الحلقه الحاديه و الثلاثون من
رواية قلوب تنزف عشقاً
بقلم :عبير سليم
❤️❤️❤️❤️❤️❤️❤️
يستقبلها في عروس البحر المتوسط الإسكندرية
يتحدث إليها بوجه يفيض بالفرح والسعاده :اسكندريه نورت وربنا
صوفيا :منورة بأهلها ياحازم
حازم:الحفله كانت حلوة
صوفيا :اه والله كانت حلوة أوي ومنظمه وكل المدعوين حضروا
لو كنت موجود كنت حتكون مبسوط أوي
حازم :غصب عني والله أمي تعبت أوي وجاتلها غيبوبة السكر وفضلنا في المستشفى طول اليوم
صوفيا :ألف سلامه عليها وهي عامله ايه دلوقتي
حازم :الحمد لله أحسن هي في المستشفى لسه مخرجتش
صوفيا :تخرج بألف سلامه ان شاء الله
حازم :ان شاء الله ياللا بقى نشوف اللي ورانا
صوفيا :ياللا بينا
يبدءوا في الشغل واستلام التوريدات والشحنات حتى يتوقفوا إلى هذا الحد
صوفيا :ياااه لسه حنيجي بكرة كمان كنت متوقعه إننا نخلص النهارده
حازم :وانا كمان كنت متوقع ده بس زي مانتي شايفه الإجراءات كتيرة ولازم نكملها بكرة وبعدين الحمد لله إحنا انجزنا وخلصنا الجزء الصعب اللي فاضل بكرة مش كتير
يعلن هاتفه عن اتصال فيرد:أيوة ياسارة إيه الأخبار عندك
دلوقتي طيب حاضر مسافة السكه وحكون عندكم
صوفيا امي الدكتور كتبلها على خروج ولازم اروحلهم اروحهم بس الأول حاخدك على الفندق تستريحي وبعدين ارجعلهم
صوفيا :لاء انا مش عاوزة أرجع الفندق
حازم:عاوزة تروحي فين قوليلي على أي مكان عاوزة تروحيه واوديكي فيه
صوفيا : عاوزة أروح معاك
حازم :تروحي معايا فين
صوفيا :عند مامتك عاوزة اطمن عليها واللا ده يضايقكم
حازم:يا خبر أبيض تضايقينا ده إيه ده الدنيا كلها حتنور
صوفيا :طب ياللا عشان منتاخرش عليهم
بعد مرور نصف ساعه في المستشفى يدخل عليهم الغرفه وقد اعدوا نفسهم للخروج:سلام عليكم
والدته واخته:وعليكم السلام ورحمة الله وبركاته
حازم :في ضيفه جايه معايا عاوزة تسلم عليكم
والدته:خليها تتفضل يابني يااهلا وسهلا بيها
حازم :اتفضلي يا صوفيا ادخلي
اعرفكم صوفيا مديرتي في الشغل
يردون عليها :أهلا وسهلا بيكي
حازم :بصي بقى ياستي القمر دي تبقى سارة اختي مخطوبه وفرحها قريب ان شاء الله
تسلم عليها صوفيا :اهلا بيكى حبيبتى والف مبروك مقدما
سارة :الله يبارك فيكي
حازم :اما بقى المزة الجامده دي تبقى ست الكل سومه ابتسام يعني أمي الحبيبه وهي الصراحه اسم على مسمى دايماً الابتسامه والضحكه على وشها
ابتسام :مزة ياقليل الحيا
حازم :هههههه طب بزمتك ياصوفيا مش امي مزة
صوفيا :أيوة بصراحه يا طنط حضرتك حلوة فعلا وتمد يدها إليها لتسلم عليها
ابتسام :تحلو دنيتك يارب لاء بصي انا معرفش السلام اللي بالايد ده تعالي فحضني
تحتضنها ابتسام بكل حب:اهلا بيكى ياحبيبتى
صوفيا :ألف سلامه عليكي ياطنط يارب تكوني بقيت كويسه
ابتسام :الله يسلمك من كل شر يارب أكيد طبعا كويسه هو معقوله أشوف الجمال ده كله ومبقاش كويسه ربنا يحفظك ويحميكي من كل شر يارب
حازم :صوفيا صممت تيجي معايا تطمن عليكي
ابتسام :ربنا يكرمك يابنتي يارب
سارة :حازم احنا جهزنا كل حاجه
حازم:طب كويس أوي انا حروح ادفع اللي باقي فالحسابات وراجعلكم
ابتسام :بصي بقى انتي النهارده حتقضي اليوم كله معانا
صوفيا :ربنا يخليكي ياطنط لا والله مش حينفع انا بس حبيت اجي اطمن على حضرتك وارجع الفندق
