.. حتى فيروز كانت عايزه تشوفك وتسلم عليك..
ادم: لا لا بلاش..
محمد: لا بلاش ليه!.. تعالى حتى تتعرف علينا اكتر..
ادم: لا عشان محدش يتضايق..
جاكي: لا والنبي تعالى.. ع الاقل تتعرف عليهم وتقعد معانا شويه... يلا يعم..
ادم: ماشي.. يلا
ركبنا ومشينا وطول الطريق نتكلم ونهزر لحد ماوصلنا...
محمد: فيروز!.. تعالي.. اتفضل ادخل..
فيروز: اهلا يابني..
ادم: اهلا بحضرتك ياامي..
جاكي: دا ادم يافيزوو..
فيروز: والنبي!.. تعالى يابني..
راحت حضنته وقعدت تبوس فيه وهو كان محرج جدا ووشه احمر..
فيروز: روح يوقفلك ولاد الحلال ويكرمك ويوفقك ويريح بالك يابني..
ادم: اي كل دا..
فيروز: ربنا يخليك ياحبيبي ويحميك لشبابك.. انا مش عارفه اشكرك ازاي والله ع اللي عملته معاها..
ادم: لا يامي دا واجب عليا...
محمد: طب جاكي.. هاتيله حاجه يشربها..
جاكي: ااه حاضر.. تحب تشرب اي!
ادم: لا شكرا ولا اي حاجه..
فيروز: لا متعمليش حاجه.. اصلا الغدا جاهز.. يتغدا الاول وبعدين يشرب..
ادم: اي دا.. لا.. ربنا يخليكي والله بس مش هينفع..
فيروز: انا قولتها كلمه وخلاص.. مش عايزه نقاش..
ادم: "باحراج".. جاكي شوفيها.. مش هينفع والله..
محمد: لا هي معاها حق.. خليك اتغدا معانا مفهاش حاجه يعني...
جاكي: خلاص مش هتخلص معاهم والله..
ادم: ماشي... طب ممكن مايه!
جاكي: ااه ثواني..
دخلت المطبخ ولقيت البنات دخلوا...
هند: بت بت..
جاكي: اي يازفته.. جيتي امتى!
هند: لسه واصلين.. بس هو مين المز دا!
جاكي: دا ادم ياستي..
نور: القمر دا ادم!
جاكي: ايون..
نور: ياحلاوه ياولاد.. وعندنا بيعمل اي!
جاكي: بس اتلموا بقاا انتوا الاتنين عيب... وبعدين تعالوا سلموا عليه..
طلعنا....
جاكي: اتفضل...
ادم: شكرا..
جاكي: دي هند ودي نور..
ادم: اهلا وسهلا
هند: اهلا..
نور: انت بقاا اللي انقذت جاكي..
بصلي وابتسم..
ادم: ايوا انا اللي انقذت جاكي..
هند: يعني بطل يعني وكدا.. طب احكيلي انقذتها ازاي!..
بصلي باستغراب اللي هو مين المجانين دول...
جاكي: بس يابنات.. معلش هما مخبولين شويه..
فيروز: قوموا يابنات حطوا الاكل عشان يتغدا معانا...
هند: حاضر...
دخلوا وجاك رجع..
محمد: تعالى شوف مين عندنا..
جاك: ادم!!!
ادم: ازيك..
جاك: اهلا.. هو في حاجه!
ادم: احم لا هو..
جاكي: انا عزمته عشان ييجي يتعرف ع فيروز وعمي وكمان هيتغدا معانا..
جاك: فعلا!.. وانتي شوفتيه فين!
جاكي: لا ماهو طلع معايا ف الجامعه..
جاك: اااه.. طب كويس.. اي اخبارك!
ادم: الحمد لله تمام..
هند: الاكل جاهز...
فيروز: تعالى يابني بقاا عشان تاكل وتقولي رايك..
دخلنا وقعدنا وادم قعد جنبي ومحمد وجاك قصادنا... وبدانا ناكل..
فيروز: وانت في سنه كام بقاا
ادم: انا ف تالته ياامي.. معاها..
هند: يعني بتحضروا المحاضرات مع بعض!
ادم: ايوا.. وكمان مع بعض ف نفس السكشن..
