الحلقه الرابعه والعشرون من رواية
قلوب تنزف عشقاً
بقلم :عبير سليم
😰😰😰😰😰😰😰
يتحدث إلى حبيبة القلب فى التليفون
خلاص ياحبيبة قلبي الهم الكبير حينزاح من قدامنا وحفوقلك ياقمر
جميله :ياااه انا مش قادرة اصدق أخيراً سميرة وافقت على سعد
سامي :بس تعبتنا اوي ده احنا كلنا كنا عليها الاهل والجيران والناس ده احنا لو كنا بنحفر قناة السويس كان حيبقى أرحم
جميله :هههههههه طب قوللي بقى الخطوبه امتى
سامي :الأسبوع الجاي ان شاء الله
جميله :وحتيجى تخطبني بعديها
سامي :طبعا ياحبيبتي
جميله :بس في مشكله ياسامي
سامي :مشكلة إيه يابت
جميله :الشغل يافالح حتقول لبابا بتشتغل ايه بتلم العيال وتلعب معاهم كورة في الشارع
سامي :لا ده انا محضرلك حتة مفاجأة انما ايه عنب
سميرة :اخس عليك يا سامي ومخبي علية انت ورثت من ورايا واللا إيه
سامي :اه ورثت حورث مين ياحسرة عمي اللي فامريكا واللا خال اللي فهولندا
يا موكوسه ده احنا نص عيلتنا بتكمل عشاها نوم يابت
جميله :امال ايه طيب
سامي :حقولك عشان ترتاحي مانا عارفك زنانه انا ويحي اتفقنا حنفتح جيم سوا هو التمويل وانا الإدارة
جميله :بقى يحي حيشاركك فجيم انت بتستغفلني ياسامي عاوز تضربني على قفايا
سامي :واستغفلك ليه ياام قفا انتي
جميله :عشان انا مش مقتنعه ان يحي يشاركك هو محتاج
سامي :انتي مالك يافقر انتي مش المهم ان في شغل وخلاص فقريه انبري فيها مانا عارفك لما بتنبري فحاجه بتجيبي أجلها
جميله :بقى انا فقريه طب ولما انا فقريه بتحبني ليه
سامي :عشان نصيبي وقسمتي السوده وخدي التقيلة بقى انا خايف ان ابويا هو اللي ميوافقش عليكي إيه رأيك بقى
جميله :نعم ياعنيه ابوك ميوافقش علية ليه ان شاء الله مشبهش واللا مشبهش
سامي :لا لو عالشبهه انتي تشبهي بلد
جميله :بقى كده ياسامي
سامي :يخرببيتك بهزر معاكي ياغبيه انا حفهمك ياللي مبتفهميش ابويا عندي عقده نفسيه عاوز العيله كلها تبقى حرف السين وممكن ميرضاش لما يعرف اناسمك بادئ بحرف الجيم
جميله :تصدق ان على لساني كلمه عاوزة اقولهالك بس انا متربيه ومحترمه وبت ناس
حرف سين ايه وزفت ايه اللي بتتكلم عليه انتوا اتهبلتوا واللا ايه
ماهو لو انتوا مثلا عندكم اطيان وشركات وعزب وابوك عاوزك تتجوز من العيله عشان الثروة متخرجش برة كنت قلت بتحصل في أحسن العائلات
لكن تقولي حرف السين لا ده انتوا تبقوا مجانين رسمي
سامي :بت انتي انا ساكتلك من الصبح مش عاوز اقل ادبي عليكي اه كله الا ابويا انتي اتخبطتي فمخك والا ايه ابوياقال لازم اتجوز واحده بحرف السين يبقى لازم اسمك يبقى بحرف السين
جميله :عوض علية عوض الصابرين يارب وانا حخللي اسمي بحرف السين ازاي ده اسمي مفيهوش حرف السين اصلا
سامي :احنا نخليه بحرف السين بصي افهمي انا حفهم ابويا ان اسمك مثلا سهيله سمر سماح ان شالله حتى ست ابوهم هو ساعتها الدنيا مش حتساعه من الفرحه وحيوافق على طول
جميله :يقوم كاتبلك العزبه باسمك لا ده انتوا مجانين رسمي أقسم بالله
