الحلقه الثامنه والعشرون
رواية
قلوب تنزف عشقاً
بقلم :عبير سليم
❤️❤️❤️❤️❤️❤️❤️❤️
لحظة سكون تام تجمع بينهما بم ستنطق الألسنه بما سيجيب على سؤالها بم سيبرر لها ما رأته عيناها
كانت في العهد السابق تلميذه عنده والآن تتبادل الأدوار ويصبح هو الذي عليه أن يتخذ دور التلميذ ويجيب عليها
ميرا :اتفضل ادخل يا أكمل مفيش داعي نخللي اللي رايح واللي جاي يبص علينا
يدخل أكمل وهو يتصبب عرقا فهو الآن مضطر للإجابة عن كل أسئلتها
ليه كده يااكمل ليه مصر تجرح كل اللي فحياتك ليه
ليه تكتب عليهم الحزن والتعاسه واللا انت خلاص اتعودت تعذب فكل اللي بيحبوك
أكمل :أنا يا ميرا
ميرا :أيوة انت يااكمل ولو كنت نسيت أفكرك يااكمل فاكر لما زمان جرحتني وسيبتني من غير حتى ماتهتم تعرف انا حصللي إيه كلمتين تقولهوملك ماما فأول مواجهه بينكم تخليك تهرب وتقرر البعاد
ماحاولتش تتمسك بية للحظه محاولتش تدافع عن حبنا لا ازاي كرامتك كبريائك ميسمحولكش بده
كل اللي ربنا قدرك عليه تسيبلي حتة ورقه بتعتذرلي فيها وتقولي آسف
آسف على إيه هو انت كسرت دراعي عشان تقولي آسف انت كسرت قلبي قلبي اللي حبك ووثق فيك وكان متأكد من حبك ليه اكتر من حبي ليه بالف مرة لكن ياخسارة الظاهر اني كنت غلطانه
ودلوقتى بتكسر قلب انسانه تانيه ليه هي ذنبها إيه تكسر قلبها بالشكل ده حرام عليك انت إيه
أكمل :هي مين ياميرا انتي بتتكلمي عن مين
ميرا :هههههههه انت كمان مش عارف بتكلم عن مين للدرجه دي مشاعرها مش مهمه عندك للدرجه دي مشاعرها ملهاش حساب عندك
عشان تكتب اسمي على دبلتك مع ان اسمها هي اللي المفروض يكون مكتوب هي صاحبة الحق الوحيد فده
مفكرتش لو هي شافتها مشاعرها حتكون إيه مفكرتش مراتك حتعمل إيه لو شافت اسم حد غيرها على دبلة جوزها
ليه حرام عليك ليه تكسر قلبها بالشكل ده
اكمل :بس ده اسم مراتي فعلا ياميرا انا مكتبتش اسم غير اسمها
ميرا :ايه انت بتقول إيه يعني مراتك اسمها ميرا لا مش ممكن معقوله الصدفه دي لا انت بتكدب علية ايوة بتكدب ده اسمي انا طب لو هي اسمها ميرا زي مابتقول مش ده تاريخ اليوم اللي اعترفتلي فيه بحبك
أكمل :أيوة حقيقي فده مقدرش اقول حاجه
ميرا :انت ازاي بتتكلم بالهدوء ده ازاي قادر تسيطر على مشاعرك بالشكل ده انت مين انت أكمل اللي انا حبيته ومحبتش فحياتي كلها حد غيره واللا حد تاني انا معرفهوش
أكمل :اسألي قلبك وهو يقولك انا مين
ميرا :قلبي انهوا قلب اللي عاوزني اسأله يااكمل قلبي اللي حبك ووثق فيك واللا قلبي اللي كسرته ودست عليه بكل قوة واللا قلبي اللي بقاله سنين بينزف من حبه وعشقه ليك ولحد دلوقتي جرحه لسه بينزف
انهو قلب يااكمل اللي عاوزني اسأله
أكمل :قلبك اللي حب اكمل قلبك اللي مش ممكن يصدق اني خنته او غدرت بيه او اتخليت عنه