سارة :ليه بس ماتيجي معانا والله حتنبسطي معانا اوي أختي أسماء كمان في البيت بتحضر الغدا قضي معانا اليوم وروحي على بالليل
يفتح حازم الباب :ياللا ياجماعه
سارة :حازم قول لصوفيا توافق تيجي معانا البيت وتقضي اليوم معانا
حازم :ياريت طبعاً
صوفيا :حقكم علية والله بس انا بجد تعبانه اوي ومرهقه اوي النهارده خلينا مرة تانيه
ابتسام :لامرة تانيه ولا تالته انتي بخيله والا إيه
صوفيا :ايه مش فاهمه
حازم :ماما صوفيا متفهمش الكلام ده
ابتسام :يبقى انتي مش عاوزة تيجي معانا عشان احنا على مش اد المقام مش كده
صوفيا :لا والله ياطنط حضرتك بتقولي ايه بس
ابتسام :يبقى خلاص حتيجي يعني حتيجي وإلا وربي لحكون زعلانه منك جامد ده احنا نعرف نكرم ضيوفنا والله وحتنبسطي أوي
صوفيا وهي تنطر لحازم ليخرجها من هذا الموقف الحرج
طب بصي ياماما سيبي صوفيا تروح النهارده ترتاح عشان احنا تعبنا النهارده جداً
واوعدك بكرة ان شاء الله نخلص بقية الشغل واجيبها واجي تتغدى معانا وبعد كده نسافر أنا وهي على القاهرة
هاه إيه رأيك ياصوفيا
صوفيا :حاضر خلاص مش حقدر اقول حاجه
سارة :يبقى حنستناكي بكرة وانا حعملك الأكل بايدي بس قوليلي بقى في اكله نفسك فيها اعملهالك
صوفيا :لاء خالص اي حاجه من ايدكم أكيد حتبقى حلوة
حازم :طب ياللا بقى ياخدهم ويروحهم عالبيت وطبعا ابتسام متسيبهاش غير لما تحلفلها صوفيا انها حتجيلهم بكرة
وبعد كده ياخدها حازم ويقعدوا مع بعض في مكان هادي عالبحر
صوفيا :الله المكان هنا هادي أوي
حازم:جيتي اسكندريه كتير قبل كده
صوفيا :لاء جيت حوالي أربع مرات بس
بس انا بحبها أوي بحس فيها بالراحه النفسيه
حازم :خلاص ياستي ليكي علية كل أسبوع اجيبك هنا وتيجي تتغدي معانا ايه رأيك
صوفيا :ياخبر واتعب طنط وأخواتك لا طبعاً مينفعش
حازم :تعبك راحه ياصوفيا انتي متعرفيش غلاوتك عندنا ازاي
واهلى طيبين وعشريين اوي انتي وسطهم حتحسي انك وسط أهلك
صوفيا بحزن :أهلي
حازم :مالك ياصوفيا هو انا قلت حاجه ضايقتك
صوفيا :لا خالص والله بس فكرتني بأهلي اللي انامعرفش عنهم حاجه
حازم :معقوله دي ياصوفيا ازاي متعرفيش عن اهلك حاجه
صوفيا :يعني حكايه كده مش عاوزة اشغل بالك بيها
حازم :لاء، ياستي انا عاوزك تشغليني انا نفسي اعرف عنك كل حاجه ده اذاكان مضايقكيش
صوفيا :لاء طبعا يضايقني ده إيه أنا أصلا برتاح معاك فالكلام أوي
حازم :بجد ياصوفيا
صوفيا :اه والله
حازم :طب احكيلي انا عاوز أسمعك
صوفيا :أنا بابي الله يرحمه مصري وسافر يشتغل في إيطاليا وهو شاب صغير قابل مامي الله يرحمها وحبوا بعض وبلغ أهله انه قرر يتجوز إيطالية طبعا هما رفضوا وبشده وخصوصا ان مامتي مش مسلمه بس هو أصر يرتبط بيها وأهله قالوله لو اتجوزت البنت دي تبقى تنسى أن ليك اهل خالص
صمم بابي يتجوز مامي واتجوزوا فعلا وجابوني وبابي كان مبسوط اوي واخدني انا ومامي ونزلنا مصر على فكرة هما عايشين في الشرقيه
حازم :الشرقيه دول أهل الكرم كله
صوفيا :فعلاً بابي دايما كان بيقول كده
حازم :وبعدين إيه اللي حصل
صوفيا :أهله استقبلوه بشكل مش كويس وخصوصا اخوه الكبير وقالله جايبلنا واحده أجنبيه وتقول انك اتجوزتها وخلفت منها انت ملكش مكان بيننا