سامي :بصي بقى انتي غبيه وشكلي كده حفركش ام الليله دي ومفيش خطوبه ياللا غوري
جميله :واهون عليك ياسماسيمو يهون عليك حبنا يموت قبل مايشوف نور الشمس
سامي :تصدقي صعبتي علية ياست فاتن حمامه
اسمعي الكلام بس وحتكسبي وربنا
جميله :الصبر من عندك يا رب اتفضل قول اما اشوف اخرتها إيه مع عيلة المجانين دي
❤️❤️❤️❤️❤️❤️❤️❤️
في صباح يوم جديد
يركب السيارة وبجانبه حبيبته الصغيرة في طريقهم للعوده إلى الفيلا
حمزة :سيلا ياسوسو
سيلا بنعاس:ايوة
حمزة :انا آسف ياحبيبة قلبي صحيتك من النوم بدري بس حعمل إيه انا قلت عشان نلحق نزور باباكي ونرجع وارجع انا تاني عالشركه
سيلا :ايوة
حمزة :بصي حبيبتي لو ياسمين سألتك كنتوا فين حتقولي إيه
سيلا :معرفش كنت مع بابي
حمزة :شطورة حبيبة بابي
سيلا:حاضر حاضر
يصلون إلى الفيلا ليجدها جالسه في انتظار عودتهم
فيشعر بدقات قلبه التي لا يستطيع السيطرة عليها بمجرد رؤيتها
مشاعر يحاول تجاهلها والتحكم فيها بكل مااوتي له من قوة ولكن كيف لتلك المشاعر ان يسيطر عليها وهي التي تسيطر عليه
تجري عليها سيلا :يويو يويو حبيبتي
فتحتضنها ياسمين :كده بردو اجي ملقيكيش
فتنظر سيلا لحمزة
حمزة :كان عندنا مشوار ضروري وكان لازم أعمله قبل مااروح الشركه
ياسمين :فطرتي ياقلبي
حمزة :أكيد طبعا حتكون فطرت مش حخرجها من غير اكل يعني
ياسمين :افتكر اني موجهتلكش كلام انا بكلم البنت
حمزة :ياسمين
ياسمين :على فكرة أنا يوم الخميس الجاي مش جايه
حمزة :ليه ان شاء الله
ياسمين :عندي ظروف حاجه خاصه تمنعني اجي اليوم ده وانا ببلغك من دلوقتى عشان تعمل حسابك
حمزة :أعمل حسابي ازاي يعني اخدها معايا الشركه واللا اعمل إيه حضرتك
ياسمين :والله دي مشكلتك مش مشكلتي
حمزة :على اساس انك بتشتغلي فطوبانه والا ايه اعملي حسابك لو غبتي اليوم ده حيتخصم اسبوع من مرتبك
ياسمين :عادي متعوده وبعدين لو مضايق اوي ارفدني وريح نفسك
حمزة بينه وبين نفسه:تريحيني وانا ازاي الاقي راحتي وانتي بعيده عني وازاي اقدر ابعدك عني بعد ما رجعت
عينيه تشوفك
ياسمين :مردتش يعني
حمزة:عاوزاني أرد أقول ايه قوليلي عندك ظرف إيه الاول
ياسمين :خطوبه
حمزة بخصه:خطوبه خطوبة مين انطقي انتي حتتخطبي
ياسمين :ومالك انفجعت كده ليه إيه عندك مشكله اني اتخطب
حمزة :ايه لا طبعا مانتي خلاص بقيتي متعوده بس على الله تكوني اتشطرتي المرة دي ووقعتي حد كويس ومتطلعيش هبله زي المرة اللي فاتت وتاخدي بمبه
ياسمين :ملكش فيه هبله هبله شئ ميخصكش
حمزة :خطوبة مين ياياسمين
ياسمين :ايه غيران واللا حاجه
حمزة :وانا إيه اللي حيخليني أغير براحتك عالاخر انا راجع الشركه
يقبل سيلا ويخرج متوجها للشركه بينما هي تتتبع اثره ودموعها تنهمر رغما عنها
:يعني انت زعلان اوي مني وبتعاملني بالطريقه دي عشان جوازي وانت ياحمزة متجوزتش أول ماسافرت وخلفت كمان
جاي تلومني على حاجه وانت عملت اللي اكتر منها