قلبك اللي مستحيل يتخيل اني ممكن اكون حبيت او ارتبطت او سمحت لغيره يدخل حياتي
قلبك اللي لما شاف الدبله دي اتاكد ان ده اسمك انتي واستحاله يكون اسم حد تاني قلبك اللي لسه بعد كل السنين دي فاكر اليوم اللي اعترفتلك فيه بحبي
انا مكدبتش لما قلت ان ده اسم مراتي عارفه ليه لأن انا من يوم ماسيبتك ومشيت وانا معتبرك انتي مراتي اللي مقدرليش الزمن اني اتجوزها وانها تكون لية
اول حاجه عملتها بعد ماسيبتك اني اشتريت دبله وكتبت عليها اسمك وتاريخ اليوم اللي اعترفتلك فيه بحبي وقررت ان مفيش اي ست فالدنيا دي كلها ممكن تاخد مكانك فقلبي
ميرا :يعني ايه انت تقصد ايه يعني انت مش متجوز معقوله تكون متجوزتش يااكمل يعني انت متجوزتش يااكمل
أكمل :لاء ياميرا متجوزتش لاء اناوعدت قلبي انه عمره ماحيكون لحد غيرك وان لو مكنش لينا نصيب مع بعض فالدنيا انك تكوني من نصيبي في الآخرة
ميرا بدموع :طب وكان لزمته إيه اللي انت عملته فينا ده ليه بعدتنا عن بعض بالشكل ده ليه ليه فهمني
كل ده عشان كلمتين بينك وبين امي تعمل فية وفنفسك كده تضيع حبنا بالشكل ده يجيلك قلب اني اكون لحد غيرك ازاي فهمني
أكمل :انا عارف اني غلطت ياميرا غلطت لما اتنازلت عنك وانتي دنيتي كلها كرامتي انجرحت مانا جرحت قلبي بايدي ودست عليه
مامتك هانتني وصعبت علية نفسي وانجرحت مشاعري ادام الناس مانتي كل الناس
لو كان على اد الكلمتين اللي هي قالتهم صدقيني كان عندي استعداد اقف ادامها تاني وتالت ورابع ومستسلمش من أول مواجهه
لكن كنت حعمل ايه كان بأيدي إيه اعمله وانا شايف مستقبلي بيضيع وحلم ابويا وامي فية يتكسر بعترف اني خفت ايوة خفت بس كنت حعمل ايه مكنتش قادر أعمل غير اللي عملته
ميرا :انت بتتكلم عن إيه مستقبل ايه اللي كان حيضيع كل ده عشان الكلمتين اللي قالتهوملك ماما
أكمل :مكنوش مجرد كلمتين ياميرا ياريتها كانت جت على كده والله ماكنت سيبتك وكنت اتمسكت بيكي لاخر نفس لكن للأسف السيده الوالده راحت لعميد الكليه وقالتله اني بلعب بمشاعرك وبستغل نفوذ والدك فمصالح شخصيه لية وقالت كلام تاني مسئ، لية ولاخلاقي وهددت بانها حتقدم شكوى لرئيس جامعة اسكندريه وووزير التعليم العالي وانها عندها السلطه انها تمسح اسمي من على وش الأرض
عارفه ده لو كان حصل كان حيبقى معناه ايه كنت حترفد من كل الجامعات مش من جامعة اسكندريه بس
كنت حتفضح وافضح اهلي اللي تعبوا فتربيتي وكان كل املهم ان ابنهم يبقى دكتور فالجامعه كانت البعثه حتتسحب مني كان كل شئ، ضاع ومستقبلي ضاع
انا عمري ماحنسى وقت ما عميد الكليه اتكلم معايا بنفسه وصمم على اني لازم اسافر وبسرعه قللي انت مش اد الناس دي يااكمل مستقبلك حيضيع