وزعلوا أوي كمان ان بابي جاب بنت وقالوله بكرة تدخل عليك بواحد وتقولك ده صاحبي وتبقى انت قاعد برة ملكش لزمه
وقتها بابي زعل أوي واخدني انا ومامي ورجعنا إيطاليا
وانا كبرت وبابي كان مهتم جدا انه يربيني كويس على قيم وأخلاق ديننا وكان مهتم جدا اني اتكلم عربي كويس
وكان دايما يكلمني عن الأدب والأخلاق واني مليش دعوة باللي بيحصل فايطاليا رباني عالصح والغلط وكان بيحفظني القرآن الكريم
كان دايماً يقوللي عاوزك لو اتقابلتي مع اهلي يقولوا اني عرفت اربيكي صح
وانا فالثانويه العامه مامي تعبت اوي وماتت
وقتها بابي كان زعلان أوي اخدني وسافرت أنا وهو عملنا عمرة وكمان حجينا
حازم :ايه ده مش معقوله يعني انتي حاجه صوفيا
صوفيا :اه شفت بقى عشان تعرف اني مش أي حاجه
حازم :يااه أي حاجه ده انتي كل حاجه
متعرفيش انا مبسوط ازاي باللي بسمعه ده
صوفيا :عشت انا وبابي لوحدينا وكان بيشتغل مع بشمهندس جابر ربنا يشفيه وانا كمان كنت بدرس في الجامعه وبشتغل معاهم لحد مافهمت الشغل كويس وأول ما خلصت دراستي بقى لية مكانه في الشركه وبعدها بابي هو كمان تعب ومات وقتها بشمهندس جابر مسابنيش ووقف جمبي بس كنت حاسه اني وحيده مليش أهل وبقيت بحب انزل مصر كتير في الإجازات كنت بحس اني مطمنه وانا على أرضها
عارف ياحازم برغم اني سافرت بلاد كتير لكن مصر أحب البلاد لقلبي
ولما حمزة جه كنت معاه كتير وعلمته حاجات كتيرة اوي وهو كان ذكي جدا وعاوز يتعلم بسرعه
واول ماقرر حمزة انا ياسس شركه هنا انا اللي توليت الموضوع ده ودي كانت فرصتي عشان افضل موجوده فمصر بلد بابي وهي دي حكايتي كلها
حازم :طب ومحاولتيش تتصلي باهلك تاني
صوفيا :لاء ياحازم محاولتش انا مش عاوزة حد يقوللي حاجه تجرحني بس صدقني لما تحس انك ملكش اهل وانك وحيد دي حاجه مش حلوة خالص
حازم هو بابي غلط لما ماسمعش كلام اهله واتجوز مامي مع ان والله مامي كانت طيبه أوي وبتحب بابي أوي
حازم:الجواز رزق يا صوفيا والرزق مكتوب عند ربنا من بداية الخلق ومعروف مين حيتجوز مين وحيخلفوا مين وحياتهم حتبقى ازاي وأسماءهم
صوفيا :إيه ده يعني انا مكتوب عند ربنا اني اسمي صوفيا
حازم :ايوة
عارفه ياصوفيا دايما كنت اسمع المقوله اللي بتقول لو اطلعتم على الغيب لاخترتم الواقع ومكنتش فاهمها لحد ماعرفت معناها انك لو حد خيرك تختاري الحياة اللي انتي عاوزه تعيشيها حتختاري الحياة اللي ربنا مقدرلك انك تعيشيها مش حياة حد تاني
وحب باباكي لمامتك رزق ربنا سبحانه وتعالى قدرلهوله جوازه منها وجودك انتي في الدنيا كل ده مكتوب ومقدر عند ربنا محدش ليه دخل فيه
كل اللى بيحصل مجرد أسباب مش أكتر لكن ربنا هو اللي بيسبب الأسباب
صوفيا :طب والحب ياحمزة بييجي ازاي بنعرفه وامتى بنحس اننا حبينا
حازم :صوفيا انتي عمرك ماحبيتي قبل كده
صوفيا :انا لا والله
حازم :هههههههه طب مصدقك متحلفيش
صوفيا :هههههه ماشي حازم انا حياتي كلها كانت مذاكرة وشغل وبس والفترة اللي عيشتها انا وبابي لوحدينا كان هو كل حياتي وبعديها كنت مركزة فى المذاكره كنت عاوزة أحقق لبابي حلمه فية
حتى كل زملائي في المدرسه والجامعه كانوا شايفيني مش طبيعيه عشان معنديش بوي فريند زيهم