ماشي ياحمزة خلينا كده اما نشوف آخرتها إيه
سيلا :يويو حبيبتي انتي عيطي ليه
ياسمين وهي تنظر لها:مامي كانت حلوة زيك كده ياسيلا
سيلا :بابي بيقوللي اه شبه مامي
عاوزة العب أنا
ياسمين :ماشي ياللا بينا
تلعب معها ولكن قلبها وعقلها مع من أخذه ومشى
بينما هو لم يكن حاله بأقل منها فقد كان يقود السيارة وهو يكاد عقله ان ينفجر من شدة التفكير
أخذ يضرب على المقود بكل قوة عله يستريح من النيران التي تشتعل بداخله
تاني ياياسمين تاني عاوزة تدبحيني تاتي انتي ايه ياشيخه ايه مبتحسيش قلبك ده خلاص بقى حجر
فيخاطبه قلبه:بس هي ماقلتش انها خطوبتها يمكن خطوبة حد تاني انت متعرفش وانت عارف انها بقت بتعاملك بنفس معاملتك ليها وممكن تكون قالت كده عشان تستفزك مش اكتر
يخبط حمزة على قلبه:انت تخرس خالص مش عاوز اسمعلك صوت ماشي ياياسمين ماشي عينيا سهله ياياسمين
يصل إلى الشركه ويتوجه إلى مكتبه مباشرة
فتطرق عليه الباب وتدخل:اتاخرت النهارده سنيور حمزة
حمزة :كنت عند جابر
صوفيا:مفيش جديد لسه
حمزة :أبدا ياصوفيا زي ماهو
صوفيا :ربنا كبير
حمزة:ونعم بالله طمنيني ياصوفيا إيه الأخبار
صوفيا :انا حددت معاد اخر الاسبوع اقابل فيه المتقدمين للوظائف الجديده
حمزة :تمام أوي بس في كتير اتقدموا
صوفيا :ياااه كتير جدا بس انا حاخد اللي عنده خبرات سابقه ومعاه شهادات تثبت كفاءه
حمزة :ماشي ياصوفيا
صوفيا :على فكرة في حاجه حصلت
حمزة :حاجة ايه خير
صوفيا :مسئولين الشركه فايطاليا بيقولوا في مشكله في التوقيعات
حمزة : معناه ايه الكلام ده
صوفيا :معناه انك لازم تسافر ايطاليا بنفسك
حمزة :احجزيلي على اول طياره
صوفيا :حاضر
حمزة:صوفيا وراكي حاجه النهارده بعد الشغل
صوفيا :لاء ليه في حاجه
حمزة:هي سيلا موحشتكيش واللا إيه
صوفيا :ياااه وحشتني أوي طبعا
حمزة :خلاص تبقي تيجي تتغدي معانا إيه رأيك
صوفيا :اوكيه تمام مفيش مشكله
❤️❤️❤️❤️❤️❤️❤️❤️
كنت قلتلك من كام يوم ان عندي اقتراحات ممكن تظبط الشغل وتحقق ارباح كويسه للمكتب
ميرا :اه بس وقتها اتصلوا بيك وانت خرجت ومكملناش كلامنا
أكمل :ايوة فعلا ده حقيقي
ميرا :طب اتفضل قول الاقتراحات دي
أكمل :طول ماحنا بنشتغل مع الشركات الصغيرة مش حنوصل للي يرفع المكتب لازم الشغل يبقى على كبير ولازم تبتدي تفكري توسعي مجال شغلك وتشتغلي مع الشركات الكبيرة
ميرا :ايوة مانا حاولت فعلا يااكمل اخد الخطوة دي بس للاسف اتصلت بكام شركه كده لقيتهم بالفعل متعاقدين مع مكاتب وحتى لما قلتلهم اننا حنعملهم عروض كويسه رفضوا
اكمل :ايوة ماده عشان المكاتب دي هما اتعودوا عليها وعلى شغلها من سنين
الفكرة اننا لازم نخرج برة الدايرة اللي احنا فيها ومنقتصرش على اسكندريه بس لازم نحاول مع المحافظات واهمها طبعا القاهرة دي العاصمه وبيكون فيها عدد كبير جدا من الشركات
والفترة الأخيرة بالذات ظهرت اكتر من شركه جديده احنا ممكن نتصل بيهم ونعرض عليهم الخدمات اللي بيقدمها المكتب كلها وانا متأكد اننا ان شاء الله حنقدر نوصل للي عاوزينه