كنتي عاوزاني اعمل ايه مقدرتش اعمل حاجه غير اني اكتبلك جواب اعتذرلك فيه واسيبهولك مع زميلي ايوة هربت ايوة سيبتك ايوة اتخليت عنك عارف وبعترف بده بس كان غصب عني والله غصب عني
شايف حياتي بتضيع حلم أهلي اللي تعبوا وشقيوا لحد ماوصلوني للي وصلتله بيتهد
أنا عشت سنين ربنا وحده العالم بية كنت بتعذب فيها ازاي كنت برفض مشاعر اي واحده تجاهي مكنتش بقدر انام غير وصورتك ادامي كنت دايما بحاول أعرف أخبارك واطمن عليكي لحد ماعرفت انك اتخطبتي لرجل أعمال واتجوز تيه دعتلك ان ربنا يسعدك لكن انا مقدرتش ياميرا مقدرتش اكون لغيرك مقدرتش أسمح لأي واحده في الدنيا تحتل قلبي غيرك
ميرا:انت بتقول ايه انت ايه الكلام اللي قلته ده ماما ماما عملت فيك كده ماما كانت عاوزة تضيع مستقبلك لا انا مش قادرة أصدق
أكمل :لا صدقي ياميرا هو ده اللي حصل واللي المفروض كنتي عرفتيه وقتها ولو مش مصدقاني اساليها ولو انكرت عميد الجامعه لسه موجود تقدري تروحي وتسأليه بنفسك وتعرفي كل الحقيقه
ميرا :ليه ياماما ليه تعملي فبنتك كده للدرجه دي هنت عليكي شفتي بنتك بتتعذب بالشكل ده وهنت عليكي
ده حرام ليه السنين دي تروح مننا فبعد وجفا ليه
ليه اكون لغيرك ليه وانا قلبي عمره ماحب حد غيرك انت
وانت انت ازاي بعد ماشفتني ورجعت ازاي هنت عليك متقوليش الحقيقه ازاي اهون عليك تسيبني أتألم وانت عارف حبي ليك اد إيه
ازاي ماتطلبش مني اننا ننسى اللي فات ونلحق العمر اللي فاضل ازاي يااكمل ازاي واللا السنين علمتك الجفا والقسوة
أكمل :لاء ياميرا لاء انا متكلمتش لأن الوضع زي ماهو ماتغيرش انا بشتغل عندك ياميرا يعني بردو انا مش من مستواكي
ميرا :مستوى ايه اللى بتتكلم عنه يااكمل لو انت مش من مستوايا انا مستعده اسيب كل حاجه وانزلك
قول انك مش عاوزني عشان كنت لغيرك صح مش هي دي الحقيقه مانت زي كل الرجاله اللي عايزة تكون رقم واحد فحياة مراته
اكمل :إيه اللي بتقوليه ده لاء مش حقيقي انا الكلام ده عمره ماجه للحظه واحده ميرا انتي ازاي يخطر ببالك حاجه زي دي ميرا انا بحبك لاء أنا مش بحبك انا بعشقك ياميرا انا مستعد دلوقتى احارب الدنيا كلها علشانك حتى لو حضيع عمري مش مستقبلي
ميرا ميرا ارجوكي سامحيني ميرا انتي لسه بتحبيني لسه عاوزاني واللا كرهتيني ياميرا
ميرا :كرهتك انا اكرهك يااكمل إزاي أقدر اكرهك وانتي حياتي كلها اكمل انا بحبك زي زمان واكتر يااكمل
انت بتجري فدمي انت أول واخر حب فحياتي
أكمل :خلاص يبقى كفايه علينا أوي لحد كده كفايه علينا الحرمان اللي عشناه عاوزين نلحق نعوض اللي فاتنا عاوزين ناسس حياتنا
ميرا :وانا موافقه موافقه يااكمل انا خلاص كبرت ومبقاش فيه حد ليه الحق يتدخل في حياتي
أكمل :وانا خلاص استحاله حسيبك تروحي مني تاني تسمحيلي اول مانرجع اسكندريه اجي تاني اتقدملك ياميرا