ده في منهم كمان كان بيقوللي لازم تتعالجي نفسيا عشان انتي مريضه
حازم انا كل أعرفه عن الحب مجرد مشاهد شفتها في الأفلام وسمعتها من الأغاني مش اكتر من كده
حازم :انا فخور بالكلام اللي بسمعه منك ده ياصوفيا
الحب ياصوفيا ده أحلى حاجه في الدنيا كلها هو اللي بيخلينا نتخطى كل الصعاب وندوس على كل المحن
ونتعدى كل المشاكل والعقبات اللي بتقف قصادنا
الحب مبيستاذنش ولا بيخبط على الباب الحب بيزق الباب ويدخل لوحده عارف طريقة عارف رايح لمين
والقلب هو اللي بيختار وبيحكم علينا وبيبقى حظنا حلو لو كان الحب متبادل بين الطرفين اما لو كان من طرف واحد بيبقى عذاب واشد عذاب في الدنيا كلها
صوفيا :وإيه اللي يخلينا نحب من طرف واحد ماهو اكيد انت حتحب اللي انت عارف انه بيحبك
حازم :مانا لسه قايلك انه مبيستاذنش ياصوفيا ومش بايده يحب اللي هو عاوزه
ماكنش حد اتعذب ياصوفيا
صوفيا :واعرف ازاي اني حبيت ياحازم
حازم :لما تلاقي نفسك متعلقه بشخص عاوزة تشوفيه طول الوقت مش عاوزاه يغيب عن عينك فعز مشاغلك تفتكريه تبقي عاوزه تسمعي صوته
لما تحسي انك مخنوقه او زهقانه بتبقي مش عاوزة غيره وجوده لوجده بيغنيكي عن الدنيا كلها
صوفيا :يااه كل ده تعرفه عن الحب ده انت شكلك كده بتحب بقى
حازم :أيوة بحب ياصوفيا وبحب أوي كمان
صوفيا :يابختها اللي تلاقي حب زي ده
حازم :صوفيا تقبلي إني أقف جمبك واساعدك يبقى ليكي أهل وحياة وتعيشي مبسوطه وسعيده دايماً
صوفيا بفرحه:أقبل ياحازم
يقوم بتوصيلها للفندق على أمل بلقاء في الغد لاستكمال العمل واصطحابها الى بيت أهله
حازم :تصبحي على خير يا صوفيا
صوفيا :وانت من اهل الخير يا حازم
يعود إلى البيت ليجد أخته سارة تتحدث اللى خطيبها ثم تغلق معه الخط:حمد الله على السلامة يا حازم
حازم:الله يسلمك يا سوسو
سارة :مكنتش متخيله انها حلوة أوي كده
حازم :بتقولي إيه
سارة :بقولك الحب باين فعيونك ياجميل وقلبك حينط من مكانه ويقول بحب ياناس
حازم :بس يخرببيت فقرك حتفضحينا
سارة :وهو الحب فضيحه ياحازم ده احلى حاجه في الدنيا وبصراحة البنت قمر وكمان باين عليها انها بنت ناس وتستاهل الحب ده الصراحه
حازم :بس احنا فين وهي فين
سارة :الحب ميعرفش الكلام ده ياحازم وعلى فكرة بقى هي بتحبك زي مانت بتحبها
حازم :ياسلام وعرفتي ازاي بقى
سارة :العاشق عيونه بتفضحه ياحبيبي وهي عيونهافاضحاها وبتقول انهابتحبك
عارف وقت ماكنت بتعرفها علية كنت حساها خايفه لكون مثلا خطيبتك واللا حبيبتك واول ماقلتلها اني اختك الفرحه كانت حتنط من عينيها
حازم :يارب ياسارة يارب وامك قالت حاجه
سارة :امك هههههه نسيت خالص انها تعبانه ومسكت الورقه والقلم وعماله تكتب في الأصناف اللي حتعملهالها وعماله تكلم ابوك عن ادبها وجمالها ومستنيه بكرة بفارغ الصبر
يدخل غرفته ويضع جسده على الفراش وعيناه لاتبعدها عن تفكيره لحظه واحده
وفي الناحيه الثانيه لم يكن وضعها أقل منه بل ظلت تفكر فيه طوال الوقت وقلبهايحدثهابانه تحبه وان حبه تملك من قلبها دون قصد او عمد منها
❤️❤️❤️❤️❤️❤️❤️
نروح بقى لحد سامي وأهله بعد ماابوه حن عليه ووافق يروح يتقدم لجميله ههههه اللي فاكر اسمها سهير هما دلوقتى بقى فبيتهم ياللا نشوفهم بقى حيحصل معاهم إيه