جاك: "بحده".. كويس.. كويس جدا..
ادم: اه كويس.. عشان اعرف ااخد بالي منها...
ادم اتكلم معاه بلهجه غريبه وجاك بصله بنظرات غضب...
فيروز: ربنا يخليك يابني والله.. ياريت كل الشباب زيك كدا..
محمد: قولي ياادم صحيح.. بتشتغل اي!
ادم: انا عندي محل ملابس واكسسوارات ع قدي كدا.. لحد مااتخرج يعني..
فيروز: هو انت اللي بتصرف ع اهلك يعني!
ادم: ااه.. انا بابايا متوفي من عشر سنين كدا...
فيروز: ربنا يرحمه ياحبيبي.. جدع ربنا يوفقك ويحفظك لاهلك..
ادم: ربنا يخليكي ياامي..
جاك: كل... كل ياادم الاكل هيبرد..
ادم: باكل اهو..
قاعدين يتكلموا ويتناقشوا وانا مركزه مع جاك اللي باصصله بحده وغضب وكنت حاسه انه هيقوم يكسر دماغه وحسيت ان ادم ملاحظ وبيغيظه كمان....
ادم: الحمد لله ع كدا..
فيروز: رايح فين..اقعد مكانك...
ادم: ياامي كلت والله تسلم ايدك..
فيروز: قولت اقعد..
كنت قاعده اضحك ع عنف فيروز معاه وهو خاف وقعد...
جاكي: كل ياادم.. كل
ميل عليا واتكلم وجاك بص...
ادم: هي عنيفه كدا ليه!
جاكي: مبتحبش تعمل اكل وميتاكلش..
قعدنا شويه وبعدين خلصنا....
الشباب طلعوا قعدوا ف الجنينه واحنا ساعدنا فيروز وبعدين طلعت قعدت معاهم...
ادم: طب انا همشي بقاا عشان طولت قووي..
جاكي: لا لسه بدري خليك شويه..
بصيت لقيت جاك ضربني ف رجلي من تحت الترابيزه..
جاكي: ااااه.. ا ا قصدي يعني لسه بدري..
ادم: لا يادوب الحق عشان المشوار..
محمد: طب تمام تعالى اوصلك..
لسه ماشيين وفيروز طلعت..
فيروز: استني يابني..
ادم: نعم
فيروز: امسك دول..
ادم: اي دا!
فيروز: دول شوية اكل لامك..
كلنا ضحكنا وهو ضحك جامد..
ادم: اكل لامي ازاي!
فيروز: ملكش دعوه انت بس.. قولها فيروز كانت عامله اكل حلو وقالتلي لازم تدوقي منه..
ادم بصلي وضحك..
ادم: حاضر.. متشكر جدا.. مع السلامه..
فيروز: مع السلامه ياحبيبي.. ربنا معاكوا...
هما مشيوا وفيروز دخلت وبقيت انا مع الثور الهائج بمفردي.. 🙂
عملت نفسي بقلب ف الموبيل عشان اتفادى نظراته المرعبه دي..
جاك: جاكي!
جاكي: اممم
جاك: بصيلي..
جاكي: نعم
جاك: خلي بالك من نفسك كويس..
سابني وقام وانا مستغربه جدا من رد فعله.. دانا فكرته هيكسر الدنيا وهيتعصب عليا..
قومت دخلت لقيت فيروز ف المطبخ..
جاكي: بتعملي اي!
فيروز: بعمل قهوه لجاك ياجميل... بس صحيح.. متعرفيش ماله!
جاكي: ليه!
فيروز: مش عارفه باين عليه متضايق..
جاكي: اديني انا القهوه دي اطلعهاله وانا اعرف ماله..
فيروز: ماشي...
خدت القهوه وطلعت... خبطت..
جاك: ادخل..
فتحت الباب ودخلت لقيته قاعد ع الكرسي وساند راسه ومغمض عينه..
جاكي: القهوه..
جاك: هو انتي!
جاكي:ااه
جاك:طب متشكر...
جاكي:...
جاك: في حاجه تاني!
جاكي: هو انت زعلان مني!
جاك: وهزعل منك ليه..
جاكي: مش عارفه بس...