ميرا :طب هو انت عندك فكرة عن حد من الشركات دي ممكن نتصل بيه
اكمل :ايوة في حوالي تقريبا اربع شركات واهمهم شركه لسه يادوب بتبدا تقف على رجليها مديرها رجل اعمال مصري كان عايش في ايطاليا ولسه نازل قريب بس عامل شركه كبيرة واكيد حيكون لسه متفقش مع حد عشان كده انا لازم اتصل بيهم على اسرع وجه
ميرا: 'ماشي يااكمل وانا معاك اعمل اللي انت عاوزه
اكمل :اللي انا عاوزه ان مكتبك ده يبقى اكبر مكتب فاسكندريه
ميرا:طول مانت معايا اكيد حيبقى اكبر مكتب
يتوقف بهما الزمن للحظات قليله كل منهما يتوه في عيون الآخر لم يقطع عليهما تلك اللحطه سوى الدق على الباب
ميرا :ايوة يامها في حاجه
مها :فى واحده اسمها ريم عاوزة دكتور أكمل
ينطر أكمل لعيون ميرا التى امتلئت بالاسئله عن تلك المرأة التي سمعت اسمها اكثر من مرة ولكنها لم تتجرأ ان تقتحم حياته وان تسأله عن هويتها
اكمل :خليها تدخل يامها ده بعد اذنك يا مدام ميرا
ميرا:اه طبعا خليها تتفضل يامها
تدخل امراة في الخامسه والثلاثين من عمرها ذات ملامح خمريه هادئه يظهر على وجهها الحزن ترتدي فستانا فضفاضا محتشما يظهر براءتها وعلى راسها حجابا يزين وجهها الطفولي وتحمل على كتفها طفله صغيرة جميله تشبهها إلى حد ما
ريم:السلام عليكم ورحمة الله وبركاته
يردون عليها:وعليكم السلام ورحمة الله
ريم :انا آسفه يااكمل بس انا رنيت عليك اكتر من مرة تليفونك بيديني جرس ومبتردش فاضطريت اطلع
أكمل :اسف ياحبيبتى أنا اصلي سايبه فمكتبي حقك علية تعبتك
هاتي عنك البنت
ياخذ منها الصغيرة ويحتضنها بكل حب
لا ننكر بأن ميرا انتابتها الغيرة الشديده في هذه اللحظه
ولكن أكمل اراد ان يحسم ذاك الموقف ليعلمها بشخصية من تظنها زوجته فيلف يده حول كتف ريم ليعرفهما ببعض
اعرفك ياريم:استاذه ميرا صاحبة المكتب
ريم :اهلا بحضرتك
ميرا:اهلا بيكي نورتي المكتب
أكمل :والقمر دي بقى تبقى ريم اختي والنونه العسل دي تبقى جنه بنتها
لم تستطع ميرا إخفاء فرحتها بهذا الأمر فقد ارتسمت الابتسامه على وجهها
ووجدت نفسها تمد لها يدها وتسلم عليها بحب
ثم تمد يدها لتحمل الصغيرة من أكمل
بسم الله ماشاء الله ايه القمر دي
دي عسول اوي ربنا يحميها يارب
ريم :حبيبتي ربنا يخليكي شفت يااكمل سبحان الله برغم ان جنه مبتسكتش مع حد بس سكتت معاها
أكمل :اه فعلا غريبه دي
ميرا :ايه انتوا حتحسدونا والا ايه شايفه ياجنه متغاظين عشان انتي ساكته معايا شكلنا انا وانتي حنبقى صحاب
ريم :ده شرف لينا والله
ميرا :الشرف لية حبيبتي انتي واقفه ليه تعالي اقعدي
ريم :معلش والله مش حينفع مرة تانيه ان شاء الله معاد الدكتور قرب وحنتاخر وهو بياخد مجموعه بالعدد ويمشي
أكمل :معلش يا ميرا انا اصلي كنت متفق مع ريم تعدي علية عشان اروح معاها استشارة جنه مبحبهاش تمشي لوحدها بخاف عليها فبعتذر انا مضطر استئذن