والد جميله :منورينا ياجماعه والله بس اتاخرتوا أوي كده ليه ده احنا كنا حنام
سعيد :ده نورك والله ياحاج معلش بقى على مااتخانقنا ولبسنا وجينا
والد جميله :اتخانقتوا
سعيد :اه ماهي دي عاده عندنا ربنا مايقطعها كل مانيجي نخرج لازم نتخانق الأول
والد جميله :غريبه أوي
سعيد :ولا غريبه ولاوحاجه بكرة تعرفوا كل حاجه عننا ياابو سهير
والد جميله :سهير
بينما كانت سحر تنطر لسامي وتضحك
سامي :بت اخرسي حنتقفش
سحر :هي صاحبتك مفهمتش ابوها ورسته عالحوار
سامي :شكلها الحمارة دي مقالتش حاجه حتودينا فداهيه الله يخرببيتها على بيت معرفتها السوده
سعيد :بص بقى احنا حندخل في الموضوع على طول احنا جايين النهارده نطلب ايد بنتك سهير لابني سامي
والدها:سهير بنتي انا هو حضرتك بتتكلم عن مين
سعيد:بنتكلم عن مين هو حضرتك مش عارف ولادك بقولك بنتك لابني
والدها :أيوة بنتي مين بقى انا عندي تلت بنات مين فيهم
سعيد :لا مااحنا أكيد مش حنطلب التلاته يعني خليلك اتنين واحنا كفايه علينا واحده
والدها :ايوة اللي هي مين بقى
سعيد :لا حول ولا قوة الا بالله بنتك سهير
والدها :سهير مين انا معنديش بنت اسمه سهير
سعيد لابنه سامي:انت ياحيوان انت جايبنا بيت غلط
سامي :لا وربنا هو البيت صح
سعيد :بنتك سهير ركز معايا الله يخليك
والدها :لا إله إلا الله بقولك معنديش حد اسمه سهير
سعيد :قوم يازفت انت جبتنا بيت غلط يامتخلف
سحر :ههههههه ههههههه
سعاد :بتضحكي على إيه يابت انتي متحترمي نفسك
سامي :الحقينى ياسحر حروح فداهيه
سحر :خلاص يامعلم كل شئ انكشفن وبان
سامي لأبوه :نقوم فين بس متاخدش فبالك اصل والدها ساعات بينسى فبالراحه كده عالراجل
سعيد :اما اشوف آخرتها معاك إيه يابن الجذمه انت
بص ياحج ركز معايا بس عشان شكلك كده مش مركز وانا حفكرك واحده واحده انت عندك كام بنت
والدها :قلتلك تلاته عندي تلاته
سعيد :أيوة اسماءهم إيه بقى
والدها:جميله وقمر وشمس
سعيد :ماشاء الله عندك المجموعه الشمسيه كلها الله امال فين سهير بقي
تنادي عليه قمر:بابا يا بابا
والدها :في إيه
قمر :تعالى بس ثواني
والدهم:طب ثواني ياجماعه وراجعلكم
سعاد :هو احنا حنفضل طول الليل ندور على اسم العروسه ماتخلونا نخلص
سحر :اصبري بس يامامتي ده الضحك حيبقى للركب
في داخل غرفة البنات :عاوزين ايه
قمر :بابا اقعد بس جميله عاوزة تفهمك حاجه
والدهم :تفهمني ايه استنوا بس اروح امشي الناس اللي برة دول واجيلكم
جميله :يالهوي تمشيهم ليه يابابا ده انا ماصدقت انهم جم
والدها:جم مين يابنتي دول شكلهم تايهين في العنوان وجايين مكان تاني
قمر :لا يابابا هما جم العنوان المظبوط
والدها :عنوان إيه وبتاع إيه دول شكلهم تحف ولا عارفين جايين لمين أصلا
و البت اللي معاهم عماله تضحك كل شويه زي الهبله
عمالين يقولولي سهير سهير تقدري تقوليلي مين سهير دي بقى عرفتوا انهم مخهم ضارب
جميله :بابا افهمني بس وانا حقولك على كل حاجه
والدها :اخلصي بسرعه الناس متلقحين برة
جميله :انا سهير يابابا
والدها :مش فاهم ازاي يعني انتي سهير
جميله :انا حفهمك يابابا
برة بقى في الصالون:عاجبكم كده قلة القيمه اللي احنا فيها دي الراجل سابنا ودخل