ميرا بفرحه:آه
لا يشعر أكمل بنفسه الا وهو يحملها ويلف بها في الغرفه وهما يضحكان بشده ثم ينزلها ويضع جبهته على جبهته ياااه وحشتينى اوي ياميرا ووحشتني أيامنا
ميرا :حنرجعها تاني يااكمل حنرجعها تاني ياحبيبي
❤️❤️❤️❤️❤️❤️❤️❤️
حمزة :هي دي كل المعلومات اللي عندك ياحازم
حازم :أيوة ياحمزة انا معرفش غير اللي حكتلك عنه واطمن أول ماحد من أهلك يظهر عيسى حيبلغني على طول
حمزة :يارب ياحازم يارب
لكن متعرفش حاجه عن جوازة ياسمين
حازم :قلتلك اللي عيسى قالهولي بس انا مستغرب أوي انا يوم ماكلمت حسين آخر مرة قاللي وقتها ان ياسمين حالتها صعبه أوي وانها طول اليوم قاعده قدام البحر مستنياك ترجع حتى لما الكل قال انك مت مع اللي كانوا معاك فالمركب هي ماصدقتش وكانت مصرة انك عايش يبقى ازاي تتجوز بالسرعه دي لا انا قلبي حاسس ان في حاجه غلط فالموضوع ده
حمزة :انا أهم حاجه دلوقتى عندي نرجع نتلم تاني
حازم:ان شاء الله يا حمزة انا لما رجعت وملقتش حد فيكم كنت حاسس ان روحي اتسحبت مني كنت حاسس اني تايه وضايع واهوه الحمد لله لقينا بعض وان شاء الله حنلاقي حسين وحنرجع لبعض تاني
حمزة :ان شاء الله يا حازم ان شاء الله
وحشتني أوي يا صاحبي حمد الله على السلامة
ينتهي اليوم ويعود إليها وهو لاينوى على خير
يدخل ويبحث عنها فيجدها في غرفة الصغيرة تلعب معها بالعابها
يحتضن الصغيرة ويطلب منها أن تخرج قليلا حتى يستطيع التحدث إليها بحريه
يقترب منها ونظرته لا تبشر بخير
ياسمين :ياما مالك في إيه انت عاوز مني إيه
حمزة :ليه لما سألتك عن حسين مقلتليش انه اتجوز خلود ليه
ياسمين :وانت إيه مشكلتك يتجوز خلود واللا غيرها انت مالك أصلا والا هو المفروض ياخد الإذن منك قبل مايتجوز
حمزة :ياسمين انتي عارفه قصدي كويس
ياسمين :لاء انا معرفش قصدك ولا أعرفك انت نفسك انت مين أصلا انت حمزة لا مش ممكن استحاله انت واحد تاني معرفهوش
حمزة :أنا فعلا واحد تاني متعرفيهوش انا نفسي مش عارف انا مين انا واحد حب ووفى بوعده وبعد كده اكتشف انه عاش أكبر كدبه فحياته
ياسمين :خليك كده عايش فاوهامك بس متبقاش تزعل بعد كده ومتبقاش تلوم حد غير نفسك
حمزة :حسين خد خلود وراحوا فين قوليلي ياياسمين ريحيني
ياسمين :اريحك وانت كنت ريحت مين عشان عاوزني اريحك روح دور عليهم بعيد عني انا معرفش عنهم حاجه انا أصلي رحت دورت على مصلحتي واتجوزت رجل أعمال وبصراحه حسيت انهم مبقوش من مستوايا فقطعت علاقتي بيهم
حمزة :بقى كده طب ماشي يا ياسمين خدي بالك انتي حسابك بالشكل ده بيزيد معايا
ياسمين :طب بمناسبة الحساب بقى حضرتك عاوزة مرتب الشهر واللا انت ناوي تشغلني سفلئه
ينطر إليها حمزة بغضب ويخرج ويغلق وراءه الباب بشده حتى انها تنتفض:ده شكله اتجنن ربنا يشفي