ميرا :ياخبر اتفضل طبعا والف سلامه على جنه حبقى اتصل بيك اطمن عليها ان شاء الله
اكمل :ان شاء الله
يأخذ اخته وينزلان للحاق بميعاد الطبيب بينما هي تسعد كثيرا بمعرفتها بحقيقة تلك العلاقه التي ظنتها زواجا
فأخذت تحدث نفسها :الله انت اتهبلتي ياميرا بتضحكي على ايه طب حتى وان طلعت اخته بس هو اكيد متجوز يعني امال الدبله اللي فصباعه دي ايه خايف على نفسه من الفتنه
❤️اه بالظبط كده هههههههه
ريم :انت بتهزر لحد امتى يااكمل بس حتفضل تخبي مشاعرك ناحيتها لحد فين البنت شكلها بتحبك جدا واضح جدا على وشها حبها ليك
حرام تعذب نفسك وتعذبها بالشكل ده
اكمل:لحد ماحاجه تتغير فحياتي ياريم غير كده لاء
ريم :اللي يسمع كلامك ده يقول انك بتدور على شغل واللا مش لاقي سكن في ايه يااكمل مالك
أكمل :في اني زمان كنت دكتورها في الجامعه واترفضت و اتهنت ودلوقتى ايه الجديد الجديد اني بشتغل عندها
لاء ياريم لاء انا مش عاوز ادخل حياتها تاني غير لما ابقى ادها وقتها حقدر اتقدملها تاني
ريم :ومين قالك انها وقتها ممكن توافق بيك اصلا او ممكن تكون ارتبطت بالفعل ماهي اللي زي ميرا دي حتقعد ليه اخلاق ومال وجمال
اكمل انت عرفتها باللي مامتها عملته زمان وانك كنت حتترفد من الجامعه بسببها
أكمل :لاء ياريم احنا مفتحناش سيرة الماضي
ريم :كمان يعني هي اصلا موجوعه منك لاعتقادها انك زمان سيبتها وهربت ودلوقتى كمان بدل ماتطبطب عليها وتفهمها اللي حصل وتلحقوا تعوضوا اللي فاتكم لاء مستني حضرتك لما تحرر القدس عشان تكلمها
أكمل :انتي بتتريقى ياريم
ريم:اكمل ممكن اسالك سؤال وتجاوبني بصراحه
أكمل :اكيد طبعآ
ريم :هو موضوع انها كانت متجوزة قبل كده وكان فيه راجل فحياتها سبب لبعدك عنها
أكمل :لا والله ابدا اطلاقا انا عمري مافكرت في الموضوع ده للحظه
صحيح منكرش اني وقت ماعرفت انها اتجوزت وشفت صور الفرح واجزاء من الفيديو انا انهارت لأني متخيلتش انها حتكون لغيري
لكن والله كنت بتمنالها السعاده من كل قلبي ولما عرفت بردو خبر انفصالها ده عمره ماقللها فنظري بالعكس انا حمدت ربنا وشكرته لأني دايما كنت بدعي ربنا ان لو لية نصيب فيها ترجعهالي
ريم:يبقى متضيعش الوقت يااكمل والحق افرح ياحبيبي العمر بيجري الحق اتجوز وخلف أفرح باطفال يملوا عليك حياتك يبقوا فرحتك تحقق فيهم كل آمالك يبقوا سندك وعكازك وقت ماالزمن ييجي عليك
اكمل وهو يركن السيارة :حاضر يا ريم ياللا بينا
ريم :ربنا يخليك لية يااكمل تعباك معايا يااخويا
اكمل :حبيبتي انتي تعبك راحه وربنا يعوض صبرك خير يارب
ريم :فولادي يااكمل انا مش عاوزة عوض غير فولادي
اكمل :ربنا يباركلك فيهم ويحميهم يارب
ريم :يارب يااكمل يارب
❤️❤️❤️❤️❤️❤️❤️❤️
يوشك النهار على الانقضاء
تقف في الشرفه المطله على البوابه تتحدث الى امها لتطمئن عليها وعلى دوائها
ترى سيارته تدخل الفيلا لترتعش يداها ويدق قلبها كالمعتاد فتغلق مع امها الهاتف