لسه مكملتش كلامي وفوني رن وكان رقم غريب... حسيت ان في حاجه غلط..
جاك: في اي!
جاكي: لا دا رغم غريب..
جاك: مترديش..
جاكي: لا احسن يكون في حاجه..
جاك: هيكون في اي يعني!...
جاكي: بس انا حاسه ان في حاجه...
مسمعتلوش وفتحت...
ـ الو جاكي الحقيني!!!!!....
Part 26: 👀♥
لم يگُن لقاءنا صُدفه ابدا، كان رحمة من الله لقلبي♥🖇
ـ جاكي الحقيني!!!
جاكي بخضه: بابا!!..
جاك قام وقف...
جاكي: بابا في اي!
بابا بتعب: الحقيني يابنتي ابوس ايدك..
جاكي بعياط: طب اهدى طيب وقولي انت فين!
بابا: محمود حابسني ف المكان اللي كنتي فيه..
جاكي: ليه!
بابا: الحقيني يابنتي بالله عليكي... انا بموووت..
جاكي بعياط: حاضر..
فجأه الخط قطع
جاك: في اي!
جاكي: جاك الحقني ارجوك..
جاك: اهدي طيب وقوليلي ف اي!
جاكي: بابا.. محمود حابسه ف المكان اللي كنت فيه.. وتقريبا عمل فيه حاجه..
جاك: طب خلاص انا هروح اشوف في اي.. بس اهدي..
جاكي: انا هاجي معاك..
جاك: لا.. انتي هتفضلي هنا لحد مااجي..
جاكي بعياط: ابوس ايدك.. عشان خاطري..
جاك: طب تعالي بسرعه..
نزلنا نجري والكل اتخض...
فيروز: في اي بتجروا كدا ليه!
جاك: بعدين يافيروز...
ركبنا العربيه بسرعه وجاك طلع ع المكان اللي بابا فيه وانا منهاره وهموت من الخوف عليه..
جاك: اهدي ارجوكي..
جاكي: بسرعه والنبي
جاك: طب اهدي وبطلي عياط.. ان شاء الله هيكون كويس...
مشينا طريق طويل وجاك كان سايق باقصى سرعه لحد ما وصلنا وجاك وقف بعيد... كنت لسه هنزل راح جاك شدني..
جاك: استني لما انزل اشوف في حد جوه ولا لا..
جاكي: لا انا هنزل معاك..
جاك: افرضي في رجاله جوه!.. استني لو مفيش حد ادخلي.. دا غير انه ممكن يكون فخ اصلا..
جاكي: طب بسرعه والنبي..
جاك: خلي موبايلك ف ايدك واقفلي الباب والشباك وخليكي جوه.. لو حصل اي حاجه او حد طلع عليكي رني عليا او اطلعي بالعربيه بسرعه.. مفهوم!
جاكي: حاضر..
سابني ومشي واول ماقرب من المكان بدا يمشي بالراحه.. لحد مادخل..
غاب شويه وانا كنت هموت من الرعب..
شويه ولقيته طالع وشايل بابا وبابا مش بيتحرك..
اتصدمت اول ماشوفت المنظر...
جاك جه ركبه ورا وانا نزلت ركبت معاه وحضنته وفضلت افوق فيه..
جاكي بعياط: جاااك.. مش بيرد عليا..
جاك: اهدي انا هطلع ع المستشفى ع طول..
جاكي: بابا.. رد عليا الله يخليك.. بابا فوق..
جاك كان سايق بسرعه رهيبه لدرجة ان لو حاجه جت قدامه هتتفرم..
فضلت افوق فيه وهو مش واعي لاي حاجه ووشه كله دم...
جاك: انزلي بسرعه..
نزلنا وجاك نقله جوه المستشفى....
الدكتور: خليكوا بره لو سمحتوا...
جاكي بصراخ:.. لا انا هدخل معاه..
جاك: اهدي جاكي.. اهدي.. مينفعش تدخلي..
جاكي: جاك بابا بيموت..
عنيه دمعت ومسك وشي...
جاك: لا ياحبيبتي مش بيموت.. هيبقى كويس.. اهدي انتي بس..
محستش بحاجه غير وانا بحضنه وبعيط جامد...