❤️❤️❤️❤️❤️❤️❤️
في المساء تتحدث إلى شخص ما :أيوة برافو عليك كده تمام أوي
الشخص :أوامرك ياهانم تحبي نكمل واللا كفايه عليه كده
هو دلوقتي عليه شيكات تخليه يقضي بقية حياته في السجن
تسمع صوته وهو يتحدث للخادمه:طيب اقفل دلوقتى وحكلمك بعدين
يدخل إليها وهو غاضب الوجه:مساء الخير يا شاهنده
شاهنده :مساء النور مالسه بدري
يامن :شاهنده بصي انا جاي على اخري ومش عاوز اسمع كلمه
شاهندا:براحتك ياحبيبي بس متبقاش ترجع تعيطلي وتقوللي الحقينى
يامن بغضب :ييه بصي انا مبحبش زن النسوان ده
شاهندا :نسوان انت اتجننت واللا إيه انت ازاي تتكلم معايا بالطريقه دي
يامن :انتي عاوزة تتخانقي صح وانا بقى مش فايقلك كفايه علية المصايب اللي انا فيها
شاهندا :والله ياحبيبي المصايب اللي انت فيها دي من عمايلك السوده واللي ان شاء الله حتجيب أجلك لعب وسكر وقمار واللا تكون فاكرتي نايمه على وداني ومش عارفه بتعمل ايه من ورايا
يامن :اعمل إيه ماهو من قرفي حعمل إيه يعني
ثم يغير نبرة صوته لكنها تفهم مغزاها جيداً : شاهندا
شاهندا :مفيش شاهندا خلاص اتصرف براحتك وريني شطارتك بقى ياجميل
يامن:متنسيش اننا فمركب واحده ولو وقعت حنقع سوا
شاهندا :لا ياحبيبي انت اللي حتغرق لوحدك عارف ليه لأنك غصب عنك حتبيعلي نصيبك في الشركه
يامن :انتي اتجننتي بتقولي إيه
شاهندا :لاء واضح انك انت اللي اتجننت وشرب الخمرة لحلستلك مخك ونسيت انك ماضي على نفسك شيكات توديك ورا الشمس
يامن :وانتي عرفتي منين
شاهندا :مش شغلك
يامن :لا شغلي ياشاهندا أيوة يبقى انتي اللي ورا كل المصايب اللي انا فيها ماهو مش معقوله كل الخساير اللي انا فيها دي صدفه انا كنت حاسس انك ورا كل ده بس كنت بكدب نفسي وبقول ازاي مش معقول تعملي فية كده ده انا جوزك
شاهندا :وانا مراتك مراتك يايامن اللي كل يوم تخونها مع واحده شكل واللا تكون فاكر اني مش عارفه فضايحك بقى انا شاهندا السمري اللي كبرات البلد كانوا يتمنوا منها اشارة تبقى سيرتي على كل لسان انا شاهندا يتقال علية اني مش مالية عين جوزي وبيخوني مع شوية زباله
روحلهم بقى ياحبيبي روحلهم وخليهم يردولك اللي دفعتهلهم ويرحموك من السجن اللي حيكون مصيرك ان شاء الله عن قريب
يامن :لا ده انا اقتلك مش يامن اللي يتعمل فيه كده
شاهندا :انت اللي عملت فنفسك مش أنا
انا فتحتلك أبواب الجنه وانت اللي قفلتها بايديك كنت مستعده اخليك من اكبر رجال الأعمال لكن انت زباله متستاهلش
يامن :شاهندا حبيبتي انا عارف اني مهونش عليكي تتخللي عني انتي عارفه ان دول نزوات مش اكتر لكن انتي مراتي حبيبتي بصي انا مستعد اعمل اي حاجه تطلبيها مني حبعد عن كل حاجه مضايقاكي مني بس ارجوكي الحقيني انا فعلا ممكن ادخل السجن