ولكنها تتفاجأ بدخوله ثم دخول سيارةاخرى وراءه ولقد ازدادت دهشتها وتعجبها عندما وجدت امرأة جميله تشبه تماما الممثلات التي تشاهدهم في التلفاز تنزل من السيارة الاخرى
فسألت نفسها:يا ترى مين دي كمان
تاخذ سيلا بيدها وتنزل للاسفل لترى من تلك التي يصطحبها حمزة
ولكن بمجرد دخولهم الفيلا ونزولها هي والصغيرة على السلم وما ان لمحت صوفيا
حتى قفزت تجري على السلالم:صوفيا جت صوفيا جت
صوفيا وهي تحتضنها بكل حب:حبيبة قلبي الصغنونه عمله ايه وحشتيني أوي
سيلا :انا زعلانه منك
صوفيا :الجميل زعلان مني انا لا انا مقدرش
سيلا :انتي مش تيجي هنا
صوفيا :حبيبتي اسفه والله عندي شغل كتير اد كده
فضحكت سيلا وتبعتها ضحكات صوفيا
بينما كان حمزة عيناه على تلك التي يكاد الشرار ان يتطاير من عينيها
حمزة :انتي واقفه عندك كده ليه
ياسمين :نعم ايه واقفه عادي في حاجه
حمزة :اتفضلي ادخلي لنعمه قوليلها تجهز الأكل احنا جايين جعانين جدا وياريت تساعديها
ياسمين :نعم اساعدها فايه ان شاء الله
حمزة :تحطي معاها الاكل عالسفرة فيها مشكله دي
ياسمين :حضرتك عارف ان ده مش شغلي انا وظيفتي هنا بيبي سيتر للبنت مش خدامه حضرتك عن اذنك ياللا يا سيلا
حمزة وهو يمسك سيلا:سيبي البنت حتاكل معانا
فتتركها من يدها وتتحرك للخارج لعلها تستطيع التنفس بعد تلك الاهانه
بقى انت عاوزني اخدم عليكم ياحمزة خلاص بقيت عاوز تذلني للدرجه دي وياترى مين دي كمان اللي جايبها فايدك وانت جاي ماشي ياحمزة بقى كده بقى انا استاهل منك توجع قلبي كده قلبي اللي حبك تعمل فيه كده
فى الداخل
صوفيا :حمزة هو في إيه انا مش فاهمه حاجه مين دي وازاي بتتكلم معاك بالطريقه دي
حمزة :حفهمك بعدين ياصوفيا
تعالي بس ناكل دلوقتى
سيلا تعالي حبيبتي كلي
سيلا:لاء انا اطلع يويو زعلانه
تتركهم سيلا وتخرج لياسمين التي ماان راتها ابتسمت لها فهي حقا الشئ الوحيد الذي يسعدها في هذا المكان
سيلا :يويو ياللا بينا جوة
ياسمين :حاضر يا قلبي ياللا بينا
تدخل مرة اخرى دون ان تعيره اهتماما ولكنها كانت تنظر لهما خلسه وهما يتناولان الطعام ويضحكان سويا
حمزة:ياسمين من فضلك عاوز سيلا تاكل معانا
سيلا:مش عاوزة بابي
ياللا يايويو ياحبيبتى
حمزة :يادي النيله حتى البنت بقت مبتعبرنيش وبترد علية هيا كمان طب ماشي عينيه
حمزة :ممكن ياسيلا تقولي لنعمه تحضرلنا القهوة
سيلا :ماشي
نعمه نعمه
نعمه:ايوة ياست البنات
سيلا :بابي عاوز قهوة
نعمه:حاضر من عينيه
تعد نعمه القهوة بينما تطلب منها ياسمين ان تعطيها اياها لتقدمها لهم هي
نعمه :انتي اللي حتقدميها
ياسمين :انتي ايدك مش فاضيه خليكي انتي
تاخذ منها القهوة وتتجه اليهم حيث كانوا يجلسون فتتعمد ان توقع القهوة على ملابس صوفيا
صوفيا :ايه ده انتي مبتشوفيش انتي غبيه
برغم من ان ياسمين هي من تعمدت ذاك الامر الا انها شعرت باهانه شديده من هذه الكلمات ولم تستطع الرد انتطرت ان يرد حمزة عنها ولكنها وجدته ينطر دون ان يتحدث بل ويحاول ان يهدئ صوفيا