جاك: خلاااص.. خلاص اهدي..
_______________
فيروز: محمد كويس انك جيت..
محمد: في اي!
فيروز بخوف: معرفش يابني.. جاك وجاكي طلعوا يجروا وجاكي كانت بتعيط ومقالوش في اي!.. وبتصل بيهم مش بيردوا..
محمد: طب خلاص اهدي.. انا هشوف في اي..
محمد رن ع جاك...
جاك: الو..
محمد: جاك انت فين!
جاك: ف المستشفى..
محمد: مستشفى ليه!
جاك حكاله اللي حصل وقاله ع المكان وبعدين قفل...
جاك: جاكي!.. حبيبتي..
جاكي بدون وعي: همم
جاك: عشان خاطري اهدي.. انتي كدا هتتعبي..
مسكت فيه جامد وانا حاضناه...
جاكي بعياط: انا عايزه بابا..
جاك: هيبقى كويس والله.. اهدي انتي عشان خاطري..
طب سيبيني اروح اجيبلك مايه..
كان بيكلمني وانا مش واعيه لحاجه.. فسكت وفضلنا كدا...
_____
فيروز: ف اي!
محمد: بيقول ان ابو جاكي ف المستشفى..
فيروز: يالهوي.. ليه!
محمد: مش وقته.. انا رايح وراهم..
فيروز: انا جايه معاك استنى..
هند: وانا كمان هاجي..
محمد: ياجماعه خليكوا هنا وانا هطمنكوا..
فيروز: ابدا... يلا امشي قدامي... وانتي رني ع ابوكي قوليله يحصلنا..
ركبوا العربيه وهند رنت ع باباها......
________
فضلت حاضنه جاك وبعيط ومش حاسه بحاجه غير ان المكان بيلف بينا.....
عدا شوية وقت ووصلوا... محمد دخل وشافنا.. وقف شويه وبعدين جه ناحيتنا..
محمد: جاك في اي!.. حصل امتى دا..
جاك: جاكي.. جاكي فوقي.. فيروز وصلت اهي..
يادوب بعدت عنه وفيروز حضنتني وعيطت...
فيروز: متقلقيش ياحبيبتي هيبقى كويس..
جاك: الدكتور هيخرج دلوقتي وهطمنا
فضلنا كدا شويه وبعدين الدكتور طلع فطلعنا نجري عليه..
جاك: خير يادكتور..
الدكتور: هو المريض كان فين!
جاك: كان مخطوف يادكتور.. المهم دلوقتي وضعه اي!
الدكتور: لا الحمد لله سيطرنا ع الوضع وشويه وهيبقى كويس..
جاكي: انا عايزه اشوفه..
الدكتور: حاليا صعب... ممكن بكرا..
جاكي: لا انا هدخله دلوقتي..
جاك: جاكي اهدي.. باباكي لازم يرتاح عشان يبقى كويس...
الدكتور: عايزك لو سمحت..
جاك: حاضر يادكتور..
جاك مشي معاه وانا قعدت مكاني وفضلت اعيط...
________
ـ فيهم الخير والله.. طلعوا ناس محترمين صحيح..
ادم: ااه والله ياماما.. لطاف قوي ومحترمين.. وخاصة فيروز.. لو شوفتيها هتحبيها قوي..
ـ طب كنت خدني معاك..
ادم: اخدك معايا فين ياماما هي سيما!.. ع العموم هي قالت عايزه تشوفك..
ـ خلاص اعزمهم عندنا..
ادم: ربنا يسهل..
منه: طب بيتهم عامل ازاي!
ادم: بيت اي دي فيلا..
منه: الله.. بجد!.. ياخساره ياريتني كنت هناك..
ادم: بس يابت..
منه: لو روحت تاني، خدني معاك بالله عليك..
ادم: حاضر..
____________
جاك: خير يادكتور في اي!
الدكتور: المريض واخد رصاصه ف رجله من فتره واظن في دكتور عالجه بس الجرح فضل ينزف... ودلوقتي واخد رصاصه ف ضهره من مده قليله جدا.. بس احنا الحمد لله انقذنا الموقف...
جاك: طب دا كويس اهو..
الدكتور: لا.. ماهو الرصاصه دي هتخليه ميعرفش يمشي تاني للاسف..