شاهندا : انت فعلا حتعمل اللي حطلبه منك بس في الوقت المناسب عن اذنك يا دنجوان
❤️❤️❤️❤️❤️❤️❤️❤️❤️
في اليوم التالي
تخرج من الجامعه بصحبة اصدقائها :ياللا بقى سلام أشوفكم بكرة
صديقتها:مش حتيجي تركبي معانا المترو
سحر :لا يااختي انا امبارح اتفعصت من الزحمه انا حروح ادورلي على ميكروباص أحسن ياللا سلام
تتجه نحو موقف الميكروباصات : يادي النيله إيه الزحمه دي كلها ده انا شكلي حبات هنا طب اجيب خيمه واقعد واللا اعمل ايه دلوقتى
تقف وفجأة يمر من أمامها فيحدث نفسه:هي ايوة هي سحر فينادي عليها:سامي تسمع اسم اخيها فتلتفت تلقائيا فتجده هو
ينزل من السيارةويتجه نحوها:ازيك ياسحر
سحر :اهلا يايحي عامل ايه
يحي :الحمد لله انتي واقفه هنا ليه
سحر :ابدا لقيت نفسي فاضيه قلت اجي اخد حمام شمس
أكيد يعني خارجه من الجامعه ومستنيه أركب زيي زي كل البؤساء دول
يحي :ههههههه انتي ملكيش حل
سحر :هههه عارفه وانت ايه اللي جايبك عندنا ايه اشتقت لأيام الجامعه واللا ايه
يحي :لاء ده طريقى أصلا وبعدي من هنا كتير بس اول مرة اخد بالي منك
ياللا تعالي اوصلك
سحر :توصلني توصلني فين ياكابتن
يحي:أوصلك البيت
سحر :لا يااخويا انا واقفه زي خلق الله مستنيه الفرج
يحي:يابنتي الدنيا زحمه وحتقفي كتير
سحىر:مش مهم انا واقفه هو انا يعني ورايا ايه عالاقل تكون ماما خلصت اللي وراها ومتطلبش مني حاجه
يحي : سحر انا زي سامي ومش حيحصل حاجه لو وصلتك واللا انتي معتبراني حد غريب
سحر :لا والله يايحي مش حينفع انا مش عاوزة مشاكل
يحي :مشاكل عشان حوصلك
سحر :ياعم انت فاكرنا ساكنين في جاردن سيتي احنا فالسيده زينب ده غير سامي اللي اصلآ ممكن يزعل مني لو عرف اني ركبت معاك
يحي :خلاص حنزلك بعيد شويه ومتقوليش ياستي اني وصلتك بس انتي والله صعبانه علية حتضيعي يابنتي فوسطهم حتتفعصي بحجمك ده
سحر :شوف انا فية كل العبر الا دي انا مش ممكن اقدر اخبي حاجه عن سمسمتي في ميكروباص داخل اهوه عن اذنك سلام ياكابتن
تجري وسط الناس وتدخل بينهم بعد مايكون شعرها اتبهدل وهدومها كمان وهو واقف مكانه مرضاش يتحرك غير بعد ماشافها جوة الميكروباص واتحرك كمان من الموقف وعلى اد مازعل انها رفضت تركب معاه على اد ماكان مبسوط بينه وبين نفسه انها عملت كده
❤️❤️❤️❤️❤️❤️❤️
هم الآن في طريقهم للعوده إلى الاسكندريه ولكن عودتهم غير ذهابهم تماما فالان يدهم ممسكه بيد بعضها فلقد تعاتبا واتفقا ان يبدا صفحه جديده ناصعة البياض نعم فلقد انتصر حبهما واعلنت قلوبهما عن وقف نزيفها وانها لن يتبقى بداخلها سوى نبضات تنطق عن الحب الساكن في اعماقهما
كانت الدنيا لا تسعهما من الفرحه أيعقل ان يجمعنا القدر بعد ماظننا الا ترجع القلوب وتلتقي اهو حلم ام حقيقة