صوفيا اسف حقك علية تعالي ظبطي هدومك في التويلت
صوفيا:خلاص ياحمزة خلاص
معلش انا حمشي
حمزة :مينفعش تمشي بالشكل ده
صوفيا:يعني هو انا حركب مواصلات مانا معايا عربيتي بس بجد مش حينفع لازم امشي
حمزة :طب استني ياصوفيا نشوف لو في حرق حصل
صوفيا :خلاص ياحمزة انا حتصرف
خرجت صوفيا سريعا فقد تضررت من وقوع القهوة عليها وقد بدا على وجهها الاحساس الألم
هنا شعرت ياسمين بجراء مافعلته بتلك المرآة فهي لم تتسبب لها في مشكله او تضايقها لتفعل بها ما فعلته ولكن ماذا عساها تفعل وهي لا تعلم من تلك المرأة التي تجلس بجوار حبيبها وتشاركه طعامه وضحكاته
دخل حمزة المطبخ وبصوت عال:نعمه
نعمه وقد تركت ما بيدها :ايوة حضرتك
حمزة :هو انا قلتلك تبعتي القهوة معاها وهو يشير باصبعه على ياسمين
نعمه :انا والله مليش دعوة
ياسمين :نعمه ملهاش دعوة انا اللي اخدت القهوة من غير ماتشوفني وطلعتهالكم
حمزة لنعمه :مخصوم منك يومين عشان بعد كده تشوفي شغلك صح
وتركزي فلقمة عيشك
اما انتي بقى فحسابك معايا بقى تقيل أوي
ياسمين :تخصم منها يومين ليه ايه الجبروت ده هي عملت إيه الغلبانه دي انا اللي اخدت القهوة وانا اللي اتعمدت اوقعها على هدومها هاه ايه رايك بقى
لم يشعر بنفسه الا وهو يدفع يدها التي صوبتها في وجهه وهي تتحدث
في نفس الوقت الذي كانت فيه نعمه واضعه الأكواب الزجاجيه
ازاحت يد ياسمين الاكواب الزجاجيه مماتسبب في كسر بعضهن واصابة يد ياسمين
لم ينتبه لصوت تالمها بقدر ماانتبه لتلك الدماء التي تتساقط من يدها
لم تكن تلك الدماء تتساقط من يديها بل كانت تتساقط من قلبه الذي تالم ونزف من شدة عشقه لها
ياسمين ايدك ايدك
ياسمين وهي تسحب يدها من قبضته :سيبني ملكش دعوة بايدي
حمزة:سيبي ايدك يامجنونه ايدك بتنزف
نعمه هاتي الشاش والقطن بسرعه
نعمه:حاضر حاضر
بينما هو يمسك بيديها تحت صنبور الماء ليرى مدى الجرح الذي اصاب يدها كاد قلبه ان يتوقف من شدة خوفه عليها
الهذا ياقلب مازلت تحبها كيف لك ان تخاف على يدها من جرح سينزف قليلا ثم يطيب وقد تركت قلبك ينزف بلا رحمه ولا شففه
وبقدر ماكانت تتألم من جرح الزجاج ليدها بقدر ماكانت سعيده بتلك اللهفه التي راتها في عينه وخوفه عليها
نعمه :اتفضل حضرتك
مسك القطن والشاش وربط لها يدها جيدا
كل ذاك وهي لم تنطق بحرف فقط تنظر له تلهب انفاسه احساسها وقلبها تود لو ترتمي باحضانه لتشكو لها عما حدث لها من مصائب الزمن ولكن كيف ذلك وهو يراها المذنبه وبائعة الهوى
انتهى من لف الشاش واطمئن على يدها
ثم عاد مرة اخرى لتلك الهيئه التي يحاول ان يرتسمها عليها
عاجبك االي بيحصل ده
شفتي عمايلك بتوصلنا لفين
ياسمين وهي تحاول ان تتحمل الألم :عمايلي انا واللا عمايلك انت
انت اللي بديت يااستاذ حمزة بقى كنت عاوزني اخدم عليك انت والبرنيبسه بتاعتك وانتوا بتاكلوا كالها السم ان شاء الله
ودي مين بقى ان شاء الله حبيبة القلب الجديده
حمزة :وانتي مالك يشغلك في ايه الجديده واللا القديمة