سعاد :اه والنبي يااخويا معاك حق ده باين عليه دخل نام
سحر :هههههههه هههههههه
سامي :ماتخرسي بقى فضحتينا انا ايه اللي خلاني اجيبك معانا
سحر :أعمل ايه بس مابصراحه موقف زي الزفت
سامي :وده إيه اللي دخله ده كمان
سحر :ماهما زمانهم جوة بيفهموه وربنا يستر
سحر ياسحر
سحر :الحق دي قمر بتنادي علية شكلهم كده حياخدونا بالدور نفر نفر
سامي :قومي الله يخرببيتك
تدخل سحر :ايوة
والد جميله :ممكن افهم معناه إيه الكلام الأهبل اللي قالتهولي جميله ده
سحر :ارجوك ياعمي لازم تقدر خطورة الموقف اللي احنا فيه اصل بابا زمان شاف حلم ان لازم كل عيلته تبقى بحرف السين عشان كده كلنا اسمنا بادئ بحرف السين وكمان عاوز ولاده يتجوزوا ناس بحرف السين وإلا حيتشائم وممكن يعيش الوهم ويحصلله حاجه فقررنا نكدب عليه الكدبه الصغيرة دي وقلبه يبقى مرتاح ويتمم الجوازه
والد جميله :ماعنها ماتمت إيه الهبل ده انا مش مقتنع بالكلام الفارغ ده
جميله :مش مهم تقتنع يابابا المهم تعدي الموضوع عشان خاطري وعلى رأي حسن الأسمر عدي ياليله
والدها:بقولكم ايه ده اسمه عبط وتخلف يعني ايه اقوله ان اسمك سهير وانتي اسمك جميله ايه الكدب ده احنا من اولها حنبدا بالكدب وبعدين ماهو مسيره يعرف كل حاجه حنقولله ايه ساعتها
سحر :ياعالم ياعمي المهم بس نعدي الليلادي ونقرا الفاتحه وبعد كده حنشوفلنا كدبه تانيه مش حنغلب يعني
والدهم :وانا قلت لاء يعني لاء
برة بقى سعيد :بقولكم إيه انا قايم ماشي
وانت يا حيوان انت هات امك واختك وحصلني عالبيت
سامي :يابابا الله يخليك اصبر بس هما بس جوة بيقنعوه وزمانه خارج
سعيد :يقنعوه بإيه ان شاء الله انا ماشي يعني ماشي
ماشي فين بس ياحاج معلش كنت باخد علاج الضغط والسكر والقلب
سعيد :كل الأمراض دي عندي
والدهم :هي لحد ماجيتوا مكنتش عندي وكانت صحتي بمب بس بعد ماخرجت من جوة دلوقتى أكيد جاتلي
سعيد :معلش ياحاج المهم بس دلوقتى تكون افتكرت بناتك
والدهم :طبعاً افتكرت مش كنت تقول انك جاي لسهير وهو انا عندي أغلى من سهير دي بنتي وحبيبتي واول فرحتي
انا بس كنت عاوز انام ومش مركز
سعيد :طب الحمد لله نتكلم في التفاصيل بقى
سامي :بت ياسحر انتوا اتاخرتوا كده ليه جوة
سحر :الراجل كان معصلج معانا عالاخر ومش راضي ابدا
بس على مين قلناله حتوافق يعني حتوافق
سامي :أيوة يعني اقنعتوه إزاي برضو
سحر :جميله قالتله حتنتحر الراجل افتكر انك جاي تصلح غلطتك فوافق انقاذا لشرف العيله
سامي :يانهاركم اسود ومنيل
سحر :خلاص ولا تزعل نفسك احنا فيها
سعيد :على بركة الله نقرا الفاتحه
جميله :لوووولي لوووولي
والدها :تعالي ياجميله ييه قصدي ياايه معلش هي اسمها ايه انا نسيت
سحر :سهير ياعمي سهير افتكرها بسهيررمزي سهير زكي واللا اقولك خليها سهير البابلي فمسرحية ريا وسكينه
سامي :هههههههههه
والدهم :اقسم بالله عيله هبله اه منك يابت الجذمه ياجميلة
❤️❤️❤️❤️❤️❤️❤️❤️❤️
في صباح اليوم التالي
سحر وهي خارجه من غرفتها :صباح الخير يا بابا
سعيد :صباح النور
سحر :إيه اللي بتتفرج عليه ده
سعيد :ماتش
سحر :هو في ماتش عالصبح كده
سعيد :لا ده متعاد
سحر :طب ولما هو متعاد بتتفرج عليه تاني ليه
سعيد :اصلهم دخل فيهم جون المرة اللي فاتت فقلت يمكن في الاعاده ياخدوا بالهم