ميرا :حقيقه يا أكمل وحتكون أجمل حقيقه في الدنيا كلها ومفيش قوة في الكون حتقدر تفرقنا بعد النهارده
أكمل :وانا استحاله حسيبك بعد مالقيتك
ميرا :حكلمك بالليل
أكمل :ان شاء الله لا إله إلا الله
ميرا:محمد رسول الله
بعد مرور القليل من الوقت تدخل المنزل فتجد أمها واختها جالسين:
مساء الخير
يردون عليها :مساء النور حمد الله على السلامة
ميرا :الله يسلمكم ماما بكرة ان شاء الله في عريس جاي يتقدملي
نهله :بجد الف مبروك يا حبيبتي اوعي تقولي انه صاحب الشركة اللي سافرتي عشان تقابليه
ميرا :شركة إيه ومصنع إيه بس ياماما هو حضرتك مفيش في دماغك غير اصحاب الشركات اخدنا ايه منهم مانا اهوه اتجورت صاحب شركه كانت ايه النتيجه مش اتطلقت مبسوطه حضرتك دلوقتى باللي حصللي
نهله :مش كل الناس زي بعضها ياميرا ومش كل اصحاب الشركات زي يامن مانتي عندك ملك بنت طنط فريده ماهي متجوزة رجل اعمال ومعيشها ملكه
ميرا :مامي انا اختارت خلاص واخدت قراري وبكره حييجي وحبلغ اونكل مأمون ونهال ييجوا ماهو أحق واحد يكون موجود معايا فموقف زي ده
نهله :طيب مانتي شاطرة اهوه ومحضرة كل حاجه ياترى بقى حضرتك حتعرفيني العريس واللا سر حربي
ميرا :أكمل ياماما فاكراه واللا نسيتيه
مريم بفرحه:بجد ألف مبروك يا قلبي
نهله :اسكتي انتي دلوقتي أكمل مين اللي بتتكلمي عنه
ميرا :أكمل ياماما اكمل دكتوري في الجامعه اللي حضرتك زمان طلبتي تقابليه وانا افتكرتك امي حبيبتي اللي حتقف جمبي وتحس ببنتها وتقدر مشاعرها هنتيه وجرحتيه وياريتك اكتفيتي بكده لاء كنتي عاوزة تضيعي مستقبله كمان فاكرة اللي حضرتك عملتيه واللا نسيتي ياماما
نهله :لا فاكرة ياميرا ومش حنكر اي حاجه عملتها ولو في اكتر من كده كمان كنت عملت
ميرا :ليه ليه حرام عليكي في ام تعمل كده فبنتها
نهله :ماهو انا عملت كده عشان انا ام زي ماقلتي ياميرا امك اللي عارفه مصلحتك اكتر منك امك اللي كانت عاوزة تجوزك شاب من سنك غني يعيشك فنفس المستوى اللي عشتي فيه كنتي عاوزاني
اعمل ايه وانا شايفاكي بتضيعي نفسك جايبالي واحد طمعان فيكي وففلوسك اكبر منك بسنين وتقوليلي عاوزة اتجوزه كان لازم اوقف المهزله دي بأي شكل
ميرا :وهنت عليكي تعملي فية كده وتشوفيني وانا بتعذب وساكته
نهله :ونسيتي ياميرا نسيتي واتجوزتي وعشتي حياتك ولولا ان يامن طلع زباله كنتي كملتي حياتك عادي صح واللا انا غلطانه
وجايالي دلوقتى بتقوليلي انه جاي تاني يتقدملك طب ايه رايك بقى اني رافضاه وعمري ماحوافق على جوازة زي دي
ميرا :ماما حضرتك مش واخده بالك اني كبرت خلاص اتجوزت واتطلقت يعني خلاص بقيت مسئوله عن نفسي كويس واقدر اخد قراري مش مستنياه من حد
ماما انا برغم اني قلبي واجعني منك ومن اللي عملتيه فية لكن للأسف مش حقدر اعمل حاجه لأن حضرتك امي