جاك بصدمه: ايه!!
الدكتور: هو ممكن بالعلاج والوقت يرجع يمشي تاني... بس دلوقتي صعب اوي..
جاك: المهم انه هيعيش مش كدا!
الدكتور: لا هيعيش ان شاء الله.. انا بس محبتش اقول كدا قدامهم
جاك: ويستحسن متقولش يادكتور.. بنته لو عرفت ممكن تروح فيها.. انا هعرفها بس بعدين..
الدكتور: تمام اللي يريحكوا..
جاك: عن اذنك يادكتور..
جاك خرج وجه عندنا..
جاكي: قالك اي!
جاك: قال انه بقاا كويس بس محتاج يرتاح شويه..
جاكي: يعني مش هشوفه دلوقتي!..
قعد قدامي ع الارض..
جاكي: لا مش هينفع.. احنا نسيبه يرتاح شويه عشان يصحى بسرعه.. وبكرا هتدخلي وتشوفيه وتتكلمي معاه كمان... ممكن بقا تبطلي عياط!
فيروز: ايوا يابنتي حرام عليكي انتي بتتعبي..
عمو احمد دخل...
عمو احمد: خير ياجماعه في اي!
محمد: اتطمن بقا كويس..
عمو احمد: حصل ازاي دا!
جاك: مش وقته ياجماعه لو سمحتوا.. اصلا وجودنا هنا ملوش لازمه.. كدا كدا مش هنشوفه غير الصبح..
عمو احمد: ليه الصبح!
جاك: الدكتور اللي قال كدا.. فلو سمحتوا قوموا امشوا وانا هفضل هنا..
محمد: جاك معاه حق.. وجودكوا هنا ملوش لازمه فعلا..
جاك: قومي روحي معاهم..
جاكي: لا مش هروح.. انا هفضل مع ابويا...
فيروز: ياحبيبتي هنجيله الصبح..
جاكي: لا مش هروح.. انا هقعد..
جاك: خلاص سيبوها... يلا روحوا انتوا عشان تظبتوا الدنيا ف البيت وابقوا تعالوا الصبح...
فيروز: انا مش هسيبها..
جاك: مابلاش عناد بقا.. قولنا وجودكوا ملوش لازمه..
عمو احمد: يلا يافيروز ونيجي الصبح..
مشوا وقعدت انا ومحمد وجاك..
جاك: روح معاهم يامحمد..
محمد: لا انا هفضل معاكوا طبعا..
جاك: طب بقولك اي...
خدوا ع جنب واتكلموا...
محمد: ماشي تمام...
جاك: متاخرش..
محمد سابه ومشي وهو رجع قعد جنبي...
جاك: جاكي.. انتي كويسه.. جاكي..
محستش بنفسي غير لما فوقت ع سرير..
جاكي: انا فين!
جاك: اخيرا فوقتي.. حرام عليكي قلقتيني..
جاكي: هو اي اللي حصل!
جاك: اغمى عليكي.. والدكتور عطاكي منوم عشان ترتاحي شويه..
جاكي: هي الساعه كام!
جاك: الساعه 8..
جاكي: انا نمت كل دا!
جاك: صحيانك مش هيقدم حاجه.. ع العموم قومي عشان تاكلي..
قومت قعدت ودموعي نزلت لوحدها..
جاك: كفايه بقاا.. هيغمى عليكي تاني..
جاكي: الدكتور مقالش حاجه تاني!
جاك: لا هو قال انه كويس ومفهوش حاجه.. اهدي بقاا وخدي كلي..
جاكي: لا مش عايزه..
جاك: لا لازم تاكلي عشان متتعبيش..
جاكي: كل انت.. انا مش عايزه..
جاك: طب بصي.. انتي تاكلي دلوقتي عشان لو ماكلتيش هروحك ومش هجيبك هنا غير الصبح.. عشان انتي ممكن تتعبي تاني قدامه.. ولو تعبتي قدامه هو هيتعب اكتر.. واحنا عايزينه يصحى بسرعه.. قولتي اي!
جاكي:.......
جاك: انا بقول كدا بردوو..
جاب الاكل وحطوا قدامي..
جاك: يلا...