سحر:ياخدوا بالهم من ايه يابابا
سعيد :من الجون امشي ابت شوفي نفسك رايحه فين ولمي شعرك اللي عاملاه شبه المجانين ده
في الجيم :الف الف مبروك يا سامي
سامي :الله يبارك فيك ياصاحبي عقبالك
فتدخل سحر فيلتفت لها يحي ويضحك ويجيبه :ان شاء الله ياسامي
سامي :بسم الله الرحمن الرحيم سلام قول من رب رحيم
سحر :إيه شفت عفريت
سامي :والله ماتفرقي حاجه عنه ايه اللي انتي عاملاه فراسك ده
سحر :ده كيرلي ياعديم المفهوميه
سامي :كيرلي ايه وزفت إيه على دماغك هو انتي ناقصه
سحر :والله انت بارد ومبتفهمش طب بزمتك انت يايحي شكلي وحش
يحي الصراحه شكلك جميل
سامي: ايه الكدب ده ياعم انت
يحي :هي دي الموضه ياسامي وكل البنات بيعملوا شعرهم كده
سامي :موضه سوده على دماغها بت انتي اخرك معايا تخلصي سنتك السوده دي وتتحجبي انتي فاهمه ماشيالي شبه العفاريت وفرحانه بنفسك وتقوليلي موضه
سحر :بقى كده هو ده جزاء اللي عملته معاك هي دي اخرتها على رأي المثل آخرة خدمة الغز علقه ده انا لولايا كانت الجوازه باظت
يحي :ليه ياسامي هي الجوازه كانت صعبه كده
سحر :تزوير فاوراق رسميه وحياتك هههههههه
سامي :وهو يحاول مسكها من شعرها:والله ماسايبك يومك اسود
سحر وهي تجري:يالهوي الحقوني ياناس
يحي :هههههه هههههه ههههههه
❤️❤️❤️❤️❤️❤️❤️❤️
في منتصف اليوم يخرج حازم وميرا بعد ماخلصوا الشغل كله وجت العربيات وحملت كل حاجه واطمنوا على كل شئ وهما دلوقتى فطريقهم لبيت حازم
وأخيراً وصلوا الحمد لله
أهلا أهلا نورتينا وربنا
صوفيا :ربنا يخليكي ياطنط يارب
ابتسام :طنط إيه قوليلي ماما هو انا مش زي مامتك
صوفيا :حبيبتي ربنا يخليكي يا رب
سارة :مستنيينكم من بدري والله
حازم :احنا خلصنا وجينا على طول والله
ابتسام :وإيه بقى اللي انتي جايباه ده كده بردو
صوفيا :دي حاجه بسيطه ياطنط
ابتسام :تاني طنط بردو
صوفيا :قصدي ماما
تسلم على أسماء وتجلس معهم ويأتي والدهم ويسلم عليها
اعدوا المائده وبدءوا في تناول الطعام وكان حازم قاعد عالكرسي اللي جمبها
ابتسام :حبيبتي كلي دي
صوفيا :باكل والله ربنا يخليكي
لاء كده كتير وربنا مش حقدر اكل الأكل ده كله
أسماء :اوعي يكون الأكل مش عاجبك وربنا حزعل واجيب ناس تزعل معايا
صوفيا ههههههه لا والله الأكل طعمه حلو جداً بس انتوا عاملين أكل كتير اوي
ابتسام اكل كتير ده فين طب ده نا كان الود ودي ادبحلك عجل
صوفيا :لاء ده كتير اوي
سارة: طب إيه رأيك فالملوخيه انا اللي عملاها طشه الطشه بنفسي
صوفيا :حلوة اوي انا بحبها جدا وكل ماانزل مصر لازم اكلها
اسماء :طب بصي كلي حتة الرقاق دي انا اللي عملاه
صوفيا :حاضر والله حاكل
بعد شويه يخلصوا أكل ويقوموا يقعدوا وطبعا القعده ماخلتش من الضحك والهزار ومر الوقت بسرعه وكانت صوفيا مبسوطه جداً معاهم وحست بجو العيله اللي عمرها ماحست بيه قبل كده
وسلمت عليهم ووعدتهم انها حتكرر الزيارة واخدها حازم وسافروا على القاهرة
❤️❤️❤️❤️❤️❤️❤️❤️❤️
بعد مرور عدة ايام
تدخل الفيلا ويرحب بها ترحيبا حارا:حبيبتي ياداده ألف حمد الله على سلامتك كده بردو الغيبه دي كلها علينا
الداده :انتوا كمان وحشتوني أوي والله يابني طمني مفيش اخبار عن جابر يابني.