مااحنا بنتعلم منك يااستاذه الخسه وقلة الأصل
ياسمين :أخرس خالص انا لاعمري كنت خسيسه ولا قليلة الأصل وكلامك ده وعمايلك دي حتندم عليها ياحمزة والله حتندم عليها
حمزة :استني عندك انا مخلصتش كلامي رايحه فين
ياسمين :ماشيه كفايه عليكم كده النهارده
حمزة :افتكر ان معاد الشغل لسه مانتهاش
ياسمين :وافتكر اني مصابه حضرتك ايه مسمعتش عن حاجه اسمها اصابة عمل واللا ايه
اساسا انت حتصرفلي مكافئه انا والبت الغلبانه دي بسبب اللي حصللي ده بدل مااروح القسم اعملك محضر واقول انك اتعديت علية بالضرب واحطلهم خمسين جنيه فالدرج عشان يقولوا محتاجه واحد وعشرين يوم علاج و
حمزة :كفايه خلاص امشي مع السلامه
ده ايه الوقعه السوده دي ياربي
منك لله انتي كمان ياللي فبالي بقى عاوزاها تركبني مصيبه
بصوا خليكم شاهدين بيلقح علية بالكلام
بص بقى يامز انت وربنا القراء مطايقينك من أساسه وانا اللي حايشاهم عنك لو سيبتهم عليك حيقطعوك يبقى تهدى كده وتلم الدور احسنلك واللا ايه رايكم يااعزائي ولووووولي زغروته ياحبايب
❤️❤️❤️❤️❤️❤️❤️❤️❤️❤️
في احدى المنازل الشعبيه بالاسكندرية
تحمد الله على عودته سالما لها تقبله وتاخذه في حضنها
زوجها في إيه ياابتسام سبيلي ابني اشبع منه شويه من ساعة ماجه وانتي مكوشه عليه لوحدك
ابتسام :وحشني ياراجل ياحبيبي يابني كنت خايفه اموت قبل مااشوفك
فيرد عليها:ألف بعد الشر عنك يا ست الحبايب
والده :انا مش مصدق عينيه اني شايفك ادامي
حازم :خلاص يابابا انا رجعت خلاص ومش مسافر تاني الغربه وحشه أوي ياما تعلت وانا لوحدي مكنتش بلاقي ايد تطبطب علية ولا كلمه حلوه تهون علية وجعي
ابتسام :ولا يهمك ياحبيبي انا حجوزك اللي تهنيك وتطبطب عليك وتشيل عنك هنك
حازم:هههههههههه حبيبتي ياأمي انا المهم عندي دلوقتى قبل موضوع الجواز ادور على صحابي وعشرة عمري ونجمع شملنا
والده :متعرفش عنهم اي حاجه ياحازم
حازم:لا والله يابابا من ساعة ماحسين كلمني اخر مرة وحكالي على موضوع حمزة وانهم مش عارفين اذا كان عايش والا ميت وانا معرفش حاجه حاولت اتصل بيه كتير تليفونه غير متاح
ومرة واحد زميلي كان نازل اجازة خليته يروح ويساللي عنه محدش عارف عنه حاجه ولا عاد بيبان
انا مكنش لية صحاب غيرهم
انا حريح النهارده عشان تعبان وبكره ان شاء الله حروح اشوفهم وان شاء الله مش حسكت ولا يهدالي بال غير لما اعرف فين اراضيهم
ابتسام :طب نويت تعمل ايه فالشغل يابني
حازم :انا الحمد لله معايا شهادات خبرة تشغلني فاحسن شركه فيكي يااسكندريه
والقرشين اللي حوشتهم مش بتوعي لوحدي دول لينا كلنا اجوز اخواتي البنات واسترهم واعملك حاجه يابابا كده صغيرة تساعد مع المعاش
ابوه:لا يابني انا ميرضينيش ناخد تعبك وشقاك اخواتك ملزومين مني
حازم :انت ومالك لابيك يابابا
وانا لو ماكنش لية خير فيكم مش حيبقالي خير فحد اخواتي حيتجهزوا احسن جهاز
ابتسام :ياحبيبي يابني ربنا يرضى عنك ويراضيك يارب