جاكي: ااه دا دلع بقاا عشان اأكلك انا.. زي مابتنزلي دموعك عشان امسحهالك كدا... انا عارف شغل البنات دا... بس ريحي نفسك مش هتعرفي تتحرشي بيا بردو...
ابتسمت ووديت وشي بعيد..
جاك: اي دا ماحنا بنضحك اهو... يلا بقا خدي..
جاكي: خلاص حطه وانا هاكل..
جاك: لا انا اللي هأكلك ياست.. ماهو دلع فاضي اصلا...
قعد يأكلني...
جاكي: وانت مش هتاكل!
جاك: لا انا تمام..
جاكي: خلاص مش واكله..
جاك: اي هو دا!.. انا حر ياست..
جاكي: وانا كمان حره..
جاك: ماشي بس اكليني انتي..
جاكي: هاا
جاك بضحك: بهزر معاكي...
وبعدين صحيح.. مين جاب الواد الملزق دا عندنا..
جاكي: انا..
جاك: لا وفخوره.. وانا قولت اي!
جاكي: عادي يعني.. صاحبي وعزمته..
جاك: صاحبك تاني!
جاكي: امال اقول عليه اي طيب!
جاك: متجيبيش سيرته خالص.. عيل ملزق ورخم..
جاكي بابتسامه: انت بتغير منه ليه!
جاك: وانا هغير ليه ياختي.. الهي يولع
جاكي: بعد الشر..
بصلي ورفع حاجبه..
جاكي: حرام تدعي عليه.. هو معملش حاجه..
جاك: دانا ماصدقت خلصت منه...يروح ربنا حاطه ف نفس جامعتك عشان يتزرع ف حياتي... استغفر الله العيظم يارب..
كنت بصاله ومبتسمه...
جاك: بتبصيلي كدا ليه!
جاكي: شكلك حلو وانت غيران كدا..
جاك: ع فكره انتي عماله تتغزلي فيا وانا حاسس ان المرحله الجايه هتبقى تحرش فربنا يستر..
جاكي بضحك: لا متقلقش انا محترمه مش بتحرش بشباب..
جاك: امال بتتحرشي ببنات!!!!
جاكي: اي القرف دا!!!.. لا طبعا.. قصدي مش بتحرش خالص..
جاك: طب قولي بقاا للواد الملزق دا ميجيش عندنا تاني..
جاكي: ليه!
جاك: هو لازقلك ليه!... واحد وعمل معانا جميل وشكرناه عليه.. لازق ليه بقاا!
جاكي: بيحبني..
بصلي وتنح..
جاكي: بيحبني زي اخته وبيخاف عليا..
جاك: امم.. كفايه احنا بنحبك وبنخاف عليكي.. فكك منه بقاا..
جاكي: تؤتؤ..
جاك: والله!
جاكي: اهااا
جاك: طب انا كنت جايب حاجه كدا والظاهر انك متستاهليش... قام وقف ومسك فراوله ف ايده..
جاكي: اي دا فراوله!.. هات بالله عليك..
جاك: تؤتؤ..
جاكي: بطل رخامه بقاا..
جاك: رخامه كمان!
جاكي: لا ياقمر دانت حبيبي والله يانهار ابيض.. هو في زيك.. هات بقاا
جاك: هتكلمي الواد دا تاني!
جاكي: تؤتؤ.. هو انا اقدر اقولك لا!
جاك: جدعه خدي..
خدتها منه وهو قعد وكنت عارفه انه بيحاول يهزر ويلطف الجو عشاني.. شويه وحسيت ان دماغي بتلف..
جاك: في اي!
جاكي: مش عارفه دماغي بتلف..
جاك: طب يلا بقاا نامي عشان متتعبيش تاني..
حطيت راسي ع المخده وهو غطاني وقفل النور وقعد قدامي...
نعست ع طول ومحستش بحاجه تاني....
تاني يوم...
قومت قعدت ع السرير... جاك كان نايم.. كان قاعد ع الكرسي ومميل براسه ع السرير جنبي...
قومت بالراحه عشان ميحسش بحاجه وروحت عند ابويا..
فتحت باب الاوضه ودخلت..
وفجأه...
جاكي بصراخ: جااااا