حمزة :لسه والله يا داده ادعيله
الداده :ربنا يتم شفاه على خير يارب
حمزة :يارب ياداده يارب
داده ماتنسيش اللي فهمتهولك في التليفون
الداده :حاضر يا بني ولو اني مش مرتاحه للكلام ده بس اللي يريحك يابني
تنزل من على السلم وفي يديها سيلا
الداده :اللهم صل عالنبي دي زي القمر ربنا يحرسها من العين
سيلا :داده داده وحشتيني أوي أوي أوي
الداده :انتي اللي وحشتيني اوي ياسيلا ياحبيبتى
حمزة :أعرفك ياداده ياسمين مربية سيلا
ياسمين اعرفك داده وجيده هي المسئوله عن البيت كله كانت مسافرة عند اهلها ولسه راجعه
ياسمين :أهلا بحضرتك ياداده وحمد الله على السلامة
الداده :الله يسلمك يابنتي يارب متكونش سيلا ضايقتك
ياسمين :سيلا دي حبيبة قلبي
حمزة :شفتي بقى ياسيلا أديني جيبتلك داده عشان تحضر عيد ميلادك ياحبيبتي
سيلا :ايوة حبيبتى وحشتينى
الداده وهي تحتضنها:وانا مقدرش محضرش عيد ميلاد سيلا حبيبتي
تمر الأيام وعلاقة حمزة وياسمين هادئه نوعا ما فهو يبحث عن حسين بكل الطرق محاولة منه الوصول اليه بينما هي تاركه إياه يفعل مايريد وهي تمارس عملها وعند عودتها تجلس الى جيرانها لتكتسب منهم راحه وسكينه وضحكه وابتسامه تعوضها عن تعب وارهاق طول اليوم
وكانت علاقتها تقوى بداده مجيده التي احبتها ورات فيها من الطيبه والحنان مايجعلها لا تصدق أنها نفسها من فعلت مافعلته بالماضي
وانتي عايشه معاهم من زمان ياداده
الداده :من سنين طويله
ياسمين :تبقي على كده بقى حضرتي ولادة سيلا
الداده :أيوة طبعا ده انا كنت مع الست سيلا في المستشفى وهي بتولد
ياسمين :قصدك وهي بتتولد
الداده لاء ماهي سيلا متسميه على اسم امها الله يرحمها
ياسمين :ياااه ياحمزة للدرجه دي يعني كمان سميتها على اسم مامتها
يدخل حمزة وبيديه علبه جميله يفتحها ويخرج منها فستانا جميلا لسيلا
سيلا :الله حلو أوي
حمزة :إيه رأيك ياداده
الداده :حلو اوى يابني تسلم ايد اللي اشترى
حمزة :بصراحه هو ذوق صوفيا هي اللي اختارته انا مبعرفش اوي فالحاجات دي
الداده :صوفيا دي اميرةوبنت حلال ربنا يسعدها يارب
حمزة :مقلتيش رأيك ياياسمين في الفستان ايه رأيك
ياسمين :حلو طبعاً وحيبقى آحلى على سيلا وعقبال ماتجيبلها فستان فرحها
هات الفستان
ايه رأيك ياحبيبتي نقيس الفستان ونطمن على المقاس وتاخدها وتطلع
الداده حمزة يابني عاوزة اقولك حاجه
حمزة :اتفضلي يا داده
الداده :بصراحه يابني انا مش مصدقة إن دي هي نفسها البنت اللي خدعتك وخانتك
دي لا ماديه ولا قاسيه بالعكس دي حنينه أوي وانا عن نفسي حبتها واحساسي بيقوللي أنها مظلومه وأكيد في حاجه انت متعرفهاش
حمزة :انتي اللي بتقولي كده ياداده
الداده :ايوة يابني انا اللي بقول كده