ماما انا حتجوز اكمل وحكمل معاه حياتي وحنعوض كل اللى فاتنا ومفيش قوة في الكون حتفرق بيننا أكمل جاي بكرة حضرتك عاوزة تكوني موجوده ده شئ يسعدني مش عاوزة براحتك ياماما فكل الأحوال مفيش حاجه حتغير رأيي عن اذنك
نهله :شفتي اختك يامريم وعمايلها
مريم :مامي عشان خاطري ميرا عمرها ماحبت ولا حتحب حد اد أكمل حرام تقفي فطريق سعادتهم
افرحيلها يامامي وخديها فحضنك وباركيلها من قلبك كفايه اوي عليهم السنين اللي ضاعت من عمرهم
الفلوس عمرها مابتسعد يامامي هي وسيله للسعاده ممكن
بنكمل بيها اللي ناقصنا عشان تكمل سعادتنا أكيد
لكن مبتصنعش سعاده من العدم يامامي
❤️❤️❤️❤️❤️❤️❤️❤️
في اليوم التالي حيث يدخل عليها وبيديه ريم
اديني جيبتهالك اهوه زي ماطلبتي
ميرا :أهلا ياريم ياحبيبتى
ريم :أهلا بيكي ياميرا والف مبروك ليكم ده احسن قرار اخدتوه ربنا يكمل فرحتكم على خير ان شاء الله
ميرا :حبيبتي ياريم ربنا يخليكي يارب ويارب اشوفك سعيده وفرحانه
ريم :انا اخدت نصيبي من الفرحه خلاص
ميرا :طب وولادك باحبيبتي مش من حقهم يعيشوا مع ام بتضحك وفرحانه حتى عشان نفسيتهم
ريم :غصب عني مش بايدي هو راح واخد كل حاجه حلوة معاه
ميرا :الحياه مبتقفش عند حد واحنا مؤمنين بالله ولازم ترضى بقضاء الله وقدره ولو الحزن بيرجع اللي راح كنا بكينا وحزنا عليهم العمر كله
ريم:ونعمه بالله انا عارفه والله بس الفراق صعب
ميرا :وعشان كده ربنا أنعم علينا بنعمة النسيان والحزن هو الحاجه الوحيده اللي بتبدأ كبيرة وبتصغر مع الوقت
واحنا بأيدينا نخرج من اللي احنا فيه
ريم :أعمل ايه
ميرا :تشتغلي ياريم
ريم :اشتغل لاء طبعا انا مقدرش اسيب ولادي ولا ثانيه
ميرا :وايه علاقة ده بالشغل انتي حتقضي في الشغل الوقت اللي حتكون فيه جنه في الحضانه واياد فى المدرسه لازم تخرجي وتقابلي ناس
ريم انتي لازم تفوقي والا حتضيعي نفسك وتضيعي معاكي أولادك
ريم :حفكر
ميرا :مفيش تفكير انتي من بكرة معانا واول حاجه حتعمليها حتسافري معايا القاهرة الاسبوع الجاي حتشاركي معايا في تنظيم حفله ففيلا حتقابلي ناس وتشوفي ناس وولادك اكيد حينبسطوا لما يلاقوا مامتهم بقت احسن
ريم :اللي عاوزه ربنا هو اللي حيكون
❤️❤️❤️❤️❤️❤️❤️
في المساء
إيه رايكم بقى حلوة
مريم :طول عمرك حلوة وزي القمر ياقلبي
نهال :ألف مبروك يا ميرو انا فرحانه أوي
ميرا :الله يبارك فيكي عقبالك يا رب يانونه
في الريسيبشن
عاجبك اللي بنت صاحبك بتعمله ده
مأمون :ميرا عاقله وعارفه هي بتعمل إيه
يسمعون طرق الباب فتذهب الخادمه لفتحه
يدخل أكمل ومعاه اخواته البنات ويرحب بيهم مأمون
طبعا مامتها كانت بتعاملهم بتكبر ومش طايقاهم لكن مأمون عاملهم بكل احترام
اما بقى فرحة اكمل وميرا ملهاش حدود
واتفقوا على أنهم حبتجوزوا بعد حفلة القاهرة